“ Yu Na Pɔsin We Rili Gɛt Valyu”!

1-2. Wetin go ɛp wi fɔ biliv se Jiova rili valyu wi?

JIOVA rili valyu in savant dɛn. Bɔt sɔm pan dɛn nɔ biliv se Jiova rili lɛk dɛn. Sɔntɛm dɛn de fil da we de bikɔs pɔsin bin trit dɛn lɛk se dɛn nɔ gɛt valyu. Yu dɔn ɛva fil da we de? If na so i bi, wetin go ɛp yu fɔ biliv se Jiova rili valyu yu?

² Wan tin we go ɛp yu na we yu rid stori dɛn na di Baybul we de sho aw Jiova want fɔ mek dɛn trit pipul dɛn. Jizɔs, we na Gɔd in Pikin, bin de rɛspɛkt pipul dɛn ɛn trit dɛn fayn. Di we aw i bin de trit pipul dɛn sho se in ɛn in Papa rili valyu di wan dɛn we ɔmbul ɛn we de fil se dɛn nɔ gɛt valyu. (Jɔn 5:19; Ibru. 1:3) Insay dis atikul, wi go tɔk bɔt: (1) aw Jizɔs bin ɛp pipul dɛn fɔ no se dɛn gɛt valyu ɛn (2) wetin wi go du fɔ mek wisɛf sɛf biliv se Gɔd rili valyu wi.—Egay 2:7.

AW JIZƆS BIN ƐP PIPUL DƐN FƆ NO SE DƐN GƐT VALYU?

3. Aw Jizɔs bin trit di pipul dɛn na Galili we bin kam to am fɔ mek i ɛp dɛn?

³ Di tɔd tɛm we Jizɔs bin de prich na Galili, bɔku bɔku pipul dɛn bin de kam fɔ lisin to am ɛn fɔ mek i mɛn dɛn. Jizɔs bin tɔk se “pipul dɛn bin de trit dɛn bad ɛn dɛn nɔ bin bisin bɔt dɛn lɛk ship dɛn we nɔ gɛt shɛpad.” (Mat. 9:36; luk di stɔdi not dɛn.) Di bigman dɛn pan Gɔd biznɛs nɔ bin bisin bɔt di pipul dɛn bikɔs dɛn bin fil se di pipul dɛn nɔ impɔtant, ɛn dɛn bin ivin tɔk se dɛn “gɛt swɛ.” (Jɔn 7:47-49; stɔdi not) Bɔt Jizɔs bin de ɔnɔ dɛn bay we i bin de tich dɛn ɛn mɛn dɛn. (Mat. 9:35) Pantap dat, fɔ mek i go ɛp mɔ pipul dɛn, i bin tren in apɔsul dɛn fɔ du di prichin wok ɛn gi dɛn pawa fɔ mɛn ɔlkayn sik dɛn.​—Mat. 10:5-8.

4. Wetin wi lan frɔm di we aw Jizɔs bin de trit ɔmbul pipul dɛn we bin de kam to am fɔ mek i tich dɛn?

⁴ We Jizɔs bin de rɛspɛkt pipul dɛn ɛn trit dɛn fayn, i bin de sho se in ɛn in Papa valyu di wan dɛn we ɔda pipul dɛn de tink se nɔ impɔtant. If yu de sav Jiova ɛn yu fil se yu nɔ gɛt valyu, na fɔ tink bɔt aw Jizɔs bin de trit ɔmbul pipul dɛn we bin de kam to am fɔ mek i tich dɛn. We yu du dat, i go ɛp yu fɔ no se Jiova rili valyu yu.

5. Wetin wi no bɔt wan uman we Jizɔs bin mit na Galili?

⁵ Jizɔs nɔ bin jɔs de tich pipul dɛn as grup, bɔt i bin de ɛp ɛn tich dɛn bak wan bay wan. Fɔ ɛgzampul, we Jizɔs bin de prich na Galili, i bin mit wan uman we bin dɔn de blid fɔ 12 ia. (Mak 5:25) Akɔdin to di Lɔ, dis sik bin mek di uman nɔ klin, ɛn ɛnibɔdi we tɔch am, insɛf nɔ go klin. Dis go dɔn mek pipul dɛn avɔyd am. Pantap dat, i nɔ bin de ebul fɔ wɔship Jiova wit ɔda pipul dɛn na di sinagɔg ɔ we dɛn gɛt fɛstival dɛn. (Liv. 15:​19, 25) Fɔ tru, dis uman nɔ bin jɔs sik, bɔt sɔntɛm i bin de fil se i nɔ gɛt valyu.—Mak 5:26.

6. Wetin di uman bin du fɔ mek i wɛl?

⁶ Dis uman we bin de rili sɔfa bin want fɔ mek Jizɔs mɛn am. Bɔt i nɔ bin go mit Jizɔs ɛn beg am fɔ mɛn am. Wetin mek? Sɔntɛm di kayn sik we i gɛt bin de mek i shem. Ɔ sɔntɛm i go dɔn fred se Jizɔs go tɔk pan am bikɔs i go midul di krawd pan ɔl we i nɔ klin. So i jɔs tɔch Jizɔs in klos we i wɛr pantap, bikɔs i bin biliv tranga wan se dat go mek i wɛl. (Mak 5:​27, 28) Ɛn i bin wɛl bikɔs i gɛt strɔng fet! Dɔn we Jizɔs aks udat tɔch am, di uman tɔk se nain. Aw Jizɔs bin trit di uman?

7. Aw Jizɔs bin trit dis uman we bin de rili sɔfa? (Mak 5:34)

⁷ Jizɔs bin rɛspɛkt di uman ɛn trit am fayn. I bin notis se di uman “de fred ɛn trimbul.” (Mak 5:33) Ɛn bikɔs Jizɔs bin no aw di uman de fil, i tɔk fayn to am. I ivin kɔl am “mi pikin.” We Jizɔs kɔl am “mi pikin,” i nɔ jɔs sho se i rɛspɛkt am, bɔt i sho bak se i lɛk am ɛn i go trit am fayn. (Rid Mak 5:34.) Dis na di wangren tɛm insay di Baybul we Jizɔs kɔl ɛni uman “mi pikin.” Sɔntɛm i tɔk dɛn wɔd dɛn ya bikɔs i si se di uman bin de rili fred. Imajin aw di uman in at go dɔn rili kol! If Jizɔs nɔ fɔ dɔn tɔk fayn to am, pan ɔl we i go dɔn wɛl, sɔntɛm i go dɔn fil bad fɔ we i tɔch Jizɔs in klos ɛn go usay pipul dɛn de. Bɔt Jizɔs nɔ bin jɔs want fɔ mɛn am, i bin want fɔ ɛp am fɔ no se in Papa we de na ɛvin rili valyu am.

8. Us prɔblɛm dɛn wan sista we de na Brazil bin gɛt?

⁸ Tide bak, Gɔd in savant dɛn kin gɛt wɛlbɔdi prɔblɛm dɛn we kin mek dɛn at pwɛl ɛn fil se dɛn nɔ gɛt valyu. Lɛ wi tɔk bɔt Mariaa we na rɛgyula payɔnia na Brazil. We dɛn bɔn am, i nɔ bin gɛt fut ɛn lɛftan. I tɔk se: “Dɛn bin de provok mi na skul ɔltɛm bikɔs ɔf di we aw a de. Dɛn bin de kɔl mi nem dɛn we bin de mek a fil bad. Ivin mi fambul dɛn bin de mek a fil lɛk se a nɔ gɛt valyu.”

9. Wetin bin ɛp Maria fɔ no se Jiova valyu am?

⁹ Wetin bin ɛp Maria? We i bi Jiova Witnɛs, in brɔda ɛn sista dɛn bin ɛnkɔrej ɛn sɔpɔt am, ɛn dɛn ɛp am fɔ si insɛf di we aw Jiova de si am. I tɔk se: “If a se a de rayt ɔl di wan dɛn we dɔn ɛp mi dɛn nem dɛn, spes nɔ go de na mi notbuk fɔ du dat! A de tɛl Jiova tɛnki wit ɔl mi at fɔ we i gi mi dis kayn wɔndaful famili.” Maria in brɔda ɛn sista dɛn na di kɔngrigeshɔn dɔn rili ɛp am fɔ no se Gɔd valyu am.

10. Us prɔblɛm Meri Magdalin bin gɛt? Aw dat bin de mek i fil? (Luk bak di pikchɔ dɛn.)

¹⁰ Lɛ wi tɔk bɔt aw Jizɔs bin ɛp wan ɔda uman we nem Meri Magdalin. I bin gɛt sɛvin dimɔn dɛn! (Lyuk 8:2) Sɔntɛm dis bin de mek i du strenj tin dɛn, ɛn pipul dɛn bin de avɔyd am bikɔs ɔf dat. I bin de sɔfa bad bad wan. Ɛn i go bi se i bin de rili fred ɛn fil se nɔbɔdi nɔ lɛk am ɛn dɛn nɔ go want fɔ ɛp am. I go bi se na Jizɔs bin pul di dimɔn dɛn pan am, ɛn i bin kam fɔ bi Jizɔs in disaypul. Us ɔda we Jizɔs bin ɛp Meri Magdalin fɔ no se Gɔd valyu am?

11. Aw Jizɔs bin ɛp Meri Magdalin fɔ no se Gɔd valyu am? (Luk bak di pikchɔ dɛn.)

¹¹ Jizɔs bin gi Meri Magdalin di ɔnɔ fɔ de travul wit in ɛn in disaypul dɛn we dɛn de prich.b Bikɔs ɔf dat, i bin kɔntinyu fɔ bɛnifit frɔm di tin dɛn we Jizɔs bin de tich ɔda pipul dɛn. Dɔn bak, Jizɔs bin apia to am di de we i gɛt layf bak. Meri Magdalin na bin wan pan di fɔs disaypul dɛn we i tɔk to da de de. Jizɔs bin ivin sɛn am fɔ go tɛl in apɔsul dɛn se i dɔn gɛt layf bak. Ɔl dɛn tin dɛn ya we Jizɔs du bin ɛp Meri Magdalin fɔ no se Jiova rili valyu am!—Jɔn 20:​11-18.

12. Wetin mek Lidia bin fil se i nɔ gɛt valyu?

¹² Jɔs lɛk Meri Magdalin, bɔku pipul dɛn tide de fil se dɛn nɔ gɛt valyu. Wan sista na Spen we nem Lidia tɔk se in mama bin want fɔ pwɛl in bɛlɛ. Ɛn ivin we Lidia bin smɔl, in mama nɔ bin de trit am fayn, ɛn i bin de tɛl am bad wɔd dɛn. I tɔk se: “Bikɔs mi mama nɔ bin de sho se i lɛk mi, a bin rili want fɔ mek ɔda pipul dɛn lɛk mi ɛn bi mi padi. Bɔt a bin de fred se dat nɔ go ɛva apin bikɔs mi mama bin mek a fil se mi na bad pɔsin.”

13. Wetin bin ɛp Lidia fɔ no se Jiova valyu am?

¹³ We Lidia lan bɔt Jiova, tin bin chenj fɔ am. We i bin de pre to Jiova, rid di Baybul, ɛn we in brɔda ɛn sista dɛn bin de tɔk fayn to am ɛn trit am fayn, dat bin ɛp am fɔ no se Jiova valyu am. I tɔk se: “Mi man kin tɛl mi ɔltɛm se i rili lɛk mi. I kin mɛmba mi ɔltɛm se a gɛt fayn kwaliti dɛn, ɛn mi padi dɛnsɛf kin du di sem tin.” Yu ebul tink bɔt pɔsin we yu go ɛp fɔ mek i no se Jiova valyu am?

WETIN GO ƐP WI FƆ SI WISƐF DI WE AW JIOVA DE SI WI?

14. Aw 1 Samiɛl 16:7 go ɛp wi fɔ no di we aw Jiova de si pipul dɛn? (Luk bak di bɔks we gɛt di taytul “Wetin Mek Jiova Valyu In Pipul Dɛn?”)

¹⁴ Mɛmba se Jiova nɔ de si yu di we aw pipul dɛn na di wɔl de si yu. (Rid 1 Samiɛl 16:7.) I nɔ de wach di mɔni we yu gɛt, di buk we yu lan, ɔ di we aw yu luk fɔ mek i go si yu as pɔsin we gɛt valyu. (Ayz. 55:​8, 9) So tray fɔ si yusɛf di we aw Jiova de si yu, nɔ pe atɛnshɔn to di we aw pipul dɛn na di wɔl de si yu. Yu kin rid stori dɛn na di Baybul we de sho se Jiova bin valyu pipul dɛn we bin fil se dɛn nɔ gɛt valyu. Yu kin rid bɔt pipul dɛn lɛk Ilayja, Naomi, ɛn Ana. Yu kin ivin rayt bɔt tin dɛn we dɔn apin to yu we de sho se Jiova rili lɛk ɛn valyu yu. Dɔn bak, yu kin stɔdi pɔblikeshɔn dɛn we go ɛp yu fɔ si yusɛf as pɔsin we gɛt valyu.c

15. Wetin mek Jiova bin si Daniɛl as “pɔsin we rili gɛt valyu”? (Daniɛl 9:23)

¹⁵ Mɛmba se Jiova valyu yu bikɔs yu fetful to am. We Prɔfɛt Daniɛl bin dɔn ɔlmost rich 100 ia, tɛm bin de we i bin “rili taya” ɛn in at bin pwɛl. (Dan. 9:​20, 21) Aw Jiova bin ɛnkɔrej am? I bin sɛn enjɛl Gebrɛl to Daniɛl fɔ mɛmba am se in na “pɔsin we rili gɛt valyu,” ɛn I dɔn yɛri in prea dɛn. (Rid Daniɛl 9:23.) Wetin mek Gɔd bin rili valyu Daniɛl? Na bikɔs Daniɛl bin lɛk fɔ du wetin rayt ɛn i bin fetful. (Izi. 14:14) Jiova mek dɛn rayt dis stori na di Baybul fɔ ɛnkɔrej wi. (Rom. 15:4) Bikɔs yusɛf de du wetin rayt ɛn yu fetful to Jiova, i valyu yu. Ɛn jɔs lɛk aw i bin lisin to Daniɛl in prea dɛn, na so i go lisin to yu we yu de pre to am.—Mayk. 6:​8, futnot dɛn; Ibru. 6:10.

16. Wetin go ɛp yu fɔ si Jiova as yu Papa we lɛk yu?

¹⁶ Si Jiova as yu Papa we lɛk yu. I want fɔ ɛp yu, i nɔ de fɛn fɔlt pan yu. (Sam 130:3; Mat. 7:11; Lyuk 12:​6, 7) We bɔku pipul dɛn de mɛmba dis, i de ɛp dɛn fɔ no se dɛn gɛt valyu. Fɔ ɛgzampul, lɛ wi tɔk bɔt wan sista we de na Spen we nem Mishɛl. I bin de fil lɛk se i nɔ gɛt valyu ɛn nɔbɔdi nɔ lɛk am bikɔs in man bin dɔn de tɛl am bad wɔd dɛn fɔ lɔng tɛm. I tɔk se, “Ɛnitɛm a fil se a nɔ gɛt valyu, a kin imajin se Jiova tot mi nain an, ɛn i de sho mi se i lɛk mi ɛn i de protɛkt mi.” (Sam 28:9) Wan sista we de na Sawt Afrika we nem Lɔrɛn kin mɛmba insɛf se, “Bikɔs Jiova dɔn yuz in lɔv fɔ drɔ mi kam nia am, i dɔn ɛp mi fɔ de nia am ɔl dis tɛm, ɛn i dɔn ivin yuz mi fɔ tich ɔda pipul dɛn, dat de mek a no se i rili valyu mi.”—Osia 11:4.

17. Wetin go ɛp yu fɔ biliv tranga wan se Jiova gladi fɔ yu? (Sam 5:12) (Luk bak di pikchɔ.)

¹⁷ Biliv tranga wan se Jiova gladi fɔ yu. (Rid Sam 5:12.) Devid bin tɔk se we Jiova gladi fɔ pɔsin we de du wetin rayt, i tan lɛk “big shild” we de protɛkt am. We yu no se Jiova gladi fɔ yu ɛn i de sɔpɔt yu, dat go ɛp yu fɔ mek yu nɔ fil se yu nɔ gɛt valyu. Aw yu go no se Jiova gladi fɔ yu? Lɛk aw wi dɔn lan, Jiova de yuz in Wɔd di Baybul fɔ tɛl yu aw i de fil bɔt yu. Dɔn bak, i de yuz di ɛlda dɛn, yu tayt padi dɛn, ɛn ɔda pipul dɛn fɔ mɛmba yu se i valyu yu. Wetin yu fɔ du we dɛn ɛnkɔrej yu?

18. Wetin mek yu fɔ biliv di gud tin dɛn we pipul dɛn de tɔk bɔt yu?

¹⁸ If pipul dɛn we sabi yu ɛn we lɛk yu de tɔk gud tin dɛn bɔt yu, na fɔ biliv se wetin dɛn de tɔk na tru. Mɛmba se Jiova kin yuz dɛn fɔ ɛp yu fɔ no se i gladi fɔ yu. Mishɛl, we wi bin dɔn tɔk bɔt, tɔk se: “Smɔl smɔl, a kin tray fɔ mɛmba se we pipul dɛn tɔk fayn to mi, dɛn min wetin dɛn de se. I nɔ izi fɔ mek a biliv di gud tin dɛn we dɛn de tɔk bɔt mi, bɔt a no se Jiova want mek a biliv wetin dɛn de tɛl mi.” Di ɛlda dɛn dɔn ɛp Mishɛl fɔ no se Jiova lɛk am. Naw, i de payɔnia ɛn i de ɛp fɔ du wok dɛn na Bɛtɛl frɔm in os.

19. Wetin mek yu fɔ biliv tranga wan se Gɔd valyu yu?

¹⁹ Jizɔs mɛmba wi se wi Papa we de na ɛvin rili valyu wi. (Lyuk 12:24) So wi nɔ gɛt wan dawt se Jiova de si wi as pɔsin we gɛt valyu. Lɛ wi nɔ ɛva fɔgɛt dat! Ɛn lɛ wi du wi bɛst fɔ ɛp ɔda pipul dɛn fɔ no se Gɔd rili valyu dɛn!