Kpundɛ Tɔ Wo

Mi Muuse dimul Feloo maa o chi lɛ ndu mbo hiŋ naa ndu chua le. Kɛ tuupa mbo faŋaŋ o Feloo lo, mbo dimul ndu aa: ‘A ditɛɛŋndo chuɛllɛŋ, puaa tasiaa kpou o Ichipi niŋ cho wu. Chɔŋ a po Feloo wo, mbo kɔ bii a chiaa cho num o ba wa puaa ndaa.’

Mi Chɛhowa dimul Isɔluɛiya le ma toosiaa nyɛdiaa teŋgeŋndo. Mbo dimul nda aa: ‘Yuŋgu o yuŋgu dii saa ɔɔ chuiŋndo o chii niŋ wɔsioo opilɛ wo. Nduyɛ te a dii pɛ, a chua kooma nduaŋ ma tiŋ, a suu o diola chiɛila ndalaŋ. Okoŋ a tuɛi visiŋ muŋ, a de muŋ a beedii nɔ yiisii leniŋ te wo. La wounuŋ nyɛla nyalaŋ, a kɔwɛila nyalaŋ, mi la bɛɛndiaŋ le kɔŋndaŋ. Chuɛllɛŋ I cho nya soli o chɛleŋ niŋ.’ Yiyaŋndɔ mɛɛ Isɔluɛiya wa a kɔl kɛndɛ yɛ, mɛɛ nda tuei yooŋgoo hoo.

A ditɛɛŋndo, mi maalikɛinɔ Chɛhowaa kei o chiɛi o chiɛi wa o Ichipi niŋ. Chiɛila ndaa suu koowaŋ o diola ndalaŋ te laŋ, mi puaa tasiaa o chiɛila laŋ niŋ kpou wu. Kɛ chiɛi o chiɛi ndoo nɔ koowaŋ ma suwaŋ o dio, maalikɛinɔ koŋ pilaŋ ndu le. Yuŋgula Ichipiaŋnda kinɛi, wana sulaa ni, wana bala fondo ni, mi puaa ndaa tasiaa kpou wu. Kɛ puaa tasiaa Isɔluɛiya opilɛ bɛɛ vi le.

Mi po tase Feloo wo bɛɛ wu. Mi hei tɛɛmbuu Feloo kɔllo tau tau. Mbo dimul Muuse nda Elɔŋ o lepilɛ niŋ kpe aa: ‘La faŋaŋ nanuŋ! La kɔ mi la kɔ piɛi Mɛlɛka nyaa. La chua chɔluaa nyaa mi la kuɛ.’

Paŋgei wa diondɔɔ mi Isɔluɛiya fula Ichipi. A wa a kɔɔnaa a yuŋgulaŋ. Waŋ piaanduaa Isɔluɛiya wa 600,000, nduyɛ waŋ laanduaa a chuaambuaa wa nda tɛɛŋ tau. Mi Ichipiaŋaa bɔɔbɔɔ kua a nda latulu, le ma kɔ piɛi Chɛhowa nda ndaa. O mɛɛlulaŋ kpɔŋ, mi Isɔluɛiya sɔla malɔɔ!

Le loonɔŋndo a mɛɛ kpɛ Chɛhowa ndoo piŋi nda yɛ, ndaa nɔ ma wa nyɛdiaa teŋgeŋndo hoo toosiaa iwɔsi o iwɔsi. Nyɛdiaa hoo ndaa veelu ni aa Hiouwɔɔ Choo Wo.