Yuz jw.org we Yu De Prich—“Bi Jiova in Padi”

Wan pat de na jw.org we gɛt di taytul “Bible Teachings.” I gɛt pat we de fɔ pikin dɛn. In taytul na “Bi Jiova in Padi.” I gɛt siŋ dɛn, fim dɛn, ɛn tin dɛn fɔ du. Yu dɔn yuz am we yu de prich? If yu de stɔdi di Baybul wit mama ɔ papa we gɛt smɔl pikin dɛn, i go fayn lɛ yu sho am! Dis go mek i want fɔ lan mɔ bɔt ɔda tin dɛn we de na wi Wɛbsayt.

We wi bin de gi di Nyus bɔt Gɔd in Kiŋdɔm No. 38, wan brɔda mit wan uman we bigin fɔ rid di trakt wantɛm wantɛm. Di uman bin gɛt smɔl smɔl pikin dɛn we bin rili want fɔ no mɔ bɔt di trakt. Di brɔda tɔk smɔl bɔt wetin de na di trakt ɛn sho am wi Wɛbsayt in adrɛs we de biɛn di trakt. Bikɔs di uman bin rili want fɔ no mɔ, di brɔda bin yuz in fon fɔ ple wan pan Kelɛb in fim dɛn fɔ in ɛn in pikin dɛn.

Wan sista tɛl in wokmet we gɛt smɔl pikin dɛn bɔt wi Wɛbsayt ɛn ɔl di tin dɛn we de de we de tɔk bɔt famili. Di uman ɛn in pikin dɛn go na wi Wɛbsayt we na jw.org. Leta i tɛl di sista se we in pikin dɛn de ple, dɛn bin de siŋ “Preach the Word” we na wan pan di siŋ dɛn frɔm “Bi Jiova in Padi.”

I go fayn fɔ sabi yuz dis say we de na jw.org, ɛn fɔ dawnlod wan pan di fim dɛn, siŋ dɛn, ɔ di tin dɛn fɔ du na yu fon. Datɛnde, yu kin yuz dis say na jw.org fɔ prich. Na fayn tin we go ɛp wi fɔ wok fɔ di Masta!—Akt 20:19.