Kristian dɛn ɛn Wɔ—Wetin di Baybul Se?

Aw wi dɔn si dyurin di wɔ we de apin na Yukren, bɔku Kristian bigman dɛn pan Gɔd biznɛs de ɛnkɔrej pipul dɛn fɔ sɔpɔt di wɔ. Notis aw sɔm klaji man dɛn de sɔpɔt ɔltu di kɔntri dɛn:

• “Wi de ɔnɔ ɔl di fɛtman dɛn we de difɛnd dɛn kɔntri Yukren ɛn wi gladi fɔ we dɛn de tinap agens di wan dɛn we wan sɔprɛs wi . . . Wi de tink bɔt una, wi de pre fɔ una, ɛn wi de sɔpɔt una ɔltɛm.”—Metropolitan Epiphanius I of Kyiv, as reported in The Jerusalem Post, Mach 16, 2022.

• “Di wan we de oba di Russian Orthodox Church bin mek wan Sɔnde savis fɔ di Rɔshian sojaman dɛn ɛn i ɛnkɔrej dɛn fɔ difɛnd dɛn kɔntri bikɔs na ‘Rɔshian dɛn nɔmɔ go ebul fɔ du dat’ as dɛn de kɔntinyu fɔ fɛt Yukren.”—Reuters, Epril 3, 2022.

Yu tink se Kristian dɛn fɔ tek pat pan wɔ? Wetin di Baybul se?

Wetin rili di Baybul se

Di Baybul sho se di wan dɛn we de rili fala Jizɔs nɔ de tek pat pan wɔ.

• “Put yu sɔd bak na in ples, bikɔs ɔl di wan dɛn we yuz di sɔd, na di sɔd dɛn go kil dɛn wit.”—Matyu 26:​52.

  Yu tink se pɔsin we de ɛnkɔrej wɔ ɔ we de fɛt de rili obe wetin Jizɔs se?

• “A de gi una wan nyu lɔ, ɛn di lɔ na dat una fɔ lɛk una kɔmpin dɛn; una fɔ lɛk una kɔmpin dɛn jɔs lɛk aw a lɛk una. If una lɛk una kɔmpin dɛn, ɔlman go no se una na mi disaypul dɛn.”—Jɔn 13:​34, 35.

  Yu tink se pɔsin we de sɔpɔt wɔ de sho di kayn lɔv we Jizɔs se go mek pipul dɛn sabi in disaypul dɛn ɔ di wan dɛn we de fala am?

Fɔ no mɔ, rid di atikul we gɛt di taytul, “Is War Compatible With Christianity?”

Kristian dɛn ɛn wɔ insay wi tɛm

Yu tink se i mek sɛns fɔ lɛ Kristian dɛn nɔ tek pat pan wɔ insay wi tɛm? Yɛs. Di Baybul bin dɔn tɔk se insay wi tɛm we i kɔl di “las dez,” pipul dɛn we kɔmɔt difrɛn difrɛn say dɛn go gri wit wetin Jizɔs tich ɛn dɛn nɔ go “fɛt wɔ igen.”—Ayzaya 2:​2, 4.

I nɔ go te igen, Jiovaa we na “di Gɔd we gɛt pis” go yuz in gɔvmɛnt we de na ɛvin fɔ sev in pipul dɛn frɔm “di wan dɛn we de sɔprɛs dɛn ɛn di wan dɛn we de mek dɛn sɔfa.”—Filipians 4:​9; Sam 72:​14.

• Fɔ si aw i go du dat, wach di vidio we gɛt di taytul, Wetin na Gɔd in Kiŋdɔm?