STƆDI ATIKUL 21
SIŊ 107 Di We Aw Gɔd Want Wi fɔ Sho Lɔv
Aw Wi Go Ebul Fɛn Gud Man ɔ Uman fɔ Mared?
“Udat ebul fɛn gud wɛf? Gud wɛf valyu fa fawe pas koral dɛn.”—PRƆV. 31:10.
MEN PƆYNT
Wi go tɔk bɔt Baybul prinsipul dɛn we go ɛp pɔsin fɔ fɛn gud man ɔ uman fɔ mared ɛn aw ɔda pipul dɛn na di kɔngrigeshɔn go sɔpɔt brɔda ɔ sista dɛn we nɔ mared bɔt we want fɔ mared.
1-2. (a) Wetin Kristian dɛn we nɔ mared fɔ tek tɛm tink bɔt bifo dɛn bigin wach dɛnsɛf fɔ mared? (b) Wetin i min fɔ mek “tu pipul dɛn wach dɛnsɛf fɔ mared”? (Luk “Wɔd we dɛn Ɛksplen.”)
YU GO lɛk fɔ mared? Pan ɔl we nɔto mared go mek pɔsin gɛt gladi-at, bɔku Kristian dɛn we nɔ mared ilɛk dɛn yɔŋ ɔ ol de luk fɔ pɔsin fɔ mared. As wi ɔl no, bifo yu bigin luk fɔ pɔsin fɔ mared, yu fɔ gɛt tayt padi biznɛs wit Jiova, bi pɔsin we machɔ, ɛn we ebul fɔ kia fɔ di tin dɛn we una go nid afta una mared.a (1 Kɔr. 7:36) If yu ebul fɔ du dat, i go pɔsibul fɔ mek yu gɛt gladi-at na yu mared-os.
2 Bɔt, i nɔ kin izi ɔltɛm fɔ fɛn gud man ɔ uman fɔ mared. (Prɔv. 31:10) Ɛn ivin we yu fɛn pɔsin we yu go want fɔ no mɔ, sɔntɛm i nɔ go izi fɔ mek una bigin wach unasɛf fɔ mared.b Insay dis atikul, wi go tɔk bɔt wetin go ɛp Kristian dɛn we nɔ mared fɔ fɛn gud man ɔ uman fɔ mared ɛn fɔ bigin wach dɛnsɛf fɔ mared. Wi go tɔk bak bɔt aw ɔda brɔda ɛn sista dɛn na di kɔngrigeshɔn go sɔpɔt di wan dɛn we want fɔ mared.
WETIN GO ƐP YU FƆ FƐN GUD MAN Ɔ UMAN FƆ MARED?
3. Wetin na sɔm tin dɛn we Kristian we nɔ mared fɔ tink bɔt we i de luk fɔ pɔsin fɔ mared?
3 If yu go lɛk fɔ mared, i go fayn fɔ mek yu no wetin yu de luk fɔ pan di pɔsin we yu want fɔ mared bifo yu bigin wach pɔsin fɔ mared. If yu nɔ du dat, sɔntɛm yu go se yu nɔ want pɔsin we fɔ dɔn bi gud man ɔ wɛf, ɔ yu go bigin wach pɔsin we nɔ go bi gud man ɔ wɛf fɔ yu. As wi ɔl no, ɛnibɔdi we yu want fɔ mared fɔ bi Kristian we dɔn baptayz. (1 Kɔr. 7:39) Bɔt nɔto ɔlman we dɔn baptayz go bi gud man ɔ wɛf fɔ yu. So i go fayn fɔ mek yu aks yusɛf dɛn kwɛstyɔn dɛn ya: ‘Us gol dɛn a gɛt? Us kwaliti dɛn impɔtant to mi we a want di pɔsin fɔ gɛt? Fɔ se a de ɛkspɛkt tumɔs frɔm di pɔsin?’
4. Wetin sɔm pipul dɛn kin pre bɔt we dɛn de fɛn pɔsin fɔ mared?
4 If yu want fɔ mared, wan dawt nɔ de se yu go dɔn pre bɔt dat. (Fil. 4:6) Fɔ tru, Jiova nɔ prɔmis fɔ gi ɛnibɔdi man ɔ wɛf. Bɔt i bisin bɔt wetin yu nid ɛn aw yu de fil ɛn i want fɔ ɛp yu we yu de fɛn gud man ɔ uman fɔ mared. So kɔntinyu fɔ tɛl am bɔt wetin yu want ɛn aw yu de fil. (Sams 62:8) Pre fɔ mek yu gɛt sɛns ɛn bi pɔsin we de peshɛnt. (Jems 1:5) Wan brɔda we nɔ mared we nem Jɔnc we de na Amɛrika tɔk bɔt ɔda tin dɛn we i kin pre bɔt. I se: “A kin tɛl Jiova bɔt di kwaliti dɛn we a go want di pɔsin we a go mared fɔ gɛt. A kin pre fɔ mek a gɛt chans fɔ mit pɔsin we go bi gud wɛf. A kin pre to Jiova bak fɔ ɛp mi fɔ gɛt kwaliti dɛn we go mek a bi gud maredman.” Tanya we na wan sista we de na Sri Lanka tɔk se: “As a de wach fɔ gud man fɔ mared, a kin pre to Jiova fɔ ɛp mi fɔ kɔntinyu fɔ fetful to am, tink di rayt we, ɛn gɛt gladi-at.” Ivin if yu nɔ gɛt di rayt pɔsin fɔ mared rayt naw, Jiova prɔmis fɔ gi yu di tin dɛn we yu nid ɛn di lɔv ɛn atɛnshɔn we yu nid.—Sams 55:22.
5. Us chans Kristian dɛn we nɔ mared gɛt fɔ si pɔsin we lɛk Jiova? (1 Kɔrintians 15:58) (Luk bak di pikchɔ.)
5 Di Baybul ɛnkɔrej wi fɔ go de du “plɛnti wok fɔ di Masta.” (Rid 1 Kɔrintians 15:58.) If yu bizi de wok fɔ Jiova ɛn de spɛn tɛm wit difrɛn brɔda ɛn sista dɛn, yu nɔ go jɔs de spɛn tɛm wit gud pipul dɛn, bɔt yu go gɛt chans bak fɔ si ɔda brɔda ɔ sista dɛn we nɔ mared we de pe atɛnshɔn fɔ du wetin Jiova want jɔs lɛk yu. As yu de du yu bɛst fɔ mek Jiova gladi, yusɛf go gɛt tru tru gladi-at.
If yu bizi de du Jiova in wok ɛn de spɛn tɛm wit difrɛn brɔda ɛn sista dɛn, sɔntɛm yu go mit ɔda pipul dɛn we want fɔ mared (Luk na paregraf 5)
6. Wetin Kristian we nɔ mared fɔ mɛmba we i de luk fɔ pɔsin fɔ mared?
6 Bɔt tek tɛm mek yu nɔ alaw di luk we yu de luk fɔ pɔsin fɔ mared fɔ bi di tin we impɔtant pas ɔl ɔda tin na yu layf. (Fil. 1:10) Di tin we go mek yu gɛt tru tru gladi-at na yu padi biznɛs wit Jiova, nɔto we yu mared ɔ we yu nɔ mared. (Mat. 5:3) Ɛn we yu nɔ mared, sɔntɛm yu go gɛt bɔku fridɔm fɔ du mɔ na di prichin wok. (1 Kɔr. 7:32, 33) Yuz dis tɛm di bɛst we. Jɛsika we na wan sista na Amɛrika mared we i ɔlmos ol 40 ia. I tɔk se, “A bin bizi de du di prichin wok, ɛn dat bin ɛp mi fɔ gɛt satisfay maynd pan ɔl we a bin want fɔ mared.”
TRAY FƆ NO UDAT DI PƆSIN BI
7. Wetin mek i fayn fɔ tray fɔ no udat di pɔsin we yu want fɔ mared bi bifo yu tɛl am se yu lɛk am? (Prɔvabs 13:16)
7 Wetin yu go du if yu tink se pɔsin go bi gud maredman ɔ wɛf? Fɔ se yu fɔ mit am wantɛm wantɛm ɛn tɛl am se yu lɛk am. Di Baybul tɔk se pɔsin we gɛt sɛns de tray fɔ no bɔt sɔntin bifo i du ɛnitin. (Rid Prɔvabs 13:16.) So i go fayn fɔ tray fɔ no sikrit wan udat di pɔsin bi bifo yu tɛl am se yu lɛk am. Ashwin we de na Nɛdaland tɔk se, “I izi fɔ mek pɔsin lɛk ɔda pɔsin, bɔt i izi bak fɔ stɔp fɔ fil da we de. Bɔt we yu gi yusɛf tɛm fɔ tray fɔ no di pɔsin, una nɔ go bigin wach unasɛf fɔ mared jɔs bikɔs ɔf aw una de fil.” Dɔn bak, sɔntɛm as yu de tray fɔ no di pɔsin, yu go kam fɔ si se i nɔ go bi gud man ɔ wɛf fɔ yu.
8. Aw yu go tray fɔ no di pɔsin we yu want fɔ mared? (Luk bak di pikchɔ.)
8 Wetin yu go du fɔ tray fɔ no di ɔda pɔsin sikrit wan? Sɔntɛm yu go notis tin dɛn bɔt di pɔsin in padi biznɛs wit Jiova, in abit dɛn, ɛn di we aw i de biev we una de na mitin ɔ na ɔda program dɛn. Udat dɛn na in padi dɛn ɛn wetin i kin tɔk bɔt? (Lyuk 6:45) Una tu gɛt di sem gol dɛn? Yu kin tɔk to di ɛlda dɛn na in kɔngrigeshɔn ɔ ɔda machɔ Kristian dɛn we rili sabi am. (Prɔv. 20:18) Sɔntɛm yu kin aks bɔt di kayn pɔsin we i bi ɛn di kwaliti dɛn we i gɛt. (Rut 2:11) As yu de tray fɔ no dis pɔsin, nɔ du tin dɛn we go mek i nɔ fil fayn. Rɛspɛkt di we aw i de fil ɛn nɔ tray fɔ de usay i de ɔltɛm jɔs fɔ no udat i bi.
Bifo yu tɛl pɔsin se yu lɛk am, tray fɔ no di pɔsin fɔs sikrit wan fɔ sɔm tɛm (Luk na paregraf 7 ɛn 8)
9. Wetin yu fɔ shɔ bɔt bifo yu tɛl di pɔsin se yu lɛk am?
9 Aw lɔng yu fɔ tek fɔ no di pɔsin bifo yu tɛl am se yu lɛk am? If yu rɔsh fɔ tɛl di pɔsin se yu lɛk am, sɔntɛm i go tink se yu nɔ tek tɛm tink bifo yu disayd fɔ du dat. (Prɔv. 29:20) Bɔt, if yu tek lɔng tɛm bifo yu tɛl di pɔsin, sɔntɛm i go tink se yu nɔ ebul fɔ disayd fɔ yusɛf mɔ if i dɔn notis se yu lɛk am. (Ɛkli. 11:4) Mɛmba se bifo yu tɛl pɔsin se yu lɛk am, yu nɔ nid fɔ shɔ se yu go mared da pɔsin de. Bɔt yu fɔ shɔ se yu dɔn rɛdi fɔ mared ɛn di ɔda pɔsin go bi gud man ɔ wɛf fɔ yu.
10. Wetin yu go du if yu notis se pɔsin lɛk yu, bɔt yu nɔ lɛk am?
10 Bɔt wetin yu go du if yu notis se pɔsin lɛk yu? If yu nɔ lɛk am, tray fɔ mek i no dat klia wan bay di tin dɛn we yu de du. I nɔ go fayn fɔ lɛ yu mek di pɔsin tink se yu go want fɔ mek una wach unasɛf fɔ mared we nɔto so i bi.—1 Kɔr. 10:24; Ɛfi. 4:25.
11. Na kɔntri dɛn usay ɔda pipul dɛn kin arenj fɔ lɛ tu pipul dɛn mared ɔ wach dɛnsɛf fɔ mared, wetin dɛn pipul dɛn de fɔ mɛmba?
11 Na sɔm kɔntri dɛn, na di mama ɛn papa ɔ ɔda big pipul dɛn, dɛn kin ɛkspɛkt fɔ pik man ɔ wɛf fɔ dɛn fambul dɛn we nɔ mared. Na ɔda kɔntri dɛn, na di famili ɔ padi dɛn kin fɛn man ɔ uman fɔ pɔsin we nɔ mared, dɔn dɛn kin arenj fɔ mek di man ɛn di uman si ɛn tɔk fɔ si if dɛn go want fɔ wach dɛnsɛf. If dɛn tɛl yu fɔ arenj mared ɔ fɔ mek tu pipul dɛn wach dɛnsɛf fɔ mared, tink bɔt wetin di man ɛn uman go lɛk ɛn nid. If yu tink se yu dɔn fɛn gud man ɔ wɛf fɔ yu padi, tray fɔ sabi di pɔsin gud gud wan, tray fɔ no di kwaliti dɛn we i gɛt, ɛn wetin impɔtant pas ɔl na fɔ tray fɔ no if i gɛt tayt padi biznɛs wit Jiova. Fɔ gɛt tayt padi biznɛs wit Jiova bɛtɛ fa fawe pas fɔ gɛt mɔni, fɔ lan bɔku buk, ɛn fɔ bi impɔtant pɔsin. Bɔt mɛmba se na di brɔda ɛn sista gɛt di rayt fɔ disayd if dɛn go mared.—Gal. 6:5.
AW YU ƐN ƆDA PƆSIN GO BIGIN WACH UNASƐF FƆ MARED
12. If yu want fɔ mek yu ɛn ɔda pɔsin bigin wach unasɛf fɔ mared, aw yu go tɛl di pɔsin?
12 If yu go lɛk fɔ mek yu ɛn ɔda pɔsin bigin wach unasɛf fɔ mared, aw yu go tɛl di pɔsin?d Yu kin arenj fɔ tɔk to di pɔsin fes-to-fes usay ɔda pipul dɛn de ɔ na fon. Tɛl di pɔsin klia wan aw yu de fil bɔt am. (1 Kɔr. 14:9) If nid de, gi am tɛm fɔ tink bɔt wetin i go tɛl yu. (Prɔv. 15:28) Ɛn if i nɔ lɛk yu, na fɔ rɛspɛkt di we aw i de fil ɛn nɔ fos am.
13. Wetin yu go du if pɔsin tɛl yu se i lɛk yu? (Koloshians 4:6)
13 Wetin yu go du if pɔsin tɛl yu se i lɛk yu? Sɔntɛm di pɔsin bin nid fɔ gɛt maynd fɔ kam tɛl yu aw i de fil. So biev fayn to am ɛn sho se yu rɛspɛkt am. (Rid Koloshians 4:6.) If yu nid tɛm fɔ tink if yu go gri fɔ mek una bigin wach unasɛf fɔ mared, na fɔ tɛl am. Bɔt, nɔ westɛm fɔ tɛl am. (Prɔv. 13:12) If yu nɔ lɛk am, na fɔ tek tɛm tɔk ɛn tɛl am klia wan. Notis wetin wan brɔda we nem Ans we de na Ɔstria bin du we wan sista bin tɛl am se i lɛk am. I tɔk se: “A tek tɛm tɔk to am, bɔt a bin mek i no klia wan se a nɔ lɛk am. A nɔ bin westɛm fɔ tɛl am se a nɔ lɛk am bikɔs a nɔ bin want mek i fil se a want am. Bikɔs ɔf dat, a bin de tek tɛm wit di we aw a de biev ɛn tɔk to am afta i bin dɔn tɛl mi se i lɛk mi.” Bɔt, if yu want mek yu ɛn di pɔsin bigin fɔ wach unasɛf fɔ mared, tɛl am bɔt aw yu de fil ɛn wetin yu de ɛkspɛkt we una de wach unasɛf fɔ mared. Di tin dɛn we yu de ɛkspɛkt go difrɛn frɔm di tin dɛn we di ɔda pɔsin de ɛkspɛkt bikɔs ɔf una kɔlchɔ ɔ ɔda tin dɛn.
AW ƆDA PIPUL DƐN GO SƆPƆT KRISTIAN DƐN WE NƆ MARED?
14. Aw di wɔd dɛn we wi de tɔk go sho se wi de sɔpɔt Kristian dɛn we nɔ mared?
14 Aw wi ɔl go sɔpɔt wi Kristian dɛn we want fɔ mared? Wan we aw wi go du dat na we wi tek tɛm wit wetin wi de tɔk. (Ɛfi. 4:29) I go fayn fɔ mek wi aks wisɛf dɛn kwɛstyɔn dɛn ya: ‘A kin tɔk wɔd dɛn we kin mek di wan dɛn we want fɔ mared fil bad? We a si brɔda ɛn sista we nɔ mared de tɔk, a kin tink se dɛn want dɛnsɛf?’ (1 Tim. 5:13) Dɔn bak, wi nɔ fɔ ɛva mek brɔda ɔ sista we nɔ mared fil se sɔntin rɔng wit am ɔ i nɔ impɔtant bikɔs i nɔ mared. Ans we wi bin dɔn tɔk bɔt, tɔk se: “Sɔm brɔda dɛn kin se, ‘Wetin mek yu nɔ de mared? Na ol yu de ol so.’ Dɛn kayn wɔd dɛn de kin mek brɔda ɛn sista dɛn we nɔ mared fil se dɛn nɔ impɔtant ɛn i kin mek dɛn rili want fɔ mared.” I go rili fayn fɔ luk fɔ we dɛn fɔ tɛl brɔda ɛn sista dɛn we nɔ mared tɛnki fɔ wetin dɛn de du!—1 Tɛs. 5:11.
15. (a) Akɔdin to di prinsipul we de na Romans 15:2, wetin wi fɔ tink bɔt bifo wi ɛp pɔsin we nɔ mared fɔ fɛn pɔsin fɔ mared? (Luk bak di pikchɔ.) (b) Us impɔtant lɛsin dɛn yu lan frɔm di vidio?
15 Wetin wi go du if wi tink se wan patikyula brɔda ɛn sista go bi gud maredman ɔ wɛf? Di Baybul tɛl wi se wi fɔ tink bɔt aw ɔda pipul dɛn de fil. (Rid Romans 15:2.) Bɔku brɔda ɛn sista dɛn we nɔ mared nɔ want mek ɔda pipul dɛn sho dɛn pɔsin fɔ mared ɛn wi fɔ rɛspɛkt wetin dɛn want. (2 Tɛs. 3:11) Sɔntɛm ɔda brɔda ɛn sista dɛn go want mek dɛn ɛp dɛn, bɔt wi nɔ fɔ du dat if dɛn nɔ aks wi fɔ ɛp dɛn.e (Prɔv. 3:27) Sɔm nɔ kin want mek dɛn sho dɛn pɔsin fɔ mared. Wan sista we nem Lidia we de na Jamani tɔk se: “Yu kin mek program ɛn invayt di brɔda ɛn di sista. Jɔs tray fɔ lɛ di brɔda ɛn di sista spɛn tɛm togɛda ɛn lɛf dɛn fɔ disayd wetin dɛn want fɔ du.”
Big gɛt-to-gɛda dɛn kin gi Kristian dɛn we nɔ mared chans fɔ si dɛnsɛf (Luk na paregraf 15)
16. Wetin Kristian dɛn we nɔ mared fɔ mɛmba?
16 Wi ɔl go ebul fɔ gɛt gladi-at ilɛk wi mared ɔ wi nɔ mared! (Sams 128:1) So if yu want fɔ mared bɔt yu nɔ si pɔsin yet, kɔntinyu fɔ pe atɛnshɔn pan yu savis to Jiova. Wan sista we de na Makayo we nem Sin Yi tɔk se: “We yu kɔmpia di tɛm we yu go spɛn wit yu man ɔ wɛf na Paradays to di tɛm we yu go spɛn we yu nɔ mared, yu go si se i rili shɔt. So ɛnjɔy di tɛm we yu nɔ mared ɛn yuz am di bɛst we.” Bɔt wetin yu go du if yu dɔn fɛn pɔsin we yu tink se go bi gud man ɔ wɛf ɛn una dɔn bigin fɔ wach unasɛf fɔ mared? Insay di nɛks atikul, wi go tɔk bɔt wetin go ɛp yu fɔ disayd fɔ du di rayt tin we una de wach unasɛf fɔ mared.
SIŊ 137 Fetful Uman Dɛn
a Fɔ no if yu dɔn rɛdi fɔ mared, luk di atikul na jw.org we gɛt di taytul, “Dating—Pat 1: Am I Ready to Date?”
b WƆD WE DƐN ƐKSPLEN: Insay dis atikul ɛn di nɛks wan, we wi tɔk se “tu pipul dɛn de wach dɛnsɛf fɔ mared,” wi de tɔk bɔt di tɛm we dɛn kin spɛn togɛda fɔ sabi dɛnsɛf gud gud wan ɛn fɔ si if dɛn go fit fɔ mared. Na sɔm kɔntri dɛn, dɛn kin kɔl am bak detin, we min se tu pipul dɛn we lɛk dɛnsɛf de spɛn tɛm togɛda fɔ sabi dɛnsɛf. Dis kin bigin we man ɛn uman tɔk se dɛn lɛk dɛnsɛf ɛn i go kɔntinyu te dɛn mared ɔ dɛn pat.
c Dɛn dɔn chenj sɔm nem dɛn insay dis atikul.
d Na sɔm kɔlchɔ dɛn, na brɔda kin mit sista ɛn tɛl am se i want lɛ dɛn bigin wach dɛnsɛf fɔ mared. Bɔt i nɔ bad bak fɔ lɛ sista go mit brɔda ɛn tɛl am se i want am. (Rut 3:1-13) Fɔ lan mɔ, luk di atikul we gɛt di taytul “Young People Ask . . . How Can I Tell Him How I Feel?” na di Ɔktoba 22, 2004 Awake!
e Luk di vidio we gɛt di taytul, Pipul dɛn we De Tinap Tranga Wan fɔ di Fet—Kristian dɛn we Nɔ Mared na jw.org.