Mitin fɔ Fil Savis De Ɛp Wi fɔ Prich Fayn

1. Wetin mek wi kin ol mitin fɔ fil savis?

¹ Wan tɛm Jizɔs bin gɛt mitin wit 70 pan in disaypul dɛn bifo dɛn go prich. (Lyuk 10:1-11) I bin ɛnkɔrej dɛn bay we i mɛmba dɛn se nɔto bay dɛnsɛf dɛn de go prich, ɛn na Jiova we “na di Masta” na in sɛn dɛn fɔ go prich. I bin gi dɛn advays dɛn fɔ mek dɛn rɛdi fɔ di wok, ɛn i ɔganayz dɛn “tu tu.” Tide, di mitin we wi de gɛt bifo wi go prich de du di sem tin, dat na fɔ ɛnkɔrej wi, ɛp wi, ɛn ɔganayz wi.

2. Aw lɔng mitin fɔ fil savis fɔ tek?

² Rayt naw, na 10 to 15 minit wi kin yuz fɔ du mitin fɔ fil savis. Na insay da tɛm de di wan we de kɔndɔkt kin ɔganayz di grup, sho usay dɛn fɔ prich, ɛn pre. Dɛn dɔn chenj aw mitin fɔ fil savis fɔ de naw. Frɔm Epril, na fayv to sɛvin minit wi fɔ yuz fɔ du mitin fɔ fil savis. Bɔt if di mitin fɔ fil savis de afta ɛni mitin, i fɔ shɔt pas dat, bikɔs di wan dɛn we go atɛnd di mitin fɔ fil savis jɔs dɔn fɔ tɔk mɔ bɔt di Baybul. We yu tek smɔl tɛm fɔ kɔndɔkt di mitin fɔ fil savis, dat go mek ɔlman ebul fɔ spɛn mɔ tɛm fɔ prich. Dɔn, if payɔnia dɛn ɔ pɔblisha dɛn bin dɔn bigin prich bifo di mitin fɔ fil savis, na smɔl tɛm nɔmɔ dɛn go nid fɔ stɔp fɔ prich.

3. Aw fɔ arenj mitin fɔ fil savis so dat di pɔblisha dɛn go rili bɛnifit?

³ Di ɛlda dɛn fɔ arenj di mitin fɔ fil savis so dat, di pɔblisha dɛn go rili bɛnifit. Na bɔku kɔngrigeshɔn dɛn, i kin bɛtɛ fɔ lɛ fil savis grup dɛn mit fɔ fil savis fɔ dɛnsɛf pas fɔ lɛ ɔl di grup dɛn mit togɛda na wan ples. Dis kin mek am izi fɔ mek di pɔblisha dɛn go di mitin fɔ fil savis ɛn go na di say we dɛn fɔ prich. I go izi fɔ ɔganayz di grup ɛn di grup ovasia go ebul pe mɔ atɛnshɔn to di wan dɛn we de na in grup. Di ɛlda dɛn fɔ tink bɔt di tin dɛn we de apin na di say we di kɔngrigeshɔn de prich ɛn tray fɔ no wetin na di bɛst tin fɔ du. Bifo di mitin fɔ fil savis ɛnd wit shɔt prea, ɔl di pɔblisha dɛn fɔ no usay fɔ prich ɛn udat dɛn de prich wit.

4. Wetin mek wi nɔ fɔ tink se mitin fɔ fil savis nɔ impɔtant lɛk di ɔda mitin dɛn?

⁴ Mitin fɔ Fil Savis Impɔtant Lɛk Ɔl di Ɔda Mitin Dɛn: Bikɔs mitin fɔ fil savis de fɔ bɛnifit di wan dɛn we de go prich, nɔto ɔlman na di kɔngrigeshɔn go de de. Bɔt dat nɔ min se wi fɔ tek am as mitin we nɔ impɔtant lɛk di ɔda mitin dɛn we wi kin gɛt. Lɛk ɔl di ɔda mitin dɛn we wi kin gɛt, Jiova de yuz mitin fɔ fil savis fɔ ɛp fɔ ɛnkɔrej wisɛf ɛn fɔ du tin we rayt. (Ibru 10:24, 25) So di wan we de kɔndɔkt mitin fɔ fil savis fɔ pripia fayn so dat di tin dɛn we dɛn go tɔk bɔt go briŋ prez to Jiova ɛn bɛnifit di pɔblisha dɛn. If una kin ol mitin fɔ fil savis na di say usay yu de, pɔblisha dɛn we de go prich fɔ rili tray fɔ atɛnd di mitin fɔ fil savis.

5. (a) Us wok di savis ovasia gɛt we i de arenj mitin fɔ fil savis? (b) Aw sista fɔ kɔndɔkt mitin fɔ fil savis?

⁵ Di Wan we De Kɔndɔkt fɔ Pripia: Fɔ mek pɔsin go pripia fayn fɔ ɛni pat we i gɛt na di mitin, dɛn fɔ tɛl am bɔt di pat we i fɔ du, bifo tɛm. Na di sem we i fɔ bi we i kam pan mitin fɔ fil savis. We fil savis grup dɛn mit fɔ fil savis fɔ dɛnsɛf, na di grup ovasia ɔ di wan we de ɛp am, fɔ kɔndɔkt di mitin fɔ fil savis. Bɔt if di wan ol kɔngrigeshɔn jɔyn fɔ mitin fɔ fil savis, na di savis ovasia go pik pɔsin we go kɔndɔkt di mitin fɔ fil savis. Sɔm savis ovasia dɛn kin mek list usay dɛn kin rayt udat fɔ kɔndɔkt ɛn usay dɛn de mit fɔ fil savis. We dɛn mek di list dɔn, dɛn kin gi am to di wan dɛn we fɔ kɔndɔkt ɛn put wan kɔpi na di notis bɔd. Di savis ovasia fɔ tink gud wan we i de pik di wan dɛn we fɔ kɔndɔkt mitin fɔ fil savis. I fɔ mɛmba se fɔ mek mitin fɔ fil savis go bɛnifit ɔlman, di pɔsin we de kɔndɔkt fɔ sabi tich ɛn ɔganayz gud gud wan. If no ɛlda, ministerial savant, ɔ brɔda we fit nɔ de, di savis ovasia fɔ pik sista we baptayz ɛn we fit fɔ kɔndɔkt mitin fɔ fil savis.—Rid di atikul we nem “If Sista De Kɔndɔkt Mitin fɔ Fil Savis, Wetin I Fɔ Du?”

6. Wetin mek i impɔtant fɔ mek di pɔsin we de kɔndɔkt di mitin fɔ fil savis pripia fayn?

⁶ We wi kin gɛt pat na di Tiokratik Ministri Skul ɔ di Savis Mitin, wi kin tek am siriɔs ɛn pripia fayn fɔ di pat. Na wan wan pipul dɛn kin wet te di tɛm we dɛn de go mitin bifo dɛn bigin tink bɔt wetin fɔ tɔk. So di wan we de kɔndɔkt mitin fɔ fil savis fɔ tek am siriɔs ɛn pripia fayn wan. Naw we di tɛm fɔ di mitin fɔ fil savis go ridyus, i rili impɔtant fɔ lɛ di wan we de kɔndɔkt pripia fayn so dat ɔlman go bɛnifit ɛn di mitin go dɔn di rayt tɛm. Fɔ pripia fayn min se di pɔsin we de kɔndɔkt di mitin fɔ fil savis fɔ sabi di say fɔ prich bifo tɛm.

7. Wetin na sɔm tin dɛn we di wan we de kɔndɔkt fɔ tɔk bɔt?

⁷ Wetin fɔ Tɔk Bɔt? Bikɔs nɔto di sem tin kin apin na difrɛn say dɛn we wi kin prich, di slev we fetful nɔ sho wan patikyula tin fɔ tɔk we pɔsin de kɔndɔkt mitin fɔ fil savis. Di bɔks we de na pej 6 sho sɔm tin dɛn we pɔsin kin tɔk bɔt. I gɛt di taytul “Una Kin Tɔk bɔt Dɛn Tin Ya we Una De Du Mitin fɔ Fil Savis.” Bɔku tɛm di wan we de kɔndɔkt ɛn di wan dɛn we kam di mitin fɔ fil savis kin tɔk bɔt di tɔpik togɛda. Sɔntɛnde, di mitin fɔ fil savis go gɛt pat we tu pɔblisha dɛn go sho aw fɔ du wetin dɛn de tɔk bɔt ɔ dɛn go tɔk bɔt wan pan dɛn shɔt fim dɛn we de na jw.org. We di wan we de kɔndɔkt di mitin fɔ fil savis de pripia, i fɔ tink bɔt wetin go ɛnkɔrej ɛn ɛp di pɔblisha dɛn we de go prich da de de.

8. Wetin una kin tɔk bɔt we go bɛnifit ɔlman we kam mitin fɔ fil savis Satide ɛn Sɔnde?

⁸ Fɔ ɛgzampul, bɔku pɔblisha dɛn kin lɛk fɔ gi Di Wachtawa ɛn Awake! magazin, dɛn Satide dɛn. Bɔku pɔblisha dɛn we de go fil savis Satide nɔ kin go fil savis insay di wik, so i nɔ kin izi fɔ mek dɛn mɛmba aw fɔ gi di magazin dɛn di we aw dɛn bin dɔn praktis we dɛn bin de du Famili Wɔship. So ɔlman go bɛnifit if di wan we de kɔndɔkt tɔk smɔl bɔt wan pan di ɛgzampul dɛn we de biɛn Wi Kiŋdɔm Ministri. Ɔda tin dɛn we una go tɔk bɔt na aw fɔ yuz sɔm tin dɛn we dɛn tɔk na nyus, tin dɛn we de apin, ɔ ɔlide dɛn, fɔ ebul prich wit wi magazin dɛn ɔ aw fɔ aks kwɛstyɔn we una go tɔk bɔt we yu go bak to di pɔsin if di pɔsin gri fɔ tek di magazin. If sɔm pan di wan dɛn we kam mitin fɔ fil savis dɔn bigin yuz wan patikyula magazin, di wan we de kɔndɔkt kin aks dɛn fɔ tɔk bɔt sɔm tin dɛn we go ɛp di ɔda poblisha fɔ gi di magazin fayn ɔ fɔ mek dɛn tɔk bɔt fayn ɛkspiriɛns dɛn we dɛn dɔn gɛt. If na Sɔnde, di wan we de kɔndɔkt kin du di sem tin we i de tɔk bɔt wetin fɔ prich wit, fɔ di mɔnt. Dɛn kin yuz di buk dɛn we wi de stɔdi pɔsin wit, lɛk di Gud Nyus buk, di Lisin to Gɔd buk, ɛn di Baybul Tich buk fɔ prich ɛni de, so di wan we de kɔndɔkt kin tɔk smɔl bɔt aw fɔ prich wit ɛni wan pan dɛn na di mitin fɔ fil savis.

9. Wetin una fɔ tɔk bɔt we una de du spɛshal prichin insay di wikɛnd?

⁹ If di kɔngrigeshɔn de du spɛshal prichin insay di wikɛnd, di wan we de kɔndɔkt fɔ tɔk bɔt aw fɔ gi di nyu magazin dɛn ɛn di inviteshɔn ɔ trakt, ɔ i kin tɔk bɔt wetin fɔ du if pɔsin sho se i want fɔ no mɔ. Dɛn kin tɔk bak bɔt di fayn ɛkspiriɛns dɛn we de sho wetin mek spɛshal prichin rili impɔtant.

10, 11. Wetin mek i impɔtant fɔ mek pɔblisha dɛn pripia so dat di mitin fɔ fil savis go kɔmɔt fayn?

¹⁰ Wetin di Pɔblisha dɛn fɔ Du fɔ Rɛdi? Pɔblisha dɛnsɛf gɛt sɔntin fɔ du so dat di mitin fɔ fil savis go kɔmɔt fayn. We dɛn praktis wetin dɛn fɔ go prich we dɛn de du famili wɔship, dat go mek dɛn gɛt sɔntin fɔ tɔk wit ɔda pɔblisha dɛn. Fɔ rɛdi fayn min se dɛn fɔ dɔn tek magazin dɛn bifo dɛn go di mitin fɔ fil savis so dat ɔlman go go na di say fɔ prich wantɛm wantɛm.

¹¹ I impɔtant fɔ tray fɔ kam kwik bifo di mitin fɔ fil savis bigin. Wi kin tray fɔ kam kwik fɔ ɔl di mitin dɛn we wi kin gɛt. We wi rili tray fɔ kam kwik fɔ di mitin fɔ fil savis, wi nɔ go ambɔg di ɔda pɔblisha dɛn. Aw dat kin bi? Di brɔda we de kɔndɔkt kin tink bɔt sɔm tin dɛn bifo i ɔganayz di grup. If di pɔblisha dɛn nɔ bɔku, di wan we de kɔndɔkt kin disayd fɔ mek di pɔblisha dɛn prich na say we dɛn bin dɔn bigin prich. If sɔm pɔblisha dɛn waka fɔ go di mitin fɔ fil savis ɛn di say we dɛn de go fɔ prich de fa, di wan we de kɔndɔkt di mitin fɔ fil savis kin mek dɛn pɔblisha ya prich wit di wan dɛn we gɛt motoka. If na bad eria, i go mek brɔda dɛn prich wit sɔm sista dɛn ɔ de nia dɛn. If pɔblisha dɛn de we nɔ gɛt bɛtɛ wɛlbɔdi ɔ we dɔn ol, i kin mek dɛn prich na say dɛn we nɔ gɛt il ɔ na os dɛn we nɔ gɛt bɔku stɛp. Di wan we de kɔndɔkt kin mek nyu pɔblisha dɛn prich wit pɔblisha dɛn we gɛt mɔ ɛkspiriɛns. Bɔt if pɔblisha dɛn kam let fɔ mitin fɔ fil savis, di fɔs we aw di wan we de kɔndɔkt bin arenj di pɔblisha dɛn go chenj ɔ i go nid fɔ arenj fɔ di wan dɛn we dɔn kam let. Wan wan tɛm sɔm pɔblisha dɛn kin gɛt sɔm siriɔs tin dɛn we kin mek dɛn let fɔ kam mitin fɔ fil savis. Bɔt if na wi abit fɔ de let ɔltɛm, i go fayn fɔ mek wi aks wisɛf if wi kin let bikɔs wi nɔ tek di mitin fɔ fil savis as siriɔs tin ɔ na bikɔs wi nɔ arenj di tin dɛn we wi fɔ du bifo tɛm.

12. Wetin yu fɔ tink bɔt if ɔltɛm yu kin dɔn arenj fɔ prich wit pɔsin?

¹² Pɔblisha dɛn we de kam mitin fɔ fil savis kin arenj fɔ prich wit pɔsin ɔ di wan we de kɔndɔkt kin gi dɛn pɔsin fɔ prich wit. If yu kin arenj fɔ prich wit pɔsin, yu nɔ tink se i go fayn fɔ mek yu prich wit ɔda pɔblisha dɛn apat frɔm yu tayt padi dɛn? (2 Kɔr. 6:11-13) Yu nɔ tink se i go fayn mek yu go arenj wan wan tɛm fɔ prich wit nyu pɔblisha dɛn so dat yu go ɛp dɛn fɔ rili sabi tich fayn? (1 Kɔr. 10:24; 1 Tim. 4:13, 15) Lisin fayn to ɛnitin we di wan we de kɔndɔkt tɛl una fɔ du, lɛk usay una fɔ bigin prich. We di mitin fɔ fil savis dɔn, nɔ chenj di we aw yu bin dɔn arenj di pɔblisha dɛn ɛn una go wantɛm wantɛm na di say we una fɔ prich.

13. Aw di mitin fɔ fil savis go bɛnifit wi if ɔlman du wetin i fɔ du?

¹³ Afta di 70 disaypul dɛn we Jizɔs bin sɛn dɔn fɔ prich, “dɛn kam bak wit gladi at.” (Lyuk 10:17) I go mɔs bi se di mitin we Jizɔs bin gɛt wit dɛn bifo dɛn go, bin ɛp dɛn fɔ prich fayn. Tide, di mitin fɔ fil savis we wi kin gɛt de bɛnifit wi di sem we. If ɔlman du wetin i fɔ du, di mitin fɔ fil savis go ɛnkɔrej wi, ɔganayz wi, ɛn rɛdi wi fɔ ebul fɔ mek “ɔlman . . . gɛt di chans fɔ yɛri ɛn biliv di gud nyuz.”—Mat. 24:14.