Nɔ Westɛm fɔ Go to di Pɔsin

Frɔm di tɛm we dɛn chenj di we aw wi wɛbsayt bin de, mɔ pipul dɛn dɔn de go na di say usay dɛn kin aks fɔ mek Jiova Witnɛs dɛn we de na dɛn eria kam stɔdi dɛn di Baybul. Dɔn frɔm di tɛm we pɔblik prichin stat, bɔku ɔda wan dɛn dɔn aks fɔ mek dɛn stɔdi dɛn di Baybul. Di branch ɔfis kin arenj dɛn mɛsej ya ɛn sɛn dɛn kwik kwik wan. Fɔ ɛgzampul, if na jw.org di pɔsin aks fɔ Baybul stɔdi, di branch ɔfis kin sɛn mɛsej to di ɛlda dɛn we de na di eria usay di pɔsin we want fɔ stɔdi de, afta tu dez. Ripɔt dɛn dɔn sho se i kin tek sɔm tɛm dɛn nɔ go to sɔm pipul dɛn we bin dɔn aks fɔ Baybul stɔdi. Wetin wi fɔ du fɔ ɛp dɛn pipul ya so dat wetin dɛn dɔn lan nɔ go kɔmɔt na dɛn at?—Mak 4:14, 15.

If di pɔsin we want fɔ no mɔ nɔ de na di eria usay una kɔngrigeshɔn fɔ prich, wantɛm wantɛm na fɔ fil wan pepa we dɛn kɔl Please Follow Up (S-43) fɔm ɛn gi am to di sɛktri na yu kɔngrigeshɔn di nɛks tɛm we una gɛt mitin. Insay wan ɔ tu dez, di sɛktri fɔ yuz di say na jw.org we de fɔ di kɔngrigeshɔn, fɔ sɛn di pɔsin in nem ɛn usay i de to di kɔngrigeshɔn we de prich na da eria ɔ to di branch ɔfis. Ɛlda dɛn fɔ de chɛk na di wɛbsayt fast fast. If dɛn sɛn to dɛn se pɔsin de na di eria usay dɛn kɔngrigeshɔn fɔ prich we want fɔ no mɔ, dɛn nɔ fɔ westɛm fɔ go de. If dɛn tɛl ɛni pɔblisha fɔ go de, i fɔ mek shɔ se i go de kwik. If di pɔsin nɔ de, rayt smɔl tin bɔt wetin mek yu kam ɛn insay de i go fayn fɔ rayt yu nem, yu adrɛs ɔ yu fon nɔmba ɛn lɛf am.