Yu Go Sɛtul Af-Af Cham-Mɔt ɛn Ɛp fɔ Mek Pis De?

JIOVA GƆD want mek di wan dɛn we de wɔship am gɛt kolat ɛn pis. I want dɛn fɔ tray tranga wan fɔ mek dɛn gɛt pis wit dɛn kɔmpin. We dɛn du dat, pis go de na di Kristian kɔngrigeshɔn. We pis de, dat go mek bɔku pipul dɛn kam na di kɔngrigeshɔn.

Fɔ ɛgzampul, wan jujuman na Madagaska bin notis di kayn pis we Jiova in pipul dɛn gɛt ɛn i bin tɔk se, ‘If a want fɔ jɔyn ɛni rilijɔn, na dis wan a go jɔyn.’ As tɛm de go, i stɔp fɔ wɔship dɛbul dɛn, du wetin di Baybul se bɔt mared, ɛn i bigin fɔ wɔship Jiova we na di Gɔd we gɛt pis.

Jɔs lɛk da man de, ɛni ia, bɔku pipul dɛn kin kam na di kɔngrigeshɔn ɛn gɛt di pis we dɛn bin rili want. Di Baybul tɛl wi se “if una de jɛlɔs ɔda pipul ɛn una gɛt bad at fɔ dɛn,” dat go ambɔg di padi biznɛs na di kɔngrigeshɔn ɛn mek prɔblɛm de. (Jems 3:14-16) Bɔt di Baybul gi wi advays dɛn bɔt aw fɔ avɔyd dɛn prɔblɛm dɛn de ɛn kɔntinyu fɔ gɛt pis wit wi brɔda ɛn sista dɛn. Lɛ wi si aw dis advays dɔn ɛp pipul dɛn insay sɔm tru tru tin dɛn we bin apin.

PRƆBLƐM DƐN ƐN AW DƐN SƐTUL DƐN

“A nɔ bin de mitɔp wit wan brɔda we bin de wok wit mi. Wan de we wi de ala ala pan wisɛf, tu pipul dɛn kam ɛn si we wi de mek plaba.”—KRIS.

Tu sista dɛn de wach dɛnsɛf vɛks vɛks wan

“Wan sista we a bin yus fɔ de prich wit bin jɔs stɔp fɔ de prich wit mi. Dɔn i stɔp bak fɔ de tɔk to mi. A nɔ bin rili no wetin mek.”—JENƐT.

“A bin de tɔk wit tu pipul dɛn na fon. Wan pan dɛn bin se bay-bay, ɛn a bin tink se i dɔn kɔt di kɔl. Afta dat, a bigin tɔk bad tin dɛn bɔt am to di ɔda pɔsin na di fon, bɔt di pɔsin we wi bin fil se dɔn kɔt di kɔl bin stil de lisin to wetin a bin de tɔk.”—MAYKƐL.

“Insay wi kɔngrigeshɔn, tu payɔnia dɛn bigin fɔ gɛt prɔblɛm dɛn. Wan bigin fɔ tɔk pan in kɔmpin. Dɛn plaba bin mek ɔda pipul dɛn at pwɛl.”—GARI.

Yu go de tink se dɛn tin ya nɔto siriɔs prɔblɛm dɛn. Bɔt dis kin mek pipul dɛn at rili pwɛl, ɛn i kin ambɔg di pis na di kɔngrigeshɔn. Bɔt wi gladi bikɔs dɛn brɔda ɛn sista dɛn ya bin fala di advays dɛn na di Baybul, ɛn dɛn bin ebul fɔ mek pis. Us advays dɛn na di Baybul we yu tink se dɛn bin fala?

Josɛf bin tɛl in brɔda dɛn se: “Mek dɛn nɔ mek plaba na rod.” (Jɛnɛsis 45:24) Dis na fayn advays we i bin gi dɛn. We pɔsin nɔ kɔntrol di we aw i de fil ɛn alaw in at fɔ wam, di prɔblɛm go wɔs. Ɔda pipul dɛn bak go vɛks. Kris bin kam fɔ si se, sɔntɛnde, i nɔ kin izi fɔ put insɛf dɔŋ ɛn fala wetin dɛn de tɛl am. I bin want fɔ chenj, so i beg di brɔda we i bin agyu wit. Dɔn, Kris tray tranga wan fɔ kɔntrol in wam at. We di brɔda notis aw Kris de tray tranga wan fɔ chenj, insɛf bin du di sem tin. Naw dɛn gɛt pis as dɛn de sav Jiova togɛda.

“If yu nɔ gɛt bɔku advays yu plan go fel.” (Prɔvabs 15:22) We Jenɛt in padi bin stɔp fɔ tɔk to am, Jenɛt bin disayd fɔ fala dis advays na di Baybul. I bin go tɔk to di sista. Jenɛt bin aks am if i dɔn du sɔntin we mek i fil bad. Fɔs, dɛn tu nɔ bin de fil fayn, bɔt as dɛn de kɔntinyu fɔ tɔk wit rɛspɛkt to dɛnsɛf, dɛn bigin fɔ fil gud. Di sista bin kam fɔ no se i nɔ bin tink di rayt we bɔt wetin bin apin, ɛn i kam fɔ no se Jenɛt nɔ bin du ɛnitin fɔ mek i fil bad. So i bin se sɔri to Jenɛt, ɛn dɛn tu dɔn bi padi bak as dɛn de sav Jiova togɛda.

“If yu de mek yu sakrifays na Gɔd in Os, ɛn yu mɛmba se yu brɔda vɛks pan yu, yu fɔ lɛf yu sakrifays na Gɔd in Os, ɛn go to yu brɔda wantɛm, mek una go tɔk di plaba fayn fayn.” (Matyu 5:23, 24) Jizɔs bin gi dis advays we i bin de prich ɔp wan mawnten. Afta we Maykɛl bin tɔk bad tin dɛn bɔt di ɔda brɔda, i bin rili fil bad. I bin disayd fɔ du wetin i ebul fɔ sɛtul di prɔblɛm. So i go to di brɔda ɛn tɛl am se i sɔri. Wetin bin apin? Maykɛl se, “Mi brɔda fɔgiv mi wit ɔl in at.” Dɛn tu dɔn bi padi bak.

“Una nɔ fɔ vɛks if pɔsin du una bad, ɛn una fɔ padin dɛn if dɛn du una ɛnitin.” (Lɛta Fɔ Kɔlɔse 3:12-14) Yu mɛmba di tu payɔnia dɛn we bin de agyu na fil savis? Wan ɛlda bin tek tɛm ɛp dɛn fɔ si se dɛn de mek ɔda pipul dɛn fil bad. I mɛmba dɛn se dɛn fɔ peshɛnt wit dɛnsɛf ɛn ɛp fɔ mek pis kɔntinyu fɔ de na di kɔngrigeshɔn. Dɛn lisin di advays ɛn du wetin di ɛlda tɛl dɛn. Naw dɛn ɔl tu de du tin fayn as dɛn de prich di gud nyuz.

Da sem advays de we de na Lɛta Fɔ Kɔlɔse 3:12-14, go ɛp yu fɔ put yusɛf dɔŋ , fɔ fɔgiv pɔsin we dɔn du yu bad, ɛn stɔp fɔ tink bɔt di prɔblɛm. Bɔt wetin wi fɔ du if wi dɔn tray fɔ fɔgiv pɔsin bɔt wi nɔ ebul? Wan advays de we Jizɔs bin gi na Matyu 18:15 we go ɛp wi. Pan ɔl we Jizɔs bin de tɔk bɔt siriɔs sin, i bin tɔk bɔt sɔntin we wi go du ɛnitɛm wi gɛt prɔblɛm wit wi brɔda ɔ sista. Wi fɔ put wisɛf dɔŋ ɛn go to di brɔda ɔ sista ɛn tɔk fayn to am ɛn tray fɔ sɔlv di prɔblɛm.

Bɔku ɔda fayn advays dɛn de na di Baybul. Bɔku pan dɛn gɛt fɔ du wit aw wi go abop pan Gɔd in spirit fɔ mek wi go sho kwaliti dɛn we di spirit de ɛp wi fɔ gɛt. Dɛn kwaliti dɛn ya ‘na lɔv, gladi at, kolat, peshɛnt, fɔ bisin bɔt ɔda pɔsin, fɔ du gud, fɔ gɛt fet, nɔ fɔ vɛks kwik, fɔ kɔntrol wisɛf.’ (Lɛta Fɔ Galeshya 5:22, 23, NW) Tink bɔt dis. Mashin go wok fayn fayn wan we dɛn ɔyl am. Semweso, i izi fɔ lɛ wi sɛtul wi af-af cham-mɔt fayn fayn wan if wi falamakata di gud kwaliti dɛn we Jiova gɛt.

DIFRƐN ABIT DƐN DE MEK WI GLADI NA DI KƆNGREGESHƆN

Wi ɔl gɛt difrɛn abit dɛn ɛn difrɛn we dɛn fɔ biev. Wi gɛt difrɛn kwaliti dɛn, difrɛn we aw wi kin si tin dɛn, ɛn difrɛn we dɛn fɔ sho aw wi de fil. Dis kin mek wi gɛt tayt padi biznɛs wit ɔda pipul dɛn ɛn wi kin ɛnjɔy am. Bɔt di difrɛn abit dɛn we wi gɛt ɛn di difrɛn we dɛn aw wi kin biev, kin briŋ af-af cham-mɔt ɛn plaba. Wan machɔ ɛlda bin gi wan ɛgzampul bɔt aw dis kin apin we i se: “I nɔ kin izi fɔ pɔsin we de shem fɔ de arawnd pɔsin we jovial. I kin tan lɛk se dɛn tu we dɛn ya aw pipul dɛn de biev nɔ impɔtant, bɔt na sɔntin we kin briŋ siriɔs prɔblɛm.” Yu tink se pipul dɛn we gɛt difrɛn we fɔ biev nɔ kin ɛva mit-ɔp? Fɔ ɛgzampul, lɛ wi tɔk bɔt tu pan Jizɔs in apɔsul dɛn. We wi tink bɔt Pita, wi go se na pɔsin we de tɔk ɛnitin we de na in maynd ɔltɛm. Bɔt we wi tink bɔt Jɔn, wi go si am as brɔda we de sho lɔv ɛn we de tink bifo i tɔk ɔ du sɔntin. Pita ɛn Jɔn bin gɛt difrɛn we fɔ biev. Bɔt dɛn ɔl tu bin wok togɛda ɛn sav Jiova fayn fayn wan. (Di Apɔsul Dɛn Wok [Akt] 8:14; Lɛta Fɔ Galeshya 2:9) Dis kin apin to wisɛf tide. Ivin Kristian dɛn we gɛt difrɛn we fɔ biev kin wok fayn fayn wan togɛda.

Bɔt wetin yu go du if sɔmbɔdi na di kɔngrigeshɔn tɔk ɔ du sɔntin we mek yu vɛks? I go fayn fɔ mek yu mɛmba se Jizɔs day fɔ da brɔda ɔ sista de jɔs lɛk aw i day fɔ yu, ɛn yu fɔ lɛk yu brɔda ɔ sista. (Jɔn 13:34, 35; Lɛta Fɔ Rom 5:6-8) I nɔ go fayn if yu disayd se yu nɔ go bi padi wit da pɔsin de igen ɔ yu nɔ go tɔk to am igen. Bifo dat, aks yusɛf dɛn kwɛstyɔn dɛn ya: ‘Mi brɔda ɔ mi sista de du sɔntin we de agens Gɔd in lɔ? I de du sɔntin fɔ pwɛl mi at bay wilful? Ɔ fɔ se wi tu jɔs gɛt difrɛn we dɛn fɔ biev? Fɔ se i gɛt kwaliti dɛn we a go lɛk fɔ falamakata?’

Fɔ ɛgzampul, if i lɛk fɔ tɔk, bɔt yu na kwayɛt pɔsin, yu nɔ tink se i go fayn fɔ mek yu prich wit am na fil savis ɛn si wetin yu go lan frɔm am? Wetin yu go du if yu si se i fri-an pas yu? Yu dɔn notis se pɔsin kin gɛt gladi at we i gi sɔntin to pipul dɛn we ol, we sik, ɔ we rili nid sɔntin? Yu tink se yu go lan aw fɔ bi pɔsin we gɛt fri-an frɔm da pɔsin de? Di men tin na dat ivin if yu ɛn yu brɔda ɔ sista gɛt difrɛn we fɔ biev, yu kin stil pe atɛnshɔn to di gud kwaliti dɛn we i gɛt. Pan ɔl we una tu nɔ go bi tayt padi, una go stil lɛk unasɛf. Dis go ɛp fɔ mek yu gɛt kolat, ɛn pis go de na di kɔngrigeshɔn.

Insay di fɔstɛm Kristian dɛn tɛm, dɛn bin gɛt tu sista dɛn we nem Yuodia ɛn Sintiki. I bin tan lɛk se dɛn ɔl tu gɛt difrɛn we dɛn fɔ biev ɛn difrɛn abit dɛn, bɔt di apɔsul Pɔl bin ɛnkɔrej dɛn se, dɛn “fɔ gɛt wanwɔd wit di Masta.” (Lɛta Fɔ Filipay 4:2) Wi bak want fɔ wɔship Jiova wit wi brɔda ɛn sista dɛn ɛn ɛp fɔ mek pis de na di kɔngrigeshɔn.

NƆ ALAW AF-AF CHAM-MƆT FƆ KƆNTINYU

Wetin mek wi fɔ pul ɛni bad tin we wi gɛt na wi at fɔ ɔda pipul dɛn wantɛm wantɛm? Wi go kɔmpia dis bad we aw wi de fil to gras we de gro na wan fayn flawa gadin. If wi nɔ rut di gras kɔmɔt, i go gro ɔlsay na di gadin. Semweso, if wi kɔntinyu fɔ de fil bad bɔt ɔda pipul dɛn, dat go afɛkt ɔlman na di kɔngrigeshɔn. Bɔt if wi lɛk Jiova ɛn wi brɔda ɛn sista dɛn, wi go du ɔl wetin wi ebul du fɔ lɛ pis kɔntinyu fɔ de na di kɔngrigeshɔn.

Tu sista dɛn de tɔk to dɛnsɛf ɛn dɛn de tray fɔ mek pis — If yu put yusɛf dɔŋ ɛn tray fɔ mek pis wit ɔda pipul dɛn, yu go sɔprayz fɔ si di gud tin dɛn we go apin

We wi mek pis wit ɔda pipul dɛn, wi kin sɔprayz aw tin kin chenj. Dis bin apin to wan Jiova Witnɛs. Luk wetin i bin se: “A bin de fil lɛk se wan sista de trit mi lɛk pikin. Dis bin de rili mɔna mi. Bikɔs a bin rili de vɛks, a stat fɔ de gi am fri-fri wɔd dɛn. A bin de tink se, ‘Bikɔs i nɔ de gi mi di rɛspɛkt we a fɔ gɛt, misɛf nɔ go rɛspɛkt am.’”

Dɔn dis sista bin tink bɔt di we aw i de biev. I kɔntinyu fɔ tɔk se: “A bigin fɔ si mi yon bad abit dɛn, ɛn dat mek a fil bad bɔt misɛf. A kam fɔ si se a nid fɔ ajɔst di we aw a de tink. Afta we a pre to Jiova bɔt di prɔblɛm, a bay wan kad ɛn wan smɔl gift fɔ di sista ɛn rayt se a sɔri fɔ di bad we aw a bin de biev. Wi ɔg wisɛf ɛn gri se wi go fɔgɛt bɔt ɔltin. Frɔm da tɛm de, wi nɔ gɛt ɛni prɔblɛm igen.”

Ɔlman nid pis. Bɔt we pipul dɛn de fil se ɔda pipul dɛn nɔ lɛk dɛn ɔ dɛn prawd, dat de mek dɛn nɔ gɛt pis. Insay di wɔl, na sɔntin we kɔmɔn, bɔt Jiova want di wan dɛn we de wɔship am fɔ biev difrɛn we. Jiova Witnɛs dɛn fɔ gɛt pis ɛn wanwɔd. Jiova bin tɛl Pɔl fɔ rayt to Kristian dɛn se dɛn fɔ “du wetin Gɔd tɛl [dɛn] fɔ du.” I bin ɛnkɔrej dɛn ‘nɔ fɔ lift dɛnsɛf ɔp ɛn dɛn fɔ de bia wit dɛn kɔmpin fɔ sho se dɛn lɛk dɛn. Dɛn fɔ tray ɔltɛm fɔ mek di wanwɔd we Gɔd in spirit de gi, nɔ dɔn, so dat dɛn nɔ go de mek plaba wit dɛn kɔmpin.’ (Lɛta Fɔ Ɛfisɔs 4:1-3) “Di wanwɔd” we Jiova in pipul dɛn gɛt rili impɔtant. So lɛ wi ɔl du wetin wi ebul fɔ mek di wanwɔd kɔntinyu ɛn fɔ sɔlv ɛni prɔblɛm dɛn we wi go gɛt wit wi brɔda ɛn sista dɛn na di kɔngrigeshɔn.

Pɔl ɛn Banabas Na Brɔda dɛn Pan Ɔl We Dɛn Bin Difrɛn

Pɔl na pɔsin we bin gɛt wamat. Bifo i kam fɔ bi Kristian, i bin “de mek Jizɔs in apɔsul dɛn sɔfa, ɛn i bin want kil dɛn.” (Di Apɔsul Dɛn Wok [Akt] 9:1) Leta, Pɔl bin tɔk bɔt aw i bin de fil bɔt di Kristian dɛn. I bin se: “Mi at bin so bad fɔ dɛn.”—Di Apɔsul Dɛn Wok [Akt] 26:11.

Afta we Pɔl baptayz, i bin chenj. Bɔt di pipul dɛn bin stil de mɛmba aw i bin de trade. Pan ɔl we i bin dɔn bi Kristian fɔ sɔm tɛm, di brɔda dɛn “nɔ bin biliv se Sɔl insɛf dɔn bi Jizɔs in lanin bɔy. Dɛn bin stil de fred am.”—Di Apɔsul Dɛn Wok [Akt] 9:26.

We Pɔl bin go na Jerusɛlɛm, di brɔda dɛn we bin de de nɔ bin biliv am. Bɔt wan brɔda frɔm Sayprɔs we nem Josɛf bin ɛp am. Josɛf na bin gud brɔda we dɛn bin lɛk ɛn rɛspɛkt na di kɔngrigeshɔn. Infakt, di brɔda dɛn bin de kɔl am Banabas, we min “Pɔsin we de kɔrej ɔda pipul.” (Di Apɔsul Dɛn Wok [Akt] 4:36, 37) Aw Banabas bin ɛp Pɔl? Di Baybul se: “Banabas ɛp Sɔl, i kɛr am go to di apɔsul dɛn. I tɛl dɛn se Sɔl si di Masta na rod ɛn di Masta tɔk to am. Banabas tɛl dɛn se Sɔl nɔ bin fred fɔ tɔk bɔt Jizɔs wɛn i de tɔk to di pipul dɛn na Damaskɔs.” (Di Apɔsul Dɛn Wok [Akt] 9:26-28) Afta we di brɔda dɛn na Jerusɛlɛm yɛri wetin Banabas bin se, dɛn bigin fɔ biliv Pɔl ɛn trit am lɛk brɔda. I nɔ tu te, Pɔl ɛn Banabas bigin fɔ wok togɛda na di prichin wok as mishɔnari dɛn.—Di Apɔsul Dɛn Wok [Akt] 13:2, 3, NW.

I go mɔs bi se, Banabas bin rɛspɛkt Pɔl fɔ di zil we i gɛt ɛn di we aw i ɔnɛs. Dat na bikɔs Pɔl nɔ bin de fred atɔl fɔ tɔk ɔ du sɔntin we nid de. Pɔl go mɔs dɔn gladi pasmak fɔ wok wit pɔsin lɛk Banabas, we bin gud ɛn rili bisin bɔt ɔda pipul dɛn.

Bɔt di Baybul tɔk se wan de Pɔl ɛn Banabas bin gɛt siriɔs cham-mɔt. Wetin mek? Pɔl ɛn Banabas nɔ bin gɛt cham-mɔt bikɔs dɛn gɛt difrɛn abit dɛn. Dɛn bin gɛt cham-mɔt bikɔs dɛn bin de dawt if wan brɔda we nem Jɔn Mak bin fit ɔ nɔ fit fɔ wok wit dɛn as mishɔnari.—Di Apɔsul Dɛn Wok [Akt] 15:36-40, NW.

Pan ɔl we Pɔl ɛn Banabas bin gɛt difrɛn abit dɛn, dɛn bin de wok togɛda gud gud wan. Infakt, dɛn bin sɛtul dɛn cham-mɔt, ɛn Jɔn Mak bin leta wok wit Pɔl. (Lɛta Fɔ Kɔlɔse 4:10) Lɛk Pɔl ɛn Banabas, wi ɔl gɛt difrɛn abit dɛn. Bɔt pan ɔl dat, wi go ɛnjɔy we wi sav Jiova togɛda.