Ɔktoba

Tɛm dɛn de we yu kin fil se i nɔ izi fɔ obe? Kiŋ Devid bin de fil da we de, so i bin pre to Gɔd se: “Mek lɛ a rɛdi fɔ obe yu.” (Sam 51:12) Devid bin lɛk Jiova. Bɔt stil, tɛm dɛn bin de we i nɔ bin izi fɔ am fɔ obe, ɛn na di sem tin kin apin to wi. Wetin mek? Fɔs, dɛn bɔn wi wit abit dɛn we de mek wi nɔ obe. Sɛkɔn, Setan de tray fɔ mek wi nɔ obe Jiova jɔs lɛk am. (2 Kɔr. 11:3) Tɔd, wi de liv wit pipul dɛn we gɛt di spirit we de na di wɔl, dat na “di spirit we de wok insay pipul dɛn we nɔ de obe.” (Ɛfi. 2:2) So wi fɔ wok tranga wan fɔ fɛt agens di pafɛkt we wi nɔ pafɛkt ɛn di Dɛbul ɛn dis wɔl, so dat wi go obe Jiova ɛn di wan dɛn we i dɔn put oba wi. w23.10 6 ¶1

Wetin wi lan frɔm Jizɔs in mirekul we i bin tɔn wata to wayn? Wi lan se wi fɔ bi pɔsin we ɔmbul. Jizɔs nɔ bin bost bɔt di mirekul we i bin pafɔm; infakt, i nɔ ɛva bost bɔt ɛnitin we i bin du. Bifo dat, i bin ɔmbul insɛf, ɛn i bin de gi in Papa di glori ɛn prez ɔltɛm. (Jɔn 5:19, 30; 8:28) If wi falamakata Jizɔs bay we wi kɔntinyu fɔ put wisɛf dɔŋ, wi nɔ go bost bɔt ɛnitin we wi du. Lɛ wi nɔ bost bɔt wisɛf, bɔt lɛ wi bost bɔt wi wɔndaful Gɔd, bikɔs na big ɔnɔ wi gɛt fɔ sav am. (Jɛr. 9:23, 24) Lɛ wi gi am di prez we i fit fɔ gɛt. Wi nɔ go ɛva ebul du ɛni gud tin if Jiova nɔ ɛp wi. (1 Kɔr. 1:26-31) If wi na pɔsin we ɔmbul, wi nɔ fɔ se paopa dɛn fɔ prez wi fɔ di gud tin dɛn we wi du fɔ ɔda pipul dɛn. Wi satisfay bikɔs wi no se Jiova de si wi ɛn valyu wetin wi de du. (Luk bak Matyu 6:2-4; Ibru. 13:16) Fɔ tru, wi de mek Jiova gladi we wi falamakata Jizɔs fɔ bi pɔsin we ɔmbul.​—1 Pit. 5:6. w23.04 4 ¶9; 5 ¶11-12

Gɔd bin dayrɛkt apɔsul Pɔl fɔ ɛnkɔrej Kristian dɛn fɔ tink bɔt wetin ɔda pipul dɛn want. Aw wi go fala dis advays we wi de na mitin? Na we wi mɛmba se jɔs lɛk aw wi want fɔ kɔmɛnt na so ɔda pipul dɛn bak want fɔ kɔmɛnt. Tink bɔt am dis we. We yu de tɔk wit yu padi dɛn, fɔ se na yu wan kin tɔk te dɛn nɔ gɛt chans fɔ tɔk? Nɔ, nɔto so i bi. Yu kin want fɔ mek dɛnsɛf tɔk. Semweso, we wi de na mitin, wi want fɔ alaw bɔku pipul dɛn fɔ gi kɔmɛnt. Infakt, wan pan di bɛst we dɛn fɔ ɛnkɔrej wi brɔda ɛn sista dɛn na we wi gi dɛn chans fɔ tɔk bɔt dɛn fet. (1 Kɔr. 10:24) So na fɔ gi shɔt kɔmɛnt, so dat tɛm go de fɔ mek ɔda pipul dɛnsɛf gi kɔmɛnt. Ilɛksɛf yu de gi shɔt kɔmɛnt, avɔyd fɔ tɔk bɔt bɔku pɔynt dɛn. If yu tɔk bɔt ɔltin we de na di paregraf, bɛtɛ tin nɔ go de fɔ lɛ ɔda pipul dɛn tɔk bɔt. w23.04 22-23 ¶11-13

Wi nid fɔ mɛmba se i rili impɔtant fɔ kɔntinyu fɔ ɛp ɔda pipul dɛn, mɔ bay we wi de du di prichin wok. We wi de du wi prichin wok, wi nid fɔ rɛdi fɔ ajɔst. Di pipul dɛn we wi kin prich to gɛt difrɛn tin dɛn we dɛn biliv bɔt Gɔd, ɛn dɛn kɔmɔt na difrɛn ples dɛn ɛn gɛt difrɛn kɔlchɔ dɛn. Apɔsul Pɔl bin rɛdi fɔ ajɔst, ɛn wi kin lan frɔm in ɛgzampul. Jizɔs bin mek Pɔl bi “apɔsul we dɛn sɛn to ɔda neshɔn dɛn.” (Rom. 11:13) Dis bin mek Pɔl ebul fɔ prich to Ju dɛn, Grik dɛn, pipul dɛn we lan buk, vileja dɛn, pipul dɛn we de wok na gɔvmɛnt, ɛn kiŋ dɛn. Fɔ mek Pɔl ebul fɔ tɔch dɛn pipul ya dɛn at wit in mɛsej, i bin nid fɔ bi “ɔltin to ɔlkayn pipul dɛn.” (1 Kɔr. 9:19-22) I bin pe atɛnshɔn pan di kɔlchɔ, di say we dɛn kɔmɔt, ɛn wetin dɛn biliv, ɛn i bin ajɔst di we aw i bin de prich. Wisɛf go prich gud gud wan if wi de ajɔst ɛn tray fɔ tink bɔt di bɛst we aw wi go ebul fɔ ɛp pipul dɛn. w23.07 23 ¶11-12

Pɔsin we de tek tɛm du tin nɔto pɔsin we wik, bɔt na pɔsin we strɔng. Pɔsin nid fɔ gɛt trɛnk fɔ ebul kɔntrol insɛf we sɔntin apin to am we nɔ izi. Fɔ tek tɛm du tin na wan pan di kwaliti dɛn we “di spirit de mek pɔsin gɛt.” (Gal. 5:22, 23) Sɔntɛnde, dɛn bin de yuz di Grik wɔd fɔ “tek tɛm du tin” fɔ tɔk bɔt wayl ɔs we dɛn dɔn tem. Imajin wan wayl ɔs we dɛn dɔn tem we nɔ wayl igen. Pan ɔl we di ɔs nɔ wayl igen, i stil strɔng. As mɔtalman dɛn, aw wi go bi pɔsin we de tek tɛm du tin ɛn stil bi pɔsin we strɔng? Wi nɔ go ebul bi da kayn pɔsin de bay wisɛf. Wan men tin we go ɛp wi na we wi pre fɔ Gɔd in spirit ɛn beg am fɔ ɛp wi gɛt dis fayn kwaliti. Ɛgzampul dɛn de we de sho se dis na kwaliti we pɔsin ebul fɔ gɛt. Fɔ ɛgzampul, bɔku pan wi brɔda ɛn sista dɛn dɔn sho se dɛn na pipul dɛn we de tek tɛm du tin we ɔda pipul dɛn de tray fɔ agyu dɛn. Ɛn dis dɔn ɛp ɔda pipul dɛn fɔ tink di rayt we bɔt Jiova Witnɛs dɛn.​—2 Tim. 2:24, 25. w23.09 15 ¶3

Insay wan wɔndaful vishɔn, apɔsul Jɔn bin si 24 ɛlda dɛn na ɛvin de wɔship Jiova. Dɛn bin prez Gɔd ɛn gri se i fit fɔ gɛt “di glori, di ɔnɔ, ɛn di pawa.” (Rɛv. 4:10, 11.) Fetful enjɛl dɛn bak gɛt bɔku bɔku rizin dɛn fɔ prez ɛn ɔnɔ Jiova. Dɛn de na ɛvin wit am, ɛn dɛn dɔn kam fɔ no am gud gud wan. Dɛn de si in kwaliti dɛn pan di tin dɛn we i de du. As dɛn de tek tɛm wach di tin dɛn we Jiova de du, dat de muv dɛn fɔ prez am. (Job 38:4-7) Wisɛf fɔ prez Jiova we wi de pre to am. Wi kin du dat bay we wi de tɛl am wetin wi lɛk bɔt am ɛn di tin dɛn we i de du we wi gladi fɔ. As yu de rid ɛn stɔdi di Baybul, tray fɔ si di kwaliti dɛn we Jiova bin sho we yu rili lɛk. (Job 37:23; Rom. 11:33) Dɔn tɛl Jiova aw yu de fil bɔt dɛn kwaliti dɛn de. Wi kin prez Jiova bak fɔ we i de sɔpɔt wi ɛn wi brɔda ɛn sista dɛn we de ɔlsay na di wɔl.​—1 Sam. 2:1, 2. w23.05 3-4 ¶6-7

Frɔm 1919, Babilɔn di Gret nɔ bin ebul fɔ kɔntrol Gɔd in pipul dɛn igen. Insay da ia de, di “slev we fetful ɛn gɛt sɛns” bin bigin fɔ wok so dat pipul dɛn we rili want fɔ lan bɔt di trut go bigin fɔ travul na di “ Oli Rod.” (Mat. 24:45-47; Ayz. 35:8) Di wok we ɔda pipul dɛn bin dɔn du trade fɔ rɛdi di rod dɔn ɛp pipul dɛn fɔ bigin fɔ travul na da men rod de fɔ lan mɔ bɔt Jiova ɛn wetin i want. (Prɔv. 4:18) Dɛn go ebul fɔ liv dɛn layf bak di we aw Jiova want. Jiova nɔ de ɛkspɛkt in pipul dɛn fɔ mek ɔl di chenj dɛn we dɛn nid fɔ mek wantɛm wantɛm. Bɔt, smɔl smɔl i dɔn klin in pipul dɛn. Wi ɔl go gladi we wi ebul mek Gɔd gladi pan ɛnitin we wi de du! Dɛn nid fɔ kia fɔ ɛni rod ɔltɛm fɔ mek i nɔ pwɛl. Frɔm 1919, di wok na “di Oli Rod” dɔn de kɔntinyu so dat pipul dɛn go ebul fɔ kɔmɔt insay Babilɔn di Gret. w23.05 17 ¶15; 19 ¶16

Di Gɔvnin Bɔdi dɛnsɛf sɛf dɔn de tren pipul dɛn we de ɛp dɛn na di difrɛn kɔmiti dɛn we dɛn gɛt. Dɛn pipul dɛn ya we de ɛp di Gɔvnin Bɔdi de du bɔku wok dɛn rayt naw na di ɔganayzeshɔn fetful wan. Dɛn dɔn rɛdi fɔ kɔntinyu di wok fɔ kia fɔ Krays in ship dɛn. We di las anɔyntɛd dɛn go go na ɛvin di tɛm we da big big trɔbul go de dɔn, Jiova in pipul dɛn na di wɔl go kɔntinyu fɔ wɔship am fetful wan. Bikɔs na Jizɔs Krays go de oba Gɔd in pipul dɛn, dɛn nɔ go mis natin, ivin af sɛf. Fɔ tru, wi no se da tɛm de, di neshɔn dɛn we go kam togɛda, we di Baybul kɔl Gɔg we de na Megɔg go atak Gɔd in pipul dɛn. (Izi. 38:18-20) Bɔt da atak we dɛn go atak wi fɔ shɔt tɛm go fel, ɛn i nɔ go stɔp Gɔd in pipul dɛn fɔ wɔship Jiova. I go mɔs sev dɛn! Insay wan vishɔn, apɔsul Jɔn bin si “bɔku bɔku pipul dɛn” we na Krays in ɔda ship dɛn. Dɛn bin tɛl Jɔn se dis na di “bɔku bɔku pipul dɛn” we “kɔmɔt pan di big big trɔbul.” (Rɛv. 7:9, 14) So wi nɔ gɛt wan dawt se Jiova go sev dɛn! w24.02 5-6 ¶13-14

Wetin wi go du fɔ gɛt oli spirit? Wi fɔ pre fɔ am, stɔdi Gɔd in Wɔd, ɛn de na in ɔganayzeshɔn we i de yuz in spirit fɔ dayrɛkt. We wi du dat, i go ɛp wi fɔ gɛt “di kwaliti dɛn we di spirit de mek pɔsin gɛt.” (Gal. 5:22, 23) Gɔd de gi in oli spirit to di wan dɛn nɔmɔ we de tink bɔt wetin klin ɛn we de du tin dɛn we klin. I nɔ go kɔntinyu fɔ gi wi in spirit if wi kɔntinyu fɔ tink bɔt tin dɛn we nɔ klin ɛn du dɛn. (1 Tɛs. 4:7, 8) Wan ɔda tin bak we go mek wi kɔntinyu fɔ gɛt oli spirit na we wi “nɔ tek prɔfɛsi dɛn lɛk se na natin.” (1 Tɛs. 5:20) Insay dis vas, “prɔfɛsi dɛn” min mɛsej dɛn we Gɔd de yuz in oli spirit fɔ gi wi, dat na mɛsej dɛn we de tɔk bɔt Jiova in de ɛn aw di tɛm we wi de so naw ɔjɛnt. Wi nɔ de tink se Jiova in de, ɔ Amagɛdɔn, nɔ go apin di tɛm we wi de alayv. Bɔt wi de kɔntinyu fɔ tink bɔt am bay we wi kɔntinyu fɔ biev di rayt we ɛn bizi de “du tin dɛn we de sho se [wi] fetful to Gɔd.”​—2 Pit. 3:11, 12. w23.06 12 ¶13-14

Wetin wi fɔ du as Kristian dɛn if rud rud pikchɔ jɔs apia na wi ilɛktronik divays? Wi fɔ stɔp fɔ luk am wantɛm wantɛm. I go izi fɔ mek wi du dat if wi mɛmba se di tin we wi gɛt we valyu pas ɔl na wi padi biznɛs wit Jiova. Ivin sɔm pikchɔ dɛn we pipul dɛn kin tink se nɔto rud rud pikchɔ dɛn kin mek wi tink bɔt mami ɛn dadi biznɛs di we aw Gɔd nɔ want. Wetin mek wi fɔ avɔyd dɛn? Na bikɔs wi nɔ ivin want fɔ tink bɔt fɔ du mami ɛn dadi biznɛs di we aw Gɔd nɔ want. (Mat. 5:28, 29) Wan ɛlda we de na Tayland we nem Devid tɔk se: “A kin aks misɛf: ‘Pan ɔl we sɔntɛm di pikchɔ dɛn nɔto rud rud pikchɔ dɛn, fɔ se Jiova go gladi if a kɔntinyu fɔ wach dɛn?’ Dis kayn we aw a de tink kin ɛp mi fɔ du di rayt tin.” We wi de fred fɔ du ɛnitin we go mek Jiova nɔ gladi, dat go ɛp wi fɔ du di rayt tin. Fɔ fred Gɔd na di “fɔs tin we pɔsin fɔ du fɔ gɛt sɛns.” w23.06 23 ¶12-13

Sɔntɛm di “rum dɛm” go min wi kɔngrigeshɔn dɛn. Di tɛm fɔ da big big trɔbul, Jiova prɔmis se i go protɛkt wi if wi kɔntinyu fɔ gɛt wanwɔd wit wi brɔda ɛn sista dɛn. So wi fɔ wok tranga wan naw fɔ gɛt dip lɔv fɔ wi brɔda ɛn sista dɛn. Sɔntɛm na dat go mek wi sev! “Jiova in gret de” nɔ go izi fɔ ɔlman. (Zɛf. 1:14, 15) Tin nɔ go izi bak fɔ Jiova in pipul dɛn. Bɔt if wi rɛdi naw, wi nɔ go wɔri ɛn wi go ɛp ɔda pipul dɛn. Wi go bia ɛni prɔblɛm dɛn we wi gɛt. We wi brɔda ɛn sista dɛn de sɔfa, wi go du wi bɛst fɔ ɛp dɛn bay we wi go sho sɔri-at ɛn gi dɛn di tin dɛn we dɛn nid. Ɛn if wi lan fɔ sho se wi lɛk wi brɔda ɛn sista dɛn naw, wi go ebul sho se wi lɛk dɛn tumara bambay. Dɔn, Jiova go blɛs wi wit layf we go de sote go na wɔl usay dizasta ɛn trɔbul dɛn nɔ go de igen.​—Ayz. 65:17. w23.07 7 ¶16-17

Bɔku tɛm, we Gɔd in Wɔd de tɔk bɔt fetful man dɛn, i kin se na pipul dɛn we gɛt maynd. Bɔt ivin di wan dɛn we rili strɔng nɔ kin fil se dɛn strɔng ɔltɛm. Fɔ ɛgzampul, sɔntɛnde Kiŋ Devid bin de fil lɛk se “i strɔng lɛk mawntin” bɔt ɔda tɛm dɛn de we i bin de “fred.” (Sam 30:7) Pan ɔl we Samsin bin rili gɛt trɛnk bikɔs ɔf Gɔd in spirit, i bin no se if nɔto bin Gɔd, i bin fɔ “wik ɛn tan jɔs lɛk ɛni ɔda mɔtalman.” (Jɔj 14:5, 6; 16:17) Na Jiova gi dɛn fetful man dɛn ya di pawa we dɛn bin gɛt. Apɔsul Pɔl sɛf bin no se i nid trɛnk frɔm Jiova. (2 Kɔr. 12:9, 10.) Insɛf bin gɛt wɛlbɔdi prɔblɛm dɛn. (Gal. 4:13, 14) Tɛm dɛn de we i nɔ bin izi fɔ am fɔ du wetin rayt. (Rom. 7:18, 19) Ɔda tɛm dɛn de we i bin de fred bikɔs i nɔ bin no wetin gɛt fɔ apin to am. (2 Kɔr. 1:8, 9) Bɔt, we Pɔl bin wik, na da tɛm de i bin gɛt pawa. Aw? Jiova bin gi Pɔl di trɛnk we i bin nid fɔ bia in prɔblɛm dɛn. I bin mek Pɔl strɔng. w23.10 12 ¶1-2

If sɔntɛnde wi de fil se wi nɔ gɛt wan valyu, i go fayn fɔ mek wi mɛmba se na Jiova insɛf sɛf drɔ wi kam to am. (Jɔn 6:44) I de si di fayn kwaliti dɛn we wi gɛt we wi nɔ ebul fɔ si ɛn i no di kayn pɔsin we wi rili bi. (2 Kro. 6:30) So i go fayn fɔ mek wi biliv am we i se wi valyu to am. (1 Jɔn 3:19, 20) Bifo sɔm pan wi lan di trut, wi bin dɔn du tin dɛn we mek wi stil de fil gilti. (1 Pit. 4:3) Ivin fetful Kristian dɛn kin stil fɛt tranga wan nɔ fɔ du di bad tin dɛn we dɛn kin fil fɔ du. Sɔntɛnde yusɛf kin fil se Jiova nɔ go fɔgiv yu? If yu de fil da we de, yu go gɛt kɔrej we yu no se Jiova in fetful savant dɛn bin de fil da sem we de. Fɔ ɛgzampul, apɔsul Pɔl in at bin rili pwɛl we i tink bɔt di mistek dɛn we i bin dɔn mek. (Rom. 7:24) Na tru se Pɔl bin dɔn ripɛnt fɔ in sin dɛn ɛn baptayz. Bɔt stil, i bin kɔl insɛf “di wan we nɔ impɔtant bɛtɛ pan di apɔsul dɛn” ɛn di sina we “wɔs pas dɛn ɔl.”​—1 Kɔr. 15:9; 1 Tim. 1:15. w24.03 27 ¶5-6

Wan lɛsin we wi lan frɔm di bad tin dɛn we Kiŋ Jɛoash bin disayd fɔ du na dat wi nid fɔ pik padi dɛn we lɛk Jiova ɛn we want fɔ mek i gladi. Dɛn padi dɛn ya go ɛp wi fɔ du gud tin dɛn. Wi kin bi padi to di wan dɛn we big pas wi ɔ di wan dɛn we wi big pas. Mɛmba se Jɛoash in padi Jɛoayda bin big pas am fa fawe. We i kam to di padi dɛn we yu de pik, aks yusɛf: ‘Dɛn mi padi dɛn ya de ɛp mi fɔ gɛt fet pan Jiova mɔ ɛn mɔ? Dɛn de du dɛn bɛst fɔ obe am? Dɛn de ɛnkɔrej mi fɔ du di sem tin? Dɛn de tɔk bɔt Jiova ɛn di tin dɛn we dɛn de lan frɔm di Baybul? Dɛn de gi mi advays di tɛm we a rili nid am ɔ na jɔs wetin a want fɔ yɛri dɛn de tɛl mi?’ (Prɔv. 27:5, 6, 17) Fɔ tɔk tru, if yu padi dɛn nɔ lɛk Jiova, yu nɔ nid dɛn. Bɔt if yu gɛt padi dɛn we lɛk Jiova, dɛn go ɛp yu ɔltɛm!​—Prɔv. 13:20. w23.09 9-10 ¶6-7

Alfa na di fɔs lɛta na di Grik alfabɛt ɛn omɛga na di las wan. We Jiova yuz di wɔd dɛn “di Alfa ɛn di Omɛga,” i ɛp wi fɔ ɔndastand se we i bigin sɔntin, i go mɔs dɔn am. Afta we Jiova mek Adam ɛn Iv, I tɛl dɛn se: “Una bɔn pikin dɛn te una bɔku ɛn ful-ɔp di wɔl ɛn mek am fayn.” (Jɛn. 1:28) Da tɛm de, Jiova bin tɔk wetin i want fɔ di wɔl ɛn mɔtalman. Dat na bin di bigin, ɔ “Alfa.” We ɔltin we i want go dɔn bi ɛn Adam ɛn Iv dɛn pikin we de obe am go dɔn ful-ɔp di wɔl ɛn mek am Paradays, dat go bi di “Omɛga.” Afta Jiova dɔn fɔ mek di ‘ɛvin ɛn di wɔl ɛn ɔl wetin de insay de,’ i tɔk sɔntin we sho se wetin i want go mɔs apin ɛn natin nɔ go pwɛl am. I go du ɔl wetin i want fɔ mɔtalman ɛn di wɔl we di de we mek sɛvin go dɔn.​—Jɛn. 2:1-3. w23.11 5 ¶13-14

Di travul we di Ju dɛn bin gɛt fɔ travul frɔm Babilɔn to Izrɛl nɔ bin izi ɛn i go tek lɛk 4 mɔnt, bɔt Jiova bin prɔmis se i go pul ɛnitin we go ambɔg dɛn fɔ mek dɛn nɔ go bak na dɛn om-tɔŋ. Fetful Ju dɛn bin no se di bɛnifit we dɛn go gɛt we dɛn go bak na Izrɛl pas ɛni sakrifays we dɛn go mek. Di blɛsin we bin pas ɔl na dɛn wɔship. No tɛmpul nɔ bin de na Babilɔn usay dɛn bin de wɔship Jiova. No ɔlta nɔ bin de usay di Izrɛlayt dɛn bin de mek sakrifays dɛn akɔdin to di Lɔ we Gɔd Bin Gi Mozis, ɛn no arenjmɛnt nɔ bin de fɔ prist dɛn fɔ mek dɛn sakrifays dɛn de. Dɔn bak, di pipul dɛn we bin de wɔship lay lay gɔd dɛn bin bɔku pas di wan dɛn we bin rɛspɛkt Jiova in lɔ dɛn. So bɔku pan di Ju dɛn we bin lɛk Jiova bin rili want fɔ go bak na dɛn om-tɔŋ usay dɛn go ebul fɔ wɔship Jiova di rayt we. w23.05 14-15 ¶3-4

Wi nid Gɔd in oli spirit fɔ ɛp wi so dat wi go kɔntinyu fɔ biev “lɛk layt in pikin dɛn.” Wetin mek? Na bikɔs i nɔ izi fɔ mek wi kɔntinyu fɔ liv klin layf insay dis wɔl we bɔku pipul dɛn de liv fri layf. (1 Tɛs. 4:3-5, 7, 8) Oli spirit go ɛp wi fɔ mek wi avɔyd fɔ tink lɛk aw pipul dɛn na di wɔl de tink we nɔ de si tin dɛn di we aw Gɔd de si am. Oli spirit go ɛp wi bak fɔ du “ɔlkayn tin we gud, [ɛn] we rayt.” (Ɛfi. 5:9.) Wan tin we wi go du fɔ gɛt oli spirit na we wi de pre fɔ am. Jizɔs bin tɔk se Jiova go “gi oli spirit to di wan dɛn we de aks am.” (Lyuk 11:13) Wi de gɛt oli spirit bak we wi de prez Jiova togɛda na wi mitin dɛn. (Ɛfi. 5:19, 20) Gɔd in oli spirit go ɛp wi fɔ liv di kayn we we go mek Gɔd gladi. w24.03 23-24 ¶13-15

Yu want fɔ bi pɔsin we de rili pɛshɛnt? If na so i bi, na fɔ pre so fɔ mek yu bi da kayn pɔsin de. Fɔ bi pɔsin we de peshɛnt na wan pan di kwaliti dɛn we di spirit de gi. (Gal. 5:22, 23) So wi kin pre fɔ oli spirit ɛn beg Jiova fɔ ɛp wi fɔ gɛt in kwaliti dɛn. If sɔntin tɛst di peshɛnt we wi de peshɛnt, wi fɔ “kɔntinyu fɔ aks” fɔ oli spirit fɔ ɛp wi fɔ bi pɔsin we de peshɛnt. (Lyuk 11:13) Wi kin beg Jiova bak fɔ ɛp wi fɔ si tin di we aw i de si am. Dɔn afta wi dɔn pre, wi fɔ du ɔl wetin wi ebul fɔ bi pɔsin we de peshɛnt ɛvride. If wi kɔntinyu fɔ pre fɔ gɛt dis kwaliti ɛn tray fɔ sho am, Jiova go ɛp wi fɔ gɛt am ilɛk wi nɔto pɔsin we bin de peshɛnt. Ɔda tin we go ɛp yu na fɔ tink gud gud bɔt Baybul ɛgzampul dɛn bɔt pipul dɛn we bin de peshɛnt. We wi de tink gud gud wan bɔt dɛn ɛgzampul dɛn ya, wi go si eria dɛn we wi go sho se wi de peshɛnt. w23.08 22 ¶10-11

Jizɔs bin mek apɔsul Pita biliv se Jiova go sɔpɔt am. We Jizɔs bin gɛt layf bak, i bin pafɔm wan ɔda mirekul bay we i mek Pita ɛn in kɔmpin apɔsul dɛn kech bɔku fish. (Jɔn 21:4-6) Wan dawt nɔ de se dis mirekul bin mek Pita biliv se Jiova go ebul gi am di tin dɛn we i nid. Sɔntɛm, di apɔsul go dɔn mɛmba di wɔd dɛn we Jizɔs bin tɔk we i se Jiova go gi di wan dɛn we de ‘put di Kiŋdɔm fɔs’ di tin dɛn we dɛn nid. (Mat. 6:33) Ɔl dis bin ɛp Pita fɔ mek i lɛf in fishin wok ɛn put di prichin wok fɔs na in layf. I bin gɛt maynd fɔ prich di de fɔ Pɛntikɔst 33 afta Krays ɛn ɛp bɔku pipul dɛn fɔ lisin to di gud nyuz. (Akt 2:14, 37-41) Afta dat, i bin ɛp di Samɛritan dɛn ɛn di pipul dɛn we nɔto Ju fɔ lan bɔt Krays ɛn fala am. (Akt 8:14-17; 10:44-48) Fɔ tru, Jiova bin rili yuz Pita fɔ mek ɔlkayn pipul dɛn kam na di kɔngrigeshɔn. w23.09 20 ¶1; 23 ¶11

Lɛk tu ia afta di Babilonian dɛn bin dɔnawe wit Jerusɛlɛm, Kiŋ Nɛbyukadnɛza na Babilɔn bin gɛt wan bad drim bɔt wan big big imej. I bin trɛtin se i go kil ɔl in sɛnsman dɛn ɛn Daniɛl if dɛn nɔ ebul fɔ tɛl am wetin i dɔn drim ɛn wetin in drim min. (Dan. 2:3-5) Daniɛl bin nid fɔ du sɔntin kwik kwik wan, bikɔs if i nɔ du sɔntin, bɔku pipul dɛn go day. I “go insay to di kiŋ ɛn beg di kiŋ lɛ i gi am smɔl tɛm, so dat in go ebul fɔ sho di kiŋ wetin in drim min.” (Dan. 2:16) I bin nid fɔ gɛt maynd ɛn fet fɔ ebul fɔ du dat. Di Baybul nɔ tɔk se Daniɛl bin dɔn intaprit drim dɛn bifo dis tɛm. I bin aks in kɔmpin dɛn fɔ ‘beg Jiova we de na ɛvin lɛ i sɔri fɔ dɛn ɛn tɛl dɛn dis sikrit.’ (Dan. 2:18) Jiova bin ansa dɛn prea. Gɔd bin ɛp Daniɛl fɔ intaprit Nɛbyukadnɛza in drim. Daniɛl ɛn in padi dɛn nɔ bin day. w23.08 3 ¶4

Tink bɔt di bɛnifit dɛn we yu go gɛt if yu na pɔsin we de peshɛnt. We wi de peshɛnt, dat go mek wi gladi mɔ ɛn gɛt kolat. If wi na pɔsin we de peshɛnt, dat go mek wi gɛt wɛlbɔdi ɛn tink di rayt we. We wi de peshɛnt wit ɔda pipul dɛn, dat go mek wi gɛt tayt padi biznɛs wit dɛn. Wi kɔngrigeshɔn go gɛt wanwɔd mɔ ɛn mɔ. If pɔsin du tin we fɔ mek wi vɛks ɛn wi nɔ vɛks kwik, wi nɔ go mek di prɔblɛm wɔs. (Sam 37:8; Prɔv. 14:29) Bɔt wetin impɔtant pas ɔl na dat, wi de falamakata wi Papa we de na ɛvin ɛn dat go mek wi kam nia am mɔ ɛn mɔ. Fɔ bi pɔsin we de peshɛnt na fayn kwaliti ɛn i go bɛnifit wi ɔl! Pan ɔl we i nɔ izi fɔ bi pɔsin we de peshɛnt ɔltɛm, Jiova go ɛp wi fɔ kɔntinyu fɔ gɛt dis kwaliti. Ɛn as wi de peshɛnt wet fɔ di nyu wɔl, wi biliv se Jiova in yay de pan ɔl udat abop pan am; ɛn i de wach dɛn wan we de wet fɔ in lɔv we nɔ de chenj.’ (Sam 33:18) Lɛ wi ɔl mekɔp wi maynd fɔ kɔntinyu fɔ bi pɔsin we de peshɛnt. w23.08 22 ¶7; 25 ¶16-17

Jems bin tɔk se pɔsin go tɔk se i gɛt fet bɔt di tin dɛn we i de du de sho se i nɔ gɛt fet. (Jems 2:1-5, 9) Jems tɔk bak bɔt ‘pɔsin we si in brɔda ɔ sista we nɔ gɛt klos ɛn bɛtɛ tin fɔ it’ bɔt i nɔ ɛp am. Ilɛksɛf da pɔsin de se i gɛt fet, na fɔ natin i de tɔk am bikɔs di tin dɛn we i de du nɔ de sho se i gɛt fet. (Jems 2:14-16) Jems bin yuz Reab as gud ɛgzampul fɔ tɔk bɔt pɔsin we du tin dɛn we sho se i gɛt fet. (Jems 2:25, 26.) Reab bin dɔn yɛri bɔt Jiova ɛn i bin no se Jiova de sɔpɔt di Izrɛlayt dɛn. (Jɔs. 2:9-11) So i bin du tin dɛn we sho se i gɛt fet bay we i protɛkt tu Izrɛlayt man dɛn we dɛn layf bin de pan denja. Dis bin mek Gɔd si dis uman as pɔsin we de du wetin rayt jɔs lɛk Ebraam pan ɔl we i nɔ pafɛkt ɛn in nɔto Izrɛlayt. Di ɛgzampul we Reab sɛt ɛp wi fɔ no se i rili impɔtant fɔ du tin dɛn we de sho se wi gɛt fet. w23.12 5-6 ¶12-13

As Kristian dɛn, wi nɔ jɔs want fɔ ɔndastand di men tin dɛn we di Baybul de tich. Wi want fɔ lan “ivin di dip tin dɛn bɔt Gɔd,” we di oli spirit go ɛp wi fɔ lan. (1 Kɔr. 2:9, 10) Yu nɔ tink se i go fayn fɔ stat pasɔnal stɔdi projɛkt we go ɛp yu fɔ kam nia Jiova? Fɔ ɛgzampul, yu kin du risach bɔt aw Jiova sho se i lɛk in savant dɛn trade ɛn aw dat pruv se i lɛk yu bak. Yu kin stɔdi bak bɔt aw Jiova bin want di Izrɛlayt dɛn fɔ wɔship am ɛn kɔmpia dat to aw i want wi fɔ wɔship am tide. Ɔ sɔntɛm yu kin stɔdi gud gud wan bɔt prɔfɛsi dɛn we Jizɔs bin mek kam tru we i bin de na di wɔl. Yu go rili gladi we yu stɔdi dɛn tɔpik dɛn de, ɛn di Buk we De Ɛp Jiova Witnɛs dɛn fɔ No bɔt Sɔntin go ɛp yu fɔ stɔdi dɛn tɔpik dɛn de. We yu de stɔdi gud gud wan, dat go ɛp yu fɔ gɛt strɔng fet ɛn ɛp yu fɔ “no bɔt Gɔd.” Prɔv. 2:4, 5. w23.10 18-19 ¶3-5

Di wɔd we apɔsul Pita yuz fɔ “rili” min “fɔ strɛch.” Di sɛkɔn pat na di vas tɔk bɔt wetin wi go du we wi rili lɛk ɔda pipul dɛn. Da lɔv de go mek wi kɔba wi brɔda ɛn sista dɛn sin. Lɛ wi tɔk bɔt dis ɛgzampul. Imajin se yu gɛt tebul we gɛt bɔku sten ɔ krach krach. I pɔsibul se yu go tek tebul klos ɛn prɛd am na di wan ol tebul, nɔto jɔs di say dɛn we gɛt di krach krach ɔ sten. Semweso, if wi rili lɛk wi brɔda ɛn sista dɛn, wi go kɔba ɔ fɔgiv di “bɔku bɔku sin dɛn” we dɛn de kɔmit, nɔto jɔs wan ɔ tu pan dɛn mistek dɛn. Di lɛk we wi lɛk wi brɔda ɛn sista dɛn fɔ so strɔng dat wi fɔ ebul fɔgiv dɛn fɔ di mistek dɛn we dɛn de mek, ilɛk dat nɔ go izi fɔ wi. (Kol. 3:13.) We wi fɔgiv ɔda pipul dɛn, wi de sho se wi rili lɛk dɛn, ɛn wi want fɔ mek Jiova gladi. w23.11 11-12 ¶13-15

We Kiŋ Josaya bin ol 26 ia, i bin mek dɛn bigin mek di say dɛn we pwɛl na Jiova in tɛmpul. We dɛn bin de du da wok de, dɛn bin fɛn “Jiova in lɔ buk we I bin gi Mozis.” We di kiŋ yɛri wetin de na di buk, i nɔ westɛm fɔ mek chenj dɛn fɔ obe wetin rayt na di buk. (2 Kro. 34:14, 19-21.) Yu go lɛk fɔ rid di Baybul ɛvride? If yu de tray fɔ du dat, yu de ɛnjɔy fɔ du am? Yu de notis vas dɛn we go ɛp yu? We Josaya bin de arawnd 39 ia, i bin mek mistek we bin mek i lɔs in layf. Bifo i beg Jiova fɔ mek i gayd am, i bin abop pan insɛf. (2 Kro. 35:20-25) Wi kin lan lɛsin frɔm dat. Ilɛk ɔmɔs ia wi ol ɔ aw lɔng wi dɔn de stɔdi di Baybul, wi fɔ kɔntinyu fɔ luk fɔ Jiova. Dat min se wi fɔ de pre to am ɔltɛm fɔ mek i gayd wi. Wi fɔ de stɔdi in Wɔd ɛn lisin to di advays dɛn we machɔ Kristian dɛn de gi wi. Dat go mek wi nɔ mek siriɔs mistek dɛn, ɛn wetin impɔtant mɔ na dat wi go gɛt gladi-at.​—Jems 1:25. w23.09 12 ¶15-16

Di Baybul tɔk bɔt bɔku uman dɛn we bin lɛk Jiova ɛn sav am. Dɛn nɔ bin de “du tin pasmak” ɛn we dɛn bin “fetful pan ɔltin.” (1 Tim. 3:11) Pantap dat, sista dɛn go ebul fɛn machɔ Kristian uman dɛn insay dɛn yon kɔngrigeshɔn we dɛn kin falamakata. Yɔŋ sista dɛn, una sabi sista dɛn we na gud ɛgzampul we una kin falamakata? Tek tɛm wach di fayn kwaliti dɛn we dɛn gɛt, dɔn tink bɔt aw yusɛf go sho dɛn sem kwaliti dɛn de. Wan impɔtant kwaliti we machɔ sista fɔ gɛt na fɔ put insɛf dɔŋ. If uman de put insɛf dɔŋ, i go gɛt tayt padi biznɛs wit Jiova ɛn ɔda pipul dɛn. Fɔ ɛgzampul, uman we lɛk Jiova go put insɛf dɔŋ ɛn fala di advays we de na 1 Kɔrintians 11:3, usay Jiova tɔk bɔt udat I dɔn gi di wok fɔ de oba di kɔngrigeshɔn ɛn di famili. w23.12 18-19 ¶3-5

Jiova de ɛkspɛkt maredman fɔ lɛk in wɛf ɛn kia fɔ di tin dɛn we i nid, fɔ bi in tayt padi, ɛn fɔ ɛp am fɔ kɔntinyu fɔ de nia Jiova. Fɔ gɛt kwaliti dɛn lɛk fɔ tink gud gud wan, fɔ rɛspɛkt uman dɛn, ɛn fɔ bi pɔsin we ɔda pipul dɛn kin abop pan go ɛp yu fɔ bi gud maredman. Afta yu mared, sɔntɛm yu go bi papa. Wetin yu go ebul lan frɔm Jiova bɔt aw fɔ bi gud papa? (Ɛfi. 6:4) Jiova bin tɛl Jizɔs we na in Bɔypikin se i lɛk am ɛn gladi fɔ am usay ɔda pipul dɛn bin de. (Mat. 3:17) If yu bi papa, mek shɔ se yu ɛp yu pikin dɛn fɔ no ɔltɛm se yu lɛk dɛn. Tɛl dɛn tɛnki fɔ di gud tin dɛn we dɛn de du. Papa dɛn we de falamakata Jiova in ɛgzampul de ɛp dɛn pikin dɛn fɔ bi machɔ Kristian man ɛn uman dɛn. Yu go ebul fɔ rɛdi naw fɔ bi gud papa bay we yu de sho se yu lɛk ɛn kia fɔ ɔda pipul dɛn na yu famili ɛn na di kɔngrigeshɔn, ɛn we yu de tɛl dɛn se yu lɛk ɛn valyu dɛn.​—Jɔn 15:9. w23.12 28-29 ¶17-18

Pan ɔl we wi na Jiova in fetful savant dɛn, wi kin stil gɛt prɔblɛm dɛn, ɛn wi kin sik jɔs lɛk ɔda pipul dɛn. Dɔn bak, di wan dɛn we et Gɔd in pipul dɛn go de agens wi ɔ dɛn go mek wi sɔfa. Pan ɔl we Jiova nɔ de protɛkt wi frɔm dɛn prɔblɛm dɛn de, i prɔmis se i go ɛp wi. (Ayz. 41:10) Wit Jiova in ɛp, wi go kɔntinyu fɔ gɛt gladi-at, disayd fɔ du di rayt tin dɛn, ɛn kɔntinyu fɔ de biɛn am ilɛk aw tin tranga fɔ wi. Jiova prɔmis fɔ gi wi wetin di Baybul kɔl “di pis we Gɔd de gi.” (Fil. 4:6, 7.) Dis min di kolat we wi kin gɛt bikɔs wi gɛt tayt padi biznɛs wit am. Dis pis we “mɔtalman nɔ ebul ɔndastand” wɔndaful pas ɛnitin we wi ebul fɔ imajin. Fɔ ɛgzampul, yu dɔn ɛva pre tranga wan to Jiova, ɛn afta yu dɔn fɔ pre yu sɔprayz bikɔs yu at rili kol? Yu bin fil da we de bikɔs yu bin gɛt “di pis we Gɔd de gi.” w24.01 20 ¶2; 21 ¶4

Na bikɔs fetful pipul dɛn lɛk Gɔd, na dat mek dɛn de prez in nem wit ɔl dɛn at. Devid bin no se fɔ prez Jiova in nem min se na Jiova insɛf sɛf wi de prez. We wi yɛri Jiova in nem, i de mek wi tink bɔt di kayn pɔsin we i bi, wi kin tink bɔt ɔl in fayn fayn kwaliti dɛn ɛn di wɔndaful tin dɛn we i de du. Devid bin want fɔ tek in Papa in nem as sɔntin we oli ɛn fɔ prez am. I bin want fɔ du dat wit “ɔltin” we de insay am, dat na wit ɔl in at. Semweso, di Livayt dɛn bin de bifo fɔ prez Jiova. Dɛn bin put dɛnsɛf dɔŋ ɛn gri se dɛn wɔd dɛn nɔ go ɛva du fɔ prez Jiova in oli nem di we aw i rili fit fɔ mek wi prez am. (Nɛi. 9:5) Wan dawt nɔ de se dis kayn we aw dɛn put dɛnsɛf dɔŋ fɔ prez Jiova wit ɔl dɛn at, bin mek Jiova gladi. w24.02 9 ¶6

Jiova nɔ go si yu as pɔsin we dɔn fel bikɔs yu nɔ ebul fɔ rich yu gol. (2 Kɔr. 8:12) Lan frɔm di tɛm dɛn we sɔntin apin we mek yu nɔ ebul rich yu gol. Kɔntinyu fɔ tink bɔt di tin dɛn we yu ɔlrɛdi dɔn du. Di Baybul tɔk se “Gɔd nɔ de du wetin nɔ rayt, so i nɔ go fɔgɛt yu wok.” (Ibru. 6:10) So yu bak nɔ fɔ fɔgɛt wetin yu dɔn du. Tink bɔt wetin yu ɔlrɛdi dɔn du. I kin bi di tayt padi biznɛs we yu dɔn gɛt wit Jiova, di prich we yu prich to ɔda pipul dɛn bɔt am, ɔ di baptayz we yu dɔn baptayz. Jɔs lɛk aw yu bin go bifo ɛn rich spirichwal gol dɛn trade, na so yu go ebul kɔntinyu fɔ go bifo pan di gol we yu dɔn sɛt naw. Wit Jiova in ɛp, yu go ebul fɔ rich yu gol. As yu de kɔntinyu fɔ wok tranga wan fɔ rich yu gol, tray ɔltɛm fɔ si aw Jiova de ɛp yu ɛn dat go mek yu gladi as yu de tray fɔ rich yu gol. (2 Kɔr. 4:7) If yu nɔ giv-ɔp, yu go gɛt bɔku bɔku blɛsin dɛn.​—Gal. 6:9. w23.05 31 ¶16-18

Jiova de luk fɔ we dɛn fɔ sho in pipul dɛn se i lɛk dɛn ɛn i gladi fɔ dɛn. Di Baybul tɔk bɔt tu tɛm we I tɛl Jizɔs se in na In Bɔypikin we I rili lɛk ɛn gladi fɔ. (Mat. 3:17; 17:5) Yu go lɛk fɔ yɛri we Jiova de tɛl yu se i gladi fɔ yu? Jiova nɔ de tɔk to wi frɔm ɛvin, bɔt i de yuz in Wɔd di Baybul fɔ tɔk to wi. Wi go ebul fɔ yɛri Jiova in vɔys we i de tɛl wi se i gladi fɔ wi we wi de rid Jizɔs in wɔd dɛn we de insay di Gɔspɛl dɛn. Jizɔs bin sho pafɛkt wan di kayn pɔsin we in Papa bi. So we wi rid bɔt aw Jizɔs bin sho in fetful disaypul dɛn we nɔ bin pafɛkt se i gladi fɔ dɛn, wi go ebul fɔ imajin we Jiova de tɛl wi dɛn wɔd dɛn de. (Jɔn 15:9, 15) We wi gɛt prɔblɛm dɛn dat nɔ min se Jiova nɔ gladi fɔ wi. Bɔt dɛn de gi wi chans fɔ sho se wi rili lɛk Gɔd ɛn wi abop pan am.​—Jems 1:12. w24.03 28 ¶10-11