Pɔl ɛn Timoti

YU DE si di yɔŋ man we tinap nia Pɔl? In nem na Timoti. Timoti de wit in famili na wan tɔŋ we dɛn kɔl Listra. In mama nem Yunis ɛn in grani nem Lɔys.

Dis na di tɔd tɛm we Pɔl kam na Listra. I dɔn pas lɛk wan ia so frɔm di fɔs tɛm we Pɔl ɛn Banabas bin kam naya fɔ prich. Ɛn naw Pɔl dɔn kam wit in padi we nem Saylas.

Yu no wetin Pɔl ɛn Timoti de tɔk? Pɔl de aks Timoti se: ‘Yu go want go wit mi ɛn Saylas? Wi go want mek yu ɛp wi fɔ prich na dɛn fa fa kɔntri dɛn.’

Timoti tɛl am se: ‘A de go wit una.’ I nɔ tu te afta dat, Timoti lɛf in famili ɛn go wit Pɔl ɛn Saylas. Bɔt bifo wi tɔk bɔt usay dɛn go, lɛ wi no fɔs wetin bin dɔn de apin to Pɔl. I dɔn tek lɛk 17 ia so frɔm we Jizɔs apia to am we i bin de go na Damaskɔs.

Mɛmba se, Pɔl bin de go na Damaskɔs fɔ go du bad to Jizɔs in disaypul dɛn. Bɔt naw insɛf dɔn bi Jizɔs in disaypul! Leta, sɔm bad pipul dɛn bin want kil Pɔl bikɔs dɛn nɔ lɛk we i de tɔk bɔt Jizɔs. Bɔt di disaypul dɛn ɛp Pɔl fɔ rɔnawe. Dɛn put am insay blay ɛn pas oba di wɔl we de rawnd di tɔŋ.

Afta sɔm tɛm, Pɔl go prich na Antiɔk. Naya so fɔs dɛn bigin kɔl di wan dɛn we de fala Jizɔs, Kristian. We Pɔl ɛn Banabas bin de na Antiɔk, dɛn tɛl dɛn fɔ go prich na fa fa kɔntri dɛn. Wan pan di ples dɛn we dɛn go, na Listra.Na da tɔŋ de Timoti de.

Naw, Pɔl dɔn kam bak na Listra. We Timoti go wit Pɔl ɛn Saylas, yu no usay ɛn usay dɛn go? Luk di map, ɛn lɛ wi lan sɔm pan di ples dɛn we dɛn go.

Dɛn go fɔs na wan tɔŋ we de nia Listra, we nem Aykonyɔm. Dɔn dɛn go na wan ɔda tɔŋ we dɛn de kɔl Antiɔk. Afta dat, dɛn go na Troas, Filipay, Tɛsalonayka ɛn Beruya. Yu de si Atɛns na di map? Pɔl dɛn prich de bak. Afta dat dɛn go na Kɔrint, ɛn dɛn prich de fɔ wan ɛn af ia. We dɛn kɔmɔt de, dɛn go na Ɛfisɔs, bɔt dɛn nɔ te de. Dɔn dɛn tek bot ɛn go na Sizeria. Frɔm de, dɛn go na Antiɔk, ɛn na de Pɔl kin de.

So Timoti go plɛnti plɛnti say dɛn fɔ ɛp Pɔl fɔ prich, ɛn fɔ ɛp pipul dɛn fɔ bi Kristian. Dɔn dɛn mek dɛn pipul ya bigin gɛda fɔ wɔship Gɔd. We yu go dɔn big, yu go want sav Gɔd lɛk Timoti?