Waŋnda Tau Cho Kindaa Sɔla O Mɛɛlulaŋ​—Nduyɛ Num Bɛɛ

Baabuiyo dimul naa maa tambei cho yɔŋnɔŋ o mɛɛlulaŋ. O dimi aa, “Nyɛ palaa va niŋ teleŋ koŋ ndo velaŋ ndɔ bɛɛ ve niŋ te. Chɔŋ bɛɛ a chieeŋndo kandɔŋndo mbo fuuluu a paale hauleŋ, nyɛ palaa vaa lende o yɔŋnuŋ ndɔ le. . . . Kɛ, Mɛlɛka faŋa palɛi nyɛ palɛi keŋ i tiŋ lechoo. Te ndu oo ve koŋ te, wana o wana bɛɛ ve lo yoomu le.” (Maatiu 24:21, 22) Kɛ Mɛlɛka dimul naa maa wanaa bɔɔbɔɔ cho kindaa sɔla. O dimi aa, “Chieeŋndo cho chuwɔɔ . . . Kɛ wana o wana tosa nyɛ Mɛlɛka hɛnaŋndo pɛ, o cho va yoomu le fɛɛŋ a fɛɛŋ.”—Chɔŋ Tasoo 2:17.

Te a yeema pɛ le kindaa sɔlaa lɔɔ chieeŋndo hoo cho i tambu wo, nduyɛ ma lo achal lefafɛɛŋ, yɛɛ ŋ nɔ yɛ ma tosa? Baa a nɔ pa ma kandu nyɛdiaa deŋgelaa ɔɔ nyɛm cheleŋndoŋ? Sako. Baabuiyo sila naa o kala kala le sɔɔŋ cheleŋ tosaa. O dimul naa aa, “Mɛɛ nya sina nuaa maa nyɛ o nyɛ fee cho hunɔɔ va o tɛɛmbaa lende yɛ, nduyɛ mi la va chumndo boondei hei le paale Mɛlɛka kɔɔsa niŋ a chieeŋndo leŋ yɛ, mɛɛ kaala nyalaŋ la va niko maa wanaa cho a yɔŋgaŋ o Mɛlɛka lo kpou.” (Pitɛ Diiŋ Ndɔɔ 3:10-12) Nyɛ dimiŋ o bolle Baabuileŋ ndeŋ niŋndo chɔm maa “nyɛ o nyɛ fee” nɔ le tambei sɔlaa, nda cho yɛ masaa lakafaa chieeŋndo hoo, a wanaa hɛli masale chieeŋndeŋ ma kɛɛ Mɛlɛka wa ni. Ŋ che kpendekele maa, te ŋ deŋgela pɛ nyɛmkiɔɔŋ, ŋ nɔla miŋ piŋi naa o tɛɛmbuu suu waa lende le.

A tonya, le miŋ sɔla kinda, mɛɛ miŋ yɔŋguŋ o Mɛlɛka lo, miŋ wa pɛɛkoo a kaa suu naŋ nɔ kuee miŋ wa chɔmndo le ndu kɔllo nɛŋioo wo. (Sɛfanaya 2:3, NW) Tuupa miŋ wa kaala wanaa bɔɔbɔɔ tolɔɔ kɔɔli hau, nduyɛ miŋ wa kiɔɔ tamasila cho chɔmndo maa ŋ cho o boondii teŋgeŋnde niŋndo, ŋ nɔ miŋ “va chumndo boondei hei le paale Mɛlɛka kɔɔsa niŋ a chieeŋndo leŋ.” Seiyaa Chɛhowaa nɔla ma chɔm num o Baabuiyo niŋ mɛɛ ŋ nɔla ma sɔla kindaa o paale leŋ choo yɛ.