Hiouwɔɔ Lachioo Tosaa o Wali Pollo Niŋ—Landuŋ Kɔl le Yeemɛi Acheleŋnda

Le yɛɛ hei Bɛnda Yɛ? Mi Chiisu cha wana o wana maa o cho o sɔvɛ nduyɛ, mbo landuŋ kɔl le yeemɛi ndɛi. Le tamaseliiyo, teleŋ pilɛ mi Chiisu cha po nila baŋulɛiyo siɔmbulaŋ o hɔl. Le hei, mɛɛ o yeema poo hoo siŋgioo, mbo faŋa ndu faŋga bɛndoo tɛɛŋ mbo kɔ siŋgi ndu. (Maki 7:31-35) Mi Chiisu chɔm vɛlɛ buulaŋndo le buɛiyaa nduaa a mɛɛ o sina nyɛ nda tiuba le ma tosa wo yɛ. Koŋ tosa ni o ke nda sɔɔŋ hiou nda mayoomu le tosaa woŋ te. (Chɔŋ 16:12) A kpaaya o nɔ o choo choo niŋndo fau, Chiisu landuŋ kɔl le yeemɛi acheleŋnda. (Tim. Diiŋ Ndɔɔ 4:17) Maa buɛiyaa Chiisuaa, ŋ nɔ miŋ tol tamasi ndɔɔ kɔɔli. (Pitɛ Tasoo 2:21; Chɔŋ Tasoo 3:16, 18) Le handɔɔ lechoo, ŋ simnuŋ wanaa dimiaa yooŋgu kɛndiaa nyɛkɛndɛi te ŋ nɔ pɛ buulaŋndo le wana naŋ cho suɛi o ndu lo wo. Nduyɛ, miŋ kindiŋ le sinaa bahawɛila ndɔlaŋ, yeemaŋ ndɔŋ, a buulaŋnda ndɔlaŋ. O nɔla mbo yaŋ nilaŋ nyɛkɛndɛi te o che pɛ maa o cho ko yooŋgu kɛndɔɔ le naŋ kuɛ ndu dimullo miŋ mel ndu yaulaŋ te kɛ, ŋ nɔ yeemɛi kɛsɛ o ndu niŋ.

Vɛɛ Ŋ Tosa yɛ Hei?

Wa o bɛɛndiaŋ nyɛkɛndɛi. Wa o lau niŋ te, mam tiŋ muɛɛŋ, nduyɛ tosa ndi o chaŋyɛi niŋ.
Mɛɛndiaŋ o nɛi taasi niŋ. A che pa nyɛ chɔm maa o nɔ chuauwa wo? Baa wana hɛnaŋ a kpelelaŋ tosaa ɔɔ chɔluaa mandaa wo o cho ni? Baa wana nɔ laalaŋnda cho o piɛiye pum niŋnde o cho ni? Te o wa lende pɛ, siŋga suukaŋ numndo ma kandu a bahawɛi suu ŋ komal ndu wo.
Nyuna ndu nyɛ cho yiyaŋ ndɔɔ wo nduyɛ, ma yaŋ nilaŋ yekeŋ haa mbo chii suɛi. Nua ndu hɔlla teleŋ o cho wa suɛiyo le chɔmndo maa a cho nilaŋ yaŋɔɔ. Mel ndu balikaa ma chandu ndu le muli o yɔŋgu wo o nɛi lebɛɛ niŋ. Chɛl mi la hiŋaŋ ladiom kposoŋ te.
Toosiaŋ le bahawɛi ŋ cho komallo. Te o bɛnda pɛ, siŋga suukaŋ numndo le ma soo a bahawɛila ndɔlaŋ. Hei cho tɛtɛlɛ le tosaa kanifuule, yaula naala pɔmbɔlaŋ, Bandu Mɛŋgɛlaa a “Tiondoo”, yaasiaa sɔɔŋ yɛ yɔŋ. Te a kuɛ pɛ ma komal wana ŋ kuɛ o ndu lo wo wallo, chɛl ndu diom ma kelu suɛi numnde i biŋgi.

Kindiŋ Ma Tosa hei o Paŋgei hei Niŋ,

Boondii pɛɛku leyuŋgoo, la pɛɛku mɛɛ wana landuŋ kɔl le yeemɛi acheleŋnda yɛ. Te a kuɛ pɛ o wali pollo niŋ, a nɔ ma siŋga suukaŋ numndo le ma soo a suɛi wana chiɛiyo dimi ve.
Te ŋ chuuŋgiaŋ pɛ le bɔŋaŋnda naŋ kua o wali pollo niŋndaŋ lapum biyɔɔ, naapum puaa pilɛnɔ cho wa bɔŋaŋ koŋ lachi wo yaasiaa ɔɔ o tosa tuula o chɔm nɛila naŋ landuŋ kɔl le yeemɛi acheleŋnda wa.