Ebilaham—Chaaŋ o Mɛlɛka

MƐƐ mɛŋma koŋgiaŋ ma hiou, mi waŋnda kila chieeŋ cheleŋ. Chioŋ muŋ o pilɛ diolaŋ aa Ɔɔ. Chiee sɔwɛɔ pila o wa ni, nduyɛ ndoo nɔ chiɛila kɛndɛlaŋ tau. Kɛ wanaa wa loŋnda mɛlɛkaa piɔmnda ndaa sooluu ni. Lende koni haa Babɛl bɛɛ ndaa tosa ni. Nuuwa a Siɛm pondɔ ndu, Jɛhowa ndaa piɛi ni. Kɛ wanaa wa Ɔɔ a Bebɛlla nda, ndaa piɛi Jɛhowa kposoŋ te.

Wɔsilaŋ 350 hiouwɔɔ, chɔŋ a boondii mɛŋma koŋgiaŋ ma hiouve, okoŋ Nuuwa vi ni. Wɔsilaŋ la tiɔŋ hiouwɔɔ o piɔm Nuuwaa kɔɔli, fal ŋ cho hoo chɔɔ o fotueiyo hoo niŋndo veluŋ ni. Wana sɔwɛɔ pila o wa Mɛlɛka o hɔl ni. Diola ndɔlaŋ aa Ebilaham. Ɔɔ chiee ndu nda yungu ndɔɔ wa ichali ni.

Paale pilɛ mi Jɛhowa dimul Ebilaham aa: ‘Ebilaham, faŋaŋ Ɔɔ ma mɛi wanayaŋ numndoŋ, ma kuɛ o lɛŋnde ya cho num chɔm ndeŋ niŋ.’ Baa Ebilaham ndoo diikuŋ pa Mɛlɛka le mbo mal naa nduaa chalaa kɛndiaa Ɔɔ? Lende kpeekpei, mbo diikuŋ. Le sabu Ebilaham ndoo diikuŋ Mɛlɛka lɔɔlɔɔ wo, nyɛ koŋ o sɔla veelɔŋndo ni aa chaŋ o Mɛlɛka.

Mi yungu Ebilahamndo otiŋ kua a ndu latulu teleŋ o wa faŋaŋndo Ɔɔ wo. Mi Tɛla Finya ndɔ tual ndu kɔɔli. Mi Lɔtu, po pɔmbɔ ndɔɔ bɛɛ tual ndu kɔɔli. Nduyɛ mi lanɔɔ Ebilaham bɛɛ Sela, tual ndu kɔɔli. Mɛɛ nyɔɔ viou kpɛɛ ma fuuluu Haluaŋ chiee. Loŋ nda lo ni mi Tɛla wu. A wa niŋ bɔɔ landaŋ a Ɔɔ.

Mɛɛ nda chii Haluaŋ chiee waali, mi Ebilaham a yungu ndɔɔ kpou faŋaŋ vɛlɛ loŋ ma huŋ o lɛŋnde Kenaŋndeŋ niŋ. Loŋ Jɛhowa dimul ndu ni aa: ‘Lɛŋndeŋ ndeŋ ya cho chuauwaa numnda ke ni.’ Kenaŋndoŋ Ebilaham wa niŋ ichali ni o tɛndɛilaŋ niŋ.

Okoŋ mi Mɛlɛka kandu Ebilaham malaa. Mbo ke ndu saa a visiaa cheleŋnda tau vɛlɛa buɛiya o kɛmɛlaŋ niŋ. Kɛ ndu a Sela ndaa vilu wɔ chua o chua le.

Ebilaham wa wɔsilaŋ 99 mi Jɛhowa dimul ndu aa: ‘A cho simnɔŋ finyaa le kaala bɔɔ bɔɔ.’ Vɛɛ hei looku yɛ niŋ yɔŋnɔŋ? Ebilaham nda Sela ndaa hiou niŋ lɔɔ vialaa