LIV YU LAYF LƐK KRISTIAN
Du Wetin Jiova in Lɔ dɛn Se
Jiova Gɔd dɔn gi mɔtalman lɔ dɛn we de ɛp dɛn fɔ biev fayn. Fɔ ɛgzampul, i dɔn tɔk se man ɛn uman we mared fɔ de togɛda sote go. (Mat. 19:4-6, 9) I et we pipul dɛn de du mami ɛn dadi biznɛs difrɛn difrɛn kayn we dɛn we nɔ rayt. (1 Kɔr. 6:9, 10) I ivin gi in pipul dɛn advays dɛn bɔt aw fɔ drɛs ɛn aw fɔ kia fɔ di tin dɛn we dɛn de wɛr so dat dɛn go difrɛn frɔm ɔda pipul dɛn.—Dit. 22:5; 1 Tim. 2:9, 10.
Insay di wɔl tide, bɔku pipul dɛn nɔ de gri fɔ fala di lɔ dɛn we Jiova dɔn gi wi. (Rom 1:18-32) Dɛn de alaw di we aw bɔku pipul dɛn de tink fɔ afɛkt di we aw dɛn de drɛs, di we aw dɛn de kia fɔ di tin dɛn we dɛn de wɛr, ɛn di we aw dɛn de biev. Bɔku pipul dɛn nɔ kin ayd di bad tin dɛn we dɛn de du ɛn dɛn kin de tɔk bad bɔt di wan dɛn we nɔ de du wetin dɛn de du.—1 Pit. 4:3, 4.
As Jiova Witnɛs dɛn, wi fɔ gɛt maynd fɔ fala di lɔ dɛn we Jiova dɔn gi wi. (Rom 12:9) Aw wi go ebul fɔ du dat? Wi fɔ tek tɛm tɛl ɔda pipul dɛn bɔt wetin rayt na Jiova in yay. Bɔt wisɛf fɔ mek shɔ se wi de fala dɛn lɔ dɛn de bay di we aw wi de liv wi layf. Fɔ ɛgzampul, we wi de pik wetin fɔ wɛr, wi fɔ aks wisɛf dɛn kwɛstyɔn dɛn ya: ‘Di tin dɛn we a de pik fɔ wɛr de sho se na Jiova in lɔ dɛn a de fala ɔ na di wan we di wɔl gɛt? Di we aw a de drɛs ɛn di we aw a de kia fɔ di tin dɛn we a de wɛr de sho se mi na Kristian we de fred Gɔd?’ Ɔ we wi de pik tɛlivishɔn program ɔ fim fɔ wach, wi fɔ aks wisɛf dɛn kwɛstyɔn dɛn ya: ‘Jiova go lɛk dis program? Udat in lɔ dɛn dis program de put bifo? Di tin dɛn we a de pik fɔ ɛnjɔy misɛf go mek a nɔ valyu Jiova in lɔ dɛn bɛtɛ igen? (Sam 101:3) I go ambɔg mi famili ɔ ɔda pipul dɛn?’—1 Kɔr. 10:31-33.
Wetin mek i rili impɔtant fɔ mek wi du wetin Jiova in lɔ dɛn se? I nɔ go te igen, Jizɔs Krays go dɔnawe wit pipul dɛn we de na di wɔl ɛn ɔl di bad tin dɛn we dɛn de du. (Izi. 9:4-7) Na di wan dɛn nɔmɔ we de du wetin Jiova want na dɛn go lɛf. (1 Jɔn 2:15-17) So lɛ wi tray tranga wan fɔ du wetin Jiova in lɔ dɛn se, so dat di we aw wi de biev, go mek di wan dɛn we de wach wi, prez Gɔd.—1 Pit. 2:11, 12.
Di klos dɛn we a de disayd fɔ wɛr de sho se a de du wetin Jiova in lɔ dɛn se?
WACH DI FIM WE GƐT DI TAYTUL, BI JIOVA IN PADI—WAN MAN, WAN UMAN, DƆN UNA TƆK BƆT DƐN KWƐSTYƆN DƐN YA:
Wetin du i mek sɛns fɔ du wetin Jiova in lɔ dɛn se?
Wetin mek frɔm we pikin dɛn smɔl, mama ɛn papa dɛn fɔ bigin tich dɛn fɔ du wetin Jiova in lɔ dɛn se?
Aw di yɔŋ wan dɛn ɛn di wan dɛn we dɔn ol go ebul fɔ ɛp pipul dɛn fɔ bɛnifit frɔm Gɔd in gudnɛs?