Di Mirekul we Apin na di Rɛd Si

As Fɛro yɛri se di Izrɛlayt dɛn dɔn kɔmɔt na Ijipt, i chenj in maynd. I kɔmand in fɛtman dɛn se: ‘Una rɛdi ɔl mi chariɔt dɛn fɔ fɛt ɛn lɛ wi rɔn afta dɛn! Wi nɔ fɔ dɔn lɛf dɛn mek dɛn go.’ In ɛn in man dɛn bigin fɔ rɔn afta di Izrɛlayt dɛn.

Jiova bin de yuz klawd santɛm ɛn faya na nɛt fɔ lid in pipul dɛn. I bin kɛr dɛn go na di Rɛd Si, ɛn i tɛl dɛn fɔ mek kamp de.

Dɔn di Izrɛlayt dɛn bin si Fɛro ɛn in sojaman dɛn de rɔn afta dɛn. Dɛn nɔ bin gɛt no say fɔ go, dɛn bin de bitwin di si ɛn di Ijipshian sojaman dɛn. Dɛn kray to Mozis se: ‘Wi de kam day! Yu fɔ dɔn lɛf wi na Ijipt.’ Bɔt Mozis tɛl dɛn se: ‘Una nɔ fred. Una wet ɛn si aw Jiova go sev wi.’ Mozis bin rili abop pan Jiova, nɔto so?

Jiova bin tɛl di Izrɛlayt dɛn fɔ rɛdi fɔ go. Da nɛt de, Jiova bin muv di klawd ɛn put am midul di Ijipshian dɛn ɛn di Izrɛlayt dɛn. Di Ijipshian dɛn yon say bin dak. Bɔt di Izrɛlayt dɛn bin gɛt layt.

Jiova bin tɛl Mozis fɔ stret in an oba di si. Dɔn Jiova bin mek ebi ebi briz blo ol nɛt. Di si bin sheb to tu ɛn dray grɔn bin de na di midul. Di bɔku bɔku Izrɛlayt dɛn bin waka na di dray grɔn midul di wata we bin tan lɛk tu wɔl dɛn fɔ go na di ɔdasay.

Fɛro ɛn in sojaman dɛn fala di Izrɛlayt dɛn na di dray grɔn. Dɔn Jiova mek di sojaman dɛn kɔnfyus. Di wil dɛn na dɛn chariɔt dɛn bigin fɔ kɔmɔt. Di sojaman dɛn ala lawd wan se: ‘Lɛ wi kɔmɔt na ya! Jiova de fɛt fɔ dɛn.’

Jiova tɛl Mozis se: ‘Stret yu an oba di si.’ Wantɛm wantɛm, di wata we bin tan lɛk wɔl fɔdɔm pan di Ijipshian sojaman dɛn. Fɛro ɛn ɔl in man dɛn bin day. No wan pan dɛn nɔ bin sev.

Na di ɔda pat na di si, bɔku bɔku pipul dɛn bin de prez Gɔd wit wan siŋ we se: “Siŋ to Jiova bikɔs i dɔn win wan fɛt we mek ɔlman dɔn no am. I dɔn ib di ɔs ɛn di wan we de rayd am na di si.” We di pipul dɛn bin de siŋ, di uman dɛn bin de dans ɛn ple tamborin dɛn. Dɛn ɔl bin rili gladi bikɔs naw dɛn dɔn fri.