Hiouwɔɔ Lachioo Tosaa o Wali Pollo Niŋ—Bɛɛndiaa Diomnda ŋ nɔ le Suɛi Kandɔɔ Laŋ

Le yɛɛ hei Bɛnda Yɛ? Te ŋ kendu a suɛi pilaŋ wana chiɛiyo kɔllo ve le, o chɛl le nilaŋ yaŋɔɔ le. Le sabu koŋ, wanaa dimiaa yooŋgu kɛndiaa bɔɔbɔɔ che ndi suɛi sɔwɛ le ma bɛɛndiaa diomnda nda kandu suɛi laŋ. Mi che bɛɛ naa mi Yau Wali Naa leMasaa a yauwo hoo, Reasoning (Comment raisonner) chɔm naa kɛɛsiaalaŋ a nyɛ naŋ nɔ le tosaa o wali pollo niŋndo, kɛ o cho nyɛ naŋ suaa wo kpede le la chɔm naa le. O yɔŋ bɛɛ mi yauwo chɔm naa nyɛ naŋ nɔ le dimioo wo, wanaa dimiaa yooŋgu kɛndiaa nɔ di ma bɛɛndiaa diomnda nda pila cho lakɔ dimi laŋ. Te ŋ tosa hei pɛ, ŋ cho wa wanaa dimiaa yooŋgu kɛndiaa nyɛkɛndɛi. O cho mɛɛ miŋ fuuluu o wana chiɛiyo lo fɛŋ malaŋ naŋ yiyaŋ nyɛ naŋ nɔ miŋ dimi wo le.—Tal. 15:28, NW.

Vɛɛ Ŋ Tosa yɛ Hei?

Tofa suɛi lebolle. Suɛi lebollii keŋ i wa ichɛlaŋ a yau ŋ kɛɛsiaa le yɔŋgoo wo. Nduyɛ, o wa suɛi waŋnda nɔ yeemɛi o tanda koŋ niŋndo.
Bɛɛndiaa diomnda ŋ nɔ le suɛi kandɔɔ laŋ nyɛkɛndɛi. Te a chii dɔɔ wana chiɛiyo yilɔɔ pɛ, a kandu naa aa, “I hiŋ o numndo kanifuule . . . ,” “Wanaa bɔɔbɔɔ cho buulaŋndo a . . . ,” “I yeema mi sina yiyaŋ numndo a suɛi hei . . . ,” te koŋ te, a dimi nyɛ cheleŋ. Diomnda cho la biŋgii nii nduyɛ mi la wa tɛtɛlɛ laŋ la bɛnda ni le suɛi kandɔɔ. Wanaa dimiaa yooŋgu kɛndiaa apum, ma kɛsiŋ diomnda nda kandu suɛi laŋ o kɔl.
Bɛɛndiaa nyuna tosa mi wana chiɛiyo yiyaŋ fɛŋ malaŋ o suaa wo. (Mat. 17:25) Loonuŋ maa wana chiɛiyo wa yiyaŋndo a sɔɔŋ cheleŋ okɔɔ tuupa ma kua o ndu lo. Lelaŋ, nyuna numndo wa o kala le muli le.

Kindiŋ Ma Tosa hei o Paŋgei hei Niŋ,

Nua teleŋndo o pɛɛku leyuŋgoo niŋ le mi la tuula diomnda wana kandu suɛi o wali pollo niŋndaŋ.
Te la wa pɛ o wali pollo niŋ, chɔm wanaa nya dimi yooŋgu kɛndɔɔ wa nyɛ ŋ tuu le kɔlaŋ suɛiyo. (Tal. 27:17, NW) Te suɛi ŋ bɛɛndiaa le kɔlaŋ dimioo ve pilaŋ niŋ waŋnda kɔltaŋ te, a siŋga ndi ma dimi icheleŋ.