Pɔl ɛn Timoti

Timoti na wan yɔŋ brɔda we bin de na di kɔngrigeshɔn na Listra. In papa na Grik, ɛn in mama na Ju. In mama we nem Yunis, ɛn in grani we nem Lɔis bin tich Timoti bɔt Jiova frɔm we i smɔl.

We Pɔl go fɛn di brɔda dɛn na Listra di sɛkɔn tɛm we i go prich de, i notis se Timoti bin rili lɛk di brɔda dɛn, ɛn i rɛdi fɔ ɛp dɛn. Pɔl invayt Timoti fɔ travul wit am. Afta sɔm tɛm, Pɔl tren Timoti fɔ sabi prich ɛn tich di gud nyuz fayn fayn wan.

Di oli spirit bin de gayd Pɔl ɛn Timoti ɛnisay we dɛn go. Wan nɛt, wan man tɛl Pɔl insay wan vishɔn fɔ go na Masidonia fɔ go ɛp dɛn. So Pɔl, Timoti, Saylas, ɛn Lyuk go de fɔ go prich ɛn mek kɔngrigeshɔn dɛn.

Bɔku man ɛn uman dɛn bi Kristian dɛn insay wan Masidonia siti we nem Tɛsalonayka. Bɔt sɔm pan di Ju dɛn bin de jɛlɔs Pɔl ɛn in padi dɛn. Dɛn gɛda bɔku pipul dɛn ɛn drɛg di brɔda dɛn to di rula dɛn na di siti, ɛn ala se: ‘Dɛn man dɛn ya na ɛnimi dɛn to di Roman gɔvmɛnt!’ Pɔl ɛn Timoti dɛn layf bin de pan denja, so dɛn rɔnawe go na Beria na nɛt.

Di pipul dɛn na Beria bin rɛdi fɔ lan di gud nyuz, ɛn pipul dɛn we na Grik ɛn Ju bi Kristian dɛn. Bɔt we sɔm Ju dɛn we kɔmɔt na Tɛsalonayka bigin kɔz prɔblɛm dɛn, Pɔl kɔmɔt de ɛn go na Atɛns. Timoti ɛn Saylas lɛf na Beria fɔ ɛp di brɔda dɛn we de de. As tɛm de go, Pɔl sɛn Timoti fɔ go bak na Tɛsalonayka fɔ ɛp di brɔda dɛn fɔ bia wit di sɔfa we dɛn bin de mek dɛn sɔfa. Leta, Pɔl sɛn Timoti fɔ go ɛnkɔrej bɔku ɔda kɔngrigeshɔn dɛn.

Pɔl tɛl Timoti se: ‘Dɛn go mek di wan dɛn we want fɔ sav Jiova sɔfa.’ Dɛn mek Timoti sɔfa, ɛn dɛn put am na prizin bikɔs ɔf wetin i biliv. I gladi fɔ di chans we i gɛt fɔ sho Jiova se i go kɔntinyu fɔ de biɛn am.

Pɔl tɛl di pipul dɛn na Filipay se: ‘A de sɛn Timoti to una. I go tich una wetin i min fɔ waka na di trut, ɛn i go tren una fɔ du di prichin wok.’ Pɔl no se i kin abop pan Timoti. Dɛn wok togɛda as padi dɛn ɛn as in kɔmpin wokman fɔ lɔng tɛm.