O Bɛnda Miŋ Miiŋgu Chɔ Chɔ o Wanaa Chɔm Yeemɛiya Lo

Chɔŋ a teleŋ naŋ kandu tɛɛŋgii nɛi hei soliŋndo kpeku ve, wanaa cho nyunaa le pɛɛkula Baabuilaŋ o Intanɛtiiyo choo wa cho kuiyo tau. Nɛi sɛnɛi naŋ chua vɛlɛ hoo le yooŋgu kɛndɔɔ dimioo wo cho tosaa ni mi waŋnda wa chɔɔloo nyunaa le nda Baabuiyo pɛɛkoo. Te nyunalaŋ ndaŋ la hiŋ pɛ o Bɛtɛl, o tosa o nɛi o nɛi niŋ le nda mulioo kioo chɔ chɔ. Le tamaseliiyo, te waŋndo nyuna pɛ le pɛɛku Baabuiyo o jw.org, o palɛi ŋiiŋ bɛŋgu, lɛuve cho tosa a sabu mi bɛnduaa cho o tanda wana chɔm koŋ yeemɛiyo niŋndo ma sina. Konaa o wali pollo niŋ chɔm maa te waŋnda apum nyuna pɛ le pɛɛku Baabuiyo, mbo chua lɔɔla siaama a sɔla wana pɛɛkaa le. Yɛɛ naŋ tosa yɛ yɔŋi yeemɛi wana koŋ i wuŋnuŋ?—Mak. 4:14, 15.

Te waŋndo chɔm yeemɛi le pɛɛku Baabuiyo pɛ nduyɛ mbo ve o tanda nyaa niŋ te, poonyiaa diola wana koŋ o yauwo hoo choo chɔ chɔ, Please Follow Up [Veuillez suivre l’intérêt] (S-43) ma kɔ ke wana poonyiaa o kunda numndo niŋ te a kuɛ pɛ o bɔŋaŋndo. Wana poonyiaa nɔ mbo yɔŋ yooŋgoo hoo o lɛuve o paale pilɛ bɛŋgu ɔɔ i ŋiiŋ. Soliŋ kpeku o naa kundaa yɔŋ yooŋgulaŋ o jw.org niŋnda ma yɔŋ. Bɛnduaa kundaa nɔ ma wa jw.org tofaa teleŋ o teleŋ fee. Te a che pɛ yooŋgoo maa waŋndo o tanda ndaa niŋ chɔm yeemɛi, a kɔ tofa chɔ chɔ le wana koŋ. Wana dimiaa yooŋgu kɛndɛ bɛnduaa dimul pɛ le mbo kuɛ o wana chɔm hoo yeemɛiyo lo, o chɔ ndi maa dioo pila keŋnuŋ ndu koŋ ni. Kɛ te wana koŋ ve o bɛɛ le, poonyiaa yau pɔmbɔ mɛɛ o looku num saalɔŋ yɛ ma mɛi loŋ.