Chonduŋ leMasaŋ Ke Wana Kɔl Sikpaa

Mi Pɔɔ nda Sailaa saŋgala Mɛlɛka teleŋ nda wa o chiɛi manyumndo niŋndo. (Walta 16:​25) O teleŋ naa hoo niŋ, mi chaaŋaa naa laalaŋnda soli chonduŋ leMasaŋ teleŋ nda wa o biyɔɔ niŋ o chiɛila manyumndaŋ niŋ Sɔkisɛŋhausɛŋ o Nasi bɛŋgu, o lɛŋnde Chamani leŋ niŋ, vɛlɛ a teleŋ nda wa o biyɔɔ niŋ o lɛŋnde Saibiiliaa leŋ niŋndo. Taamaseliilaŋ ndaŋ la chɔm mɛɛ chondoŋ solioo yɔŋgu Kilisiɔŋnda malaa le ma nɔ kɔl sikpaa o nyɛkindilaa bɛŋgu yɛ.

Sɔɔŋ maŋgalaŋ bɔɔbɔɔ cheleŋ cho hunɔɔ yau ŋchondu sɛnɛiyo sɔla suŋ suŋ diola ndɔlaŋ aa, “‘Soli Chonduŋ Kɔl Kɛndɔŋ Choo Choo’ o Chɛhowa Lo”. Te ŋ sɔla dɔɔ pɛ yauwo hoo, ŋ nɔ miŋ wa chondoŋ muŋ pɛɛkoo a teleŋ pɛɛku naa leyuŋgoo le miŋ loonuŋ muŋ. (Ɛfi 5:​19) Okoŋ, te ŋ wa pɛ o nyɛkindilaa bɛŋgu, nyina diandaa nɔla mbo mala naa miŋ loonuŋ muŋ. Chonduŋ leMasaŋ mala naa miŋ handu kɔllo o nyɛm naŋ cho lehɔl o nɛi le muŋ ndoŋ. Ŋ ke naa yoomuaŋ te ŋ wa pɛ o nyɛkindilaa bɛŋgu. Te ŋ nɔ pɛ yiyaŋ kɛndɔɔ, nyɛ chaa mala naa miŋ “soli chonduŋ kɔl kɛndɔŋ choo choo” le mɛɛ naŋ cho a kɔl kɛndɛ yɛ. (1Ko 15:​16; Sam 33:​1-3) Ŋ soliŋ chonduŋ naŋ leMasaŋ kpeku nyɛkɛndɛi o nɛi o nɛi niŋ!

LA TOFA VIDUEIYO HOO, CHONDII KE WANAA WALLA YOOMUAŊ NDE, OKOŊ MI LA MULI NYUNALAŊ NDAŊ:

• Yɛɛnɛ nyindu yɛ Ŋgɔɔ Filɔsi chondei solioo?

• Vɛɛ chondei ke yɛ puaapiliaa wa o biyɔɔ niŋ o chiɛila manyumndaŋ Sɔkisɛŋhausɛŋ niŋnda yoomuaŋ?

• O nɛila kuɛɛ choo chonduŋ leMasaŋ ŋ ke yɛ num yoomuaŋ?

• Chonduŋ leMasaŋ kuɛɛ num yeema yɛ ma bii o kɔl?