Comstock Images/Stockbyte via Getty Images
UNA GO DE WACH
Us Lida Yu Go Pik?—Wetin di Baybul Se?
Pipul dɛn go disayd impɔtant tin bɔt us lida dɛn go pik.
Wetin di Baybul se?
Mɔtalman lida dɛn nɔ ebul du ɔltin
Di Baybul sho wetin mɔtalman lida dɛn nɔ ebul du.
“Nɔ abop pan prins dɛn ɔ mɔtalman we nɔ ebul fɔ sev pɔsin. We i stɔp fɔ blo, i de go bak na dɔti; da de de, ɔl wetin i de tink bɔt go dɔn.”—Sam 146:3, 4, futnot.
Ivin lida dɛn we de tray tranga wan fɔ du dɛn bɛst, kin day afta sɔm tɛm. Dɔn bak, dɛn nɔ go ebul fɔ garanti se di wan dɛn we go kam afta dɛn go kɔntinyu fɔ du di gud tin dɛn we dɛn bin de du.—Ɛkliziastis 2:18, 19.
Di tru na dat, di Baybul sho se Gɔd nɔ ɛva mek mɔtalman fɔ rul dɛnsɛf.
“Mɔtalman nɔ ebul kɔntrol in yon layf ɔ dayrɛkt in stɛp dɛn.”—Jɛrimaya 10:23.
Yu tink se ɛnibɔdi de we go ebul fɔ bi gud lida insay wi tɛm?
Wan lida we Gɔd de sɔpɔt
Di Baybul sho se Gɔd dɔn pik di bɛst lida we na Jizɔs Krays. (Sam 2:6) Jizɔs na di Kiŋ na Gɔd in Kiŋdɔm we na gɔvmɛnt we de rul frɔm ɛvin.—Matyu 6:10.
Yu go gri fɔ mek Jizɔs rul yu? Di Baybul sho wetin mek da kwɛstyɔn de impɔtant:
“Ɔnɔ Gɔd in bɔypikin [Jizɔs Krays]. If nɔto dat, Gɔd go vɛks bad bad wan; i go dɔnawe wit yu, bikɔs i de vɛks kwik kwik wan. Ɔl di wan dɛn we de go to Am fɔ ayd gɛt gladi-at.”—Sam 2:12.
Na naw yu fɔ disayd. Baybul prɔfɛsi sho se Jizɔs bin bigin fɔ rul insay di ia 1914 ɛn i nɔ go te igen, Gɔd in Kiŋdɔm go tek mɔtalman gɔvmɛnt dɛn ples.—Daniɛl 2:44.
Fɔ lan mɔ bɔt aw yu go sɔpɔt Jizɔs in rul, rid di atikul we gɛt di taytul, “Choose to Support God’s Kingdom Now!”