CHƐLUIMAYA
1 Diomnda Chɛluimaya* laŋ la cho laŋ ni, po Hilikaya wo. Hilikaya yɛ, wana soliaa lasalaa o pilɛ o wa Anatɔti+ ni o buŋgɛi Bɛŋjamiŋ nde niŋ. 2 Mi Chɛhowa suaa o ndu lo o wɔsi 13 Choosaya+ po Amɔŋ ndo+ wa o masaleŋ choo Chuda wo. 3 Mi Mɛlɛka suaa vɛlɛ o Chɛluimaya lo a teleŋ Chɛhowakim,+ po Choosaya wo wa o masaleŋ choo Chuda wo, haaa mbo huŋ bii a wɔsi 11 Sɛdikaya,+ po Choosaya wo wa o masaleŋ choo Chuda wo. O lo suɛi o ndu lo haaa ma kua a waŋnda Chulusalɛm o biyɔɔ niŋ o paŋgii ŋuɛɛnuei niŋ.+
4 Mi Chɛhowa suaa naa ya chua aa:
5 “I sina* num fɛlɛŋ tuupa mi toosiaa num o demboo niŋ.+
Nduyɛ, I dindi num fɛlɛŋ tuupa ma vialuŋ.*+
Ya siiŋguu num wana suaa le ya wo o waŋnda lo ni.”
6 Kɛ mi dimi aa: “Kpokoo Chɛhowa, Mɛlɛka Kpuluŋguma Bɛndoo!
I chiee suɛi le,+ kanifuule poombɔɔ* ya cho ni.”+
7 Mi Chɛhowa dimul la aa:
“Dimi nuaa maa poombɔɔ le ŋ cho le.
Kanifuule, a nɔ ma kuɛ o wanaa ya cho num viomɔɔ o nda lo wa lo,
Ma dimul nda nyɛ o nyɛ ya cho num dimullo.+
8 Siooŋii bii num a mɛɛ nda cho yɛ le,+
Kanifuule ‘I cho a num latulu le num chiindiaa.’+ Ya Chɛhowa dimi lende ni.”
9 Okoŋ, mi Chɛhowa siɛndi ba ndɔɔ mbo pilaŋ ya sondoo.+ Nduyɛ mi Chɛhowa dimul la aa: “I dɔu num diomnda nilaŋ o sondo.+ 10 I ke num kpaayaa paale hauleŋ ndeŋ lɛŋnde choo a masɛi, le ma suŋgu nduyɛ ma koombiaa, ma tɛɛmbuu nduyɛ ma pesi, ma taŋgul nduyɛ ma tɔl.”+
11 Mi Chɛhowa suaa vɛlɛ naa ya chua, mbo nyuna ya aa: “Yɛɛnɛ ŋ cho yɛ chɔɔ Chɛluimaya?” Mi muli aa: “I cho lɛuvii yɔm amɔŋ ndo* chɔɔ.”
12 Mi Chɛhowa dimul la aa: “Nyɛ ŋ che wo cho tonya, kanifuule I cho lahɔl kpeekpei le mi nyɛ ya dimi wo yɔŋnuŋ.”
13 Mi Chɛhowa suaa o ya lo le teleŋ diiŋ ndɔɔ, mbo nyuna ya aa: “Yɛɛnɛ ŋ cho yɛ chɔɔ?” Mi dimi aa: “I cho kpɛɛnɛi* chɔɔ ŋolɔɔ* mi i naŋgu sondoo ba luaŋ ndo.” 14 Okoŋ mi Chɛhowa dimul la aa:
“Kpundɔɔ cho chɔnɔŋ ba luaŋ ndo,
Le wanaa cho o lɛŋndeŋ niŋnda kpou.+
15 Kanifuule ‘I cho yuŋgulaŋ kpou o masɛi cho ba luaŋ ndo ve chuuŋgiaa naapilɛ.’ Ya Chɛhowa dimi lende ni.+
A cho kpakila balu ndu laŋ kpou chiŋalaŋ,
Vɛlɛ a chieeŋ bɛndoŋ kpou o Chuda niŋ.+
16 I cho nda nyɛpalaa tusi choo le dɛnɛ wɔɔŋ kɛ kɛ nda tosa,
Le mɛɛ nda kɛɛ ya yɛ.+
A cho salalaŋ solioo o mɛlɛkaa cheleŋnda lo,+
Nduyɛ ma beŋ mɛlɛkaa ndaa nda toosiaa a bala ndalaŋ nda wulaŋ.’+
17 A nɔ ma bɛɛndiaŋ le ma tosa nyɛ,*
Okoŋ ma chɛŋ ma kɔ dimul nda nyɛ o nyɛ ya dimul num.
Siooŋii bii num le nda le,+
Yɔŋii ya tosa ma nyiiya kpa kpa a siooŋii bɛnduei nda lachi.
18 Kanifuule, I tosa hau ma simnuŋ maa chiee cho o kpaki kala kalaa niŋndo le waŋnda kpou o lɛŋndeŋ niŋ simullo,
Nda cho yɛ masaa Chuda, laŋgbaa nduaa kalla,+
Wanaa soliaa lasalaa vɛlɛ a waŋnda kpou o lɛŋndeŋ niŋ ni.
A suŋgbule ichiliŋ ndeŋ, vɛlɛ a kpaki chiliŋii siaŋɛi* nda taŋgul chioo hoo ni.+
19 A cho num chiŋalaŋ a sɔŋgɔɔ,
Kɛ a tiu niŋ num ba le.*
Kanifuule ‘I cho a num latulu+ le num chiindiaa.’ Ya Chɛhowa dimi lende ni.”
2 Mi Chɛhowa suaa naa ya chua aa: 2 “Kɔ dimul waŋnda Chulusalɛm maa, ‘Nyɛ Chɛhowa dimi wo cho hoo ni:
“I loonuŋndɔ a yɔŋgɔŋ* nyaa okɔɔ teleŋ nya wa feleŋguaa wo.+
Mi la chɔm ya kaalaa mɛɛ naŋ chɛlaŋ le challe o nɔɔ niŋ.+
Mi la tual la kɔɔli o pollo niŋ,
O lɛŋnde tɔlɔɔ vil te leŋ niŋ.+
3 Isɔluɛi wa kɔmnde tasele Chɛhowa leŋ ni,+ nduyɛ o wa o diandaa ndu o hɔl.”’
‘Wana o wana tɛɛmbuu ndu pɛ, o tosa hakioo.
Nduyɛ kpundɔɔ cho nda tolɔɔ choo.’ Ya Chɛhowa dimi lende ni.”+
4 Nya waŋnda o yuŋgu Chekɔpu wo niŋ, la yaŋ nilaŋ o nyɛ Chɛhowa dimi wo.
Nya yuŋgulaŋ o Isɔluɛi niŋ kpou, la yaŋ nilaŋ.
5 Nyɛ Chɛhowa dimi wo cho hoo ni:
“Biondɔŋnda yɛɛ finyaa nyaa mamaa saaluŋ yɛ ya o ŋdial,+
La tosa ma kuaŋnuŋ landaŋ a ya laŋ?
A tol piɔmaa fonduaa kɔɔli,+ a tosa ma simnuŋ wanaa fonduaa wa.+
6 Le pilɛ bɛɛ a nyuna nuaa aa, ‘Kuɛɛnɛ Chɛhowa cho yɛ,
Wana soli naa o lɛŋndeŋ Ichipi leŋ niŋndo le?+
Ndu keeku a naa o pollo niŋ ni,+
Lɛŋnde vesɛile nɔ sooŋndaŋ ndeŋ,
Lɛŋnde piɔɔ se le leŋ,+ lɛŋnde nɔ nyumma kpiŋgbima bɛnduaŋ ndeŋ,
Lɛŋnde wanachiee nɔla mbo kuɛ lechoo le leŋ,
A lɛŋnde wanachiee nɔla mbo chal lechoo le leŋ.’
7 Okoŋ mi huŋ a nya o lɛŋnde tɔlɔɔlaŋ la naŋ ndeŋ niŋ,
Le mi la de komɔɔla ndɔlaŋ a nyɛm kɛndɛŋ cho leniŋ ndoŋ.+
Kɛ mɛɛ nya hiŋ mi la nɔɔliaa lɛŋnde nileŋ,
Mi la siiŋguu nyɛm kɛŋ nuŋ nyɛm nɔɔlɛi.+
8 Le pilɛ bɛɛ wana soliaa lasalaa nyuna nuaa aa, ‘Kuɛɛnɛ Chɛhowa cho yɛ’ le?+
Wanaa pɛɛku waŋnda Sawala Mɛlɛkalaŋ nda sina ya le.
Wanaa mandaa lasaa simul la.+
Wanaa suaa le Mɛlɛka wa cho huuloŋ dimioo o diola Baal laŋ niŋ.+
Nduyɛ, mɛlɛkaa chuu nda tɔnɔ o tɔnɔ le wa nda tol kɔɔli ni.
9 ‘Lelaŋ, I cho hiouwɔɔ lachi a sɔɔŋ nya tosa woŋ chɔɔmuuwo,+
Vɛlɛ a sɔɔŋ chuauwaa nyaa mamaa tosa woŋ chɔɔmuuwo,’ Ya Chɛhowa dimi lende ni.
10 ‘La taŋ o lɛŋii mɛŋndaŋ ma balu ve niŋ Kitim+ mi la che nyɛ cho loŋ ndo.
La yɔŋ waŋndo Kidaa+ mbo kɔ mɛɛndaŋ nyɛkɛndɛi.
La tofawɔ, te sɔɔŋ waa lende yɔŋnuŋ niŋ pɛ loŋ.
11 Baa kaale kɛ kɛ siŋga niŋ pa mɛlɛkaa ndaa le nyɛm nda yiyaŋ maa ŋ cho mɛlɛkaa le woŋ?
Kɛ ya Mɛlɛka tɔɔma bɛndoo, wanaa niaa kɛɛ ya le nyɛm fondoŋ sooluuwo.+
12 Num choo choo, nua o kɔndɔfili bɛndoo niŋ,
Nduyɛ ma nyiiya a siooŋii bɛnduei.’ Ya Chɛhowa dimi lende ni.
13 ‘Kanifuule, wanaa niaa tosa sɔɔŋ wɔɔŋndoŋ ŋ muuŋ:
Ya yɔŋgu mɛŋma yoomaŋ ndo, a mal la.+
Nduyɛ ma tuau sooŋndaŋ* le ndapila,
Sooŋnda tambɛila mɛŋma cho leniŋ te laŋ.’
14 ‘Baa buɛiyo ɔɔ chiɔɔ Isɔluɛi cho o yuŋgoo niŋ ni?
Mɛɛ le yɛɛ nda puŋga yɛ niŋ nyɛm ndɔŋ?
A tosa mi siooŋnde bii waŋnda o lɛŋnde ndɔleŋ niŋ.
A mal chieeŋ ndɔŋ bɛndoŋ o yiŋ, le halikpeŋ wana nɔla mbo chal loŋ te.
16 Waŋnda Nɔɔfi*+ a waŋnda Tafanɛsi+ cho nyɛdiaa dio o mɔsil lemasa cho num o lebollo choo.
17 Nyapila veeluŋ hei choo ni.
Kanifuule la mal Chɛhowa Mɛlɛka nyaa,+
Teleŋ o wa kɔlaŋ a nya wo.
19 Dɛnɛ wɔɔŋ nyaa cho nya miŋgi o nɛi,
Mi laalaŋ lepɛŋ nyaa sila nya.
La nɔ mi la sina mɛɛ i cho suɛi wɔɔŋ, nduyɛ mi i wa suɛi kɔl tambɛi bɛndu,+
Le Chɛhowa Mɛlɛka nyaa malɔɔ yɛ.
La yɔŋ isiooŋ le ya le,’+ Ya Chɛhowa, Mɛlɛka Kpuluŋguma Bɛndoo, Mɛlɛka puaa chɔuwa* dimi lende ni.
20 ‘I yimi yimi niŋ yɔm lawolɔɔ wa nya o lakɛsu wo le teleŋ vilɛi,+
Nduyɛ mi kili kili yɔlɔŋ ndaa yiu yiu nya woŋ.
Kɛ mi la dimi aa: “Ŋ cho num piɛi le,”
Kanifuule o fondaŋ filioŋ kɛ kɛ, a o yɔm bɛndu kɛ kɛ bɛŋgu,+
La waŋnuŋ hiniŋndaŋ kaŋgaŋ, nduyɛ mi la tosa sɔɔŋ suundɛi yoŋ.+
21 La cho ko maa kulii kɛndɛi ya tɔl,+ mi i simnuŋ yɔm makilepii siaŋa kɛndɛ kɛndɔɔ wo.
Mɛɛ le yɛɛ nya siŋgaŋ yɛ mi la simnuŋ maa yɔm makilepii wɔɔŋ cho yondoo niŋndo?’+
22 ‘O yɔŋ bɛɛ mi la wa pulɔŋndo mi la biiŋuŋ nyɛkɛndɛ kɛndɛ,*
Nɔɔ nyaa feŋaŋ te.’+ Ya Chɛhowa, Mɛlɛka Kpuluŋguma Bɛndoo dimi lende ni.
23 Le yɛɛ mi la dimi aa, ‘Ŋ nɔɔliaa naapila le.
Ŋ sooluu Baal te’?
La yiyaŋndɔ a kaala nyalaŋ o kpoloŋndo niŋ.
La yiyaŋndɔ a nyɛ nya tosa wo okɔɔ.
La cho ko maa nyɔɔmɛ laandu fɔŋndɔ nyaanuŋ nyaanɔŋ bɛndoo,
Mbo heelu a tuusoo le hɛnaŋ ndɔɔ tosaa wo,
24 Mɛɛ sofɛlɛ laandoo wa nuaa o pollo niŋ,
Mbo keeliaa miŋndo le mi sofɛlɛ piaandoo hel ndu yɛ.
Nɛɛnɛ nɔla yɛ mbo kpaa ndu te o wa pɛ i lam lamnde le helɔɔ?
Sofɛliaa piaanduaa nuuviaa ndu wa nɔ bɛɛ ma saaŋgiaŋ ndapila le.
Te boondii nduɛi* fuuluu dɔɔ pɛ, a cho ndu saalɔŋ.
25 La manda peluŋ nyaŋ yɔŋii nya kela peluŋ fondo.
Nduyɛ, la chɛl mi bololaŋ la vesa nya le kolɔɔ lepɛŋndo le.
Kɛ mi la dimi aa: ‘Mbɔ i hiou lɔɔ!+
26 Mɛɛ siɔmbulaŋ la bii nuaa viinɔɔ te a bii ndu pɛ yɛ,
Lende siɔmbulaŋ la bii waŋnda Isɔluɛi,
Masaa ndaa, laŋgbaa ndaa kalla,
Wanaa ndaa soliaa lasalaa, a wanaa ndaa suaa le Mɛlɛka wa ni.+
27 A dimul yɔmndo aa, ‘Num cho finya naa ni.’+
Nduyɛ ma dimul pouwo aa, ‘Num velu naa ni.’
Kɛ ya, ma mulul la kɔɔ, a mulul la lahɔl te.+
Nduyɛ te kpundɔɔ komal nda pɛ, a cho dimi aa:
‘Chɔŋ ma piŋi naa!’+
28 Kuɛɛnɛ mɛlɛkaa nya toosiaa le nyapila wa cho yɛ niko?+
Te a nɔla pɛ ma piŋi nya o kpundɛ nya cho niŋndo, mɛɛ a chɔŋ ndɔ niko ma piŋi nya.
Oo Chuda, mɛlɛkaa nyaa kui tau mɛɛ chieeŋ nyaŋ bɛndoŋ cho yɛ.+
29 Chɛhowa dimi aa: ‘Le yɛɛnɛ nya cho yɛ hiouwɔɔ lachi a ya sɔɔŋ hɛɛnduuwo choo?
Le yɛɛnɛ nya kpou cho yɛ ya simullo?’+
30 Mi tusi puaa nyaa nyɛpalaa choo.+
Kɛ a chɛl sila nuu le,+
La diu wanaa nyaa suaa le Mɛlɛka wa a muɛi nyɛi faŋnde,+
Mɛɛ kpɔkuŋ* iyolaa tosa yɛ.
31 Oo wanaa niaa, la yiyaŋ a nyɛ ya Chɛhowa dimi wo okɔɔ.
Baa lɛŋnde polteŋ ya simnuŋ le Isɔluɛi ni,
Ɔɔ mɛɛ lɛŋndeŋ le wa nuaa mi nyumndaŋ ma tol lechoo kpiŋgbi yɛ?
Le yɛɛnɛ wanaa niaa dimi yɛ aa, ‘Ŋ cho wa heeloo a tuusoo,
Ŋ cho lɛ miiŋgu o numndo le’?+
32 Baa wana lanɔ yufuaanɔɔ nɔla pa mbo puɛɛnuŋ le nyɛm kɛvɛlɔŋ wounɔŋndo?
Baa wana cho challe o nɔɔ wo nɔla pa mbo puɛɛnuŋ le nyɛ saa ndu mɛɛyaŋ ndo wounɔŋndo?
Kɛ wanaa niaa puɛɛnuŋ niŋ a ya okɔɔ le teleŋ vilɛi.+
33 Aa chuaa, a chaa bɔɔ puaa vɛɛloo le num kaalaa!
A pɛɛku numpila le dɛnɛ wɔɔŋndo tosaa.+
34 Kooma wanaa bala fonduaa tɛɛmbuu isɔɔ le wa ma cho ma tiuwaa o nyɛla numndaŋ silɔ.+
Mi che bɛɛ I chi nda chiɛi numndo piɔlɔɔ le ma luɛi le,
Kɛ kooma ndaŋ ma cho ma tiuwaa o nyɛla numndaŋ kpou.+
35 Kɛ ma dimi aa, ‘I tosa suɛi wɔɔŋ te.
O kpeekpei niŋ, Mɛlɛka doonuŋ niŋ tumbe a ya le’
I cho num nyɛpalaa tusi choo,
Le mɛɛ ŋ dimi maa a tosa haki le yɛ.
36 Le yɛɛnɛ ŋ che yɛ sɔɔŋ wɔɔŋ ŋ cho tosaa woŋ maa sɔɔŋ taaniŋ?
37 Le hei, a cho wa balɔɔ a balaŋ o lebol,+
Kanifuule, Chɛhowa kɛɛ wanaa ŋ dɔu tiindaŋndo o nda niŋ nda.
A nɔla ma mala num ma sɔla batiuwaa le.”
3 Mi waŋnda nyuna aa: “Te poo kɛɛ pɛ laa ndɔ mbo tou ndu, okoŋ mi wana pɔnɔ cheleŋ chua ndu o nɔɔ niŋ, baa po koŋ nɔ lɛ pa mbo tol chua koŋ kɔɔli?”
Baa o cho nɔɔliaa le nda nɔɔliaa lɛŋnde leŋ dikpili le?+
“A tosa kaa suundɛiyo a wanaa bɔɔbɔɔ,+
Le yɛɛnɛ ŋ miiŋgu yɛ naa ya chua?” Ya Chɛhowa dimi lende ni.
2 “Heelu wɔ hɔlla o pemboŋ choo ma che.
Fondaŋ kuɛɛ lo yɛ a hini wɔ a num loŋ te?
Ma chal nda chum o nɛilaŋ daŋgala,
Mɛɛ wana kelaŋndo* wa nuaa o pollo niŋ yɛ.
A cho hiouwɔɔ lachi a lɛŋndeŋ nɔɔliaa,
A kaa num suundɛiyo vɛlɛ a dɛnɛ num wɔɔŋndo.+
3 Lelaŋ piɔɔ kɛɛ le siaa ni,+
Nduyɛ mi waloo sim a sialteŋ.
Mɛɛ ŋ nua yɛ bɛɛ mbo chɔm kɛsɛ maa wana lanɔ suundɛiyo ŋ cho ni.
Siɔmbuleŋ bɛɛ a nɔ le.+
4 Kɛ suŋ suŋ niŋ a cho ya veeloo ma dimi aa:
‘Kɛkɛ nuu, chɔŋ o chuaambɔyɛi nii niŋ num cho chaŋ nuu ni!+
5 Baa waŋndo nɔ pa mbo dɔɔnuŋ tumbe lefafɛɛŋ,
Ɔɔ mbo kɛsiŋ suɛi nɛiyaŋ nde o kɔl le teleŋ o teleŋ?’
Nyɛ nya dimi wo cho hoo ni,
Kɛ a koŋ kpou, la cho wɔ hiouwɔɔ lachi a sɔɔŋ wɔɔŋndoŋ tosaa mɛɛ nya tiuba yɛ.”+
6 A teleŋ Choosaya wa o masaleŋ choo wo,+ mi Chɛhowa dimul la aa: “‘A cho pa chɔɔ nyɛ Isɔluɛi kɛɛ hoo lo lechoo wo chɔmndo o ya lo wo cho tosaa wo? O helnuŋ o pembuŋ vilɛiyoŋ choo, nduyɛ mbo hiniŋ o yɔmii vilɛiye bɛŋgu le kaa suundɛiyo tosaa.+ 7 Mi che bɛɛ mbo tosa sɔɔŋ muŋ, mi hiau lachi a ndu dimullo le mbo miiŋgu ya o ibuŋ,+ kɛ mbo kɛɛ kpooŋ le miiŋgoo. Nduyɛ mi Chuda hiau lachi a bɛ ndɔ mulu muluaŋndo tofaa.+ 8 Mɛɛ ya che hei, mi ke Isɔluɛi kɛɛ lo lechoo wo chɔmndo o ya lo wo yau kɛyaŋndo,+ nduyɛ mi tuau ndu le mɛɛ o tosa kaa suundɛiyo yɛ.+ Kɛ Chuda pɔmbɔ ndɔ mulu muluaŋndo yɔŋ isiooŋ te. Mi ndu bɛɛ fula mbo kɔ tosa kaa suundɛiyo.+ 9 O chi bɛɛ kaa ndɔ suundɛiyo isɔɔ le. Mbo hiau lachi a lɛŋndeŋ nɔɔliaa, nduyɛ mbo tosa kaa suundɛiyo a poutaŋ, vɛlɛ a yɔmnde.+ 10 Kɛ a sɔɔŋ muŋ kpou, Chuda pɔmbɔ ndɔ mulu muluaŋndo miiŋgu ya o ibuŋ a kɔl ndɔɔ kpou le. O lahɔl koni o wa chɔmndo ni.’ Ya Chɛhowa dimi lende ni.”
11 Okoŋ mi Chɛhowa dimul la aa: “Isɔluɛi kɛɛ lo lechoo wo chɔmndo o ya lo wo sandu mbo hiau Chuda mulu muluaŋndo.+ 12 Kɔ dimul wanaa cho ba luaŋ ndo wa aa:+
“‘“Oo num Isɔluɛi kɛɛ ya hoo ma mal la wo, miiŋgu ya o ibuŋ.” Ya Chɛhowa dimi lende ni.’+ “‘I cho tumbe dɔɔnɔŋ a num te,* kanifuule wana chɔm lo lechoo wo wo ya cho ni.”+ Ya Chɛhowa dimi lende ni.’ “‘I cho dɔɔnɔŋ tumbe a num lefafɛɛŋ te. 13 Chɛl kinɛi maa a tosa yɔŋ wɔɔŋndo, kanifuule a simul Chɛhowa Mɛlɛka numndo. A cho hiouwɔɔ lachi a malnɔŋndo mi mialla* hini a num o yɔm bɛndu kɛ kɛ bɛŋgu. Kɛ a yeŋ ya lani le.” Ya Chɛhowa dimi lende ni.’”
14 Nyɛ Chɛhowa dimi wo cho hoo ni: “Nya puaa kɛɛ ya haa mi la mal la wa, la miiŋgu ya o ibuŋ. Kanifuule, I simnuŋ masanɔ nya* kpeekpeiyo. Chiee bɛndu kɛ kɛ I cho chua waŋndo o pilɛ, nduyɛ mi chua wanaa ŋiɔɔŋ o yuŋgu kɛ kɛ choo, mi hiŋ a nya Saayɔŋ.+ 15 I cho nya wanaa mandaa lasaa ya hini kɔl a nda wa ke,+ ma wa nya nyɛdiaa kioo a kɔl kaloo vɛlɛ a sinapɛŋgoo. 16 A teleŋ koŋ, la cho chuauwa violɔɔ mi la kui tau o lɛŋndeŋ niŋ.” Ya Chɛhowa dimi lende ni.+ “A suu lɛ niŋ a kɔfu kpema Chɛhowa wo okɔɔ le! Kɔl del lɛ niŋ nda pɛŋ le ndu, kɛlɛŋgaa niŋ te ma yiyaŋ a ndu, ɔɔ mi yeemɛi bii nda le ndu le. Nduyɛ fɛɛŋ bɛɛ a toosiaa lɛ ndu le. 17 A teleŋ koŋ, a cho Chulusalɛm veelu maa kpeŋgbei* lemasa Chɛhowa wo.+ Nduyɛ lɛŋnde kpou cho chuuŋgiaŋ Chulusalɛm le diola Chɛhowa laŋ saŋgalaa.+ Fɛɛŋ bɛɛ a tullɛ niŋ nyɛ kɔlta ndalaŋ la dimul nda wo kɔɔli le dɛnɛ wɔɔŋndo tosaa le.”
18 “A teleŋ koŋ, waŋnda Chuda a waŋnda Isɔluɛi cho wa o diompilɔɔ niŋ.+ A cho chɔnɔŋ o lɛŋndeŋ ba luaŋ ndo, ma hiŋ diompilɛ o lɛŋnde ya ke finyaa ndaa mamaa le mi le wa nyɛm kɛŋ nda leŋ niŋ.+ 19 Mi dimi aa: ‘Tofawɔ, mi siiŋguu nya puaa niaa, nduyɛ mi ke nya lɛŋnde kɛndɛ kɛndɛleŋ, nyɛm kɛŋ hiou naŋɔɔ kpou woŋ kaalaŋ tɛɛŋ.’+ Mi yiyaŋ vɛlɛ maa la cho ya veelu aa: ‘Kɛkɛ naa!’ nduyɛ maa la cho ya faŋaŋ kɔɔli le. 20 ‘A tonya, mɛɛ wana lanɔ mulu muluaŋndo mal nuaa pɔnɔ ndɔ* yɛ, lende koni nya waŋnda Isɔluɛi tosa a ya ni.’+ Ya Chɛhowa dimi lende ni.”
21 Mi tuɛi bɔɔluuwo o pemboŋ choo.
Waŋnda Isɔluɛi wa chaŋndaŋ nduyɛ ma nyɔɔlu,
Kanifuule ma tosa nɛi nda wa kɔlaŋ choo wo kɔŋgɔdi kɔŋgɔdi,
Nduyɛ ma puɛɛnuŋ a Chɛhowa Mɛlɛka ndaa.+
22 “Nya puaa kɛɛ ya haa mi la mal la wa, la miiŋgu ya o ibuŋ.
I cho nya siŋgi, nduyɛ fɛɛŋ bɛɛ la kɛɛ lɛ ya le.”+
“Oo Chɛhowa, mi che naa, ŋ miiŋgu num o ibuŋ!
Kanifuule, num cho Mɛlɛka naa ni.+
23 A tonya, bɔɔluu fondoo koni naŋ wa kɔlaŋ o pembuŋ pɔmbɔŋ a o pembuŋ bɛndoŋ choo ni.+
Chɛhowa Mɛlɛka naa tosa ni mi Isɔluɛi sɔla pioŋɔɔ.+
24 Chɔŋ o feleŋgɔyɛi nɛi niŋ, nyɛ fondoo hoo* cho saŋga finyaa naa mamaa dioo ni.+
O chii saa ndaa, chuiŋaa ndaa, nauwaa ndaa,
Puaa ndaa, vɛlɛ a chuauwaa ndaa laanduaa kpou dio.
25 La ŋ hiniŋ o siɔmbula naalaŋ niŋ,
Nduyɛ mi bɛɛla naala tambɛilaŋ la kumbu naa,
Kanifuule ŋ tosa hakioo a Chɛhowa Mɛlɛka naa.+
Naa ni, finyaa naa mamaa ni, chɔŋ o feleŋgɔyɛi nɛi niŋ haaa a paale hauleŋ ndeŋ naŋ tosa hakioo ni,+
Nduyɛ miŋ kɛɛ le Chɛhowa Mɛlɛka naa diikɔŋndo.”
4 Nyɛ ya Chɛhowa dimi wo cho hoo ni: “Oo Isɔluɛi, miiŋgu ya o ibuŋ.
2 Te a mɛnaŋ pɛ o tonyaa choo,
Sandei a sakpoyɛi, ma dimi aa: ‘Mɛɛ i cho kpendekele maa Chɛhowa cho yoomu yɛ!’
Koŋ cho tosa mi waŋnda o lɛŋnde niŋ sɔla salaa o ndu niŋ,
Nduyɛ ma pɛɛluŋ o ndu niŋ.”+
3 Nyɛ Chɛhowa dimul puaa Chuda a Chulusalɛm ndo cho hoo ni:
“La tosa walta nyalaŋ o lɛŋnde kɛndɛ leŋ choo,
Nduyɛ la wa kulloŋ saŋɔɔ o yɔɔŋ tɛɛŋ te.+
4 Nya puaa Chuda a waŋnda Chulusalɛm,
La sɔla hivi chiɛi kɔɔlioo le Chɛhowa,
Mi la faaŋiaa kɔlula cho o kɔlta nyalaŋ choo laŋ,+
Yɔŋii ya dɔɔnuŋ tumbe a nya o kala kala mɛɛ yiŋndeŋ le bii nuaa yɛ,
Le dɛnɛ nya wɔɔŋndo,+
Nduyɛ wana o wana ve niŋ le leŋ nyumi le.”
5 La dimi ndi o Chuda niŋ, mi la yonda ndi o Chulusalɛm niŋ.
La deŋi choo choo, okoŋ mi la hɔŋ buloo o lɛŋndeŋ niŋ kpou.+
La dimi choo choo kpeleŋ aa: “La ŋ chuuŋgiaŋ naapilɛ,
Miŋ nyaanuŋ o chieeŋ bɛnduŋ cho o kpakila kala kalalaŋ niŋndoŋ.+
6 La simi suŋgbuleŋ maa tamasi o nɛi kuɛ Saayɔŋ ndo.
La nuuviaa naa viaŋnaŋnda, nduyɛ la sim te.”
Kanifuule I cho hunɔɔ a nyɛpalaa fulaa ba luaŋ ndo,+ kpundɛ bɛndu bɛndoo.
7 Wana tɛɛmbuu lɛŋnde wo fula+
Mɛɛ kpɔkuŋndo* fula nuaa faŋ o bɛmɛlta ndɔlaŋ yɛ,+
O fula o fondaŋ ndɔɔ le mbo tosa mi siooŋnde bii waŋnda a lɛŋnde nyaleŋ.
Chieeŋ nyaŋ bɛndoŋ cho tambei sɔla, wana o wana chel lɛ niŋ loŋ te.+
8 Lelaŋ la wounuŋ nyɛla labɛkilaŋ,+
Mi la bii mɔnɛi, nduyɛ mi la chaŋ chaŋndo pila,
Kanifuule kɔl tuu bɛndu Chɛhowa wo feŋaŋ ndɔ naa choo le.
9 Nyɛ Chɛhowa dimi wo cho hoo ni: “O paale leŋ choo, kɔllo cho masaa yɔŋnɔŋ pulaŋ pulaŋ.+
Waŋ banaa bɛɛ, kɔltaŋ la cho nda yɔŋnɔŋ pulaŋ pulaŋ.
Siooŋii bɛnduei cho wanaa soliaa lasalaa biyɔɔ, nduyɛ mi kɔndɔfillo bii wanaa suaa le Mɛlɛka wa.”+
10 Okoŋ mi dimi aa: “Kpokoo Chɛhowa, Mɛlɛka Kpuluŋguma Bɛndoo! A hui waŋnda haa+ a Chulusalɛm mɛɛ ŋ dimi aa: ‘La cho wa o kɔl nyulu niŋ,’+ kɛ mi muɛi faŋnde wa naa o labolo.”
11 A teleŋ koŋ, a cho dimi a waŋnda haa vɛlɛ a Chulusalɛm okɔɔ aa:
“Hueiyii tuu kpɛi chaŋ o pembuŋ kpalamandaŋ ndoŋ choo o pollo niŋnde,
Cho hunɔɔ chua laandu wanaa niaa basɔɔ.
O cho le kuluŋ hɛi ɔɔ le muŋ dindi le i cho hunɔɔ le.
12 Ya tosa ni mi hueiyii fuku fukuei chɛŋ o fondaŋnda laŋ.
I cho nda yamɛi kilul.
13 O cho hunɔɔ mɛɛ piɔɔ hel nuaa mbo piimiaa kpilo kpilo yɛ,
Nduyɛ nyɛm ndɔŋ nyaanaŋ suaa naŋndoŋ cho ko maa hueiyii bɛndu bɛnduei.+
Suaa nduaa keleŋa a hiou koviaa.+
Kpundɔɔ tol naa choo, mbɔ naŋ chuu fɔ!
14 Oo waŋnda Chulusalɛm, la dindi kɔlta nyalaŋ, nduyɛ mi la soli balaŋ o dɛnɛ wɔɔŋndo niŋ, le halikpeŋ mi la sɔla pioŋɔɔ.+
Le vɛɛ kpɛ nya cho yɛ wa yiyaŋndo o sɔɔŋ wɔɔŋndoŋ choo?
15 Waŋndo cho yooŋgoo dimioo o Daŋ niŋ,+
Nduyɛ o dimi maa kpundɔɔ cho le pembuŋ bɛndoŋ o Ifiluem niŋ.
16 La dimul lɛŋnde a ndi okɔɔ,
La dimi ndi Chulusalɛm.”
“Suaŋsuaŋnda* cho fulaa o fondaŋnda leviltaŋ ma wa hunɔɔ,
Nduyɛ a cho deŋi choo choo kpeleŋ, le chieeŋ bɛndoŋ o Chuda niŋ chiŋalaŋndo.
17 A cho fulaa ba o ba fee o fondaŋnda wakpa laŋ le ndu hunɔɔ chiŋalaŋndo,+
Kanifuule o simul la.”+ Ya Chɛhowa dimi lende ni.
18 “Kelala numndaŋ a kaala numndaŋ la cho num mululaŋ.+
Kpundɛ numndo wɔu niŋ bɔɔ,
Kanifuule o kɔllo niŋ di dɛnɛ wɔɔŋ numndo chɛŋ ni!”
19 Kpokoo ya, aa ma che kpundɔɔ!
Nyɛ nɛiyaa cho ya bɔɔ o kɔllo niŋ.*
Kɔllo cho ya lɔɔ kpu kpu.
I nɔla mi mei le,
Kanifuule I tuei buloo suɛi.
I tuei bɔɔluu chɔuwo.+
20 A konala kpundɛlaŋ okɔɔ kinɛi naŋ tuɛi ni,
Kanifuule lɛŋndeŋ kpou le sɔla tambei.
Tɛndiila nilaŋ la sɔla tambei o lepilɛ niŋ kpe,
Nduyɛ mi kolala tɛndii nuu la tambu o biɔŋɔɔ le pilɛ bɛŋgu.+
21 Le vɛɛ kpɛ ya cho yɛ hiouwɔɔ lachi a suŋgbuleŋ chɔɔ maa tamasi,
Vɛlɛ a buloo tueinɔŋndo o lani?+
22 “Diɔmaa fonduaa wanaa niaa cho ni,+
A yiyaŋ pɛŋ a ya okɔɔ le.
Diɔmnda puaa niaa cho ni, a nɔ sinapɛŋgu le.
A nɔ taasioo tau le sɔɔŋ wɔɔŋndoŋ tosaa,
Kɛ sɔɔŋ kɛndɔŋ muŋ, a sina mɛɛ wana tosa muŋ yɛ le.”
23 Mɛɛ ya tofa lɛŋndeŋ, I chi nyɛ o nyɛ lechoo le, pɔmndo kposoŋ le wa ni.+
Mi tofa choo choo, kɛ nyɛ teŋgaa ve loŋ te.+
24 Mi cha pembuŋ bɛndoŋ ŋ wa nyiiyaa,
Mi pembuŋ pɔmbɔŋ bɛɛ wa hiilɔŋndo.+
25 Mɛɛ ya tofa, I chi wana o wana le,
Mi youwaa balu o choo choo niŋnda bɛɛ kpou kuaŋnuŋ.+
26 Mɛɛ ya tofa mi cha maa fondaŋ iyɔmndo simnuŋ pollo,
Nduyɛ mi chieeŋ ndɔŋ bɛndoŋ kpou sɔla tambei.+
Chɛhowa tosa keŋ ni,
Le mɛɛ o dɔɔnuŋ tumbe o kala kala yɛ.
27 Nyɛ Chɛhowa dimi wo cho hoo ni: “Lɛŋndeŋ kpou le cho simnɔŋ pɔmndo,+
Kɛ I cho leŋ tɛɛmbuu kpata kpata le.
Kanifuule ya kɛɛsiaa ni, mi dimi le ndi tosaa.
Nduyɛ I siŋga kɔl nuu* le, kɛlɛŋgaa niŋ te mi faŋaŋ o nyɛ ya dimi wo choo.+
29 Mɛɛ bɔɔluu wanaa nyaanuŋ suaa wa a wanaa wuu chiŋuaŋ nda soo,
Mi chioo kpou nyaanuŋ.+
Mi waŋnda kpou sɔndaŋ yondoo niŋ,
Ma helnuŋ o poutaŋ choo.+
Waŋnda mal chieeŋ bɛndoŋ kpou,
Nduyɛ wana o wana cho leniŋ te.”
30 Yɛɛ ŋ cho yɛ niko tosa mɛɛ ŋ sɔla niŋ nuaa tambei yɛ?
Nyɛla siaŋala sɔɔtɔtɔ laŋ num oo chuɛɛnuŋ ni,
Mi num oo bayiaŋ nyɛm kɛvɛlɛŋ nda toosiaa a kooliiyoŋ ndoŋ,
Nduyɛ ma suiinuŋ tiweiyo o lahɔl.
Kɛ naŋɔɔ fondoo fuu ŋ naŋ ni.+
Kanifuule, mi wanaa wa num i lako lakuei kɔɔli wa kɛɛ num.
Suŋ suŋ niŋ a cho nɛilaŋ nuuviaa le num diyɔɔ.+
31 Kanifuule I tuei bɔɔluuwo maa bɔɔluu wana lanɔ cho a naa wo,
Maa bɔɔluu wana lanɔ cho violɔɔ iwɛɛŋndo, mbo wa o nyɛ nɛiyaa niŋndo.
I tuei diom chua laandoo Saayɔŋ o cho yoomuaŋ saaliaa wo.
O heelu balaŋ choo choo mbo dimi aa:+
“Kpundɔɔ cho le ya, kanifuule wanaa yeema ya diyɔɔ wa tosa mi saŋga yɔkɔɔ!”
5 Balu o nɛila bɛndulaŋ choo Chulusalɛm.
Mɛɛndaŋ ndu nyɛkɛndɛi.
Mɛɛndaŋndɔ o luŋnda ndɔlaŋ
Le chɔɔ te a saaluŋ niŋ pɛ wana tosa sɔɔŋ o nɛi sakpoo choo wo,+
Nduyɛ mbo lo o lediom ndo.
Okoŋ, I cho ndu malɔɔ haki.
2 O yɔŋ bɛɛ ma mɛnaŋ aa: “Mɛɛ i cho kpendekele maa Chɛhowa cho yoomu yɛ!”
Mɛnaŋ lachoowaa koni nda cho wa ni.+
3 Oo Chɛhowa, baa o cho wanaa tosa sɔɔŋ o nɛi sakpoo choo wa le ŋ tofa le?+
Ma suaŋ nda, kɛ a sinaŋ nyɛ nɛiyaa le.*
Ma tɛɛmbuu nda, kɛ a pɛɛku isɔɔ leniŋ te.+
4 Kɛ mi dimuluŋ yapila aa: “O kpeekpei niŋ waŋnda haa cho wanaa sɔvɛ le.
A tosa sɔɔŋ ŋdiɔmndoŋ, kanifuule a sina hɛnaŋ Chɛhowa wo le,
Nduyɛ a sina sawala Mɛlɛka ndaa le.
5 I cho lakɔ o wanaa cho a sɔvɛ wa lo, mi soo o nda lo.
Kanifuule a sina hɛnaŋ Chɛhowa wo,
Vɛlɛ a sawala Mɛlɛka ndaa.+
Nda kpou yem yɔm wa nda o ikɛsu wo,
Nduyɛ ma kili kili yɔlɔŋ wa nda ŋ bayiaa woŋ.”
6 Lelaŋ kpɔkuŋ* cho yondoo niŋndo chiŋalaŋ nda ni,
Mi tiwollo o lɛŋnde dɛŋgbɛleŋ niŋ wa hiouwɔɔ lachi a nda kisi kisioo.
Tambillo hini o chieeŋ ndaŋ bɛndoŋ ikɛi mbo wa mɛŋgɛlaa.
Wana o wana fula o chieeŋ muŋ niŋ pɛ, o sɛɛsiaa ndu.
Kanifuule hakila ndalaŋ la cho bɔɔ,
Nduyɛ sɔɔŋ nda cho tosaa o kafalaŋ choo woŋ cho tau tau.+
7 Vɛɛ ya mallɛ nya haki le hei?
Puaa nyaa kɛɛ ya,
Nduyɛ ma mɛnaŋ o nyɛ cho Mɛlɛka kpeekpei le wo lo.+
I ke nda nyɛm nda hau ba woŋ,
Kɛ ma hiau lachi a kaa suundɛiyo tosaa,
Nduyɛ ma wa kɔlaŋ ikpɔlɔ kpɔluɛi o chiɛi wana lanɔ suundɛiyo niŋ.
8 A cho ko maa suaa cho ilako lakuei le helɔɔ wa.
Wana o wana cho lanɔɔ chaŋ ndɔ fɛlɛ fɛlaa le waa a ndu.+
9 Chɛhowa dimi aa: “Baa I nɔ di le mi nyuna nda ma dɔɔnuŋ kona a sɔɔŋ muŋ okɔɔ le?
Baa I nɔ di mi miŋgul lɛŋndeŋ ndeŋ maa le?”+
10 “Kɔ chiŋalaŋ kpele ndɔ makilepiiyo nduyɛ ma tɛɛmbuu ndu,
Kɛ tɛɛmbuu ndu kpata kpata le.+
Kili kili lɛuwuŋ ndɔŋ cho pɛŋgɛlaŋndo woŋ,
Kanifuule o cho le Chɛhowa le ŋ cho le.
11 Waŋnda Isɔluɛi a waŋnda Chuda
Ve ya sɔɔŋ kɛndɛ tosal te.” Ya Chɛhowa dimi lende ni.+
12 “A kɛɛ Chɛhowa, ma wa hiouwɔɔ lachi a dimioo aa:
‘O cho naa nyɛ o nyɛ tosal te.*+
Kpundɛ kɛ kɛ cho naa tolɔɔ choo le.
Ŋ chi niŋ muɛi faŋnde ɔɔ mi yima bɛnduaŋ ma tol naa choo le.’+
13 Wanaa suaa le Mɛlɛka wa, hueiye kpu fula nda o sondo ni.
Diom Mɛlɛkaa cho nda niŋ te.
Maa hei yɔŋnuŋ a nda!”
14 Lelaŋ nyɛ Chɛhowa, Mɛlɛka puaa chɔuwa dimi wo cho hoo ni:
“Le nyɛ puaa haa dimi hoo wo,
I cho tosa mi diomnda nilaŋ la wa num o sondo maa leyiŋ,+
Nduyɛ mi waŋnda haa wa yɔmnde,
Okoŋ mi le lom nda.”+
15 Nyɛ Chɛhowa dimi wo cho hoo ni: “Oo waŋnda Isɔluɛi,+ I cho lɛŋnde cho landaŋ ndeŋ chua mi le huŋ chiŋalaŋ nya.
Lɛŋnde cho niŋ le teleŋ vilɛi leŋ le cho ni.
16 Bɔlɔla ndala nda wou chiŋuaŋ ndaŋ la cho ko maa sɛi kumbiaŋ,
Nda kpou kuubaa chɔuwa nda cho ni.
17 A cho nyɛm nya kou woŋ a nyɛdiaa* nyaa tɛɛmbuu.+
A cho puaa nyaa a chuauwaa nyaa laanduaa diu.
A cho saa nyaa, chuiŋaa nyaa, vɛlɛ a nauwaa nyaa diu.
A cho kpelela nyala makilepiilaŋ a kpelela nyala mafikiilaŋ tɛɛmbuu.
A cho chieeŋ nyaŋ bɛnduŋ cho o kpakila kala kalalaŋ niŋ mi la tiindaŋ muŋ ndoŋ tɛɛmbuu a muɛi faŋnde.”
18 “Kɛ a teleŋ koŋ bɛɛ, I cho nya tɛɛmbuu kpata kpata le.”+ Ya Chɛhowa dimi lende ni. 19 “Te a nyuna pɛ aa, ‘Le yɛɛnɛ Chɛhowa Mɛlɛka naa tosal lɛ naa sɔɔŋ muŋ kpou?’ Dimul nda aa, ‘Mɛɛ nya mal la mi la muliŋ mɛlɛkaa cheleŋnda sooluuwo o lɛŋnde nyaleŋ niŋ yɛ, lende koni nya cho wallo tosa le mialla o lɛŋnde isumialteŋ niŋ ni.’”+
20 Dimul yuŋgu Chekɔpu wo a hei okɔɔ,
Nduyɛ ma yonda ndi o Chuda niŋ aa:
21 “La yaŋ nilaŋ nya diɔmaa nɔ haa taasi le wa.*+
La nɔ hɔltaŋ kɛ la chi le.+
La nɔ nilaŋ kɛ la tuii le.+
22 Nyɛ ya Chɛhowa dimi wo cho hoo ni, ‘Baa la nɔ siooŋii ni le?
Baa la nyiiya ya lachi le?
Ya kɛsi siooŋnde ni, le mi i wa pɛŋgulaŋ le pee mɛŋma ihɛllo,
Nduyɛ le fɛɛŋ a fɛɛŋ la feŋaŋ te.
O yɔŋ bɛɛ mi ma wa ikpoku kpokuei, ma sɔla batiuwaa le.
Ma wa bɛɛ bɔɔluu bɛndoo, ma tiuba mi ma hiou pɛŋgula laŋ te.+
23 Kɛ wanaa bolii kalaa a wanaa nilakaluaa waŋnda haa cho ni.
A mal la, ma tual nɛila ndalaŋ kɔɔli.+
24 Ma kɛɛ le dimiŋndo o lakɔl aa:
“Ŋ nɔŋnuŋ siooŋnde le Chɛhowa Mɛlɛka naa.
Ndu tosa ni mi piɔɔ sia a boondii o nɔ le siaa ve,
Nduyɛ mbo ke naa piɔɔ a wɔɔle pɔmbɔleŋ vɛlɛ a wɔɔle kala kalaleŋ.
Ndu tosa ni miŋ kou chiɔɔŋ naŋ a paŋguŋ kpeekpei naŋ nɔ miŋ kou muŋ ndoŋ.”+
25 Biondɔŋnda nyalaŋ la tosa la cho nyɔɔŋ muŋ sɔla le,
Nduyɛ hakila nyalaŋ la kuuna nya nyɛm kɛndɔŋ sɔlaa.+
26 Kanifuule wanaa dɛnɛ wɔɔŋnda cho wanaa niaa tɛɛŋ.
A hini mɛŋgɛlaa mɛɛ doosunɔ youwa hini nuaa lɛŋ fɛlɛkpɛkpɛ le mɛŋgɛlaa yɛ.
A yaŋ yaŋɔɔle piɔm ndeŋ.
Nduyɛ, waŋnda chieeya le bii ni.
27 Mɛɛ fonda nda manda youwa wo wa nuaa o piaa cha a youwa yɛ,
Lende koni chiɛila ndalaŋ la cho la piaa cha a kafalaŋ ni.+
Lelaŋ nda simnuŋ wanaa sulaa a wanaa kpaaya bɛndu ni.
28 A chelul nduyɛ ma yɔŋnuŋ niŋgili.
Dɛnɛ wɔɔŋndo o piaa nda niŋ cha.
A suŋgu le wanaa nɔ ŋfinya le wa o lemasa,+
Le halikpeŋ ma sɔla batiuwaa le.
Nduyɛ ma kilul wanaa bala fonduaa yamɛi lakafɛi.’”+
29 Chɛhowa dimi aa: “Baa I nɔ di le mi nyuna nda ma dɔɔnuŋ kona a sɔɔŋ muŋ okɔɔ le?
Baa I nɔ di le mi miŋgul lɛŋndeŋ ndeŋ maa le?
30 Suɛi wɔɔŋ wɔɔŋnde yɔŋnuŋ o lɛŋndeŋ ndeŋ niŋ:
31 Wanaa suaa le Mɛlɛka wa cho sɔɔŋ lachoowaŋ dimioo,+
Mi wanaa soliaa lasalaa wa kpaaya ndaa soliŋndo kpeku o nɛi wɔɔŋndo choo.
Nduyɛ, wanaa niaa kaala bɔɔ hei.+
Kɛ yɛɛ nya cho yɛ tosa te mɛɛlulaŋ la fuuluu pɛ?”
6 Oo nya puaa Bɛŋjamiŋ nda, la faŋaŋ Chulusalɛm mi la kɔ vioŋnuŋ.
Kanifuule kpundɛ bɛndu bɛndoo cho chɔŋnɔŋndo ba luaŋ ndo.+
2 Chua laandoo Saayɔŋ cho ko maa wana lanɔ kɛndɛ kɛndɛ choŋnuŋ o biiloo niŋndo.+
3 Wanaa mandaa lasaa cho hunɔɔ a chɔluaa ndaa,
Ma huŋ balu ndu silɔ a tɛndiila ndalaŋ.+
Wana o wana cho wa chɔluaa nduaa billo kioo.+
4 “La bɛɛndiaŋ* le ndu chiŋalaŋndo a chɔuwo!
La chɔŋ mi la chiŋalaŋ ndu ipala deŋ!”
“Kpundɔɔ cho le naa, kanifuule paaleŋ le cho delɔɔ,
Nduyɛ nyumndaŋ ma cho tolɔɔ!”
5 “La chɔŋ miŋ chiŋalaŋ ndu a nyumndaŋ.
Ŋ tɛɛmbuŋ chiɛila ndɔla choo choola kala kala laŋ.”+
6 Nyɛ Chɛhowa, Mɛlɛka puaa chɔuwa dimi wo cho hoo ni:
“La kiolu yɔmnde mi la wou Chulusalɛm o piŋndo niŋ.+
Chiee bɛndu ya nɔ mi tusi nyɛpalaa choo le hakila ndɔlaŋ ndo o cho ni,
Kanifuule dɛnɛ wɔɔŋndo cho o piaa loŋ cha.+
7 Mɛɛ mɛŋndaŋ ma wa nuaa ma nyulu vili o sooŋndo niŋ yɛ,
Lende koni dɛnɛ wɔɔŋ ndɔɔ cho ni.
Sɔŋgɔlaŋ a diyɔɔlaŋ wana tuɛi o chioo hoo niŋ ni.+
Nyɛ ya cha wo kinɛi cho naalaŋ a kpundɛlaŋ ni.
8 Oo Chulusalɛm, yaŋ nilaŋ o sila ya cho num ndo. Te o cho koŋ te, a cho ya kuisiŋ o kɔl.+
I cho tosa ma simnuŋ pɔmndo, wana o wana chel lɛ loŋ te.”+
9 Nyɛ Chɛhowa, Mɛlɛka puaa chɔuwa dimi wo cho hoo ni:
“A cho wanaa lo o Isɔluɛi niŋnda nuuviaa tɛɛ tɛɛ, mɛɛ nda nuuviaa nuaa kilepiima lo kɔɔli o kpelelaŋ niŋndaŋ yɛ.
La kei nda vɛlɛ balaŋ choo mɛɛ nda keenduu nuaa kilepiima lo o yɔmnde choo waŋ yɛ.”
10 “O nɛɛnɛ lo ya cho yɛ isɔɔ, mi sila ndu?
Nɛɛnɛ cho yɛ ya nilaŋ yaŋɔɔ?
Tofawɔ, a kinda nila ndalaŋ* yɔŋii nda tuei nyɛ ya cho nda dimullo wo.+
Diom Chɛhowa wo simnuŋ nyɛ mamaa le nda,+
A nɔ iyeema kposoŋ o ndu niŋ te.
11 Kɔl tuu Chɛhowa wo cho ya o piaa niŋ cha,
Nduyɛ I saŋga a ndu biuwɔŋndo.”+
“Hulu ndu chuaambuaa cho o nɛila bɛndulaŋ choo wa choo,+
Ma hulu vɛlɛ ndu chuaa piaanduaa chuuŋgiaŋ naapilɛ a kundalaŋ nda choo.
12 Wanaa cheleŋnda cho chiɛila ndalaŋ,
Kpelela ndalaŋ, vɛlɛ a laandaa ndaa hiɔlɔɔ.+
Kanifuule I cho ba nuu siɛndi mi chiŋalaŋ wanaa cho o lɛŋndeŋ niŋnda.” Ya Chɛhowa dimi lende ni.
13 “Chuaambɔ ni, kaasoŋnɔ ni, nda kpou cho tɔnɔlaŋ sɔlaa o kafalaŋ choo.+
Wanaa suaa le Mɛlɛka wa ni, wanaa soliaa lasalaa ni, nda kpou cho nyɛm pilaŋ dioo a lediɔɔmu.+
14 A cho saalaŋ le pauvii wanaa niaa siŋgioo le. A cho nda dimullo aa,
‘Kɔl nyuloo cho! Kɔl nyuloo cho!’
Kɛ nduyɛ kɔl nyulu cho le.+
15 Baa siɔmbula bii nda le sɔɔŋ nɔɔlɛi nda tosa woŋ te?
Siɔmbula bii nda kposoŋ te!
A sina pɛŋ nyɛ cho siɔmbulaŋ ndo le!+
Le hei, a cho tambei sɔla maa wanaa sɔla tambei ya.
A cho boŋ ma del, te I tusi nda nyɛpalaa choo pɛ.” Ya Chɛhowa dimi lende ni.
16 Nyɛ Chɛhowa dimi wo cho hoo ni:
“La sim o fondaŋ nɛilaŋ la bɔŋa wo mi la che.
La nyuna a nɛila masindɛlaŋ okɔɔ.
La nyuna le ma chɔm nya nɛi kɛndɔɔ mi la kuɛ lechoo,+
Okoŋ mi la sɔla pɛŋgioo.”
Kɛ ma dimi aa: “Ŋ cho lakɔ lechoo le.”+
17 “Mi hɛli wanaa mɛŋgɛlaa,+ ma dimul nda aa:
‘La yaŋ nilaŋ o bulu nda cho hɔŋndo wo!’”+
Kɛ ma dimi aa: “Ŋ cho lani yaŋɔɔ le.”+
18 “Lelaŋ, la yaŋ nilaŋ nya waŋnda o lɛŋnde niŋ!
Nya wanaa chuuŋgiaŋ haa wa,
Le sinaa nyɛ cho yɔŋnɔŋ a nda wo.
19 Nya waŋnda o lɛŋndeŋ choo kpou, la yaŋ nilaŋ!
I cho waŋnda haa nyɛpalaa tusi choo,+
Le yiyaŋnda wɔɔŋnda cho nda o kɔl taŋ.
Kanifuule a yeŋ nyɛ ya dimi wo lani le,
Nduyɛ ma kɛɛ sawala* nilaŋ.”
20 “La fula bɛɛ a filaŋkiŋsɛŋ ndoŋ Siɛba,
Vɛlɛ a nyɛm chuŋ kɛndɔŋ* fulaa o lɛŋnde cho landaŋ ndeŋ niŋ, I buulaŋ a muŋ te.
Salala nyala luamaala kpulukuu laŋ, I chɛl taŋ te.
Nduyɛ salala nya soli laŋ la nɛŋi ya kɔl te.”+
21 Lelaŋ, nyɛ Chɛhowa dimi wo cho hoo ni:
“I cho waŋnda haa poutaŋ kɛsi lachi,
Okoŋ ma boŋ, ma del lechoo.
Finyaa nda puaa ndaa cho delɔɔ naapilɛ,
Mi poo nda wana nda chiɛɛliaŋ ndo del naapilɛ.
Nduyɛ nda kpou cho tambei sɔla.”+
22 Nyɛ Chɛhowa dimi wo cho hoo ni:
“Waŋnda cho chɔnɔŋndo o lɛŋnde cho ba luaŋ ndo leŋ,
Lɛŋnde kpaaya bɛnduleŋ le cho chɔnɔŋ o fondaŋnda cho landaŋ o lɛŋndeŋ choo laŋ.+
23 A cho chiɔulaŋ a baltaŋ chua.
Wanaa kɔl vesɛiya pila nda cho ni, nduyɛ a nɔ inyiɛɛ le.
A cho wa bɔɔluuwo maa pee mɛŋma ihɛl,
Nduyɛ a cho hunɔɔ o suaa choo.+
Oo chua laandoo Saayɔŋ, a cho a kɔɔnaa le num chiŋalaŋndo maa puaa chɔu.”
24 Ŋ tuei konaa a ndi okɔɔ.
Balaŋ la vi naa doŋ.+
Nyɛpalaa tol naa choo.
Nyɛ nɛiyaa kpuuwa naa mɛɛ pulii vialɛi kpuuwa nuaa wana lanɔɔ yɛ.+
25 La kua yondoo niŋ te,
Nduyɛ la balu o nɛi le,
Kanifuule muɛi faŋnde cho yaamɔɔnɔɔ o ba.
Siooŋnde bii waŋnda kpou.
26 Oo chua laandu wanaa niaa,
Wounuŋ nyɛla labɛkilaŋ+ nduyɛ ma yuuliaŋ o pultaŋ niŋ.
Bii mɔnɛi nduyɛ ma chaŋ chaŋndo pila, naŋ chaa pole numnde pilɛ leŋ le vi ni.+
Kanifuule wana tɛɛmbaa cho naa hinul o lepilɛ niŋ kpe.+
27 “I siiŋguu num* nyɛ nda tofa chiliŋnde wo wanaa niaa tɛɛŋ,
Le nda mɛɛndaŋndo nyɛkɛndɛi.
A nɔ ma handu nda hɔlteŋ choo nduyɛ ma mɛɛndaŋ kaala ndalaŋ.
A cho ko mɛɛ chiliŋii siaŋɛi* a chiliŋuŋ cheleŋndoŋ cho nuaa yɛ.
Nda kpou wanaa lakafaa nda cho ni.
29 Nyɛla nda fuula yiŋndeŋ ndaŋ la ŋuɛ.
Nduyɛ, liiye kinɛi lo ni i teŋga le.
Saŋgaŋ fondoo fuu wana cho kindiŋndo le ndi teeŋgiaa wo cho ni.+
Nduyɛ, a nɔla ma soli wanaa wɔɔŋnda waŋnda tɛɛŋ te.+
30 Waŋnda cho wa nda veeloo aa chiliŋii humbuii nda kɛɛ ve,
Kanifuule Chɛhowa kɛɛ nda.”+
7 Nyɛ Chɛhowa dimul Chɛluimaya wo cho hoo ni: 2 “Sim o dio kpaki chiɛi Chɛhowa wo ma dimul waŋnda yooŋgoo hoo aa, ‘Nya waŋnda Chuda kpou, nya luɛi o diola kpakilaŋ le kɔlaŋ Chɛhowa wulaŋ beŋndo wa, la yaŋ nilaŋ o nyɛ Chɛhowa dimi wo. 3 Nyɛ Chɛhowa, Mɛlɛka puaa chɔuwa, Mɛlɛka Isɔluɛiya dimi wo cho hoo ni: “La siŋga kaala nyalaŋ vɛlɛ a mɛɛ nya tosa sɔɔŋ yɛ, okoŋ I cho nya chɛlɔɔ mi la hiou lachi a waa o fondaa hoo.+ 4 La duau tiindaŋndo o choolaŋ niŋ mi la dimi aa, ‘Chiɛi Chɛhowa wo cho hoo* ni, chiɛi Chɛhowa wo cho hoo ni, chiɛi Chɛhowa wo cho hoo ni’ le!+ 5 Te la siŋga pɛ kaala nyalaŋ vɛlɛ a mɛɛ nya tosa sɔɔŋ yɛ, mi la kelu waŋnda yamɛi tɛɛŋ o nɛi sakpoo choo,+ 6 mi la bii mialaa cho nya tɛɛŋ nda, viiya,* a waŋ laanduaa vii piaanduaa wa biyɔɔ wɔɔŋ te,+ mi la dii wanaa tɛɛmbuu isɔɔ le wa o fondaa hoo le, nduyɛ mi la tul mɛlɛkaa cheleŋnda kɔɔli le nyapila nyɛpalaa tusiŋndo choo le,+ 7 mɛɛ I cho nya chɛlɔɔ mi la hiou lachi a waa o fondaa hoo, lɛŋnde ya ke finyaa nyaa mamaa le fɛɛŋ a fɛɛŋ ndeŋ.”’”
8 “Kɛ la cho hiouwɔɔ lachi a tiindaŋndo dɔwɔɔ o choola nda dimul nya laŋ niŋ,+ nduyɛ keŋ chuu nya tɔnɔ o tɔnɔ le. 9 Baa o bɛnda pa mi la tosa viileŋ,+ mi la dii, mi la tosa kaa suundɛiyo, mi la mɛnaŋ o choolaŋ choo,+ mi la soli salalaŋ* o Baal lo,+ nduyɛ mi la tol mɛlɛkaa cheleŋaa nya sina le wa kɔɔli, 10 okoŋ mi la huŋ sim ya lachi o chiɛi nɔ diola nilaŋ ndo, mi la dimi aa, ‘Ŋ cho pioŋɔɔ sɔla,’ mi che bɛɛ mi la tosa sɔɔŋ nɔɔlɛiyoŋ muŋ kpou? 11 Baa la yeema mi la siiŋguu chiɛi nɔ hoo diola nilaŋ ndo buulu viiya?+ Yapila cho chɔɔ nyɛ cho yɔŋnɔŋndo wo.” Ya Chɛhowa dimi lende ni.
12 “‘La kɔ Silɔɔ+ fondaŋ diola nilaŋ la wa paandu wo,+ mi la che nyɛ ya tosa a ndu wo, le mɛɛ wanaa niaa Isɔluɛi tosa sɔɔŋ wɔɔŋndoŋ yɛ.+ 13 Kɛ la cho hiouwɔɔ lachi a sɔɔŋ muŋ kpou tosaa, mi che bɛɛ mi sila nya lediiŋ diiŋ,* kɛ la yeŋ lani le.+ Mi hiau lachi a nya veeloo, kɛ la mulul la le.’+ Ya Chɛhowa dimi lende ni. 14 ‘Mɛɛ ya tosa a Silɔɔ yɛ,+ lende ya cho tosa a chiɛi nɔ hoo diola nilaŋ ndo ni,+ fondaŋ ya ke nya a finyaa nyaa mamaa mi la duau tiindaŋndo o ndu niŋndo.+ 15 I cho nya viouwɔɔ mi la faŋaŋ ya o hɔl, mɛɛ ya viou wanayaŋ nyaŋ fula o yuŋgu Ifiluem ndo choo wa kpou yɛ.’+
16 “Kɛ num Chɛluimaya, piɛi le waŋnda haa le. Chaŋ le nda, ma piɛi le nda, ɔɔ ma nyɔɔlu ya le mi mal nda haki le.+ Kanifuule I cho num lani yaŋɔɔ le.+ 17 Baa a cho chɔ sɔɔŋ nda cho tosaa o chieeŋ bɛndoŋ niŋ Chuda a o nɛila bɛndu laŋ choo Chulusalɛm ndoŋ te? 18 Chuauwa cho yɔmnde tiŋgɔɔ, mi finyaa wa yiŋndeŋ kiisuuwo, nduyɛ mi laanduaa wa kpeyaŋndo muuliaŋndo le beediiyo* toosiaa le salaa solioo o Masa Laandoo Choo Choo* lo,+ okoŋ ma wa sala mamuɛiyo talaa o mɛlɛkaa cheleŋnda lo le ya kɔllo tɛɛmbuuwo.+ 19 ‘Kɛ baa ya nda cho kɔllo tɛɛmbuuwo* ni? O cho ndapila le nda cho siɔmbulaŋ tusiŋndo le?’+ Ya Chɛhowa dimi lende ni. 20 Lelaŋ nyɛ Chɛhowa, Mɛlɛka Kpuluŋguma Bɛndoo dimi wo cho hoo ni, ‘I cho kɔl ni tuuwo tusi o fondaa hoo maa leyiŋ,+ mbo lom waŋnda chieeya, visiaa biyaa, yɔmnde yondoo niŋ, vɛlɛ a komɔɔlaŋ kpou. O cho nda lomɔɔ, nduyɛ wana o wana nɔla ndu niŋ pɔlul te.’+
21 “Nyɛ Chɛhowa Mɛlɛka Isɔluɛiya, Mɛlɛka puaa chɔuwa dimi wo cho hoo ni, ‘O faŋaŋ o salala nya soli laŋ kɔɔli, la chɔɔlu vɛlɛ salala luamaala kpulukuu laŋ soli, nduyɛ mi nyapila de visioŋ.+ 22 Kanifuule paale ya soli finyaa nyaa mamaa o lɛŋnde Ichipi leŋ niŋndeŋ, kposoŋ bɛɛ I dimul nda le salala luamaala kpulukuu laŋ a salala cheleŋ solioo o ya lo le.+ 23 Kɛ mi dimul nda aa: “La diikuŋ nyɛ ya cho nya dimullo wo, mi simnuŋ Mɛlɛka nyaa, nduyɛ mi nya bɛɛ simnuŋ wanaa niaa.+ La tol nɛila nila ya cho nya chɔmndo laŋ kpou kɔɔli, okoŋ mi nyɛ o nyɛ wa o kɛndɛ a nya.”’+ 24 Kɛ a yeŋ lani le, kɛlɛŋgaa niŋ te ma tosa nyɛ ya dimul nda wo.+ Ma tual kɔlta ndala dɛnɛ wɔɔŋndaŋ* kɔɔli le sɔɔŋ tosaa mɛɛ nda hɛnaŋ yɛ.+ Ma miiŋguŋ kɔɔli, a tosa hiouwɔɔ lachi le, 25 chɔŋ a paale ya soli finyaa ndaa mamaa o lɛŋnde Ichipi leŋ niŋndo haaa a paale hauleŋ ndeŋ.+ Le hei, mi hiau lachi a wanaa niaa suaa le ya wa yɔŋndo o nya lo lediiŋ diiŋ* le ma sila nya.+ 26 Kɛ a yeŋ ya lani le, nduyɛ a hendu kɔllo o nyɛ ya dimul nda wo choo le.+ Ma luɛi bolle kalaleŋ,* nduyɛ ma tosa sɔɔŋ wɔɔŋndoŋ hiouwɔɔ finyaa ndaa mamaa!
27 “O yɔŋ bɛɛ ma dimul nda sɔɔŋ muŋ kpou,+ a cho num lani yaŋɔɔ le. Nduyɛ veelu nda bɛɛ, a cho num mulul te. 28 Lelaŋ dimul nda aa, ‘Nya kɛɛ le Chɛhowa Mɛlɛka nyaa diikɔŋndo ni, mi la kɛɛ sila ndɔɔ. Sakpoyɛi lo nya tɛɛŋ pɛ,* nduyɛ wana o wana suu a ndi okɔɔ le.’+
29 “La kili yiiŋii cho nya o lebol le mi la viou ndi, nduyɛ mi la soli chonduŋ ŋmɔnɔŋ o pembuŋ kpalamandaŋ ndoŋ choo. Kanifuule Chɛhowa kɛɛ wanaa tɛɛmbuu ndu haa kɔllo wa, nduyɛ o cho nda malɔɔ. 30 Chɛhowa dimi aa, ‘Waŋnda Chuda tosa nyɛ bɛnda ya o hɔl te wo. A simi mɛlɛkaa ndaa nɔɔlɛiya o chiɛi nɔ hoo diola nilaŋ ndo niŋ, le halikpeŋ ma nɔɔliaa ndu.+ 31 A taŋgul fondaŋnda filioŋndaŋ Tofɛti, o Kpoloŋ Po Hinɔm Ndo,*+ le halikpeŋ ma wa puaa ndaa a chuauwaa ndaa laanduaa lomɔɔ o yiŋndeŋ niŋ.+ O cho ya le vem nda keŋ tosa le, nduyɛ paale pilɛ bɛɛ keŋ hiŋ ya o kɔl te.’*+
32 “Nyɛ Chɛhowa dimi wo cho hoo ni, ‘Teleŋ cho fuuluu, a veelu lɛ niŋ fondaŋ koŋ aa Tofɛti ɔɔ Kpoloŋ Po Hinɔm Ndo* le. Kɛ a cho ndu veelu aa Kpoloŋ Nda Diu Waŋnda Wo. A cho lo waŋnda kumbɔɔ Tofɛti haaa mi fondaa chuu.+ 33 Waŋnda haa dialuŋ ndaŋ vilɛiyoŋ cho simnɔŋ nyɛdiaa le youwaa balu o choo choo niŋnda, vɛlɛ a visiaa yonduaa o lɛŋndeŋ choo, nduyɛ wana o wana tuu niŋ nda le.+ 34 I cho tosa mi kpeŋjoo a bɔɔluu kɔl kɛndɛ wana pɔnɔ cho lanɔɔ chuaa wo, vɛlɛ a wana lanɔ cho challe o nɔɔ wo+ mɛɛlu o chieeŋ bɛndoŋ niŋ Chuda, a o nɛila bɛndulaŋ choo Chulusalɛm. Kanifuule, lɛŋndeŋ le cho tambei sɔla.’”+
8 Nyɛ ya Chɛhowa dimi wo cho hoo ni: “A teleŋ koŋ, paala masaa le Chuda, paala laŋgbaa nduaa kalla, paala wana soliaa lasalaa, paala wanaa suaa le Mɛlɛka wa, a paala waŋnda o Chulusalɛm niŋ kpou, I cho laŋ soli o sɛila ndalaŋ niŋ. 2 A cho paala ndalaŋ sɛŋi nyɛm ndaa kaala ma sooluu muŋ, nduyɛ ma beŋ muŋ wulaŋ ndoŋ lachi.+ Nyɛm muŋ cho yɛ paaleŋ, paŋgei, a nyɛ o nyɛ Mɛlɛka toosiaa o choo choo niŋndo ni. A cho nda diyɔɔ naapilɛ le, kɛlɛŋgaa niŋ te ma kumbu nda. A cho simnɔŋ maa nyɛ nɛŋi tɔlɔɔlaŋ ndo o lɛŋndeŋ choo.”+
3 “Nduyɛ wanaa cho lo yoomu o yuŋgu dɛnɛ wɔɔŋndo hoo tɛɛŋ nda, cho piɔmndo yeema mbo hiau waa yoomu, o fondaŋnda ya cho nda sɛŋi laŋ kpou.” Ya Chɛhowa, Mɛlɛka puaa chɔuwa dimi lende ni.
4 “Dimul nda aa, ‘Nyɛ Chɛhowa dimi wo cho hoo ni:
“Te a del pɛ, baa a nɔla lɛ ma chɛŋ te?
Te waŋndo o pilɛ mulul pɛ yɔŋ ndɔ wɔɔŋndo kɔɔ, baa a tuaa nɔla ma tosa nyɛ pilɛ koŋ te?
5 Le yɛɛ waŋnda Chulusalɛm cho yɛ hiouwɔɔ lachi a kiɔɔ waa sakpo o ya lo?
A yiŋnuŋ o choolaŋ niŋ,
Ma kɛɛ le ya miiŋgoo o ibuŋ.+
6 Mi chua teleŋndo le nda nilaŋ yaŋɔɔ, kɛ nyɛ nda dimi wo ve tonya le.
Wana pilɛ bɛɛ wookuŋ, ɔɔ mbo nyunaŋ aa: ‘Yɛɛnɛ ya tosa yɛ?’ le.+
Wana o wana cho faŋgaa tolɔɔ kɔɔli, mɛɛ soo yom nuaa a kiltaŋ le kɔlaŋ o chɔuwo yɛ.
7 You sitɔkii balu o choo choo niŋndo bɛɛ sina boonduŋ ndɔŋ.*
Te piiŋndo, kookoo, a kpukputulumaa kuɛ kelaa pɛ, a sina teleŋ nda miiŋgu wo.
Kɛ wanaa niaa sina nuaa maa teleŋndo cho niŋ fuuluuwo le mi ya Chɛhowa kilul nda yamɛi le.”’+
8 ‘Le yɛɛ mi la dimi aa: “Ŋ nɔ taasioo, nduyɛ ŋ sina sawala* Chɛhowa laŋ”?
Kɛ o kpeekpei niŋ, kpɛkile lachoowa leŋ+ wanaa poonyiaa soliŋ kpeku ni, le choolaŋ poonyiaa.
9 Siɔmbulaŋ la bii wanaa taasiaa.+
Siooŋii bɛnduei bii nda, nduyɛ a cho hau o yaŋɔɔleŋ.
A kɛɛ diom Chɛhowa wo,
Baa a nɔ pa taasioo?
10 Le hei, I cho laandaa ndaa chua mi ke puaa cheleŋ,
Mi chua chiɔɔŋ ndaŋ, mi ke wanaa cheleŋ.+
Chuaambɔ ni, kaasoŋnɔ ni, nda kpou cho tɔnɔlaŋ sɔlaa o kafalaŋ choo.+
Wanaa suaa le Mɛlɛka wa ni, wanaa soliaa lasalaa ni, nda kpou cho nyɛm pilaŋ dioo a lediɔɔmu.+
11 A cho saalaŋ le pauvii chua laandu wanaa niaa siŋgioo le. A cho dimioo aa:
“Kɔl nyuloo cho! Kɔl nyuloo cho!”
Kɛ nduyɛ kɔl nyulu cho le.+
12 Baa siɔmbula bii nda le sɔɔŋ nɔɔlɛi nda tosa woŋ te?
Siɔmbula bii nda kposoŋ te!
A sina pɛŋ nyɛ cho siɔmbulaŋ ndo le!+
Le hei, a cho tambei sɔla maa wanaa sɔla tambei ya.
A cho boŋ ma del te I tusi nda nyɛpalaa choo pɛ.’+ Ya Chɛhowa dimi lende ni.
13 Nyɛ ya Chɛhowa dimi wo cho hoo ni, ‘I cho nda chuuŋgiaa naapilɛ mi tɛɛmbuu nda.
Kilepiileŋ le pilɛ bɛɛ le cho lo o yɔm makilepiiyo choo le, nduyɛ fikiileŋ le pilɛ bɛɛ le cho lo o yɔm mafikiiyo choo le. Pei nduɛi kpou cho nyamala.
Nduyɛ, nyɛ ya ke nda wo cho nda hiɔlɔŋ.’”
14 “Le yɛɛnɛ naŋ challɛ nanuŋ?
Ŋ chuuŋgiaŋ naapilɛ miŋ kɔ luɛinuŋ o chieeŋ bɛnduŋ cho a kpakila kala kalalaŋ niŋndoŋ,+ miŋ sɔla tambei loŋ.
Kanifuule Chɛhowa Mɛlɛka naa cho naa basɔɔ tɛɛ,
Nduyɛ o cho naa ke mɛŋma nɔ pɔsɔnioo waŋ miŋ kol,+
Le mɛɛ naŋ tosa hakioo a ndu Chɛhowa yɛ.
15 Naŋ nɔ tiindaŋndo le kɔl nyuloo sɔlaa, kɛ mbɔ kɔl nyulu bɛɛ ŋ sɔla le.
Ŋ wa chumndo le miŋ sɔla kɛndiaa, kɛ miŋ luɛi o buulaŋ bɛndoo niŋ!+
16 Ŋ lo Daŋ, miŋ tuɛi suaa yaamɔɔnɔ naa hunɔɔ a yoomulaŋ ifuu fuu ve.
Mi bɔɔluu suaa nduaa piaanduaa wa wo
Tosa mi lɛŋndeŋ kpou le nyiiya.
Mɛɛ nda hiŋ o lɛŋndeŋ niŋ, ma tɛɛmbuu leŋ a nyɛ o nyɛ cho leniŋ.
Ma tɛɛmbuu chiee ndɔ bɛndoo vɛlɛ a wanaa cho leniŋ nda.”
17 “I cho nya kɛuwaa wɔɔŋ wɔɔŋnda yɔŋ tɛɛŋ,
Ma huŋ lɔuviaa nya,
Nduyɛ la nɔ niŋ ma nyulu le nda le.” Ya Chɛhowa dimi lende ni.
18 Kɔl ni tambɛiyo nɔ makoŋgo le,
Nyɛ nɛiyaa cho ya bɔɔ o kɔllo niŋ.
19 Wana lo landaŋ, ma tuei mɛɛ chua laandu wanaa niaa
Cho koŋullo le malaa yɛ. O cho dimioo aa:
“Baa Chɛhowa cho o Saayɔŋ niŋ te?
Baa masa ndaa cho loŋ te?”
“Le yɛɛnɛ nda simul lɛ ya a piɔmaa nda sɛl la,
Vɛlɛ a mɛlɛkaa ndaa fonduaa cheleŋ?”
20 “Teleŋ kuauwaa hiou, mi wɔɔleŋ le fuuluu o mɛɛlulaŋ,
Kɛ ŋ sɔla pioŋɔɔ le!”
21 Kɔllo tambu ya bɔɔ le pauvii chua laandu wanaa niaa sɔla ve.+
I tambu bɔɔ kɔllo,
Nduyɛ siooŋii bɛnduei bii ya.
22 Baa chuɛima baasam ndaŋ ma cho Kiliaadi le?+
Ɔɔ wana chiɔuwaa cho loŋ te?+
Le yɛɛnɛ chua laandu wanaa niaa sɔla wɔ sioŋgɔɔ le?+
9 Te bolle nileŋ lee wa pɛ mɛŋndaŋ kpu,
Mi hɔlta nilaŋ laa wa sooŋ mamɛmiɔɔ,+
I wa wa chaŋndo idii a ichɔl,
Le wanaa niaa nda diu wa!
2 Te yaa nɔ pɛ yiyala wanaa kelaŋnda o pollo niŋ,
I wa wanaa niaa malɔɔ mi yaa kuɛŋnuŋ landaŋ a nda!
Kanifuule nda kpou wanaa suundɛiya nda cho ni,+
Nduyɛ wanaa hui waŋnda wa nda cho ni.
3 A cho a bɛɛndiaŋ le choolaŋ dimioo mɛɛ nda kindu nuaa chiɔuleŋ yɛ.
Lɛŋndeŋ le cho le piaa cha a choolaŋ, tonya cho o leŋ niŋ te.+
“A cho hiouwɔɔ tuŋ lachi a sɔɔŋ wɔɔŋndoŋ tosaa,
Nduyɛ a yeŋ ya lani le.”+ Ya Chɛhowa dimi lende ni.
4 “Wana o wana mandaŋ a wana nda chiɛɛliaŋ ndo.
Duau tiindaŋndo o wanayɛi numnde niŋ te.
5 Wana o wana cho wana nda chiɛɛliaŋ ndo kafalaŋ tosallo,
Wana o wana cho tonya dimi le.
A pɛɛku diɔɔmuii ndɛi le choolaŋ dimioo.+
A cho ndapila saaŋgiaa a sɔɔŋ wɔɔŋ nda cho tosaa woŋ.
6 A cho ichali wanaa dimi choolaŋ nda tɛɛŋ.
Choola nda cho dimioo laŋ la tosa ma kɛɛ le ya sinaa.” Ya Chɛhowa dimi lende ni.
7 Lelaŋ nyɛ Chɛhowa, Mɛlɛka puaa chɔuwa dimi wo cho hoo ni:
“I cho nda teeŋgiaa nduyɛ mi dindi nda.+
Yɛɛ cheleŋ ya nɔ yɛ vɛlɛ mi tosa a chua laandu wanaa niaa?
8 Diɔɔmuii ndɛi nda dimi choolaŋ nde cho ko maa chiŋɔma diu waŋnda waŋ.
Mi waŋndo dimul wana nda chiɛɛliaŋ ndo diomnda kɔl nyulu laŋ,
Kɛ mbo yeŋ ndu yaŋɔɔleŋ o kɔl niŋ.”
9 Chɛhowa dimi aa: “Baa I nɔ di le mi nyuna nda ma dɔɔnuŋ kona a sɔɔŋ muŋ okɔɔ le?
Baa I nɔ di le mi miŋgul lɛŋndeŋ ndeŋ maa le?+
10 I cho chaŋ choo choo kpeleŋ nduyɛ mi bii mɔnɛi le pembuŋ bɛndoŋ.
I cho chondii imɔnɛi soli le fondaŋnda chɔluaa dia nyɛdiaa o pollo niŋ ndaŋ.
Kanifuule la ŋuɛ, nduyɛ wana o wana kei loŋ te.
Waŋnda tuii chɔluaa chaŋndo loŋ te.
Youwaa balu o choo choo niŋnda a visiaa yonduaa bɛɛ nyaanuŋ.+
11 I cho tosa mi Chulusalɛm simnuŋ bembelaŋ,+ naa tuŋaa yonduaa chal la,+
Nduyɛ mi tosa mi chieeŋ bɛndoŋ o Chuda niŋ simnuŋ pɔmndo, wana o wana chel loŋ te.+
12 Nɛɛnɛ nɔ yɛ taasioo tau le mbo bii hei bila?
O nɛɛnɛ lo Chɛhowa soo yɛ le mbo dimul wanaa cheleŋ a ndi okɔɔ?
Le yɛɛnɛ lɛŋndeŋ le sɔla yɛ tambei?
Le yɛɛnɛ lɛŋndeŋ le ŋuɛ yɛ nuaa mi le simnuŋ pollo,
Naa wana o wana nɔla mbo keeku le wa?”
13 Mi Chɛhowa muli aa: “Kanifuule a kɛɛ sawala* nilaŋ, nduyɛ a tul taŋ kɔɔli ma diikuŋ nyɛ ya dimul nda wo le. 14 Kɛ ma yaŋ kɔlta ndala dɛnɛ wɔɔŋndaŋ nilaŋ,+ okoŋ ma tual Baal kɔɔli a mɛɛ finyaa ndaa pɛɛku nda yɛ.+ 15 Lelaŋ, nyɛ Chɛhowa Mɛlɛka Isɔluɛiya, Mɛlɛka puaa chɔuwa dimi wo cho hoo ni, ‘I cho tosa mi waŋnda haa de yɔm lolɛiyo, nduyɛ ma kol mɛŋma pɔsɔnioo cho leniŋ ndaŋ.+ 16 I cho nda sɛŋi o lɛŋii nda a finyaa ndaa sina le ve niŋ,+ nduyɛ mi yɔŋ nda muɛi faŋnde kɔɔli haaa mi basu nda tɛɛ.’+
17 Nyɛ Chɛhowa, Mɛlɛka puaa chɔuwa dimi wo cho hoo ni,
‘La tosa sɔɔŋ maa wanaa kɔl kalu.
La chuuŋgiaa waŋ laanduaa soli chonduŋ ŋmɔnɔŋ nda,+
Nduyɛ mi la yooŋgu le waŋ laanduaa chaa chaŋ imɔnɔɔ wa,
18 Ma hiŋ chɔ chɔ ma chaŋ chaŋ imɔnɔɔ le naa,
Le mi mɛmiaŋ ma tol naa o lahɔl kpasu kpasu,
Okoŋ mi yiiŋii lahɔlle liwa yɔ yɔ.+
19 Waŋnda cho chaŋnda imɔnɔlaŋ Saayɔŋ ma dimi aa:+
“Kpundɛ bɛndoo tol naa choo!
Nuawɔ se suɛi lasiɔmbu bɛndu!
Kanifuule ŋ mal lɛŋnde naaleŋ, nduyɛ a tɛɛmbuu chiɛila naalaŋ.”+
20 Nya waŋ laanduaa, la yaŋ nilaŋ o nyɛ Chɛhowa dimi wo.
Maa nila nyalaŋ la tuei nyɛ o dimi wo.
La pɛɛku chuauwaa nyaa laanduaa chaŋ imɔnɔɔ hoo,
Nduyɛ mi la pɛɛkaŋ chondii imɔnɛi hei vellaa velle.+
21 Kanifuule piɔmndo keeku o wundɛila* naalaŋ,
Mbo luɛi o chiɛila naala choo choola kala kalalaŋ niŋ,
Le mbo diu chuauwaa naa cho o nɛila bɛndulaŋ choo wa,
Nduyɛ a puaa naa feleŋguaa cho o fondaŋnda wakpa laŋ nda.’+
22 Dimul nda aa, ‘Nyɛ Chɛhowa dimi wo cho hoo ni:
“Dialuŋ wanaa vilɛiya cho deli miŋ simnuŋ nyɛ nɛŋi tɔlɔɔlaŋ ndo o lɛŋndeŋ choo.
A cho wa mɛɛ waŋnda kialu nuaa witiiyoŋ sɛnɛi ma kɛsi muŋ,
Kɛ wana ve le muŋ diyɔɔ le yɛ.”’”+
23 Nyɛ Chɛhowa dimi wo cho hoo ni:
“Maa wana nɔ taasioo wo chɔmnuŋ a taasi ndɔɔ le.+
Maa wana kpaaya bɛndoo chɔmnuŋ a kpaaya ndɔ bɛndoo le.
Nduyɛ, maa wana nɔ sullo wo chɔmnuŋ a sul ndɔɔ le.”+
24 “Kɛ te waŋndo wa pɛ yoŋgaa kiolɔɔ,
O kiolu yoŋgaa le mɛɛ o nɔ taasioo a sinapɛŋgoo a ya okɔɔ yɛ,+
Maa ya cho Chɛhowa ni, wana chɔm kaala lo lechoo wo, sandei, a sakpoyɛi o lɛŋndeŋ choo wo.+
Kanifuule, sɔɔŋ muŋ tosa ni mi naŋ kɔl.”+ Ya Chɛhowa dimi lende ni.
25 Chɛhowa dimi aa: “Boondii cho fuuluu, mi tusi wanaa cho chɔmndo maa a sɔla hivi chiɛi kɔɔlioo, kɛ a sɔla hivi chiɛi kɔɔli le wa nyɛpalaa choo.+ 26 Nda cho yɛ waŋnda Ichipi,+ waŋnda Chuda,+ waŋnda Idɔm,+ Amɔnaitiiya,+ waŋnda Mowaabi,+ vɛlɛ a wanaa kili yiiŋii ndɛi o kpeŋgoŋ ma wa ichali o pollo niŋnda ni.+ Kanifuule lɛŋnde kpou sɔla hivi chiɛi kɔɔli le, nduyɛ waŋnda Isɔluɛi kpou bɛɛ sɔla hivi chiɛi kɔɔli o kɔlta ndalaŋ niŋ te.”+
10 Nya waŋnda Isɔluɛi, la yaŋ nilaŋ o nyɛ Chɛhowa dimi a nya okɔɔ wo. 2 Nyɛ Chɛhowa dimi wo cho hoo ni:
“La tosa sɔɔŋ maa waŋnda o lɛŋnde niŋ te,+
Nduyɛ siooŋii bii nya le sɔɔŋ kɔndɔfiliŋ yɔŋnuŋ o choo choo niŋndoŋ te.
Kanifuule, sɔɔŋ muŋ tosa ni mi siooŋnde bii waŋnda o lɛŋnde niŋ.+
3 Nyɛ fondoo fuu naamula waŋnda haa la cho ni.
Naamulaŋ ndaŋ la cho ko maa yɔm nda keŋ yondoo niŋ,
Okoŋ mi wana chaa nyɔɔŋ siɔlɔɔ wo sial ndu a nyɛm ndɔŋ walloŋ ndo.+
4 Ma bɛɛndiaa ndu a kaniŋ humboŋ vɛlɛ a kooliiyoŋ,+
Nduyɛ ma beŋi lɔndimɛiyoŋ* o ndu a haamɛiyo,* le halikpeŋ o del te.+
5 Yɔmndo hoo suu le. O cho ko mɛɛ nda toosiaa nuaa nyɔɔ maa wanachiee le simioo o chiɛi niŋ yɛ.+
Yɔmndo hoo kue a ba ndɔ le, mɛɛ ma kuɛ a ndu.+
La yɔŋ isiooŋ le ndu le, kanifuule o nɔla mbo tosal nya nyɛ o nyɛ wɔɔŋ te,
Kɛlɛŋgaa niŋ te mbo tosa nyɛ cho o kɛndɔɔ wo.”+
6 Oo Chɛhowa, wana o wana cho maa num te.+
A cho o bɛndu, nduyɛ diola numndaŋ la cho diola tɔɔma bɛndu.
7 Num Masaa le lɛŋnde kpou, o nɛɛnɛ yɔŋ yɛ siooŋnde le num te?+
O bɛnda ma yɔŋ siooŋnde, kanifuule o wanaa taasiaa cho o lɛŋnde niŋnda tɛɛŋ vɛlɛ a masɛi ndɛi kpou,
Wana o wana cho maa num te.+
8 Nda kpou diɔmnda nda cho ni, nduyɛ a nɔ sinapɛŋgu le.+
Nyɛ fondoo fuu pɛɛkula fula o yɔmndo laŋ la cho ni.+
9 Hɛŋgɛila nda toosiaa a kaniŋ humboŋ ndaŋ, Taasi la fula ni,+ nduyɛ Yufaasi kooliiyoŋ fula ni.
Wana chaa nyɛ a laba mbo tosa wallo a chiliŋndoŋ ndo toosiaa laŋ ni.
Nyɛla ndalaŋ, a kɛi buliiyo vɛlɛ a kɛi yim yimndo nda toosiaa laŋ ni.
Piɔmnda haa kpou, wanaa toosiaa nyɛ a laba wa toosiaa nda ni.
10 Kɛ Chɛhowa cho Mɛlɛka tonyaa ni.
Ndu cho Mɛlɛka cho yoomu wo ni,+ nduyɛ Masa cho le fɛɛŋ a fɛɛŋ ndo o cho ni.+
Te o dɔɔnuŋ pɛ tumbe, mi lɛŋndeŋ le nyiiya.+
Lɛŋnde kɛ kɛ nɔla mi le biunuŋ tumbe ndɔɔ le.
11* Nyɛ ŋ nɔ ma dimul nda wo cho hoo ni:
“Mɛlɛkaa toosiaa haa choo choo a lɛŋndeŋ te wa,
A cho hunɔɔ tambei sɔla o lɛŋndeŋ choo.”+
12 Ndu cho Wana Toosiaa lɛŋndeŋ a kpaaya ndɔɔ wo ni.
Ndu toosiaa lɛŋnde kɛndɛ kɛndɛle naŋ nyɔɔŋ ndeŋ a taasi ndɔɔ ni.+
Ndu pɛŋgɛla vɛlɛ halaa a sinapɛŋgu ndɔɔ ni.+
13 Te o soo pɛ,
Mi mɛŋma cho o choo choo niŋndaŋ ma hiiluŋ yoŋgbaŋ yoŋgbaŋ,+
Mbo tosa mi haŋgullo chɛŋ ba o ba fee o lɛŋndeŋ choo, mbo hel choo choo.+
Mbo tosa mi nyɛ ŋualalɛiyo kiolu le mi piɔɔ sia.
Mbo soli hueiye o fondaŋnda o kɛsi ndi laŋ.+
14 Wana o wana cho sɔɔŋ tosaa maa wana nɔ sinapɛŋgu a kɔl kalu le wo.
Wana o wana tosa wallo a chiliŋndoŋ, siɔmbulaŋ la cho ndu biyɔɔ le piɔm o toosiaa wo.+
15 Nyɛ mamaa wali ndaa cho ni, nyɛ fondoo fuu.+
Te paale Mɛlɛka chii niŋ a nda leŋ le fuuluu pɛ, a cho tambei sɔla.
16 Nyɛm Kɛŋ Chekɔpu woŋ cho maa nyɔɔŋ muŋ te,
Kanifuule ndu toosiaa nyɛ o nyɛ fee ni,
Nduyɛ Isɔluɛi cho tinda nyɛm kɛŋ ndɔŋ ni.+
Diola ndɔlaŋ la cho Chɛhowa, Mɛlɛka puaa chɔuwa ni.+
17 Num wana lanɔ nda dɔu hoo o piŋndo niŋndo,
Dii nyɛm numndoŋ naapilɛ.
18 Nyɛ Chɛhowa dimi wo cho hoo ni:
“A teleŋndo hoo ya cho wanaa cho o lɛŋndeŋ niŋnda viouwɔɔ ni,+
Nduyɛ mi tosa ma sinaŋ nyɛ nɛiyaa.”
19 Kpundɔɔ cho le ya le mɛɛ ya boliŋ yɛ!+
Pau nuu siŋgu le.
Mi dimi aa: “Naa nuu kpeekpei cho niŋ hoo ni, I nɔ mi biunuŋ ndu.
20 Tɛndii nuu tambu, mi yuei nduɛi kpou kioli kioli.+
Puaa niaa mal la, nduyɛ o pilɛ bɛɛ cho lɛ le.+
Wana o wana lo lɛ yoomu le tɛndii nuu kindɔɔ le.
Le sabu koŋ nda kɛɛ sɔɔŋ tosaa a sinapɛŋgoo ni,
Mi saa ndaa kpou saŋnuŋ.”+
22 La yaŋ nilaŋ o yooŋgoo hoo!
Wooluŋ wooluŋ bɛndoo cho chɔnɔŋndo ba luaŋ ndo,+
Le mi chieeŋ bɛndoŋ o Chuda niŋ simnuŋ pɔmndo, okoŋ miŋ simnuŋ bɛmɛlta tuŋaa yonduaa.+
23 Oo Chɛhowa, I sina kɛsɛ maa wanachioo nɔla mbo chɔm ndupila nɛiyo le.
Wanachioo nɔ di kposoŋ le mbo chɔm ndupila nɛi o nɔ mbo kuɛ choo wo le.+
24 Oo Chɛhowa, kilul la yamɛi okoŋ ma miŋgi ya o nɛi,
Kɛ tosa ndi a kɔl tuuwo le,+ yɔŋii ŋ tosa mi simnuŋ nyɛ fondoo fuu.+
25 Hulu kɔl num tuuwo o lɛŋii kɛɛ num nde choo,+
Vɛlɛ a yuŋgula kɛɛ le diola numndaŋ veeloo laŋ.
Kanifuule a tɛɛmbuu Chekɔpu,+
A tonya, a tɛɛmbuu ndu ma basu ndu tɛɛ,+
Nduyɛ ma siiŋguu lɛŋnde ndɔleŋ pɔmndo.+
11 Nyɛ Chɛhowa dimul Chɛluimaya wo cho hoo ni: 2 “Nya waŋnda haa, la yaŋ nilaŋ o diomnda ya yii kpemaa a nya laŋ!
“Dimul* puaa Chuda a waŋnda Chulusalɛm a laŋ okɔɔ. 3 Dimul nda aa, ‘Nyɛ Chɛhowa, Mɛlɛka Isɔluɛiya dimi wo cho hoo ni: “Wana o wana kɛɛ pɛ le diomnda cho o kpemaa hoo niŋndaŋ diikɔŋndo, sendioo cho ndu choo.+ 4 Diomndaŋ ndaŋ ya dimul finyaa nyaa mamaa ni, paale ya soli nda o lɛŋnde Ichipi leŋ niŋ,+ o tondo leyiŋ nda teeŋgiaa chiliŋndoŋ ndo niŋ.+ Mi dimul nya aa, ‘La tuei ya diom, nduyɛ mi la tosa nyɛ o nyɛ ya dimul nya, okoŋ mi la simnuŋ wanaa niaa, mi ya bɛɛ simnuŋ Mɛlɛka nyaa.+ 5 Koŋ cho tosa mi peelu buŋgɛi ya chuel finyaa nyaa mamaa, nduyɛ mi mɛnaŋ le nda lɛŋndeŋ kioo wo, lɛŋnde milikiiyaŋ* a liaaŋ ma cho taaliaa leniŋ ndeŋ,+ a mɛɛ i cho suŋ suŋ yɛ.’”’”
Okoŋ mi dimi aa: “Oo Chɛhowa, Amiina.”*
6 Mi Chɛhowa dimul la vɛlɛ aa: “Yonda nyɛ o nyɛ ya dimul num o chieeŋ bɛndoŋ o Chuda niŋ, a o nɛila bɛndulaŋ choo o Chulusalɛm niŋ aa: ‘La yaŋ nilaŋ o diomnda cho o kpemaa hoo niŋndaŋ, nduyɛ mi la tosa nyɛ la dimi wo. 7 Kanifuule, chɔŋ a paale ya soli finyaa nyaa mamaa o lɛŋnde Ichipi leŋ niŋndeŋ haaa a paale hauleŋ ndeŋ, I wa nda silaa lediiŋ diiŋ* aa: “La tuei ya diom.”+ 8 Kɛ ma kɛɛ kpooŋ le ya nilaŋ yaŋɔɔ. Mi wana o wana luɛi bolle kala leŋ, mbo tosa nyɛ kɔl ndɔ dɛnɛ wɔɔŋndo dimul ndu wo.+ Le hei, nyɛ o nyɛ ya dimi o kpemaa hoo niŋ, mi tusi nda ndu choo, le mɛɛ nda kɛɛ le nyɛ ya dimul nda wo tosaa yɛ.’”
9 Mi Chɛhowa dimul la aa: “Waŋnda Chuda a waŋnda Chulusalɛm kɛɛsiaa le ya simullo. 10 A luei balaŋ o hakila finyaa ndaa mamaa niŋ, a kɛɛ le nyɛ ya dimul nda wo tosaa wa.+ Nda bɛɛ muliŋ mɛlɛkaa cheleŋnda tolɔɔ kɔɔli ma wa nda sooluuwo.+ Waŋnda Isɔluɛi a waŋnda Chuda tɛɛmbuu kpema ya yii a finyaa ndaa mamaa wo.+ 11 Lelaŋ nyɛ Chɛhowa dimi wo cho hoo ni, ‘I cho nda nyɛpalaa tusi choo,+ a nɔla niŋ ma hɛluŋ ndu le. Nduyɛ a veelu ya bɛɛ le malaa, I mulul nda le.+ 12 Okoŋ, waŋnda o chieeŋ bɛndoŋ niŋ Chuda a waŋnda Chulusalɛm cho lakɔ o mɛlɛkaa ndaa nda soli salalaŋ* o nda lo wa lo, ma nyuna nda le malaa.+ Kɛ nda bɛɛ nɔla niŋ kposoŋ ma piŋi nda o paale kpundɔɔ tual nda niŋ choo leŋ te. 13 Kanifuule, mɛlɛkaa nyaa kui tau tau maa chieeŋ bɛndoŋ o Chuda niŋ. Nduyɛ bandula luamaa lasalala nya toosiaa le Baal,+ mɛlɛka fondoo salalaŋ solullo lechoo laŋ, la kui tau tau maa nɛila bɛndulaŋ o Chulusalɛm niŋ.’
14 “Kɛ num Chɛluimaya, piɛi le waŋnda haa le. Chaŋ le nda ɔɔ ma nyɔɔlu ya le nda le.+ Kanifuule teleŋ kpundɔɔ cho nda wa choo wo, a veelu ya bɛɛ le malaa, I cho nda mulul te.
15 Le yɛɛnɛ wanaa niaa ya kaala wa cho yɛ wɔ o chiɛi nuu niŋ,
Mi che bɛɛ mi wanaa bɔɔbɔɔ nda tɛɛŋ wa sɔɔŋ wɔɔŋndoŋ tosaa?
Baa chɔluaa diandaa* nya soli salalaŋ nda nɔla pa ma kuuna kpundɛ cho nya hunɔɔ choo wo?
Baa la cho pa kpeŋjoo wuu o paale leŋ choo?
16 Mi Chɛhowa ndoo veelu num paandu aa,
Yɔm ma ɔlifii kɛndɛ kɛndɛ kuam komɔɔla kɛndɛlaŋ ndo.
Kɛ mɛɛ o deŋi choo choo, mbo mal ndu o yiŋ,
Nduyɛ mi yaamɔɔwa yimi yimi lɛuwuŋ ndɔŋ.
17 “Chɛhowa, Mɛlɛka puaa chɔuwa, Wana Tɔl num ndo+ kɛɛsiaa le num kpundɔɔ tusioo choo, le suɛi dɛnɛ wɔɔŋ waŋnda Isɔluɛi a waŋnda Chuda tosa ve. Kanifuule, ma pilaŋ ya tana mɛɛ nda soli salalaŋ o Baal lo.”+
18 Mi Chɛhowa dimul la nyɛ wa yɔŋnɔŋndo wo le mi sina a ndi okɔɔ.
A teleŋ koŋ, ma tosa mi cha nyɛ nda wa tosaa wo.
19 I wa ko maa saa fɔŋndɔ nda cho kɔlaŋ le diyɔɔ wo.
I sina bɛɛ pɛŋ maa a wa sɔɔŋ wɔɔŋndoŋ kɛɛsiaa a ya okɔɔ le.+ Ma dimi aa:
“Ŋ tɛɛmbuŋ yɔmndo hoo a komɔɔla ndɔlaŋ,
Nduyɛ miŋ dii ndu mbo faŋaŋ wanaa cho yoomu wa tɛɛŋ,
Le halikpeŋ wana loonuŋ ndɛ a diola ndɔlaŋ okɔɔ le.”
20 Kɛ o nɛi sakpoo choo Chɛhowa, Mɛlɛka puaa chɔuwa kialu yamɛi ni.
Mbo yaasiaa yiyaŋnda yiŋgoloŋnda* wanachioo vɛlɛ a kɔl ndɔɔ.+
Tosa mi che mɛɛ ŋ cho nda maa miŋgul lɛ,
Kanifuule num ya mal suɛi nii o ba ni.
21 Lelaŋ, nyɛ Chɛhowa dimi a puaa Anatɔti okɔɔ wo cho hoo ni.+ Nda cho kindiŋndo le num diyɔɔ ni, ma dimi aa: “Ŋ tuɛi lɛ num suɛi a diola Chɛhowa laŋ okɔɔ le.+ Te o cho koŋ te, ŋ cho num diyɔɔ.” 22 Nyɛ Chɛhowa, Mɛlɛka puaa chɔuwa dimi wo cho hoo ni: “I cho nda nyɛpalaa tusi choo le nyɛ nda tosa wo. Muɛi faŋnde cho chuaa piaanduaa diu,+ nduyɛ mi yiaaŋ ma diu puaa ndaa a chuaa ndaa laanduaa.+ 23 Wana pilɛ bɛɛ lo niŋ yoomu nda tɛɛŋ te, kanifuule I cho waŋnda Anatɔti nyɛpalaa tusi choo+ o wɔsi ya kɛɛsiaa wo niŋ le sɔɔŋ wɔɔŋ nda tosa woŋ.”
12 Oo Chɛhowa, wana sakpoo ŋ cho ni.+
Te I ŋɔɔchiaŋ pɛ naa num chua ɔɔ mi dɔu num isɔɔ lachi, o nɛi sakpoo choo ŋ bii ndi ni.
Kɛ le yɛɛnɛ wanaa dɛnɛ wɔɔŋnda cho yɛ batiuwaa sɔlaa?+
Nduyɛ le yɛɛ wanaa kaŋgalaa choŋnuŋ yɛ hɛnɛkɛ, a nɔ buulaŋ te?
2 Num tɔl nda ni, ma wul puundoŋ.
A hindu ma yɔŋgu kɔmndeŋ.
Ma soo a num okɔɔ, kɛ kɔlta ndalaŋ la* choŋnuŋ landaŋ a num.+
3 Num Chɛhowa, a sina ya nyɛkɛndɛi+ nduyɛ a cho ya chɔɔ.
A yaasiaa kɔl nuu, ma saaluŋ maa I yɔŋguŋ o numndo kpou.+
Hɛli nda mɛɛ nda hɛli nuaa saa le nda diyɔɔ yɛ,
Nduyɛ ma kɛsi nda le paale nda cho nda diu leŋ.
4 Le vɛɛ kpɛ lɛŋndeŋ le cho yɛ wa le vesɛi,
Nduyɛ mi tɔlɔɔla cho lechoo laŋ kpou la vesa sɛɛŋ?+
Le mɛɛ wanaa cho o lɛŋndeŋ ndeŋ niŋnda cho wanaa dɛnɛ wɔɔŋ yɛ,
Visiaa yonduaa a youwa chuu wu kpou.
Kanifuule a dimi aa: “Mɛlɛka cho chɔ nyɛ cho naa hunɔɔ yɔŋnɔŋ ndo le.”
5 Te a saŋga wɔ pɛ a kiltaŋ nya wanaa cho kiltaŋ a ŋpelu wa,
Vɛɛ ŋ nɔla yɛ niko ma nyaanuŋ nya wanaa cho kiltaŋ o suaa choo wa?+
Naapum a cho waŋnɔŋ hɛnɛkɛ o lɛŋnde kɔl nyulu leŋ niŋ.
Kɛ vɛɛ ŋ cho yɛ wa o yondo mɔndɔ mɔndɔ cho o Chɔɔdaŋ ndaŋ holnɔŋndo wo niŋ?
6 Hali wanayaŋ numndoŋ bɛɛ, ŋ nya fula yuŋgu pilɔɔ woŋ,
A tosal num kaŋgalaa.+
A soo sɔɔŋ wɔɔŋndoŋ a num okɔɔ.
Duau tiindaŋ o nda niŋ te,
O yɔŋ bɛɛ ma dimul num sɔɔŋ yeelɛi yoŋ.
7 “I mal chiɛi nuu,+ mi kɛɛ nyɛm kɛŋ nuŋ.+
I mal wana ya kaala wo yaamɔɔwaa nduaa o ba.+
8 Nyɛm kɛŋ nuŋ simnuŋ maa kpɔkuŋ* cho yondoo niŋndo.
O cho ya pɛɛliaa choo.
Lelaŋ ya tul ndu leyɛ ni.
9 Nyɛm kɛŋ nuŋ simnuŋ maa you biyaa nɔ kɔɔle muuliaŋ ndeŋ ndo.
Youwaa biyaa cheleŋnda balu ndu silɔ le ndu delɔɔ choo a sɔŋgɔɔ.+
Nya visiaa biyaa yondoo niŋ kpou, la chuuŋgiaŋ naapilɛ,
Mi la hiŋ le ndu dioo.+
A tosa mi buŋgɛi nii kɛndɛ kɛndɛi simnuŋ pollo.
11 Le simnuŋ lɛŋnde tambɛi leŋ.
Lɛŋndeŋ kpou le simnuŋ pɔmndo,
Kɛ wana o wana hendu bɛɛ kɔllo lechoo le.+
12 Wanaa tɛɛmbaa fula ba o ba fee o pollo niŋ ma keeku o nɛila tambɛilaŋ ma huŋ.
Kanifuule, muɛi faŋii Chɛhowa ve cho waŋnda diuwo ba o ba fee o lɛŋndeŋ niŋ.+
Wana o wana* cho a kɔl nyulu le.
13 A saŋ witiiyoŋ, kɛ ma kuau yɔɔŋ.+
A yɔɔkpiaa ndapila fondo fuu, kɛ tɔnɔ o tɔnɔ a sɔla le.
Siɔmbulaŋ la cho nda biyɔɔ le nyɛ nda kou wo,
Kanifuule kɔl tuu Chɛhowa wo wa niŋ bɔɔ.”
14 Lɛŋnde wanaa niaa Isɔluɛi sɔla maa nyɛm kɛŋ nda leŋ, wanaa dɛnɛ wɔɔŋaa balu naa wa cho nda delɔɔ choo ma poonda leŋ.+ Lelaŋ, nyɛ Chɛhowa dimi a nda okɔɔ wo cho hoo ni: “I cho nda faŋa o lɛŋnde ndaleŋ niŋ,+ nduyɛ mi soli waŋnda Chuda nda tɛɛŋ. 15 Kɛ te I soli nda pɛ, I cho vɛlɛ nda tuiinɔŋ inyiɛɛ, mi miŋgi wana o wana o lɛŋnde ndɔleŋ niŋ pila mbo kɔ chua nyɛm kɛŋ ndɔŋ.”
16 “Te a pɛɛku pɛ le kaala wanaa niaa tolɔɔ kɔɔli, nduyɛ ma mɛnaŋ o diola nilaŋ niŋ, mɛɛ nda pɛɛku wanaa niaa le mɛnaŋndo o diola Baal laŋ niŋ yɛ, okoŋ ma dimi aa: ‘Mɛɛ i cho kpendekele maa Chɛhowa cho yoomu yɛ!’ Keŋ cho tosa mi chɛl nda ma wa wanaa niaa tɛɛŋ. 17 Kɛ te a kɛɛ pɛ le diikɔŋndo, I cho nda soli o lɛŋnde ndaleŋ niŋ, mi tɛɛmbuu nda.” Ya Chɛhowa dimi lende ni.+
13 Mi Chɛhowa dimul la aa: “Kɔ piondu yaule nda toosiaa a kola kɛndɛ kɛndɔɔ leŋ ma yiinuŋ ndeŋ o chaŋ, kɛ yiŋ ndeŋ o mɛŋndaŋ niŋ te.” 2 Okoŋ mi kɔ piondu yauleŋ a mɛɛ Chɛhowa dimul la yɛ, mi yiinuŋ ndeŋ o chaŋ. 3 Mi Chɛhowa suaa naa ya chua le teleŋ diiŋ ndɔɔ aa: 4 “Soli yaule ŋ pendu ma yiinuŋ o chaŋ ndeŋ, ma kuɛ a leŋ Yufiluaati ma kɔ vioŋ ndeŋ o poutaŋ tɛɛŋ.” 5 Okoŋ mi kua mi kɔ vioŋ ndeŋ Yufiluaati, mɛɛ Chɛhowa dimul la yɛ.
6 Kɛ mɛɛ palɛi bɔɔbɔɔ hiou okoŋ kɔɔli, mi Chɛhowa dimul la aa: “Chɔŋ ma kuɛ Yufiluaati, ma kɔ chua yaule ya dimul num le ma kɔ vioŋ loŋ ndeŋ.” 7 Okoŋ mi kua Yufiluaati, mi kɔ soli yauleŋ ndeŋ o fondaŋ ya veŋ ndeŋ ndo. Nduyɛ mi saaluŋ maa le tambu, wanaa nɔla lɛ ma soliŋ ndeŋ kpeku le.
8 Mi Chɛhowa suaa naa ya chua aa: 9 “Nyɛ Chɛhowa dimi wo cho hoo ni, ‘Nuaa ya cho nyɛ waŋnda Chuda a Chulusalɛm kialu yoŋgaa wo tɛɛmbuu ni.+ 10 Wanaa dɛnɛ wɔɔŋaa kɛɛ haa le ya diikɔŋndo+ ma tosa nyɛ kɔl ndaa dimul nda wo wa,+ nduyɛ ma tual mɛlɛkaa cheleŋnda kɔɔli ma baŋ wulaŋ le nda sooluuwo wa, a cho simnɔŋ wanaa fonduaa mɛɛ yauleŋ ndeŋ le cho nuaa yɛ.’ 11 ‘Mɛɛ waŋndo yiinuŋ nuaa yauleŋ o chaŋ mi le saa ndu kpiŋ yɛ, lende ya tosa ni mi waŋnda Isɔluɛi a Chuda holnuŋ ya kpiŋ, le ma simnuŋ wanaa niaa,+ ma saŋgala diola nilaŋ,+ nduyɛ ma ke ya bɛɛleŋ. Kɛ a diikuŋ ya le.’+ Ya Chɛhowa dimi lende ni.
12 “Nduyɛ a nɔ ma dimul nda vɛlɛ yooŋgoo hoo aa, ‘Nyɛ Chɛhowa, Mɛlɛka Isɔluɛi dimi wo cho hoo ni: “Muɛiyaŋ ma nɔ mi ma pɛ cha o kpɛɛnɛi bɛnduii kɛ kɛ niŋ.”’ Okoŋ a cho num mulul aa, ‘Baa ŋ sina nuaa maa muɛiyaŋ ma nɔ mi ma pɛ o kpɛɛnɛi bɛnduii kɛ kɛ niŋ te?’ 13 Okoŋ a dimul nda aa, ‘Nyɛ Chɛhowa dimi wo cho hoo ni: “I cho waŋnda o lɛŋndeŋ ndeŋ niŋ kpou muɛiyaŋ pimi haaa mi ma bii nda.+ Ma cho biyɔɔ masaa cho ichali o kpeŋgei lemasa Deeve wo choo wa, wanaa soliaa lasalaa, wanaa suaa le Mɛlɛka wa, vɛlɛ a waŋnda Chulusalɛm kpou. 14 Wana ya chua ko, I fasaŋa ndu o chaaŋ ndɔ o vi. Lende ya cho finyaa a puaa ndaa tosal ni. I cho nda tuiinɔŋ inyiɛɛ le, kɛlɛŋgaa niŋ te mi bii mɔnɛi le nda. Nyɛ o nyɛ cho ya kuuna nda tɛɛmbuuwo le.”’+ Ya Chɛhowa dimi lende ni.+
15 La yaŋ nilaŋ mi la tuei nyɛ ya dimi wo.
La wa wanaa heelaŋ te, kanifuule ya Chɛhowa soo ni.
16 La ke Chɛhowa Mɛlɛka nyaa bɛɛleŋ,
Tuupa mbo tusi nyumma bɛnduaŋ,
Nduyɛ mi la boŋ o pembuŋ bɛndoŋ a paale delaaleŋ.
La cho wa nyɛ teŋgaa chumndo,
Kɛ mbo tusi nyumndaŋ kpiŋgbi.
O cho tosa mi nyɛ teŋgaa simnuŋ nyumma kpiŋgbima bɛnduaŋ.+
17 Nduyɛ te la kɛɛ pɛ le ya nilaŋ yaŋɔɔ,
I cho lakɔ o fondaŋ yololiɔɔ mi chaŋ le heelɔŋ nyaa.
I cho chaŋ tau tau, okoŋ mi mɛmiaŋ ma tol la kpasu kpasu,+
Kanifuule a kuɛ a wanaa Chɛhowa wa+ o biyɔɔ niŋ.
18 Dimul masaa a kala ndɔ+ aa, ‘La tol lɛŋ,
Kanifuule, mɔsilta nyala lemasala kɛndɛ kɛndɛ laŋ la cho nya suŋgɔŋ o lebol mi la del.’
19 A kiindiaa chieeŋ bɛnduŋ cho ba tou wo woŋ,* wana o wana nɔla muŋ kumbi le.
A kuɛ a waŋnda Chuda kpou o biyɔɔ niŋ, wana pilɛ bɛɛ lo kɔɔli le.+
20 Num Chulusalɛm, heelu hɔlla ma che wanaa cho fulaa ba luaŋ ndo ma wa hunɔɔ wa.+
Kuɛɛnɛ chɔluaa nda ke num nda cho yɛ, saa num aa kɛndɛ kɛndiaa?+
21 Te chaŋyaŋ num kpɛɛluŋ ŋ nuuviaa o kandɔŋndo pɔ woŋ tusi num pɛ nyɛpalaa choo,
Yɛɛnɛ ŋ cho yɛ dimi?+
Baa o cho nyɛ nɛiyaa le cho num tolɔɔ choo mɛɛ pulii vialɛi kpuuwa nuaa wana lanɔɔ yɛ le?+
22 Naapum ma nyunaŋ ndɔɔ o kɔl niŋ aa, ‘Le yɛɛnɛ sɔɔŋ muŋ kpou tollɛ ya choo?’+
Le mɛɛ ŋ tosa hakioo tau tau yɛ nda yuŋga num ni.+
Nduyɛ ma tosa mi tɔnduŋ kɔɔliŋ numndoŋ nɛi num tau tau.
23 Te Kusaitiinɔɔ* siŋga pɛ kɔɔle ndɔleŋ, ɔɔ mi tambillo mal poŋgaŋ ndɔŋ,+
Mɛɛ nya bɛɛ cho o kɛndɔɔ tosa,
Nya pɛɛku haa nyɛkɛndɛi le dɛnɛ wɔɔŋndo tosaa wa.
24 Lelaŋ I cho nda sɛŋi mɛɛ hueiyii chaŋ o pollo niŋnde sɛŋi nuaa bil vesɛiyo yɛ.+
25 Buŋgɛi ya tuu mi kilul nya ve cho hei ni.
Le mɛɛ nya puɛɛnuŋ a ya+ nduyɛ mi la duau tiindaŋndo o choolaŋ niŋ yɛ.”+ Ya Chɛhowa dimi lende ni.
26 “Lelaŋ, I cho doma vilɛi cho num lekɔɔ wo kpeeŋa mi heelu ndu tema num o hɔl,
Okoŋ mi siɔmbulaŋ la tol num.+
27 Kaa suundɛi numndo,+ ilako lakuei numnde le kaa ihini nɔɔlɛiyo tosaa,
Vɛlɛ a sɔɔŋ lasiɔmbuŋ ŋ tosa woŋ kpou, waŋnda cho muŋ chɔ.
I che kaala nɔɔlɛila ŋ tosa o pemboŋ choo
A yondoo niŋndaŋ.+
Oo Chulusalɛm, kpundɔɔ cho num choo!
Le vɛɛ kpɛ ŋ cho yɛ hiouwɔɔ lachi a waa o nɔɔlɛi?”+
14 Nyɛ Chɛhowa dimul Chɛluimaya a walu kala kalaa okɔɔ wo cho hoo ni:+
2 Chuda cho mɔnɛi biyɔɔ,+ nduyɛ diola kpakila ndɔlaŋ la tambu.
La koombiaa lɛŋ a kɔl tambɛiyo.
Chaŋndaŋ la cho suɛi Chulusalɛm chiee kpuu.
3 Masaa vem buɛiyaa ndaa le ma kɔ kɔndu mɛŋndaŋ.
A kɔ nuuviaa maŋ o sooŋndaŋ niŋ, kɛ a seeluŋ te.
A miiŋgu a nyɛm ndaŋ laandoŋ fondo.
Siɔmbulaŋ la bii nda a kɔl tambɛiyo,
Ma kumbu bolii ndɛi.
4 Lɛŋndeŋ le tɛɛndiaa,
Kanifuule piɔɔ cho sia lechoo le.+
Wanaa tosa wali ichiɔɔ wa tambu kɔltaŋ, nduyɛ ma kumbu bolle.
5 Kial laŋga kom ndo bɛɛ kɛɛ chuale ndɔleŋ,
Kanifuule bil cho le.
6 Sofɛliaa yonduaa cho isisi o pembuŋ kpalamandaŋ ndoŋ choo.
A cho yoomulaŋ fuu fuu le hueiye sɔlaa maa tuŋaa yonduaa.
Hɔltaŋ la saŋga nda yɔkɔɔ le billo nuuviaa.+
7 Oo Chɛhowa, tosa isɔɔ le sabu diola numndaŋ,+
Mi che bɛɛ mi biondɔŋnda naalaŋ la chɔm wanaa suu naŋ cho wa.
Kanifuule sɔɔŋ naŋ tosa miŋ kɛɛ le num lo lechoo wo chɔmndo woŋ cho tau,+
Nduyɛ a num naŋ tosa hakioo ni.
8 Oo wana piŋiaa Isɔluɛi tiindaŋ+ a teleŋ kpundɔɔ wo,
Le yɛɛnɛ ŋ cho yɛ sɔɔŋ tosaa maa mial o lɛŋndeŋ niŋ?
Le yɛɛnɛ ŋ cho yɛ tosaa maa wana kei luaŋ o fondaa mbo hiounuŋ ndo?
9 Le yɛɛnɛ ŋ simnuŋ yɛ nuaa kpɛ,
Maa wana kpaaya bɛndu nɔla mbo piŋi le wo?
Lelaŋ mal naa le.
10 Nyɛ Chɛhowa dimi a waŋnda haa okɔɔ wo cho hoo ni: “A kaala bɔɔ heeloo a tuusoo.+ A nɔla challe le.+ Lelaŋ Chɛhowa niŋ kɔl a nda le.+ O cho loonɔŋ a biondɔŋnda ndalaŋ, nduyɛ mbo tusi nda nyɛpalaa choo le hakila ndalaŋ.”+
11 Okoŋ mi Chɛhowa dimul la aa: “Piɛi le mi dɛnɛ kɛndɛ komal waŋnda haa le.+ 12 A bii bɛɛ sumndo, I yeŋ nilaŋ o nyɔɔlu nda cho ya wo le.+ A soli bɛɛ sala luamaa kpulukuu wo a salala ŋkultaŋ, la nɛŋi ya kɔl te.+ Kanifuule, I cho nda chii a muɛi faŋnde, yima bɛnduaŋ, vɛlɛ a naala taŋ waŋnda laŋ.”+
13 Okoŋ mi dimi aa: “Kpokoo Chɛhowa, Mɛlɛka Kpuluŋguma Bɛndoo! Wanaa suaa le Mɛlɛka wa cho nda dimullo aa, ‘Muɛi faŋnde cho nya nyɛ yɔŋ te, nduyɛ yima bɛnduaŋ ma cho nya tolɔɔ choo le. Kɛ I cho nya kɔl nyulu kpeekpeiyo ke o fondaa hoo.’”+
14 Okoŋ mi Chɛhowa dimul la aa: “Wanaa suaa le ya wa cho choolaŋ dimioo o diola nilaŋ niŋ.+ O cho ya le vem nda le, nduyɛ I suu o nda lo le.+ Yilaŋuŋ lachoowaŋ, yawala fondolaŋ, vɛlɛ a sɔɔŋ ndapila kɛɛsiaŋ o kɔl loŋ nda cho nya dimullo ni.+ 15 Waŋnda haa cho yooŋgoo dimioo o diola nilaŋ niŋ maa muɛi faŋnde a yiaaŋ ma diu niŋ waŋnda o lɛŋndeŋ ndeŋ niŋ te, mi che bɛɛ o cho ya le vem nda le. Lelaŋ, nyɛ ya Chɛhowa dimi a nda okɔɔ wo cho hoo ni: ‘Yiaaŋ a muɛi faŋnde cho wanaa suaa haa le ya wa diu diu.+ 16 I cho tosa mi yiaaŋ a muɛi faŋnde diu wanaa nda cho suɛi o nda lo a ya okɔɔ wa, okoŋ ma viou nda o nɛila bɛndulaŋ choo Chulusalɛm. Wana o wana cho wa le nda kumbɔɔ le.+ Nda ni, laandaa ndaa, puaa ndaa, vɛlɛ a chuauwaa ndaa laanduaa kpou, I cho nda kpundɛ nda nɔ le sɔlaa wo tusi choo.’+
17 “Dimul nda aa,
‘Idii a ichɔl I cho wa mɛmiaŋ tusioo, ma kiolu kɔɔli le.+
Kanifuule, chua laandu yufuaanɔ wanaa niaa sɔla tambei kpata kpata,+
A yɔŋul bɛndu nda yɔŋul ndu wo.
18 Te I kuɛ pɛ yondoo niŋ,
Wanaa muɛi faŋnde diu wa ya cha ni!+
Nduyɛ te I hel pɛ chiee,
Wanaa yima bɛnduaŋ ma tɛɛmbuu labɛɛ wa ya cha ni!+
Kanifuule, wanaa suaa le Mɛlɛka wa a wanaa soliaa lasalaa kɔ balu o lɛŋnde nda sina le leŋ niŋ.’”+
19 Baa malɔɔ ŋ mal nuaa Chuda waŋ waŋ ni, ɔɔ yɛleŋ ŋ tul Saayɔŋ ni?+
Le yɛɛnɛ ŋ koŋ yɛ naa nuaa tiindaŋ o tiindaŋ cho lɛ le miŋ seŋgu le?+
Naŋ nɔ tiindaŋndo le kɔl nyuloo sɔlaa, kɛ mbɔ kɔl nyulu bɛɛ ŋ sɔla le.
Ŋ wa chumndo le miŋ sɔla kɛndiaa, kɛ miŋ luɛi o buulaŋ bɛndoo niŋ!+
20 Oo Chɛhowa, ŋ chɛl maa wanaa dɛnɛ wɔɔŋnda naŋ cho ni.
Nduyɛ finyaa naa mamaa bɛɛ ma bianduŋ a num,
Kanifuule ŋ tosa hakioo a num.+
21 Le sabu diola numndaŋ, kɛɛ naa le.+
Chua kpeŋgbei* num lebiɔɔ chɔdɔ le.
A yandii loonuŋ a naa, nduyɛ tɛɛmbuu kpema ŋ yii a naa wo le.+
22 Baa piɔmaa fonduaa o lɛŋnde niŋ nɔla pa ma yɔŋgu naa piɔɔ?
Baa choo choo nɔla pa mbo tusi piɔɔ a ba ndɔ?
Oo Chɛhowa Mɛlɛka naa, baa o cho numpilɛ kpe le nɔla ma tosa sɔɔŋ muŋ te?+
Num naŋ tiindaŋ ni,
Kanifuule numpilɛ kpe tosa sɔɔŋ muŋ kpou ni.
15 Okoŋ mi Chɛhowa dimul la aa: “O yɔŋ bɛɛ mi Muuse nda Saamiɛɛ huŋ sim ya lachi,+ I tuiinuŋ waŋnda haa inyiɛɛ le. Tou nda ma faŋaŋ ya o hɔl. A kɔ! 2 Te a nyuna num pɛ aa, ‘Kuɛɛnɛ naŋ kɔ yɛ?’ Mulul nda aa, ‘Nyɛ Chɛhowa dimi wo cho hoo ni:
“Waŋnda apum nya tɛɛŋ, naala wɔɔŋ wɔɔŋndaŋ la cho nda diu,
Apum mi muɛi faŋnde diu nda,+
Apum mi yima bɛnduaŋ ma diu nda,
Nduyɛ mi apum kuɛ o biyɔɔ niŋ.”’+
3 “‘I cho nda kpundɛlaŋ la hiɔɔlu* tusi choo. + Laŋ la cho ni, muɛi faŋnde le nda diu wo, tuŋnda le dialuŋ ndaŋ vilɛiyoŋ sasɔɔ, youwaa balu choo choo wa, vɛlɛ a visiaa yonduaa o lɛŋndeŋ choo le nda tɛɛmbuuwo nduyɛ ma de nda.’+ Ya Chɛhowa dimi lende ni. 4 ‘I cho tosa mi siooŋnde bii masɛi o lɛŋndeŋ choo kpou a nyɛ cho nya yɔŋnɔŋ ndo,+ le nyɛ Manaasɛ po Hɛsikaya wo, masaa le Chuda tosa o Chulusalɛm niŋndo.+
5 Oo Chulusalɛm, o nɛɛnɛ kpeekpei cho yɛ mɔnɛi biyɔɔ le num?
O nɛɛnɛ cho yɛ num tuiinɔŋ inyiɛɛ?
O nɛɛnɛ kpeekpei cho yɛ lasisi mbo nyuna a num okɔɔ?’
6 ‘A mal la,’ ya Chɛhowa dimi lende ni.+
‘A cho hiouwɔɔ lachi a ya kɔɔ mulullo.*+
Lelaŋ I cho ba nuu siɛndi mi chiŋalaŋ num, nduyɛ mi tɛɛmbuu num.+
I saŋga a* num nyiɛɛye tuiinɔŋndo.
7 I cho nda saŋɔɔ o diola kpakilaŋ lachi o lɛŋndeŋ niŋ, mɛɛ hueiye saŋ nuaa tɛfɛlaŋ yɛ.
I cho chuauwaa nduaa diu kpou.+
I cho wanaa niaa diu,
Kanifuule a kɛɛ le yɔŋnda ndala wɔɔŋndaŋ kɔɔ mulul lo.+
8 Waŋ laanduaa ndaa vii piaanduaa wa cho ya kui o hɔl, ma hiou siooŋnde o pee mɛŋma ihɛllo.
I cho wana tɛɛmbaa yɔŋ, mbo chiŋalaŋ nda ipala deŋ, nduyɛ mbo chiŋalaŋ kalla a chuaa ndaa piaanduaa.
Siooŋii bɛnduei cho nda tolɔɔ choo o lepilɛ niŋ kpe, ma yɔŋnuŋ pulaŋ pulaŋ.
9 Wana lanɔ velu chuauwa a ŋɔmmɛu wo wou kpandeŋ,
O cho yoomuaŋ saaliaa.
Nyumndaŋ ma tol ndu o hɔl ipala deŋ,
Mi siɔmbulaŋ la tual ndu, nduyɛ mbo tambu labɛɛ.’
‘Wanaa pɔmbuaa cho lo yoomu nda tɛɛŋ nda,
I cho nda malɔɔ yaamɔɔwaa ndaa o ba ma diu nda a muɛi faŋnde.’ Ya Chɛhowa dimi lende ni.”+
10 Oo kala nuu, kpundɔɔ cho ya choo le mɛɛ ŋ velu ya yɛ.+
Kanifuule, waŋnda o lɛŋndeŋ niŋ kpou cho ya chiŋalaŋndo a sɛɛŋgiaŋndo, nduyɛ ma sɔŋga a ya.
I bii wana kuee o ba ɔɔ mi wuu wana kuee le.
Kɛ nda kpou cho ya mɛɛniaa.
11 Mi Chɛhowa dimi aa: “I cho num mala,
I cho suŋgɔɔ le num a teleŋ kpundɔɔ,
Nduyɛ mi chiŋalaŋ yaamɔɔwaa numnda a teleŋ nyɛpalaa.
12 Baa waŋndo nɔla pa mbo yimi yimi chiliŋnde?
O nɔla pa mbo yimi yimi chiliŋii fula ba luaŋ ndo ve a chiliŋii siaŋɛi?*
13 I cho tosa mi waŋnda puŋga nyɛm nyaŋ sɔlaŋ fondo fuu,+
Le mɛɛ nya tosa hakilaŋ o tandala nyalaŋ niŋ kpou yɛ.
14 I cho muŋ chua mi ke yaamɔɔwaa nyaa,
Ma kuɛŋnuŋ a muŋ o lɛŋnde nya sina le leŋ niŋ.+
Kanifuule, kɔl ni tuuwo bii wum maa leyiŋ,
Le nya lumi lumioo.”+
15 Oo Chɛhowa, numpila sina nyɛ cho ya choo wo.
Yandii loonuŋ a ya, ma mulul la hɔlla.
Miŋgul wanaa cho ya nyɛpalaa tusioo choo wa maa.+
Lo chumndo haaa mi sɔla piɔmndo le.
Loonuŋ maa le sabu numndo ya cho tɔɔ wɔɔŋndo hoo biuwɔŋndo ni.+
16 Oo Chɛhowa, Mɛlɛka puaa chɔuwa, mɛɛ ya saaluŋ diom numndo, mi dia ndu.+
Nduyɛ mi diom numndo tosa mi nyaaloo pia ya o kɔllo niŋ cha.
Kanifuule, diola numndaŋ la cho ya choo.
17 Wanaa kaala yelelaŋndo wa, I sɔɔŋguu nda choo le nyaaloo le.+
Yapilɛ kpe choŋnuŋ ni, kanifuule ba numndo cho ya choo.
Nduyɛ a pei ya cha a yooŋgula wɔɔŋndaŋ le waŋnda haa.+
18 Le yɛɛ nyɛ nɛiyaa kala kalaa cho yɛ ya choo, nduyɛ pau nuu siŋgu le?
O kɛɛ le sioŋgɔɔ kpooŋ.
Baa a cho pa simnɔŋ sooŋ kolaa hui wana wo le ya,
O wana tiindaŋ te wo?
19 Lelaŋ nyɛ Chɛhowa dimi wo cho hoo ni:
“Te a* miiŋgu ya o ibuŋ pɛ, I cho num siŋgi,
Nduyɛ ma sim ya o hɔl.
Te a hɛli pɛ nyɛ cho o kɛndɔɔ wo o wɔɔŋndo tɛɛŋ,
A cho simnɔŋ sondo suaa le ya.
Nda cho hunɔɔ naa num chua ni,
Kɛ num kue niŋ o nda lo le.”
20 “I cho num siiŋguu kpaki kala kala nda toosiaa a chiliŋii siaŋɛi yo le waŋnda haa.+
Kanifuule I cho a num latulu le num piŋioo.” Ya Chɛhowa dimi lende ni.
21 “I cho num piŋi wanaa dɛnɛ wɔɔŋnda o ba,
Nduyɛ mi soli num wanaa kɔl vesɛiya o ba.”
16 Mi Chɛhowa suaa vɛlɛ naa ya chua aa: 2 “Chua lanɔ le, nduyɛ vialu ŋchua o lɛŋndeŋ ndeŋ niŋ te. 3 Kanifuule, nyɛ Chɛhowa dimi a chuauwaa nda cho violɔɔ o lɛŋndeŋ ndeŋ niŋnda, kalaa ndaa, vɛlɛ a finyaa ndaa okɔɔ wo cho hoo ni: 4 ‘Naala wɔɔŋ wɔɔŋndaŋ la cho nda diu.+ Kɛ wana o wana cheŋ nda niŋ te, kɛlɛŋgaa niŋ te mi wana kumbu nda. A cho simnɔŋ nyɛ nɛŋi tɔlɔɔlaŋ o lɛŋndeŋ choo wo.+ Yiaaŋ a muɛi faŋnde cho nda diu,+ nduyɛ mi dialuŋ ndaŋ vilɛiyoŋ simnuŋ nyɛdiaa le youwaa balu o choo choo niŋnda vɛlɛ a visiaa yonduaa o lɛŋndeŋ choo.’
5 Nyɛ Chɛhowa dimi wo cho hoo ni:
‘Luɛi o chiɛi nyɛdiaa biisioo cho wo niŋ te,
Nduyɛ kua loŋ le chaŋndo ɔɔ le yilɔɔ biisioo le.’+
‘Kanifuule I faŋa kɔl ni nyuloo, kaala lo lechoo nuu,
Vɛlɛ a nyɛiyii nii waŋnda haa choo.’+ Ya Chɛhowa dimi lende ni.
6 ‘Wana pɔmbɔ ni, wana bɛndu ni, nda kpou cho wu o lɛŋndeŋ ndeŋ niŋ.
Wana o wana cho nda kumbɔɔ le.
Wana o wana cho nda chaŋ te.
Kɛlɛŋgaa niŋ te, mi wana tɛɛndiaa dialloŋ ɔɔ mbo sendi yuŋgullo* le nda.
7 Wana o wana cho nyɛdiaa yɔŋgu le wanaa biisioo komal la,
Le nda kɔllo dɛɛniaa le wana nda vi wo le.
Wana o wana cho nda mamuɛi ke le ma kol,
Le nda kɔllo dɛɛniaa le finya nda ɔɔ kala nda vi wo le.
8 Luɛi o chiɛi waŋnda cho diolaŋ a koli kolilaŋ ndo niŋ te.
Chal a nda le diolaŋ a koli kolilaŋ te.’
9 “Kanifuule nyɛ Chɛhowa, Mɛlɛka puaa chɔuwa, Mɛlɛka Isɔluɛiya dimi wo cho hoo ni, ‘I cho tosa mi kpeŋjoo a bɔɔluu kɔl kɛndɛ wana pɔnɔ cho lanɔɔ chuaa wo, vɛlɛ a wana lanɔ cho challe o nɔɔ wo mɛɛlu o fondaa hoo.+ I cho tosa mi i yɔŋnuŋ o palɛi numnde niŋ, nduyɛ ma che ndi a lehɔl pɛɛŋ.’
10 “Te a dimul nda pɛ sɔɔŋ muŋ kpou, a cho num nyuna aa, ‘Le yɛɛnɛ Chɛhowa dimi yɛ le naa kpundɛ bɛndoo hoo kpou tusioo choo? Kuɛɛ naŋ benduŋ yɛ, nduyɛ haki kuɛɛ naŋ tosa yɛ a Chɛhowa Mɛlɛka naa?’+ 11 A nɔ ma mulul nda aa, ‘“Le mɛɛ finyaa nyaa mamaa kɛɛ ya ma mal la,+ ma muliŋ mɛlɛkaa cheleŋnda sooluuwo nduyɛ ma beŋ nda wulaŋ yɛ.+ Kɛ ma kɛɛ ya, nduyɛ ma kɛɛ le sawala nilaŋ diikɔŋndo.”+ Ya Chɛhowa dimi lende ni. 12 “La tosa sɔɔŋ wɔɔŋndoŋ mbo hiau finyaa nyaa mamaa.+ Wana o wana luɛi nilakalulaŋ, nduyɛ mbo tosa nyɛ kɔl ndɔ dɛnɛ wɔɔŋndo dimul ndu wo yɔŋii o diikuŋ ya.+ 13 Lelaŋ I cho nya soli o lɛŋndeŋ ndeŋ niŋ, mi viou nya o lɛŋnde nya a finyaa nyaa mamaa sina le leŋ niŋ.+ Loŋ nya cho wa mɛlɛkaa cheleŋnda sooluu wo idii a ichɔl ni.+ Kanifuule, I cho nya inyiɛɛ tuiinɔŋ te.”’
14 “‘Mi ndaa dimi paandu aa: “Mɛɛ i cho kpendekele maa Chɛhowa, Mɛlɛka soli waŋnda Isɔluɛi o lɛŋnde Ichipi leŋ niŋndo cho yoomu yɛ!”+ Kɛ teleŋ cho fuuluu, a dimi lɛ niŋ lende le.’ Ya Chɛhowa dimi lende ni. 15 ‘A cho niŋ wa dimioo aa: “Mɛɛ i cho kpendekele maa Chɛhowa, Mɛlɛka kuɛ a waŋnda Isɔluɛi o lɛŋndeŋ ba luaŋ ndo, a lɛŋii o sɛŋi nda niŋnde kpou wo cho yoomu yɛ!” Nduyɛ I cho nda miŋgi pila o lɛŋnde ndaleŋ niŋ, lɛŋnde ya ke finyaa ndaa mamaa leŋ.’+
16 ‘I cho yɔŋ le wanaa yɔɔyaa,
Ma yɔɔya nda.
Nduyɛ mi yɔŋ le doosuaa,
Okoŋ ma nuuviaa nda o pembuŋ bɛndoŋ a o pembuŋ pɔmbɔŋ kɛ kɛ choo,
Nduyɛ ma nuuviaa nda o pouta bɛndulaŋ tɛɛŋ.’ Ya Chɛhowa dimi lende ni.
17 ‘Nyɛ o nyɛ nda cho tosaa,* I cho nda chɔɔ.
A nɔla ma veŋnuŋ ya le,
Kɛlɛŋgaa niŋ te ma veŋ hakila ndalaŋ.
18 I tasei, I cho nda nyɛpalaa sulaŋ a haki ndaa wo tusi choo.+
Kanifuule, a nɔɔliaa lɛŋnde nileŋ a piɔmaa ndaa nɔɔlɛiya.
Ma pei nyɛm ndaŋ nɔɔlɛiyoŋ cha o nyɛm niŋ kiɔɔŋ choo.’”+
19 Oo Chɛhowa, num cho yoomuma niaŋ a fondaŋ kala kala ya viaŋnuŋ ndo ni.
Num cho naa ya nyaanuŋ a teleŋ kpundɔɔ wo ni.+
Waŋnda cho chɔnɔŋ ba o ba fee o lɛŋndeŋ choo,
Ma dimi aa: “Piɔmnda sooluuwo finyaa naa mamaa komal ni, nduyɛ mi nda bɛɛ tual nda kɔɔli le nda sooluuwo.
Ma luei balaŋ o sɔɔŋ fondoŋ nɔ tɔnɔ o tɔnɔ le woŋ niŋ.”+
20 Baa waŋndo nɔla pa mbo toosiaa mɛlɛkaa le ndupila,
A cho mɛlɛka kpeekpei le wa?+
21 “Lelaŋ, I cho tosa ma sina.
Suŋ suŋ niŋ, I cho tosa ma sina lusul nuu.
A cho sina maa diola nilaŋ la cho Chɛhowa ni.”
17 “A kpɛkile ichiliŋndeŋ nda poonyiaa hakila waŋnda Chuda ni.
A nyɛ poonyiaa nda toosiaa a daamɔŋnde wo nda poonyiaa hakila ndalaŋ o kɔlta ndalaŋ choo ni,
A o leela bandula ndala luamaa lasalalaŋ.
2 Mi puaa ndaa loonuŋ bandula ndala luamaa lasalalaŋ ndaŋ, vɛlɛ a suŋgbuma iyɔm nda simi le sooluuwo waŋ.*+
Nduyɛ nyɔɔŋ muŋ cho o yɔmii bɛnduei bɛŋgu, o pembuŋ vilɛiyoŋ choo,+
3 A o pembuŋ bɛndoŋ choo o fondaŋ wakpaa.
I cho tosa mi waŋnda puŋga nyɛm nyaŋ sɔlaŋ kpou.+
A tonya, I cho tosa ma poondiaa fondaŋnda nyala filioŋndaŋ, le haki nya tosa o tandala nyalaŋ niŋ kpou laŋ.+
4 Nyapila cho tosa mi nyɛm kɛŋ ya ke nya woŋ hɛluŋ nya.+
I cho tosa mi la saaŋgial yaamɔɔwaa nyaa o lɛŋnde nya sina le leŋ niŋ,+
Le mɛɛ nya beeŋguu tumbe nuu maa leyiŋ yɛ.+
O cho wa nya lumi lumioo le fɛɛŋ a fɛɛŋ.”
5 Nyɛ Chɛhowa dimi wo cho hoo ni:
“Sendioo cho wana* dɔu hoo tiindaŋndo o wanachioo niŋ,+
Nduyɛ mbo tiindaŋ kpaaya wanachioo,+
Okoŋ mbo faŋa kɔl ndɔɔ Chɛhowa choo wo.
6 O cho simnɔŋ maa yɔm cho isisi ndupilɛ kpe o pollo niŋndo.
O yɔŋ bɛɛ mi dɛnɛ kɛndɔɔ hiŋ, o chi ndu le.
Kɛ o cho wa o lɛŋnde vesɛileŋ o pollo niŋ,
O lɛŋnde ihɛlteŋ, naa wanachiee nɔla mbo chal te wa.
8 O cho wa mɛɛ yɔmndo wa nuaa o tualaa o pioo kɔŋgɔ,
Mbo yɔŋ puunduŋ ndɔŋ o peelo yɛ.
O yɔŋ bɛɛ mi haŋgullo hiŋ, o sinaŋ te.
Kɛ teleŋ o teleŋ, pei nduɛi cho wa puiyo tɛɛ tɛɛ.+
Nduyɛ o yɔŋ bɛɛ mi walu kala kalaa sim, o buulaŋ te,
Kɛlɛŋgaa niŋ te mbo pɛŋgi kɔmndeŋ yɔŋgoo.
9 Kɔllo hui wana o hiou nyɛ o nyɛ, nduyɛ o chuluka.+
Nɛɛnɛ nɔla yɛ mbo sina ndu?
10 Ya Chɛhowa, ya mɛɛndaŋ kɔllo ni.+
Ya koni yaasiaa yiyaŋnda yiŋgoloŋndaŋ* ni,
Okoŋ mi fanda wana o wana mɛɛ kelala ndɔlaŋ,
A kaala ndɔlaŋ la cho yɛ.+
11 Mɛɛ siasoo chuuŋgiaa nuaa pelta o dou le laŋ yɛ,
Lende koni wana chuuŋgiaa hoo sullo o kafalaŋ choo wo cho ni.+
O cho lakɔ ba o ba a yoomu ndɔɔ le mi nyɔɔŋ muŋ hɛluŋ ndu.
O mɛɛlulaŋ, waŋnda cho chɔ maa diɔm fondoo fuu o cho ni.”
12 Kpeŋgbei* lemasa tɔɔma bɛndoo fondaŋ chiɛi Mɛlɛkaa cho ni.+
Nduyɛ o kandɔŋndo pa o fula tɔɔ ni.
13 Oo Chɛhowa, wana Isɔluɛiya tiindaŋ ndo,
Wana o wana faŋaŋ num kɔɔli pɛ, siɔmbulaŋ la cho ndu biyɔɔ.
Wanaa mal num nda,* a cho nda diolaŋ poonyiaa o chundoo niŋ.+
Kanifuule a kɛɛ Chɛhowa, Mɛlɛka nɔ mɛŋma yɔŋgu yoomoo waŋ ndo.+
14 Oo Chɛhowa, chiɔu ya le mi sɔla sioŋgɔɔ.
Mala ya le mi sɔla pioŋɔɔ,+
Kanifuule num cho wana ya saŋgala wo ni.
15 Tofawɔ! Waŋnda cho ya dimullo aa:
“Vɛ nyɛ Chɛhowa dimi wo peeluŋ ndɔ le?+
Mɛɛ o peeluŋ niko wa!”
16 Kɛ ya, maa wana mandaa lasaa, I feŋaŋ nya kɔlaŋ kɔɔli le,
Kɛlɛŋgaa niŋ te mi yeemɛi wa ya le mi kpundɔɔ tol nya choo.
Nyɛ o nyɛ ya soo, la sina ndu nyɛkɛndɛi.
Nya o hɔl o yɔŋnuŋ kpou ni!
17 Yandii tosa mi siooŋii bɛnduei bii ya le.
Num cho naa niaa viaŋnaŋnda ni a teleŋ kpundɔɔ.
18 Tosa mi siɔmbulaŋ la bii wanaa cho ya nyɛpalaa tusioo choo wa,+
Kɛ tosa mi siɔmbula bii ya le.
Tosa mi siooŋii bɛnduei bii nda,
Kɛ tosa mi siooŋii bɛnduei bii ya le.
19 Nyɛ Chɛhowa dimul la wo cho hoo ni: “Kɔ ma kɔ sim o dio kpaki waŋnda, naa masaa le Chuda luɛi a fulaa wa, nduyɛ ma sim o diola kpakilaŋ Chulusalɛm kpou.+ 20 Dimul nda aa, ‘Nya masaa le Chuda, nya waŋnda Chuda a o Chulusalɛm niŋ kpou, nya luɛi o diola kpakilaŋ ndaŋ nda, la yaŋ nilaŋ o nyɛ Chɛhowa dimi wo. 21 Nyɛ Chɛhowa dimi wo cho hoo ni: “La mandaŋ. La chua wolɔɔlaŋ o Paale Pɛŋgiaaleŋ choo, ɔɔ mi la luɛi a laŋ Chulusalɛm o diola kpakila ndɔlaŋ te.+ 22 La nɔ mi la soli wolɔɔlaŋ o la nya lo chiɛɛniŋ o Paale Pɛŋgiaaleŋ choo le. Nduyɛ la nɔ mi la tosa wali kɛ kɛ o paale leŋ choo le.+ La kɛsi Paale Pɛŋgiaaleŋ le diandaa a mɛɛ ya dimul finyaa nyaa mamaa yɛ.+ 23 Kɛ a yeŋ ya lani, ɔɔ ma tosa nyɛ ya dimul nda wo le. Ma tosa nilakalulaŋ,* okoŋ ma kɛɛ kpooŋ le sila nuu tolɔɔ kɔɔli.”’+
24 “‘Nyɛ ya Chɛhowa dimi wo cho hoo ni: “Te la diikuŋ ya pɛ nyɛkɛndɛi, mi la keeku a wolɔɔlaŋ o diola kpakilaŋ le luɛiyɔɔ Chulusalɛm o Paale Pɛŋgiaaleŋ choo le, mi la kɛsi Paale Pɛŋgiaaleŋ le diandaa nduyɛ mi la tosa wali kɛ kɛ lechoo le,+ 25 okoŋ masaa a waŋ banaa cho ichali o kpeŋgbei lemasa Deeve wo choo wa+ bɛɛ cho keeku o diola kpakila chioo hoo ma luɛi. Nda ni, waŋ banaa ndaa ni, puaa Chuda ni, a waŋnda o Chulusalɛm niŋ kpou cho wa luɛiyɔɔ o nyɛm nyaanaŋ suaa naŋndoŋ niŋ a o suaa choo.+ Nduyɛ waŋnda cho wa ichali o chioo hoo niŋ le fɛɛŋ a fɛɛŋ. 26 Waŋnda cho wa fulaa o chieeŋ bɛndoŋ o Chuda niŋ, o fondaŋnda balu Chulusalɛm ndaŋ, o lɛŋnde Bɛŋjamiŋ ndeŋ niŋ,+ o lɛŋnde dɛŋgbɛ leŋ,+ o tanda ŋpemboo, a o Nɛkɛbi niŋ. Okoŋ ma wa hunɔɔ a salala luamaala kpulukuu laŋ,+ salala cheleŋ ndaŋ,+ salala ŋkultaŋ,+ filaŋkiŋsɛŋ, a salala balika melaa laŋ o chiɛi Chɛhowa wo niŋ.+
27 “‘“Kɛ te la diikuŋ ya le, mi la kɛɛ le Paale Pɛŋgiaaleŋ kɛsioo le diandaa, nduyɛ mi la chua wolɔɔlaŋ mi la keeku a laŋ o diola kpakilaŋ Chulusalɛm o Paale Pɛŋgiaaleŋ choo, I cho diola kpakila ndɔlaŋ malɔɔ o yiŋ, mi le lom chiɛila choo choola kala kalalaŋ Chulusalɛm.+ Nduyɛ, wana nɔla niŋ ndeŋ nyumi le.”’”+
18 Nyɛ Chɛhowa dimul Chɛluimaya wo cho hoo ni: 2 “Chɔŋ ma kuɛ o chiɛi wana chuau kpɛɛnɛŋ puuloŋ ndo.+ I cho isɔɔ o numndo loŋ.”
3 Okoŋ mi chaŋ mi kua o chiɛi wana chuau kpɛɛnɛŋ puuloŋ ndo. I komal ndu nyɛi laandei toosiaa. 4 Mɛɛ nyɛi laandii o wa toosiaa a puuloo ve piɔl ndu o ba, mbo miŋgi nyɛi laandii cheleŋ toosiaa a mɛɛ i bɛnda ndu o hɔllɛ.
5 Okoŋ mi Chɛhowa suaa naa ya chua aa: 6 “Ya Chɛhowa dimi aa, ‘Nya waŋnda Isɔluɛi, baa I nɔla mi tosal nya mɛɛ wana chuauwaa ŋkpɛɛnɔɔ hoo tosa yɛ le? Oo waŋnda Isɔluɛi, mɛɛ puuloo cho wana chuauwaa ŋkpɛɛnɔɔ o ba yɛ, lende koni nya bɛɛ cho ya o ba ni.+ 7 Teleŋ o teleŋ ya dimi pɛ le lɛŋndeŋ tɛɛmbuuwo ɔɔ le masaleŋ piɔlɔɔ,+ 8 nduyɛ mi waŋnda o lɛŋnde leŋ niŋ mal dɛnɛ wɔɔŋ ya sila nda a ndu okɔɔ wo, ya bɛɛ I cho kɔl nuu siŋga,* I tusi lɛ nda kpundɛ ya dimi le nda tusioo choo wo le.+ 9 Kɛ teleŋ o teleŋ ya dimi pɛ le lɛŋndeŋ taŋgullo ɔɔ le masaleŋ simioo, 10 mi le tosa suɛi bɛnda ya o hɔl te ve nduyɛ mi le kɛɛ le ya diikɔŋndo, I cho yiyaŋ kɛndɛ yaa nɔ a leŋ okɔɔ wo siŋga.’*
11 “Lelaŋ a yandii, dimul waŋnda Chuda a haa Chulusalɛm aa, ‘Nyɛ Chɛhowa dimi wo cho hoo ni: “I cho bɛɛndiaŋndo* mi wa nɛilaŋ nuuviaa le nya nyɛpalaa tusioo choo. Lelaŋ a yandii, la mulul sɔɔŋ wɔɔŋ nya cho tosaa woŋ kɔɔ, nduyɛ mi la mal kaala nyala wɔɔŋndaŋ.”’”+
12 Kɛ ma dimi aa: “Mbɔ puɛŋ a keŋ!+ Kanifuule, nyɛ yiyaŋnda naalaŋ la dimul naa wo naŋ cho wa tosaa ni. Nduyɛ wana o wana o naa tɛɛŋ cho wa bolle kala leŋ tosaa, nduyɛ mbo tual nyɛ kɔl ndɔ dɛnɛ wɔɔŋndo dimul ndu wo kɔɔli.”+
13 Lelaŋ nyɛ Chɛhowa dimi wo cho hoo ni:
“A yandii, nyapila nyuuniaa wɔ o kaalaŋ tɛɛŋ.
Nɛɛnɛ tuei yɛ niŋ suɛi waa nuaa?
Yufuaanɔɔ Isɔluɛi tosa suɛi wɔɔŋ wɔɔŋ bɛndu.+
14 Baa mɔmndo Lebanɔŋ nɔla pa mbo faŋaŋ o poutaŋ choo o fondaŋnda feke feke laŋ?
Ɔɔ mɛŋma nyuluma fula levil laŋ ma nɔla pa mi ma vela?
15 Kɛ wanaa niaa puɛɛnuŋ a ya.+
Kanifuule, a cho salalaŋ* solioo o nyɛ fondoo lo.+
A tosa mi waŋnda mal nɛila nda wa paandu kɔlaŋ choo laŋ,+
Okoŋ ma muliŋ kɔlaŋ o nɛila wɔɔŋndaŋ* choo,
16 Ma tosa mi lɛŋnde ndaleŋ le simnuŋ nyɛ nɔɔlɛi,+
Nduyɛ teleŋ o teleŋ waŋndo che leŋ pɛ o hɔŋ huiye.+
Wana o wana kei leŋ ikɛi pɛ mbo che leŋ, siooŋnde bii ndu, okoŋ o hiŋ bolleŋ.+
17 I cho nda saŋɔɔ yaamɔɔwaa ndaa lachi, mɛɛ hueiyii chaŋ ba paaleŋ le chaŋ ndo ve saŋ nuaa tɛfɛlaŋ yɛ.
Paale kpundɔɔ cho nda tolɔɔ choo leŋ, I cho nda kɔɔ nuu mulul, mi viŋ nda hɔlaa niaa.”+
18 Nduyɛ ma dimi aa: “La huŋ miŋ nuuviaŋ nɛilaŋ le Chɛluimaya nyɛpalaa tusioo choo.+ Kanifuule wanaa naa soliaa lasalaa cho naa wa sawala* Mɛlɛka laŋ pɛɛkoo ni, mi wanaa naa taasiaa wa naa silaa, nduyɛ mi wanaa suaa le Mɛlɛka wa wa naa yooŋgu Mɛlɛkaa dimullo. La huŋ miŋ chiŋalaŋ ndu a lasondo.* Ŋ yaŋnuŋ lani o nyɛ o cho dimioo wo le.”
19 Oo Chɛhowa, mulul la hɔlla,
Nduyɛ ma yaŋ nilaŋ o nyɛ yaamɔɔwaa niaa cho dimioo wo.
20 Te waŋndo tosal naa pɛ dɛnɛ kɛndɔɔ, baa o bɛnda pa miŋ miŋgul ndu a o wɔɔŋndo?
Kanifuule a tuu ya sooŋndo le ya diyɔɔ.+
Loonuŋ maa mi sim num o hɔl, mi dimi sɔɔŋ kɛndɔŋ a nda okɔɔ,
Le halikpeŋ mi kɔl tuu num oo dɔɔnuŋ a nda wo pɔlul.
21 Lelaŋ, tosa mi chuauwaa ndaa chuu paku a yiaaŋ.
Mal nda muɛi faŋnde o ba.+
Maa laandaa ndaa vii chuauwaa ndaa a piaandaa ndaa.+
Maa naa wɔɔŋndo diu puaa ndaa,
Nduyɛ ma diu puaa ndaa feleŋguaa a muɛi faŋnde o chɔuwo.+
22 Maa chaŋndaŋ la piɔl o chiɛila ndalaŋ niŋ,
Te a yɔŋ pɛ waŋnda ma huŋ del nda choo o lepilɛ niŋ kpe.
Kanifuule a tuu ya sooŋndo le ya biyɔɔ,
Nduyɛ ma kɛsul la yaŋɔɔlaŋ o nɛi le mi wou peloŋ leniŋ.+
23 Kɛ num oo Chɛhowa,
Sɔɔŋ wɔɔŋ nda kɛɛsiaa le ya diyɔɔ woŋ, a sina muŋ walaŋ.+
Kumbu yɔŋnda ndala wɔɔŋndaŋ te,
Nduyɛ wɔɔsuu hakila ndala cho num lachi laŋ te.
19 Nyɛ Chɛhowa dimi wo cho hoo ni: “Kɔ o wana chuauwaa ŋkpɛɛnɔɔ lo, ma kɔ piondu kpɛɛnɛi nda toosiaa a puuloo ve.+ Chua waŋ banaa apum le waŋnda, a waŋ banaa apum le wanaa soliaa lasalaa, 2 mi la kuɛ o Kpoloŋ Po Hinɔm Ndo,+ o Dio Kpaki Wana Chuauwaa ŋKpɛɛnɔɔ sondoo. Okoŋ ma dimi nyɛ ya cho num dimul lo loŋ. 3 A nɔ ma dimul nda aa, ‘Nya masaa le Chuda a waŋnda Chulusalɛm, la yaŋ nilaŋ o nyɛ Chɛhowa dimi wo. Nyɛ Chɛhowa, Mɛlɛka Isɔluɛiya, Mɛlɛka puaa chɔuwa dimi wo cho hoo ni:
“‘“I cho fondaa hoo kpundɔɔ tusi choo, nduyɛ wana o wana tuei a ndi okɔɔ pɛ, o cho lɔlulaŋ lɔɔ.* 4 Kanifuule a mal la,+ ma tosa waŋnda sina lɛ a fondaa hoo okɔɔ le.+ A cho salalaŋ solioo o mɛlɛkaa cheleŋnda lo, mɛlɛkaa nda, finyaa ndaa mamaa, a masaa le Chuda sina a nda okɔɔ le wa. Nduyɛ a pei fondaa hoo cha a kooma wanaa tosa isɔɔ le wa.+ 5 A taŋgul fondaŋnda filioŋndaŋ le puaa ndaa salala luamaala kpulukuu laŋ solioo o Baal lo.+ O cho ya le vem nda keŋ tosa le, nduyɛ paale pilɛ bɛɛ keŋ hiŋ ya o kɔl te.”’+
6 “‘Lelaŋ nyɛ Chɛhowa dimi wo cho hoo ni: “Teleŋ cho fuuluu, a veelu lɛ niŋ fondaŋ koŋ aa Tofɛti ɔɔ Kpoloŋ Po Hinɔm Ndo* le. Kɛ a cho ndu veelu aa Kpoloŋ Nda Diu Waŋnda Wo.+ 7 I cho tosa mi kɛɛsiaala waŋnda Chuda a Chulusalɛm tambu o fondaa hoo, nduyɛ mi tosa mi yaamɔɔwaa ndaa diu nda a muɛi faŋnde. Okoŋ, mi ke youwaa balu o choo choo niŋnda a visiaa yonduaa o lɛŋndeŋ choo dialuŋ ndaŋ vilɛiyoŋ le ma de.+ 8 I cho tosa mi siooŋnde bii waŋnda a nyɛ cho yɔŋnɔŋ a chioo hoo wo, nduyɛ ma hɔŋ huiye. Wana o wana keeku ndu pɛ ikɛi, o cho woolu wa a siooŋnde, nduyɛ mbo hɔŋ huiye le kpundɛla tol ndu choo laŋ kpou.+ 9 Te yaamɔɔwaa ndaa a wanaa cho nda nuuviaa le nda diyɔɔ wa luei nda pɛ o piŋndo niŋ, I cho tosa ma de puaa ndaa a chuauwaa ndaa laanduaa, nduyɛ ma diaŋnaŋ vellaa velle, le mɛɛ nda luei nda o piŋndo niŋ ma wa a kɔl tambɛi bɛndoo yɛ.”’+
10 “Okoŋ ma pɛl kpɛɛnɛi puuluei puaa cho lakɔ a num latulu wa o hɔl. 11 Ma dimul nda aa, ‘Nyɛ Chɛhowa, Mɛlɛka puaa chɔuwa dimi wo cho hoo ni: “Nuaa ya cho waŋnda haa a chioo hoo piɔlɔɔ ni, mɛɛ waŋndo pial nuaa kpɛɛnɛi puuluei wɔ wɔ yɛ. A cho lo waŋvilɛiya kumbɔɔ o Tofɛti niŋ haaa mi fondaa chuu.”’+
12 “‘Nuaa ya cho tosa a chioo hoo ni vɛlɛ a wanaa nduaa, le mbo simnuŋ maa Tofɛti. Ya Chɛhowa dimi lende ni. 13 Nduyɛ chiɛilaŋ o Chulusalɛm niŋ a chiɛila masaa o Chuda niŋ kpou cho simnɔŋ la nɔɔlɛi maa Tofɛti.+ A tonya, chiɛila nda soli salalaŋ o nyɛm waa o choo choo niŋndo laŋ kpou,+ vɛlɛ a fondaŋnda nda taaliaa salala mamuɛilaŋ o mɛlɛkaa cheleŋnda lo laŋ+ la cho simnɔŋ maa Tofɛti.’”
14 Mɛɛ Chɛluimaya faŋaŋ Tofɛti naa Chɛhowa ndoo vem ndu le yooŋgoo dimioo wa, mbo sim o luŋ chiɛi Chɛhowa wo, mbo dimul waŋnda kpou aa: 15 “Nyɛ Chɛhowa, Mɛlɛka Isɔluɛiya, Mɛlɛka puaa chɔuwa dimi wo cho hoo ni, ‘I cho chioo hoo a sɔndɔkɔlta balu ndu laŋ kpou nyɛpalaa ya dimi wo tusi choo, le mɛɛ nda tosa nilakalulaŋ* ma kɛɛ le nyɛ ya dimi wo diikɔŋndo yɛ.’”+
20 Paasiɔɔ wana soliaa lasalaa po Imaa wo wa nilaŋ yaŋɔɔ mɛɛ Chɛluimaya wa sɔɔŋ muŋ dimioo. Paasiɔɔ yɛ, ndu wa vɛlɛ wanaa wa wallo o chiɛi Chɛhowa wo wa bolleŋ ni. 2 Okoŋ mi Paasiɔɔ fukpa Chɛluimaya wana suaa le Mɛlɛka wo, nduyɛ mbo baŋ ndu o kpiɔɔ.+ Kpiɔɔ hoo wa o Dio Kpaki Bɛŋjamiŋ Ndo Amaluaŋ o chiɛi Chɛhowa wo niŋ. 3 Diimandɔɔ, mi Paasiɔɔ soli Chɛluimaya o kpiɔɔ. Okoŋ mi Chɛluimaya dimul ndu aa:
“Chɛhowa siŋga diola numndaŋ. A nɔ lɛ ladio aa Paasiɔɔ le, kɛ diola numndaŋ niŋ aa Siooŋnde Ba o Ba Fee.+ 4 Kanifuule nyɛ Chɛhowa dimi wo cho hoo ni, ‘I cho tosa ma simnuŋ nyɛ isiooŋndo le numpila vɛlɛ a chaaŋaa numnda kpou. Nduyɛ a cho wa tofaa pɛɛŋ,+ mi yaamɔɔwaa ndaa diu nda kpou a muɛi faŋnde. I cho waŋnda o Chuda niŋ kpou malɔɔ masaa le Babilɔŋ o ba, mbo kuɛ a nda o biyɔɔ niŋ Babilɔŋ, okoŋ mbo kɔ diu nda a muɛi faŋnde.+ 5 I cho nyɛm sɔlaŋ o chioo hoo niŋ, nyɛm ndɔŋ sɔvɛ sɔviɔŋ, vɛlɛ a nyɛ sɔlaa masaa o Chuda niŋ kpou chua mi mal yaamɔɔwaa ndaa o ba.+ A cho muŋ puŋga nduyɛ ma poondiaa nda muŋ o laba ma kuɛŋnuŋ a muŋ Babilɔŋ.+ 6 Kɛ num Paasiɔɔ a wanaa cho o numndo chiɛiniŋ nda kpou, a cho lakɔ a nya o biyɔɔ niŋ. A cho lakɔ a num vɛlɛ a chaaŋaa numnda kpou Babilɔŋ mi la kɔ wu loŋ, nduyɛ ma kumbu nya loŋ. Kanifuule a dimul waŋnda yooŋgu lachoowaa.’”+
7 Oo Chɛhowa, a hui ya. A tonya, a hui ya.
A chɔm maa a nɔ kpaayaa ma hiau ya, nduyɛ ma sɔla batiuwaa.+
I simnuŋ nyɛ mamaa waŋnda o hɔl.
Lepaa o lepaa a cho ya mamɔɔ.+
8 Teleŋ o teleŋ ya wa pɛ suɛi, mi yonda choo choo kpeleŋ aa:
“Sɔŋgɔlaŋ a tambei!”
Kanifuule diom Chɛhowa wo tosa mi waŋnda wa ya yioulaŋ, nduyɛ ma mam ya lepaa o lepaa.+
9 Lelaŋ mi dimi aa: “I cho lɛ isɔɔ a ndu okɔɔ le,
Nduyɛ I pel lɛ diola ndɔlaŋ te.”+
Kɛ diom ndɔɔ wa ya kɔllo lumi lumioo maa leyiŋ. O wa ko maa leyiŋ o paala nilaŋ niŋ.
Nduyɛ mi saŋga a ndu kɛsiŋndo o kɔl,
I nɔla mi hiou lachi a ndu biuwɔŋndo le.+
10 Kanifuule mi tuɛi yooŋgula wɔɔŋnda bɔɔbɔɔ,
Sɔɔŋ ŋsiooŋndoŋ cho ya ŋ balaa silɔ.+
Waŋnda wa dimioo aa: “La pɛɛsa ndu, la ŋ pɛɛsaŋ ndu!”
Wanaa ndaa chɔm maa a cho o kɔl nyulu niŋ a ya wa, a wa chumndo le mi del.+
Ma dimi aa: “La chum tuŋ, naapum o cho biondɔŋ mbo tosa isɔɔ,
Okoŋ miŋ del ndu choo miŋ miŋgul ndu maa.”
11 Kɛ Chɛhowa wa ya ikɛi maa kuubanɔ kpaaya bɛndu.+
Le saboo hoo wanaa cho ya nyɛpalaa tusioo choo wa cho delɔɔ, nduyɛ a sɔla niŋ batiuwaa le.+
Siɔmbula bɛndulaŋ la cho nda tolɔɔ choo, kanifuule a cho batiuwaa sɔla le.
Fɛɛŋ bɛɛ waŋnda puɛɛnuŋ niŋ a bɛɛla ndala tambɛilaŋ okɔɔ le.+
12 Kɛ num Chɛhowa, Mɛlɛka puaa chɔuwa, hɔlte numndeŋ le cho wanaa cho sakpo wa choo.
Ma yaasiaa yiyaŋnda yiŋgoloŋnda* wanachioo vɛlɛ a kɔl ndɔɔ.+
13 La solul Chɛhowa chondei! La saŋgala Chɛhowa!
Kanifuule o piŋi wana* bala fondoo wanaa dɛnɛ wɔɔŋnda o ba.
14 Sendioo cho paale ya veluŋ ndeŋ choo!
Maa sala wa paale kala nuu velu ya leŋ choo le fɔ!+
15 Wana kɔ dimul finya nuu yooŋgu kɛndɔɔ aa:
“A vilul num wana pɔnɔɔ!”
Okoŋ mbo duaunuŋ nyaale tau tau wo, sendioo cho ndu choo.
16 Maa wana koŋ simnuŋ maa chieeŋ bɛnduŋ Chɛhowa tɛɛmbuu, o tembu kɔl te woŋ.
Maa o tuei waŋnda chaŋnda imɔnɔlaŋ choo choo kpeleŋ idiiyo, nduyɛ mbo tuei yondaa a kpundɛ cho hunɔɔ wo okɔɔ ipala deŋ.
17 Le yɛɛnɛ a dii ya o dembe kala nuu niŋ,
Le halikpeŋ mi kala nuu ndoo simnuŋ fondaŋ nda kumbu ya wo le?
Hei wa tosa mi kala nuu ndoo wa a folioo teleŋ o teleŋ.+
21 Mi Chɛhowa suaa naa Chɛluimaya chua a teleŋ Masaa Sɛdikaya+ vem Paasiɔɔ,+ po Malikicha wo, a Sɛfanaya+ wana soliaa lasalaa, po Maasɛya wo naa Chɛluimaya chua wo. Ma dimul ndu aa: 2 “Yandii nyunal naa Chɛhowa le sinaa nyɛ cho yɔŋnɔŋ ndo, kanifuule Nɛbukanɛɛsa* masaa le Babilɔŋ chiŋalaŋ naa a chɔuwo.+ Naapum Chɛhowa cho tosa kaamaala ndɔlaŋ o pilɛ le naa, okoŋ mbo miiŋgu.”+
3 Mi Chɛluimaya dimul nda aa: “Nyɛ nya nɔ mi la dimul Sɛdikaya wo cho hoo ni, 4 ‘Nyɛ Chɛhowa, Mɛlɛka Isɔluɛiya dimi wo cho hoo ni: “I cho tosa mi nyɛm chɔu cho nya o laba woŋ mululaŋ nya, ŋ nya cho soliŋndo kpeku le masaa Babilɔŋ vɛlɛ a Kaadiaŋaa dɔu nya o piŋndo niŋnda chɔulabaa woŋ.+ I cho nyɛm chɔuwoŋ chuuŋgiaa o chioo hoo tɛɛŋ deŋ. 5 Yapila cho tumboo dɔɔnɔŋ o kala kala,+ mi siɛndi ba ni kpaaya bɛndoo, okoŋ mi chiŋalaŋ nya a sɔŋgɔɔ.+ 6 Nyɛ o nyɛ cho o chioo hoo niŋ, wanachiee ni, chɔlu ni, I cho nda diu paku. I cho nda naa taŋ waŋnda wo tusi choo ma chuu paku.”’+
7 “‘“Okoŋ kɔɔli, I cho malɔɔ Sɛdikaya, masaa le Chuda, buɛiyaa nduaa, waŋnda o chioo hoo niŋ, a chinda a naa taŋ waŋnda wo wa, a muɛi faŋnde mɛi ya, a wanaa yiaaŋ ma mɛi yoomu wa Nɛbukanɛɛsa,* masaa le Babilɔŋ o ba. I cho nda malɔɔ yaamɔɔwaa ndaa o ba, wanaa cho nda nuuviaa le nda diyɔɔ wa.+ O cho nda diu a muɛi faŋnde. O cho nda tuiinɔŋ inyiɛɛ le, kɛlɛŋgaa niŋ te mi mɔnɛi bii ndu le nda.”’+ Ya Chɛhowa dimi lende ni.
8 “Dimul waŋnda haa aa, ‘Nyɛ Chɛhowa dimi wo cho hoo ni: “I kɛsi nya yoomoo a piɔmndo lachi. 9 Wanaa cho lo o chioo hoo niŋnda, muɛi faŋnde, yima bɛnduaŋ, a naa taŋ waŋnda wo cho nda diu. Kɛ wana o wana yɔŋguŋ o Kaadiaŋaa dɔu nya o piŋndo niŋnda lo pɛ, o cho wa yoomu,* a yɔŋ ndu nyɛ o nyɛ le.”’+
10 “‘“Kanifuule I mulul chioo hoo hɔlla le ndu dɛnɛ palaa tusioo choo, kɛ o cho le ndu suɛi kɛndɛ tosal te.+ I cho ndu malɔɔ masaa le Babilɔŋ+ o ba mbo lom ndu.”+ Ya Chɛhowa dimi lende ni.
11 “‘Nya wanaa cho o yuŋgu masaa le Chuda wo niŋnda, la yaŋ nilaŋ o nyɛ Chɛhowa dimi wo: 12 Nya waŋnda o yuŋgu Deeve wo niŋ, nyɛ Chɛhowa dimi wo cho hoo ni:
“La kiolu yamaŋ o nɛi sakpoo choo,
La piŋi wana nda del choo ma poondiaa nyɛm ndɔŋ ndo,+
Yɔŋii kɔl ni tuuwo sandu maa leyiŋ,+
Mbo wa nya lumi lumioo le sɔɔŋ dɛnɛ wɔɔŋ nya tosa woŋ.+
Nduyɛ wana nɔla niŋ ndu nyumi le.”’
13 ‘Nya wanaa cho o kpoloŋndo* niŋnda,
A nya wanaa cho o chiee cho o taŋgulaa o pouwo choo wa, I cho nya chiŋalaŋ.’ Ya Chɛhowa dimi lende ni.
Waŋnda apum cho dimioo aa: “Nɛɛnɛ cho yɛ tolɔɔ mbo huŋ chiŋalaŋ naa?
Nduyɛ nɛɛnɛ cho yɛ fondaŋnda naalaŋ hiɔlɔɔ?”
14 I cho nya hunɔɔ nyɛpalaa tusi choo,
A mɛɛ kuɛɛla nyalaŋ la cho yɛ.+
Nduyɛ I cho yiŋndeŋ malɔɔ o bundɛla ndɔlaŋ niŋ kpou,
Mi le tɛɛmbuu nyɛ o nyɛ balu ndu.’”+ Ya Chɛhowa dimi lende ni.
22 Nyɛ Chɛhowa dimi wo cho hoo ni: “Kɔ o chiɛi lemasaa ma dimul masaa le Chuda yooŋgoo hoo. 2 Dimul ndu aa, ‘Num masaa le Chuda, num cho hoo ichali o kpeŋgbei* lemasa Deeve wo choo wo, a buɛiyaa numnda vɛlɛ a wanaa numnda, a keeku o diola kpakila chioo hoo wa, la yaŋ nilaŋ o nyɛ Chɛhowa dimi wo. 3 Nyɛ Chɛhowa dimi wo cho hoo ni: “La kiolu yamaŋ o nɛi sakpoo choo, nduyɛ mi la piŋi wana nda del choo ma poondiaa nyɛm ndɔŋ ndo. La bii mialaa cho nya tɛɛŋ nda biyɔɔ wɔɔŋndo le, nduyɛ la tusi chuauwaa nɔ ŋfinya le wa* a waŋ laanduaa vii piaanduaa wa nyɛpalaa choo le.+ La dii wana tɛɛmbuu isɔɔ le wo o fondaa hoo le.+ 4 Te la tosa pɛ nyɛ ya dimul nya hoo wo nyɛkɛndɛi, koŋ cho tosa mi masaa chal o kpeŋgbei lemasa Deeve wo choo wa,+ buɛiyaa ndaa, vɛlɛ a wanaa ndaa kpou keeku o diola kpakila chiɛiyo hoo ma luɛi. A cho wa luɛiyɔɔ o nyɛm nyaanaŋ suaa naŋndoŋ niŋ a o suaa choo.”’+
5 “‘Kɛ te la tosa nyɛ ya dimi hoo wo le, I mɛnaŋ po a yapila maa chiɛiyo hoo cho simnɔŋ bemboo.’+ Ya Chɛhowa dimi lende ni.
6 “Kanifuule nyɛ Chɛhowa dimi a chiɛi masaa le Chuda okɔɔ wo cho hoo ni,
‘A cho ko ya o hɔl maa Kiliaadi,
Nduyɛ maa pembii Lebanɔŋ nde tullo.
Kɛ I cho tosa ma simnuŋ pollo,
Wana o wana chel lɛ o chieeŋ num bɛndoŋ i kɛ kɛ niŋ te.+
A cho hunɔɔ yɔmii num ii sida ve i kɛndɛ kɛndɛi kiiŋuu,
Ma mal ndi o yiŋ.+
8 “‘Te wanaa bɔɔbɔɔ o lɛŋnde niŋ wa pɛ keekoo o chioo hoo ikɛi, a cho nyuuniaŋ aa: “Le yɛɛnɛ Chɛhowa tosa yɛ hei a chiee tɔɔma bɛndoo hoo?”+ 9 A cho muli aa: “Kanifuule a tɛɛmbuu kpema Chɛhowa Mɛlɛka ndaa yii a nda wo, ma muliŋ mɛlɛkaa cheleŋnda wulaŋ beŋndo ma sooluu nda.”’+
10 La chaŋ le wana vi wo le,
Nduyɛ la bii imɔnɔ le ndu le.
Kɛ la chaŋ fukpaa fukpaa le wana cho kɔŋndaŋ ndo,
Kanifuule o miiŋgu lɛ niŋ o lɛŋnde nda velu ndu leŋ niŋ te.
11 “Nyɛ Chɛhowa dimi a Sialum*+ po Choosaya wo, o miiŋgu o masaleŋ choo o foofo Choosaya finya ndɔ wo,+ nduyɛ ma kua a ndu o biyɔɔ niŋndo cho hoo ni: ‘Fɛɛŋ bɛɛ o miiŋgu lɛ niŋ Chulusalɛm te. 12 O cho piɔmndo sɔla naa nda kuɛ a ndu o chɛleŋ niŋnda, nduyɛ o chi lɛ niŋ lɛŋndeŋ ndeŋ te.’+
13 Kpundɔɔ cho le wana taŋgul chiɛi ndɔɔ,
Vɛlɛ a lumuila ndɔlaŋ choo choo o kafalaŋ choo wo.
Mbo tosa mi chaaŋ ndɔ wanachioo tosal ndu wallo fondo fuu,
14 O cho dimioo aa, ‘I taŋgullɔɔ chiɛi bɛndoo,
A lumuila fɛkɛilaŋ choo choo.
I cho ndu taŋgul a wundɛilaŋ,*
Nduyɛ mi beŋi beŋi ndu a yɔm sida wo, okoŋ mi sui ndu pɔu siaŋa sɔɔtɔtɔɔ.’
15 Baa a cho pa hiouwɔɔ lachi a waa o masaleŋ choo le mɛɛ ŋ soliŋ yɔmii sida ve kpeku tau mbo hiau acheleŋnda yɛ?
Finya num bɛɛ wa diolaŋ a koli kolilaŋ,
Kɛ mi ndoo tosa sɔɔŋ o sandei choo a o nɛi sakpoo choo.+
Nduyɛ mi hei tosa mi sɔɔŋ wa ŋ kɛndɛ a ndu.
16 Mi ndoo suŋgu le wana nɔ wana malaa le wo a wana bala fondoo.
Le hei, sɔɔŋ wa kɔlaŋ nyɛkɛndɛi.
‘Baa o cho hei le sim le ya sinaa le?’ Ya Chɛhowa dimi lende ni.
17 ‘Kɛ num o nyɛm lakafaŋ choo ŋ kɛsi kɔllo ni,
Ma diu wanaa tɛɛmbuu isɔɔ le wa.
A cho vɛlɛ viileŋ tosaa ma dia nyɛm pilaŋ o kafalaŋ choo.’
18 “Lelaŋ, nyɛ Chɛhowa dimi a Chɛhowakim+ po Choosaya wo, masaa le Chuda okɔɔ wo cho hoo ni,
‘Te waŋndo vi pɛ, teleŋnda bɔɔbɔɔ mi waŋnda chaŋ aa:
“Kpokoo ya pɔmbɔ nuu! Kpokoo ya bɛ nuu! Kpokoo yema nuu!”
Kɛ Chɛhowakim ndu te o vi pɛ a cho ndu chaŋ aa:
“Kpokoo ya masanɔɔ! Kpokoo, bɛɛle numndeŋ le kuɛŋnuŋ fɔ!” le.
19 A cho ndu kumbɔɔ mɛɛ nda kumbu sofɛlɔɔ yɛ,+
Nduyɛ ma sasu ndu kɔkɔɔ kɔkɔɔ,
Ma soli ndu o dio kpakioo Chulusalɛm, ma viou ndu o bɛɛ.’+
20 Kɔ Lebanɔŋ ma chaŋ choo choo kpeleŋ.
Heelu diomndo Baasiaŋ,
Nduyɛ ma koŋul a chaŋndo o Abaluim niŋ.+
Kanifuule samaa numnda kpou sɔla tambei.+
21 Teleŋ ŋ waŋnuŋ hɛnɛkɛ wo, mi sila num.
Kɛ ma dimi aa, ‘I cho lani yaŋɔɔ le.’+
Kaa numndo cho hoo ni chɔŋ o feleŋgɔyɛi numnde niŋ,
A cho wana tuei ya diom te.+
22 Hueiye cho wanaa num aa mandaa lasaa kpou viouwɔɔ,+
Nduyɛ mi samaa numnda kuɛ o chɛleŋ niŋ.
Kpundɛ cho num komal lo cho tosa mi siɔmbulaŋ la bii num nduyɛ ma tambu labɛɛ.
23 Num cho hoo ichali Lebanɔŋ,+
O yɔmii sida ve tɛɛŋ ndo,+
A cho wa kuŋndaŋ a nyɛ nɛiyaa cho num tolɔɔ choo wo,
Mɛɛ pulii vialɛi kpuuwa nuaa wana lanɔɔ yɛ!”+
24 “‘Mɛɛ i cho kpendekele maa I cho yoomu yɛ, o yɔŋ bɛɛ mi Konaya*+ po Chɛhowakim ndo,+ masaa le Chuda ndoo wa kelɛi sɔvɛ sɔvɛi o ba ni kɛndɔɔ, I wa num soli loŋ po!’ Ya Chɛhowa dimi lende ni. 25 ‘I cho num malɔɔ Nɛbukanɛɛsa* masaa le Babilɔŋ vɛlɛ a Kaadiaŋnda o ba.+ Nda cho num nuuviaa ni le num diyɔɔ, nduyɛ le nda ŋ nɔ siooŋnde ni. 26 I cho tosa ma kuɛ a num vɛlɛ a kala num o lɛŋnde cheleŋ niŋ, mi la kɔ wu loŋ. 27 Nduyɛ, fɛɛŋ bɛɛ a miiŋgu lɛ o lɛŋnde nda nɔ yeemɛi le miiŋgoo leŋ niŋ te.*+
28 Baa Konaya cho pa maa kpɛɛnɛi piɔlɛi,
I waŋnda heu lɛ ba a ndi le ve?
Le yɛɛnɛ nda viou yɛ ndu nda yuŋgu ndɔɔ
O lɛŋnde cheleŋ niŋ?’+
29 Oo lɛŋndeŋ, lɛŋndeŋ, lɛŋndeŋ, yaŋ nilaŋ o nyɛ Chɛhowa cho dimioo wo.
30 Nyɛ Chɛhowa dimi wo cho hoo ni:
‘La poonyiaa a poo hoo okɔɔ maa wana nɔ chua le wo o cho ni,
Wana sɔla niŋ batiuwaa kɛ kɛ o yoomu ndɔɔ* niŋ te wo o cho ni.
Kanifuule, chuauwaa nduaa o kɛ kɛ sɔla lɛ niŋ batiuwaa,
Le challe o kpeŋgbei lemasa Deeve wo choo o masaleŋ choo Chuda le.’”+
23 “Kpundɔɔ cho le wanaa mandaa lasaa cho saa niaa diuwo nduyɛ ma sɛŋi nda wa!” Ya Chɛhowa dimi lende ni.+
2 Nyɛ Chɛhowa, Mɛlɛka Isɔluɛiya dimi a wanaa mandaa lasaa cho wanaa niaa mandaa wa okɔɔ wo cho hoo ni: “La tosa mi saa niaa puusiaŋ ma saŋnuŋ, nduyɛ la cho nda hɔlteŋ kɔɔli le.”+
“Le hei, I cho nya nyɛpalaa tusi choo le sɔɔŋ wɔɔŋ nya tosa woŋ.” Ya Chɛhowa dimi lende ni.
3 “I cho saa niaa lo yoomu wa soli o lɛŋii ya saŋ nda ve niŋ kpou,+ mi chuuŋgiaa nda naapilɛ, nduyɛ mi miŋgi nda pila o fondaŋ nda dia billo wo,+ ma kom, okoŋ ma kui tau tau.+ 4 I cho wanaa mandaa lasaa cheleŋ hɛli, a tiuba ma manda nda nyɛkɛndɛi ya.+ Nyɛ luei nda niŋ isiooŋ kɛlɛŋgaa mi siooŋnde bii nda le. Nduyɛ saa o pilɛ bɛɛ luusiaŋ niŋ te.” Ya Chɛhowa dimi lende ni.
5 “Tofawɔ! Teleŋ cho fuuluu, I cho tosa mi kulii cho sakpo ve piɔl* o pulale Deeve leŋ choo.+ O cho wa masaa,+ nduyɛ mbo chɔm sinapɛŋgoo, okoŋ mbo tosa sɔɔŋ o nɛi sakpoo choo o lɛŋndeŋ niŋ.+ Ya Chɛhowa dimi lende ni. 6 O teleŋ ndɔɔ niŋ, Chuda cho pioŋɔɔ sɔla,+ mi Isɔluɛi waŋnuŋ hɛnɛkɛ.+ Nduyɛ a cho ndu wa veeloo aa: Chɛhowa Cho Sakpoyɛi Nɛi Ni.”+
7 “Mi ndaa dimi paandu aa, ‘Mɛɛ i cho kpendekele maa Chɛhowa, Mɛlɛka soli waŋnda Isɔluɛi o lɛŋnde Ichipi leŋ niŋndo cho yoomu yɛ!’+ Kɛ teleŋ cho fuuluu, a dimi lɛ niŋ lende le.” Ya Chɛhowa dimi lende ni. 8 “A cho niŋ wa dimioo aa, ‘Mɛɛ i cho kpendekele maa Chɛhowa, Mɛlɛka kuɛ a waŋnda Isɔluɛi o lɛŋndeŋ ba luaŋ ndo, a lɛŋii o sɛŋi nda niŋnde kpou wo cho yoomu yɛ!’ Nduyɛ I cho nda miŋgi pila o lɛŋnde ndaleŋ niŋ.”+
9 Yooŋgu cho a wanaa suaa le ya wa okɔɔ wo cho hoo ni:
Kɔllo tambu ya bɔɔ.
Paalaŋ kpou la cho ya hiilɔŋndo.
Mɛɛ ya tuei a Chɛhowa okɔɔ vɛlɛ a diomnda ndɔla diandaa laŋ,
Mi simnuŋ maa wana muɛiyaŋ ma bii,
Mbo wa yiŋgi yiŋgi a maŋ ndo.
10 Wanaa suundɛiya cho a piaa cha o lɛŋndeŋ niŋ.+
Waŋnda cho chaŋnda imɔnɔlaŋ le mɛɛ sendioo cho lɛŋndeŋ choo yɛ,+
Nduyɛ fondaŋnda chɔluaa dia o pollo niŋndaŋ la vesa sɛɛŋ.+
Sɔɔŋ dɛnɛ wɔɔŋndoŋ nda tosa ni, nduyɛ ma soliŋ kpaaya ndaa kpeku o nɛi wɔɔŋndo choo.
11 “Wanaa suaa le ya wa a wanaa soliaa lasalaa bɛɛ kpɔlɔlaŋ.*+
O ya lo chiɛiniŋ bɛɛ kɛsɛ, mi saaluŋ nda dɛnɛ wɔɔŋndo tosaa.”+ Ya Chɛhowa dimi lende ni.
12 “Le saboo hoo, nɛi ndaa cho yɔŋnɔŋ chuluku chuluku, nduyɛ mi nyumndaŋ ma tol lechoo kpiŋgbi.+
A cho nda nyindɔɔ ma del.
I cho nda nyɛpalaa tusi choo,
A teleŋ nda cho ndi taasi dɔwɔɔ wo.” Ya Chɛhowa dimi lende ni.
13 “Mi saaluŋ suɛi nɔɔlɛiye wanaa suaa le Mɛlɛka o Sameeliaa niŋnda tɛɛŋ.+
O diola Baal laŋ niŋ nda wa huuloŋ dimioo ni.
Ma tosa mi Isɔluɛiya faŋaŋ o nɛi nda wa kɔlaŋ ndo choo.
14 Mi saaluŋ suɛi wɔɔŋ wɔɔŋnde wanaa suaa le ya o Chulusalɛm niŋnda tɛɛŋ.
A cho suundaa+ ma dimi choolaŋ.+
Ma chɛl waŋnda* le dɛnɛ wɔɔŋndo tosaa,
Nduyɛ a kɛɛ kpooŋ le dɛnɛ wɔɔŋ ndaa malɔɔ.
A cho ko ya o hɔl maa Sodɔm.+
Wanaa cho o chioo hoo niŋnda cho ko maa Komoolua.”+
15 Lelaŋ nyɛ Chɛhowa, Mɛlɛka puaa chɔuwa dimi a wanaa suaa le Mɛlɛka wa okɔɔ wo cho hoo ni:
“I cho tosa ma de yɔm lolɛiyo,
Nduyɛ mi ke nda mɛŋma pɔsɔnioo cho leniŋ ndaŋ ma kol.+
Kanifuule, wanaa simul tonyaa wa cho niŋ tau o wanaa suaa le Mɛlɛka o Chulusalɛm niŋnda tɛɛŋ.”
16 Nyɛ Chɛhowa, Mɛlɛka puaa chɔuwa dimi wo cho hoo ni:
“La yaŋ nilaŋ o nyɛ wanaa suaa le ya wa cho nya dimullo wo le.+
Kanifuule, huiyo nda cho nya ni.*
17 A cho lambaŋndo wanaa nɔ lebɛɛ le ya le wa dimullo aa,
‘Chɛhowa dimi aa: “La cho kɔl nyuloo tueiyɔɔ yeela.”’+
Nduyɛ ma dimul vɛlɛ wanaa cho nyɛ kɔlta ndala dɛnɛ wɔɔŋndaŋ la dimul nda wo tolɔɔ kɔɔli wa aa,
‘Kpundɛ o kpundɛ cho nya tolɔɔ choo le.’+
18 Nɛɛnɛ cho yɛ isisi wanaa cho kpɛɛluŋ a Chɛhowa wa tɛɛŋ,
Mbo tuei diom ndɔɔ?
O nɛɛnɛ yaŋ yɛ nilaŋ nyɛkɛndɛi le halikpeŋ mbo tuei diom ndɔɔ?
19 Chɛhowa cho dɔɔnɔŋ tumbe o kala kala, mɛɛ hueiyii bɛndu bɛnduei hɔŋ nuaa yɛ.
O cho wanaa dɛnɛ wɔɔŋnda pinda pinda a tumbe ndɔɔ, mɛɛ hueiyii feleŋ feleŋnde hɔŋ nuaa a kpaaya yɛ.+
20 Kɔl tuu Chɛhowa dɔɔnuŋ ndo cho pɔlul te,
Haaa mbo tosa nyɛ o kɛɛsiaŋ o kɔl le tosaa wo.
O palɛi mɛɛlɛi niŋ kpɔŋ nya cho hei biyɔɔ bila nyɛkɛndɛi ni.
21 I vim wanaa suaa le ya wa le, ma kua a kiltaŋ.
I suu o nda lo le, ma dimi yooŋgu nuu.+
22 Te ndaa lo pɛ wanaa cho kpɛɛluŋ a ya wa tɛɛŋ,
A wa tosa mi wanaa niaa ndaa tuei diomnda nilaŋ,
Okoŋ mi ndaa mulul sɔɔŋ wɔɔŋ nda wa tosaa woŋ kɔɔ.”+
23 Nyɛ ya Chɛhowa dimi wo cho hoo ni: “Baa mɛɛ mi wa nya ikɛi malaŋ ya wa Mɛlɛka? Baa I nɔla mi wa landaŋ mi wa Mɛlɛka le?”
24 “Baa waŋndo nɔla pa mbo veŋnuŋ I tiuba mi che ndu le?”+ Ya Chɛhowa dimi lende ni.
“Baa I nɔla mi che nyɛ o nyɛ fee o choo choo niŋ a o lɛŋndeŋ choo le?”+ Ya Chɛhowa dimi lende ni.
25 “I tuei wanaa suaa le ya wa choolaŋ dimioo o diola nilaŋ niŋ aa, ‘I sɔl luaŋ! I sɔl luaŋ!’+ 26 Le vɛɛ kpɛ wanaa suaa le ya wa cho yɛ hiouwɔɔ lachi a kɛɛsiaŋndo o kɔl, le waŋnda yooŋgula lachoowalaŋ dimullo? Wanaa kɛɛsiaŋ o lakɔl le waŋnda huiyo wa nda cho ni.+ 27 A yeema mi lɔma sɔlaama nda cho dimulaŋndo waŋ ma tosa mi wanaa niaa puɛɛnuŋ a diola nilaŋ okɔɔ, mɛɛ finyaa ndaa puɛɛnuŋ a diola nilaŋ okɔɔ le Baal lɛ.+ 28 Maa wana suaa le Mɛlɛka mbo sɔl luaŋ ndo tɛɛsiaa lɔma ndɔma sɔlaŋ, kɛ mi wana tuei diom nuu wo soo a ndu okɔɔ o tonyaa choo.”
“Chɛlaŋ yɛɛ cho yɛ fueende tɛɛŋ a kulloŋ?” Ya Chɛhowa dimi lende ni.
29 “Diom nuu cho ko maa leyiŋ,+ nduyɛ o cho ko maa haamɛi* nda pesi poutaŋ ndo.”+ Ya Chɛhowa dimi lende ni.
30 “Lelaŋ I cho wanaa suaa le ya wa chiŋalaŋ, a cho diomnda nilaŋ chiimbuuwo ndapila tɛɛŋ nda.”+ Ya Chɛhowa dimi lende ni.
31 Ya Chɛhowa dimi aa: “I cho wanaa suaa le ya wa nyɛpalaa tusi choo, kanifuule a cho dimioo aa, ‘Nyɛ o dimi wo cho hoo ni!’”+
32 “I cho wanaa suaa le ya wa nyɛpalaa tusi choo, le mɛɛ nda cho wanaa niaa lɔma sɔlaŋ tɛɛsiallo o choolaŋ choo, ma hui nda, nduyɛ ma pɛɛluŋ a ndi yɛ.”+ Ya Chɛhowa dimi lende ni.
“O cho ya le vem nda keŋ tosaa le. Lelaŋ, tɔnɔ o tɔnɔ bɛɛ a cho waŋnda haa chuu le.”+ Ya Chɛhowa dimi lende ni.
33 “Nduyɛ te waŋnda haa, ɔɔ wana suaa le Mɛlɛka wo, ɔɔ wana soliaa lasalaa nyuna num pɛ aa, ‘Yɛɛ cho yɛ wolɔɔla lusulɛila* Chɛhowa laŋ?’ mulul nda aa, ‘“Nya cho wolɔɔla lusulɛilaŋ ni, nduyɛ I cho nya tɛɛmbuu.”+ Ya Chɛhowa dimi lende ni.’ 34 Kɛ te waŋnda haa, wana suaa le ya wo, ɔɔ wana soliaa lasalaa dimi pɛ aa, ‘Wolɔɔla lusulɛila* Chɛhowa laŋ la cho laŋ ni!’ I cho wana koŋ a wanaa cho o ndu lo chiɛiniŋ nda kpou nyɛpalaa tusi choo. 35 A cho nyuuniaŋndo ndapila tɛɛŋ vellaa velle aa, ‘Vɛɛ Chɛhowa muli yɛ? Nduyɛ yɛɛnɛ Chɛhowa dimi yɛ?’ 36 Kɛ la suaa lɛ a wolɔɔla lusulɛila* Chɛhowa laŋ okɔɔ le. Kanifuule, nyɛ nya cho dimioo wo cho wolɔɔla lusulɛilaŋ* ni. Nduyɛ la siŋga diomnda Chɛhowa Mɛlɛka naa, Mɛlɛka puaa chɔuwa, Mɛlɛka cho yoomu wo.
37 “Nyuna wana suaa le Mɛlɛka wo aa, ‘Vɛɛ Chɛhowa mulul lɛ num? Nduyɛ yɛɛ Chɛhowa dimi yɛ? 38 La cho hiouwɔɔ lachi a dimioo aa, “Wolɔɔla lusulɛila* Chɛhowa laŋ la cho laŋ ni!” Lelaŋ nyɛ Chɛhowa dimi wo cho hoo ni: “La cho dimioo aa, ‘Nyɛ naŋ cho dimioo wo cho wolɔɔla lusulɛila* Chɛhowa laŋ ni,’ mi che bɛɛ mi dimul nya maa la dimi lende le. ‘Kɛ la cho wɔ dimioo aa: “Wolɔɔla lusulɛila* Chɛhowa laŋ la cho laŋ ni!”’ 39 Lelaŋ num ni, chiee ya ke num vɛlɛ a finyaa num aa mamaa wo, I cho nya heelu mi viou nya fakolo, mi la faŋaŋ ya o hɔl. 40 Nduyɛ I cho num siɔmbulaŋ tusi ma tambu labɛɛ, fɛɛŋ bɛɛ a puɛɛnuŋ a ndi okɔɔ le.”’”+
24 Mɛɛ Nɛbukanɛɛsa,* masaa le Babilɔŋ soli Chɛkonaya*+ po Chɛhowakim ndo,+ masaa le Chuda o Chulusalɛm niŋ, latulu a waŋ banaa Chuda, wanaa chaa nyɔɔŋ siɔlɔɔ a laba wa, a wanaa tosa wallo a chiliŋndoŋ nda, mbo kua a nda o chɛleŋ niŋ Babilɔŋ,+ mi Chɛhowa chɔm ya kambɛilaŋ la tiɔɔŋ a fikiiyaŋ leniŋ o chiɛi Chɛhowa wo hɔlndɔ. 2 Kambɛiyo o pilɛ ndoo nɔ fikiima kɛndɛ kɛndiaŋ, mɛɛ fikiima tasiaŋ ma wa nuaa yɛ. Kɛ o pilɔɔ ndoo nɔ fikiima wɔɔŋ wɔɔŋndaŋ, wanaa tiuba ma de maŋ te.
3 Okoŋ mi Chɛhowa nyuna ya aa: “Yɛɛnɛ ŋ cho yɛ chɔɔ Chɛluimaya?” Mi muli aa: “Fikiiyaŋ. Ma kɛndiaŋ ma hiouba a naŋɔɔ. Kɛ ma wɔɔŋndaŋ ma hiouba a tambei, wana tiuba ma de maŋ te.”+
4 Okoŋ mi Chɛhowa suaa naa ya chua aa: 5 “Nyɛ Chɛhowa, Mɛlɛka Isɔluɛiya dimi wo cho hoo ni: ‘Waŋnda Chuda, a ya kuɛ o biyɔɔ niŋ o lɛŋnde Kaadiaŋnda niŋnda cho ko ya o hɔl maa fikiima kɛndiaŋ maŋ. I cho nda biyɔɔ nyɛkɛndɛi. 6 I cho nda hɔlteŋ kɛsi choo le nda sɔɔŋ kɛndɔŋ tosallo, nduyɛ mi tosa ma miiŋgu o lɛŋndeŋ ndeŋ niŋ.+ I cho tosa ma sɔla nyɔɔŋ tau, kɛ I cho nda tɛɛmbuu le. I cho nda tɔlɔɔ, kɛ I cho nda suŋgɔɔ le.+ 7 I cho nda dɔwɔɔ o kɔl le ma sina maa ya cho Chɛhowa ni.+ A cho simnɔŋ wanaa niaa, mi ya bɛɛ simnuŋ Mɛlɛka ndaa.+ Kanifuule a cho miiŋgu ya o ibuŋ a kɔlta ndalaŋ kpou.+
8 “‘Nyɛ Chɛhowa dimi a fikiima wɔɔŋ wɔɔŋndaŋ, ma wana nɔla ma de le waŋ+ okɔɔ wo cho hoo ni: “Sɛdikaya+ masaa le Chuda, wanaa nduaa bɛnduaa, wanaa lo yoomu Chulusalɛm o lɛŋndeŋ niŋnda, a wanaa cho ichali o lɛŋnde Ichipi leŋ niŋnda cho ko ya o hɔl maa fikiima wɔɔŋ wɔɔŋndaŋ.+ 9 I cho tosa mi siooŋnde bii masɛi o lɛŋndeŋ choo kpou a nyɛ cho nya yɔŋnɔŋndo.+ I cho tosa mi waŋnda dimi taloo a nya okɔɔ, ma mam nya, ma dimi sɔɔŋ wɔɔŋndoŋ a nya okɔɔ, nduyɛ mi sendioo wa nya choo+ o fondaŋnda ya saŋ nya laŋ niŋ kpou.+ 10 I cho nda chiŋalaŋ a muɛi faŋnde,+ nduyɛ mi tusi nda yima bɛnduaŋ a naala taŋ waŋnda laŋ choo,+ haaa mi basu nda tɛɛ o lɛŋnde ya ke nda a finyaa ndaa mamaa leŋ niŋ.”’”
25 Wɔsi Chɛhowakim+ po Choosaya wo chiŋa wɔsilaŋ la hiɔɔlu o masaleŋ choo Chuda wo, mi Mɛlɛka suaa naa ya Chɛluimaya chua a Chuda okɔɔ kpou. A teleŋ koŋ, Nɛbukanɛɛsa* ndoo chii niŋ wɔsioo o pilɛ o masaleŋ choo Babilɔŋ. 2 Nyɛ Chɛluimaya wana suaa le Mɛlɛka wo dimi a waŋnda Chulusalɛm kpou, vɛlɛ a Chuda okɔɔ wo cho hoo ni:
3 “Chɔŋ a teleŋ Choosaya+ po Amɔŋ ndo chiŋa wɔsilaŋ 13 o masaleŋ choo Chuda mbo huŋ bii a paale hauleŋ ndo, wɔsilaŋ 23 hiou ni. Nduyɛ o wɔsilaŋ ndaŋ bɛŋgu, mi Chɛhowa suaa naa ya chua lediiŋ diiŋ. I wa nya sɔɔŋ muŋ dimullo,* kɛ la yeŋ ya lani le.+ 4 Chɛhowa wa buɛiyaa nduaa suaa le ndu wa kpou yɔŋndo o nya lo lediiŋ diiŋ.* Kɛ la yeŋ nda lani le, nduyɛ la hendu kɔllo o nyɛ nda wa nya dimullo wo choo le.+ 5 A wa nya dimullo aa, ‘A yandii, la mal kaala wɔɔŋndaŋ nduyɛ mi la mulul taŋ kɔɔ.+ Te la tosa lende pɛ, la cho hiouwɔɔ lachi a waa achal le teleŋ vilɛi o lɛŋnde Chɛhowa ke nya a finyaa nyaa mamaa paandu pa leŋ niŋ. 6 La tual mɛlɛkaa cheleŋnda kɔɔli, mi la sooluu nda nduyɛ mi la beŋ nda wulaŋ te. La tɛɛmbuu ya kɔllo a nyɛm nya toosiaa a laba woŋ te, yɔŋii ya tusi nya nyɛpalaa choo.’
7 “‘Kɛ la yeŋ ya lani le. Mi la tɛɛmbuu ya kɔllo a nyɛm nya toosiaa a laba woŋ, le nyapila kpundɔɔ tusiŋndo choo.’+ Ya Chɛhowa dimi lende ni.
8 “Lelaŋ nyɛ Chɛhowa, Mɛlɛka puaa chɔuwa dimi wo cho hoo ni, ‘“Le mɛɛ nya kɛɛ ya diikɔŋndo yɛ, 9 I cho yuŋgula cho ba luaŋ ndo laŋ kpou chuuŋgiaa naapilɛ,+ nduyɛ mi yooŋgu le Nɛbukanɛɛsa* buɛi nuu, masaa le Babilɔŋ,+ okoŋ mi dimul nda ma huŋ del lɛŋndeŋ ndeŋ choo,+ wanaa cho leniŋ nda, vɛlɛ a lɛŋii balu leŋ nde kpou.+ I cho nda tɛɛmbuu, nduyɛ mi siooŋnde bii waŋnda le nyɛ cho nda yɔŋnɔŋndo, okoŋ ma hɔŋ huiye le mɛɛ nda sɔla tambii fafɛɛŋnde yɛ. Ya Chɛhowa dimi lende ni. 10 I cho tosa mi kpeŋjoo a bɔɔluu kɔl kɛndɛ+ wana pɔnɔ cho lanɔɔ chuaa wo vɛlɛ a wana lanɔ cho challe o nɔɔ wo mɛɛlu.+ Bɔɔluula pouta nda chuii kulloŋ ndaŋ la cho mɛɛlu, nduyɛ mi lambuilaŋ la nyum. 11 Lɛŋndeŋ kpou le cho tambei sɔla, okoŋ mi siooŋnde bii waŋnda a nyɛ cho leŋ yɔŋnɔŋndo. Nduyɛ, lɛŋnde hei cho wa masaa le Babilɔŋ o ba bɛŋgu le wɔsilaŋ 70.”’+
12 “‘Kɛ te wɔsila 70 la chuu pɛ,+ I cho masaa le Babilɔŋ nyɛpalaa tusi choo, vɛlɛ a lɛŋnde leŋ le haki ndaa.+ Nduyɛ I cho tosa mi lɛŋnde Kaadiaŋnda le simnuŋ pɔmndo le fɛɛŋ a fɛɛŋ.’+ Ya Chɛhowa dimi lende ni. 13 ‘Nyɛ o nyɛ ya dimi le lɛŋndeŋ ndeŋ tosallo, I cho ndu tosa. Nduyɛ nyɛ o nyɛ Chɛluimaya soo a lɛŋnde hei okɔɔ mbo wa o poonyiaa o yauwo hoo niŋ, I cho ndu tosa. 14 Kanifuule lɛŋii bɔɔbɔɔ a masaa kpaayaa bɛnduaa+ cho nda siiŋguu chiaa,+ nduyɛ mi miŋgul nda maa le sɔɔŋ nda tosa woŋ, vɛlɛ a walta nda tosa a bala ndalaŋ ndaŋ.’”+
15 Kanifuule nyɛ Chɛhowa, Mɛlɛka Isɔluɛiya dimul la wo cho hoo ni: “Bii taala mamuɛi tumbe nuu cho hoo leniŋ ndo ya o ba, okoŋ ma ke waŋnda o lɛŋnde niŋ kpou ma kol ndu, a ya cho num viomɔɔ o nda lo wa. 16 Te a kol pɛ, ma cho nda biyɔɔ ma kuɛ taŋgaŋ taŋgaŋ, okoŋ ma tosa sɔɔŋ maa wanaa seemɛi, le mɛɛ ya cho nda muɛi faŋnde yɔŋ tɛɛŋ yɛ.”+
17 Okoŋ mi bii Chɛhowa taalaa o ba, mi tosa mi waŋnda o lɛŋnde niŋ kpou kol, a Chɛhowa vem ya o nda lo wa.+ 18 Mi kandu a Chulusalɛm, chieeŋ bɛndoŋ o Chuda niŋ,+ masaa nduaa vɛlɛ a laŋgbaa nduaa kalla, le halikpeŋ ma sɔla tambei okoŋ mi siooŋnde bii waŋnda ma hɔŋ huiye a nyɛ cho ndu hunɔɔ yɔŋnɔŋndo, nduyɛ ma handu ndu sendioo choo+ a mɛɛ i cho paale hauleŋ ndeŋ yɛ. 19 Okoŋ mi ke vɛlɛ Feloo masaa le Ichipi a buɛiyaa nduaa, laŋgbaa nduaa kalla, wanaa nduaa kpou,+ 20 vɛlɛ a wanaa cheleŋaa wa nda tɛɛŋ nda kpou. Mi ke vɛlɛ masaa o lɛŋnde Ɔɔsi leŋ niŋ kpou, masaa o lɛŋnde Filitiaa leŋ niŋ kpou,+ Asikɛlɔŋ,+ Kaasa, Ɛkulɔŋ, wanaa lo o Asidɔɔ niŋnda, 21 Idɔm,+ Mowaabi,+ a Amɔnaitiiya.+ 22 Mi ke vɛlɛ masaa o Taaya niŋ kpou, masaa o Saidɔŋ niŋ kpou,+ vɛlɛ a masaa o lɛŋnde ibuŋgaleŋ o pee mɛŋma ihɛllo niŋ, 23 Dɛdaŋ,+ Tɛma, Busi, vɛlɛ a wanaa kili yiiŋnde o kpeŋgoŋ nda kpou.+ 24 Mi ke vɛlɛ masaa Aluabuiya kpou,+ a masaa wanaa cheleŋaa wa ichali nda tɛɛŋ o pollo niŋnda, 25 masaa Simili kpou, masaa Ɛlam kpou,+ vɛlɛ a masaa Midiaa.+ 26 Mi ke masaa cho ba luaŋ ndo wa a pilɛŋ pilɛŋnda kpou, masaa cho levil la, a masaa cho kpɛɛluŋ nda. Mi ke vɛlɛ masɛi o lɛŋndeŋ choo kpou. Okoŋ, mi masaa le Siisiaki*+ mɛɛlu kolɔɔ kpɔŋ.
27 “Lelaŋ dimul nda aa, ‘Nyɛ Chɛhowa, Mɛlɛka Isɔluɛiya, Mɛlɛka puaa chɔuwa dimi wo cho hoo ni: “La kol mi ma bii nya, mi la kuusuu, nduyɛ mi la deli le halikpeŋ la nɔla lɛ mi la chɛŋ te,+ le mɛɛ ya cho nya muɛi faŋnde yɔŋ tɛɛŋ yɛ.”’ 28 Kɛ te a kɛɛ pɛ le num taala mamuɛiyo biyɔɔ o ba ma kol, dimul nda aa, ‘Nyɛ Chɛhowa, Mɛlɛka puaa chɔuwa dimi wo cho hoo ni: “La nɔ mi la kol maŋ! 29 Kanifuule, la yiyaŋndɔ a hei. Te I tusi pɛ chiee diola nilaŋ la cho choo wo nyɛpalaa choo,+ nya yɛ, baa la yiyaŋ pa maa mi mal nya haki?”’+
“‘Sako, I mel nya haki le. Kanifuule I cho muɛi faŋnde yɔŋ, mi i diu waŋnda o lɛŋndeŋ choo kpou.’ Ya Chɛhowa, Mɛlɛka puaa chɔuwa dimi lende ni.
30 “Dimul waŋnda yooŋgu ya cho num hoo kioo wo kpou. Dimul nda aa,
‘Chɛhowa cho lo o choo choo niŋ pɔ pɔ mbo pɛɛliaa maa kpɔkuŋ.*
Nduyɛ o cho lo o fondaŋ ndɔ diandaa mbo tosa mi waŋnda tuei diom ndɔɔ.
O cho fondaŋ ndɔ chalaa pɛɛliaa choo,
Nduyɛ mbo deŋi mɛɛ wanaa waiyiaa kilepiilayaŋ nda deŋi nuaa o doola mamuɛiyo yɛ.
O cho chondii kɔl kɛndɛi soli waŋnda kpou choo le mɛɛ o yem chɔuwo yɛ.’
31 ‘Bɔɔluu bɛndoo cho wa ba o ba fee o lɛŋndeŋ choo,
Le mɛɛ Chɛhowa chiŋalaŋ waŋnda o lɛŋnde niŋ yɛ.
Ndupila kɛsɛ cho waŋnda chieeya kpou yamɛi kilul ni.+
Nduyɛ, mbo diu wanaa dɛnɛ wɔɔŋnda a muɛi faŋnde.’ Chɛhowa dimi lende ni.
32 Nyɛ Chɛhowa, Mɛlɛka puaa chɔuwa dimi wo cho hoo ni:
‘Nyɛpalaa cho tiu o lɛŋnde niŋ silɔ.+
Nduyɛ I cho tosa mi hueiyii kpaaya bɛnduei suŋgu hɔŋndo, fulaa o fondaŋnda yololɛlaŋ o lɛŋndeŋ choo.+
33 “‘Wanaa Chɛhowa cho diu o paale leŋ choo wa cho wa ba o ba fee o lɛŋndeŋ choo. Wana o wana cho nda chaŋ te, kɛlɛŋgaa niŋ te ma dii nda naapilɛ ɔɔ ma kumbu nda. A cho simnɔŋ maa nyɛ nɛŋi tɔlɔɔlaŋ ndo o lɛŋndeŋ choo.’
34 Nya wanaa mandaa lasaa, la koŋul choo choo kpeleŋ a chaŋndo!
Nya saa nɔ tɔɔ o saa tɛɛŋ nda, la yuuliaŋ a chaŋndo!
Kanifuule, teleŋ nda nɔ le nya diuwo nduyɛ mi la saŋnuŋ ndo fuuluu.
La cho delɔɔ mi la pesi mɛɛ nyɛi laandii sɔvɛi nɛi piɔl te ve cho nuaa yɛ!
35 Wanaa mandaa lasaa nɔ ba o ba nda nyaanuŋ te.
Nduyɛ saa nɔ tɔɔ o saa tɛɛŋ nda bɛɛ, a nɔ nɛi o nɛi nda hɛluŋ te.
36 La yaŋ ndɔ nilaŋ, wanaa mandaa lasaa cho chaŋndo choo choo kpeleŋ,
Nduyɛ mi saa nɔ tɔɔ o saa tɛɛŋ nda wa koŋullo,
Kanifuule Chɛhowa cho fondaŋnda nda dia nyɛdiaa laŋ tɛɛmbuuwo.
37 Fondaŋnda waŋnda wa ichali o kɔl nyuloo niŋndaŋ la lo fondo,
Le mɛɛ Chɛhowa dɔɔnuŋ tumbe o kala kala yɛ.
38 O fula mɛɛ kpɔkuŋ fɔŋndɔɔ fula nuaa o bɛmɛlta ndɔlaŋ yɛ,+
Okoŋ mi siooŋnde bii waŋnda a nyɛ yɔŋnuŋ lɛŋnde ndɔleŋ ndo.
Nduyɛ le mɛɛ o dɔɔnuŋ tumbe o kala kala yɛ,
Mbo soliŋ muɛi nduɛi faŋnde kpeku mbo diu wanaa bɔɔbɔɔ.”
26 A teleŋ Chɛhowakim+ po Choosaya wo, masaa le Chuda kandu masaleŋ ndo, mi Chɛhowa suaa naa ya chua aa: 2 “Nyɛ ya Chɛhowa dimi wo cho hoo ni, ‘Sim o luŋ chiɛi Chɛhowa wo, ma soo a wanaa cho o chieeŋ bɛndoŋ o Chuda niŋnda okɔɔ kpou, a huŋ piɛileŋ* o chiɛi Chɛhowa wo niŋnda. Nyɛ o nyɛ ya dimul num pɛ, dimul nda ndu. O pilɛ bɛɛ faŋa lechoo le. 3 Kɛlɛŋgaa dɔɔ ma yaŋ num nilaŋ ma mulul yɔŋ nda wɔɔŋndo kɔɔ,* okoŋ I tusi lɛ nda nyɛpalaa ya kɛɛsiaa le nda tusioo choo le yɔŋnda ndala wɔɔŋndaŋ ndo le.+ 4 Dimul nda aa: “Nyɛ Chɛhowa dimi wo cho hoo ni, ‘Te la yeŋ ya lani nduyɛ mi la tosa nyɛ sawala* ya ke nya laŋ la dimi wo le, 5 okoŋ mi la kɛɛ le nyɛ buɛiyaa niaa suaa le ya wa dimul nya wo nilaŋ yaŋɔɔ, a ya vem o nya lo lediiŋ diiŋ nda* kɛ mi la kɛɛ le nda nilaŋ yaŋɔɔ wa,+ 6 I cho tosa mi chiɛiyo hoo simnuŋ maa Silɔɔ,+ nduyɛ mi tosa mi waŋnda o lɛŋndeŋ choo kpou sina maa sendioo cho chioo hoo choo.’”’”+
7 Mi wanaa soliaa lasalaa, wanaa suaa le Mɛlɛka wa, vɛlɛ a waŋnda kpou tuɛi Chɛluimaya sɔɔŋ muŋ dimioo o chiɛi Chɛhowa wo niŋ.+ 8 Mɛɛ Chɛluimaya chii waŋnda nyɛ Chɛhowa dimul ndu wo kpou dimul, mi wanaa soliaa lasalaa, wanaa suaa le Mɛlɛka wa, vɛlɛ a waŋnda kpou bii ndu ma dimul ndu aa: “A nɔ ma sɔla piɔmndo. 9 Le yɛɛnɛ ŋ dimi yɛ yooŋgoo o diola Chɛhowa laŋ niŋ aa, ‘Chiɛiyo hoo cho simnɔŋ maa Silɔɔ, nduyɛ mi chioo hoo sɔla tambei wana o wana ve lɛ niŋ leniŋ te’?” Okoŋ mi waŋnda kpou balu Chɛluimaya silɔ o chiɛi Chɛhowa wo niŋ.
10 Mɛɛ laŋgbaa kalla o Chuda niŋ tuei nyɛ Chɛluimaya dimi hoo wo, ma mal o chiɛi lemasaa ma huŋ o chiɛi Chɛhowa wo. Okoŋ, ma chal o dio kpaki sɛnɛiyo sondoo o chiɛi Chɛhowa wo.+ 11 Mi wanaa soliaa lasalaa a wanaa suaa le Mɛlɛka wa dimul laŋgbaa kalla a waŋnda kpou aa: “Laŋunɔɔ hoo nɔ mbo sɔla piɔmndo,+ kanifuule o dimi yooŋgu wɔɔŋndo a chioo hoo okɔɔ, a mɛɛ nyapila tuei a nila nyalaŋ yɛ.”+
12 Okoŋ mi Chɛluimaya dimul laŋgbaa kalla vɛlɛ a waŋnda kpou aa: “Diomnda nya tuei ya laŋ dimioo laŋ kpou, Chɛhowa vem ya laŋ dimioo ni a chiɛiyo hoo okɔɔ vɛlɛ a chioo hoo.+ 13 Lelaŋ la siŋga yiyaŋnda nyalaŋ, nduyɛ mi la mal kaala nyalaŋ, mi la diikuŋ nyɛ Chɛhowa Mɛlɛka nyaa dimul nya wo. Keŋ cho tosa mi Chɛhowa siŋga yiyaŋ ndɔɔ,* o tusi lɛ nya kpundɛ ndoo kɛɛsiaa le nya tusioo choo wo le.+ 14 Kɛ le ya ndu, la che ya. Nyɛ o nyɛ bɛnda pɛ nya o hɔl le ya tosallo, la tosa. 15 Kɛ la kɛsiŋ o lakɔl maa te la dii ya pɛ, kooma wana tɛɛmbuu isɔɔ le wo cho nya, chioo hoo, vɛlɛ a wanaa cho leniŋ nda kpou wa o lebol. Kanifuule, Chɛhowa kpeekpei vem ya nya sɔɔŋ muŋ kpou dimullo ni.”
16 Okoŋ mi laŋgbaa kalla a waŋnda kpou dimul wanaa soliaa lasalaa a wanaa suaa le Mɛlɛka wa aa: “Laŋunɔɔ hoo nɔ mbo sɔla piɔm te, kanifuule o diola Chɛhowa Mɛlɛka naa niŋ o soo o naa lo ni.”
17 Okoŋ kɔɔli, mi waŋ banaa apum o lɛŋndeŋ niŋ chaŋ ma kandu suɛi o waŋnda lo kpou aa: 18 “A teleŋ Hɛsikaya+ masaa le Chuda wa o masaleŋ choo wo, mi Maika+ fulaa Moluɛsiɛti dimul waŋnda kpou yooŋgu Mɛlɛkaa aa, ‘Nyɛ Chɛhowa, Mɛlɛka puaa chɔuwa dimi wo cho hoo ni:
“A cho Saayɔŋ waa mɛɛ nda waa nuaa chiɛi yɛ,
Nduyɛ mi Chulusalɛm simnuŋ bembelaŋ.+
Pembii bɛnduei o Chiɛiyo* cho simnɔŋ fondaŋnda filioŋndaŋ o bundɔɔ niŋ.”’+
19 “Baa mi Hɛsikaya masaa le Chuda a waŋnda Chuda kpou ndaa dii ndu pa? Baa Hɛsikaya ndoo yɔŋ siooŋnde le Chɛhowa, nduyɛ mbo nyɔɔlu Chɛhowa le mbo tuiinuŋ ndu inyiɛɛ le? Le hei mi Chɛhowa siŋga kɔl ndɔɔ,* o tusi lɛ nda nyɛpalaa ndoo kɛɛsiaa le nda tusioo choo wo le.+ Lelaŋ, kpundɔɔ naŋ cho naapila tusiŋndo choo nuaa ni.
20 “Po cheleŋ wa, mi ndu bɛɛ dimi yooŋgoo o diola Chɛhowa laŋ niŋ. Diola ndɔlaŋ aa Yuluaacha, po Siɛmaya wo, fulaa Kiliaati-chiaaluim.+ Mbo dimi yooŋgoo a chioo hoo vɛlɛ a lɛŋndeŋ ndeŋ okɔɔ, mɛɛ Chɛluimaya dimi yɛ koni. 21 Mɛɛ Masaa Chɛhowakim,+ kuubaa nduaa chɔuwa, vɛlɛ a laŋgbaa nduaa kalla kpou tuei hei, mi masaa kɛɛsiaa le ndu diyɔɔ.+ Mɛɛ Yuluaacha tuei a hei okɔɔ, o lepilɛ niŋ kpe mi siooŋnde bii ndu, okoŋ mbo nyaanuŋ Ichipi. 22 Kɛ mi Masaa Chɛhowakim viam Ɛli-netaŋ+ po Achibɔɔ wo, a puaa cheleŋ ndu kɔɔli Ichipi. 23 Ma kɔ bii Yuluaacha Ichipi loŋ, ma huŋ a ndu o Masaa Chɛhowakim ndo, okoŋ mbo dii ndu a muɛi faŋnde.+ Ma chua dialuŋ ndɔŋ, ma kɔ kumbu muŋ o fondaŋ nda kumbu wanaa yɔŋaa wo.”
24 Kɛ mi Ahikam+ po Siafaŋ ndo+ suaa le Chɛluimaya, o chɛl ma mal ndu waŋnda o ba ma dii ndu le.+
27 A teleŋ Chɛhowakim, po Choosaya wo, masaa le Chuda kandu masaleŋ ndo, mi Chɛhowa suaa naa Chɛluimaya chua aa: 2 “Nyɛ Chɛhowa dimul la wo cho hoo ni, ‘Toosiaa yuei, ma yii yɔmii lawoluɛi nda handuŋ o ŋkɛsu ve a ndi, ma handuŋ ndi o ikɛsu. 3 Okoŋ ma ke wanaa nda vem Chulusalɛm o Sɛdikaya, masaa le Chuda lo wa, ma yoo masaa le Idɔm,+ masaa le Mowaabi,+ masa Amɔnaitiiya,+ masaa le Taaya,+ vɛlɛ a masaa le Saidɔŋ.+ 4 Dimul nda yooŋgoo hoo le masaa ndaa aa:
“‘“Nyɛ nya nɔ mi la kɔ dimul masaa nyaa wo cho hoo ni. Nyɛ Chɛhowa, Mɛlɛka Isɔluɛiya, Mɛlɛka puaa chɔuwa dimi wo cho hoo ni, 5 ‘Ya siɛndi ba ni kpaaya bɛndoo ni mi toosiaa lɛŋndeŋ, waŋnda chieeya, vɛlɛ a visiaa cho o lɛŋndeŋ choo wa kpou. Nduyɛ wana ya yeema wo,* ndu ya ke ni.+ 6 Lelaŋ lɛŋnde hei kpou, I ke Nɛbukanɛɛsa buɛi nuu,+ masaa le Babilɔŋ. Hali visiaa yonduaa bɛɛ, ndu ya ke ni le ma tosal ndu wallo. 7 Waŋnda o lɛŋnde niŋ kpou cho ndu, puaa nduaa, a puaa nduaa mamaa wa o ba bɛŋgu haaa mi masale ndɔleŋ le fuuluu o mɛɛlulaŋ.+ A teleŋ koŋ, lɛŋii bɔɔbɔɔ a masaa kpaayaa bɛnduaa cho ndu siiŋguu chiɔɔ.’+
8 “‘“‘Te lɛŋnde kɛ kɛ ɔɔ masale kɛ kɛ kɛɛ pɛ le Nɛbukanɛɛsa masaa le Babilɔŋ wallo tosallo, nduyɛ mbo kɛɛ le luɛiyɔɔ o yɔm ndɔɔ bɛŋgu, I cho lɛŋnde leŋ nyɛpalaa tusi choo a muɛi faŋnde,+ yima bɛnduaŋ, vɛlɛ a naala taŋ waŋnda laŋ, nduyɛ mi tosa mbo basu nda tɛɛ.’ Ya Chɛhowa dimi lende ni.
9 “‘“‘Lelaŋ te wanaa nyaa suaa le Mɛlɛka wa, wanaa nyaa viamaa layawaa, wanaa nyaa sɔl luaŋ nda, wanaa nyaa tosa maŋgaliaalaŋ nda, a mandiaa nyaa dimul nya pɛ aa: “La cho masaa le Babilɔŋ wallo tosal te,” la yaŋ nda lani le. 10 Kanifuule yooŋgu lachoowaa nda cho nya koŋ dimullo ni, le halikpeŋ mi la faŋaŋ o lɛŋnde nyaleŋ niŋ, ma kuɛ a nya landaŋ, nduyɛ mi sɛŋi nya, okoŋ mi la sɔla tambei.
11 “‘“‘Kɛ lɛŋnde cho luɛiyɔɔ o yɔm masaa le Babilɔŋ bɛŋgu nduyɛ mi le tosal ndu wallo leŋ, I cho wanaa nduaa chɛlɔɔ ma wa* o lɛŋnde leŋ choo, nduyɛ ma tosa wallo lechoo.’”’” Ya Chɛhowa dimi lende ni.
12 Mi dimul vɛlɛ Sɛdikaya masaa le Chuda+ nyɛpilɔɔ hoo kpe aa: “Masaa le Babilɔŋ, la luɛi o yɔm ndɔɔ bɛŋgu, mi la tosal ndu a wanaa nduaa wallo, okoŋ mi la hiou lachi a waa achal.+ 13 Chɛhowa dimi maa lɛŋnde cho kɛɛ le masaa le Babilɔŋ wallo tosallo leŋ, o cho leŋ tɛɛmbuu a muɛi faŋnde,+ yima bɛnduaŋ,+ vɛlɛ a naala taŋ waŋnda laŋ.+ Baa a yeema mi keŋ yɔŋnuŋ num vɛlɛ a wanaa numnda? 14 Wanaa suaa le Mɛlɛka wa cho dimioo aa, ‘La cho wallo tosa le masaa le Babilɔŋ te.’+ Kɛ la yaŋ nda lani le, kanifuule yooŋgu lachoowaa nda cho nya koŋ dimullo ni.+
15 “‘O cho ya le vem nda le. Yooŋgu lachoowaa koni nda cho dimioo ni o diola nilaŋ niŋ. Te la yaŋ nda nilaŋ pɛ, koŋ cho tosa mi saŋ nya, nduyɛ mi tɛɛmbuu nya vɛlɛ a wanaa cho nya kaŋ choolaŋ dimullo wa.’”+ Ya Chɛhowa dimi lende ni.
16 Nduyɛ mi dimul wanaa soliaa lasalaa a waŋnda kpou aa: “Nyɛ Chɛhowa dimi wo cho hoo ni, ‘La yaŋ nilaŋ o yooŋgu wanaa suaa le Mɛlɛka wa cho nya dimullo wo le, kanifuule yooŋgu lachoowaa nda cho dimioo ni.+ A cho dimioo aa: “Nyɛm wa o chiɛi Chɛhowa wo niŋ ma kua a muŋ Babilɔŋ ndoŋ, ŋ cho suŋ miiŋgu nanuŋ!”+ 17 La yaŋ nda lani le. La tosal masaa le Babilɔŋ wallo, okoŋ mi la hiou lachi a waa achal.+ Le yɛɛ mi la chɛl mi chiee nyaa sɔla tambei? 18 Kɛ te wanaa suaa le Mɛlɛka wa nda cho ni, nduyɛ te Chɛhowa vem nda lekɛndɛi ni, mɛɛ a nyɔɔlu wɔ Chɛhowa, Mɛlɛka puaa chɔuwa, le mbo tosa waŋnda chue nyɛm tɔɔŋ lo o chiɛi Chɛhowa woŋ niŋ, chiɛi lemasaa le masaa Chuda, a Chulusalɛm, ma kuɛŋnuŋ a muŋ Babilɔŋ te.’
19 “Kanifuule mi Chɛhowa, Mɛlɛka puaa chɔuwa suaa a suŋgbuaŋ,+ Hɛŋgɛi Bɛndu Mamɛŋndo,+ nyɛm viliaa mamɛŋ ndoŋ,+ vɛlɛ a nyɛm tɔɔŋ lo o chioo hoo niŋndoŋ okɔɔ. 20 Nyɔɔŋ muŋ Nɛbukanɛɛsa, masaa le Babilɔŋ mɛi ni, teleŋ o bii Chɛkonaya, po Chɛhowakim ndo masaa le Chuda Chulusalɛm, mbo kua a ndu o chɛleŋ niŋ Babilɔŋ, latulu a waŋ banaa kpou Chuda a Chulusalɛm ndo.+ 21 Lelaŋ, nyɛm lo o chiɛi Chɛhowa wo niŋ, chiɛi lemasaa le masaa Chuda, vɛlɛ a o Chulusalɛm niŋndoŋ, nyɛ Chɛhowa, Mɛlɛka Isɔluɛiya, Mɛlɛka puaa chɔuwa dimi a muŋ okɔɔ wo cho hoo ni: 22 ‘“A cho lakɔ a nyɔɔŋ muŋ Babilɔŋ,+ nduyɛ loŋ ŋ cho lo ni haaa mi mulul wanaa niaa hɔlla, okoŋ mi chua muŋ mi miŋgi muŋ o fondaa hoo,”+ Ya Chɛhowa dimi lende ni.’”
28 O wɔsi pilɛ koŋ niŋ, koŋ cho ni, wɔsi hiɔɔlu ndɔ Sɛdikaya,+ masaa le Chuda kandu masaleŋ o paŋgii ŋuɛɛnuei niŋndo, mi wana suaa le Mɛlɛka wo Hananaya po Asɔ wo, fulaa Kibiɔŋ+ suaa naa ya chua, wanaa soliaa lasalaa, a waŋnda kpou o hɔl o chiɛi Chɛhowa wo niŋ aa: 2 “Nyɛ Chɛhowa, Mɛlɛka Isɔluɛiya, Mɛlɛka puaa chɔuwa dimi wo cho hoo ni, ‘I cho yɔm lawolɔɔ masaa le Babilɔŋ handu nya o ikɛsu wo yomɔɔ.+ 3 O wɔsilaŋ la tiɔɔŋ bɛŋgu, nyɛm Nɛbukanɛɛsa masaa le Babilɔŋ chua o chiɛi Chɛhowa wo hoo niŋ mbo kuaŋnuŋ a muŋ Babilɔŋ ndoŋ, muŋ kpou I cho muŋ miŋgi o fondaa hoo.’”+ 4 “‘Nduyɛ I cho Chɛkonaya,+ po Chɛhowakim ndo,+ masaa le Chuda, vɛlɛ a wanaa nda bii o Chuda niŋ ma kuaŋnuŋ a nda Babilɔŋ o biyɔɔ niŋnda kpou miŋgi pila o fondaa hoo.+ Kanifuule, I cho yɔm lawolɔɔ masaa le Babilɔŋ handu nda o ikɛsu wo yomɔɔ.’” Ya Chɛhowa dimi lende ni.
5 Okoŋ mi Chɛluimaya, wana suaa le Mɛlɛka wo suaa naa Hananaya chua wana suaa le Mɛlɛka wo, wanaa soliaa lasalaa a waŋnda kpou o hɔl, a wa isisi o chiɛi Chɛhowa wo niŋnda. 6 Mi Chɛluimaya, wana suaa le Mɛlɛka wo dimi aa: “Amiina!* Maa Chɛhowa tosa hei fɔ! Maa Chɛhowa peelu nyɛ ŋ dimi wo, okoŋ mbo miŋgi nyɛm nda kuɛ Babilɔŋ ndoŋ o chiɛi Chɛhowa wo niŋ, nduyɛ mbo miŋgi wanaa nda kuɛ o biyɔɔ niŋnda kpou o fondaa hoo! 7 Kɛ a yandii, yaŋ nilaŋ o yooŋgu ya cho hoo num a waŋnda kpou dimullo wo. 8 O paandoo niŋ pa, tuupa miŋ simnuŋ wanaa suaa le Mɛlɛka wa, mi wanaa ndaa suaa le Mɛlɛka wa ndaa dimi sɔɔŋ a lɛŋii bɔɔbɔɔ okɔɔ, masɛi kpaayɛi bɛnduei, chɔulaŋ, kpundɛlaŋ, vɛlɛ a naala taŋ waŋnda laŋ okɔɔ. 9 Te wana suaa le Mɛlɛka wo soo pɛ a kɔl nyuloo okɔɔ, nduyɛ mi nyɛ o dimi koŋ ndo yɔŋnuŋ, mɛɛ ŋ sina maa Chɛhowa kɛsɛ vem wana suaa koŋ le Mɛlɛka wo ni.”
10 Le hei, mi Hananaya, wana suaa le Mɛlɛka wo faŋa yɔm lawolɔɔ wa Chɛluimaya o ikɛsu wo mbo yam ndu.+ 11 Okoŋ mi Hananaya dimi waŋnda kpou o hɔl aa: “Nyɛ Chɛhowa dimi wo cho hoo ni, ‘Mɛɛ ya tosa nuaa a yɔm lawolɔɔ hoo yɛ, o wɔsila tiɔɔŋ bɛŋgu, lende koni ya cho Nɛbukanɛɛsa masaa le Babilɔŋ yomɔɔ waŋnda o lɛŋndeŋ niŋ kpou o ikɛsu ni.’”+ Okoŋ mi Chɛluimaya, wana suaa le Mɛlɛka wo kuaŋnuŋ.
12 Mɛɛ Hananaya, wana suaa le Mɛlɛka wo yem yɔm lawolɔɔ wa Chɛluimaya o ikɛsu wo, mi Chɛhowa ke Chɛluimaya yooŋgoo hoo. Mbo dimul ndu aa: 13 “Kɔ dimul Hananaya aa, ‘Nyɛ Chɛhowa dimi wo cho hoo ni: “Mɛɛ ŋ yem niŋ nuaa yɔm lawolɔɔ yɛ,+ chiliŋii chuaa lawoluɛi ŋ cho niŋ toosiaa ni.” 14 Kanifuule nyɛ Chɛhowa, Mɛlɛka Isɔluɛiya, Mɛlɛka puaa chɔuwa dimi wo cho hoo ni: “I cho chiliŋii chuaa lawoluɛi handɔɔ waŋnda o lɛŋnde niŋ kpou o ikɛsu, le ma tosa wallo le Nɛbukanɛɛsa masaa le Babilɔŋ, nduyɛ a nɔ ma tosal ndu wallo.+ Hali visiaa yonduaa bɛɛ, I cho nda ndu malɔɔ o ba.”’”+
15 Mi Chɛluimaya, wana suaa le Mɛlɛka wo dimul Hananaya aa:+ “Hananaya, yandii yaŋ ya nilaŋ! O cho Chɛhowa le vem num te. Kɛ a tosa mi waŋnda haa duau tiindaŋndo o choolaŋ niŋ.+ 16 Lelaŋ nyɛ Chɛhowa dimi wo cho hoo ni, ‘I cho num faŋa o lɛŋndeŋ choo. A cho wu o wɔsioo hoo niŋ, kanifuule a tosa mi waŋnda simul Chɛhowa.’”+
17 Okoŋ mi Hananaya wana suaa le Mɛlɛka wo wu o paŋgii ŋɔmmɛu ve niŋ o wɔsi koŋ niŋ.
29 Mi Chɛluimaya, wana suaa le Mɛlɛka wo yɔŋ wanaa Nɛbukanɛɛsa chua Chulusalɛm mbo kua a nda o biyɔɔ niŋ Babilɔŋ nda yauwo. Nda cho ni, waŋ banaa wa o wanaa nda kuɛ o biyɔɔ niŋnda tɛɛŋ nda, wanaa soliaa lasalaa, wanaa suaa le Mɛlɛka wa, a wanaa tuaa kpou. 2 A teleŋ koŋ, masaa Chɛkonaya,+ kala ndɔ,+ wanaa silaa, waŋ banaa o Chuda niŋ a Chulusalɛm, wanaa chaa nyɔɔŋ a laba wa, a wanaa tosa wallo a chiliŋndoŋ nda ndaa mal niŋ Chulusalɛm ma kuaŋnuŋ.+ 3 Mbo chua yau o poonyiaa wo mbo ke Ɛlesa, po Siafaŋ ndo,+ a Kɛmaluaya, po Hilikaya wo le ma kuɛ a ndu. Nda Sɛdikaya,+ masaa le Chuda ndoo vem naa Nɛbukanɛɛsa, masaa le Babilɔŋ chua ni. Mi yauwo dimi aa:
4 “Mi Chɛhowa, Mɛlɛka puaa chɔuwa, Mɛlɛka Isɔluɛiya dimul wanaa cho o biyɔɔ niŋ kpou wa, wanaa o tosa ma faŋa nda Chulusalɛm ma kua a nda Babilɔŋ nda aa, 5 ‘La taŋgul chiɛilaŋ, mi la wa leniŋ. La tɔl kpelelaŋ, mi la de kɔmnde ndɔleŋ. 6 La chua laanduaa, mi la velu puaa a waŋ laanduaa. La chuel puaa nyaa laanduaa, mi la kɛsi chuaa nyaa laanduaa o nɔlaŋ, le halikpeŋ mi nda bɛɛ velu puaa a waŋ laanduaa. La kui tau tau, la faŋaŋ lechoo le. 7 La tosa sɔɔŋ chuu nya kɔl nyuloo o chiee nya cho o biyɔɔ niŋndo, nduyɛ mi la piɛi o Chɛhowa lo le chiee koŋ. Kanifuule, kɔl nyulu ndɔɔ cho tosa ni mi nya bɛɛ wa o kɔl nyuloo niŋ.+ 8 Nyɛ Chɛhowa, Mɛlɛka puaa chɔuwa, Mɛlɛka Isɔluɛiya dimi wo cho hoo ni: “La chɛl mi wanaa nyaa suaa le Mɛlɛka wa a wanaa nyaa viamaa layawaa cho nya tɛɛŋ nda hui nya le.+ La yaŋ nilaŋ o lɔma sɔlaama nda cho nya tɛɛsiallo waŋ te. 9 Kanifuule ‘yooŋgu lachoowaa nda cho nya dimullo ni o diola nilaŋ niŋ. O cho ya le vem nda le.’+ Ya Chɛhowa dimi lende ni.”’”
10 “Nyɛ Chɛhowa dimi wo cho hoo ni, ‘Te la chii pɛ wɔsilaŋ 70 o Babilɔŋ niŋ, I cho nya hɔlla mulul.+ I cho tosa sɔɔŋ kɛndɛŋ ya dimi woŋ, mi miŋgi nya o fondaa hoo.’+
11 “Chɛhowa dimi aa, ‘Kanifuule I sina sɔɔŋ ya cho yiyaŋndo a muŋ okɔɔ le nya woŋ. Sɔɔŋ chuu nya kɔl nyuloo woŋ, kɛ o cho sɔɔŋ chuu nya kpundɛ le.+ Le mi la nɔ tiindaŋndo le chilaŋ.+ 12 La cho hunɔɔ naa ya chua mi la veelu ya o piɛileŋ niŋ, nduyɛ mi yaŋ nya nilaŋ.’+
13 “‘La cho ya nuuviaa mi la saaluŋ ya.+ Kanifuule, a kɔlta nyalaŋ kpou nya cho ya wa nuuviaa ni.’+ 14 Chɛhowa dimi aa, ‘I cho tosa mi la saaluŋ ya.+ Lɛŋii ya sɛŋi nya ma kua a nya o biyɔɔ niŋnde kpou, I cho nya soli loŋ mi chuuŋgiaa nya naapilɛ,+ okoŋ mi miŋgi nya pila o fondaŋ nya wa mi la tosa mi kua a nya o biyɔɔ niŋndo.’+ Ya Chɛhowa dimi lende ni.
15 “Kɛ la dimi aa, ‘Chɛhowa ke naa wanaa suaa le ndu wa o Babilɔŋ niŋ.’
16 “Mi Chɛhowa suaa a masa cho ichali o kpeŋgbei* lemasa Deeve wo choo wo okɔɔ,+ wanaa cho ichali o chioo hoo niŋnda kpou, vɛlɛ a wanayaŋ numndoŋ, a kue a num latulu o biyɔɔ niŋ te wa. 17 ‘Nyɛ Chɛhowa, Mɛlɛka puaa chɔuwa dimi wo cho hoo ni: “I cho nda muɛi faŋnde yɔŋ, yiaaŋ, vɛlɛ a naala taŋ waŋnda laŋ,+ nduyɛ mi tosa ma simnuŋ maa fikiima siouwɛi siouwɛiyaŋ, wana nɔla ma de maŋ te.”’+
18 “‘I cho nda tisa kɔɔli a muɛi faŋnde,+ nduyɛ mi tusi nda yima bɛnduaŋ, a naala taŋ waŋnda laŋ choo. Siooŋnde cho masɛi o lɛŋndeŋ choo kpou biyɔɔ a nyɛ ya cho tosa a nda wo.+ I cho nda sendioo handɔɔ choo, nduyɛ mi kɔndɔfillo bii waŋnda, okoŋ ma hɔŋ huiye.+ A cho sɔɔŋ wɔɔŋndoŋ dimi a nda okɔɔ o lɛŋii ya saŋ nda niŋnde kpou.+ 19 Kanifuule, I wa buɛiyaa niaa suaa le ya wa viomɔɔ o nda lo a yooŋgu nuu lediiŋ diiŋ,*+ kɛ a yeŋ nda lani le.’ Ya Chɛhowa dimi lende ni.
“‘Mi la kɛɛ le ya nilaŋ yaŋɔɔ kpooŋ.’+ Ya Chɛhowa dimi lende ni.
20 “Lelaŋ, nya wanaa ya soli Chulusalɛm ma kua a nya o biyɔɔ niŋ Babilɔŋ nda kpou, la yaŋ nilaŋ o nyɛ ya Chɛhowa dimi wo. 21 Nyɛ ya Chɛhowa, Mɛlɛka Isɔluɛiya, Mɛlɛka puaa chɔuwa dimi a Ehaabi po Kolaaya wo, vɛlɛ a Sɛdikaya po Maasɛya wo, a cho nya yooŋgu lachoowaa dimullo o diola nilaŋ niŋndo okɔɔ wo cho hoo ni,+ ‘I cho nda malɔɔ Nɛbukanɛɛsa* masaa le Babilɔŋ o ba, okoŋ mbo diu nda nya o hɔl. 22 Nyɛ cho nda yɔŋnɔŋ ndo cho wa maa tamasi waŋnda Chuda tɛɛŋ kpou, a cho o biyɔɔ niŋ Babilɔŋ nda, le waŋnda sendioo handɔɔ choo. A cho wa dimioo aa: “Maa Chɛhowa tosal num mɛɛ o tosa a Sɛdikaya a Ehaabi yɛ, wanaa masaa le Babilɔŋ tuɛi ya!” 23 Kanifuule ma tosa sɔɔŋ lasiɔmboŋ o Isɔluɛi niŋ,+ ma suunda a laandaa wanaa nda chiɛɛliaŋ nda, nduyɛ ma dimul waŋnda yooŋgu lachoowaa o diola nilaŋ niŋ, mi che bɛɛ o cho ya le vem nda le.+
“‘“Yapilɛ kpe sina ndi ni, nduyɛ I cho lesei.”+ Ya Chɛhowa dimi lende ni.’”
24 “Lelaŋ dimul Siɛmaya,+ wana waa Nɛhɛlam aa, 25 ‘Nyɛ Chɛhowa, Mɛlɛka Isɔluɛiya, Mɛlɛka puaa chɔuwa dimi wo cho hoo ni: “Ma yɔŋ waŋnda yaulaŋ o Chulusalɛm niŋ kpou, o Sɛfanaya+ wana soliaa lasalaa lo, po Maasɛya wo, a o wanaa soliaa lasalaa lo kpou o diola numndaŋ niŋ aa, 26 ‘Chɛhowa siiŋguu num wana soliaa lasalaa o foofo Chɛhoyada wana soliaa lasalaa, le ma chua chilaŋ o chiɛi Chɛhowa wo, nduyɛ ma wa wana o wana cho wana seemɛi mbo wa sɔɔŋ tosaa maa wana suaa le Mɛlɛka wo hɔlteŋ, okoŋ ma wou ndu o kpiɔɔ.+ 27 Mɛɛ le yɛɛnɛ ŋ mallɛ Chɛluimaya fula Anatɔti wo+ mbo wa sɔɔŋ tosaa maa wana suaa le Mɛlɛka wo a sila ndu le?+ 28 Mbo yɔŋ naa pɛŋ yooŋgoo Babilɔŋ, mbo dimi aa: “La cho wa o biyɔɔ niŋ le teleŋ vilɛi! Lelaŋ la taŋgul chiɛilaŋ, nduyɛ mi la wa leniŋ. La tɔl kpelelaŋ, mi la de kɔmnde ndɔleŋ.”’”’”+
29 Mɛɛ Sɛfanaya,+ wana soliaa lasalaa veelu diomndaŋ o yauwo hoo niŋ mi Chɛluimaya wana suaa le Mɛlɛka wo tuɛi, 30 mi Chɛhowa suaa naa Chɛluimaya chua, mbo dimul ndu aa: 31 “Yɔŋ wanaa cho o biyɔɔ niŋnda kpou yooŋgoo ma dimul nda aa, ‘Nyɛ Chɛhowa dimi a Siɛmaya wana waa Nɛhɛlam okɔɔ wo cho hoo ni: “Kanifuule, mi Siɛmaya dimul nya yooŋgoo maa wana suaa le Mɛlɛka wo, le mi la laalaŋ o choolaŋ niŋ, mi che bɛɛ o cho ya le vem ndu le.+ 32 Lelaŋ, nyɛ Chɛhowa dimi wo cho hoo ni, ‘I cho Siɛmaya fula Nɛhɛlam ndo a wanaa fula o pulale ndɔleŋ choo wa nyɛpalaa tusi choo. Wanaa nduaa o pilɛ bɛɛ sɔla niŋ chindaa waŋnda haa tɛɛŋ te. Nduyɛ sɔɔŋ kɛndɛŋ ya cho tosa le wanaa niaa woŋ, o chi niŋ muŋ te. Kanifuule o tosa mi waŋnda simul Chɛhowa. Ya Chɛhowa dimi lende ni.’”’”
30 Mi Chɛhowa suaa naa Chɛluimaya chua, mbo dimul ndu aa: 2 “Nyɛ Chɛhowa, Mɛlɛka Isɔluɛiya dimi wo cho hoo ni, ‘Nyɛ o nyɛ ya cho num dimullo, poonyiaa ndu o yau choo. 3 Kanifuule Chɛhowa dimi aa: “Teleŋ cho fuuluu, mi chuuŋgiaa wanaa niaa Isɔluɛi a Chuda a nda kuɛ o biyɔɔ niŋnda,+ nduyɛ mi miŋgi nda pila o lɛŋnde ya ke finyaa ndaa mamaa leŋ niŋ, okoŋ ma chal vɛlɛ leniŋ.”’”+ Ya Chɛhowa dimi lende ni.
4 Diomndaŋ ndaŋ Chɛhowa dimul waŋnda Isɔluɛi a Chuda ni.
5 Nyɛ Chɛhowa dimi wo cho hoo ni:
“Miŋ tuɛi waŋnda chaŋndaŋ ma nyiiya.
Siooŋii bɛnduei wa ba o ba fee, nduyɛ kɔl nyulu ve le.
6 Yandii nyuna wɔ. Baa wana pɔnɔɔ nɔla pa mbo chua folioo* mbo velu?
Mɛɛ le yɛɛnɛ mi wa chɔɔ laŋgbaa dialuŋ kalaa ma handuŋ balaŋ o ladembe a nyɛ nɛiyaa,
Mɛɛ wana lanɔɔ huŋ nuaa le violɔɔ yɛ?+
Le yɛɛnɛ nya cho yɛ hɔlla nyaandiaa?
7 Kpundɔɔ cho le ya, kanifuule paale leŋ le wa niŋ bɔɔ paale kpundɛ bɛndu.+
Paale kɛ kɛ ve niŋ maa leŋ te,
Teleŋ nyɛpalaa wa niŋ koŋ ni le Chekɔpu.
Kɛ o cho pioŋɔɔ sɔla o paale leŋ choo.”
8 “O paale leŋ choo, I cho yɔm chuaa lawolɔɔ cho num o ikɛsu wo yomɔɔ, mi kili kili yuei nda yii num nde. Fɛɛŋ bɛɛ a simnuŋ lɛ chiɔɔ* le mialla le.” Chɛhowa, Mɛlɛka puaa chɔuwa dimi lende ni. 9 “Wanaa niaa cho ya Chɛhowa Mɛlɛka ndaa piɛi, ma tosa wallo le Deeve masa ndaa, o ya cho yulɔɔ iso le nda wo.”+
10 “Num buɛi nuu Chekɔpu, yɔŋ isiooŋ te.
Num Isɔluɛi, siooŋii bii num te.+
Kanifuule, I cho num piŋi naa ŋ cho landaŋ nda,
Nduyɛ mi piŋi chuauwaa numnda o lɛŋnde nda cho o biyɔɔ niŋndeŋ.+
Chekɔpu cho miiŋgu mbo waŋnuŋ o kɔl nyulu niŋ, nyɛ o nyɛ paaliaŋ lɛ ndu le.
Wana o wana luei lɛ nda isiooŋ te.”+ Ya Chɛhowa dimi lende ni.
11 “Kanifuule I cho a num latulu, le mi piŋi num.
I cho wanaa cho o lɛŋii ya sɛŋi nya niŋnde wa basɔɔ tɛɛ.+
Kɛ nya nya, I cho nya tɛɛmbuu le.+
I cho num sila ŋ nɔ le sɔlaa wo ke.
I mel num niŋ lende mi kɛɛ num nyɛpalaa tusi choo le.”+ Ya Chɛhowa dimi lende ni.
12 Kanifuule nyɛ Chɛhowa dimi wo cho hoo ni:
“Delɔɔ ŋ del hoo wo, a nɔla lɛ ma chɛŋ te,+
Nduyɛ pau numndo siŋgu lɛ le.
13 Wana o wana cho mbo nyɔɔlu le num te.
Nɛi o nɛi cho le mi pau numndo seŋgu le.
Danda kɛ kɛ cho le ma seŋgu le.
14 Samaa numnda kpou puɛɛnuŋ a num okɔɔ.+
A nɔ lɛ iyeema le num chɔ le.
Kanifuule, I soŋ num a sioŋnde nda suaŋ yaamɔɔnɔɔ leŋ,+
Nduyɛ mi tusi num nyɛpalaa choo mɛɛ nda tusi nuaa wana dɛnɛ wɔɔŋndo nyɛpalaa choo yɛ,
Le mɛɛ ŋ tosa hakilaŋ tau tau yɛ.+
15 Le yɛɛnɛ ŋ cho yɛ chaŋndo le pau cho numndo?
Nyɛ nɛiyaa numndo siŋgu le!
Le mɛɛ ŋ tosa hakilaŋ tau tau yɛ,+
Ya tosa hei a num ni.
16 Lelaŋ wana o wana cho num tɛɛmbuuwo, I cho nda tɛɛmbuu.+
Nduyɛ yaamɔɔwaa numnda kpou cho lakɔ o biyɔɔ niŋ.+
Wanaa cho nyɛm numndoŋ puŋgaa wa, a cho nyɛm ndaŋ puŋga.
Wanaa cho nyɛm numndoŋ puŋgaa wa kpou, I cho nda malɔɔ wanaa puŋga nyɔɔŋ nda o ba.”+
17 “Kɛ I cho boolɔŋnda numndaŋ siŋgi ma miiŋgu kɛndiaa,+
Mi che bɛɛ a veelu num aa wana nda kɛɛ wo. Ma wa dimioo aa:
‘Saayɔŋ chiee wana o wana nɔ iyeema le lakɔ leniŋ te wo.’”+ Ya Chɛhowa dimi lende ni.
18 Nyɛ Chɛhowa dimi wo cho hoo ni:
“I cho wanaa cho o biyɔɔ niŋ o tɛndiila Chekɔpu laŋ niŋnda chuuŋgiaa naapilɛ.+
Nduyɛ, I cho tɛndiila ndɔlaŋ tuiinɔŋ inyiɛɛ.
Chioo cho miiŋgu taŋgulɔŋ o bembela ndɔlaŋ choo,+
Nduyɛ a cho bandu kala kalaa taŋgul o fondaŋ o wa paandu wo.
19 A cho wa chonduŋ balika melaŋ solioo, nduyɛ ma wa bɔɔluuwo a mamɔɔ.+
I cho tosa ma kui tau tau, a dɔɔnaŋ niŋ te.+
20 Puaa nduaa cho miiŋgu mɛɛ nda wa o paandoo niŋ yɛ,
Nduyɛ I cho tosa ma simnuŋ wanaa dialuŋ kala ya o hɔl.+
I cho yaamɔɔwaa nduaa kpou nyɛpalaa tusi choo.+
21 Wana pilɛ o wanaa nduaa tɛɛŋ cho simnɔŋ wana tɔɔ,
Nduyɛ mi masaa fula o ndu niŋ.
I cho tosa mbo sɔɔŋguu ya ikɛi.”
“Te o cho ndu le, nɛɛ cheleŋ bii yɛ kɔllo mbo sɔɔŋguu ya ikɛi?” Ya Chɛhowa dimi lende ni.
22 “La cho simnɔŋ wanaa niaa,+ mi ya simnuŋ Mɛlɛka nyaa.”+
23 Hueiyii tɔɔmɛi bɛnduii Chɛhowa ve cho wa hɔŋndo ifuku fukuei.+
I cho wanaa dɛnɛ wɔɔŋnda hɔŋ choo, mɛɛ hueiyii feleŋfeleŋnde hɔŋ nuaa yɛ.
24 Kɔl tuu ŋama ŋama Chɛhowa dɔɔnuŋ ndo cho pɔlul te,
Haaa mbo tosa nyɛ o kɛɛsiaŋ o kɔl le tosaa wo.+
O palɛi mɛɛlɛi niŋ kpɔŋ nya cho hei biyɔɔ bila ni.+
31 “A teleŋ koŋ, I cho simnɔŋ Mɛlɛka le waŋnda o Isɔluɛi niŋ kpou, nduyɛ mi nda bɛɛ simnuŋ wanaa niaa.”+ Ya Chɛhowa dimi lende ni.
2 Nyɛ Chɛhowa dimi wo cho hoo ni:
“Wanaa hɛluŋ muɛi faŋnde wa, ma tuiinuŋ nda inyiɛɛ o pollo niŋ,
Mɛɛ Isɔluɛiya wa kɔlaŋ o fondaŋ nda pɛŋgiaa.”
3 I wa o fondaŋ levillo, mi Chɛhowa chɔɔmuŋ ya mbo dimi aa:
“Mi kaala num kaala cho le fɛɛŋ a fɛɛŋ ndo.
Le saboo hoo ya soliŋ kaala lo lechoo wo kpeku ni, mi sɔɔŋguŋ num ya ikɛi.*+
4 Num yufuaanɔɔ Isɔluɛi, I cho num vɛlɛ miŋgi taŋgul ma sim yi.+
5 A cho vɛlɛ kilepiima numndaŋ tɔlɔɔ o pembuŋ bɛndoŋ Sameeliaa.+
Wanaa cho maŋ tɔlɔɔ wa cho maŋ dio, ma tuei maŋ yeela.+
6 Teleŋ cho fuuluu mi wanaa mɛŋgɛlaa cho o pembuŋ bɛndoŋ Ifiluem choo wa veelu choo choo aa:
‘La chɔŋ miŋ kuɛŋnuŋ Saayɔŋ o Chɛhowa Mɛlɛka naa lo.’”+
7 Kanifuule, nyɛ Chɛhowa dimi wo cho hoo ni:
“La mɛli yeelaŋ choo choo le mi Chekɔpu sina maa la cho a kɔl kɛndɛ.
La deŋi a nyaaloo le mɛɛ lɛŋnde cho nya o ba bɛŋgu yɛ.+
La yonda a ndi okɔɔ, la saŋgala Mɛlɛka mi la dimi aa:
‘Oo Chɛhowa, piŋi wanaa numnda, wanaa lo haa yoomu o Isɔluɛi niŋnda.’+
8 I cho nda soli o lɛŋndeŋ ba luaŋ ndo, mi hiŋ a nda pila.+
I cho nda soli o fondaŋnda cho landaŋ o lɛŋndeŋ choo laŋ, mi chuuŋgiaa nda naapilɛ.+
Wanaa sumɛiya a namtaa cho nda wa tɛɛŋ,+
Wanaa lafoliaa* a wanaa cho niŋ le violɔɔ wa kpou, I cho nda chuuŋgiaa naapilɛ.
A cho miiŋgu nanuŋ kunda bɛndu bɛndoo.+
9 A cho wa hunɔɔ a chaŋndo.+
I cho wa hunɔɔ a nda ma nyɔɔlu ya le mi tuiinuŋ nda inyiɛɛ.
Kanifuule ya cho Finyaa le Isɔluɛi ni, nduyɛ Ifiluem cho po ni tasoo ni.”+
10 Nya waŋnda o lɛŋnde niŋ, la yaŋ nilaŋ o nyɛ Chɛhowa dimi wo,
Okoŋ mi la yonda a ndi okɔɔ, o lɛŋii mɛŋndaŋ ma balu mi i wa landaŋ nde niŋ aa:+
“Wana saŋ Isɔluɛi yo cho ndu vɛlɛ chuuŋgiaa naapilɛ.
O cho ndu wa hɔlteŋ choo mɛɛ wana mandaa lasaa wa nuaa saa nduaa hɔlteŋ choo yɛ.+
12 A cho hunɔɔ ma deŋi choo choo a nyaaloo o pembii Saayɔŋ nde tullo.+
Nduyɛ a cho yɔŋnɔŋ niŋgili niŋgili le sɔɔŋ kɛndɛŋ Chɛhowa cho wa nda tosallo woŋ,
Kuluŋ ndaŋ, muɛima ndama sɛnɛiyaŋ,+ chuɛima ndaŋ,
Saa ndaa fonduaa, a nauwaa ndaa.+
13 “A teleŋ koŋ, yufuaanɔɔ cho wa yolaŋ a kɔl kɛndɔɔ,
Latulu a puaa feleŋguaa vɛlɛ a falaa yuuwa.+
I cho tosa mi kɔl nda tambɛiyo miiŋgu kɔl kɛndɔɔ.+
I cho nda kɔltaŋ dɛɛniaa nduyɛ mi tosa ma wa a nyaale, a bii lɛ imɔnɔ le.+
14 I cho tosa mi wanaa soliaa lasalaa sɔla nyɔɔŋ tau tau* ma hini kɔl,
Nduyɛ mi ke wanaa niaa nyɛm kɛndɔŋ ma hini kɔl mɛɛ.”+ Ya Chɛhowa dimi lende ni.
15 “Nyɛ Chɛhowa dimi wo cho hoo ni:
‘Waŋndo mal yioo kpeleŋ Luama chiee.+ Chaŋ imɔnɔɔ a yeela bɛndulaŋ la cho suɛi.
Luechɛɛ cho puaa* nduaa chaŋndo ni.+
O nyɔɔluŋ te,
Kanifuule puaa nduaa chuu paku.’”+
16 Nyɛ Chɛhowa dimi wo cho hoo ni:
“‘Mei chaŋndo, ma wɔɔsuu mɛmɛma cho num o hɔl laŋ,
Kanifuule a cho fandaa sɔla le nyɛ ŋ tosa wo.
Puaa numnda cho miiŋgu o lɛŋnde yaamɔɔnɔ ndaa niŋ.’+ Ya Chɛhowa dimi lende ni.
17 ‘A nɔ tiindaŋndo le chilaŋ,+
Nduyɛ puaa numnda cho miiŋgu o tanda ndaa niŋ.’”+ Ya Chɛhowa dimi lende ni.
18 “I tuei kɛsɛ ŋɔɔchiaŋnda Ifiluem cho laŋ, mbo dimi aa,
‘A sila ya mi miiŋgu o nɛi,
Mɛɛ nau fɔŋndɔ nda pɛɛku le wo cho nuaa yɛ.
Miŋgi ya pila, nduyɛ I cho o bɛɛndiaŋ le mi miiŋgu,
Kanifuule num cho Chɛhowa Mɛlɛka nuu ni.
19 Mi kial suei le nyɛ ya tosa wo, nduyɛ mi mulul yɔŋ ni wɔɔŋndo kɔɔ.+
Mɛɛ ya bii nyɛ ya tosa wo bila, mi luaa lɔlulaŋ o mɔnɛi bɛnduei niŋ.
Mi siɔmbulaŋ la bii ya, nduyɛ mi tambu labɛɛ,+
Kanifuule mi siɔmbulaŋ la bii ya le hakila ya tosa o feleŋgɔyɛi nii niŋ ndaŋ.’”
20 “Ifiluem cho po sɔviɔɔ le ya ni, po ni kaalaa.+
Te I wa ndu pɛ silaa le ndu miŋgioo o nɛi, mi loonuŋndɔ a ndu kɛ.
Le saboo hoo yeemɛi nduɛi bii ya tau ni.+
A tonya, I cho ndu tuiinɔŋ inyiɛɛ.” Ya Chɛhowa dimi lende ni.+
21 “Handu tamasilaŋ o nɛi le numpila,
Nduyɛ ma simi nyɔɔ maa tamasi.+
Kɛsi kɔllo o nɛi bɛndu ŋ nɔ le kɔlaŋ ndo choo.+
Oo yufuaanɔɔ Isɔluɛi, miiŋgu o chieeŋ num bɛndoŋ niŋ.
22 Num chua laandu kɛɛ hoo lo lechoo wo chɔmndo wo, le vɛɛ kpɛ ŋ cho yɛ hiouwɔɔ lachi a kiisaŋndo nɔɔ?
Kanifuule suɛi sɛnɛi Chɛhowa tosa o lɛŋndeŋ choo ve cho hei ni:
Wana lanɔɔ cho wa iloko lokuei wana pɔnɔɔ kɔɔli.”
23 Nyɛ Chɛhowa, Mɛlɛka puaa chɔuwa, Mɛlɛka Isɔluɛiya dimi wo cho hoo ni: “Te I miŋgi pɛ wanaa ndaa nda kuɛ o biyɔɔ niŋnda pila o lɛŋnde Chuda leŋ niŋ, a o chieeŋ ndaŋ bɛndoŋ niŋ, diomnda nda cho vɛlɛ dimi laŋ la cho laŋ ni: ‘Num fondaŋ sandei cho hei leniŋ ndo,+ num pembii diandɛi,+ maa Chɛhowa dɔu num sala.’ 24 Loŋ waŋnda Chuda a chieeŋ ndɔŋ bɛndoŋ kpou cho wa ichali diompilɛ ni, wanaa tosa wali ichiɔɔ wa, a wanaa mandaa lasaa.+ 25 Kanifuule I cho wanaa cho a saŋgɛiya yoomuaŋ luei, nduyɛ mi ke wanaa cho o saŋgaa niŋnda nyɛm nda hauba woŋ.”+
26 Okoŋ mi tiandu, mi kumbi hɔlla. Nduyɛ mi tuɛi luaŋ yeela tau.
27 “Tofawɔ! Teleŋ cho fuuluu, I cho tosa mi waŋnda Isɔluɛi a waŋnda Chuda kui tau tau, nduyɛ mi chɔluaa ndaa bɛɛ kui tau tau.”+ Ya Chɛhowa dimi lende ni.
28 “Mɛɛ ya handu nda hɔlteŋ kɔɔli le nda suŋgɔɔ, mi tusi nda, mi sɛɛsiaa nda, mi tɛɛmbuu nda, nduyɛ mi tusi nda nyɛpalaa choo yɛ,+ lende koni ya cho nda hɔlteŋ handɔɔ choo ni le mi taŋgul nda nduyɛ mi tɔl nda.”+ Ya Chɛhowa dimi lende ni. 29 “A teleŋ koŋ, a dimi niŋ nuaa aa, ‘Finyaa de kilepiima waalɛiyaŋ, kɛ puaa ndaa chiŋndoŋ waala* ni’ le.+ 30 Kɛ wana o wana cho piɔmndo sɔla le haki ndɔɔ. Wana o wana de pɛ kilepiima waalɛiyaŋ, ndu chiŋndoŋ cho waala ni.”
31 “Yaŋ nilaŋ! Teleŋ cho fuuluu, I cho kpema sɛnɛiyo yii a waŋnda Isɔluɛi vɛlɛ a waŋnda Chuda.”+ Ya Chɛhowa dimi lende ni. 32 “Kpema koŋ ve niŋ maa kpema ya yii a finyaa ndaa mamaa, paale ya saa nda baa mi soli nda o lɛŋnde Ichipi leŋ niŋndo le,+ ‘kpema ni nda tɛɛmbuu wo,+ mi che bɛɛ ya wa masanɔ nda* kpeekpeiyo ni.’ Ya Chɛhowa dimi lende ni.”
33 “Kanifuule te teleŋ koŋ hiou pɛ, kpema ya cho yii a waŋnda Isɔluɛiyo cho hoo ni. I cho nda sawa nuu dɔwɔɔ niŋ,+ nduyɛ mi poonyiaa ndu nda o lakɔl.+ I cho simnɔŋ Mɛlɛka ndaa, mi nda bɛɛ simnuŋ wanaa niaa.”+ Ya Chɛhowa dimi lende ni.
34 “Wana o wana pɛɛku niŋ wana nda chiɛɛliaŋ ndo ɔɔ wanayɛi nduɛi, mbo dimul ndu aa, ‘Sina Chɛhowa!’+ le. Kanifuule nda kpou cho ya sina, chuaambɔ ni, kaasoŋnɔ ni.+ I cho nda malɔɔ haki le biondɔŋnda ndalaŋ, nduyɛ fɛɛŋ bɛɛ I loonuŋ lɛ a hakila ndalaŋ te.”+ Ya Chɛhowa dimi lende ni.
35 Chɛhowa, Mɛlɛka yɔŋgu nyɛ teŋgaa ipala wo,
Mɛlɛka yɔŋgu paŋgei a looŋ sawalaŋ le miŋ yɔŋgu nyɛ teŋgaa ichɔl lo,
O tosa mi pee mɛŋma ihɛllo kalaŋiaŋ nduyɛ mbo muuluŋ yokpaŋ yokpaŋ ndo,
O nɔ diolaŋ aa Chɛhowa, Mɛlɛka puaa chɔuwa wo,+
Nyɛ o dimi wo cho hoo ni:
36 “‘Te sawala ya kɛsul nyɔɔŋ muŋ ndaŋ la tambu pɛ,
Mɛɛ kaaleŋ Isɔluɛi bɛɛ cho ya faŋaŋ o hɔl le fɛɛŋ a fɛɛŋ.’”+ Ya Chɛhowa dimi lende ni.
37 Nyɛ Chɛhowa dimi wo cho hoo ni: “‘Te wana nɔla pɛ ma tuu choo choo nduyɛ ma sina a suŋgbuma saa chieeŋndo waŋ okɔɔ, mɛɛ I cho waŋnda Isɔluɛi kɛɛ le sɔɔŋ wɔɔŋ nda tosa woŋ kpou.’ Ya Chɛhowa dimi lende ni.”+
38 “La yaŋ nilaŋ! Teleŋ cho fuuluu ma taŋgul chioo+ le Chɛhowa, chɔŋ o Bandoo Hananɛɛ+ kɔ o Dio Kpakioo o Sɔŋgioo.”+ Ya Chɛhowa dimi lende ni. 39 “Yoole tuwaaleŋ+ le cho lakɔ sakpo o pembii pɔmbuɛi Keluɛbi, mi le muliŋ kpeŋgii Kowaa ve. 40 Chɔŋ o kpoloŋ* nda viau dialuŋ vilɛiyoŋ a pultaŋ ndo kpou, mbo kuɛ a yondo holnuŋ Kpoloŋndo Kidilɔŋ ndo kpou,+ haaa kɔ o sɔŋgi Dio Kpaki Suaa+ ba paaleŋ le chaŋ ndo, o cho simnɔŋ nyɛ diandaa le Chɛhowa.+ Fɛɛŋ bɛɛ o sɔla lɛ tambei mbo piɔl wɔ wɔ le.”
32 Wɔsi 10 ndɔ Sɛdikaya, masaa le Chuda wa o masaleŋ choo wo, koŋ cho ni, wɔsi 18 ndɔ Nɛbukanɛɛsa* wa o masaleŋ choo wo,+ mi Chɛhowa suaa naa Chɛluimaya chua. 2 A teleŋ koŋ, puaa chɔuwaa masaa le Babilɔŋ nda wa Chulusalɛm lueiyo o piŋndo niŋ. Nduyɛ Chɛluimaya, wana suaa le Mɛlɛka wo wa o biyɔɔ niŋ o Luŋ Wanaa Manda masaa+ le Chuda Wa niŋ. 3 Kanifuule Sɛdikaya masaa le Chuda bii ndu ni mbo kɛsi ndu loŋ,+ mbo dimi aa: “Le yɛɛnɛ ŋ cho yɛ yooŋgu waa nuaa dimioo? A dimi aa, ‘Nyɛ Chɛhowa dimi wo cho hoo ni: “I cho chioo hoo malɔɔ masaa le Babilɔŋ o ba, mbo bii ndu.+ 4 Nduyɛ Sɛdikaya masaa le Chuda heluŋ niŋ Kaadiaŋnda o ba le. Kanifuule a cho ndu malɔɔ masaa le Babilɔŋ o ba, ma chaŋnaŋ, okoŋ mbo suukaŋ a ndu hɔlla a hɔlla.”’+ 5 ‘O cho lakɔ a Sɛdikaya Babilɔŋ, nduyɛ mbo lo loŋ haaa mi mulul ndu hɔlla. Mi che bɛɛ a cho hiouwɔɔ lachi a sɔŋgaa a Kaadiaŋnda, kɛ a cho batiuwaa sɔla le.’”+ Ya Chɛhowa dimi lende ni.
6 Mi Chɛluimaya dimi aa: “Nyɛ Chɛhowa dimul la wo cho hoo ni, 7 ‘Hanamɛɛ po Sialum finya num pɔmbɔ wo cho hunɔɔ naa num chua mbo dimul num aa: “Piondu lɛŋnde nileŋ Anatɔti,+ kanifuule num cho wana tase nɔ dioo le leŋ baŋaa wo ni.”’”+
8 Okoŋ mi Hanamɛɛ po finya ni pɔmbɔɔ huŋ naa ya chua, o Luŋ Wanaa Manda Masaa Wa a mɛɛ Chɛhowa dimi yɛ. Mbo dimul la aa: “A yandii, piondu lɛŋnde nileŋ Anatɔti, o tanda Bɛŋjamiŋ ndo niŋ. Kanifuule, num cho wana nɔ dioo le leŋ baŋaa mbo loo leŋ ndo ni.” Okoŋ mi sina kɛsɛ maa Chɛhowa kɛɛsiaa hei ni.
9 Mi piandu lɛŋndeŋ Anatɔti, Hanamɛɛ po finya ni pɔmbɔɔ o ba. Mi tuu kanioŋ*+ Siɛkɛlloŋ ŋɔmmɛu* a kaniŋ humboŋ 10 mi ke ndu. 10 Okoŋ mi veelu seiya+ miŋ toosiaa yaula lelɛŋndaŋ,+ mi pila suei, nduyɛ mi tuu kanioŋ o sekeleiyo choo. 11 Mi chua yau ya pendu lɛŋndeŋ mi pila suei a mɛɛ sawalaŋ la dimi yɛ wo, latulu a yau ya pila iso le wo. 12 Mi chua yau ya pendu lɛŋndeŋ ndo, mi ke Baluki+ po Nɛluaya wo,+ Hanamɛɛ po finya ni pɔmbɔɔ o hɔl. Baluki yɛ, finya ndɔ mama wa Masɛya ni. Nduyɛ seiyaa pila suei o yau lelɛŋndo choo wa, a Chuuwaa wa ichali o Luŋ Wanaa Manda Masaa Wa kpou bɛɛ wa loŋ.+
13 Mi dimul Baluki nda kpou o hɔl aa: 14 “Nyɛ Chɛhowa, Mɛlɛka puaa chɔuwa, Mɛlɛka Isɔluɛiya dimi wo cho hoo ni, ‘Chua yau lelɛŋ naŋ pila sueiyo, a o naŋ pila iso le wo, ma wou laŋ o nyɛi laandii nda toosiaa a puuloo ve niŋ, le mi la wa la kɛsiaa le teleŋ vilɛi.’ 15 Kanifuule nyɛ Chɛhowa, Mɛlɛka puaa chɔuwa, Mɛlɛka Isɔluɛiya dimi wo cho hoo ni, ‘Waŋnda cho vɛlɛ miŋgi chiɛilaŋ, lɛŋnde, a kpelela makilepiilaŋ piondɔɔ o lɛŋndeŋ ndeŋ niŋ.’”+
16 Okoŋ mi piɛi o Chɛhowa lo mɛɛ ya ke Baluki po Nɛluaya wo yaula lelɛŋndaŋ. Mi dimi aa: 17 “Oo Chɛhowa, Mɛlɛka Kpuluŋguma Bɛndoo! Tofawɔ! Num toosiaa choo choo a lɛŋndeŋ ni a ba num kpaaya bɛndoo.+ Nyɛ o nyɛ cho ma bumba ndu tosa le. 18 Ma chɔm waŋnda o waalaŋ niŋ kaala lo lechoo wo, kɛ ma tusi chuauwa nyɛpalaa choo le hakila finyaa ndaa tosa laŋ.+ Num cho Mɛlɛka tonyaa ni, Mɛlɛka bɛndoo, a Mɛlɛka kpaaya kpou kpou wo. Diola numndaŋ la cho Chɛhowa, Mɛlɛka puaa chɔuwa ni. 19 Silala numndaŋ la cho silala kɔndɔfili bɛndu, nduyɛ sɔɔŋ ŋ tosa woŋ cho bɔɔ sɔɔŋ kɔndɔfili.+ Ma mɛɛndaŋ kelala waŋnda chieeya kpou,+ nduyɛ ma paawa* wana o wana a mɛɛ kelala ndɔlaŋ la cho yɛ, vɛlɛ a mɛɛ o tosa sɔɔŋ yɛ.+ 20 Ma tosa kaamaalaŋ a sɔɔŋ kɔndɔfilloŋ o lɛŋnde Ichipi leŋ niŋ, nduyɛ haaa a paale hauleŋ ndeŋ waŋnda cho suɛi a muŋ okɔɔ. Okoŋ mi diola numndaŋ la fula tɔɔ o Isɔluɛi niŋ vɛlɛ a o chieeŋndo choo kpou,+ a mɛɛ i cho hau nuaa yɛ. 21 Ma soli wanaa numnda Isɔluɛiya o lɛŋnde Ichipi leŋ niŋ a kaamaalaŋ, sɔɔŋ kɔndɔfilloŋ, ba num kpaaya bɛndoo, vɛlɛ a sɔɔŋ ŋsiooŋndoŋ.+
22 “Mɛɛ teleŋ tiŋ hiou, ma ke nda lɛŋndeŋ ndeŋ, lɛŋnde ŋ mɛnaŋ o finyaa ndaa mamaa lo le nda kioo leŋ,+ lɛŋnde milikiiyaŋ* a liaaŋ ma cho taaliaa leniŋ ndeŋ.+ 23 Okoŋ ma huŋ o lɛŋndeŋ ndeŋ niŋ, ma siiŋguu leŋ nyɛm kɛŋ nda. Kɛ a diikuŋ nyɛ ŋ dimul nda wo ɔɔ ma kuɛ o sawala numndaŋ choo le. Nyɛ o nyɛ ŋ dimul nda le tosaa, a tosa le. Lelaŋ ŋ tusi nda kpundɛlaŋ ndaŋ kpou choo ni.+ 24 Nuawɔ! Puaa hiŋ ma huŋ dɔu chioo o piŋndo niŋ le ma bii ndu.+ Nduyɛ muɛi faŋnde,+ yima bɛnduaŋ, a naala taŋ waŋnda laŋ+ la cho tosaa mi Kaadiaŋaa chiŋalaŋ chioo hoo wa bii ndu. A mɛɛ ŋ cho chɔɔ yɛ, nyɛ ŋ dimi wo kpou yɔŋnuŋ hoo ni. 25 Kɛ num Oo Chɛhowa, Mɛlɛka Kpuluŋguma Bɛndoo, mi che bɛɛ maa Kaadiaŋnda cho chioo hoo biyɔɔ, kɛ ma dimul la aa, ‘Piondu lɛŋndeŋ le numpila a kaniei nduyɛ ma veelu seiya.’”
26 Okoŋ mi Chɛhowa suaa naa Chɛluimaya chua, mbo dimul ndu aa: 27 “Ya cho Chɛhowa ni, Mɛlɛka waŋnda chieeya kpou. Baa nyɛ cho pa mi bumba ndu tosa? 28 Lelaŋ, nyɛ Chɛhowa dimi wo cho hoo ni, ‘I cho chioo hoo malɔɔ Kaadiaŋnda, vɛlɛ a Nɛbukanɛɛsa* masaa le Babilɔŋ o ba mbo bii ndu.+ 29 Nduyɛ Kaadiaŋaa chiŋalaŋ chioo hoo wa cho luɛiyɔɔ ma mal ndu o yiŋ,+ ma lom ndu latulu a chiɛila nda hel o tullo ma soli salalaŋ o Baal lo laŋ, vɛlɛ a la nda soli salala mamuɛilaŋ o mɛlɛkaa cheleŋnda lo le ya kɔllo tɛɛmbuuwo laŋ.’+
30 “‘Kanifuule chɔŋ o feleŋgɔyɛi ndɛi niŋ haaa huŋ bii a hau, nyɛ bɛnda ya o hɔl te wo kinɛi waŋnda Isɔluɛi a Chuda tosa ni.+ Waŋnda Isɔluɛi cho hiouwɔɔ lachi a ya kɔllo tɛɛmbuuwo a sɔɔŋ nda tosa a bala ndalaŋ ndoŋ.’ Ya Chɛhowa dimi lende ni. 31 ‘Chioo hoo ndu, chɔŋ a teleŋ nda taŋgul ndu wo haaa huŋ bii a paale hauleŋ ndeŋ, sɔɔŋ tosa mi dɔɔnuŋ tumbe o kala kala woŋ kinɛi o tosa ni.+ Lelaŋ I cho ndu faŋa ya o hɔl,+ 32 le sɔɔŋ wɔɔŋ waŋnda Isɔluɛi a waŋnda Chuda tosa le ya kɔllo tɛɛmbuuwo woŋ kpou. Nda ni, masaa ndaa ni,+ laŋgbaa ndaa kalla ni,+ wanaa ndaa soliaa lasalaa, wanaa ndaa suaa le Mɛlɛka wa,+ puaa Chuda, vɛlɛ a waŋnda Chulusalɛm. 33 Mi che bɛɛ mi kindiŋ le nda pɛɛkoo lediiŋ diiŋ,* kɛ ma hiau lachi a ya kɔɔ mulul lo, a mulul la hɔlla le.+ Nduyɛ wana o wana yeŋ lani mbo sɔla silaa le.+ 34 Ma luei piɔmaa ndaa nɔɔlɛiya o chiɛi diola nilaŋ la cho choo wo niŋ le ndu nɔɔliaa.+ 35 Okoŋ kɔɔli, ma taŋgul fondaŋnda filioŋndaŋ le Baal o Kpoloŋ Po Hinɔm Ndo,*+ le halikpeŋ ma soli puaa ndaa a chuauwaa ndaa laanduaa salaa o yiŋ o Molɛki lo.+ O cho ya le vem nda keŋ tosaa le.+ Nduyɛ paale pilɛ bɛɛ keŋ hiŋ ya o kɔl* le suɛi nɔɔlɛi waa nuaa tosaa, le mi waŋnda Chuda tosa hakioo le.’
36 La dimi a chioo hoo okɔɔ maa masaa Babilɔŋ cho ndu delɔɔ choo a muɛi faŋnde, nduyɛ mi yima bɛnduaŋ a naa taŋ wɔɔŋnda wo diu wanaa cho leniŋ nda. “Lelaŋ nyɛ Chɛhowa, Mɛlɛka Isɔluɛiya dimi a ndu okɔɔ wo cho hoo ni: 37 ‘Wanaa ya dɔɔnuŋ haa tumbe a nda nduyɛ mi sɛŋi nda o lɛŋnde niŋ kpou a kɔl ni tuu bɛndoo wa, I cho nda chuuŋgiaa naapilɛ,+ nduyɛ mi miŋgi nda pila o fondaa hoo, ma waŋnuŋ hɛnɛkɛ.+ 38 A cho wa wanaa niaa, mi ya simnuŋ Mɛlɛka ndaa.+ 39 I cho tosa ma nɔ yiyaŋ pilɔɔ,+ nduyɛ ma kuɛ o nɛi pilɔɔ choo, le halikpeŋ ma nɔ siooŋii nii le teleŋ o teleŋ. Okoŋ mi sɔɔŋ wa ŋ kɛndɛ a nda vɛlɛ a chuauwaa ndaa.+ 40 I cho kpema cho le fɛɛŋ a fɛɛŋ ndo yii a nda,+ nduyɛ I kɛɛ niŋ le nda sɔɔŋ kɛndɔŋ tosallo le.+ I cho nda siooŋii nii dɔwɔɔ o lakɔl, yɔŋii nda mulul la kɔɔ.+ 41 I cho wa a kɔl kɛndɛ le nda, nduyɛ mi tosal nda sɔɔŋ kɛndɔŋ a kɔl nuu kpou vɛlɛ a yoomu* nuu kpou.+ I cho nda tɔlɔɔ ma sim yi o lɛŋndeŋ ndeŋ niŋ.’”+
42 “Nyɛ Chɛhowa dimi wo cho hoo ni, ‘Mɛɛ ya tusi waŋnda haa kpundɛla bɛŋndaŋ ndaŋ choo kpou yɛ, lende koni ya cho nda sɔɔŋ kɛndɛŋ ya chuel nda buŋgɛi yoŋ kpou tosal ni.+ 43 Waŋnda cho vɛlɛ lɛŋnde piondɔɔ o lɛŋndeŋ ndeŋ niŋ,+ mi che bɛɛ mi la wa dimioo a leŋ okɔɔ aa: “Lɛŋnde vesɛile wanachiee a visi cho leniŋ te leŋ le cho ni, nduyɛ maa a mal teŋ Kaadiaŋnda o ba.”’
44 “‘Waŋnda cho wa lɛŋnde piondɔɔ a kanioŋ, ma toosiaa yaula lelɛŋndaŋ, nduyɛ ma veelu seiya le ma pila suei. Hei cho wa yɔŋnɔŋndo o lɛŋnde Bɛŋjamiŋ ndeŋ niŋ,+ o fondaŋnda balu Chulusalɛm ndaŋ niŋ, o chieeŋ bɛndoŋ Chuda niŋ,+ o chieeŋ bɛnduŋ cho o tanda ŋpemboo woŋ niŋ, o chieeŋ bɛndoŋ o lɛŋnde dɛŋgbɛ leŋ niŋ,+ a o chieeŋ bɛndoŋ ba tou wo. Kanifuule, I cho wanaa ndaa kuɛ o biyɔɔ niŋnda miŋgi pila.’+ Ya Chɛhowa dimi lende ni.”
33 Teleŋ Chɛluimaya wa o biyɔɔ niŋ o Luŋ Wanaa Manda Masaa Wa wo, mi Chɛhowa suaa naa ndu chua teleŋ diiŋ ndɔɔ.+ Mbo dimi aa: 2 “Chɛhowa, Mɛlɛka toosiaa lɛŋndeŋ mbo simi leŋ yi wo, diola ndɔlaŋ la cho Chɛhowa ni. Nyɛ ndu Chɛhowa dimi wo cho hoo ni: 3 ‘Te a veelu ya pɛ, I cho num mulul. Nduyɛ I cho o bɛɛndiaŋ le mi chɔm num sɔɔŋ kɔndɔfiliŋ bɛnduŋ ŋ biiyɔ bila le woŋ.’”+
4 “Nyɛ Chɛhowa, Mɛlɛka Isɔluɛiya dimi a chiɛila chioo hoo, vɛlɛ a chiɛila lemasalaŋ o Chuda niŋ okɔɔ wo cho hoo ni, la nda pesi pesi le wanaa dɔu chioo o piŋndo niŋnda vɛlɛ a muɛi faŋnde simullo laŋ.+ 5 A tonya, wanaa cho hunɔɔ Kaadiaŋnda chiŋalaŋ a sɔŋgɔɔ, ma pei chiɛilaŋ ndaŋ cha cha a waŋ vilɛiya wa, a ya cho diu diu o kɔl ni tuu bɛndoo niŋ le dɛnɛ wɔɔŋ nda tosa mi viŋ chioo hoo hɔlla wo, nyɛ ya dimi a nda okɔɔ wo cho hoo ni: 6 ‘I cho chioo hoo siŋgi, mbo miiŋgu kɛndiaa.+ I cho wanaa cho leniŋ nda siŋgi, mi ke nda kɔl nyuloo a tonyaa o hɔbɛi.+ 7 Wanaa wa Chuda a Chulusalɛm ma kua a nda o biyɔɔ niŋnda,+ I cho nda miŋgi pila, nduyɛ mi taŋgul nda mɛɛ nda wa o tasela ndɔ yɛ.+ 8 I cho nda dindi le hakila nda tosal la laŋ kpou,+ nduyɛ mi mal nda haki le hakilaŋ vɛlɛ a biondɔŋnda nda tosal la laŋ.+ 9 Chioo hoo cho tosa mi fula tɔɔ, nduyɛ mi sɔla saŋgalaa a bɛɛleŋ, te lɛŋnde o chieeŋndo choo kpou tuei pɛ a sɔɔŋ kɛndɛŋ ya tosal wanaa niaa woŋ okɔɔ.+ A cho nyiiya a siooŋnde+ le sɔɔŋ kɛndɛŋ ya tosa le chioo hoo woŋ, vɛlɛ a kɔl nyulu o nɔ wo.’”+
10 “Nyɛ Chɛhowa dimi wo cho hoo ni: ‘Fondaŋ nya cho hoo hunɔɔ dimi maa o simnuŋ pollo, wanachiee ɔɔ visi cho loŋ te wo, nduyɛ maa chieeŋ bɛndoŋ Chuda a nɛila bɛndulaŋ Chulusalɛm la simnuŋ pollo, wanachiee ɔɔ chɔlu cho loŋ te wo, la cho vɛlɛ tueiyɔɔ 11 bɔɔluu nyaaloo a bɔɔluu kɔl kɛndɔɔ,+ nduyɛ mi la tuei bɔɔluu wana chua lanɔɔ sɛnɛiyo nda laa ndɔ. Waŋnda cho wa vɛlɛ dimioo aa: “La mel Chɛhowa, Mɛlɛka puaa chɔuwa balikaa, kanifuule Chɛhowa cho wana kɛndɛ.+ Kaala lo lechoo ndɔɔ cho le fɛɛŋ a fɛɛŋ!”’+
“‘A cho hunɔɔ a salala balika melaa laŋ o chiɛi Chɛhowa wo.+ Kanifuule, I cho wanaa wa o biyɔɔ niŋnda miŋgi pila o lɛŋnde ndaleŋ niŋ maa paandu.’ Chɛhowa dimi lende ni.”
12 “Nyɛ Chɛhowa, Mɛlɛka puaa chɔuwa dimi wo cho hoo ni: ‘Billo cho vɛlɛ wulɔɔ o lɛŋnde polteŋ ndeŋ niŋ, naa wanachiee ɔɔ chɔlu cho le wa, a o chieeŋ ndɔŋ bɛndoŋ niŋ kpou, le mi wanaa mandaa lasaa sɔla naa nda kua a chɔluaa ndaa le pɛŋgioo wa.’+
13 “‘Chieeŋ bɛnduŋ cho o tanda ŋpemboo niŋndoŋ, chieeŋ bɛnduŋ cho o lɛŋnde dɛŋgbɛleŋ niŋndoŋ, chieeŋ bɛnduŋ cho ba tou wo woŋ, chieeŋ bɛnduŋ cho o lɛŋnde Bɛŋjamiŋ ndeŋ niŋndoŋ, chieeŋ bɛnduŋ cho o fondaŋnda balu Chulusalɛm ndaŋ niŋndoŋ,+ vɛlɛ a chieeŋ bɛndoŋ o Chuda niŋ,+ wanaa mandaa lasaa cho vɛlɛ wa saa ndaa chɔmndo o chiooŋ muŋ niŋ.’ Chɛhowa dimi lende ni.”
14 “Chɛhowa dimi aa: ‘Teleŋ cho fuuluu, mi peelu buŋgɛi ya chuel waŋnda Isɔluɛi a waŋnda Chuda ve.+ 15 A boondii keŋ, I cho kulii cho sakpo ve hɛli o yuŋgu Deeve wo choo,+ nduyɛ mbo tosa mi sakpoyɛi a sandei wa o lɛŋndeŋ niŋ.+ 16 A teleŋ koŋ, Chuda cho pioŋɔɔ sɔla,+ mi Chulusalɛm waŋnuŋ hɛnɛkɛ.+ Nduyɛ a cho wa chioo hoo veeloo aa: Chɛhowa Cho Sakpoyɛi Nɛi Ni.’”+
17 “Kanifuule nyɛ Chɛhowa dimi wo cho hoo ni: ‘Waŋndo cho wa teleŋ o teleŋ o pulale Deeve leŋ choo le challe o kpeŋgbei* lemasaa choo Isɔluɛi.+ 18 Nduyɛ wanaa soliaa lasalaa fula o pulale Livai leŋ choo wa cho wa teleŋ o teleŋ ya lachi, le salala luamaala kpulukuu laŋ, a salala cheleŋndaŋ solioo, vɛlɛ a salala ŋkultaŋ lomɔɔ o ya lo.’”
19 Mi Chɛhowa suaa vɛlɛ naa Chɛluimaya chua, mbo dimul ndu aa: 20 “Nyɛ Chɛhowa dimi wo cho hoo ni, ‘Te la nɔla pɛ mi la tɛɛmbuu kpema ya yii a paaleŋ vɛlɛ a nyumndaŋ ndo, okoŋ mi la kuuna paaleŋ fulaa a teleŋ le nɔ le fulaa wo, nduyɛ mi la kuuna nyumndaŋ tolɔɔ a teleŋ ma nɔ le tolɔɔ wo,+ 21 mɛɛ kpema ya yii a Deeve buɛi ni, le mi po ndɔɔ wa ichali teleŋ o teleŋ o kpeŋgbei lemasaa choo maa masa+ wo cho tambu,+ nduyɛ mi kpema ya yii a wanaa soliaa lasalaa fula o pulale Livai leŋ choo le wallo tosaa le ya wo tambu.+ 22 Mɛɛ nyɛm cho o choo choo niŋndoŋ, vɛlɛ a siooŋnde o pee mɛŋma ihɛllo niŋ chuu chɔm te yɛ, lende ya cho tosa ni, mi chuauwaa* fula o pulale Deeve buɛi ni leŋ choo wa, a Livaiyaa cho wallo le ya wa kui.’”
23 Mi Chɛhowa suaa vɛlɛ naa Chɛluimaya chua, mbo dimul ndu aa: 24 “A tuei pa nyɛ waŋnda haa cho dimioo wo? A cho dimioo aa, ‘Chɛhowa kɛɛ yuŋgula tiɔɔŋnda o hɛli laŋ.’ A cho wanaa niaa biyɔɔ o nɛi lebɛɛ choo le, nduyɛ a chi lɛ nda pɛŋ maa lekaa le.
25 “Nyɛ Chɛhowa dimi wo cho hoo ni: ‘Mɛɛ ya yii kpemaa a paaleŋ vɛlɛ a nyumndaŋ,+ nduyɛ mi kɛsi sawalaŋ le choo choo a lɛŋndeŋ yɛ,+ 26 lende koni i cho wa a chuauwaa* fula o pulale Chekɔpu leŋ choo a buɛi nuu Deeve wa ni. Fɛɛŋ bɛɛ I mel nda mi waŋndo kɛɛ fulaa o pulale Deeve leŋ choo mbo wa masaa chuauwaa Ebilaham nda,* Aase, a Chekɔpu wa choo le. Kanifuule, I cho wanaa ndaa cho o biyɔɔ niŋnda inyiɛɛ tuiinɔŋ,+ mi miŋgi nda chuuŋgiaa pila.’”+
34 Teleŋ Nɛbukanɛɛsa,* masaa le Babilɔŋ, puaa nduaa chɔuwa, masɛi o lɛŋndeŋ choo i wa ndu o ba bɛŋgu ve kpou, vɛlɛ a waŋnda kpou huŋ chiŋalaŋ Chulusalɛm a chieeŋ ndɔŋ bɛndoŋ ndo,+ mi Chɛhowa suaa naa Chɛluimaya chua.
2 “Nyɛ Chɛhowa, Mɛlɛka Isɔluɛiya dimi wo cho hoo ni, ‘Kɔ dimul Sɛdikaya+ masaa le Chuda aa: “Nyɛ Chɛhowa dimi wo cho hoo ni, ‘I cho chioo hoo malɔɔ masaa le Babilɔŋ o ba, mbo mal ndu o yiŋ.+ 3 A cho num biyɔɔ ma mal num ndu o ba, a nɔla niŋ ma hɛluŋ ndu le.+ A cho lakɔ a num Babilɔŋ, ma che masaa le Babilɔŋ a lehɔl pɛɛŋ, nduyɛ mi la suukaŋ nya ndu hɔlla a hɔlla.’+ 4 Kɛ num Sɛdikaya masaa le Chuda, yaŋ nilaŋ o nyɛ Chɛhowa dimi wo, ‘Nyɛ Chɛhowa dimi a num okɔɔ wo cho hoo ni: “A cho num diyɔɔ a muɛi faŋnde le. 5 A cho wu o kɔl nyulu niŋ,+ ma lom nyɛm chuŋ kɛndɔŋ le num, mɛɛ nda tosa a finyaa numnda yɛ, a wa num lachi o masaleŋ choo wa. Nduyɛ a cho num chaŋ ma dimi aa, ‘Kpokoo masanɔ naa!’ Kanifuule ‘ya Chɛhowa dimi lende ni.”’”’”
6 Okoŋ mi Chɛluimaya wana suaa le Mɛlɛka wo dimul Sɛdikaya masaa le Chuda diomndaŋ ndaŋ kpou o Chulusalɛm niŋ, 7 teleŋ puaa chɔuwaa masaa le Babilɔŋ nda huŋ chiŋalaŋ Chulusalɛm a chieeŋ bɛndoŋ o Chuda niŋ kpou ŋ lo woŋ.+ Muŋ cho ni, Lakisi+ a Asikaa.+ Kanifuule chieeŋ muŋ nɔ kpakila kala kala laŋ o Chuda niŋndoŋ, muŋ kinɛi muŋ lo ni.
8 Mi Chɛhowa suaa naa Chɛluimaya chua, mɛɛ Masaa Sɛdikaya yii kpemaa a waŋnda Chulusalɛm kpou le ma mal chiaa cho nda o ba wa.+ 9 Mbo dimul nda le mi wana o wana mal chɛ Hibuluinɔ cho ndu o ba wo, wana pɔnɔ ni, wana lanɔ ni, le halikpeŋ wana o wana bii lɛ chaaŋ ndɔ Chuunɔɔ mbo wa ndu o ba o chɛleŋ niŋ te. 10 Okoŋ mi laŋgbaa kalla a waŋnda kpou diikuŋ masaa. Ma yii kpemaa le mi wana o wana mal chiaa cho ndu o ba wa, o piaandu ni, o laandu ni, nduyɛ maa fɛɛŋ bɛɛ a ve lɛ ndu o ba o chɛleŋ niŋ te. Ma chɛl le nyɛ masaa dimi wo tosaa, ma mal nda ma kuaŋnuŋ. 11 Kɛ mɛɛ teleŋ tiŋ hiou, ma miŋgi vɛlɛ wanaa nda mal la biyɔɔ le ma wa nda o ba o chɛleŋ niŋ. Nduyɛ ma kandu nda vɛlɛ baŋɔɔ le walta lechɛ laŋ tosaa. 12 Okoŋ mi Chɛhowa suaa vɛlɛ naa Chɛluimaya chua. Mi Chɛhowa dimul ndu aa:
13 “Nyɛ Chɛhowa, Mɛlɛka Isɔluɛiya dimi wo cho hoo ni, ‘Mi yii kpemaa a finyaa nyaa mamaa,+ teleŋ ya soli nda o chɛleŋ niŋ o lɛŋnde Ichipi leŋ niŋndo.+ Mi dimul nda aa: 14 “O wɔsi ŋɔmmɛu kɛ kɛ mɛɛlulaŋ, a nɔ ma mal chaaŋ num Hibuluinɔɔ o nda pisi num o ba o chɛleŋ niŋ mbo tosal num wallo le wɔsioŋ ŋɔmpum ndo. A nɔ ma mal ndu mbo kuɛŋnuŋ.”+ Kɛ mi finyaa nyaa mamaa kɛɛ le ya nilaŋ yaŋɔɔ, a tosa nyɛ ya dimul nda wo le. 15 Nduyɛ nyɔɔ viu wɔ le* mi la siŋga yiyaŋnda nyalaŋ, mi la tosa nyɛ bɛnda ya o hɔllo. Mi la yii kpemaa ya lachi o chiɛi nɔ diola nilaŋ ndo, le mi la mal wanayaŋ nyaŋ cho nya o ba o chɛleŋ niŋndoŋ ma kuɛŋnuŋ. 16 Kɛ la siŋga vɛlɛ yiyaŋnda nyalaŋ. Wanaa wa nya o ba o chɛleŋ niŋnda, wana pɔnɔ ni wana lanɔ ni, mi la mal nda le ma kuɛŋnuŋ ba o ba nda yeema pɛ wa, la miŋgi nda vɛlɛ biyɔɔ pila le ma wa nya o ba o chɛleŋ niŋ, nduyɛ mi la baŋ nda le wali lechiɔɔ tosaa. Okoŋ mi la nɔɔliaa diola nilaŋ.’+
17 “Kɛ nyɛ Chɛhowa dimi wo cho hoo ni: ‘La diikuŋ ya, le mi wana o wana mal wanayaŋ ndɔŋ cho ndu o ba o chɛleŋ niŋndoŋ te.+ Lelaŋ I cho nya malɔɔ muɛi faŋnde, naa taŋ waŋnda wo, vɛlɛ a yiaaŋ o ba,+ nduyɛ mi siooŋnde bii masɛi o lɛŋndeŋ choo kpou a nyɛ cho nya yɔŋnɔŋndo.’+ Ya Chɛhowa dimi lende ni. 18 ‘Mi la yii kpemaa ya lachi, nduyɛ mi la kialu nau fɔŋndɔɔ buŋgaŋ ŋ muuŋ, mi la kei o buŋgaŋ muŋ tɛɛŋ.+ Lelaŋ, wanaa chua kaŋ buŋgɛi ma kɛɛ le nyɛ nda chua buŋgɛi yo tosaa wa, 19 nda cho ni, laŋgbaa kalla Chuda, laŋgbaa kalla Chulusalɛm, wanaa cho o chiɛi lemasaa wa, wanaa soliaa lasalaa, a wanaa cho o lɛŋndeŋ niŋ ma kei o buŋgaŋ nau fɔŋndɔ koŋ tɛɛŋ nda kpou, nyɛ cho yɔŋnɔŋ a nda wo cho hoo ni: 20 I cho nda malɔɔ yaamɔɔwaa ndaa o ba, a cho nda nuuviaa le nda diyɔɔ wa. Nduyɛ, mi dialuŋ ndaŋ vilɛiyoŋ simnuŋ nyɛdiaa le youwaa balu o choo choo niŋnda, vɛlɛ a visiaa yonduaa o lɛŋndeŋ choo.+ 21 I cho Sɛdikaya, masaa le Chuda a laŋgbaa nduaa kalla malɔɔ yaamɔɔwaa ndaa cho nda nuuviaa le nda diyɔɔ wa o ba, vɛlɛ a puaa chɔuwaa masaa le Babilɔŋ o ba,+ a huŋ luei nya o piŋndo niŋ ma wa miiŋgɔŋndo wa.’+
22 “‘I cho nda dimul le ma miiŋgu o chioo hoo pila, ma huŋ chiŋalaŋ ndu, ma bii ndu, nduyɛ ma mal ndu o yiŋ.+ I cho tosa mi chieeŋ bɛndoŋ Chuda simnuŋ lɛŋnde vesɛileŋ, naa wana o wana cho le wa.’+ Ya Chɛhowa dimi lende ni.”
35 Mi Chɛhowa suaa naa Chɛluimaya chua a teleŋ Chɛhowakim,+ po Choosaya wo, masaa le Chuda wa o masaleŋ choo wo. Mbo dimul ndu aa: 2 “Kɔ o Luekabaitiiya lo,+ ma dimul nda le ma hiŋ o chiɛi Chɛhowa wo niŋ, ma luei nda o lumuila diaa nyɛdiaa laŋ niŋ o pilɛ, ma ke nda muɛiyaŋ le ma kol.”
3 Okoŋ mi chua Chaasanaya, po Chɛluimaya wo, po mama Habasinaya wo, wanayaŋ ndɔŋ, puaa nduaa kpou, vɛlɛ a waŋnda o yuŋgu Luekabi wo choo kpou, 4 mi kua a nda o chiɛi Chɛhowa wo niŋ. Mi kua a nda o lumui diaa nyɛdiaa puaa Henaŋ nda niŋ, po Ikidalaya wo, wana Mɛlɛka tonyaa. Lumuiyo hoo wa lumui laŋgbaa kalla dia nyɛdiaa wo ikɛi, nduyɛ o wa vɛlɛ lumui Maasɛya, po Sialum ndo, wana manda dio kpakioo wo amaluaŋ. 5 Okoŋ mi pei muɛiyaŋ cha o taalala bɛndulaŋ niŋ a taalala pɔmbɔlaŋ, mi kɛsi Luekabaitiiya lachi, mi dimul nda aa: “La kol muɛiyaŋ.”
6 Kɛ ma dimi aa: “Ŋ cho mamuɛi kolɔɔ le, kanifuule Chɛhonadabi,*+ po Luekabi finya naa mamaa dou naa sawaa aa, ‘Nya ni, puaa nyaa ni, fɛɛŋ bɛɛ la nɔ mi la kol muɛiyaŋ te. 7 La nɔ mi la taŋgul chiɛilaŋ, mi la saŋ kulloŋ, mi la tɔl ɔɔ mi la nɔ kpelela makilepiilaŋ te. Kɛ nduyɛ, la nɔ mi la wa teleŋ o teleŋ o tɛndiilaŋ niŋ, le halikpeŋ mi la viou achal o lɛŋnde nya cho ichali o sumialle leŋ niŋ.’ 8 Lelaŋ naa ni, laandaa naa ni, puaa naa ni, vɛlɛ a chuaa naa laanduaa, miŋ hiau lachi a nyɛ Chɛhonadabi, po Luekabi finya naa mamaa dimul naa wo kpou tosaa, ŋ kol muɛima kɛ kɛ le. 9 Ŋ teŋgul lachiɛi le miŋ chal leniŋ te, kɛlɛŋgaa niŋ te miŋ nɔ kpelela makilepiilaŋ, yondolaŋ, ɔɔ miŋ saŋ kulloŋ. 10 Miŋ hiau lachi a waa o tɛndiilaŋ niŋ, nduyɛ miŋ tosa nyɛ o nyɛ Chɛhonadabi* finya naa mamaa dimul naa le tosaa. 11 Kɛ mɛɛ Nɛbukanɛɛsa* huŋ chiŋalaŋ lɛŋndeŋ,+ miŋ dimi aa: ‘Ŋ kɔŋnuŋ Chulusalɛm yɔŋii puaa chɔuwaa Kaadiaŋnda a Siiliaŋnda diu naa.’ Lelaŋ naŋ cho ichali Chulusalɛm ni.”
12 Mi Chɛhowa suaa naa Chɛluimaya chua, mbo dimul ndu aa: 13 “Nyɛ Chɛhowa, Mɛlɛka puaa chɔuwa, Mɛlɛka Isɔluɛiya dimi wo cho hoo ni, ‘Kɔ ma dimul puaa Chuda a waŋnda Chulusalɛm kpou aa: “Le teleŋ o teleŋ, I wa hiouwɔɔ lachi a nya dimullo le mi la diikuŋ nyɛ ya dimi wo, lende le?”+ Ya Chɛhowa dimi lende ni. 14 “Mi Chɛhonadabi po Luekabi wo dimul wanaa fula o pulale ndɔleŋ choo wa maa a kol muɛiyaŋ te. Nduyɛ ma diikuŋ nyɛ o dimul nda wo, a kol mamuɛi le haaa a paale hauleŋ ndeŋ. Le hei, ma diikuŋ sawa finya nda mamaa dou nda wo.+ Kɛ ya, mi suaa o nya lo lediiŋ diiŋ,* kɛ la diikuŋ ya le.+ 15 Mi hiau lachi a buɛiyaa niaa suaa le ya wa kpou yɔŋndo naa nya chua lediiŋ diiŋ,*+ ma dimul nya aa, ‘A yandii, la mal sɔɔŋ wɔɔŋ nya cho tosaa woŋ,+ mi la tosa nyɛ cho sakpo wo! La tual mɛlɛkaa cheleŋnda kɔɔli mi la sooluu nda le. Koŋ cho tosa mi la hiou lachi a waa achal o lɛŋnde ya ke nya a finyaa nyaa mamaa leŋ niŋ.’+ Kɛ la yeŋ ya lani ɔɔ mi la tosa nyɛ ya dimul nya wo le. 16 Mi wanaa fula o pulale Chɛhonadabi, po Luekabi wo choo wa tosa nyɛ finya nda mamaa dimul nda wo.+ Kɛ waŋnda haa kɛɛ le ya nilaŋ yaŋɔɔ.”’”
17 “Lelaŋ nyɛ Chɛhowa, Mɛlɛka puaa chɔuwa, Mɛlɛka Isɔluɛiya dimi wo cho hoo ni: ‘I cho waŋnda Chuda a waŋnda Chulusalɛm kpou kpundɛla ya dimi le nda tusioo choo laŋ tusi choo,+ kanifuule mi suaa o nda lo, kɛ a yeŋ ya lani le. Mi hiau lachi a nda veeloo, kɛ a mulul la le.’”+
18 Mi Chɛluimaya dimul Luekabaitiiya aa: “Nyɛ Chɛhowa, Mɛlɛka puaa chɔuwa, Mɛlɛka Isɔluɛiya dimi wo cho hoo ni, ‘Le mɛɛ nya diikuŋ nyɛ Chɛhonadabi finya nya mamaa dimul nya wo nyɛkɛndɛi, nduyɛ mi la hiau lachi a nyɛ o nyɛ o dimul nya wo tosaa yɛ, 19 nyɛ Chɛhowa, Mɛlɛka puaa chɔuwa, Mɛlɛka Isɔluɛiya dimi wo cho hoo ni: “Wanaa fula o pulale Chɛhonadabi,* po Luekabi wo choo wa cho hiouwɔɔ lachi a wallo tosaa ya lachi le teleŋ o teleŋ.”’”
36 Wɔsi hiɔɔlu ndɔ Chɛhowakim,+ po Choosaya wo masaa le Chuda wa o masaleŋ choo wo, mi Chɛhowa suaa naa Chɛluimaya chua, mbo dimul ndu aa: 2 “Diomnda ya dimul num chɔŋ o tasela ndɔ o palɛi Choosaya ve niŋ haaa huŋ bii a paale hauleŋ ndeŋ+ a Isɔluɛi okɔɔ, Chuda,+ vɛlɛ a lɛŋnde kpou laŋ,+ chua yau simbulaa ma poonyiaa laŋ leniŋ kpou. 3 Naapum te waŋnda Chuda tuei pɛ a kpundɛla ya kɛɛsiaa le nda tusioo choo laŋ kpou, a cho sɔɔŋ wɔɔŋ nda cho tosaa woŋ malɔɔ, okoŋ mi mal nda haki le yɔŋnda ndala wɔɔŋndaŋ, vɛlɛ a hakila ndalaŋ.”+
4 Okoŋ mi Chɛluimaya veelu Baluki+ po Nɛluaya wo, mbo dimul ndu diomnda Chɛhowa dimul ndu laŋ kpou. Nduyɛ mi Baluki poonyiaa diomndaŋ ndaŋ o yau simbulaa niŋ.+ 5 Okoŋ mi Chɛluimaya dimul Baluki aa: “I cho o biyɔɔ niŋ, nduyɛ I nɔla mi kuɛ o chiɛi Chɛhowa wo niŋ te. 6 Lelaŋ, num nɔ ni ma kuɛ ma kɔ veelu diomnda Chɛhowa laŋ, la ya dimul num ma poonyiaa o yau simbulaa niŋndaŋ choo choo. Veelu diomndaŋ o paale nda bii sumndo leŋ choo, mi wanaa cho o chiɛi Chɛhowa wo niŋnda tuei. A nɔ ma veelu laŋ mi waŋnda o Chuda niŋ kpou a cho chɔnɔŋ o chieeŋ ndaŋ bɛndoŋ niŋnda tuei. 7 Naapum Chɛhowa cho tueiyɔɔ piɛile nda cho ndu le mbo tuiinuŋ nda inyiɛɛ leŋ, nduyɛ mi wana o wana mal sɔɔŋ wɔɔŋ o cho tosaa woŋ, mbo mulul muŋ kɔɔ. Kanifuule, nyɛpalaa Chɛhowa kɛɛsiaa le waŋnda haa tusioo choo a kɔl tuu bɛndoo wo cho bɔɔ.”
8 Okoŋ mi Baluki, po Nɛluaya wo tosa mɛɛ Chɛluimaya wana suaa le Mɛlɛka wo dimul ndu yɛ. Mbo veelu diomnda Chɛhowa laŋ, la wa o yau simbulaa niŋ ndaŋ choo choo kpeleŋ o chiɛi Chɛhowa wo niŋ.+
9 Wɔsi ŋuɛɛnu ndɔ Chɛhowakim,+ po Choosaya wo, masaa le Chuda wa o masaleŋ choo wo, o paŋgii ŋɔmahiɔɔluei niŋ, ma yonda le mi wanaa wa o Chulusalɛm niŋnda, a wanaa fula o chieeŋ bɛndoŋ Chuda ma huŋ Chulusalɛm nda kpou bii sumndo Chɛhowa lachi.+ 10 Okoŋ mi Baluki kua o chiɛi Chɛhowa wo, mbo kɔ luɛi o lumui Kɛmaluaya+ po Siafaŋ ndo niŋ,+ wana miŋgi diom Mɛlɛkaa poonyiaa wo, mbo kɔ sim o luŋ cho amaluaŋ ndo, o dio kpaki sɛnɛi chiɛi Chɛhowa wo sondoo.+ Okoŋ, mbo veelu diomnda Chɛluimaya dimi mi la wa o yau simbulaa niŋndaŋ choo choo kpeleŋ mi wana o wana tuɛi.
11 Mɛɛ Maikaya po Kɛmaluaya wo, po mama Siafaŋ ndo tuei diomnda Chɛhowa laŋ o yau simbulaa niŋ kpou, 12 mbo kua sakpo o chiɛi lemasaa, o lumui wana poonyiaa. Laŋgbaa kalla* kpou wa ichali loŋ. Nda cho ni: Ɛlisiama+ wana poonyiaa, Dɛlaaya po Siɛmaya wo, Ɛli-netaŋ+ po Achibɔɔ wo,+ Kɛmaluaya po Siafaŋ ndo, Sɛdikaya po Hananaya wo, vɛlɛ a laŋgbaa kalaa tuaa kpou. 13 Mi Maikaya dimul nda nyɛ o nyɛ o tuei teleŋ Baluki wa diomndaŋ veeloo o yau simbulaa niŋ waŋnda kpou o hɔl lo.
14 Okoŋ mi laŋgbaa kalla kpou yɔŋ Chɛhudi po Nɛtanaya wo, po mama Siɛlɛmaya wo o Baluki lo. Siɛlɛmaya yɛ, Kusai velu ndu ni. Ma dimul ndu aa: “Huŋ ndɔ a yau simbulaa ŋ veelu diomndaŋ leniŋ waŋnda o hɔl lo.” Mi Baluki po Nɛluaya wo chua yau simbulaa o ba, mbo kua o nda lo. 15 Ma dimul ndu aa: “Yandii chal nanuŋ ma veelul naa diomndaŋ leniŋ choo choo kpeleŋ.” Okoŋ, mi Baluki veelul nda diomndaŋ leniŋ.
16 Dimioo nuaa a tuei diomndaŋ ndaŋ kpou, ma nuaŋnaŋ vellaa velle o siooŋnde niŋ. Ma dimul Baluki aa: “Ŋ nɔ miŋ dimul masaa diomndaŋ ndaŋ kpou.” 17 Ma nyuna Baluki aa: “Yandii dimullɔ naa, vɛɛ ŋ looku yɛ diomndaŋ ndaŋ kpou poonyiaa? Baa Chɛluimaya dimul num sɔɔŋ muŋ kpou ni?” 18 Mi Baluki mulul nda aa: “Ndu dimul la diomndaŋ ndaŋ kpou ni, mi poonyiaa laŋ a kpɛkileŋ o yau simbulaa hoo niŋ.” 19 Mi laŋgbaa kalla dimul Baluki aa: “La kɔ vioŋnuŋ nya Chɛluimaya. Nduyɛ la tosa mi wana o wana sina naa nya cho vioŋnɔŋ nda le.”+
20 Okoŋ ma kua o luŋ chiɛi lemasaa, ma kɔ kɛsi yau simbulaa o lumui Ɛlisiama wana poonyiaa niŋ. Nduyɛ ma dimul masaa nyɛ o nyɛ nda tuei.
21 Okoŋ mi masaa viam Chɛhudi+ le mbo kɔ chua yau simbulaa. Mbo kɔ chua ndu o lumui Ɛlisiama wana poonyiaa niŋ, mbo huŋ a ndu. Mi Chɛhudi kandu diomndaŋ veeloo leniŋ masaa o hɔl, a laŋgbaa kalaa wa ndu isisi ikɛi ya kpou. 22 O paŋgii ŋɔmahiɔɔluei niŋ,* masaa wa ichali o lumui cho le teleŋ ihueiyo wo niŋ, nduyɛ yiŋndeŋ le wa ndu biyɔɔ lachi o fondaŋ nda mɛndul yiŋndeŋ ndo. 23 Te Chɛhudi veelu pɛ diomndaŋ o buŋgaŋ ŋgaa ɔɔ ŋhiɔɔlu niŋ, masaa kelu wɔ muŋ a muɛi wana poonyiaa o mal o yiŋ. O lo tosaa lende haaa mbo chii yau simbulaa koŋ lomɔɔ. 24 Masaa ni, buɛiyaa nduaa ni, nda kpou, siooŋii bii wana o wana le, nduyɛ a sɛɛsiaŋ nyɛlaŋ lekɔɔ le. 25 Mi che bɛɛ mi Ɛli-netaŋ+, Dɛlaaya,+ a Kɛmaluaya+ nyɔɔlu masaa maa o luam yau simbulaa le, kɛ o yeŋ nda lani le. 26 Okoŋ kɔɔli, mi masaa dimul Chɛluamɛɛ po masaa, Sɛluiya po Asiliɛɛ wo, a Siɛlɛmaya po Abidɛɛ wo le ma bii Baluki wana poonyiaa a Chɛluimaya wana suaa le Mɛlɛka wo. Kɛ mi Chɛhowa viaŋ nda kpiŋ.+
27 Mɛɛ masaa lom yau simbulaa Chɛluimaya dimul Baluki mbo poonyiaa wo, mi Chɛhowa suaa vɛlɛ naa Chɛluimaya chua.+ Mbo dimul ndu aa: 28 “Chua vɛlɛ yau simbulaa cheleŋ, ma poonyiaa vɛlɛ diomnda wa o yau simbulaa tasoo niŋ ndaŋ, o Chɛhowakim, masaa le Chuda lom ndo.+ 29 Nduyɛ a nɔ ma dimul Chɛhowakim masaa le Chuda aa, ‘Nyɛ Chɛhowa dimi wo cho hoo ni: “A lom yau simbulaa hoo ma dimi aa, ‘Le yɛɛnɛ ŋ poonyiaa yɛ lechoo aa: “Masaa le Babilɔŋ cho hunɔɔ mbo tɛɛmbuu lɛŋndeŋ ndeŋ, waŋnda chieeya a visiaa, nduyɛ mbo mɛi leŋ fondo”?’+ 30 Lelaŋ, nyɛ Chɛhowa dimi a Chɛhowakim, masaa le Chuda okɔɔ wo cho hoo ni, ‘O sɔla niŋ wana o wana o cho ichali o kpeŋgbei lemasa Deeve wo choo le.+ Nduyɛ te o vi pɛ, dialuŋ ndɔŋ cho wa ŋ malaa kpendekele, mi paaleŋ le koŋ muŋ, nduyɛ mi mɔmndo tol muŋ choo ichɔl.+ 31 I cho ndu, wanaa fula o pulale ndɔleŋ choo wa,* a buɛiyaa nduaa nyuna le ma dɔɔnuŋ kona le yɔŋnda ndala wɔɔŋndaŋ. Nduyɛ nyɛpalaa ya dimi le nda tusioo choo wo,+ I cho nda, waŋnda Chulusalɛm, a puaa Chuda kpou ndu tusi choo. Kɛ a yeŋ ya lani le.’”’”+
32 Okoŋ mi Chɛluimaya chua yau simbulaa cheleŋ mbo ke Baluki po Nɛluaya wo, wana poonyiaa.+ Nduyɛ diomnda wa o yau simbulaa Chɛhowakim, masaa le Chuda lom ndo niŋndaŋ, mi Chɛluimaya dimul ndu vɛlɛ laŋ mbo miŋgi poonyiaa.+ Nduyɛ ma chɔɔlu pɛŋ diomnda waa lende handɔɔ lechoo.
37 Mi Sɛdikaya,+ po Choosaya wo simnuŋ masaa o foofo Konaya,*+ po Chɛhowakim ndo. Kanifuule mi Nɛbukanɛɛsa,* masaa le Babilɔŋ siiŋguu ndu masaa o lɛŋnde Chuda leŋ niŋ.+ 2 Kɛ Sɛdikaya, buɛiyaa nduaa, a wanaa wa o lɛŋnde leŋ niŋnda yeŋ nyɛ Chɛhowa dimul Chɛluimaya wana suaa le ndu wo le nda dimullo wo lani le.
3 Nduyɛ mi Masaa Sɛdikaya viam Chɛhukal+ po Siɛlɛmaya wo, a Sɛfanaya+ po Maasɛya wo wana soliaa lasalaa, o Chɛluimaya wana suaa le Mɛlɛka wo lo. Mbo dimul ndu aa: “Yandii piɛi le naa o Chɛhowa Mɛlɛka naa lo.” 4 Chɛluimaya wa balɔŋndo fɛɛsɛŋ waŋnda tɛɛŋ, kanifuule ndaa wou wɔ ndu o chiɛi manyumndo niŋ te.+ 5 A boondii keŋ, mi Kaadiaŋnda luei Chulusalɛm o piŋndo niŋ. Kɛ mɛɛ nda tuei maa puaa chɔuwaa Feloo wa chɛŋ Ichipi ma wa hunɔɔ,+ ma faŋaŋ Chulusalɛm ma miiŋguŋ,+ a chiŋalaŋ ndɛ ndu le. 6 Okoŋ mi Chɛhowa suaa naa Chɛluimaya wana suaa le ndu wo chua. Mbo dimul ndu aa: 7 “Nyɛ Chɛhowa, Mɛlɛka Isɔluɛiya dimi wo cho hoo ni, ‘Nyɛ nya nɔ mi la kɔ dimul masaa le Chuda, o vem nya o ya lo wo cho hoo ni: “Puaa chɔuwaa Feloo wa, a cho hunɔɔ le nya malaa wa cho miiŋgu pila o lɛŋnde ndɔleŋ niŋ Ichipi.+ 8 Okoŋ, mi Kaadiaŋnda miiŋgu nanuŋ pila ma huŋ chiŋalaŋ chioo hoo a sɔŋgɔɔ, ma bii ndu, nduyɛ ma mal ndu o yiŋ.”+ 9 Nyɛ Chɛhowa dimi wo cho hoo ni: “La hui nyapila mi la dimi aa, ‘Kaadiaŋnda cho naa nyaanɔŋ, ma faŋaŋ naa kɔɔli’ le. Kanifuule a cho nya faŋaŋ kɔɔli le. 10 O yɔŋ bɛɛ mi la yem puaa chɔuwaa Kaadiaŋaa cho chɔulabaa a nya wa kpou, nduyɛ mbo lo a yɔŋuluŋ nda kinɛi, a cho chɔnɔŋ o tɛndiila ndalaŋ niŋ ma mal chioo hoo o yiŋ.”’”+
11 Mɛɛ puaa chɔuwaa Kaadiaŋnda faŋaŋ Chulusalɛm le puaa chɔuwaa Feloo wa,+ 12 mi Chɛluimaya mal Chulusalɛm mbo kua o lɛŋnde Bɛŋjamiŋ ndeŋ niŋ+ le mbo kɔ sɔla nyɛm kiɔɔŋ ŋ ndɔŋ wanaa nduaa tɛɛŋ. 13 Kɛ mɛɛ o fuuluu o Dio Kpakioo Bɛŋjamiŋ, mi wana bɛndu wanaa manda masaa wa, o ndoo nɔ diolaŋ aa Aluicha wo, po Siɛlɛmaya wo, o Hananaya velu wo bii Chɛluimaya wana suaa le Mɛlɛka wo, mbo dimul ndu aa: “Kaadiaŋnda o ba bɛŋgu ŋ cho yɔŋgɔŋndo ni!” 14 Mi Chɛluimaya dimi aa: “I cho tonya le! O cho Kaadiaŋnda o ba bɛŋgu le ya cho yɔŋgɔŋndo le.” Kɛ o yeŋ ndu lani le. Le hei, mbo bii Chɛluimaya mbo kua a ndu o laŋgbaa kalla lo. 15 Mi laŋgbaa kalla tuulu kɔl ŋama ŋama a Chɛluimaya,+ ma luaa ndu, okoŋ ma wou ndu o chiɛi Chɛhonataŋ ndo niŋ+ wana poonyiaa, o ndaa siiŋguu chiɛi manyumndo wo.* 16 Ma wou Chɛluimaya o lumui sɔɔkɛnyɛɛ wo o chiɛi wa o lɛŋndeŋ bɛŋgu wo niŋ. Nduyɛ, o wa loŋ le palɛi bɔɔbɔɔ.
17 Mi Masaa Sɛdikaya yooŋgu Chɛluimaya le mbo hiŋ o ndu lo chiɛiniŋ. Nduyɛ mbo nyuna ndu sɔɔsɔɔ+ aa: “Baa a nɔ pa yooŋgu kɛ kɛ fulaa Chɛhowa o ba?” Mi Chɛluimaya dimi aa: “Ei, I nɔ yooŋgoo!” Mbo hiau lachi a dimioo aa: “Mɛlɛka cho num malɔɔ masaa le Babilɔŋ o ba!”+
18 Mi Chɛluimaya dimul vɛlɛ Masaa Sɛdikaya aa: “Haki yɛɛnɛ ya tosal lɛ num, buɛiyaa numnda, vɛlɛ a waŋnda haa, mi la duau ya o chiɛi manyumndo niŋ? 19 Kuɛɛnɛ wanaa nyaa suaa le Mɛlɛka wa cho yɛ, a wa nya yooŋgu Mɛlɛkaa dimullo aa, ‘Masaa le Babilɔŋ hiŋ niŋ mbo chiŋalaŋ nya a lɛŋndeŋ leŋ te’+ wa? 20 Lelaŋ yandii masanɔ nuu, yaŋ ya nilaŋ. Tuiinuŋ ya inyiɛɛ, ma chɛl nyɛ ya cho num nyuna wo. Miŋgi lɛ ya o chiɛi Chɛhonataŋ+ wana poonyiaa wo le. Te o cho koŋ te, I cho piɔmndo sɔla loŋ.”+ 21 Okoŋ mi Masaa Sɛdikaya dimi le ma kɔ kɛsi Chɛluimaya o biyɔɔ niŋ o Luŋ Wanaa Manda Masaa Wa.+ Lepaa o lepaa, mi ndaa ke ndu beedii* tiilaŋ wanaa toosiaa beediiya ndaa pisi o nɛiyo o pilɛ,+ haaa mi beediiyo chuu o chioo niŋ.+ Nduyɛ mi Chɛluimaya wa niko o Luŋ Wanaa Manda Masaa Wa.
38 Mi Siɛfatiaa po Mataŋ ndo, Kɛdalaya po Paasiɔɔ wo, Chukal+ po Siɛlɛmaya wo, a Paasiɔɔ+ po Malikicha wo tuɛi diomnda Chɛluimaya wa waŋnda kpou dimullo laŋ aa: 2 “Nyɛ Chɛhowa dimi wo cho hoo ni, ‘Wanaa cho lo o chioo hoo niŋnda, a cho wu a muɛi faŋnde, yima bɛnduaŋ, vɛlɛ a naala taŋ waŋnda laŋ.+ Kɛ wana o wana yɔŋguŋ pɛ Kaadiaŋnda o ba bɛŋgu, o cho yoomu ndɔɔ piŋi, nduyɛ mbo hiou lachi a waa yoomu.’+ 3 Nyɛ Chɛhowa dimi wo cho hoo ni, ‘A tonya, I cho chioo hoo malɔɔ puaa chɔuwaa masaa le Babilɔŋ nda o ba, okoŋ mbo bii ndu.’”+
4 Mi laŋgbaa kalla dimul masaa aa: “Yandii tosa mi poo hoo sɔla piɔmndo.+ Kanifuule, sɔɔŋ o cho muŋ dimioo woŋ cho puaa chɔuwaa lo o chioo hoo niŋnda vɛlɛ a waŋnda kpou dialloŋ* diyɔɔ. Laŋunɔɔ hoo cho kindiŋndo le mi kpundɔɔ del waŋnda haa choo. O cho le ma wa o kɔl nyulu niŋ te.” 5 Mi Masaa Sɛdikaya dimi aa: “I mal nya ndu o ba. Kanifuule, I nɔla mi tosa nyɛ o nyɛ le nya kuunaa le.”
6 Okoŋ ma bii Chɛluimaya, ma tusi ndu a yuei o sooŋ mamɛŋ Malikicha po masaa wo niŋ. Nduyɛ o Luŋ Wanaa Manda Masaa Wa sooŋndo hoo wa ni.+ Loolioo kinɛi wa o sooŋndo hoo niŋ ni, mɛŋma ve leniŋ te. Okoŋ mi Chɛluimaya kandu mɔɔwaa o loolioo hoo niŋ.
7 Mi Ɛbɛdi-mɛlɛki+ Itoopiaanɔɔ, o wa wallo o chiɛi lemasaa niŋndo tuɛi maa a wou Chɛluimaya o sooŋndo niŋ. Masaa wa ichali o Dio Kpaki Bɛŋjamiŋ Ndo,+ 8 mi Ɛbɛdi-mɛlɛki fula o chiɛi lemasaa niŋ, mbo kɔ soo o masaa lo. Mbo dimul ndu aa: 9 “Oo masanɔ nuu, suɛi dɛnɛ wɔɔŋii bɛnduei pila waŋnda haa tosal Chɛluimaya wana suaa le Mɛlɛka wo ni! Nduyɛ o cho piɔmndo sɔla loŋ a yiaaŋ. Kanifuule nyɛdiaa* cho lɛ o chioo niŋ te.”+
10 Okoŋ mi masaa dimul Ɛbɛdi-mɛlɛki Itoopiaanɔɔ aa: “Chua puaa nanuŋ ŋwaŋ 30 mi la soli Chɛluimaya wana suaa le Mɛlɛka wo o sooŋndo niŋ, yɔŋii o sɔla piɔmndo.” 11 Mi Ɛbɛdi-mɛlɛki chua puaa ma kua o chiɛi lemasaa niŋ, o lumui nda kɛsi nyɛm baa kalaŋ ndo bɛŋgu,+ ma kɔ chua nyɛla yuulula siɔŋɛɛlaŋ ma tusul Chɛluimaya laŋ o sooŋndo niŋ o yuei. 12 Mi Ɛbɛdi-mɛlɛki Itoopiaanɔɔ dimul Chɛluimaya aa: “Yandii, handuŋ yuulula laŋ o wɔɔŋndaŋ bɛŋgu a yuei latulu.” Nduyɛ mi Chɛluimaya tosa mɛɛ o dimi yɛ. 13 Okoŋ ma naŋ Chɛluimaya a yuei, ma soli ndu o sooŋndo niŋ. Nduyɛ mi Chɛluimaya wa niko loŋ, o Luŋ Wanaa Manda Masaa Wa.+
14 Mi Masaa yooŋgu Chɛluimaya wana suaa le Mɛlɛka wo le mbo hiŋ naa ndu chua o dio yaa ndɔɔ, o cho o chiɛi Chɛhowa wo wo. Okoŋ mbo dimul Chɛluimaya aa: “I yeema mi nyuna num isɔɔ, nduyɛ viŋ ya nyɛ o nyɛ le.” 15 Mi Chɛluimaya dimul Sɛdikaya aa: “Te I dimul num pɛ, a tonya, a cho ya diyɔɔ. Nduyɛ te I sila num pɛ, a yeŋ ya niŋ lani le.” 16 Okoŋ, mi Masaa Sɛdikaya mɛnaŋ sɔɔ sɔɔ o Chɛluimaya lo aa: “I mɛnaŋ po o Chɛhowa lo, wana ke naa yoomoo wo maa I cho num diyɔɔ le. Nduyɛ, I cho num malɔɔ wanaa cho kindiŋndo le num diyɔɔ wa o ba le.”
17 Mi Chɛluimaya dimul Sɛdikaya aa: “Nyɛ Chɛhowa, Mɛlɛka puaa chɔuwa, Mɛlɛka Isɔluɛiya dimi wo cho hoo ni, ‘Te a yɔŋguŋ pɛ laŋgbaa kalaa masaa le Babilɔŋ nda o ba bɛŋgu, a cho yoomu numndo piŋi, nduyɛ a mel niŋ chioo hoo o yiŋ te. Okoŋ mi num, a yuŋgu numndo sɔla pioŋɔɔ.+ 18 Kɛ te a kɛɛ pɛ le yɔŋgɔŋndo laŋgbaa kalaa masaa le Babilɔŋ o ba bɛŋgu, Mɛlɛka cho chioo hoo Kaadiaŋnda malɔɔ o ba, ma mal ndu o yiŋ,+ nduyɛ a nɔla niŋ ma hɛluŋ nda le.’”+
19 Okoŋ mi Masaa Sɛdikaya dimul Chɛluimaya aa: “Siooŋnde cho ya le Chuuwaa yɔŋguŋ niŋ Kaadiaŋnda o ba bɛŋgu wa. Kanifuule te a mal la nda o ba pɛ, a cho ya nyɛpalaa tusi choo.” 20 Mi Chɛluimaya dimi aa: “A cho num nda malɔɔ o ba le. Yandii diikuŋ Chɛhowa, ma tosa nyɛ ya cho num dimullo wo. Okoŋ nyɛ o nyɛ cho wa o kɛndɛ a num, ma hiou lachi a waa yoomu. 21 Kɛ te a kɛɛ pɛ le nda yɔŋgɔŋndo o ba bɛŋgu, nyɛ Chɛhowa chɔm ya wo cho hoo ni: 22 Waŋ laanduaa lo yoomu o chiɛi lemasaa niŋ Chuda wa kpou, a cho kɔlaŋ a nda o laŋgbaa kalaa masaa le Babilɔŋ ndo,+ nduyɛ ma dimi aa,
‘Puaa ŋ dɔu tiindaŋndo o nda niŋnda* hui num, nduyɛ ma tiu num ba.+
A tosa mi peluŋ numndoŋ mɔɔwa o loolioo niŋ,
Okoŋ ma faŋaŋ num kɔɔli.’
23 A cho hunɔɔ a laandaa numnda vɛlɛ a chuauwaa numnda kpou o Kaadiaŋnda lo, nduyɛ numpila bɛɛ nɔla niŋ ma hɛluŋ nda le. Kɛ masaa le Babilɔŋ cho num biyɔɔ,+ okoŋ mbo mal chioo hoo o yiŋ le sabu numndo.”+
24 Mi Sɛdikaya dimul Chɛluimaya aa: “Dimul wana o wana a sɔɔŋ muŋ okɔɔ le, yɔŋii ŋ sɔla piɔmndo. 25 Te laŋgbaa kalla tuei pɛ maa I suukaŋ a num, nduyɛ ma huŋ dimul num aa, ‘Yandii, dimul naa nyɛ ŋ dimul masaa wo. Ŋ cho num diyɔɔ le,+ lelaŋ viŋ naa nyɛ o nyɛ le. Yɛɛnɛ masaa dimul lɛ num?’ 26 A nɔ ma mulul nda aa, ‘Nyɔɔloo ya wa masaa ni maa o miŋgi ya o chiɛi Chɛhonataŋ ndo mi kɔ sɔla piɔmndo loŋ te.’”+
27 Mɛɛ teleŋ tiŋ hiou, mi laŋgbaa kalla huŋ naa Chɛluimaya chua, ma nyuna ndu. Okoŋ mbo dimul nda nyɛ o nyɛ masaa dimul ndu. Le hei, a dimul lɛ ndu nyɛ o nyɛ le. Kanifuule, a tuii balta ndalaŋ te. 28 Haaa a paale nda bii Chulusalɛm ndeŋ, Chɛluimaya wa o Luŋ Wanaa Manda Masaa Wa.+ O lo loŋ haaa ma bii Chulusalɛm.+
39 Wɔsi ŋɔmahiɔɔlu ndɔ Sɛdikaya, masaa le Chuda wa o masaleŋ choo wo, o paŋgii tɔ ve niŋ, mi Nɛbukanɛɛsa* masaa le Babilɔŋ huŋ a puaa nduaa chɔuwa Chulusalɛm, ma huŋ luei ndu o piŋndo niŋ.+
2 Wɔsi 11 Sɛdikaya wa o masaleŋ choo wo, paŋgii hiɔɔluei, malɔ le ŋɔmahiɔɔlu, mi Kaadiaŋnda pial kpaki chioo.+ 3 Okoŋ mi masaa le Babilɔŋ laŋgbaa nduaa kalla luɛi, ma kɔ chal o Dio Kpaki Wa Tɛɛŋ Ndo.+ Nda cho haa ni, Nɛka-sialuisa Samikanɔɔ, Nibo-sasɛkim Luabisalueisinɔɔ,* Nɛka-sialuisa Luamakinɔɔ,* a laŋgbaa kalaa masaa le Babilɔŋ nda a tuaa kpou.
4 Mɛɛ Sɛdikaya, masaa le Chuda a puaa nduaa chɔuwa kpou che nda, ma mal chioo a nyumndaŋ, ma keeku o dio wa o kpakila tiɔɔŋndaŋ tɛɛŋ ndo, ma nyaanuŋ+ o nɛi kuɛ o kpele lemasaa wo, nduyɛ ma hiau lachi a nyaanɔŋndo o nɛi kuɛ Aluaba wo.+ 5 Kɛ mi puaa chɔuwaa Kaadiaŋnda tisa nda kɔɔli, nduyɛ ma kɔ bii Sɛdikaya o pollo niŋ Chɛluiko.+ Mɛɛ nda bii ndu, ma kua a ndu o Nɛbukanɛɛsa,* masaa le Babilɔŋ ndo Luibila,+ o lɛŋnde Hamaati leŋ niŋ.+ Okoŋ, mbo kilul ndu yamɛi loŋ. 6 Mi masaa le Babilɔŋ tosa ma dii puaa Sɛdikaya wa Sɛdikaya pila o hɔl Luibila loŋ. Nduyɛ mi masaa tosa vɛlɛ ma dii laŋgbaa kalla Chuda kpou.+ 7 Okoŋ mbo pesi Sɛdikaya hɔltaŋ, mbo wou ndu o yɔlɔŋ nda toosiaa a chiliŋii siaŋɛi yoŋ* le kɔlaŋ a ndu Babilɔŋ.+
8 Mi Kaadiaŋnda mal vɛlɛ chiɛi lemasaa o yiŋ a chiɛila waŋnda.+ Nduyɛ, ma pesi pesi kpakilaŋ Chulusalɛm.+ 9 Mi Nɛbusaluadaŋ,+ wana bɛndu wanaa manda masaa wa kua a wanaa lo yoomu o chioo niŋnda, wanaa yɔŋguŋ o ndu lo wa, vɛlɛ a wana o wana lo yoomu o biyɔɔ niŋ Babilɔŋ.
10 Kɛ mi Nɛbusaluadaŋ, wana bɛndu wanaa manda masaa wa mɛi wanaa bala fonduaa apum, a nɔ nyɛ o nyɛ le wa o lɛŋnde Chuda leŋ niŋ. O paale leŋ choo, mbo ke nda vɛlɛ kpelela makilepiilaŋ a yondolaŋ le wallo* tosaa.+
11 Okoŋ kɔɔli, mi Nɛbukanɛɛsa* masaa le Babilɔŋ dimul Nɛbusaluadaŋ wana bɛndu wanaa manda masaa wa a Chɛluimaya okɔɔ aa: 12 “Chua Chɛluimaya ma wa ndu hɔlteŋ choo. Tosal ndu suɛi wɔɔŋ te. Nduyɛ nyɛ o nyɛ o yeema pɛ, a ke ndu.”+
13 Okoŋ mi Nɛbusaluadaŋ, wana bɛndu wanaa manda masaa wa, Nɛbusiasibaŋ Luabisalueisinɔɔ,* Nɛka-sialuisa Luamakinɔɔ,* a laŋgbaa kalaa masaa le Babilɔŋ kpou viam waŋnda, 14 ma kɔ chua Chɛluimaya o Luŋ Wanaa Manda Masaa Wa,+ ma huŋ a ndu o Kɛdalaya lo,+ po Ahikam ndo+ o Siafaŋ velu wo,+ le mbo kuɛ a ndu o ndu lo chiɛiniŋ. Loŋ Chɛluimaya wa niŋ ni a waŋnda latulu.
15 Teleŋ Chɛluimaya wa o biyɔɔ niŋ o Luŋ Wanaa Manda Masaa Wa wo,+ mi Chɛhowa suaa o ndu lo, mbo dimul ndu aa: 16 “Kɔ dimul Ɛbɛdi-mɛlɛki+ Itoopiaanɔɔ aa, ‘Nyɛ Chɛhowa, Mɛlɛka puaa chɔuwa, Mɛlɛka Isɔluɛiya dimi wo cho hoo ni: “Nyɛpalaa ya dimi le chioo hoo tusioo choo wo, I cho ndu peelu. Nduyɛ o paale leŋ choo, a cho ndi chɔ o yɔŋnɔŋndo.”’
17 “‘Kɛ I cho num piŋi o paale leŋ choo, nduyɛ I mel num niŋ puaa ŋ nɔ siooŋnde le nda wa o ba le.’ Chɛhowa dimi lende ni.
18 “‘A tonya, I cho tosa ma hɛluŋ, a sɔla niŋ piɔmndo a muɛi faŋnde le. I cho yoomu numndo piŋi+ le mɛɛ ŋ dɔu tiindaŋndo o ya niŋ yɛ.’+ Chɛhowa dimi lende ni.”
40 Mi Chɛhowa suaa naa Chɛluimaya chua mɛɛ Nɛbusaluadaŋ,+ wana bɛndu wanaa manda masaa wa mal ndu Luama le mbo kuɛŋnuŋ.+ Loŋ Nɛbusaluadaŋ kuɛ a ndu ni a balaŋ ndu la yiyaa a yɔlɔŋ. Nduyɛ, o wa o wanaa ndaa bii Chulusalɛm a Chuda ma kua a nda o biyɔɔ niŋ Babilɔŋ nda tɛɛŋ. 2 Okoŋ, mi wana bɛndu wanaa manda masaa wa hiau a Chɛluimaya o lesɔŋgi, mbo dimul ndu aa: “Chɛhowa Mɛlɛka numndo ndoo dimi niŋ a kpundɛ yɔŋnuŋ o fondaa hoo wo okɔɔ, 3 nduyɛ mi Chɛhowa tosa a mɛɛ o dimi yɛ. Kanifuule mi la tosa hakioo a Chɛhowa, la diikuŋ nyɛ o dimul nya wo le. Le saboo hoo hei yɔŋnuŋ a nya ni.+ 4 Lelaŋ, I cho yɔlɔŋ nda yii num o laba woŋ timbi paale hauleŋ ndeŋ mi mal num. Te o bɛnda a num pɛ, huŋ kɔ latulu Babilɔŋ. I cho num wa hɔlteŋ choo. Kɛ te a yeema lakɔ a ya latulu Babilɔŋ te, mɛɛ lo nanuŋ. O lɛŋndeŋ ndeŋ niŋ kpou, ba o ba ŋ yeema pɛ, a kuɛ loŋ.”+
5 Chɛluimaya lo yiyaŋndo le miiŋgoo, mi Nɛbusaluadaŋ dimul ndu aa: “Miiŋgu o Kɛdalaya lo,+ po Ahikam ndo,+ o masaa le Babilɔŋ yulu iso le mbo wa chieeŋ bɛndoŋ o Chuda niŋ chilaŋ ndo, ma kɔ wa a ndu latulu waŋnda tɛɛŋ, ɔɔ ma kuɛŋnuŋ ba o ba ŋ yeema pɛ. Ahikam yɛ, Siafaŋ velu ndu ni.”+
Mi wana bɛndu wanaa manda masaa wa ke ndu nyɛdiaa a nyɛm cheleŋndoŋ, nduyɛ mbo mal ndu mbo kuaŋnuŋ. 6 Okoŋ mi Chɛluimaya kua Misipa+ o Kɛdalaya lo, po Ahikam ndo, mbo kɔ wa a ndu latulu wanaa ndaa lo o lɛŋndeŋ niŋnda tɛɛŋ.
7 Mɛɛ teleŋ tiŋ hiou, wanaa wa puaa chɔuwa bolle wa a puaa ndaa chɔuwa kpou, a waŋnuŋ yondoo niŋnda, ma tuɛi maa masaa le Babilɔŋ yulu Kɛdalaya, po Ahikam ndo iso, le mbo wa wanaa lo o lɛŋndeŋ niŋnda chilaŋ, puaa, waŋ laanduaa, a chuauwaa wanaa bala fonduaa nda kue o biyɔɔ niŋ Babilɔŋ te wa.+ 8 Okoŋ ma kua Misipa+ naa Kɛdalaya chua. Nda cho haa ni: Isimɛɛ+ po Nɛtanaya wo, Chohinaŋ+ nda Chonataŋ puaa Kaluiya wa, Sɛluiya po Tanihumɛti wo, Ɛfai Nɛtofataitiinɔɔ puaa nduaa, a Chɛsanaya+ po Maakataitiinɔɔ, vɛlɛ a puaa ndaa chɔuwa latulu. 9 Mi Kɛdalaya po Ahikam ndo, o Siafaŋ velu wo mɛnaŋ mbo chuel nda a puaa ndaa buŋgɛi, mbo dimi aa: “La yɔŋ isiooŋ le wallo tosaa le Kaadiaŋnda le. La wa o lɛŋndeŋ ndeŋ niŋ mi la tosa wallo le masaa le Babilɔŋ, nduyɛ nyɛ o nyɛ cho wa o kɛndɛ le nya.+ 10 Kɛ le ya ndu, I cho lo Misipa nanuŋ mi wa hɔlte nya,* le Kaadiaŋaa cho wa hunɔɔ o naa lo wa. Kɛ nya la kɔ chal o chieeŋ bɛnduŋ nya bii yoŋ niŋ, mi la chuuŋgiaa muɛiyaŋ, komɔɔla lesialtaŋ, chuɛiyaŋ, nduyɛ mi la dɔu muŋ o chiɛila nya manda nyɔɔŋ niŋndaŋ.”+
11 Nduyɛ mi Chuuwaa wa Mowaabi, Amɔŋ, Idɔm, a o lɛŋii cheleŋnde niŋnda kpou bɛɛ tuɛi maa masaa le Babilɔŋ mɛi Chuuwaa lo yoomu wa apum o lɛŋnde Chuda leŋ niŋ, nduyɛ mbo yulu Kɛdalaya po Ahikam ndo, o Siafaŋ velu wo iso le mbo wa nda chilaŋ. 12 Okoŋ mi Chuuwaa ndaa saŋnuŋ o fondaŋnda yɛ yɛlaŋ niŋnda kpou kandu miiŋgoo o lɛŋnde Chuda leŋ niŋ Misipa, naa Kɛdalaya chua. Nduyɛ ma chuuŋgiaa muɛiyaŋ a komɔɔla lesialtaŋ tau tau.
13 Mi Chohinaŋ, po Kaluiya wo a wanaa wa puaa chɔuwa bolle ma wa yondolaŋ niŋnda kpou huŋ Misipa o Kɛdalaya lo. 14 Ma dimul ndu aa: “A sina nuaa maa Baalisi, masa Amɔnaitiiya+ vem Isimɛɛ po Nɛtanaya wo le num diyɔɔ le?”+ Kɛ Kɛdalaya, po Ahikam ndo laalaŋ nyɛ nda dimul ndu wo le.
15 Okoŋ mi Chohinaŋ, po Kaluiya wo dimul Kɛdalaya Misipa loŋ sɔɔsɔɔ aa: “I yeema mi kuɛ mi kɔ dii Isimɛɛ po Nɛtanaya wo, wana o wana sina a ndi okɔɔ le. Le yɛɛnɛ mbo dii num, mi waŋnda Chuda kpou, a chuuŋgiaŋ haa naa num chua wa a sɛŋiŋ, nduyɛ mi wanaa lo yoomu o Chuda niŋnda sɔla tambei?” 16 Kɛ mi Kɛdalaya,+ po Ahikam ndo dimul Chohinaŋ po Kaluiya wo aa: “Tosa i waa lende le. Kanifuule nyɛ ŋ cho dimioo a Isimɛɛ okɔɔ wo cho tonya le.”
41 O paŋgii ŋɔmmɛu ve niŋ, mi Isimɛɛ+ po Nɛtanaya wo, o fula o yuŋgu lemasaa* choo wo, vɛlɛ a waŋndo o pilɛ o laŋgbaa kalaa masaa tɛɛŋ huŋ a puaa cheleŋ tɔ Misipa,+ naa Kɛdalaya chua, po Ahikam ndo. Nɛtanaya yɛ, finya ndɔ wa Ɛlisiama ni. Mɛɛ nda wa nyɛdiaa dioo latulu Misipa, 2 mi Isimɛɛ po Nɛtanaya wo, a puaa tɔ wa a ndu latulu wa chaŋ ma dii Kɛdalaya po Ahikam ndo, o Siafaŋ velu wo a muɛi faŋnde. Okoŋ mi Isimɛɛ dii wana masaa le Babilɔŋ yulu iso le chilaŋ chuaa o lɛŋndeŋ niŋndo. 3 Mbo diu diu vɛlɛ Chuuwaa wa latulu a Kɛdalaya Misipa wa, vɛlɛ a puaa chɔuwaa Kaadiaŋaa wa loŋ nda kpou.
4 Mɛɛ nda dii Kɛdalaya, tuupa mi wana o wana sina a ndi okɔɔ diimandɔɔ, 5 mi puaa 80 fula Siɛkɛm,+ Silɔɔ,+ a Sameeliaa,+ ma huŋ loŋ. Siɛiyoŋ wa nda ŋ sendiaa, domala ndalaŋ la sɛɛsiɛi, ma tɛɛndiaa dialuŋ ndaŋ,+ nduyɛ salala ŋkultaŋ a filaŋkiŋsɛŋ+ wa nda o laba le hunɔɔ a nyɔɔŋ muŋ o chiɛi Chɛhowa wo. 6 Okoŋ mi Isimɛɛ po Nɛtanaya wo chaŋ Misipa mbo wa kɔlaŋ naa nda chua a chaŋndo. Mɛɛ o komal nda, mbo dimul nda aa: “La huŋ naa Kɛdalaya chua, po Ahikam ndo.” 7 Kɛ mɛɛ nda hel chiee, mi Isimɛɛ po Nɛtanaya wo, a puaa nduaa diu diu nda ma nyindu nda o sooŋndo niŋ.
8 Kɛ mi puaa tɔ nda tɛɛŋ dimul Isimɛɛ aa: “Yandii dii naa le, kanifuule ŋ nɔ witiiyoŋ, baliiyoŋ, chuɛiyaŋ, a liaaŋ ma viaŋaa yondoo niŋ.” Le hei, o dii lɛ nda a puaapiliaa ndaa latulu le. 9 Okoŋ, mi Isimɛɛ nyindu dialuŋ puaa o diu wa kpou o sooŋ bɛndoo niŋ, sooŋ Masaa Esa tou boondii o wa Baasia, masaa le Isɔluɛi chɔulabaa ve.+ Mi Isimɛɛ po Nɛtanaya wo pei sooŋndo hoo cha a laŋgbaa o diu wa.
10 Mi Isimɛɛ chua wanaa lo Misipa wa kpou,+ kɔ bii a chuauwaa laanduaa masaa velu wa, vɛlɛ a wana o wana Nɛbusaluadaŋ, wana bɛndu wanaa manda masaa wa mel Kɛdalaya,+ po Ahikam ndo Misipa wa. Mi Isimɛɛ po Nɛtanaya wo chua nda mbo kuaŋnuŋ a nda o biyɔɔ niŋ le mbo kɔ taŋ o Amɔnaitiiya lo.+
11 Mɛɛ Chohinaŋ+ po Kaluiya wo, a wanaa wa puaa chɔuwa bolle wa a wa a ndu latulu wa tuei a sɔɔŋ dɛnɛ wɔɔŋ Isimɛɛ, po Nɛtanaya wo tosa woŋ kpou okɔɔ, 12 ma chua puaa ndaa kpou, ma kua Isimɛɛ, po Nɛtanaya wo kɔɔli le ndu chiŋalaŋndo a sɔŋgɔɔ. Okoŋ, ma kɔ saaluŋ ndu o pee bɛndoo* Kibiɔŋ.
13 Mi wanaa wa a Isimɛɛ latulu wa kpou duaunuŋ nyaale mɛɛ nda che Chohinaŋ, po Kaluiya wo, vɛlɛ a wanaa wa puaa chɔuwa bolle ma wa a ndu latulu wa kpou. 14 Okoŋ, mi wanaa Isimɛɛ chua Misipa+ mbo wa kɔlaŋ a nda o biyɔɔ niŋnda kpou muliŋ, ma nyaanuŋ naa Chohinaŋ chua, po Kaluiya wo. 15 Kɛ mi Isimɛɛ, po Nɛtanaya wo a puaa nduaa a ŋɔmaa hialuŋ Chohinaŋ, okoŋ ma kuaŋnuŋ o Amɔnaitiiya lo.
16 Mi Chohinaŋ po Kaluiya wo a wanaa wa puaa chɔuwa bolle ma wa a ndu latulu wa kpou chua wanaa tuaa lo yoomu Misipa wa, a nda piŋi Isimɛɛ po Nɛtanaya wo o ba wa, mɛɛ o dii Kɛdalaya+ po Ahikam ndo. Ma chua puaa, puaa chɔuwa, waŋ laanduaa, chuaambuaa, a laŋgbaa kalla, ma chaŋ Kibiɔŋ ma miiŋgu a nda. 17 Okoŋ ma kua, ma kɔ chal o fondaŋ Chimiham wa o yiya Bɛtilɛhɛm ikɛi yo.+ Ma kɛɛsiaa le kɔŋndaŋ Ichipi,+ 18 kanifuule siooŋnde wa nda le Kaadiaŋnda. Le mɛɛ Isimɛɛ po Nɛtanaya wo dii Kɛdalaya po Ahikam ndo, o masaa le Babilɔŋ yulu iso le mbo wa chilaŋ o lɛŋndeŋ niŋndo+ yɛ siooŋnde wa nda ni.
42 Mi wanaa wa puaa chɔuwa bolle wa kpou, a Chohinaŋ+ po Kaluiya wo, Chɛsanaya po Hoosaya wo, vɛlɛ a waŋnda kpou, wana sulaa ni, wana bala fondo ni, chuaambɔ ni, kaasoŋnɔ ni, ma huŋ 2 dimul Chɛluimaya, wana suaa le Mɛlɛka wo aa: “Yandii yaŋ nilaŋ ma tuiinuŋ naa inyiɛɛ, ma piɛi le naa o Chɛhowa Mɛlɛka numndo lo le wanaa lo haa yoomu wa. Kanifuule waŋnda nyɛɛmbɔ koni lo niŋ ni,+ a mɛɛ numpila cho chɔɔ yɛ. 3 Maa Chɛhowa Mɛlɛka numndo dimul naa nɛi naŋ nɔ miŋ kuɛ choo wo, vɛlɛ a nyɛ naŋ nɔ miŋ tosa wo.”
4 Mi Chɛluimaya, wana suaa le Mɛlɛka wo dimul nda aa: “I tuei nyɛ nya dimi wo. Nduyɛ, I cho piɛi o Chɛhowa Mɛlɛka nyaa lo a mɛɛ nya dimi yɛ. Nyɛ o nyɛ Chɛhowa mulul nya pɛ, I cho nya dimul. Diomndo o pilɛ bɛɛ I cho mɛi kɔɔli le.”
5 Ma dimul Chɛluimaya aa: “Te ŋ tosa nyɛ Chɛhowa Mɛlɛka numndo dimul num le ma dimul naa wo le, maa Chɛhowa, o cho sei wana nɔla ma tiindaŋ nduyɛ mbo dimi tonyaa wo tusi naa nyɛpalaa choo. 6 Nyɛ o nyɛ Chɛhowa Mɛlɛka naa, o naŋ cho num viomɔɔ o ndu lo wo dimi pɛ, o wa suɛi kɛndɛ ɔɔ suɛi wɔɔŋ, ŋ cho ndu diikɔŋ, le halikpeŋ mi nyɛ o nyɛ wa o kɛndɛ a naa, le mɛɛ naŋ diikuŋ nyɛ Chɛhowa Mɛlɛka naa dimi wo yɛ.”
7 Palɛi tɔ o koŋ kɔɔli, mi Chɛhowa suaa naa Chɛluimaya chua. 8 Okoŋ mbo yooŋgu Chohinaŋ po Kaluiya wo, wanaa wa puaa chɔuwa bolleŋ ma wa a ndu latulu wa, vɛlɛ a waŋnda kpou, wana bala fondo ni, wana sulaa ni, chuaambɔ ni, kaasoŋnɔ ni.+ 9 Mbo dimul nda aa: “Chɛhowa, Mɛlɛka Isɔluɛiya, o nya vem ya le mi kɔ nyɔɔlu ndu mbo tuiinuŋ nya inyiɛɛ yo, nyɛ o dimi wo cho hoo ni: 10 ‘A tonya, te la chal pɛ o lɛŋndeŋ ndeŋ niŋ, I cho nya taŋgul, I tɛɛmbuu niŋ nya le, nduyɛ mi tɔl nya mɛɛ nda tual nuaa yɔmndo yɛ. I suŋgu niŋ nya le, kanifuule nyiɛɛye cho ya biyɔɔ le kpundɛla ya tusi niŋ nya choo laŋ.’+ 11 Chɛhowa dimi aa: “‘Siooŋii bii nya le masaa Babilɔŋ te.+
La yɔŋ isiooŋ le ndu le, kanifuule I cho a nya latulu. I cho nya piŋi, nduyɛ mi chiindiaa nya ndu o ba. 12 I cho nya tuiinɔŋ inyiɛɛ,+ mi ndu bɛɛ tuiinuŋ nya inyiɛɛ, okoŋ mbo miŋgi nya o lɛŋnde nyaleŋ niŋ.
13 “‘Kɛ te la dimi pɛ aa, “Ŋ cho lo o lɛŋndeŋ ndeŋ niŋ te!” nduyɛ mi la kɛɛ le Chɛhowa Mɛlɛka nyaa diikɔŋndo, 14 okoŋ mi la dimi aa, “O lɛŋnde Ichipi leŋ niŋ naŋ cho lakɔ ichali ni.+ Loŋ ndu, ŋ chi lɛ niŋ chɔu le, ŋ tui lɛ niŋ bulu chɔu le, nyɛdiaa* lepɛŋ ve lɛ niŋ naa le, nduyɛ maa loŋ naŋ cho wa ichali ni,” 15 mɛɛ nya lo yoomu o Chuda niŋnda, la tuei nyɛ Chɛhowa dimi wo. Nyɛ Chɛhowa, Mɛlɛka puaa chɔuwa, Mɛlɛka Isɔluɛiya dimi wo cho hoo ni: “Te la kɛɛsiaŋ pɛ o lakɔl le kɔlaŋ Ichipi, nduyɛ mi la yeema le challe loŋ,* 16 muɛi faŋii nya cho siooŋnde le ndi ve cho nya tolɔɔ kɔɔli o lɛŋnde Ichipi leŋ niŋ, okoŋ mi yima bɛnduma nya cho siooŋnde le maŋ ndaŋ bɛɛ ma tol nya kɔɔli Ichipi, nduyɛ loŋ nya cho wu ni.+ 17 Wanaa kɛɛsiaŋ o kɔl le kɔlaŋ challe Ichipi wa kpou, muɛi faŋnde, yima bɛnduaŋ, vɛlɛ a naala taŋ waŋnda laŋ la cho nda chii paku. Wana pilɛ bɛɛ cho chinda, ɔɔ mbo hɛluŋ kpundɛ ya cho nda tusi choo wo le.”’
18 “Kanifuule nyɛ Chɛhowa, Mɛlɛka puaa chɔuwa, Mɛlɛka Isɔluɛiya dimi wo cho hoo ni: ‘Mɛɛ ya tusi kɔl ni tuuwo waŋnda Chulusalɛm choo yɛ,+ lende ya cho nya kɔl ni tuuwo tusi choo ni te la kuɛ pɛ Ichipi. Sendioo cho nya wa choo, nduyɛ mi siooŋnde bii waŋnda a nyɛ yɔŋnuŋ niŋ nya wo. La cho simnɔŋ nyɛ mamaa,+ nduyɛ sala ve niŋ nya choo le. Fɛɛŋ bɛɛ la chi lɛ niŋ fondaa hoo le.’
19 “Nya wanaa lo yoomu o Chuda niŋnda, Chɛhowa kuuna nya le kɔlaŋ Ichipi. Lelaŋ, la kua le. La puɛɛnuŋ sila ya ke nya hau a suɛi hei okɔɔ wo le. 20 Te la tosa biondɔŋndo pɛ, yoomula nyalaŋ la cho lo leniŋ. Kanifuule mi la viam ya o Chɛhowa Mɛlɛka nyaa lo, mi la dimi aa, ‘Piɛi le naa o Chɛhowa Mɛlɛka naa lo, nduyɛ ma dimul naa nyɛ o nyɛ Chɛhowa Mɛlɛka naa cho num dimul, okoŋ ŋ cho tosa nyɛ o dimi wo.’+ 21 Nduyɛ, I chii nya hau dimul nyɛ Mɛlɛka dimul la wo. Kɛ la cho Chɛhowa Mɛlɛka nyaa diikɔŋ te, kɛlɛŋgaa niŋ te mi la tosa nyɛ o vem ya le mi dimul nya wo.+ 22 Lelaŋ, la sina pɛŋgu kpendekele maa muɛi faŋnde, yima bɛnduaŋ, a naala taŋ waŋnda laŋ la cho nya chii o fondaŋ nya nɔ yeemɛi le kɔlaŋ challe wo niŋ.”+
43 Mɛɛ Chɛluimaya chii waŋnda kpou dimul diomnda Chɛhowa Mɛlɛka ndaa, nyɛ o nyɛ Chɛhowa Mɛlɛka ndaa vem ndu le mbo dimul nda, 2 mi Asaluaya po Hoosaya wo, Chohinaŋ+ po Kaluiya wo, a puaa nɔ yoŋgaa wa kpou dimul Chɛluimaya aa: “Choolaŋ ŋ cho dimioo ni! O cho Chɛhowa Mɛlɛka naa le vem num le ma huŋ dimul naa aa, ‘La kua Ichipi mi la kɔ chal loŋ te’ le. 3 Kɛ Baluki+ po Nɛluaya wo cho num nyindɔɔ ni le naa malɔɔ Kaadiaŋnda o ba ma diu naa, ɔɔ ma kuɛ a naa o biyɔɔ niŋ Babilɔŋ.”+
4 Le hei, mi Chohinaŋ po Kaluiya wo, waŋ banaa puaa chɔuwa, a waŋnda kpou kɛɛ le Chɛhowa diikɔŋndo le loo o lɛŋnde Chuda leŋ niŋ. 5 Okoŋ waŋnda Chuda, a lo yoomu ma sɛŋiŋ o lɛŋii cheleŋnde niŋ, kɛ ma miiŋgu le challe o lɛŋnde Chuda leŋ niŋnda, mi Chohinaŋ po Kaluiya wo, a waŋ banaa puaa chɔuwa kpou chua nda, ma kua a nda latulu.+ 6 Ma chua puaa, waŋ laanduaa, chuaambuaa, chuaa laanduaa masaa velu wa, a wana o wana Nɛbusaluadaŋ,+ wana bɛndu wanaa manda masaa wa mel Kɛdalaya+ po Ahikam ndo,+ o Siafaŋ velu wo,+ Chɛluimaya wana suaa le Mɛlɛka wo, vɛlɛ a Baluki po Nɛluaya wo. 7 Okoŋ, ma kuaŋnuŋ o lɛŋnde Ichipi leŋ niŋ. Ma kɛɛ le Chɛhowa diikɔŋndo, nduyɛ ma kuaŋnuŋ pɔɔli Tapanɛsi.+
8 Okoŋ kɔɔli, Chɛluimaya wa Tapanɛsi mi Chɛhowa suaa o ndu lo aa: 9 “Chua pouta bɛndulaŋ, ma kɔ tuu laŋ o kpilikioŋ tɛɛŋ, o fondaŋ nda toosiaa le luɛiyɔɔ o Feloo lo chiɛiniŋ Tapanɛsi wo. Tosa ndi Chuuwa o hɔl le ma wa num chɔɔ. 10 Okoŋ ma dimul nda aa, ‘Nyɛ Chɛhowa, Mɛlɛka puaa chɔuwa, Mɛlɛka Isɔluɛiya dimi wo cho hoo ni: “I cho buɛi nuu Nɛbukanɛɛsa* masaa le Babilɔŋ yooŋgu,+ mbo huŋ handu kpeŋgbei* ndɔ lemasaa, o fondaŋ ya tuu hoo poutaŋ ndo kpeekpei. Nduyɛ, o cho tɛndii ndɔ lemasaa kindɔɔ o laŋ choo.+ 11 O cho hunɔɔ mbo huŋ chiŋalaŋ lɛŋnde Ichipi leŋ.+ Apum cho piɔmndo sɔla a naala dii waŋnda laŋ, ma kuɛ a apum o biyɔɔ niŋ, nduyɛ ma diu apum a muɛi faŋnde.+ 12 I cho chiɛila* mɛlɛkaa ndaa o Ichipi niŋ malɔɔ o yiŋ.+ Masaa le Babilɔŋ cho laŋ lomɔɔ, nduyɛ mbo kuɛ a nda o biyɔɔ niŋ. O cho lɛŋnde Ichipi leŋ sayiaŋ lekɔɔ, mɛɛ wana mandaa lasaa sayiaŋ nuaa doma ndɔ bɛndoo lekɔɔ yɛ, okoŋ mbo faŋaŋ ndoŋ o kɔl nyulu niŋ.* 13 O cho suŋgbuma cho Bɛti-siɛmɛsi* o lɛŋnde Ichipi leŋ niŋndaŋ pesi pesi wɔ wɔ, nduyɛ mbo mal chiɛila* mɛlɛkaa o Ichipi niŋ o yiŋ.”’”
44 Yooŋgu Chɛluimaya sɔla le Chuuwa kpou a wa ichali o lɛŋnde Ichipi leŋ niŋ,+ Mikidɔɔ,+ Tapanɛsi,+ Nɔɔfi,*+ a lɛŋnde Patɔlɔsi leŋ+ ndo cho hoo ni. Mbo dimul nda aa: 2 “Nyɛ Chɛhowa, Mɛlɛka puaa chɔuwa, Mɛlɛka Isɔluɛiya dimi wo cho hoo ni, ‘La che kpundɛ ya tusi Chulusalɛm choo+ a chieeŋ bɛndoŋ o Chuda niŋ kpou wo. Chiooŋ muŋ cho hau ŋ tambɛiyoŋ, wana o wana cho loŋ te.+ 3 Hei yɔŋnuŋ le sɔɔŋ dɛnɛ wɔɔŋ nda tosa le ya kɔllo tɛɛmbuuwo woŋ. A wa salalaŋ solioo+ ma biilu mɛlɛkaa cheleŋnda, mɛlɛkaa nda a finyaa ndaa mamaa sina le wa.+ 4 Mi hiau lachi a buɛiyaa niaa suaa le ya wa kpou yɔŋndo naa nda chua. Mi viam nda o nda lo lediiŋ diiŋ* ma dimul nda aa: “Yandii, la tosa suɛi wɔɔŋii ya tul hei leyɛ ve le.”+ 5 Kɛ a yeŋ nilaŋ ma mulul sɔɔŋ wɔɔŋ nda wa tosaa woŋ kɔɔ le, kɛlɛŋgaa niŋ te ma pɛŋgi salalaŋ solioo o mɛlɛkaa cheleŋnda lo.+ 6 Le hei, mi chuiŋi kɔl ni tuuwo mbo luam chieeŋ bɛndoŋ Chuda a nɛila bɛndulaŋ Chulusalɛm, okoŋ miŋ tambu miŋ simnuŋ pɔmndaŋ, a mɛɛ ŋ cho hau nuaa yɛ.’+
7 “Nyɛ Chɛhowa, Mɛlɛka puaa chɔuwa, Mɛlɛka Isɔluɛiya dimi wo cho hoo ni, ‘Le yɛɛ nya cho yɛ kpundɛ bɛndoo tusiŋndo choo? Keŋ cho tosa mi wana o wana sɔla tambei o Chuda niŋ, wana pɔnɔ ni, wana lanɔ ni, chuaambɔ ni, chɛlɛkpɛ ni, waŋndo o pilɛ bɛɛ lo niŋ yoomu le. 8 Le yɛɛnɛ nya cho yɛ ya kɔllo tɛɛmbuuwo a sɔɔŋ nya cho tosaa woŋ, mi la soli salalaŋ o mɛlɛkaa cho o lɛŋnde Ichipi leŋ niŋnda lo, naa nya kuɛ le challe wa? La cho tambei sɔla nduyɛ mi la simnuŋ nyɛ sendi a nyɛ mamaa o lɛŋnde niŋ kpou o chieeŋndo choo.+ 9 Baa la puɛɛnuŋ sɔɔŋ dɛnɛ wɔɔŋ finyaa nyaa mamaa, masaa nyaa o Chuda niŋ+ a laandaa ndaa,+ nyapila vɛlɛ a laandaa nyaa+ tosa o lɛŋnde Chuda leŋ niŋ a o nɛila bɛndulaŋ choo Chulusalɛm ndoŋ? 10 Haaa a paale hauleŋ ndeŋ, a tusiŋ ma nɔ siooŋii nii le,+ kɛlɛŋgaa niŋ te ma kuɛ o sawala nilaŋ choo, la ya ke nda a finyaa ndaa mamaa laŋ.’+
11 “Lelaŋ nyɛ Chɛhowa, Mɛlɛka puaa chɔuwa, Mɛlɛka Isɔluɛiya dimi wo cho hoo ni, ‘I kɛɛsiaa le mi hiŋ a kpundɔɔ nda choo, mi tɛɛmbuu Chuda kpou. 12 Wanaa lo yoomu o Chuda niŋ ma kɛɛsiaa le kɔlaŋ challe o lɛŋnde Ichipi leŋ niŋnda, I cho tosa mi nda kpou sɔla tambei o lɛŋnde Ichipi leŋ niŋ.+ A cho piɔmndo sɔla a muɛi faŋnde vɛlɛ a yima bɛnduaŋ. Chuaambɔ ni, kaasoŋnɔ ni, wana bala fondo ni, wana sulaa ni, nda kpou cho piɔmndo sɔla a muɛi faŋnde, vɛlɛ a yima bɛnduaŋ. Sendioo cho nda wa choo nduyɛ mi siooŋnde bii waŋnda a nyɛ yɔŋnuŋ niŋ nda wo. A cho simnɔŋ nyɛ mamaa,+ nduyɛ sala ve niŋ nda choo le. 13 I cho wanaa cho ichali o lɛŋnde Ichipi leŋ niŋnda nyɛpalaa tusi choo, mɛɛ ya tusi Chulusalɛm nyɛpalaa choo a muɛi faŋnde, yima bɛnduaŋ, vɛlɛ a naala taŋ waŋnda laŋ yɛ.+ 14 Wanaa lo yoomu o Chuda niŋ ma kua le challe o lɛŋnde Ichipi leŋ niŋnda, a heluŋ niŋ kɛlɛŋgaa ma chinda le miiŋgoo o lɛŋnde Chuda leŋ niŋ te. A cho nɔ yeemɛi le miiŋgoo ma kɔ chal loŋ, kɛ a miiŋgu niŋ te, mɛɛ le wanaa pɔmbuaa hɛluŋ nda.’”
15 Puaa ndaa sina maa mi laandaa ndaa wa salalaŋ solioo o mɛlɛkaa cheleŋnda lo wa kpou, a laandaa ndaa wa isisi loŋ ma wa kunda bɛndoo wa kpou, vɛlɛ a wana o wana wa o lɛŋnde Ichipi leŋ niŋ+ a Patɔlɔsi,+ ma mulul Chɛluimaya aa: 16 “Ŋ cho lani yaŋɔɔ o nyɛ ŋ dimul naa o diola Chɛhowa laŋ niŋndo le. 17 Kɛ nyɛ o nyɛ naŋ dimi le tosaa, ŋ cho hiouwɔɔ lachi a ndu tosaa. Ŋ cho wa salalaŋ solioo o Masa Laandoo Choo Choo* lo, nduyɛ miŋ tala salala mamuɛilaŋ o ndu lo.+ Lende naa, finyaa naa mamaa, masaa naa, a laŋgbaa naa kalla tosa o chieeŋ naŋ bɛndoŋ niŋ Chuda a o nɛila bɛndulaŋ choo Chulusalɛm ni. A boondii keŋ, mi naŋ de nyɛdiaa* miŋ hini kɔl. Nduyɛ ŋ waŋnuŋ nyɛkɛndɛi, kpundɛ o kpundɛ komal naa le. 18 Kɛ chɔŋ a teleŋ naŋ pɛŋgi salalaŋ solioo o Masa Laandoo Choo Choo* lo, okoŋ miŋ pɛŋgi salala mamuɛilaŋ talaa o ndu lo wo, ŋ nɔ lɛ nyɛ o nyɛ le. Ŋ cho piɔmndo sɔlaa a muɛi faŋnde vɛlɛ a yiaaŋ.”
19 Mi waŋ laanduaa haa chɔɔlu dimi aa: “Piaandaa naa chɛl ni miŋ wa salalaŋ solioo o Masa Laandoo Choo Choo* lo. Nda chɛl ni miŋ wa salala mamuɛilaŋ talaa o ndu lo, a katolaŋ toosiaa o velaŋ ndɔɔ niŋ.”
20 Okoŋ mi Chɛluimaya dimul waŋnda kpou, puaa a laandaa ndaa, vɛlɛ a wanaa wa suɛi o ndu lo wa kpou aa: 21 “Salala nya, finyaa nyaa mamaa, masaa nyaa, laŋgbaa nyaa kalla a wanaa cho o lɛŋndeŋ niŋnda soli o chieeŋ bɛndoŋ niŋ Chuda a o nɛila bɛndulaŋ choo Chulusalɛm ndaŋ,+ Chɛhowa loonuŋ a laŋ nduyɛ mbo miŋgi kɔllo handɔɔ o laŋ choo. 22 O mɛɛlulaŋ kpɔŋ, mi Chɛhowa saŋga a nya biuwɔŋndo le sɔɔŋ dɛnɛ wɔɔŋ vɛlɛ a sɔɔŋ nɔɔlɛi nya tosa woŋ. Mi lɛŋnde nyaleŋ le simnuŋ nyɛ tambɛi, nyɛ sendi, nduyɛ mi siooŋnde bii waŋnda a nyɛ yɔŋnuŋ a leŋ ndo. Wana o wana cho ichali loŋ te, a mɛɛ i cho hau nuaa yɛ.+ 23 Le mɛɛ nya soli salalaŋ ndaŋ nduyɛ mi la tosa hakioo a Chɛhowa, mi la kɛɛ le Chɛhowa diikɔŋndo, la tul sawala ndɔlaŋ a nyɛ o nyɛ o dimul nya wo kɔɔli le yɛ, kpundɔɔ hoo tol nya choo ni, a mɛɛ i cho hau nuaa yɛ.”+
24 Mi Chɛluimaya hiau lachi a suɛi o waŋnda lo a o waŋ laanduaa lo kpou aa: “La tueiyɔ nyɛ Chɛhowa dimi wo nya waŋnda Chuda, a cho haa o lɛŋnde Ichipi leŋ niŋnda. 25 Nyɛ Chɛhowa, Mɛlɛka puaa chɔuwa, Mɛlɛka Isɔluɛiya dimi wo cho hoo ni, ‘Nyɛ nya a laandaa nyaa dimi wo, ndu nya tosa ni. Kanifuule mi la dimi aa: “Ŋ cho hiouwɔɔ lachi a buŋgaŋ naŋ chua le salalaŋ solioo o Masa Laandoo Choo Choo* lo, nduyɛ a salala mamuɛilaŋ talaa o ndu lo woŋ peelu.”+ Nya waŋ laanduaa haa, la cho tosa nyɛ nya dimi le tosaa wo.’
26 “Lelaŋ la tueiyɔ nyɛ Chɛhowa dimi wo, nya waŋnda Chuda kpou, nya cho o lɛŋnde Ichipi leŋ niŋnda. Chɛhowa dimi aa: ‘“La cho buŋgaŋ chuaa mi la dimi aa, ‘Te Chɛhowa, Mɛlɛka Kpuluŋguma Bɛndoo cho pɛ yoomu!’+ Kɛ I mɛnaŋ po a diola nila tɔɔmalaŋ maa wana o wana fula Chuda, o soliŋ lɛ diola nilaŋ kpeku le buŋgaŋ chuaa le.+ 27 Suŋ suŋ niŋ, I nɔ nda hɔlteŋ choo, o cho le mi chuu nda suɛi kɛndɛ le,+ kɛ le mi tusi nda kpundɔɔ choo. Wanaa fula Chuda ma wa ichali o lɛŋnde Ichipi leŋ niŋnda kpou, a cho lo tambei sɔlaa a muɛi faŋnde vɛlɛ a yima bɛnduaŋ haaa ma chuu paku.+ 28 Waŋnda nyɛɛmbɔ koni cho muɛi faŋnde hiɔlɔŋ ni ma mal lɛŋnde Ichipi leŋ, ma miiŋgu o lɛŋnde Chuda leŋ niŋ.+ Okoŋ wanaa lo yoomu o lɛŋnde Chuda leŋ niŋ ma kɔ chal o lɛŋnde Ichipi leŋ niŋnda kpou cho sina wana dimi tonyaa wo, te ya ni ɔɔ nda ni!”’”
29 “Chɛhowa dimi aa, ‘Tamasioo cho hoo ni, le nyɛpalaa ya tusi niŋ nya choo o lɛŋndeŋ ndeŋ niŋndo, le mi la sina maa kpundɛ ya dimi le nya tusioo choo wo, o nɔ le yɔŋnɔŋndo. 30 Nyɛ Chɛhowa dimi wo cho hoo ni: “I cho Feloo Hɔfilua, masaa le Ichipi malɔɔ yaamɔɔwaa nduaa o ba, a cho nɛilaŋ nuuviaa le ndu diyɔɔ wa, mɛɛ ya mal Sɛdikaya masaa le Chuda, Nɛbukanɛɛsa,* masaa le Babilɔŋ o wa yaamɔɔnɔ ndɔɔ, nduyɛ mbo wa nɛilaŋ nuuviaa le ndu diyɔɔ wo o ba yɛ.”’”+
45 Wɔsi hiɔɔlu ndɔ Chɛhowakim+ po Choosaya wo, masaa le Chuda wa o masaleŋ choo wo, mɛɛ Baluki,+ po Nɛluaya wo wa diomnda Chɛluimaya+ wa ndu dimullo laŋ poonyiaa o yauwo choo, nyɛ Chɛluimaya, wana suaa le Mɛlɛka wo dimul ndu wo cho hoo ni. Mbo dimi aa:
2 “Nyɛ Chɛhowa, Mɛlɛka Isɔluɛiya dimi a num okɔɔ wo cho hoo ni Baluki, 3 ‘A dimi aa: “Kpundɔɔ cho le ya, kanifuule Chɛhowa chɔɔlu ya mɔnɛi luei o nyɛ ni nɛiyaa choo. I cho niŋ o yɔkpɛiyo a chaŋ ya cho teleŋ o teleŋ ndo, nduyɛ I seeluŋ ndɔ fondaŋ pɛŋgiaa le.”’
4 “Dimul Baluki aa, ‘Nyɛ Chɛhowa dimi wo cho hoo ni: “Nyɛ ya taŋgul lo, I cho ndu piɔlɔɔ. Nduyɛ nyɛ ya tɔl lo, I cho ndu suŋgɔɔ. I cho hei tosa o lɛŋndeŋ niŋ kpou.+ 5 Kɛ a cho nyɛm bɛndoŋ nuuviaa* le numpila. Pɛŋgi nyɛm waa lende nuuviaa.”’
“‘Kanifuule, I cho suŋ kpundɛ bɛndoo tusi wana o wana choo.+ Nduyɛ ba o ba ŋ kuɛ pɛ, I cho yoomu numndo piŋi.’+ Chɛhowa dimi lende ni.”
46 Nyɛ Chɛhowa dimul Chɛluimaya, wana suaa le ndu wo a lɛŋnde okɔɔ wo cho hoo ni:+ 2 Yooŋgoo cho hoo ni le Ichipi,+ a puaa chɔuwaa Feloo Niko wa,+ masaa le Ichipi, o Nɛbukanɛɛsa,* masaa le Babilɔŋ yem Kakɛmisi o Pioo Yufiluaati ikɛi, o wɔsi hiɔɔlu ndɔ Chɛhowakim+ po Choosaya wo, masaa le Chuda wa o masaleŋ choo wo:
3 “La bɛɛndiaa boola nyala chɔula pɔmbɔlaŋ* a la bɛŋndaŋ,
Okoŋ mi la kuɛ le chɔuwo.
4 Nya puaa sɔŋga o suaa choo wa, la bɛɛndiaa suaa a nyɛm nyaanaŋ suaa naŋndoŋ.
La sim o fondaŋnda nyalaŋ le sɔŋgɔɔ, nduyɛ mi la wounuŋ mɔsilta nyala chɔulaŋ.
La bɛɛndiaa balta nyalaŋ nyɛkɛndɛi, nduyɛ mi la wounuŋ domala nyala chɔulaŋ.
5 Chɛhowa dimi aa, ‘Le yɛɛ ya cho yɛ nda chɔɔ mi kɔltaŋ la wa nda pulaŋ pulaŋ a siooŋii bɛnduei?
A yem kuubaa ndaa chɔuwa ma wa miiŋgoo a nyaanɔŋndo.
Kuubaa ndaa cho nyaanɔŋndo a kɔltaŋ nda pulaŋ pulaŋ, a nɔla ma muliŋ amakɔɔ le.
Sɔɔŋ ŋsiooŋndoŋ cho nda ŋ balaa silɔ.
6 Wana nyaanuŋ nyaanɔŋ labɛɛlaa wo nɔla lɛ kiltaŋ te,
Nduyɛ kuubaa ndaa chɔuwa bɛɛ nɔla ma hɛluŋ te.
A boŋ ma del ba luaŋ ndo, o Pioo Yufiluaati kɔŋgɔ.’+
7 Nɛɛnɛ cho yɛ hoo helɔɔ naŋ chaa mɛŋma hunaŋ o Pioo Nail ni,
Mɛɛ mɛŋndaŋ ma wa nuaa lɔɔnɔŋndo o peelaŋ niŋ yɛ?
8 Ichipi cho helɔɔ naŋ chaa mɛŋma hunaŋ o Pioo Nail ni,+
Mɛɛ mɛŋndaŋ ma wa nuaa lɔɔnɔŋndo o peelaŋ niŋ yɛ,
Nduyɛ mbo dimi aa, ‘I cho helɔɔ mi kumbu lɛŋndeŋ kpu.
I cho chiee bɛndoo tɛɛmbuu a wanaa cho leniŋ nda.’
9 Nya suaa, la hel tema!
Nya nyɛm nyaanaŋ suaa naŋndoŋ, la nyaanuŋ maa wanaa seemɛi!
Nya kuubaa chɔuwa,
Kusi, a Puti, nya bii haa boola puaa chɔuwa o laba wa,+
A Ludi,+ nya bii haa chiɔuwo o laba nduyɛ mi la kindu ndu wa,+ la chɔŋ mi la kuɛ o chɔuwo.
10 “Chɛhowa, Mɛlɛka Kpuluŋguma Bɛndoo, Mɛlɛka puaa chɔuwa, paale ndɔleŋ le cho leŋ ni. Paale ndeŋ o miŋgul niŋ yaamɔɔwaa nduaa maa ni. Muɛi faŋnde cho nda tɛɛmbuu, mi i pim kooma ndaŋ cha, nduyɛ mi i hini kɔl. Kanifuule Chɛhowa, Mɛlɛka Kpuluŋguma Bɛndoo, Mɛlɛka puaa chɔuwa nɔ le salaa solioo o lɛŋnde leŋ niŋ ba luaŋ ndo, o Pioo Yufiluaati ikɛi.+
11 Chua laandu yufuaanɔɔ Ichipi,
Chɔŋ ma kuɛ Kiliaadi ma kɔ bii chuɛima baasam ndaŋ.+
Fondo fuu koni ŋ cho nɛila yɛ yɛlaŋ nuuviaa ni le chiɔunɔŋndo,
Kanifuule a cho sioŋgɔɔ sɔla le.+
12 Lɛŋnde tuei a bɛɛla tambɛila numndaŋ okɔɔ,+
Nduyɛ a mɛɛ chaŋnda numndaŋ la tiu o lɛŋndeŋ niŋ silɔ yɛ.
Kuubaa chɔuwa cho kuundiaŋ vellaa velle,
Okoŋ mi nda ŋiɔɔŋ kpou del diompilɛ.”
13 Nyɛ Chɛhowa dimul Chɛluimaya, wana suaa le ndu wo a mɛɛ Nɛbukanɛɛsa,* masaa le Babilɔŋ huŋ niŋ mbo yem lɛŋnde Ichipi leŋ+ ndo yɛ cho hoo ni:
14 “Yonda a ndi okɔɔ o Ichipi niŋ a o Mikidɔɔ niŋ,+
Dimi aa, ‘La sim o fondaŋnda nyalaŋ nduyɛ mi la bɛɛndiaŋ.
Kanifuule, muɛi faŋnde cho wanaa balu nya wa kpou diu.
15 Le yɛɛnɛ nda basu yɛ laŋgbaa nyaa kpaayaa bɛnduaa tɛɛ?
A nɔla ma sim yi le,
Kanifuule Chɛhowa nyindu nda ni ma del.
16 A cho boŋi boŋioo a hɔbɛi ma wa delioo lɛɛsiɛŋ.
A cho dimulaŋndo aa:
“La chɔŋ! Ŋ nyaanuŋ muɛi faŋii dɛnɛ wɔɔŋnde,
Miŋ miiŋguŋ o lɛŋnde naaleŋ niŋ o wanaa naa lo.”’
17 Loŋ puaa nduaa chɔuwa dimi ni aa,
‘Feloo masaa le Ichipi, tombola fondoo koni o tombola ni kɛ o tosa nyɛ o nyɛ le.
O lo tofaa mi teleŋ ndoo sɔla fondaa le sɔɔŋ tosaa wo hiaunuŋ.’+
18 Masaa, o nɔ diolaŋ aa Chɛhowa, Mɛlɛka puaa chɔuwa wo, nyɛ o dimi wo cho hoo ni, ‘Mɛɛ i cho kpendekele maa I cho yoomu yɛ,
O* cho hunɔɔ mɛɛ Tabɔɔ+ cho nuaa o pemboŋ tɛɛŋ yɛ,
Vɛlɛ a mɛɛ Kamɛɛ+ cho nuaa o pee mɛŋma ihɛllo ikɛi yɛ.
19 Num chua laandoo Ichipi,
Bɛɛndiaa bɔlɔ numndo le kɔlaŋ o biyɔɔ niŋ.
Kanifuule, Nɔɔfi* cho simnɔŋ nyɛ waŋnda cha mi siooŋnde bii nda wo.
A cho ndu malɔɔ o yiŋ,* nduyɛ wana o wana chel lɛ niŋ loŋ te.+
20 Ichipi cho ko maa nau towa kɛndɛ kɛndɛ naŋ nuaa wo.
Kɛ nyaa biaŋaa cho chɔnɔŋ ba luaŋ ndo ma huŋ tol ndu choo.
21 Puaa nduaa chɔuwaa o pendu ma wa o lɛŋnde ndɔleŋ niŋnda bɛɛ cho ko maa nauwaa chelulɛi.
Kɛ nda bɛɛ muliŋ ma nyaanuŋ diompilɛ.
A nɔla ma sim yi le,+
Kanifuule paale ndale kpundɛ leŋ le komal nda,
Teleŋ nda nɔ le konaa dɔɔnɔŋndo wo fuuluu.’
22 ‘Diom ndɔɔ cho ko fulaa mɛɛ kɛuwo nyaanuŋ nuaa yɛ.
Kanifuule yaamɔɔwaa kpaayaa bɛnduaa hinul ndu a chooŋ,
Mɛɛ puaa wa nuaa yɔmnde kiiŋuuwo* yɛ.’
23 Chɛhowa dimi aa, ‘A cho bundɛ ndɔɔ piɔlɔɔ, mi che bɛɛ wana nɔla ma keeku leniŋ te.
Kanifuule a cho a hɔbɛi mbo hiau soonuaa, a chuu chɔm te.
24 Siɔmbulaŋ la cho chua laandoo Ichipi biyɔɔ.
A cho ndu malɔɔ wanaa cho ba luaŋ ndo wa o ba.’+
25 “Chɛhowa, Mɛlɛka puaa chɔuwa, Mɛlɛka Isɔluɛiya dimi aa: ‘I cho niko Amɔŋ+ cho o chiee bɛndoo niŋ Noo* wo,+ Feloo, Ichipi, mɛlɛkaa ndaa,+ vɛlɛ a masaa ndaa hɔlla mulul. A tonya, I cho Feloo a wana o wana dɔu tiindaŋndo o ndu niŋ hɔlla mulul.’+
26 “‘I cho nda malɔɔ Nɛbukanɛɛsa,* masaa le Babilɔŋ+ a buɛiyaa nduaa o ba, a cho nda nuuviaa le nda diyɔɔ wa. Kɛ okoŋ kɔɔli, waŋnda cho vɛlɛ miiŋgu ichali loŋ, mɛɛ nda wa o paandoo niŋ yɛ.’ Chɛhowa dimi lende ni.+
27 ‘Kɛ num buɛi nuu Chekɔpu, siooŋii bii num te.
Nduyɛ num Isɔluɛi, yɔŋ isiooŋ te.+
Kanifuule a cho wa o fondaŋnda leviltaŋ mi piŋi num,
Chekɔpu cho miiŋgu mbo waŋnuŋ hɛnɛkɛ, nyɛ o nyɛ paaliaŋ ndu le,
Nduyɛ wana o wana luei niŋ ndu isiooŋ te.’+
28 Chɛhowa dimi aa, ‘Num buɛi nuu Chekɔpu, siooŋii bii num te, kanifuule I cho a num latulu.
Lɛŋii ya sɛŋi num o ndi niŋnde, I cho ndi basɔɔ tɛɛ.+
Kɛ num, I cho num tɛɛmbuu le.+
I cho num sila ŋ nɔ le sɔlaa wo ke.+
I mel num niŋ lende mi kɛɛ num nyɛpalaa tusi choo le.’”
47 Nyɛ Chɛhowa dimul Chɛluimaya, wana suaa le ndu wo a Filitiaŋnda okɔɔ wo cho hoo ni,+ tuupa mi Feloo tɛɛmbuu Kaasa. 2 Nyɛ Chɛhowa dimi wo cho hoo ni:
“Mɛŋndaŋ ma cho chɔnɔŋndo ba luaŋ ndo.
Ma cho simnɔŋ mɛŋma koŋgi bɛndu bɛnduaŋ.
Mɛŋndaŋ maŋ ma cho basɔɔ lɛŋndeŋ a nyɛ o nyɛ cho leniŋ,
Chiee bɛndoo vɛlɛ a wanaa cho leniŋ nda.
Puaa cho wa chaŋndaŋ choo choo kpeleŋ,
Nduyɛ wana o wana cho o lɛŋndeŋ niŋ cho wa yeelaŋ.
3 Te buukula suaa nduaa la wa pɛ diomndaŋ solioo,
Mi nyɛm nyaanaŋ suaa nduaa naŋndoŋ wa suɛi,
Mi peluŋ ndaŋ wa idiki dikiei,
Finyaa del niŋ pɛŋ kɔl le puaa ndaa nda velu wa le,
Kanifuule balaŋ la wa niŋ nda la vilɛi pɛ.
4 Paale leŋ le cho fuuluu le mi Filitiaŋnda kpou sɔla tambei.+
Wana o wana cho Taaya+ a Saidɔŋ+ malaa, a cho tambei sɔla.
Kanifuule Chɛhowa cho Filitiaŋnda tɛɛmbuu,
Wanaa lo yoomu ma wa ichali o lɛŋnde mɛŋndaŋ ma balu leŋ niŋ Kafitɔɔ* wa.+
5 Waŋnda Kaasa cho tembeltaŋ sendi.*
Waŋnda Asikɛlɔŋ mei kpili.+
Wanaa lo yoomu o lɛŋnde dɛŋgbɛleŋ niŋnda,
Vɛɛ kpɛ nya hiau yɛ niŋ lachi a dialuŋ nyaŋ kili kilioo?+
6 Kpokoo muɛi faŋii Chɛhowa ve!+
Baa o cho wɔ letuu le?
Miiŋgu niŋ o boo numndo niŋ.
Challɔ niŋ ma pɛŋgi, nduyɛ ma mei kpili.
7 Vɛɛ muɛi hei pɛŋgi yɛ,
Te Chɛhowa vem ndi pɛ le nyɛ tosa?
O vem ndi le mi i kɔ chiŋalaŋ Asikɛlɔŋ a kɔŋgɔ pee mɛŋma ihɛllo. +
Loŋ o vem ndi ni.”
48 Nyɛ Chɛhowa, Mɛlɛka puaa chɔuwa, Mɛlɛka Isɔluɛiya dimi a Mowaabi+ okɔɔ wo cho hoo ni:
“Kpundɔɔ cho le Nibo,+ kanifuule o sɔla tambei!
A tusi Kiliaatim+ siɔmbulaŋ okoŋ ma bii ndu.
Siɔmbulaŋ la bii fondaŋ kala kala* waŋnda tiindaŋ le vioŋnɔŋndo wo, nduyɛ ma tɛɛmbuu ndu.+
2 Waŋnda cho lɛ Mowaabi saŋgala le.
Hɛsibɔŋ+ nda yii ndu dumbu* ni le ndu tɛɛmbuuwo, ma dimi aa:
‘La ŋ kɔŋnuŋ miŋ kɔ tɛɛmbuŋ ndu.’
Madimɛŋ, num bɛɛ nɔ le tambei sɔlaa,
Kanifuule muɛi faŋnde cho num tolɔɔ kɔɔli.
3 Chaŋndaŋ la cho fulaa Hɔlɔnim+ kpeekpei,
Le tambii o sɔla ve vɛlɛ a delɔɔ bɛndu o del lo.
4 Mowaabi sɔla tambei,
Nduyɛ mi chuauwaa nduaa wa chaŋndaŋ kpeekpei.
5 O nɛi kuɛ Luhiti wo, waŋnda cho pembei helɔɔ ma kua a chaŋndaŋ.
Nduyɛ o nɛi kuɛ Hɔlɔnim ndo, waŋnda cho tolɔɔ ma wa chaŋnda kɔlta tambɛilaŋ tueiyɔɔ le kpundɛ bɛndu del lo.+
6 La nyaanuŋ le mi la piŋi yoomula nyalaŋ.
La cho simnɔŋ maa yɔm chunipa wo o lɛŋnde polteŋ niŋ.
7 Le mɛɛ ŋ tiindaŋ walta numndaŋ vɛlɛ a sulta numndaŋ yɛ,
Num bɛɛ a cho num biyɔɔ.
Nduyɛ a cho lakɔ a Kɛmɔɔsi+ o biyɔɔ niŋ,
Latulu a wanaa nduaa soliaa lasalaa vɛlɛ a laŋgbaa nduaa kalla.
8 Wana tɛɛmbaa cho hunɔɔ chiee bɛndu kɛ kɛ delɔɔ choo,
O pilɛ bɛɛ heluŋ ndu niŋ te.+
9 La handu tamasioo le Mowaabi nɛiyo chɔmndo.
Kanifuule te chieeŋ ndɔŋ bɛndoŋ sɔla pɛ tambei, wanaa nduaa cho nyaanɔŋ.
Chieeŋ ndɔŋ bɛndoŋ cho simnɔŋ nyɛ waŋnda cha mi siooŋnde bii nda wo,
Nduyɛ wana o wana chel lɛ niŋ loŋ te.+
10 Sendioo cho le wana cho wali Chɛhowa wo tosaa taalɛɛ wo!
Nduyɛ sendioo cho le wana kɛɛ le muɛi nduɛi faŋnde soliŋndo kpeku le diyɔɔ wo!
11 Nyɛ o nyɛ paaliaŋ ndɔ Mowabaitiiya le chɔŋ o feleŋgɔyɛi ndɛi niŋ.
A choŋnuŋ ko mɛɛ muɛiyaŋ ma chal nuaa o kiiyo choo yɛ.
A dou wɔ nda o nyɛi laandii cheleŋ niŋ, mɛɛ nda tala nuaa muɛiyaŋ o taala cheleŋ niŋ yɛ le.
Nduyɛ kani bɛɛ a kue wɔ a nda o biyɔɔ niŋ te.
Le sabu koŋ nda choŋnuŋ ndɔ paŋ ni,
Chuŋ ndaa bɛɛ siŋgaŋ te.
12 “Lelaŋ nyɛ Chɛhowa dimi wo cho hoo ni, ‘Teleŋndo cho fuuluu mi yɔŋ puaa ma huŋ hulu nda kpu. A cho nda hulɔɔ ma pɛi nyɛm ndaŋ laandoŋ, nduyɛ ma pesi pesi kpɛɛnɛŋ ndaŋ bɛndoŋ wɔ wɔ. 13 Siɔmbulaŋ la cho Mowabaitiiya tolɔɔ le Kɛmɔɔsi, mɛɛ siɔmbulaŋ la bii Isɔluɛiya le Bɛtɛl, o ndaa dɔu tiindaŋ ndaa o ndu niŋndo yɛ.+
14 Yɛɛ hel lɛ nya mi la wa dimioo aa: “Kuubaa chɔuwaa mayoomuaa naŋ cho ni, nduyɛ ŋ cho a bɛɛndiaŋ le chɔuwo”?’+
Masaa, o nɔ diolaŋ aa Chɛhowa, Mɛlɛka puaa chɔuwa+ wo dimi lende ni.
16 Kpundɛ nɔ le delɔɔ Mowabaitiiya choo wo cho niŋ kpɛɛluŋ,
Nduyɛ tambii ndɛi cho niŋ fuuluuwo chɔ chɔ.+
17 Wanaa balu nda wa kpou cho mɔnɛi biyɔɔ a nda latulu,
Wana o wana sina diola ndalaŋ.
La dimul nda aa: ‘Nuawɔ se mɛɛ tinda lebɛɛ kɛndɛ kɛndɛ ndoo nɔ kpaayaa wo sɔla tambei yɛ!’
18 Tol o fondaŋ num lebiɔɔ,
Nduyɛ ma chal a bolola vesɛilaŋ,* num chua laandoo Dibɔŋ,+
Kanifuule wana tɛɛmbaa le Mowaabi cho hunɔɔ num chiŋalaŋndo.
Nduyɛ, o cho hunɔɔ fondaŋnda numnda kala kalalaŋ tɛɛmbuu.+
19 Nya waŋnda Aloya,+ la sim o nɛiyo ikɛi mi la tofa.
La nyuna puaa cho nyaanɔŋndo wa a waŋ laanduaa cho hiɔlɔŋndo wa aa, ‘Yɛɛ yɔŋnuŋ yɛ?’
20 A tusi Mowaabi siɔmbulaŋ, mi siooŋii bɛndu bɛnduei bii ndu.
La chaŋ nduyɛ mi la mɛli yeelaŋ choo choo kpeleŋ.
La yonda o Anɔŋ niŋ+ maa Mowaabi sɔla tambei.
21 “Mɛlɛka kilul lɛŋnde dɛŋgbɛleŋ*+ yamɛi, mbo kilul vɛlɛ Holɔŋ, Chahasi,+ a Mɛfaati+ yamɛi. 22 Mɛlɛka kilul vɛlɛ Dibɔŋ,+ Nibo,+ a Bɛti-dibilatayim yamɛi. 23 Kiliaatim,+ Bɛti-kamu, Bɛti-miɔŋ,+ 24 Kiliɔɔti,+ a Bɔsilua vɛlɛ a chieeŋ bɛnduŋ balu lɛŋnde Mowaabi leŋ ndoŋ kpou, ŋ cho kpɛɛluŋ a ŋ cho landaŋ ndoŋ, mi Mɛlɛka kilul muŋ yamɛi.
25 ‘A kelu yoomuma Mowaabi waŋ* lechoo.
A yem ndu baa.’ Chɛhowa dimi lende ni.
26 ‘La ke ndu muɛiyaŋ mi ma bii ndu,+ kanifuule o heeluŋ nduyɛ mbo simul Chɛhowa.+
Mowaabi cho loŋgolaŋndo o kuisi ndɔɔ niŋ,
Nduyɛ o simnuŋ nyɛ mamaa.
27 Baa o cho nyɛ mamaa le Isɔluɛi wa le num te?+
Baa a viileŋ nda bii ndu ni,
Le ma dimi sɔɔŋ wɔɔŋndoŋ a ndu okɔɔ nduyɛ ma hiiluu bolleŋ?
28 Nya waŋnda Mowaabi, la mal chieeŋ nyaŋ bɛndoŋ mi la kɔ kila chaltaŋ o poutaŋ choo,
Nduyɛ mi la simnuŋ mɛɛ piiŋndo tosa nuaa waaŋnde ndɔleŋ o kpoloŋndo tɛɛŋ yɛ.’”
29 “Ŋ tuei a yoŋga Mowaabi wo okɔɔ. Mowaabi cho lɛŋnde yoŋga bɛndu.
Le heeluŋ, nduyɛ mi le chuaŋnuŋ maa le cho filioŋ mi le hiau lɛŋii cheleŋnde.”+
30 “Chɛhowa dimi aa, ‘I sina kɔl tuu Mowaabi wo.
Kɛ sɔɔŋ ndɔŋ fondoŋ o dimi woŋ cho simnɔŋ nyɛ fondoo fuu.
Nyɛ o nyɛ a tosa niŋ te.
31 Le sabu koŋ ya cho yeelaŋ mɛli Mowaabi choo ni,
Nduyɛ mi chaŋ le lɛŋnde Mowaabi leŋ kpou,
Okoŋ mi bii mɔnɛi le waŋnda Kiaa-hɛluɛsi.+
Lɛuwuŋ num kɛndɛ kɛndɔŋ saaniaa miŋ taŋ pee mɛŋma ihɛllo.
Lɛuwuŋ numndoŋ fuuluu o pee mɛŋma ihɛllo Chasɛɛ di.
Kɛ a teleŋ nya kendi komɔɔla nyala lesialtaŋ ndo, vɛlɛ a teleŋ nya kendi kilepiima nyaŋ ndo,
Wana tɛɛmbaa hiŋ mbo tɛɛmbuu tɔlɔɔla nyalaŋ kpou.+
33 Kɔl kɛndɔɔ a nyaale bɛndoo cho lɛ o yɔmii kuamɛi niŋ te,
Nduyɛ o cho vɛlɛ o lɛŋnde Mowaabi leŋ niŋ te.+
I tosa mi muɛiyaŋ ma pɛŋgi fulaa o doolala* ndala mamuɛilaŋ.
Wanaa toosiaa muɛiyaŋ nda cho lɛ wa muɛima toosiaa ma deŋi a kɔl kɛndɛ le.
Deŋi nda cho niŋ wa wo cho wa teŋgeŋ.’”+
34 “‘Chaŋndaŋ la cho fulaa Hɛsibɔŋ+ kpeekpei, mi waŋnda Ɛliaalɛɛ wa nda tueiyɔɔ.+
Hali waŋnda Chahasi bɛɛ cho nda tueiyɔɔ.+
Chaŋnda cho fulaa Sowaa laŋ, waŋnda Hɔlɔnim+ a Ɛkilati-sɛlisiya cho laŋ tueiyɔɔ.
Hali mɛŋndaŋ Nimiluim bɛɛ ma cho tambei sɔla.’+
35 Chɛhowa dimi aa, ‘Wana cho salalaŋ solioo o fondaŋ filioŋndo wo,
Vɛlɛ a wana cho salalaŋ solioo o mɛlɛka ndɔɔ lo wo,
I cho tosa ma faŋaŋ Mowaabi.
36 Lelaŋ ya cho mɔnɛi biyɔɔ* o kɔl nuu niŋ ni le Mowaabi, mɛɛ nda hɔŋ nuaa sɛŋndeŋ yɛ.*+
Nduyɛ kɔl nuu cho mɔnɛi biyɔɔ* le waŋnda Kiaa-hɛluɛsi, mɛɛ nda hɔŋ nuaa sɛŋndeŋ yɛ.*
Kanifuule, sul o chuuŋgiaa wo kpou cho tambei sɔla.
37 A cho tembeltaŋ sendi,+
Ma sendi siɛyuŋ ndaŋ.
38 “Chɛhowa dimi aa, ‘O chiɛilaŋ Mowaabi choo kpou,
A o luŋnda ndɔlaŋ kpou,
Nyɛ o nyɛ cheleŋ wana tuii niŋ loŋ te mɛɛ yeelaŋ.
Kanifuule I tɛɛmbuu Mowaabi,
Mɛɛ nda pesi pesi nuaa kpɛɛnɛi puuluei yɛ.’
39 ‘Nuawɔ se mɛɛ o simnuŋ nyɛ waŋnda cha mi siooŋnde bii nda wo yɛ! La mɛli yeelaŋ!
Nuawɔ se mɛɛ Mowaabi muli kɔɔ a siɔmbula bɛndulaŋ yɛ!
Mowaabi simnuŋ nyɛ mamaa,
Nduyɛ mbo simnuŋ nyɛ luei wanaa balu ndu wa kpou siooŋnde wo.’”
40 “Nyɛ Chɛhowa dimi wo cho hoo ni:
‘Mɛɛ kowɔɔ tual nuaa sululu a kumbaŋndaŋ la pɛɛŋgaa yɛ,+
Lende koni yaamɔɔnɔɔ pɛɛŋga niŋ kumbaŋndaŋ Mowaabi choo ni.+
41 A cho chieeŋ ndɔŋ biyɔɔ,
Nduyɛ fondaŋnda ndɔla kala kalalaŋ bɛɛ ma poondiaa laŋ.
A teleŋ koŋ, kɔlta kuubaa chɔuwa Mowaabi la cho simnɔŋ
Maa kɔl wana lanɔ hiŋ niŋ violɔɔ wo.’”
42 “‘Mowaabi cho tambei sɔla, o ve lɛ niŋ lelɛŋ te.+
Kanifuule le mɛɛ nda chuaŋnuŋ a bɛndu, ma simul Chɛhowa yɛ.’+
43 Chɛhowa dimi aa, ‘Nya waŋnda Mowaabi,
Sɔɔŋ ŋsiooŋndoŋ, sooŋndo, a yaŋɔɔleŋ le cho nya lachi.’
44 Chɛhowa dimi aa, ‘Wana o wana nyaanuŋ pɛ sɔɔŋ ŋsiooŋndoŋ, o cho delɔɔ o sooŋndo niŋ.
Nduyɛ wana o wana fula pɛ o sooŋndo niŋ, o hau o yaŋɔɔleŋ.
Kanifuule, I cho Mowaabi nyɛpalaa tusi choo te wɔsi ya kɛɛsiaa wo fuuluu pɛ.’
45 ‘Wanaa cho nyaanɔŋndo wa sim o wundule Hɛsibɔŋ ndeŋ bɛŋgu, mi yoomuaŋ ma chuu nda paku.
Kanifuule yiŋndeŋ le cho chɔnɔŋ Hɛsibɔŋ,
Mi yiŋnde wule wule leŋ le fula Saihɔŋ.+
Le cho Mowaabi tendei lomɔɔ,
Mi le lom vɛlɛ kpokpola puaa kɔl tuuwa.’+
46 ‘Waŋnda Mowaabi, kpundɔɔ cho le nya!
Wanaa Kɛmɔɔsi+ wa sɔla tambei,
Kanifuule a bii puaa numnda,
Nduyɛ ma kuaŋnuŋ a chuaa num aa laanduaa o biyɔɔ niŋ.’+
47 Chɛhowa dimi aa, ‘Kɛ o mɛɛlulaŋ kpɔŋ, wanaa nda bii Mowaabi ma kua a nda o biyɔɔ niŋnda, I cho nda chuuŋgiaa naapilɛ.
Haaa a boondei hei, mɛɛlulaŋ la cho laŋ ni a yamɛi nda kilul Mowaabi ve.’”+
49 Nyɛ Chɛhowa dimi a Amɔnaitiiya+ okɔɔ wo cho hoo ni:
“Baa Isɔluɛi nɔ ŋchuau le?
Baa o nɔ lɛ wana loo nyɛm kɛŋ ndɔŋ ndo le?
Le sabu yɛɛ Malikam+ siiŋguu yɛ Kaadi nyɛm kɛŋ ndɔŋ?+
Nduyɛ, le sabu yɛɛ wanaa nduaa cho yɛ o chieeŋ bɛnduŋ Isɔluɛiya niŋ?”
2 “Mi Chɛhowa dimi aa, ‘Le saboo hoo, palɛi cho hunɔɔ,
Boondii ya cho tosa mi waŋnda deŋi deŋi chɔuwo ve, okoŋ ma chiŋalaŋ Luaba+ o lɛŋnde Amɔnaitiiya niŋ.+
O cho tambei sɔla mbo simnuŋ bembelaŋ,
Nduyɛ ma mɛli chieeŋ balu ndu woŋ o yiŋ.’
‘Okoŋ, mi Isɔluɛi poondiaa nyɛm wanaa ndaa poondiaa ndu nyɔɔŋ o ba wa.’+ Ya Chɛhowa dimi lende ni.
3 ‘Nya waŋnda Hɛsibɔŋ, la mɛli yeelaŋ, kanifuule Eyai sɔla tambei!
Wanaa cho o chieeŋ balu Luaba woŋ niŋnda, la chaŋ choo choo kpeleŋ.
La wounuŋ nyɛla labɛkilaŋ.
La mɛli yeelaŋ nduyɛ mi la yuuliaŋ o kuŋgala chɔluaa* nda toosiaa a poutaŋ ndaŋ tɛɛŋ.
Kanifuule Malikam cho lakɔ o biyɔɔ niŋ,
Latulu a wanaa nduaa soliaa lasalaa vɛlɛ a laŋgbaa nduaa kalla.+
4 Num chua laandu chɔm hoo le lechoo le wo, nduyɛ ma wa tiindaŋndo dɔwɔɔ o sulta ndɔlaŋ niŋndo,
Le yɛɛnɛ ŋ cho yɛ saŋgalaŋndo a kpoloŋnda numndaŋ,*
Vɛlɛ a lɛŋnde numnde dɛŋgbɛle mɛŋndaŋ ma cho hiouwɔɔ wolu wolu leŋ,
Nduyɛ ma wa dimioo aa: “Nɛɛnɛ nɔla yɛ mbo huŋ chiŋalaŋ ya?”’”
5 “Chɛhowa, Mɛlɛka Kpuluŋguma Bɛndoo, Mɛlɛka puaa chɔuwa dimi aa,
‘I cho tosa mi wanaa balu numnda luei num siooŋii bɛnduei.
La cho saŋnɔŋ ba o ba fee,
Nduyɛ wana o wana ve niŋ le wanaa saŋnuŋ nda nuuviaa le.’”
6 “‘Kɛ te teleŋ koŋ hiou pɛ, I cho Amɔnaitiiyaa nda bii wa chuuŋgiaa naapilɛ.’ Ya Chɛhowa dimi lende ni.”
7 Nyɛ Chɛhowa, Mɛlɛka puaa chɔuwa dimi a Idɔm okɔɔ wo cho hoo ni:
“Baa taasi kɛ kɛ cho lɛ o Tɛmaŋ niŋ te?+
Baa silala wanaa bii sɔɔŋ bila wa la tambu?
Baa nyɛ fondoo taasi ndaa simnuŋ ni?
8 La nyaanuŋ, la miiŋgu kɔɔli!
Nya waŋnda Dɛdaŋ,+ la kɔ mi la kɔ chal o kpoloŋnda yiŋgilɛilaŋ niŋ.
Kanifuule te teleŋndo fuuluu pɛ,
I cho Iisɔ hɔlla mulul, nduyɛ mi tusi ndu kpundɔɔ choo.
9 Te waŋnda hiŋ pɛ kilepiima numndaŋ keenduuwo,
Baa a mɛi ma tiŋ kɔɔli le mi wanaa cheleŋ keenduu le?
Te viiya hinul num pɛ a nyumndaŋ,
Nyɔɔŋ koni nda tɛɛmbuu ni mɛɛ nda yeema yɛ.+
10 Kɛ I cho Iisɔ yuŋga.
I cho fondaŋnda ndɔla viaŋnaŋnda puusiaa,
Le halikpeŋ o viŋnuŋ lɛ loŋ te.
Chuauwaa nduaa, wanayaŋ ndɔŋ, vɛlɛ a wanaa nda chiɛɛliaŋ nda kpou cho tambei sɔla,+
Nduyɛ o cho lɛ wa kposoŋ te.+
11 Mal chuauwaa num aa nɔ lɛ ŋfinya le wa,
I cho nda manda ma wa yoomu.
Nduyɛ waŋ laanduaa num aa vii piaanduaa wa cho tiindaŋndo dɔwɔɔ o ya niŋ.”
12 Nyɛ Chɛhowa dimi wo cho hoo ni: “Te wanaa ndaa nɔ le kolɔɔ o taala ni kɔl tuuwo niŋ te wa kol pɛ leniŋ, baa num ya cho malɔɔ ni mi kɛɛ num nyɛpalaa tusi choo? I mel num lende mi kɛɛ num nyɛpalaa tusi choo le. Num bɛɛ mɛɛ ma kol o taala koŋ niŋ.”+
13 Chɛhowa dimi aa: “I mɛnaŋ a yapila maa siooŋnde cho waŋnda biyɔɔ a nyɛ yɔŋnuŋ niŋ Bɔsilua wo,+ mbo sɔla bɛɛla tambɛilaŋ, tambei, nduyɛ mbo simnuŋ nyɛ sendi. Chieeŋ ndɔŋ bɛndoŋ kpou cho tambei sɔla le fɛɛŋ a fɛɛŋ.”+
14 I tuei yooŋgu fula Chɛhowa o ba wo,
Mbo viam waŋndo o lɛŋnde niŋ mbo wa dimioo aa:
“La bɛɛndiaŋ le chɔuwo, mi la chuuŋgiaŋ naapilɛ,
Okoŋ mi la chiŋalaŋ ndu.”+
15 “Kanifuule I tosa ma simnuŋ wana fondoo o lɛŋnde tɛɛŋ,
Nduyɛ mi tosa mi wana o wana tul num leyɛ.+
16 Num cho hoo ichali o pouwo bɛŋgu wo,
Nduyɛ ma wa ichali o pembii filioŋ nde choo wo,
Siooŋii ŋ luei acheleŋnda ve,
A kaa heelaŋ cho num o kɔl lo hui num.
Mi che bɛɛ a taŋgul waaŋnde numndeŋ o fondaŋ filioŋndo maa kovɛ,
I cho num tusi naa ŋ cho kaŋ nda.” Ya Chɛhowa dimi lende ni.
17 “Siooŋnde cho waŋnda biyɔɔ a nyɛ yɔŋnuŋ niŋ Idɔm ndo.+ Wana o wana keeku ndu ikɛi pɛ mbo che ndu, siooŋnde cho ndu biyɔɔ nduyɛ mbo hɔŋ huiye a dɛnɛ palaa nda tusi ndu choo wo.” 18 Chɛhowa dimi aa: “Mɛɛ i yɔŋnuŋ a Sodɔm a Komoolua vɛlɛ a chieeŋ balu muŋ ndo yɛ,+ lende koni i yɔŋnuŋ niŋ a Idɔm ni. Wana o wana chel lɛ loŋ te, nduyɛ wana o wana kila lɛ niŋ chaltaŋ loŋ te.+
19 “Waŋndo cho hunɔɔ mbo huŋ chiŋalaŋ fondaŋ nya manda chɔluaa wo, mɛɛ kpɔkuŋndo*+ fula nuaa o bundɛ bɛndu holnuŋ Chɔɔdaŋ ndaŋ ndo niŋ yɛ. Kɛ te teleŋ tiŋ hiou pɛ, I cho tosa mbo nyaanuŋ ndu, okoŋ mi yulu wana ya hɛli wo iso le mbo wa ndu chilaŋ. O nɛɛnɛ cho yɛ maa ya? O nɛɛnɛ nɔla yɛ mbo simul la? Wana mandaa lasaa kuɛɛ nɔla yɛ mbo sim ya o hɔl?+ 20 Lelaŋ nya waŋnda, la tuei kɛɛsiaa Chɛhowa tosa a Idɔm okɔɔ wo, vɛlɛ a sɔɔŋ o yiyaŋ le tosaa a waŋnda Tɛmaŋ ndoŋ:+
A tonya, saa tuaa cho lo wa, a wa niŋ kɔlaŋ a nda sasɔɔ.
Nduyɛ o cho chalta ndalaŋ tɛɛmbuu le sabu ndaa.+
21 Te diomndo soo dɔɔ pɛ a teleŋ Idɔm cho delɔɔ wo, lɛŋndeŋ le cho nyiiya,
Nduyɛ waŋnda cho wa chaŋndaŋ choo choo kpeleŋ.
Wanaa cho landaŋ o Pee Siaŋa Mɛŋma Ihɛllo wa bɛɛ cho tueiyɔɔ.+
22 Mɛɛ kowɔɔ hel nuaa choo choo mbo wa tolɔɔ sululu a kumbaŋndaŋ la pɛɛŋgaa yɛ,+
Lende koni yaamɔɔnɔɔ pɛɛŋga niŋ kumbaŋndaŋ Bɔsilua choo ni.+
A teleŋ koŋ, kuubaa chɔuwa Idɔm,
Kɔlta ndalaŋ la cho simnɔŋ maa kɔl wana lanɔ hiŋ niŋ violɔɔ wo.”
23 Yooŋgoo le Damasikɔɔ:+
“Siɔmbulaŋ la bii Hamaati+ a Apaadi,
Kanifuule le yooŋgu wɔɔŋ nda tuei yo.
Siooŋii bɛnduei bii nda,
Mi kɔltaŋ la yɔŋnuŋ nda pulaŋ pulaŋ, mɛɛ pee mɛŋma ihɛllo muuluŋ nuaa o pɛŋgi le yɛ.
24 Damasikɔɔ nɔ lɛ kɔl simulaa le.
O muliŋ le nyaanɔŋndo a siooŋii bɛnduii bii ndu ve.
Dɛnɛ palaa a nyɛ nɛiyaa tol ndu choo,
Maa wana lanɔ hiŋ niŋ violɔɔ wo.
25 Chiee waŋnda saŋgala hoo nduyɛ mi wanaa nduaa wa a kɔl kɛndɛ wo,
Le yɛɛnɛ a mellɔ ndu le?
26 Kanifuule puaa nduaa feleŋguaa cho delɔɔ a vilɛiya o luŋnda ndɔlaŋ kpendekele,
Nduyɛ mi puaa nduaa chɔuwa sɔla tambei o paale leŋ choo.” Ya Chɛhowa, Mɛlɛka puaa chɔuwa dimi lende ni.
27 “I cho kpaki balu Damasikɔɔ wo malɔɔ o yiŋ,
Mi le kɔ tɛɛmbuu chiɛila choo choola kala kalala Bɛŋ-hedadi laŋ.”+
28 Yooŋgoo cho hoo ni le Kidaa,+ a masɛi le Hasɔɔ, i Nɛbukanɛɛsa,* masaa le Babilɔŋ tɛɛmbuu ve. Nyɛ Chɛhowa dimi wo cho hoo ni:
“Chɔŋ ma kuɛ Kidaa,
Ma kɔ tɛɛmbuu wanaa cho Ba Paaleŋ le Chaŋ Ndo wa.
29 A cho tɛndiila ndalaŋ a chɔluaa ndaa poondiaa nda o laba,
Kolala tɛndiila ndalaŋ, a nyɛ o nyɛ nda nɔ.
A cho lakɔŋnɔŋ a nyɔɔmiaa ndaa,
Nduyɛ ma wa chaŋndo o nda lo aa, ‘Sɔɔŋ ŋsiooŋndoŋ cho naa ŋ balaa silɔ!’”
30 Chɛhowa dimi aa: “La nyaanuŋ! La kɔŋnuŋ landaŋ!
Nya waŋnda Hasɔɔ, la kɔ mi la kɔ chal o kpoloŋnda yiŋgilɛilaŋ niŋ.
Kanifuule Nɛbukanɛɛsa,* masaa le Babilɔŋ kɛɛsiaa le nya delɔɔ choo,
Nduyɛ o cho yiyaŋndo a kɛɛsiaa ndɔɔ le nya kpundɔɔ tusioo choo.”
31 Chɛhowa dimi aa: “La chɔŋ mi la kɔ chiŋalaŋ lɛŋnde cho o kɔl nyuloo niŋ,
Ma wa a chalnaŋ o hɛnɛkɛyɛi niŋndo.
A nɔ ladio le, kɛlɛŋgaa niŋ te ma kinda laŋ a chiliŋndoŋ. A choŋnuŋ yololɛ.”
32 “A cho nyɔɔmiaa ndaa puŋga,
Nduyɛ ma puŋga chɔluaa hɔbɛiyaa nda nɔ wa.
Wanaa kili yiiŋii ndɛi o kpeŋgoŋ nda,+
I cho tosa ma saŋnuŋ ba o ba fee o hueiye niŋ,
Nduyɛ I cho tosa mi kpundɔɔ fula ba o ba fee mbo huŋ del nda choo.” Ya Chɛhowa dimi lende ni.
33 “Hasɔɔ cho simnɔŋ bɛmɛlta tuŋaa yonduaa,
Nduyɛ mbo tambu le fɛɛŋ a fɛɛŋ.
Wana o wana chel lɛ loŋ te,
Nduyɛ wana o wana kila lɛ niŋ chaltaŋ loŋ te.”
34 Boondii Sɛdikaya,+ masaa le Chuda kandu masaleŋ ndo, yooŋgu Chɛhowa dimul Chɛluimaya wana suaa le ndu wo a Ɛlam okɔɔ wo+ cho hoo ni: 35 “Nyɛ Chɛhowa, Mɛlɛka puaa chɔuwa dimi wo cho hoo ni, ‘I cho chiɔu Ɛlam ndo tɛɛmbuu,+ nyɛ nda tiindaŋ le nda kpaayaa kioo wo. 36 I cho tosa mi hueiyii bɛnduei hɔŋ Ɛlam choo, chɔnɔŋndo o kpeŋguŋ hiɔɔluŋ hueiye fula o choo choo niŋndoŋ, nduyɛ mi tosa mi nda kpou saŋnuŋ o hueiye hei niŋ. Wanaa saŋnuŋ haa wa cho lakɔ o lɛŋnde kɛ kɛ niŋ o chieeŋndo choo.’”
37 Chɛhowa dimi aa: “I cho waŋnda Ɛlam tɛɛmbuu yaamɔɔwaa ndaa vɛlɛ a wanaa cho nda nuuviaa le nda diyɔɔ wa o hɔl. Nduyɛ I cho nda kpundɔɔ tusi choo, ndu cho yɛ kɔl ni tuu ŋama ŋamaa ni. I cho muɛi faŋnde yɔŋ nda kɔɔli, mi i lo nda diuwo haaa ma chuu kpou.”
38 Chɛhowa dimi aa: “I cho kpeŋgbei* ni lemasaa kɛsi Ɛlam,+ nduyɛ mi tɛɛmbuu masaa le Ɛlam a laŋgbaa nduaa kalla.”
39 “Kɛ te palɛi keŋ fuuluu pɛ o mɛɛlulaŋ, I cho wanaa nda bii Ɛlam ma kua a nda o biyɔɔ niŋnda chuuŋgiaa naapilɛ.” Chɛhowa dimi lende ni.
50 Nyɛ Chɛhowa dimi a Babilɔŋ okɔɔ,+ lɛŋnde Kaadiaŋnda, sanaa a Chɛluimaya, wana suaa le ndu wo cho hoo ni:
2 “Yonda o lɛŋnde niŋ a ndi okɔɔ.
Simi suŋgbuleŋ maa tamasi ma yonda a ndi okɔɔ.
Viaŋ nyɛ o nyɛ le!
Dimi aa, ‘A bii Babilɔŋ.+
A tusi Bɛl siɔmbulaŋ.+
Siooŋii bɛnduei bii Mɛlodaki.
A tusi piɔmaa nduaa siɔmbulaŋ.
Siooŋii bɛnduei bii piɔmaa nduaa nɔɔlɛiya.’*
3 Waŋnda fula o lɛŋndeŋ niŋ ba luaŋ ndo, ma huŋ chiŋalaŋ ndu.+
A tosa mi siooŋnde bii waŋnda a nyɛ nda tosa a lɛŋnde ndɔleŋ ndo,
Nduyɛ wana o wana cho lɛ loŋ te.
Waŋnda chieeya a visiaa kpou nyaanuŋ.
Nda kpou kuɛŋnuŋ.”
4 Chɛhowa dimi aa: “O palɛi keŋ niŋ nduyɛ a teleŋ koŋ, waŋnda Isɔluɛi a waŋnda Chuda cho hunɔɔ diompilɛ.+ A cho wa kɔlaŋ a chaŋndo,+ nduyɛ ma nuuviaa Chɛhowa Mɛlɛka ndaa diompilɛ.+ 5 A cho nyuna le nɛi Saayɔŋ ndo, nduyɛ ma muli hɔlaa ndaa kpeŋgii keŋ,+ ma dimi aa, ‘La huŋ miŋ simnuŋ vɛlɛ wanaa Chɛhowa wa, miŋ miiŋgu o kpema fɛɛŋ a fɛɛŋ ndo niŋ, o naŋ nɔ miŋ puɛɛnuŋ te wo.’+ 6 Wanaa niaa simnuŋ saa laasiaŋ nda.+ Wanaa ndaa mandaa lasaa tosa ma laasiaŋ.+ A kuɛ a nda o pemboŋ choo, ma mal nda ma wa balɔŋndo o pembuŋ bɛndoŋ a ŋ pɔmbɔŋ choo. A puɛɛnuŋ a fondaŋ nda pɛŋgiaa okɔɔ. 7 Te yaamɔɔwaa ndaa saaluŋ nda pɛ a tɛɛmbuu nda,+ okoŋ a dimi aa, ‘Tɔɔyaŋ o tɔɔyaŋ cho naa choo le. Kanifuule a tosa hakioo a Chɛhowa, fondaŋ pɛŋgiaa cho sakpo wo, vɛlɛ a tiindaŋ finyaa ndaa mamaa, Chɛhowa.’”
8 “La fula o Babilɔŋ niŋ mi la nyaanuŋ.
La fula o lɛŋnde Kaadiaŋnda niŋ.+
Nduyɛ, la wa maa chɔluaa sim chɔluaa kundaa lachi le kɔlaŋ nda.
9 Kanifuule, I cho waŋnda faŋga bɛndoo chuuŋgiaa o lɛŋndeŋ ba luaŋ ndo,+
Mi hiŋ a nda le Babilɔŋ chiŋalaŋndo.
A cho ndu hunɔɔ chiŋalaŋ a chɔuwo,
Nduyɛ ma bii ndu.
Chiŋɔma ndaŋ ma cho ko maa chiŋɔma kuubanɔ chɔu.
Mi ma mɛi kala chuaa o mɔnɛi niŋ le chuauwaa nduaa.+
A wuu chiŋɔleŋ ma bendu le.
10 A cho nyɔɔŋ puŋga o lɛŋnde Kaadiaŋnda niŋ.+
Wanaa cho nyɔɔŋ muŋ puŋga wa kpou, a cho kɔllo naŋɔɔ.”+ Chɛhowa dimi lende ni.
11 “Kanifuule la wa hiouwɔɔ lachi a nyaaloo,+ nduyɛ mi la wa a kɔl kɛndɛ bɛndoo,
Boondii nya wa nyɛm kɛŋ nuŋ puŋgaa ve.+
La wa huuloo mɛɛ nauwaa fɔŋnduaa huulu nuaa o bil puiyaa niŋ yɛ,
Okoŋ mi la wa bɔɔluu kɔl kɛndɛ bɛndoo mɛɛ suaa chaŋ nuaa yɛ.
12 A tusi kala num siɔmbulaŋ.+
Kɔl tambɛiyo komal wana velu num ndo.
Ndu hiou dɔɔnaŋ o lɛŋnde tɛɛŋ kpou.
O simnuŋ lɛŋnde polte nɔ mamɛŋ kposoŋ te leŋ.+
13 Le mɛɛ Chɛhowa dɔɔnuŋ tumbe yɛ, wana o wana ve lɛ niŋ o lɛŋnde ndɔleŋ niŋ te.+
Le cho tambei sɔla kpata kpata.+
Wana o wana wa pɛ keekulaŋ Babilɔŋ mbo tofa ndu, siooŋnde cho ndu biyɔɔ,
Nduyɛ mbo hɔŋ huiye le dɛnɛ palaa bɛndu nda tusi ndu choo wo.+
14 Nya kindu chiɔula nyalaŋ nda kpou,
La huŋ balu Babilɔŋ silɔ mi la chiŋalaŋ ndu a chɔuwo.
La vii vii ndu a chiŋɔma nyaŋ, la mɛi le kɛ kɛ le.+
Kanifuule, Chɛhowa o tosal hakioo ni.+
15 La balu ndu silɔ mi la deŋi deŋi chɔuwo.
Ndupila yɔŋguŋ.*
La miŋgul ndu maa.
La tosal ndu mɛɛ ndu bɛɛ tosa yɛ.+
16 La faŋa wana saŋ kulloŋ o Babilɔŋ niŋndo,
Vɛlɛ a wana bii wɔlɔtɔɔ o ba a teleŋ kuauwaa wo.+
Wana o wana cho nyaanɔŋ o lɛŋnde ndɔleŋ niŋ,+
Mbo miiŋguŋ o wanaa nduaa lo, le chɔu kala kalaa hoo.
17 “Waŋnda Isɔluɛi cho ko maa saa kpɔkuŋnda* luɛi tɛɛŋ+ ma saŋnuŋ nda.+ Masaa le Asiiliaa fɛŋ tɛɛmbuu nda,+ okoŋ mi Nɛbukanɛɛsa,* masaa le Babilɔŋ luei nda nyɛ nɛiyaa o paalaŋ niŋ.+ 18 Lelaŋ nyɛ Chɛhowa, Mɛlɛka puaa chɔuwa, Mɛlɛka Isɔluɛiya dimi wo cho hoo ni: ‘Mɛɛ ya tosa a masaa le Asiiliaa yɛ,+ lende koni ya cho tosa a masaa le Babilɔŋ vɛlɛ a lɛŋnde ndɔleŋ ni. 19 I cho Isɔluɛi miŋgi o bil kɛndɛ kɛndɔɔ,+ mbo wa diolaŋ o pembii Kamɛɛ ve, pembii Baasiaŋ nde,+ pembii Ifiluem nde,+ a o tanda Kiliaadi wo niŋ+ okoŋ mbo hini kɔl mɛɛ.’”
20 Chɛhowa dimi aa: “O palɛi keŋ niŋ nduyɛ a teleŋ koŋ,
A cho nuuviaa yɔŋ wɔɔŋ Isɔluɛi tosa wo,
Kɛ a seeluŋ ndu niŋ te.
Ma nuuviaa hakila Chuda tosa laŋ, kɛ a seeluŋ ndaŋ niŋ te.
Kanifuule wanaa ya chɛl ma lo yoomu wa, I cho nda malɔɔ haki.”+
21 “La kɔ chiŋalaŋ lɛŋnde Mɛluatayim ndeŋ, a wanaa cho Pɛkɔdi wa.+
La diu nda mi la tɛɛmbuu nda kpou.” Chɛhowa dimi lende ni.
“La tosa nyɛ o nyɛ ya dimul nya le tosaa.
22 Bɔɔluu chɔuwo cho o lɛŋndeŋ niŋ,
Nduyɛ mi kpundɛ bɛndu bɛndoo del.
23 Nuawɔ se mɛɛ nda tɛɛmbuu haamɛi* kala kala wa o lɛŋndeŋ choo wo yɛ!+
Babilɔŋ simnuŋ fondaŋ luei waŋnda siooŋnde wo o lɛŋnde tɛɛŋ a nyɛ yɔŋnuŋ ndu wo!+
24 Num Babilɔŋ, I hendul num yaŋɔɔleŋ,
Nduyɛ mi bii num a sina pɛŋ a ndi okɔɔ le.
A saaluŋ num ma bii num,+
Kanifuule Chɛhowa ŋ simul ni.
25 Chɛhowa kumbi chiɛi ndɔ nda kɛsi nyɔɔŋ ndo,
Mbo soli nyɛm chɔu o soliŋ kpeku le kɔl ndɔ tuuwo chɔmndo woŋ.+
Kanifuule Chɛhowa, Mɛlɛka Kpuluŋguma Bɛndoo, Mɛlɛka puaa chɔuwa nɔ wallo le tosaa,
O lɛŋnde Kaadiaŋnda niŋ.
26 La fula o fondaŋnda leviltaŋ mi la huŋ chiŋalaŋ Babilɔŋ.+
La kuumbuu chiɛila ndɔla o kɛsi nyɔɔŋ ndaŋ.+
La diu diu ndu bembelaŋ, mɛɛ nda dii nuaa witiiyoŋ yɛ.
La tɛɛmbuu ndu kpata kpata.+
Wanaa nduaa o pilɛ bɛɛ la mɛi le.
27 La diu diu nauwaa nduaa fɔŋnduaa kpou.+
La yɛɛmbuu nda lɛŋ, mi la kili nda bololaŋ.
Kpundɔɔ cho le nda, kanifuule paale ndaleŋ le cho fuuluu,
Teleŋ nda nɔ le konaa dɔɔnɔŋndo wo!
28 Wanaa hɛluŋ o lɛŋnde Babilɔŋ ndeŋ niŋ,
Ma wa nyaanɔŋndo wa cho chaŋndaŋ kpeekpei,
Le ma kɔ yonda o Saayɔŋ niŋ maa Chɛhowa Mɛlɛka naa cho maa miŋgioo ni.
O cho maa miŋgioo le chiɛi ndɔɔ.+
29 Wanaa chaa chiŋuaŋ wuuwo, ma kindu chiɔula ndalaŋ nda,+
Chuuŋgiaa nda kpou le ma chiŋalaŋ Babilɔŋ.
La balu ndu silɔ, la chɛl mi wana o wana hɛluŋ te.
La paawa* ndu a mɛɛ walta ndɔlaŋ la cho yɛ.+
La tosal ndu mɛɛ ndu bɛɛ tosa yɛ.+
Kanifuule mbo tosa sɔɔŋ a yoŋga bɛndoo le Chɛhowa simullo,
O cho Wana Diandaa le Isɔluɛi yo.+
30 Lelaŋ, puaa nduaa feleŋguaa cho deli a vilɛiya o luŋnda ndɔlaŋ kpendekele,+
Nduyɛ puaa nduaa chɔuwa kpou cho tambei sɔla o paale leŋ choo.” Chɛhowa dimi lende ni.
31 Chɛhowa, Mɛlɛka Kpuluŋguma Bɛndoo, Mɛlɛka puaa chɔuwa dimi aa: “Num wana nila kaloo hoo,+ yaamɔɔnɔ numndo ya cho ni.+
Kanifuule paale numndeŋ le cho fuuluu, teleŋ ya cho num nyuna le ma dɔɔnuŋ kona wo.
32 Num wana nila kaloo hoo, a cho boŋ ma del,
Nduyɛ wana o wana mala num niŋ le ma sim te.+
I cho chieeŋ num bɛndoŋ malɔɔ o yiŋ,
Mi nyɛm cho num ŋ balaa silɔ woŋ ŋuɛ kpou.”
33 Nyɛ Chɛhowa, Mɛlɛka puaa chɔuwa dimi wo cho hoo ni:
“A tusi waŋnda Isɔluɛi, a waŋnda Chuda nyɛpalaa choo.
34 Kɛ Wana Pendu nda wo nɔ kpaayaa.+
Diola ndɔlaŋ la cho Chɛhowa, Mɛlɛka puaa chɔuwa ni.+
A tonya, o cho suɛi ndɛi biyɔɔ mbo suŋgu le nda,+
Le halikpeŋ mi lɛŋndeŋ le sɔla pɛŋgioo,+
Nduyɛ mi waŋnda o Babilɔŋ niŋ yɔŋnuŋ pulaŋ pulaŋ.”+
35 Chɛhowa dimi aa: “Muɛi faŋnde cho Kaadiaŋnda chiŋalaŋ,
Mi i chiŋalaŋ waŋnda Babilɔŋ, laŋgbaa nduaa kalla, a wanaa nduaa taasiaa.+
36 Muɛi faŋnde cho wanaa dimi sɔɔŋ fondoŋ nda* chiŋalaŋ, nduyɛ ma tosa sɔɔŋ ŋdiɔmndoŋ.
Muɛi faŋnde cho kuubaa nduaa chɔuwa chiŋalaŋ, mi siooŋii bɛnduei bii nda.+
37 Muɛi faŋnde cho suaa ndaa a nyɛm chɔu suaa naŋndoŋ chiŋalaŋ,
Mi i chiŋalaŋ wanaa yɛ yiaa cho loŋ nda,
Okoŋ mi nda kpou simnuŋ naŋ chaa waŋ laanduaa ni.+
Muɛi faŋnde cho sulta ndɔlaŋ chiŋalaŋ, ma puŋga nyɛm ndɔŋ.+
38 Kpundɔɔ cho mɛŋma nduaŋ choo, kanifuule ma cho vela sɛɛŋ.+
Lɛŋnde cho le piaa cha a piɔmnda leŋ le cho ni.+
Nduyɛ le mɛɛ nda cha yilaŋuŋ ŋsiooŋndoŋ yɛ, lelaŋ nda cho sɔɔŋ tosaa maa wanaa seemɛi ni.
39 Lelaŋ, o cho simnɔŋ fondaŋ chalaa le nyaa yoomaa wa o pollo niŋnda a visiaa wɔɔŋ wɔɔŋnda.
O cho vɛlɛ simnɔŋ fondaŋ chalaa le youwaa ɔsiluichiiya.+
Fɛɛŋ bɛɛ wana chel lɛ niŋ loŋ te,
Nduyɛ le fɛɛŋ a fɛɛŋ wana o wana kila niŋ chaltaŋ o fondaŋ koŋ te.”+
40 Chɛhowa dimi aa: “Mɛɛ ya Mɛlɛka tɛɛmbuu Sodɔm a Komoolua+ vɛlɛ a chieeŋ balu muŋ ndoŋ yɛ,+ lende koni i cho yɔŋnɔŋ a Babilɔŋ ni. Wana o wana chel lɛ loŋ te, nduyɛ wana o wana kila lɛ niŋ chaltaŋ loŋ te.+
41 Waŋnda cho chɔnɔŋndo ba luaŋ ndo ma wa hunɔɔ.
Kaale bɛnduleŋ a masaa bɛnduaa+ cho chɔnɔŋ,
O fondaŋnda cho landaŋ landaŋ o lɛŋndeŋ choo laŋ+ ma hiŋ le sɔŋgɔɔ.
42 A cho chiɔula ndalaŋ a balta ndalaŋ bɛɛndiaa.+
A cho ŋuasu ŋuasu, inyiɛɛ bɛɛ a nɔ le.+
Te a wa pɛ o suaa ndaa choo,
Bɔɔluu ndaa wa ko naŋ chaa pee mɛŋma ihɛllo cho ikpoku kpokuei ni.+
A cho a bɛɛndiaŋnda maa wana pɔnɔ le num hunɔɔ chiŋalaŋndo, num chua laandoo Babilɔŋ.+
Mi nyɛ nɛiyaa tual ndu choo o lepilɛ niŋ kpe,
Mɛɛ pulii vialɛi kpuuwa nuaa wana lanɔɔ yɛ.
44 “Waŋndo cho hunɔɔ mbo huŋ chiŋalaŋ fondaŋ nya manda chɔluaa wo, mɛɛ kpɔkuŋndo* fula nuaa o bundɛ bɛndu holnuŋ Chɔɔdaŋ ndaŋ ndo niŋ yɛ. Kɛ te teleŋ tiŋ hiou pɛ, I cho tosa ma nyaanuŋ ndu, okoŋ mi yulu wana ya hɛli wo iso le mbo wa ndu chilaŋ.+ O nɛɛnɛ cho yɛ maa ya? O nɛɛnɛ nɔla yɛ mbo simul la? Wana mandaa lasaa kuɛɛ nɔla yɛ mbo sim ya o hɔl?+ 45 Lelaŋ nya waŋnda, la tuei kɛɛsiaa Chɛhowa tosa a Babilɔŋ okɔɔ wo,+ vɛlɛ a sɔɔŋ o yiyaŋ le tosaa a lɛŋnde Kaadiaŋnda woŋ.
A tonya, saa tuaa cho lo wa, a wa niŋ kɔlaŋ a nda sasɔɔ.
Nduyɛ o cho chalta ndalaŋ tɛɛmbuu le sabu ndaa.+
46 Te diomndo soo dɔɔ pɛ a teleŋ nda cho Babilɔŋ biyɔɔ wo, lɛŋndeŋ le cho nyiiya,
Nduyɛ waŋnda wa niŋ chaŋndaŋ choo choo kpeleŋ o lɛŋnde niŋ.”+
51 Nyɛ Chɛhowa dimi wo cho hoo ni:
2 I cho wanaa hɛiyaa yɔŋ Babilɔŋ,
Ma hɛi ndu nduyɛ ma tosa mi lɛŋnde ndɔleŋ le lo fondo.
A cho fula ba o ba fee ma huŋ chiŋalaŋ ndu o paale kpundɛ leŋ choo.+
3 Maa wana wuu chiŋuaŋ ndo kindu chiɔu ndɔɔ le.
Nduyɛ maa wana o wana sim a doma ndɔ chɔuwo lekɔɔ le.
La tuiinuŋ puaa nduaa feleŋguaa inyiɛɛ le.+
La tɛɛmbuu puaa nduaa chɔuwa kpou.
4 A cho wa ihini a vilɛiya lɛɛsiɛŋ o lɛŋnde Kaadiaŋnda niŋ.
A cho nda chuukuu a mɔɔŋ faŋndoŋ o nɛila ndɔla bɛndulaŋ choo.+
5 Chɛhowa, Mɛlɛka puaa chɔuwa mel Isɔluɛi a Chuda ma simnuŋ maa wana lanɔ vii pɔnɔɔ wo le.+
Kɛ dɛnɛ wɔɔŋ cho tosaŋndo o lɛŋnde Kaadiaŋnda niŋndo cho o piaa cha Wana Diandaa le Isɔluɛi o hɔl.
6 La fula o Babilɔŋ niŋ,
Mi la nyaanuŋ le yoomula nyalaŋ chiindiaa.+
La sɔla tambei le yɔŋ ndɔ wɔɔŋndo le.
Kanifuule, teleŋndo cho hoo ni le mi Chɛhowa miŋgul ndu maa.
O cho ndu paawa* le nyɛ o tosa wo.+
7 Babilɔŋ wa Chɛhowa o ba maa taala ŋkoolii.
Mbo tosa mi muɛiyaŋ ma bii waŋnda kpou o lɛŋndeŋ choo.
8 Babilɔŋ del o lepilɛ niŋ kpe mbo yom.+
La mɛli ndu yeelaŋ choo!+
La huŋ a chuɛima baasam ndaŋ le nyɛ nɛiyaa o cho niŋ ndo, naapum o cho sioŋgɔɔ.”
9 “Miŋ kindiŋ le Babilɔŋ siŋgioo, kɛ o siŋgu le.
Ŋ malnuŋ ndu, mi wana o wana miiŋguŋ o lɛŋnde ndɔleŋ niŋ.+
Kanifuule yɔŋ ndɔ wɔɔŋndo fuuluu o choo choo niŋ di.
O hel filioŋ mbo hiau yumbu yumboo.+
10 Chɛhowa kelu yamɛi sakpuei le naa.+
La huŋ Saayɔŋ, miŋ chɔm walta Chɛhowa Mɛlɛka naa tosa laŋ.”+
11 “La bɛɛndiaa chiŋuaŋ,*+ mi la chua boola chɔula tiu tiula puaa chɔuwa bii o laba le nda mandaa laŋ.
Chɛhowa tosa mi kɔllo yusa masaa le Midiaa,+
Kanifuule o kɛɛsiaa le mbo tɛɛmbuu Babilɔŋ.
Maa Chɛhowa cho miŋgioo wo cho hoo ni le chiɛi ndɔɔ.
12 La simi suŋgbuleŋ+ maa tamasi le kpakilaŋ Babilɔŋ simullo.
La tosa fondaŋ mɛŋgɛlaa mbo wa o kala poŋ, mi la kɛsi wanaa mɛŋgɛlaa.
La tosa mi waŋnda apum veŋnuŋ le sɔŋgɔɔ.
Kanifuule Chɛhowa kɛɛsiaa le isɔɔ tosa.
Nduyɛ nyɛ o dimi a waŋnda Babilɔŋ okɔɔ wo, o cho ndu tosa.”+
13 “Num wana lanɔ chal hoo o peela faŋga faŋga laŋ choo,+
Ma nɔ sullo o hɔbɛi yo,+
Mɛɛlula numndaŋ la fuuluu, nduyɛ tɔnɔla ŋ wa sɔlaa laŋ kpou bɛɛ la mɛɛlu.+
14 Chɛhowa, Mɛlɛka puaa chɔuwa mɛnaŋ po* aa,
‘I cho tosa mi puaa pɛ o lɛŋnde numndeŋ niŋ, ma wa a hɔbɛi naŋ chaa soonuaa ni.
A cho num yomɔɔ ma wa num kuuliaa choo.’+
15 Ndu cho Wana Toosiaa lɛŋndeŋ a kpaaya ndɔɔ wo ni,
Ndu toosiaa lɛŋnde kɛndɛ kɛndɛle naŋ nyɔɔŋ ndeŋ a taasi ndɔɔ ni.+
Ndu koni pɛŋgɛla halaa a sinapɛŋgu ndɔɔ ni.+
16 Te o soo pɛ,
Mi mɛŋma cho o choo choo niŋndaŋ ma hiiluŋ yoŋgbaŋ yoŋgbaŋ.
Mbo tosa mi haŋgullo chɛŋ ba o ba fee o lɛŋndeŋ choo, mbo hel choo choo.
Mbo tosa mi nyɛ ŋualalɛiyo kiolu le mi piɔɔ sia.
Mbo soli hueiye o fondaŋnda o kɛsi ndi laŋ.+
17 Wana o wana cho sɔɔŋ tosaa maa wana nɔ sinapɛŋgu a kɔl kalu le wo.
Wana o wana tosa wallo a chiliŋndoŋ, siɔmbulaŋ la cho ndu biyɔɔ le piɔm o toosiaa wo.+
18 Nyɛ mamaa wali ndaa cho ni,+ nyɛ fondoo fuu.
Te paale Mɛlɛka chii niŋ a nda leŋ le fuuluu pɛ, a cho tambei sɔla.
19 Nyɛm Kɛŋ Chekɔpu Woŋ cho maa nyɔɔŋ muŋ te.
Kanifuule ndu toosiaa nyɛ o nyɛ fee ni,
Nduyɛ Isɔluɛi cho tinda nyɛm kɛŋ ndɔŋ ni.+
Diola ndɔlaŋ la cho Chɛhowa, Mɛlɛka puaa chɔuwa ni.”+
20 “Num* cho kunduwa nuu ni, nyɛ ni chɔuwo.
Num ya cho kpeku soliŋ ni mi tɛɛmbuu lɛŋnde.
Num koni ya cho kpeku soliŋ ni mi tɛɛmbuu masɛi.
21 Num ya cho kpeku soliŋ ni mi tɛɛmbuu soo a wana cho ndu nyaanɔŋndo wo.
Num koni ya cho kpeku soliŋ ni mi tɛɛmbuu nyɛ nyaanaŋ suaa naŋndo a wana nyaanuŋ ndu wo.
22 Num ya cho kpeku soliŋ ni mi tɛɛmbuu wana pɔnɔɔ a wana lanɔɔ,
Mi tɛɛmbuu bɛndu yuuwo a poombɔ pɔmbɔɔ.
Num ya cho kpeku soliŋ ni mi tɛɛmbuu po feleŋgɔnɔɔ a wana lanɔ feleŋgɔnɔɔ.
23 Num ya cho kpeku soliŋ ni mi tɛɛmbuu wana mandaa lasaa a saa nduaa,
Mi tɛɛmbuu wana wali ichiɔɔ a chɔluaa nduaa tosal ndu wallo wa,
Num ya cho kpeku soliŋ ni mi tɛɛmbuu masaa ŋbuŋgaa a wanaa cho masaa ikɛiya.
24 I cho Babilɔŋ a wanaa cho o lɛŋnde Kaadiaŋ ndeŋ niŋnda paawa,
Le sɔɔŋ wɔɔŋ nda tosa o Saayɔŋ niŋ, waŋnda Chuda o hɔl loŋ.”+ Ya Chɛhowa dimi lende ni.
25 Chɛhowa dimi aa: “Num pembii bɛnduii tɛɛmbuu hei nyɔɔŋ nde, I cho num chiŋalaŋ.+
Num tɛɛmbuu hoo lɛŋndeŋ kpou wo,+
I cho ba nuu siɛndi mi chiŋalaŋ num, nduyɛ mi nyindu num ma pimbul o poutaŋ choo,
Okoŋ mi tosa ma simnuŋ pembii ŋualɛiye.”
26 “Waŋnda chue lɛ niŋ pou saa taŋgullo wo ɔɔ pou chiiye sim choo wo num o ba le,
Kanifuule a cho tambei sɔla le fɛɛŋ a fɛɛŋ.”+ Ya Chɛhowa dimi lende ni.
27 “La simi suŋgbuleŋ maa tamasi o lɛŋndeŋ niŋ.+
La hɔŋ buloo o kaalaŋ tɛɛŋ.
La hɛli* lɛŋnde le ma chɔulaba ndu.
La dimul masɛi Alualuati,+ Mini, a Asikɛnaasi+ ma kɔ chɔulaba ndu.
La viom wana hɛli puaa chɔuwa wo le ndu chiŋalaŋndo.
La tosa mi sofɛliaa hinul ndu naŋ chaa soonuaa ni.
28 La hɛli lɛŋnde le ndu chiŋalaŋndo.
La hɛli* masaa Midiaa,+ masaa nduaa ŋbuŋgaa, masaa cho ndu ikɛi ya,
A wanaa nda cho masaleŋ choo wa kpou.
29 Lɛŋndeŋ le cho nyiiya mi le hiiluŋ woku woku.
Kanifuule nyɛ Chɛhowa dimi a Babilɔŋ okɔɔ wo cho peelɔŋ.
O cho simnɔŋ nyɛ waŋnda cha mi siooŋnde bii nda wo, nduyɛ wana o wana ve lɛ niŋ loŋ te.+
30 Puaa chɔuwa Babilɔŋ pɛŋgi sɔŋgɔɔ.
A chal o fondaŋnda ndala kala kalalaŋ niŋ.
Yoomuaŋ ma chuu nda fo.+
A simnuŋ maa waŋ laanduaa.+
A mal chiɛila ndɔlaŋ o yiŋ,
Ma pesi diola ndɔla ŋchiliŋndaŋ.+
31 Wana kua a yooŋgulaŋ ndo nyaanuŋ le mbo komal wana cheleŋ kua a yooŋgulaŋ ndo,
Mi wana viamaa komal wana viamaa cheleŋ,
Le ma dimul masaa le Babilɔŋ maa a balu chiee ndɔɔ malɔɔ o yiŋ silɔ,+
32 Nduyɛ maa a bii fondaŋnda taŋaalaŋ,+
Ma mal dɛndɛla nda toosiaa a tɔlɔɔ velaŋ a tɛiyo laŋ o yiŋ,
Okoŋ mi siooŋii bɛnduei bii puaa chɔuwa.”
33 Nyɛ Chɛhowa, Mɛlɛka puaa chɔuwa, Mɛlɛka Isɔluɛiya dimi wo cho hoo ni:
“Chua laandoo Babilɔŋ cho ko maa yasaba luaa ŋwitii.
Teleŋndo cho hoo ni le ma niɔu niɔu ndu o kala kala.
Teleŋ ndɔ kuauwaa cho fuuluu suŋ suŋ.”
34 “Nɛbukanɛɛsa,* masaa le Babilɔŋ tɛɛmbuu ya.+
O tosa mi hiŋnuŋ lahɔl.
O tosa mi wa maa nyɛi laandii nyɛ o nyɛ cho leniŋ te ve.
O mel la mɛɛ kɛu bɛndoo mial nuaa nyɔɔ yɛ.+
O pei dembe ndɔɔ cha a nyɛm niŋ kɛndɛ kɛndɔŋ,
Nduyɛ mbo tuaa ya chɛkɛlɛ.
35 Waŋnda Saayɔŋ dimi aa, ‘Maa nyɛ Babilɔŋ tosal naa a wanaa naa wo miiŋgu ndu choo fɔ!’+
Waŋnda Chulusalɛm dimi aa, ‘Maa tɔɔyaŋ kooma naŋ ma hel waŋnda o lɛŋnde Kaadiaŋ ndeŋ niŋ o lebol fɔ!’”
36 Lelaŋ nyɛ Chɛhowa dimi wo cho hoo ni:
I cho pee ndɔ mɛŋma ihɛllo veeliaa, okoŋ mi sooŋnda ndɔla mamɛŋndaŋ la vela.+
37 Babilɔŋ cho simnɔŋ bembelaŋ.+
O cho simnɔŋ bɛmɛlta tuŋaa yonduaa.+
Siooŋnde cho waŋnda biyɔɔ a nyɛ yɔŋnuŋ niŋ ndu wo, okoŋ ma hɔŋ huiye.
Wana o wana ve niŋ loŋ te.+
38 Nda kpou a cho wa pɛɛliaa naŋ chaa kpɔkuŋaa* fɔŋnduaa ni.
A cho wa kuuliaa naŋ chaa kpɔkuŋaa chuauwa ni.”
39 “Teleŋ nda cho wa a yeemɛi yo, I cho bɔŋaŋ diaa nyɛdiaa bɛndoo tosa le nda nduyɛ mi tosa mi muɛiyaŋ ma bii nda,
Le halikpeŋ ma heeluŋ.+
Okoŋ mi tosa ma lɔl lɔma fafɛɛŋ ndaŋ,
Nduyɛ fɛɛŋ bɛɛ a tindi lɛ le.”+ Ya Chɛhowa dimi lende ni.
40 “I cho nda tusi lɛŋ mɛɛ nda wa nuaa saa fɔŋnduaa diyɔɔ yɛ,
Mi tusi nda mɛɛ nda wa nuaa saa konduaa a chuiŋaa tooyiaa diyɔɔ yɛ.”
41 “Nuawɔ se mɛɛ nda bii Siisiaki* yɛ!+
Nuawɔ se mɛɛ nda bii chiee bɛndu waŋnda saŋgala saŋgala bɛndoo wo yɛ!+
Nuawɔ se mɛɛ Babilɔŋ simnuŋ nyɛ isiooŋ o kaalaŋ tɛɛŋ yɛ!
42 Pee mɛŋma ihɛllo kumbu Babilɔŋ kpu.
Pee mɛŋma ihɛllo kalaŋiaŋ mbo kumbu ndu kpu.
43 Chieeŋ ndɔŋ bɛndoŋ simnuŋ nyɛ waŋnda cha mi siooŋnde bii nda wo, lɛŋnde polte mɛŋma cho leniŋ te leŋ.
Wana o wana cho lɛ wa o lɛŋnde leŋ niŋ te, nduyɛ wana o wana keeku lɛ loŋ te.+
Waŋnda o lɛŋnde niŋ ve lɛ niŋ kɔlaŋ ikpɔlɔ kpɔluɛi naa ndu chua le,
Nduyɛ kpakioo Babilɔŋ cho komba.+
45 Wanaa niaa, la fula o chiee koŋ niŋ!+
La nyaanuŋ le yoomula nyalaŋ chiindiaa,+ kanifuule ya Chɛhowa, I tuulu kɔl ŋama ŋama a ndu.+
46 La wou kpandeŋ ɔɔ mi siooŋii bii nya a kona nya wa niŋ tueiyɔɔ o lɛŋndeŋ niŋndo le.
La tuɛi niŋ konaa o wɔsioo niŋ,
Nduyɛ mi la tuei vɛlɛ kona cheleŋ o wɔsioo pilɔɔ niŋ.
Sɔŋgɔlaŋ la cho wa o lɛŋndeŋ niŋ, nduyɛ mi masaa simul masaa.
47 Lelaŋ teleŋndo cho fuuluu,
Mi mulul piɔmaa cho Babilɔŋ nda hɔlla.
Waŋnda o lɛŋnde ndɔleŋ niŋ kpou, siɔmbulaŋ la cho nda biyɔɔ.
Wanaa nda cho diu o chioo hoo niŋnda kpou cho wa ihini lɛɛsiɛŋ.+
48 Choo choo a lɛŋndeŋ vɛlɛ a nyɛ o nyɛ cho leniŋ,
Ŋ cho deŋi a nyaaloo Babilɔŋ choo.+
Kanifuule wana tɛɛmbaa cho chɔnɔŋ ba luaŋ ndo mbo hinul ndu.”+ Ya Chɛhowa dimi lende ni.
49 “O cho ko waŋnda Isɔluɛi le Babilɔŋ diu diu mbo mɛli nda lɛɛsiɛŋ te.+
Kɛ o Babilɔŋ niŋ bɛɛ, ma diu diu waŋnda o lɛŋndeŋ choo kpou, nduyɛ ma mɛli nda lɛɛsiɛŋ.
50 La hɛluŋ muɛi faŋnde. La hiou lachi a kɔlaŋ, la sim te!+
La loonuŋ a Chɛhowa okɔɔ naa nya cho wa o fondaŋnda leviltaŋ nda.
Maa la wa yiyaŋndo a Chulusalɛm okɔɔ o kɔlta nyalaŋ niŋ.”+
51 “A tusi naa siɔmbulaŋ. Ŋ tuei a mamɔɔ nda cho naa wo okɔɔ.
Bɛɛla tambɛilaŋ la kumbu naa hɔlla kpu,
Kanifuule mialla huŋ chiŋalaŋ fondaŋnda diandaa laŋ o chiɛi Chɛhowa wo.”+
52 Chɛhowa dimi aa: “Teleŋndo cho fuuluu,
Mi mulul piɔmaa nduaa hɔlla.
Nduyɛ o lɛŋnde ndɔleŋ niŋ kpou, wanaa yɔŋuluŋ nda cho wa mɔnɛi biyɔɔ.”+
53 “O yɔŋ bɛɛ mi Babilɔŋ hel o choo choo niŋ di,+
Mbo taŋgul kpakila ndɔlaŋ la kala kala,
I cho wana tɛɛmbaa yɔŋ mbo kuel ndu.”+ Ya Chɛhowa dimi lende ni.
54 “La yaŋ nilaŋ! Yeelaŋ la cho fulaa Babilɔŋ kpeekpei.+
Bɔɔluu dɛnɛ tɛɛmbaa bɛndoo cho fulaa o lɛŋnde Kaadiaŋnda niŋ,+
55 Kanifuule Chɛhowa cho Babilɔŋ tɛɛmbuuwo.
O cho tosa mi bɔɔluu bɛndu cho loŋ ndo mei doŋ.
Bɔɔluu yaamɔɔwaa nduaa cho wa mɛɛ mɛŋma bɛnduaŋ ma kalaŋiaŋ nuaa yɛ.
Waŋnda cho wa diomnda ndalaŋ tueiyɔɔ.
56 Wana tɛɛmbaa cho Babilɔŋ hinul.+
A cho puaa nduaa chɔuwa biu biu,+
Ma tɛɛmbuu chiɔula ndalaŋ.
Kanifuule Chɛhowa, Mɛlɛka miŋgi maa wo o cho ni.+
A tonya, o cho ndu maa miŋgul.+
57 I cho tosa mi muɛiyaŋ ma bii laŋgbaa nduaa kalla, puaa nduaa taasiaa,+
Masaa nduaa ŋbuŋgaa, masaa cho ndu ikɛi ya, a puaa nduaa chɔuwa,
Ma lɔl le fɛɛŋ a fɛɛŋ,
A tindu lɛ niŋ kposoŋ te.”+ Masaa dimi lende ni, o nɔ diolaŋ aa Chɛhowa, Mɛlɛka puaa chɔuwa wo.
58 Nyɛ Chɛhowa, Mɛlɛka puaa chɔuwa dimi wo cho hoo ni:
“Mi che bɛɛ kpakioo Babilɔŋ cho o kala kala, kɛ o cho tambei sɔla kpata kpata.+
Mi che bɛɛ diola ndɔla kpakilaŋ la cho la vilɛi, kɛ a cho laŋ malɔɔ o yiŋ.
Waŋnda cho saŋga o fondo fuuwo choo.
Waŋnda o lɛŋnde niŋ cho saŋga tau, kɛ yiŋndeŋ ko nda wa niŋ beeŋguuwo ni.”+
59 Nyɛ Chɛluimaya, wana suaa le Mɛlɛka wo dimul Sɛluiya, po Nɛluaya wo+ wo cho hoo ni, mɛɛ nda kuɛ nda ndu o Sɛdikaya lo Babilɔŋ, masaa le Chuda, o wɔsi hiɔɔlu ndɔ o wa o masaleŋ choo wo niŋ. Nɛluaya yɛ, Masɛya velu ndu ni. Nduyɛ Sɛluiya wa nyɛm lemasaŋ bolleŋ ni. 60 Mi Chɛluimaya poonyiaa kpundɛla nɔ le Babilɔŋ tolɔɔ choo laŋ kpou o yauwo o pilɛ niŋ. Kpundɛlaŋ ndaŋ kpou, a Babilɔŋ okɔɔ o poonyiaa laŋ ni. 61 Okoŋ kɔɔli, mi Chɛluimaya dimul Sɛluiya aa: “Te a hiŋ pɛ Babilɔŋ ma che mɛɛ o cho yɛ, a nɔ ma veelu diomndaŋ ndaŋ choo choo kpeleŋ. 62 Okoŋ ma dimi aa, ‘Oo Chɛhowa, a dimi a fondɛi hei okɔɔ maa i cho tambei sɔla, nduyɛ maa wana o wana ve lɛ niŋ loŋ te, wanachiee ni, visi ni, okoŋ mbo simnuŋ pɔmndo le fɛɛŋ a fɛɛŋ.’+ 63 Te a chii pɛ diomndaŋ veelu o yauwo hoo niŋ, baa pouwo o ndu, ma viou ndu o pee kɔllo Yufiluaati. 64 Okoŋ ma dimi aa, ‘Nuaa Babilɔŋ cho mɔɔwa ni, nduyɛ le fɛɛŋ a fɛɛŋ o cheŋ lɛ mbo sim te.+ Kanifuule kpundɛ ya cho ndu tusi choo wo cho tosa mbo saŋga yɔkɔɔ.’”+
Diomnda Chɛluimaya poonyiaa laŋ la cho laŋ ni.
52 Sɛdikaya+ wa wɔsilaŋ 21 mbo simnuŋ masaa, nduyɛ mbo chii wɔsilaŋ 11 o masaleŋ choo Chulusalɛm. Kala ndɔ ndoo nɔ diolaŋ ni aa Hamuta,+ chua Chɛluimaya wo, fulaa Libina. 2 Mbo hiau lachi a nyɛ bɛnda Chɛhowa o hɔl te wo tosaa, mɛɛ Chɛhowakim ndoo tosa yɛ.+ 3 Le mɛɛ Chɛhowa ndoo dɔɔnuŋ tumbe yɛ sɔɔŋ muŋ wa waŋnda Chulusalɛm a waŋnda Chuda yɔŋnɔŋndo ni, haaa mbo faŋa nda ndu o hɔl bau.+ Nduyɛ mi Sɛdikaya simul masaa le Babilɔŋ.+ 4 Wɔsi ŋɔmahiɔɔlu ndɔ Sɛdikaya wa o masaleŋ choo wo, paŋgii tɔ ve malɔ tɔ, mi Masaa Nɛbukanɛɛsa* huŋ a puaa nduaa chɔuwa kpou le Chulusalɛm chiŋalaŋndo a sɔŋgɔɔ. Ma kila dɔɔŋgɔɔ ndu ikɛi, nduyɛ ma taŋgul kpakioo, ma luei chioo kpou o piŋndo niŋ.+ 5 Chioo hoo lo o piŋndo niŋ haaa wɔsi 11 Masaa Sɛdikaya wa o masaleŋ choo wo.
6 O paŋgii hiɔɔluei niŋ malɔ le ŋɔmahiɔɔlu,+ mi yima bɛnduaŋ ma bii waŋnda o chioo niŋ, nduyɛ nyɛdiaa kɛ kɛ ve lɛ nda o laba o lɛŋndeŋ niŋ te.+ 7 O mɛɛlulaŋ kpɔŋ, chioo wa o piŋndo niŋ, mi Kaadiaŋnda pial kpakioo a nyumndaŋ. Kɛ mi puaa chɔuwa kpou keeku o dio wa o kpakila tiɔɔŋnda wa o kpele masaa ikɛi yo, ma nyaanuŋ. Ma hiau lachi a nyaanɔŋndo o nɛi kuɛ Aluaba wo.+ 8 Kɛ mi puaa chɔuwaa Kaadiaŋnda tisa Masaa Sɛdikaya+ kɔɔli, nduyɛ ma kɔ bii ndu o pollo niŋ Chɛluiko. Okoŋ, mi puaa nduaa chɔuwa kpou mɛi ndu ma nyaanuŋ. 9 Mɛɛ nda bii masaa, ma kua a ndu o masaa le Babilɔŋ ndo Luibila o lɛŋnde Hamaati leŋ niŋ, okoŋ mbo kilul ndu yamɛi. 10 Mi masaa le Babilɔŋ dii puaa Sɛdikaya wa ndu o hɔl, a laŋgbaa nduaa kalla Chuda kpou Luibila. 11 Okoŋ mi masaa le Babilɔŋ pesi Sɛdikaya hɔltaŋ,+ mbo wou ndu o kpiɔɔ, o nda toosiaa a chiliŋii siaŋɛi yo.* Mbo kua a ndu Babilɔŋ mbo kɔ wou ndu o chiɛi manyumndo niŋ. O lo loŋ haaa mbo sɔla piɔmndo.
12 O paŋgii ŋuɛɛnuei niŋ malɔ tɔ, koŋ cho ni, wɔsi 19 Nɛbukanɛɛsa* masaa le Babilɔŋ wa o masaleŋ choo wo, mi Nɛbusaluadaŋ, wana bɛndu wanaa manda masaa wa huŋ Chulusalɛm.+ Nduyɛ buɛi masaa le Babilɔŋ ndo o wa ni. 13 Mbo luam chiɛi Chɛhowa wo,+ chiɛi lemasaa, a chiɛila wa Chulusalɛm ndaŋ kpou. Mbo luam vɛlɛ chiɛi bɛndu kɛ kɛ wa loŋ. 14 Nduyɛ kpakila laa balu Chulusalɛm ndaŋ kpou, mi Kaadiaŋaa wa latulu a wana bɛndu wanaa manda masaa wa koombiaa laŋ kpou.+
15 Mi Nɛbusaluadaŋ, wana bɛndu wanaa manda masaa wa kua a wanaa nɔ nyɛsɔlaa bɔɔ le wa apum, vɛlɛ a wanaa tuaa lo o chioo niŋnda o biyɔɔ niŋ. Mbo kua vɛlɛ a wanaa yɔŋguŋ o masaa lo wa vɛlɛ a wanaa chaa nyɔɔŋ toosiaa a laba wa.+ 16 Kɛ mi Nɛbusaluadaŋ, wana bɛndu wanaa manda masaa wa mɛi wanaa bala fonduaa o lɛŋndeŋ niŋ, le yɔmii makilepiiye kɛiyaa a wali lechiɔɔ tosaa.+
17 Mi Kaadiaŋnda pesi pesi suŋgbuma nda toosiaa a chiliŋii siaŋɛi+ o chiɛi Chɛhowa wo waŋ, nyɛla viliaa mamɛŋndaŋ,+ a Hɛŋgɛi nda toosiaa a chiliŋii siaŋɛi le mɛŋndaŋ kɛsioo leniŋ,+ mi la wa o chiɛi Chɛhowa wo laŋ. Okoŋ, ma kuaŋnuŋ a chiliŋuŋ siaŋaŋ kpou Babilɔŋ.+ 18 Ma chua vɛlɛ hɛŋgɛila nda duau pultaŋ ndaŋ, siɔbuiilaŋ,* nyɛla nyumiaa leyiŋndaŋ, hɛŋgɛila pɔmbɔlaŋ,+ taalalaŋ,+ a nyɛm laanduŋ nda toosiaa a chiliŋii siaŋɛi le wallo o chiɛi Mɛlɛkaa laŋ kpou. 19 Mi wana bɛndu wanaa manda masaa wa chua hɛŋgɛila bɛndulaŋ,+ nyɛla chuaa leyiŋndaŋ, hɛŋgɛila pɔmbɔlaŋ, hɛŋgɛila nda duau pultaŋ ndaŋ, nyɛla kɛsiaa la lambuilaŋ,+ taalalaŋ, a hɛŋgɛila nda toosiaa a koolii kɛndɛ kɛndɛi vɛlɛ a kanii humbuei laŋ.+ 20 Kɛ suŋgbuma miɔɔŋ ndaŋ, Hɛŋgɛi Mamɛŋndo, nauwaa 12 nda toosiaa a chiliŋii siaŋɛi+ ma kɛsi nda Hɛŋgɛi koŋ o kɔɔ wa, a nyɛla viliaa lawolɔɔla Sɔlɔmɔŋ toosiaa o chiɛi Chɛhowa wo niŋndaŋ, wana o wana ndoo nɔla chiliŋii siaŋɛi nda soliŋ kpeku le laŋ toosiaa ve tuu le.
21 Suŋgbuaŋ maŋ yɛ, le kɛ kɛ le wa bandei nɛiyo 27.* Yoole tuwaaleŋ le suŋgbule kɛ kɛ bɔŋaa silɔ,+ le wa bandei nɛiyo 18.* Nduyɛ chiliŋii nda toosiaa suŋgbule kɛ kɛ ve, chelul ndɔɔ wa toŋgii sooŋ ŋ hiɔɔlu. Le kɛ kɛ lee nɔ sooŋndo leniŋ. 22 Nduyɛ nyɛla nda handu o suŋgbuaŋ bolle laŋ, a chiliŋii siaŋɛi nda toosiaa laŋ ni. Nyɛlaŋ ndaŋ o pilɛ, bandii nduɛi wa nɛiyo le ŋɔmmɛu a tɛndaa tɛɛŋ.+ Nyɛ nda kiŋi kiŋi maa yala wo, a pɔmɛkilanetiima nda tuuliaa o nyɛla wa o suŋgbuaŋ bolle waŋ kpou, a chiliŋii siaŋɛi nda toosiaa laŋ ni. Suŋgbuma miɔɔŋ ndaŋ kpou, nyɛpilɔɔ kpe ma wa ni, nduyɛ pɔmɛkilanetiima nda tuuliaa lechoo waŋ bɛɛ. 23 Pɔmɛkilanetiiyaŋ 96 ma wa o kpeŋgoŋ ni. Kpou kpou, pɔmɛkilanetiiyaŋ 100 ma wa ma balaa o nyɛ nda kiŋi kiŋii maa yala wo ni.+
24 Mi wana bɛndu wanaa manda masaa wa kua vɛlɛ a Sɛluiya+ masa wanaa soliaa lasalaa, Sɛfanaya+ wana soliaa lasala diiŋ ndɔɔ, a waŋnda a yaa, a ndaa manda diolaŋ nda.+ 25 Mbo kua vɛlɛ a wana pilɛ o wa o chiɛi lemasaa niŋ mbo wa puaa chɔuwa bolleŋ ndo, masaa chaaŋaa nduaa kpɛɛluŋnda a ŋɔmmɛu a o saaluŋ o chioo niŋnda, a wana poonyiaa le wana wa puaa chɔuwa bolleŋ ndo, o ndoo yooŋgu puaa chɔuwa o lɛŋnde leŋ niŋ le kɔlaŋ o chɔuwo wo, a puaa cheleŋ o saaluŋ o chioo niŋnda ŋwaŋ 60. 26 Mi Nɛbusaluadaŋ, wana bɛndu wanaa manda masaa wa chua nda, mbo kua a nda o masaa le Babilɔŋ ndo Luibila. 27 Mi masaa le Babilɔŋ diu diu nda Luibila+ o lɛŋnde Hamaati leŋ niŋ. Mɛɛ nuaa nda looku waŋnda Chuda faŋa o lɛŋnde ndaleŋ niŋ ni ma kua a nda o biyɔɔ niŋ.+
28 Wanaa Nɛbukanɛɛsa* kuɛ o biyɔɔ niŋ o wɔsi ŋɔmmɛu wo niŋnda wa Chuuwa 3,023.+
29 O wɔsi 18 Nɛbukanɛɛsa*+ wa o masaleŋ choo wo niŋ, waŋnda 832 nda chua Chulusalɛm ni ma kua a nda o biyɔɔ niŋ.
30 O wɔsi 23 Nɛbukanɛɛsa* wa o masaleŋ choo wo niŋ, mi Nɛbusaluadaŋ, wana bɛndu wanaa manda masaa wa kua a Chuuwa 745 o biyɔɔ niŋ.+
Kpou kpou, waŋnda 4,600 nda kuɛ o biyɔɔ niŋ ni.
31 Wɔsi 37 Chɛhowakiŋ,+ masaa le Chuda wa o chɛleŋ niŋndo, o paŋgii 12 niŋ malɔ 25, mi Ivi-mɛlodaki masaa le Babilɔŋ soli Chɛhowakiŋ, masaa le Chuda o chiɛi manyumndo niŋ. Nduyɛ wɔsi koŋ Ivi-mɛlodaki simnuŋ masaa ni.+ 32 Mbo suaa o ndu lo nyɛkɛndɛi, nduyɛ mbo ke ndu foofoo mbo hiau masa kɛ kɛ wa a ndu latulu Babilɔŋ. 33 Okoŋ, mi Chɛhowakiŋ soli nyɛla wa ndu lekɔɔ o chiɛi manyumndo niŋndaŋ. Nduyɛ teleŋ o teleŋ, nda masaa ndaa dia nyɛdiaa latulu ni haaa a yoomu ndɔɔ mɛɛlulaŋ. 34 Haaa mbo wu, mi masaa le Babilɔŋ ndoo ke ndu nyɛdiaa lepaa o lepaa.
Naapum diolaŋ ndaŋ la sim, “Chɛhowa Heelu.”
Ɔɔ “hɛli.”
Hibuluiye, “tuupa ma fula o demboo niŋ.”
Ɔɔ “feleŋgɔnɔɔ.”
Hibuluiye, “wana cho lahɔl lo.”
Ɔɔ “kpɛɛnɛi yawɛi nɔ sondo bɛndoo ve.”
Hibuluiye, “kpɛɛnɛi nda sɛndi yiŋndeŋ lebɛŋgu ve.”
Ɔɔ “kpɛŋɛ.”
Hibuluiye, “yii chaŋnda peŋ.”
Ɔɔ “kapaa.”
Ɔɔ “a cho num yomɔɔ le.”
Ɔɔ “kaala lo lechoo.”
Naapum o pouwo.
Ɔɔ “Yalakanaa.”
Ɔɔ “Mɛmfisi.”
Koŋ cho ni, lɛuvii fula o Pioo Nail ve.
Koŋ cho ni, Yufiluaati.
Koŋ cho ni, puaa chɔuwa o choo choo niŋ.
Hibuluiye, “mi la puluŋ a sodaa ɔɔ libiiyo.”
Hibuluiye, “paŋgii nduɛi.”
Ɔɔ “mɛlɛkaa cheleŋnda.”
Ɔɔ “yalakana.”
Hibuluiye, “Aluabuiinɔɔ.”
Hibuluiye, “I cho tosa mi hɔlaa niaa del te.”
Ɔɔ “mɛlɛkaa cheleŋnda.”
Ɔɔ naapum, “pɔnɔ nya.”
Ɔɔ “kpɛŋɛ.”
Hibuluiye, “chaaŋ ndɔ.”
Nyɛ fondoo hoo sim le mɛlɛka Baal.
Ɔɔ “yalakanaa.”
Hibuluiye, “Wanaa mɛŋgɛlaa,” koŋ cho ni, wanaa mɛɛndaŋ chioo le sinaa teleŋ nda nɔ ma bii ndu wo wa.
Hibuluiye, “o kpakila kɔl nuu.”
Ɔɔ “I bii mɔnɛi.”
Hibuluiye, “a vi ŋdial te.”
Ɔɔ “yalakana.”
Ɔɔ naapum, “Mɛlɛka cho kposoŋ te.”
Hibuluiye, “beedii ɔɔ bulu.”
Hibuluiye, “diɔmaa nɔ haa kɔl niŋ te wa.”
Hibuluiye, “La dindi nyapila.”
Hibuluiye, “nila ndalaŋ la sɔla hivi chiɛi kɔɔli le.”
Hibuluiye, “Wanaa nɔ palɛi tau wa latulu.”
Ɔɔ “silala.”
Bil chuŋ kɛndɔɔ.
Koŋ cho ni, Chɛluimaya.
Ɔɔ “kapaa.”
Hibuluiye, “Laŋ la cho,” taŋgulta wa o luŋ chiɛi Mɛlɛkaa laŋ ni.
Ɔɔ “chuauwaa nɔ ŋfinya le wa.”
Ɔɔ “kumii lasalɛi.”
Hibuluiye, “chɔnɔŋndo idii puŋ mi wa suɛi.”
Ɔɔ “buloo.”
Diolaŋ ndaŋ ndaa veelu mɛlɛka laandu Isɔluɛiyaa simul Mɛlɛka wa ndaa piɛiyo ni. Ɔɔ naapum, mɛlɛka laandu tosa mi nyɔɔŋ kui yo.
Ɔɔ “tiŋɔɔ.”
Ɔɔ “silala ndalaŋ.”
Hibuluiye, “chɔnɔŋndo idii puŋ mi viam nda.”
Hibuluiye, “Ma kindi kɛsuŋ ndaŋ.”
Hibuluiye, “Sakpoyɛi kiolu nda o sondo kpali.”
Tofa Tɛɛsiaa, “Kɛhɛna.”
Ɔɔ “I luei o yiyaŋnda nilaŋ niŋ te.”
Tofa Tɛɛsiaa, “Kɛhɛna.”
Ɔɔ “teleŋnda ndɔlaŋ.”
Ɔɔ “silala.”
Ɔɔ “silala.”
Ɔɔ “finɛtelela.”
Ɔɔ “pɔŋtiiyoŋ.”
Ɔɔ “malatoo.”
Sɔɔŋ 11 o bolle Baabuileŋ ndeŋ niŋ, o Alamakiiye niŋ nda poonyiaa leŋ ni.
Ɔɔ “chiliŋii teeŋgiɛi.”
Naapum o Chɛluimaya lo o wa suɛi ni.
Ɔɔ “nɔnɔɔ.”
Ɔɔ “I yɔŋnuŋ lende fɔ.”
Hibuluiye, “chɔnɔŋndo idii puŋ le nda silaa.”
Ɔɔ “kumii lasalɛi.”
Koŋ cho ni, salala nda soli o chiɛi Mɛlɛkaa niŋndaŋ.
Hibuluiye, “kɔl keloŋ.”
Hibuluiye, “kɔl keluŋ ndaŋ.”
Ɔɔ “yalakana.”
Ɔɔ naapum, “Le chaŋ.”
Hibuluiye, “Dialii kɛ kɛ.”
Ɔɔ “A wou chieeŋ ndɔŋ bɛndoŋ o piŋndo niŋ.”
Ɔɔ “Itoopiaŋnɔɔ.”
Ɔɔ “kpɛŋɛ.”
Ɔɔ naapum, “yamaŋ ŋhiɔɔlu.” Hibuluiye, “yuŋgulaŋ la hiɔɔlu.”
Ɔɔ naapum, “Ma wa hiouwɔɔ lachi a miiŋgɔŋndo amakɔɔ.”
Ɔɔ “I kel suei le.”
Ɔɔ “kapaa.”
Koŋ cho ni, Chɛluimaya.
Ɔɔ “ma yem num te.”
Naapum naamoo hoo Isɔluɛiyaa ndaa piɛi Mɛlɛka le wa ndaa tosa ni, te waŋndo ndoo vi pɛ.
Hibuluiye, “Kelala ndalaŋ kpou.”
Tofa Tɛɛsiaa.
Ɔɔ “wana dialuŋ kala.”
Ɔɔ “wana dialuŋ kala.”
Hibuluiye, “kɔl keloŋ.”
Ɔɔ “Kpɛŋɛ.”
Hibuluiye, “Wanaa simul la wa,” naapum a Chɛhowa okɔɔ nda cho suɛi ni.
Ɔɔ “ma tɛɛmbuu nda hiouwɔɔ bɛmbɔɔ lediiŋ.”
Hibuluiye, “Ma kindi kɛsoŋ.”
Ɔɔ “I cho suei kiolɔɔ.”
Ɔɔ “I cho suei kiolɔɔ.”
Hibuluiye, “toosiaa.”
Ɔɔ “kumii lasalɛi.”
Ɔɔ “nɛila nda toosiaa le laŋ.”
Ɔɔ “silala.”
Hibuluiye, “miŋ kaandiaa ndu a diɔɔmuleŋ.”
Hibuluiye, “nilaŋ la cho ndu beŋul.”
Tofa Tɛɛsiaa, “Kɛhɛna.”
Hibuluiye, “kindi kɛsuŋ ndaŋ.”
Hibuluiye, “kɔl keluŋ.”
Ɔɔ “yoomu.”
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Ɔɔ “o cho nyaanɔŋ a yoomu ndɔɔ.”
Ɔɔ “dɛŋgbɔɔ.”
Ɔɔ “kpɛŋɛ.”
Ɔɔ “viiya.”
Hibuluiye, “hɛli.”
Ndu koni nda veelu vɛlɛ ni aa Chɛhowahasi.
Ɔɔ “wolii.”
Ɔɔ “sala.”
Ɔɔ “finɛtelelaŋ.”
Ndu nda veelu vɛlɛ ni aa Chɛhowakiŋ a Chɛkonaya.
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Ɔɔ “manda nda leŋ niŋ te.”
Hibuluiye, “palɛi nduɛi.”
Ɔɔ “wana sakpo cho lo nyɛm kiɔɔŋ ndo fula.”
Ɔɔ “a simul tonyaa.”
Hibuluiye, “Ma kindi waŋnda balaŋ.”
Ɔɔ “peiyo nda cho nya ni a tiindaŋ fondoo.”
Ɔɔ “malato.”
Ɔɔ “yooŋgula lusulɛila.” Diom maHibuluiyo hoo sim le sɔɔŋ ŋ muuŋ: “yooŋgu lusulɛi chɛŋ Mɛlɛka o ba wo” ɔɔ “nyɛ lusulɛiyo.”
Ɔɔ “yooŋgula lusulɛila.”
Ɔɔ “yooŋgula lusulɛila.”
Ɔɔ “yooŋgula lusulɛilaŋ.”
Ɔɔ “yooŋgula lusulɛila.”
Ɔɔ “yooŋgula lusulɛila.”
Ɔɔ “yooŋgula lusulɛila.”
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Ndu nda veelu vɛlɛ ni aa Chɛhowakiŋ a Konaya.
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Hibuluiye, “chɔnɔŋndo idii puŋ mi wa suɛi.”
Hibuluiye, “chɔnɔŋndo idii pum ma vem nda.”
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Nɛi cheleŋ nda veelu vɛlɛ Babilɔŋ ndo cho hoo ni.
Ɔɔ “yalakana.”
Ɔɔ “wulaŋ baŋɔɔ.”
Ɔɔ “ma kel suei.”
Ɔɔ “silala.”
Hibuluiye, “I wa chɔnɔŋndo idii puŋ mi vem nda.”
Ɔɔ “kel suei.”
Ɔɔ “Chiɛi Mɛlɛkaa.”
Ɔɔ “kial suei.”
Hibuluiye, “wana ya che maa o nɔ dioo wo.”
Hibuluiye, “pɛŋgi.”
Ɔɔ “I yɔŋnuŋ lende fɔ!”
Ɔɔ “kpɛŋɛ.”
Hibuluiye, “chɔnɔŋndo idii puŋ mi vem nda.”
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Ɔɔ “yollo.”
Ɔɔ “a siiŋguu lɛ niŋ nda chiaa.”
Ɔɔ naapum, “ma sɔla bɛɛleŋ.”
Ɔɔ “ya hiou lachi a num kaala lo lechoo wo chɔmndo ni.”
Ɔɔ “Ma kuɛ o yola wanaa cho mamɔɔ wa.”
Ɔɔ “layolla.”
Ɔɔ “kpoloŋnda.”
Hibuluiye, “nyɛm chelulɛiyoŋ.”
Ɔɔ “chuauwaa.”
Hibuluiye, “bumbula.”
Ɔɔ naapum, “pɔnɔ nda.”
Ɔɔ “lɛnde dɛŋgbɛle.”
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Ɔɔ “wolioŋ.”
Siɛkɛlle i pilɛ, lusul ndɔɔ wa le kilolaŋ 34 a nyɛ lechoo. Tofa Tɛɛsiaa B14.
Ɔɔ “sala.”
Ɔɔ “nɔnɔɔ.”
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Hibuluiye, “chɔnɔŋndo idii puŋ le nda pɛɛkoo.”
Tofa Tɛɛsiaa, “Kɛhɛna.”
Ɔɔ “o yiyaŋnda nilaŋ niŋ.”
Tofa Tɛɛsiaa.
Ɔɔ “kpɛŋɛ.”
Hibuluiye, “kulii.”
Hibuluiye, “kulii.”
Hibuluiye, “kulii Ebilaham nde.”
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Hibuluiye, “hau.”
Hibuluiye, “Chonadabi.” Kiɔlɔɔ biŋgioo le Chɛhonadabi.
Hibuluiye, “Chonadabi.” Kiɔlɔɔ biŋgioo le Chɛhonadabi.
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Hibuluiye, “I wa chɔnɔŋndo idii puŋ mi wa suɛi.”
Hibuluiye, “chɔnɔŋndo idii puŋ le.”
Hibuluiye, “Chonadabi.” Kiɔlɔɔ biŋgioo le Chɛhonadabi.
Ɔɔ “Wanaa tosa wallo o chiɛi lemasaa niŋnda.”
Chɔŋ Bɛŋgufɔnɔɔ 15 haaa Yindimiiyo 15. Tofa Tɛɛsiaa B15.
Hibuluiye, “kulii nduɛi.”
Ndu nda veelu vɛlɛ ni aa Chɛhowakiŋ a Chɛkonaya.
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Hibuluiye, “ma wou ndu o chiɛi nda wou waŋnda o kpiɔɔ wo.”
Ɔɔ “bulu.”
Hibuluiye, “balaŋ.”
Hibuluiye, “beedii ɔɔ bulu.”
Hibuluiye, “Puaa ŋ cho o kɔl nyulu niŋ a nda wa.”
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Ɔɔ a mɛɛ nda kili kili diomndaŋ ndaŋ o Hibulueiye niŋ yɛ, “Nɛka-sialuisa, Samika-nibo, Sasɛkim, Luabisalueisinɔɔ.”
Ɔɔ “masa wanaa viamaa layawaa (wana pɛɛku a looŋ okɔɔ wo).”
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Ɔɔ “kapaa woŋ.”
Ɔɔ naapum, “walta lechɛ laŋ.”
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Ɔɔ “wana tosa wallo o chiɛi lemasaa wo.”
Ɔɔ “masa wanaa viamaa layawaa (wana pɛɛku a looŋ okɔɔ wo).”
Hibuluiye, “mi sim lachi.”
Hibuluiye, “kulii lemasɛi.”
Ɔɔ naapum, “mɛŋma tiilaŋma bɛnduaŋ.”
Hibuluiye, “beedii ɔɔ bulu.”
Ɔɔ “challe le teleŋ tiŋ.”
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Ɔɔ “kpɛŋɛ.”
Ɔɔ “maaŋnda.”
Ɔɔ “nyɛ o nyɛ yɔŋnuŋ ndu le.”
Ɔɔ “Chiɛiyo (Maaŋ) nda taŋgul le paaleŋ ndo, koŋ cho ni, Hilioopolisi.”
Ɔɔ “maaŋnda.”
Ɔɔ “Mɛmfisi.”
Hibuluiye, “I wa chɔnɔŋndo idii puŋ mi viam nda.”
Diolaŋ ndaŋ ndaa veelu mɛlɛka laandu Isɔluɛiyaa simul Mɛlɛka wa ndaa piɛiyo ni. Ɔɔ naapum, mɛlɛka laandu tosa mi nyɔɔŋ kui yo.
Hibuluiye, “beediiyo ɔɔ buloo.”
Diolaŋ ndaŋ ndaa veelu mɛlɛka laandu Isɔluɛiyaa simul Mɛlɛka wa ndaa piɛiyo ni. Ɔɔ naapum, mɛlɛka laandu tosa mi nyɔɔŋ kui yo.
Diolaŋ ndaŋ ndaa veelu mɛlɛka laandu Isɔluɛiyaa simul Mɛlɛka wa ndaa piɛiyo ni. Ɔɔ naapum, mɛlɛka laandu tosa mi nyɔɔŋ kui yo.
Diolaŋ ndaŋ ndaa veelu mɛlɛka laandu Isɔluɛiyaa simul Mɛlɛka wa ndaa piɛiyo ni. Ɔɔ naapum, mɛlɛka laandu tosa mi nyɔɔŋ kui yo.
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Ɔɔ “kɔl.”
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Boolaŋ ndaŋ, wanaa wuu chiŋuaŋ nda soliŋ ndaŋ kpeku ni.
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Ɔɔ “Mɛmfisi.”
Koŋ cho ni, wana cho hunɔɔ Ichipi yomɔɔ wo.
Ɔɔ “Mɛmfisi.”
Ɔɔ naapum, “O cho simnɔŋ lɛŋnde nyɛ o nyɛ cho le leŋ.”
Ɔɔ “tiŋgɔɔ.”
Koŋ cho ni, Tibɛɛsi.
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Hibuluiye, “kulii numnde.”
Koŋ cho ni, Kilɛti.
Koŋ cho ni, tembeltaŋ sendioo le mɔnɛi a siɔmbula cho nda biyɔɔ laŋ.
Ɔɔ “fondaŋ filioŋ.”
Ɔɔ “defu.”
Ɔɔ “Lɛŋnde Dɛŋgbɛleŋ le.”
Ɔɔ “lɛŋnde dɛŋgbɛleŋ o pembei choo.”
Ɔɔ naapum, “o lɛŋnde vesɛileŋ choo.”
Ɔɔ “lɛŋnde dɛŋgbɛleŋ o pembei choo.”
Hibuluiye, “lee Mowaabi wo.”
Ɔɔ “yindɛɛla.”
Ɔɔ “saŋgaa.”
Koŋ cho ni, sɛŋnde nda hɔŋ a mɔnɛi le biisioo wo.
Ɔɔ “saŋgaa.”
Koŋ cho ni, sɛŋnde nda hɔŋ a mɔnɛi le biisioo wo.
Ɔɔ “heela saa.”
Ɔɔ “lɛŋnde dɛŋgbɛle numndeŋ.”
Ɔɔ “yalakanaa.”
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Ɔɔ “kpɛŋɛ.”
Diom maHibului nda soliŋ kpeku wo chiɛɛliaŋ lepum a “poolaŋ.” Nduyɛ ma soliŋ ndu kpeku le nyɔɔ pɛɛsaa.
Hibuluiye, “O yɔŋgu ba ndɔɔ.”
Ɔɔ “yalakanaa.”
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Ɔɔ “malato.”
Ɔɔ “sala.”
Ɔɔ “wanaa lachoowaa suaa le Mɛlɛka wa.”
Ɔɔ “yalakanaa.”
Naapum diolaŋ ndaŋ ndaa veelu vɛlɛ lɛŋnde Kaadiaŋ ndeŋ ni.
Ɔɔ “sala.”
Ɔɔ naapum, “La pei bɔlɔ machiŋɔɔ.”
Ɔɔ “I mɛnaŋ po a yapila.”
Ɔɔ “piɔm chiliŋii teeŋiɛi.”
Naapum a cho suɛi a Babilɔŋ okɔɔ ɔɔ Nɛbukanɛɛsa.
Hibuluiye, “dindi.”
Hibuluiye, “dindi.”
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Ɔɔ “yalakanaa.”
Wana che pɛ maa diolaŋ ndaŋ ndaa veelu vɛlɛ Babɛl (Babilɔŋ) ni.
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Ɔɔ “kapaa wo.”
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Ɔɔ “peelelaŋ.”
Tofa Tɛɛsiaa B14.
Tofa Tɛɛsiaa B14.
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Hibuluiye, “Nɛbukadɛlɛsa.” Nɛi cheleŋ le laŋ poonyiaa.
Hibuluiye, “Nɛbukadɛlɛsa.” Nɛi cheleŋ le laŋ poonyiaa.