Masale Mɛlɛkaleŋ O Cho Masale Nɔ Lakafa Le

Te waŋchieeya wa pɛ wanaa lakafa, a laalaŋ maa masale wanachioo le kɛ kɛ cho simnɔŋ nyɛ lakafa le? Te lende icho ni, mɛɛ masale cho sakpo leŋ le nɔ mi le hiŋ. Kɛ le nɔ mi le fula waŋchieeya tɛɛŋ te. Baabuiyo soo a masaleŋ ndeŋ okɔɔ. Leŋ le cho Masale Mɛlɛkaleŋ ni, le Chiisu pɛɛku buɛiyaa nduaa le ma piɛi a leŋ ndo.—Maatiu 6:9, 10, NW.

Masaleŋ kpeekpei Masale Mɛlɛkaleŋ le cho o choo choo niŋ ni. Le cho faŋa masɛi waŋchieeya kpou. (Chondei 2:8, 9, NW; Sɔɔŋ Chɔɔmaŋndoŋ 16:14; 19:19-21) O salala Masale Mɛlɛkaleŋ le cho waŋchieeya chuu laŋ tɛɛŋ, cho kafala lemasalaŋ faŋaa ni. Ŋ yaasiaŋndɔ nyɔɔŋ ŋɔmpum, ŋ Masaleŋ ndeŋ le ke naa tiindaŋndo maa ŋ cho yɔŋnɔŋ ndoŋ.

1. KPAAYAA

BAHAWƐIYO: Pilachieeya o ba masale waŋchieeya sɔla nyɛsɔlaa ni. Lelaŋ le bii waŋnda paawaa (muloo) o ba ni. Mɛɛ waŋnda yɔŋgu nyɛsɔlaa fau, lende koni wanaa bɛnduaa bɛɛ sɔla tɔɔndaŋndo le viileŋ ni. Nduyɛ mi apum chɛl luɛiyɔɔ niŋndo waŋnda apum o ba le ma dɔɔnial nda paawaa (muloo), ɔɔ chuuŋgiaala cheleŋ la nda nɔ ma mal masaleŋ o ba laŋ. Kɛ mi hei hiŋ a fulamakɔɔli wɔɔŋndo. Mi masaleŋ le chɔɔlu paawaa (muloo) heelu le nyɛsɔlaa lo kɔɔli wo peeloo. Nduyɛ mi kafalaŋ la chɔɔlu kuufaŋ. O hei bɛŋgu, wanaa sandu wa hiau saŋga.

BAHAWƐIYO SOLIOO: Masale Mɛlɛkaleŋ le sɔla kpaayaa Chɛhowa o ba, Mɛlɛka kpaaya kpou kpou wo.a (Sɔɔŋ Chɔɔmaŋndoŋ 11:15) Wana cho paawa (mulu) malɔɔ o masaleŋ ndeŋ bɛŋgu le leŋ hivioo lachi le. Kɛ, Mɛlɛka cho chɔm kpaaya ndɔ bɛndoo a kɛndɛi nduɛi hiuwaŋ mɛŋnde le chɔmndo maa, o Masale ndɔleŋ bɛŋgu, waŋchieeya kpou cho hini kɔl.—Aisaiya 40:26; Chondei 145:16, NW.

2. MASAA

BAHAWƐIYO: Mi Susan Rose-Ackerman, o naŋ soo a ndu okɔɔ o buŋgɛi tasei niŋndo dimi aa, “Kindiŋndo le kafalaŋ chiiyo nɔ fɛŋ mbo kanduŋ naa lebolla.” Waŋnda nɔ lɛ tiindaŋ o masale chieeŋndeŋ niŋ te. Kanifuule, le wa kindiŋndo le kafalaŋ faŋaa polisiiya tɛɛŋ, kɛ mi le chɛl taŋ wanaa bɛnduaa tɛɛŋ. Nduyɛ masa kɛndɛ kɛndɔɔ bɛɛ, wana hakioo o cho ni. Baabuiyo dimi aa, “Wana o wana cho o chieeŋndo hoo choo mbo sandu le, maa ndu ndu sɔɔŋ kɛndɔŋ tuŋ o tosa ni le.”—Ikilisiate 7:20, NW.

BAHAWƐIYO SOLIOO: Chiisu Mɛlɛka hɛli ni le mbo wa Masaa o Masale Mɛlɛkaleŋ choo. Ndu cho maa waŋchieeyaa lahakiaa le. O luei laba o lakafa niŋ te. Le chɔmndo maa ndu yeema luɛiyɔɔ niŋndo le, mbo kɛɛ “lɛŋnde o chieeŋndo choo a sulta laŋ kpou.” Ndoo sooluu dɔɔ pɛ Masa Nyinaa Wɔɔŋnda, o wa ndu sultaŋ ndaŋ ke. (Maatiu 4:8-10; Chɔŋ 14:30) Mɛɛ nda wa Chiisu saaŋgiaa le ndu diyɔɔ, ndaa yeema mbo sinaŋ nyɛ nɛiyaa le. Le hei, ma ke ndu muɛiyaŋ ma pum le mbo kol mi bolleŋ le hiŋnuŋ ndu. Kɛ mbo kɛɛ kpoŋ le maŋ kolɔɔ le mbo lo o pimbi ndɔ simiaa choo. (Maatiu 27:34) Suŋ suŋ niŋ, Mɛlɛka miŋgi ndu yoomu mbo wa o choo choo niŋ. Chiisu chɔm maa o suiliŋ nyɛkɛndɛi le waa masaa o Masale Mɛlɛkaleŋ choo.—Filipiaŋnda 2:8-11.

3. LE HIILUŊ TE

BAHAWƐIYO: Mi lɛŋii bɔɔbɔɔ mal yaulaŋ le masaa lakafaa faŋaa o masaleŋ choo. Kɛ o kpeekpei niŋ, ma tosa kafalaŋ tuma nda wa waŋnda nuuviaa le yaulaŋ malɔɔ wo, a paale malaa layauleŋ. O lɛŋii pɛlnuŋ ladio ve niŋ bɛɛ, mi hei yɔŋnuŋ. Mi chuuŋgiaala wanaa sulaa yɔŋgu laŋ, a sɔɔŋ cheleŋ nda tosa woŋ, tosa mi wanaa bɛnduaa hau, a haa o siɔdii lachioo niŋ, luei balaŋ o niilu lakafaa niŋ.

Mi wana bɛndoo o naa Kialaa ŋYamaa Lebolla o lɛŋnde Amɛlikaleŋ niŋ diolaŋ Chɔŋ Pɔɔl Tiiviŋ poonyiaa maa, “o cho ko sandei a suiliŋ lemasaa nɔ wo le” kaa waa naa paaliaŋ te, “kɛ tiindaŋ waŋnda nɔ ma dɔu o leŋ niŋndo bɛɛ.” Lelaŋ, te wanaa bɔɔbɔɔ chieeŋndo balɔɔ silɔ yiyaŋ pɛ maa kɔɔnala lemasalaŋ o chieeŋndo choo la hiou lakafa, icho suɛi kaamaa le.

BAHAWƐIYO SOLIOO: Masale Mɛlɛkaleŋ le nuuviaa niŋ waŋnda le layau malɔɔ le, kanifuule, le cho wa lefafɛɛŋ. (Daniɛl 7:13, 14, NW) Mɛlɛka pila cho Masaa hɛli ni le masaleŋ ndeŋ. Lelaŋ, wana mel niŋ layau le leŋ siiŋgoo nyɛ sɔvɛ le. Nduyɛ, wana chiee nɔla leŋ faŋa le. Le mɛɛ wana nɔla leŋ hiiluu le yɛ, nyɛ le cho wa tosaa wo wa niŋ tɔnɔɔ lefafɛɛŋ le wanaa cho wa o leŋ bɛŋgu wa.

4. SAWALAŊ

BAHAWƐIYO: O tase ndɔɔ, ma yiyaŋ maa, sɔɔŋ cho siŋgaŋ te sawala sɛnɛilaŋ la dɔunuŋ pɛ. Kɛ, wanaa sinaa ŋsɔɔ wa dimi maa teleŋnda bɔɔbɔɔ, mɛɛ nda duau sawala sɛnɛilaŋ fau, lende koni kafalaŋ la kuufaŋ ni. Le handɔɔ lechoo, dialii kɛsi sawalaŋ o lɛŋndeŋ niŋndo nɔ yiyaŋndo le kafalaŋ dɔɔniaa. Kɛ saŋgaa hiou a fulamakɔɔlioo.

BAHAWƐIYO SOLIOO: Sawala Masale Mɛlɛkaleŋ la cho filioŋ mbo hiau sawala masɛi waŋchieeya. Le tamaseliiyo, tuupa mi sawalaŋ la wa la poonyiaa o yau choo, tosa hei, kɛ tosa hei le, mi Chiisu yɔŋgu sawa sɔviɔɔ opum. Mbo dimi aa, “Kaa ŋ hɛnaŋ maa chaaŋ num tosal num ndo, num bɛɛ tosal chaaŋnda kaa koŋ.” (Maatiu 7:12) Kɛlɛŋgaa o kpeekpei niŋ, yiyaŋndaŋ a kaalaŋ, sawala Masale Mɛlɛkaleŋ le cho tofaa ni. Mi Chiisu dimi aa, “La kaala chaaŋ nya wana chioo mɛɛ nya kaala nya pila yɛ.” (Maatiu 22:39) A tonya, Mɛlɛka cha nyɛ cho o kɔllo niŋndo nɔla mbo tosa, le mi sawalaŋ ndaŋ la biinuŋ.—Samiɔŋ Tasoo 16:7, NW.

5. SABOO

BAHAWƐIYO: Sɔɔŋ tosa mi waŋnda luei balaŋ o kafalaŋ niŋndo cho hɔlteŋ, a tɔnɔ ndapilaa ni. Masaa bɛnduaa, a wanaa nda cho choo masa wa, cho kaala wɔɔŋndaŋ ndaŋ chɔmndo. O buŋgɛi tasei o yauwo hoo niŋ, miŋ suaa a chiɛi leyula komba waŋnda choo Siyul chiee wo. Mɛɛ nda yaasiaa le sabu hei yɔŋnuŋndo, ma cha maa wanaa bɛnduaa cho taŋgultaŋ hɔlteŋ choo o chieeŋ bɛndoŋ niŋnda, chɛl luɛiyɔɔ niŋndo wanaa taŋgulaa o ba ni, le ma soliŋ nyɛm kindu baa le woŋ kpeku.

Le mi kafalaŋ la faŋaŋ, mɛɛ mi waŋnda sɔla pɛɛkoo le ma mal kaa lehɔllo, nduyɛ ma soliŋ kaayei o lakɔl. Kɛ, masale waŋchieeya nɔ iyeema le hei tosaa le. Nduyɛ a nɔla le pɛɛku waa naa tosaa le.

BAHAWƐIYO SOLIOO: Masale Mɛlɛkaleŋ le nɔla mi le suŋgu puundui lakafɛi, a mɛɛ le pɛɛku waŋnda le ma mal yiyaŋnda wɔɔŋnda tosa ma luei balaŋ o kafalaŋ niŋndo.b Pɛɛkoo hoo mala nda le mi ‘kɔlta ndalaŋ la simnuŋ la sɛnɛi yuka.’ (Ɛfisiaŋnda 4:23) O mala nda vɛlɛ ma mal kaa lehɔllo a kaayei. Okoŋ, ma nɔ kɔl hiniaa a yeemɛi le wanaa cheleŋnda.—Filipiaŋnda 2:4; Timotii Tasoo 6:6.

6. WANAA NDA CHO CHOO MASA WA

BAHAWƐIYO: O yɔŋ bɛɛ aa o fonda kɛndɔɔ waŋnda cho ni, nduyɛ ma sɔla pɛɛku kɛndɔɔ a kaala kɛndɛlaŋ okɔɔ, kɛ a koŋ kpou ma luɛi nilakalulaŋ. Nduyɛ, ma luei balaŋ o kafalaŋ niŋ. Wanaa sinaa dɛniaa dimi maa le saboo hoo, masɛi waŋchieeya tiuba mii faŋa kafalaŋ kposoŋ te. O wana tiindaŋ nda kinɛiyo cho ni maa, a tiuba ma dɔɔniaa kafalaŋ, a nyɛ la tɛɛmbuu wo.

BAHAWƐIYO SOLIOO: Mi kɔɔna chieeŋndo le kafalaŋ chɔulabaa dimi maa, le kafalaŋ chɔulabaa, masɛi nɔ mii chɔm “lo lechoo wo, sandei, a tosaa nyɛ cho nda kuee wo.” Kpeleŋ kɛndɔɔ pila cho hoo ni. Masale Mɛlɛkaleŋ ndeŋ, le cho ko kaalaŋ ndaŋ hivioo lachi le, kɛ le yeema mi wanaa cho o leŋ bɛŋgu wa nɔ laŋ. Baabuiyo dimi maa, “wanaa luɛi hɔlteŋ le nyɛm pilaŋ nda” a “wanaa lachoovaa” luei niŋ o Masale Mɛlɛkaleŋ niŋ te.—Kɔliŋtiaŋ Tasoo 6:9-11; Sɔɔŋ Chɔɔmaŋndoŋ 21:8.

Waŋnda nɔla ma pɛɛku le sawala sɔvɛlaŋ ndaŋ biyɔɔ, a mɛɛ Kilisiɔŋnda sindɛ chɔm yɛ. Le tamaseliiyo, mɛɛ kiilanɔɔ Saimɔŋ kindiŋ le nyina diandaa piondɔɔ kiilaa o ba, ma kɛɛ luɛiyɔɔ niŋndo. Ma dimul ndu aa, “Mal kɔl vesɛi koŋ ma piɛi Masanɔɔ Mɛlɛka.” Mɛɛ Saimɔŋ che kpundɛ kaa ndɔ wɔɔŋndo wa ndu tuisi choo wo, mbo dimul Pitɛ nda Chɔŋ le ma piɛi Masanɔɔ Mɛlɛka le ndu le mbo mal yiyaŋ wɔɔŋ koŋ.—Walta Wanaa Chiisuaa 8:18-24.

MƐƐ Ŋ SIMNUŊ WAŊNDO OPILƐ O MASALE MƐLƐKALEŊ BƐŊGU YƐ

O cho lɛŋnde ŋ fula leŋ te cho suɛi le, kɛ a nɔ dioo le ma wa waŋndo opilɛ o Masale Mɛlɛkaleŋ bɛŋgu. (Walta Wanaa Chiisuaa 10:34, 35) Masaleŋ ndeŋ le tosa kɛɛsiaa le pɛɛkoo. Mɛɛ naŋ suaa naa yɛ bɛɛ, o cho tosaŋndo chieeŋndo balɔɔ silɔ. Pɛɛkoo hoo cho num chɔm nyɛ ŋ nɔ ma tosa wo. Seiyaa Chɛhowaa naŋ kɔl le ma chɔm num mɛɛ pɛɛku Baabuiyo hoo tosaŋ yɛ, le chemchemndaŋ tɔ o lɔɔ bɛŋgu, a yɔŋgu nyɛ o nyɛ le. O fula wɔ o hoo kɔɔli, a chɔɔlu pɛɛku a ‘yooŋgu kɛndɔɔ a Masale Mɛlɛkaleŋ okɔɔ,’ a mɛɛ le cho hunɔɔ masɛi waŋchieeya faŋa yɛ. (Luku 4:43) Ŋ yeema num ma nuuviaa Seiyaa Chɛhowaa o fonda ŋ cho wo, ɔɔ ma tofa tɛɛŋgii nɛi hei, www.pr418.com/kiz..