LIV YU LAYF LƐK KRISTIAN
Una Wok Togɛda fɔ Prich na Tɛritri we Dɛn De Tɔk Difrɛn Langwej Dɛn
Bɔku tɛm, pipul dɛn kin gladi fɔ lisin to di Kiŋdɔm mɛsej if dɛn yɛri am insay dɛn yon langwej. Sɔntɛm na dat mek insay Pɛntikɔst 33, Jiova bin arenj fɔ mek di ‘Ju pipul we de fred Gɔd, ɛn we kɔmɔt na ɔl di neshɔn dɛn’ yɛri di gud nyuz insay “dɛn yon langwej” pan ɔl we sɔntɛm dɛn bin de tɔk langwej we kɔmɔn lɛk Ibru ɔ Grik. (Akt 2:5, 8) Na eria dɛn we dɛn de tɔk difrɛn langwej dɛn, sɔm kɔngrigeshɔn dɛn we de gɛt mitin insay difrɛn langwej dɛn kin gɛt di sem tɛritri wit ɔda kɔngrigeshɔn dɛn we de tɔk ɔda langwej. Aw pɔblisha dɛn we de na dɛn kayn kɔngrigeshɔn dɛn de go wok togɛda fɔ mek dɛn go ebul fɔ prich to ɔlman ɛn stil nɔ mek di wan dɛn we dɛn de prich to vɛks bay we dɛn go to di sem pipul dɛn fast-fast?
Una arenj (Prɔ 15:22): Savis ovasia dɛn fɔ sidɔm togɛda ɛn arenj aw dɛn go prich di gud nyuz di kayn we we ɔl di kɔngrigeshɔn dɛn go ebul fɔ tek pat. Sɔntɛm sɔm kɔngrigeshɔn dɛn we gɛt smɔl tɛritri we de tɔk wan langwej, kin tɛl di ɔda kɔngrigeshɔn fɔ jomp ɛni os we dɛn mit pɔsin we de tɔk dɛn langwej. Bɔt if dɛn nɔ ebul fɔ prich ɔlsay na dɛn tɛritri fast-fast, bikɔs di os dɛn skata difrɛn say dɛn, dɛn kin se bifo dɛn jomp di os dɛn, if dɛn mit pɔsin we want fɔ no mɔ i go bɛtɛ fɔ tɛl dɛn. (od-E pej 93, par. 37) Ɔ sɔntɛm dɛn go tɛl una kɔngrigeshɔn fɔ ɛp dɛn fɔ fɛn pipul dɛn we de tɔk di langwej na dɛn kɔngrigeshɔn ɛn sɛn di adrɛs na dɛn tɛritri. (km-E 7/12 pej 5, bɔks) Mɛmba se sɔntɛnde, dɛn kin tɔk pas wan langwej insay sɔm os dɛn. We una de arenj aw fɔ prich na di tɛritri, una fɔ mɛmba fɔ fala ɛni lɔ we de na di kɔntri bɔt aw fɔ gi infɔmeshɔn bɔt pɔsin.
Una wok togɛda (Ɛfi 4:16): Fala ɛnitin we yu savis ovasia tɛl yu fɔ du. Yu de stɔdi di Baybul wit pɔsin we de tɔk langwej we dɛn nɔ de tɔk na yu kɔngrigeshɔn? Di pɔsin go ebul fɔ go bifo kwik kwik wan if yu transfa in stɔdi to di kɔngrigeshɔn we de tɔk in langwej fɔ mek dɛn stɔdi wit am.
Una pripia (Prɔ 15:28; 16:1): If yu mit pɔsin we de tɔk ɔda langwej na yu tɛritri, na fɔ tray fɔ prich di gud nyuz to am. Yu kin pripia bay we yu tink bɔt uskayn langwej dɛn yu go mit, ɛn dawnlod Baybul transleshɔn dɛn ɛn fim dɛn na yu fon ɔ tablɛt. Yu kin yuz JW Language ap bak fɔ lan fɔ grit insay dɛn langwej dɛn de.