Hiouwɔɔ Lachioo Tosaa o Wali Pollo Niŋ—Poonyiaa Yeemɛi Waŋnda Chɔmnde

“Manda num pila nyɛ kɛndɛ kɛndɛ, ma mandaŋ a nyɛ ŋ cho waŋnda pɛɛkoo wo.” (Tim. Tasoo 4:16) O yɔŋ bɛɛ miŋ laŋga huŋ o tonyaa niŋ, ɔɔ miŋ viou niŋ leniŋ, sila Pɔɔl ke hoo Timoti wo chɔm ni maa, naŋ cho yooŋgu kɛndɔɔ dimioo wa kpou, ŋ nɔ miŋ kindiŋ le hiouwɔɔ lachioo tosaa. Le miŋ tosa hei, Yau Wali Naa leMasaa cho wa hunɔɔ a suɛi lebolle hei, “Hiouwɔɔ Lachioo Tosaa o Wali Pollo Niŋ.” Buŋgɛi kɛ kɛ fee cho yaasiaa suɛi sɔwɛi i pilɛ nduyɛ, mi i chɔm naa nyɛ naŋ nɔ miŋ tosa o wali pollo niŋndo. O paŋgii keŋ niŋ, naa kpou ŋ cho a dɛɛniaa le miŋ tol pɛɛku cho o buŋgɛi keŋ niŋnde kɔɔli. Te paŋgei chuu pɛ, o pɛl bɔŋaŋ wali pollo niŋ, ŋ cho yaasiaa tɔnɔla naŋ sɔlalaŋ, nduyɛ, miŋ chɔm mɛɛ la mala naa o wali pollo niŋ yɛ. O paŋgei hei niŋ, ŋ cho a dɛɛniaa le yeemɛi waŋnda chɔmnde poonyiaa.

Le yɛɛ hei Bɛnda Yɛ? Le nyɛ Chiisu dimul naa wo tosaa nyɛkɛndɛi, o cho ko yooŋgu kɛndɔɔ dimioo le. Ŋ nɔ miŋ miiŋgu o wanaa chɔm yeemɛiya lo le nda pɛɛkoo, nduyɛ, miŋ pɔɔla kulii naŋ tɔl nda o kɔl le. (Mat. 28:19, 20; Kɔl. Tasoo 3:6-9) Le hei tosaa, mɛɛ miŋ miiŋgu o ndu lo miŋ soo a balahawɛila ndɔlaŋ okɔɔ, nduyɛ, miŋ hiou lachi a suukaŋndo o yau naŋ mel ndu wo choo. Lelaŋ, ŋ saaluŋ pɛ yeemɛi waŋndo, o bɛnda miŋ poonyiaa ndi o yau choo.

Vɛɛ Ŋ Tosa yɛ Hei?

• Chua nyɛm walloŋ te a wa kɔlaŋ o wali pollo niŋ pɛ le yeemɛi waŋnda chɔmnde poonyiaa. Poonyiaa kpɛkpɛ nduyɛ, ma bii yauwo hoo nyɛkɛndɛi. A chii dɔɔ suɛi pɛ, a poonyiaa.

• Poonyiaa wana chiɛiyo diolaŋ, fondaŋ o cho wo, a fon nɔmbɛi (nimolo) ndɔɔ. Yɛɛ sɔwɛ ŋ saaluŋ yɛ ndu pila vɛlɛ a yuŋgu ndɔɔ okɔɔ? Baa o nɔ pa chuauwa? Wana cho kɛndiaa le wo cho ndu pa o ba chiɛiniŋ?

• Poonyiaa nyɛ nya suukaŋ choo wo o yauwo niŋ a bolii Baabui nya tofa ve. Yɛɛ o laalaŋ yɛ? Yau kuɛɛ ŋ mellɛ ndu? Poonyiaa teleŋ ŋ tosa wo, a paale ŋ kuɛ o ndu lo o lɔɔ koŋ niŋndo.

• Poonyiaa nyɛ ŋ tuu le tosaa lɔɔ cheleŋndo. Yɛɛ ŋ dimi yɛ le mi la suukaŋ? Teleŋ kuɛɛ ŋ dimi yɛ le miiŋgoo o ndu lo?

• Teleŋ o teleŋ ŋ miiŋgu pɛ o ndu lo, poonyiaavɛlɛyeemɛi o chɔmnde. Poonyiaa bɛɛ sɔɔŋ tau o yau pilɔɔ hoo niŋ, o ve i wɔɔŋ te.

Kindiŋ Ma Tosa hei o Paŋgei hei Niŋ,

• Te a wa nyɛ poonyiaa pɛ, dimul wana nya cho o wali pollo niŋndo nyɛ ŋ cho poonyiaa wo.