Aw Yu Go Gɛt Tayt Padi Biznɛs wit Jiova Bak?

ƐNI ia, bɔku pan Jiova in ship dɛn we i valyu kin kam bak na di kɔngrigeshɔn. Imajin di bɔku “gladi-at we [kin] de na ɛvin” we ɛni wan pan dɛn kam bak. (Lyuk 15:7, 10) If yu dɔn kam bak na di kɔngrigeshɔn, wan dawt nɔ de se Jizɔs, di enjɛl dɛn, ɛn Jiova insɛf gladi fɔ si we yu dɔn bi pat ɔf di kɔngrigeshɔn bak. Bɔt as yu de tray fɔ gɛt tayt padi biznɛs wit Jiova bak, sɔntɛm yu go gɛt prɔblɛm dɛn. Wetin na sɔm pan dɛn prɔblɛm dɛn de, ɛn wetin go ɛp yu?

WETIN NA DI PRƆBLƐM DƐN?

Bɔku brɔda ɛn sista dɛn stil gɛt pwɛlat, pan ɔl we dɛn dɔn kam bak na di kɔngrigeshɔn. Sɔntɛm yu go ɔndastand aw Kiŋ Devid bin fil. Pan ɔl we Jiova bin dɔn fɔgiv in sin dɛn, i bin se: “Mi sin dɛn dɔn . . . blɔk mi we.” (Sam 40:12; 65:3) Afta we pɔsin kam bak to Jiova, sɔntɛm i kin stil fil bad fɔ wetin i bin dɔn du ɛn i kin ivin shem fɔ lɔng tɛm. Isabɛl bin disfɛloship pas 20 ia.a I bin se, “I bin at fɔ mek a biliv se Jiova go fɔgiv mi.” If yu gɛt pwɛlat, dat kin mek yu nɔ gɛt tayt padi biznɛs wit Jiova igen. (Prɔv. 24:10, NWT) Tray fɔ mek dat nɔ apin to yu.

Ɔda pipul dɛn kin wɔri se sɔntɛm dɛn nɔ go ebul du ɔl wetin dɛn nid fɔ du fɔ gɛt tayt padi biznɛs wit Jiova bak. Afta wan brɔda we nem Antwan bin kam bak na di kɔngrigeshɔn, i bin se: “A bin dɔn fɔgɛt bɔku tin dɛn we a bin dɔn lan ɛn we a bin de du we mi na bin Witnɛs trade.” Bikɔs sɔm pan dɛn kin fil dis we, dɛn nɔ kin want fɔ du ɔl wetin dɛn fɔ du fɔ Jiova.

Fɔ ɛgzampul, if ebi briz pwɛl pɔsin in os bad bad wan, sɔntɛm in at go pwɛl we i tink bɔt di tɛm ɛn di wok we i go nid fɔ wok tranga wan fɔ mek am bak. Semweso, if yu padi biznɛs wit Jiova dɔn pwɛl bikɔs yu sin siriɔs wan, sɔntɛm yu go fil se yu gɛt fɔ wok tranga wan fɔ mek yu bi Jiova in padi bak. Bɔt yu nɔ gɛt fɔ du dis yu wangren.

Jiova de tɛl wi se: “Una kam lɛ wi tɔk di kes we de bitwin mi ɛn una.” (Ayz. 1:18, NWT) Yu dɔn ɔlrɛdi tray tranga wan fɔ “tɔk di kes.” Jiova lɛk yu fɔ we yu de du dat. Jɔs tink bɔt dis: Bikɔs yu dɔn kam bak to Jiova, i go yuz yu as ɛgzampul fɔ pruv se Setan na layman.—Prɔv. 27:11.

We yu dɔn kam bak to Jiova, yu dɔn ɔlrɛdi kam nia am, ɛn insɛf dɔn prɔmis se i go kam nia yu. (Jems 4:8) I gud fɔ mek ɔda pipul dɛn si se yu dɔn kam bak na di kɔngrigeshɔn. Bɔt yu nid fɔ du pas dat. Yu nid fɔ kɔntinyu fɔ gɛt lɔv fɔ yu Papa ɛn Padi, Jiova. Aw yu go du dis?

SƐT GOL DƐN WE YU GO EBUL FƆ RICH

Tray fɔ sɛt gol dɛn we yu go ebul fɔ rich. Sɔntɛm yu stil mɛmba di men tin dɛn we yu bin lan bɔt Jiova ɛn in prɔmis fɔ de sote go na Paradays. Bɔt naw, yu nid fɔ mek tɛm bak fɔ du tin dɛn lɛk fɔ de go prich ɔltɛm, go di mitin dɛn, ɛn fɔ spɛn tɛm wit yu brɔda ɛn sista dɛn. Lɛ wi tɔk bɔt sɔm gol dɛn.

Tɔk to Jiova ɔltɛm. Yu Papa ɔndastand se if yu kɔntinyu fɔ fil bad fɔ di rɔng tin we yu bin dɔn du, i go at fɔ mek yu pre to am. (Rom. 8:26) Bɔt, “nɔ taya fɔ pre.” Tɛl Jiova aw yu rili want fɔ gɛt tayt padi biznɛs wit am. (Rom. 12:12) Andre bin mɛmba se: “A bin rili de shem ɛn fil gilti. Bɔt afta ɛnitɛm we a pre, a bin de fil fayn. A bin de gɛt mɔ gladi-at.” If yu nɔ no wetin fɔ pre fɔ, luk di prea dɛn we Kiŋ Devid bin rayt na Di Sam Dɛm 51 ɛn 65, afta i ripɛnt.

Stɔdi di Baybul ɔltɛm. Dis go ɛp yu fɔ gɛt strɔng fet ɛn fɔ lɛk Jiova mɔ. (Sam 19:7-11) Felipe bin se: “Bikɔs a nɔ bin de rid di Baybul ɛn stɔdi ɛvride, dat bin mek a wik ɛn a mek Jiova in at pwɛl. A nɔ bin want fɔ mek dis sem mistek igen, so a bin disayd se a go de du mi pasɔnal stɔdi ɔltɛm.” Yu go ebul fɔ du di sem tin. If yu nid ɛp fɔ pik tɔpik fɔ du yu pasɔnal stɔdi, yu kin aks wan machɔ padi fɔ ɛp yu.

Gɛt tayt padi biznɛs wit yu brɔda ɛn sista dɛn. Sɔm pipul dɛn we bin dɔn kam bak na di kɔngrigeshɔn kin wɔri se ɔda pipul dɛn go vɛks pan dɛn. Larisa bin se: “A bin rili de shem. A bin fil se a bin dɔn kɔmɔt biɛn mi brɔda ɛn sista dɛn na di kɔngrigeshɔn. A bin kɔntinyu fɔ fil da we de fɔ lɔng tɛm.” Na fɔ biliv se di ɛlda dɛn ɛn ɔda machɔ brɔda ɛn sista dɛn rili want fɔ ɛp yu fɔ gɛt tayt padi biznɛs wit Jiova bak. (Rid di bɔks we nem, “Wetin Ɛlda dɛn Go Du?”) Dɛn gladi we yu kam bak, ɛn dɛn want yu fɔ gladi.—Prɔv. 17:17, NWT.

Wetin go mek yu kam nia di kɔngrigeshɔn? Na fɔ go ɔl di mitin dɛn wit yu brɔda ɛn sista dɛn, ɛn go de prich wit dɛn ɔltɛm. Aw dis go ɛp yu? Fɛliks bin se: “Di kɔngrigeshɔn bin rili want fɔ mek a kam bak. A bin no se dɛn lɛk mi. Dɛn ɔl bin ɛp mi fɔ bi pat ɔf di famili bak, fɔ no se Jiova dɔn fɔgiv mi, ɛn fɔ mek a kɔntinyu fɔ sav Jiova.—Rid di bɔks we nem, “Wetin Yu Go Du?”

NƆ GIV-ƆP!

As yu de tray fɔ gɛt tayt padi biznɛs wit Jiova bak, Setan go kɔntinyu fɔ sɛn prɔblɛm dɛn pan yu fɔ mek yu wik. (Lyuk 4:13) Rɛdi fɔ dat bay we yu de du di tin dɛn we go mek yu gɛt tayt padi biznɛs wit Jiova.

We Jiova bin de tɔk bɔt in ship dɛn, i prɔmis dɛn se: “A go luk fɔ di wan dɛn we lɔs, ɛn a go briŋ kam bak di wan we stre, ɛn a go mɛn dɛn wan we kripul, ɛn a go mek di wik [wan] dɛn gɛt trɛnk.” (Izi. 34:16) Jiova dɔn ɛp bɔku ɔda pipul dɛn fɔ gɛt tayt padi biznɛs wit am bak. Na fɔ biliv se i want fɔ ɛp yu fɔ kɔntinyu fɔ gɛt tayt padi biznɛs wit am.

Wetin Ɛlda dɛn Go Du?

Di ɛlda dɛn gɛt bɔku tin dɛn we dɛn go du fɔ ɛp di wan dɛn we dɔn kam bak na di kɔngrigeshɔn, so dat dɛn go gɛt tayt padi biznɛs wit Jiova bak. Notis wetin dɛn go ebul du fɔ di wan dɛn we dɔn kam bak na di kɔngrigeshɔn.

Ɛnkɔrej dɛn. Apɔsul Pɔl bin no se i pɔsibul fɔ lɛ pɔsin we dɔn kam bak to Jiova alaw in at fɔ “pwɛl pasmak te i giv-ɔp.” (2 Kɔr. 2:7) Sɔntɛm, i go de shem ɛn fil bad. Pɔl bin advays di kɔngrigeshɔn se: “Una fɔ fɔgiv am wit ɔl una at ɛn kɔrej am.” Di wan dɛn we dɔn kam bak na di kɔngrigeshɔn kin nid fɔ no se Jiova ɛn dɛn brɔda ɛn sista dɛn lɛk dɛn pasmak. We di ɛlda dɛn de tɛl dɛn tɛnki ɔltɛm ɛn ɛp dɛn, dat kin ɛp fɔ mek dɛn at nɔ pwɛl.

Pre wit dɛn. “We pɔsin we de du wetin rayt rili beg Gɔd, dat rili gɛt pawa.” (Jems 5:16) Larisa, we wi bin dɔn tɔk bɔt, se: “A bin tɛl di ɛlda dɛn bɔt di tin dɛn we de mek a fred ɛn di dawt dɛn we a bin gɛt. Dɛn bin pre wit mi ɛn pre fɔ mi bak. Dɔn, a kam fɔ ɔndastand se di ɛlda dɛn nɔ bin vɛks pan mi. Dɛn bin want fɔ ɛp mi fɔ gɛt tayt padi biznɛs wit Jiova bak.” Tio se: “Di ɛlda dɛn prea dɛn mek a biliv tranga wan se Jiova rili lɛk mi, ɛn i de si di gud we a de du, nɔto jɔs di bad.”

Bi padi to dɛn. Di wan dɛn we dɔn kam bak to Jiova nid padi dɛn na di kɔngrigeshɔn. Wan ɛlda we nem Jɔstin se: “Prich wit dɛn ɛnitɛm we yu ebul, ɛn mek shɔ se yu de go fɛn dɛn na dɛn os. I rili impɔtant fɔ bi dɛn padi.” Wan ɔda ɛlda we nem Ɛnri se, “If ɔda brɔda ɛn sista dɛn de si se di ɛlda dɛn de mek padi wit di wan dɛn we dɔn kam bak na di kɔngrigeshɔn, dɛnsɛf go tray fɔ du di sem tin.”

Ɛp dɛn fɔ stɔdi. Machɔ padi dɛn kin ɛp di wan dɛn we dɔn kam bak na di kɔngrigeshɔn fɔ gɛt fayn shɛdul fɔ stɔdi. Wan ɛlda we nem Dako se: “A lɛk fɔ tɛl dɛn bɔt di fayn tin dɛn we a lan na mi pasɔnal stɔdi, ɛn fɔ sho dɛn aw a de rili ɛnjɔy fɔ stɔdi di Baybul. A kin arenj bak fɔ stɔdi wan fayn atikul wit dɛn.” Wan ɔda ɛlda we nem Kletin se: “A kin ɛnkɔrej dɛn fɔ luk fɔ stori dɛn na di Baybul bɔt pipul dɛn we go tru di sem tin dɛn we dɛnsɛf bin go tru, ɛn fɔ si wetin dɛn kin lan frɔm dɛn.”

Bi gud shɛpad. Di wan dɛn we dɔn kam bak na di kɔngrigeshɔn dɔn si we di ɛlda dɛn dɔn bi jɔj. Bɔt na naw mɔ dɛn nid fɔ si dɛn as shɛpad dɛn. (Jɛr. 23:4) Bi pɔsin we kwik fɔ lisin ɛn we rɛdi fɔ tɛl tɛnki ɔltɛm. Go de tɔk wit dɛn fast fast. Notis wetin wan ɛlda we nem Makɔs kin du we i kin go du shɛpadin visit. I se: “Wi kin rid skripchɔ wit dɛn, tɛl dɛn tɛnki, ɛn tɛl dɛn se wi ɛn Jiova rili gladi we dɛn de tray tranga wan fɔ kam bak to Am. Afta we wi kin dɔn ɛni shɛpadin visit, wi kin pik ɔda tɛm we wi go kam bak.”

a Dɛn dɔn chenj sɔm nem dɛn na dis atikul.