Jizɔs Na Wi Ay Prist We Gɛt Sɔri-At

1-2. (a) Wetin mek Jiova bin sɛn in Pikin fɔ kam na di wɔl? (b) Wetin wi go tɔk bɔt insay dis atikul? (Ibruz 5:​7-9)

LƐK 2,000 ia bifo dis tɛm, Jiova Gɔd bin sɛn in Pikin we i lɛk pas ɔl fɔ kam na di wɔl. Wetin mek? Wan rizin we mek i kam na di wɔl na fɔ fri mɔtalman frɔm sin ɛn day ɛn fɔ pul ɔl di prɔblɛm dɛn we de apin bikɔs ɔf wetin Setan du. (Jɔn 3:16; 1 Jɔn 3:8) Jiova bin no bak se if Jizɔs kam liv na dis wɔl as mɔtalman, dat go ɛp am fɔ bi Ay Prist we gɛt sɔri-at ɛn we de ɔndastand wetin de apin to wi. Jizɔs bin bigin fɔ du da wok de afta i baptayz insay di ia 29.a

² Insay dis atikul, wi go tɔk bɔt aw di tin dɛn we apin to Jizɔs we i bin de na dis wɔl bin ɛp am fɔ bi Ay Prist we de ɔndastand wetin de apin to wi. We wi ɔndastand se Jizɔs na di “pafɛkt” pɔsin fɔ dis wok, dat go mek i izi fɔ lɛ wi pre to Jiova ɛn kam nia am, ilɛksɛf wi at pwɛl bikɔs ɔf di sin dɛn we wi dɔn kɔmit ɔ bikɔs ɔf di say dɛn we wi wik.—Rid Ibruz 5:​7-9.

GƆD IN PIKIN WE I LƐK KAM NA DI WƆL

3-4. Us big chenj dɛn Jizɔs bin mek we i kam na di wɔl?

³ Bɔku pan wi no wetin i min fɔ mek tin dɛn chenj na wi layf, lɛk fɔ kɔmɔt usay wi lɛk fɔ de ɛn lɛf wi fambul ɛn padi dɛn biɛn. I nɔ kin izi fɔ mek dɛn chenj dɛn ya. Bɔt nɔn pan wi nɔ wande mek big chenj dɛn na wi layf lɛk aw Jizɔs bin du. We i bin de na ɛvin, nain na bin di enjɛl we impɔtant pas ɔl di ɔda enjɛl dɛn. Jiova bin rili lɛk am, ɛn Jizɔs bin gladi ɔltɛm we i de wok na Gɔd in “raytan.” (Sam 16:11; Prɔv. 8:30) Bɔt Filipians 2:7 tɔk se i bin rɛdi fɔ “lɛf ɔltin we i gɛt” na ɛvin fɔ kam de na dis wɔl wit mɔtalman dɛn we nɔ pafɛkt.

⁴ Tink bak bɔt wetin apin to Jizɔs we dɛn bɔn am ɛn di tɛm we i bin smɔl. I bɔn na po famili we bin jɔs ebul fɔ gi tu smɔl bɔd dɛn as sakrifays afta dɛn bɔn am. (Liv. 12:8; Lyuk 2:24) We Kiŋ Ɛrɔd we na bin wikɛd man no se dɛn dɔn bɔn di Mɛsaya, i bin tray fɔ kil am. Di famili bin rɔnawe go na Ijipt fɔ mek di kiŋ nɔ kil di pikin. (Mat. 2:​13, 15) Fɔ tru, Jizɔs in layf na dis wɔl bin rili difrɛn frɔm di layf we i bin de liv na ɛvin!

5. Wetin Jizɔs bin si we i bin de na di wɔl? Aw dat bin ɛp am fɔ bi Ay Prist we gɛt sɔri-at? (Luk bak di pikchɔ.)

⁵ We Jizɔs bin de na di wɔl, i bin si we bɔku pipul dɛn de sɔfa. Wan dawt nɔ de se insɛf bin lɔs pipul dɛn we i lɛk; i go mɔs bi se wan pan dɛn pipul dɛn de nain stɛp-papa we nem Josɛf. We i bin de du in prichin wok, i bin si pipul dɛn we gɛt lɛprɔsi, we blayn, we paralayz, ɛn we dɛn pikin dɛn dɔn day, ɛn i bin sɔri fɔ dɛn. (Mat. 9:​2, 6; 15:30; 20:34; Mak 1:​40, 41; Lyuk 7:13) Na tru se i bin de si we pipul dɛn de sɔfa we i bin de na ɛvin. Bɔt we i bin de na di wɔl as mɔtalman, i bin si di sɔfa we mɔtalman de sɔfa difrɛn we. (Ayz. 53:4) I bin ebul fɔ ɔndastand gud gud wan di we aw pipul dɛn de fil ɛn aw dɛn de sɔfa bikɔs ɔf di tin dɛn we de apin to dɛn. Ɛn insɛf bin de taya ɛn gɛt pwɛlat jɔs lɛk ɛni ɔda pɔsin.

JIZƆS SHO SE I DE FIL FƆ ƆDA PIPUL DƐN

6. Wetin di ɛgzampul dɛn we Prɔfɛt Ayzaya yuz de tich wi bɔt di sɔri-at we Jizɔs gɛt? (Ayzaya 42:3)

⁶ We Jizɔs bin de du in prichin wok, i bin de sho se i de rili sɔri fɔ di wan dɛn we bin wik ɛn we dɛn bin de trit bad. We i du dat, i bin mek Ayzaya in prɔfɛsi kam tru. Insay di Ibru Skripchɔ dɛn, sɔntɛnde, dɛn kin kɔmpia pipul dɛn we jɛntri ɛn we strɔng to gadin we gɛt bɔku bɔku wata ɔ tɔl stik dɛn we strɔng. (Sam 92:12; Ayz. 61:3; Jɛr. 31:12) Bɔt dɛn kin kɔmpia di po wan dɛn ɛn di wan dɛn we dɛn nɔ bin de trit fayn to gras we dɔn lɛf smɔl fɔ wida ɛn lamp in wik we dɔn lɛf smɔl fɔ ɔt. (Rid Ayzaya 42:3) Jiova bin mek Prɔfɛt Ayzaya tɔk bɔt dɛn ɛgzampul dɛn ya fɔ sho aw Jizɔs go gɛt lɔv ɛn sɔri-at fɔ po pipul dɛn we dɛn nɔ tek mek natin.

7-8. Aw Jizɔs bin mek Ayzaya in prɔfɛsi kam tru?

⁷ Matyu sho se Jizɔs bin du wetin Ayzaya rayt nain prɔfɛsi we se: “I nɔ go rut ɛni gras we dɔn lɛf smɔl fɔ wida, ɛn i nɔ go ɔt ɛni wik we dɔn lɛf smɔl fɔ ɔt.” (Mat. 12:20) Sɔm pan Jizɔs in mirekul dɛn bin ɛp pipul dɛn we dɛn nɔ bin de trit fayn ɛn we go dɔn de fil se dɛn tan lɛk gras we dɔn lɛf smɔl fɔ wida ɛn lɛk wik we dɔn lɛf smɔl fɔ ɔt. Fɔ ɛgzampul, Jizɔs bin mit wan man we bin gɛt lɛprɔsi we bin dɔn rili bad-ɔf. I go bi se dis man bin fil se i nɔ go ɛva wɛl, ɛn i nɔ go ebul fɔ de wit in fambul ɛn padi dɛn. (Lyuk 5:​12, 13) Dɔn i bin mit wan ɔda man we dɛf ɛn we nɔ de tɔk klia wan. Imajin aw i bin de fil we i de si pipul dɛn de tɔk, bɔt i nɔ ebul fɔ ɔndastand wetin dɛn de tɔk. (Mak 7:​32, 33) Bɔt nɔto dat nɔmɔ.

⁸ Insay Jizɔs in tɛm, bɔku Ju dɛn bin biliv se di wan dɛn we sik de sɔfa bikɔs ɔf dɛn sin ɔ bikɔs ɔf di sin we dɛn mama ɛn papa dɛn kɔmit. (Jɔn 9:2) Dis rɔng tin we dɛn biliv bin de mek dɛn pipul dɛn ya fil bad bɔt dɛnsɛf. Jɔs lɛk aw Ayzaya bin prɔfɛsay, Jizɔs bin mɛn dɛn ɛn mek dɛn gɛt op bak pan Gɔd. Wetin dis tich wi bɔt aw Jizɔs de fil bɔt wi tide?

9. Aw Ibruz 4:​15, 16 de sho se wi Ay Prist rili ɔndastand mɔtalman dɛn we nɔ pafɛkt?

⁹ Rid Ibruz 4:​15, 16. Wi gɛt kɔnfidɛns se Jizɔs de ɔndastand wi ɔltɛm. Wetin dat min? Pɔsin we de ɔndastand aw ɔda pɔsin de fil, kin du sɔntin fɔ ɛp di ɔda pɔsin we i de sɔfa. Di Grik wɔd we dɛn translet as “ɔndastand” kin min fɔ put wisɛf na di ɔda pɔsin in sus ɛn fil di pen we i de fil. (Luk bak Ibruz 10:​34, usay Pɔl bin yuz di sem Grik wɔd.) Di stori dɛn bɔt Jizɔs in mirekul dɛn de sho se Jizɔs bin de rili sɔri fɔ pipul dɛn we de sɔfa. I nɔ bin jɔs mɛn pipul dɛn bikɔs i fɔ du am. Bɔt i bin mɛn dɛn bikɔs i rili bisin bɔt dɛn ɛn want fɔ ɛp dɛn. Fɔ ɛgzampul, i nɔ bin nid fɔ tɔch di man we bin gɛt lɛprɔsi fɔ mɛn am, bɔt i bin tɔch am. Ɛn i go bi se i bin dɔn rili te we pɔsin tɔch da man de. Dɔn bak, we i bin de mɛn di man we dɛf, i pul am usay nɔys de ɛn kɛr am go na kɔna usay pipul dɛn nɔ de. Tink bak bɔt wetin bin apin we wan uman we bin dɔn ripɛnt bin sok Jizɔs in fut wit in kray wata ɛn dray am wit in ia. Wan Faresi nɔ bin tink di rayt we bɔt di uman, bɔt Jizɔs bin tɔk fɔ am. (Mat. 8:3; Mak 7:33; Lyuk 7:44) Jizɔs nɔ bin de avɔyd di wan dɛn we sik ɔ di wan dɛn we bin dɔn sin siriɔs wan. Bifo dat, i bin de tɛl dɛn fɔ kam to am ɛn ɛp dɛn fɔ no se i de sɔri fɔ dɛn. Wi shɔ se na da sem we de i de sɔri fɔ wi.

AW WI DE FALAMAKATA WI AY PRIST?

10. Wetin wi kin yuz fɔ ɛp di wan dɛn we dɛf ɛn di wan dɛn we blayn? (Luk bak di pikchɔ dɛn.)

¹⁰ As Jizɔs in disaypul dɛn, wi de tray fɔ falamakata am fɔ sho lɔv, fɔ fil fɔ ɔda pipul dɛn, ɛn fɔ sɔri fɔ dɛn. (1 Pit. 2:21; 3:8) Na tru se wi nɔ ebul mɛn di wan dɛn we dɛf ɔ blayn, bɔt wi ebul ɛp dɛn fɔ kam nia Jiova. Fɔ ɛgzampul, wi pɔblikeshɔn dɛn we de tɔk bɔt di Baybul de insay pas 100 sayn langwej dɛn. Ɛn fɔ di wan dɛn we nɔ de si fayn ɔ we blayn, wi gɛt brel pɔblikeshɔn dɛn insay pas 60 langwej dɛn. Ɛn naw, wi gɛt pas 100 langwej dɛn we gɛt vɔys we de ɛksplen wetin de apin insay di vidio dɛn. Dɛn tin ya de ɛp di wan dɛn we dɛf ɛn di wan dɛn we blayn fɔ kam nia Jiova ɛn in Pikin.

11. Aw Jiova in ɔganayzeshɔn de sho di sem kayn sɔri-at we Jizɔs bin gɛt fɔ ɔlkayn pipul dɛn? (Akt 2:​5-7, 33) (Luk bak di pikchɔ dɛn.)

¹¹ Jiova in ɔganayzeshɔn de du dɛn bɛst fɔ ɛp ɔlkayn pipul dɛn fɔ kam nia Jiova. Mɛmba se we Jizɔs bin gɛt layf bak, i bin gi oli spirit to in disaypul dɛn so dat di wan dɛn we kam di Pɛntikɔst Fɛstival go yɛri di gud nyuz insay dɛn “yon langwej.” (Rid Akt 2:​5-7, 33.) Tide, Jizɔs de dayrɛkt di ɔganayzeshɔn fɔ mek pɔblikeshɔn dɛn we de tɔk bɔt di Baybul insay pas 1,000 langwej dɛn, pan ɔl we i bi se di pipul dɛn we de tɔk sɔm pan dɛn langwej dɛn ya nɔ bɔku. Fɔ ɛgzampul, di pipul dɛn we de tɔk sɔm langwej dɛn na Nɔt Amɛrika ɛn Sawt Amɛrika nɔ bɔku. Bɔt stil, wi gɛt pɔblikeshɔn dɛn insay pas 160 pan dɛn langwej dɛn de so dat bɔku pipul dɛn go yɛri di gud nyuz. Wi pɔblikeshɔn dɛn de bak insay pas 20 Romani langwej dɛn. Ɛn bɔku pipul dɛn we de tɔk dɛn langwej dɛn de dɔn stat fɔ sav Jiova.

12. Us ɔda tin dɛn Jiova in ɔganayzeshɔn de du fɔ ɛp pipul dɛn?

¹² Apat frɔm di ɛp we Jiova in ɔganayzeshɔn de ɛp pipul dɛn fɔ yɛri di gud nyuz, dɛn de ɛp di wan dɛn bak we de sɔfa bikɔs ɔf nachɔral dizasta. Bɔku brɔda ɛn sista dɛn rɛdi fɔ vɔlɔntia fɔ ɛp dɛn kɔmpin Kristian dɛn we nid ɛp. Dɔn bak, di ɔganayzeshɔn de bil simpul ples dɛn usay pipul dɛn de gɛda fɔ lan mɔ bɔt di lɛk we Gɔd lɛk dɛn.

WI AY PRIST GO ƐP YU

13. Wetin na sɔm tin dɛn we Jizɔs de du fɔ ɛp wi?

¹³ Bikɔs Jizɔs na wi gud shɛpad, i de mek shɔ se wi gɛt di tin dɛn we wi nid fɔ kɔntinyu fɔ de nia Jiova. (Jɔn 10:14; Ɛfi. 4:7) Sɔntɛnde, di tin dɛn we kin apin to wi kin mek wi at pwɛl, ɛn wi kin fil lɛk wik we dɔn lɛf smɔl fɔ ɔt ɔ lɛk gras we dɔn lɛf smɔl fɔ wida. Sɔntɛm wi at kin pwɛl bikɔs wi sik siriɔs wan, bikɔs wi mek mistek, ɔ sɔntɛm wi gɛt cham-mɔt wit pɔsin na di kɔngrigeshɔn. I nɔ kin izi fɔ lɛ wi pe atɛnshɔn pan wi op fɔ tumara bambay ɛn lɛf fɔ pe atɛnshɔn pan di bad tin we dɔn apin to wi. Bɔt mɛmba se Jizɔs de si wetin de apin to yu, ɛn i ɔndastand aw yu de fil. Di sɔri-at we Jizɔs gɛt go mek i du sɔntin fɔ ɛp yu. Fɔ ɛgzampul, i go yuz di oli spirit fɔ gi yu trɛnk di tɛm we yu wik. (Jɔn 16:7; Tay. 3:6) Dɔn bak, Jizɔs go yuz ‘man dɛn we na gift’ ɛn yu kɔmpin Kristian dɛn fɔ ɛnkɔrej yu, sɔpɔt yu, ɛn ɛp yu.—Ɛfi. 4:8.

14. Wetin wi go du we wi at pwɛl?

¹⁴ If yu at pwɛl, na fɔ mɛmba se Jizɔs na wi Ay Prist, ɛn tink gud wan bɔt wetin dat min fɔ yu. Jiova nɔ bin jɔs sɛn Jizɔs na di wɔl fɔ gi in layf fɔ wi, bɔt na fɔ ɛp am bak fɔ rili ɔndastand di prɔblɛm dɛn we de mit wi bikɔs wi nɔ pafɛkt. We wi at pwɛl bikɔs ɔf di sin dɛn we wi dɔn kɔmit ɔ bikɔs ɔf di say dɛn we wi wik, Jizɔs rɛdi fɔ ɛp wi “di rayt tɛm.”—Ibru. 4:​15, 16.

15. Wetin bin ɛp wan brɔda fɔ kam bak na di kɔngrigeshɔn?

¹⁵ Jizɔs de ɛp in pipul dɛn as dɛn de tray fɔ fɛn ɛn ɛp di wan dɛn we dɔn stɔp fɔ sav Jiova fɔ kam bak to am. (Mat. 18:​12, 13) Lɛ wi tɔk bɔt Stɛfanob in ɛgzampul. I bin disayd fɔ atɛnd mitin afta 12 ia we dɛn bin dɔn pul am kɔmɔt na di kɔngrigeshɔn. I tɔk se, “I nɔ bin izi fɔ mi, bɔt a bin want fɔ jɔyn mi brɔda ɛn sista dɛn bak fɔ sav Jiova. Di ɛlda dɛn we bin tɔk to mi bin mek a gladi fɔ kam bak. Sɔntɛnde a bin de fil bad bikɔs a bin stɔp fɔ sav Jiova, ɛn a bin want fɔ giv-ɔp. Bɔt di ɛlda dɛn bin mɛmba mi se Jiova ɛn Jizɔs nɔ want mek a giv-ɔp. We a bin kam bak na di kɔngrigeshɔn, di wan ol kɔngrigeshɔn bin rili gladi fɔ wɛlkɔm mi ɛn mi famili. Leta, mi wɛf bin stat fɔ stɔdi di Baybul, ɛn rayt naw, wi de sav Jiova togɛda as famili.” Wi Ay Prist we lɛk wi kin rili gladi we i de si se ɔlman na di kɔngrigeshɔn de ɛp di wan dɛn we dɔn ripɛnt fɔ kam bak to Jiova!

16. Wetin mek yu gladi fɔ gɛt Ay Prist we de ɔndastand yu?

¹⁶ We Jizɔs bin de na di wɔl, i bin ɛp bɔku bɔku pipul dɛn di tɛm we dɛn bin nid ɛp. Tide bak, wi gɛt kɔnfidɛns se i go ɛp wi ɛnitɛm we wi nid ɛp. Ɛn insay di nyu wɔl, i go ɛp wi ɔl fɔ pafɛkt ɛn mek wi nɔ ɛva sin igen. Wi de tɛl Jiova wi Gɔd bɔku tɛnki bikɔs i gɛt sɔri-at ɛn i lɛk wi pasmak, ɛn na dat mek i pik in Pikin fɔ bi wi Ay Prist we de rili ɔndastand wi!