‘Kɔl Kɛndɔɔ Cho le Wanaa Cho Loo o PimbiNda Simiaa Choo Wa’

1-2. (a) Yɛɛ masɛi pum tosallɛ niŋ wanaa Chɛhowaa, kɛ yɛɛ nda cho yɛ tosaa? (b) Vɛɛ nyɛpalaa nda tusi naa choo wo tosa yɛ miŋ wa a kɔl kɛndɛ? (Tɛɛsiaa fotueiyo o kɔɔ.)

SUŊ suŋ, wali naa otiŋ ɔɔ kpou cho o kuunaa bɛŋgu o lɛŋnde hiouwɔɔ 30 niŋ chieeŋndo balɔɔ silɔ. O lɛŋnde hei ipum niŋ, masaa waa dɔu niŋ puaapiliaa a ndepiliaa naa o chiɛila manyumndaŋ niŋ. Le yɛɛ? O kpeekpei niŋ, puaapiliaa a ndepiliaa haa tosa nyɛ o nyɛ wɔɔŋ Chɛhowa o hɔl te. Nyɛ kinɛi nda tosa wo cho diomndaŋ veeloo o Baabuiyo niŋ a ndu pɛɛkoo, acheleŋnda dimullo a laalaŋnda ndalaŋ, vɛlɛ a kɔlaŋ o bɔŋaŋndaŋ ni. A cho vɛlɛ puaapiliaa haa nyɛpalaa tusioo choo le mɛɛ nda wou laba o yalale chieeŋndeŋ niŋ te yɛ. Mi che bɛɛ a cho nda nyɛpalaa kala kalaa tusioo choo, kɛ a cho loo o pimbi nda simiaa choo.b A cho chɔmndo maa a yɔŋguŋ o Chɛhowa lo a kɔl ndaa kpou. Nduyɛ a cho a kɔl kɛndɛ le mɛɛ nda cho keŋ tosaa yɛ!

² Naapum a che niŋ fotueila puaapiliaa a ndepiliaa kɔl simulaa haa a tiŋ. Nduyɛ a che niŋ mɛɛ nda wa mamɔɔ o fotueilaŋ ndaŋ niŋ teleŋ o teleŋ yɛ. A cho a kɔl kɛndɛ kanifuule, a sina maa Chɛhowa hini kɔl a nda le mɛɛ nda cho loo o pimbi nda simiaa choo yɛ. (1 Kolo. 29:​17a) Mi Chiisu dimi aa: “Kɔl kɛndɔɔ cho le wanaa nda cho nyɛpalaa tusioo choo wa, le mɛɛ nda cho nyɛ cho sakpo Mɛlɛka o hɔl lo tosaa yɛ. . . . La wa a nyaale, nduyɛ mi la naŋ kɔl tau, kanifuule fanda bɛndu bɛndoo cho le nya.”—Maa. 5:​10-12.

TAMASELII NAŊ TIUBA MIŊ TOL KƆƆLI WO

3. A mɛɛ Walta Kiilaa 4:​19, 20 dimi yɛ, yɛɛ kiilaa o wɔsiŋ kɛmɛ tasoŋ niŋ tosa yɛ, nduyɛ le yɛɛ?

³ Nyɛ keeku kiilaa choo o wɔsiŋ kɛmɛ tasoŋ niŋndo koni cho hau puaapiliaa a ndepiliaa naa keekoo choo ni. Nda bɛɛ ma tusi nda nyɛpalaa choo le mɛɛ nda wa yooŋgoo dimioo a Chiisu okɔɔ yɛ. Teleŋnda bɔɔbɔɔ, mi wanaa kialaa ŋyamaa le Chuuwa ndaa dimul nda maa “a suaa lɛ o wana lo ɔɔ ma pɛɛku waŋnda a diola Chiisu laŋ okɔɔ le.” (Walta. 4:​18; 5:​27, 28, 40) Yɛɛ kiilaa Chiisuaa ndaa tosa yɛ? (Nuawɔ Walta Kiilaa 4:​19, 20.) Ndaa sina maa wana nɔ kpaayaa mbo hiau masaa waa wo ndoo dimul nda ni ‘le ma dimul waŋnda yooŋgoo’ a Kiliti okɔɔ. (Walta. 10:​42) Le hei, mi wanaa ndaa suaa le nda wa Pitɛ nda Chɔŋ dimi kpendekele a kɔl simulaa maa, Mɛlɛka nda cho diikɔŋ ni, kɛ o cho wanaa kialaa ŋyamaa le. Nduyɛ ma dimul nda kpendekele maa a pɛŋgi suɛi a diola Chiisulaŋ okɔɔ le. O dimi niŋ, nyunaa nda wa masaa waa ni aa: ‘Baa dimioo nya cho ni maa ŋ nɔ miŋ diikuŋ nya, okoŋ miŋ kɛɛ Mɛlɛka diikɔŋndo?’

4. A mɛɛ Walta Kiilaa 5:​27-29 chɔm yɛ, tamasi yɛɛ kiilaa kɛsullɛ hau Kilisiɔŋaa tonyaa kpou, nduyɛ vɛɛ naŋ tuallɛ tamasi ndaa kɔɔli?

⁴ Mi kiilaa Chiisuaa kɛsi tamasi kɛndɔɔ le Kilisiɔŋaa tonyaa hau kpou. Nduyɛ, ŋ cho tamasi nda koŋ tolɔɔ kɔɔli le “miŋ diikuŋ Masanɔɔ Mɛlɛka mbo hiou wanachioo.” (Nuawɔ Walta Kiilaa 5:​27-29.) Mɛɛ nda lɔɔ nda le mɛɛ nda lo o pimbi nda simiaa choo yɛ, ma faŋaŋ laŋgbaa kalaa kialu yamaŋ nda o hɔl ma kuaŋnuŋ. “A wa kɔlaŋ a nyaaloo le mɛɛ Mɛlɛka chɛl ma tusi nda siɔmbulaŋ le diola Chiisu laŋ yɛ.” Nduyɛ ma hiau lachi a yooŋgu kɛndɔɔ dimioo.—Walta. 5:​40-42.

5. Nyunala kuɛɛ naŋ nɔ yɛ le mulioo?

⁵ Tamasi kiilaa Chiisuaa kɛsul naa wo tosa miŋ nyuna nyunalaŋ lapum. Le tamaseliiyo, vɛɛ kɛɛsiaa nda tosa le Mɛlɛka diikɔŋndo mbo hiou wanachioo wo chɛlaŋ yɛ a nyɛ Baabuiyo dimi maa, “ŋ nɔ miŋ diikuŋ wanaa cho naa masaleŋ choo wa”? (Luomaŋ. 13:​1) A mɛɛ kiilanɔɔ Pɔɔl dimi yɛ, vɛɛ naŋ diikuŋ yɛ “wanaa cho naa masaleŋ choo wa,” miŋ lo o pimbi naa simiaa choo, nduyɛ miŋ nɛŋi Mɛlɛka kɔl o hiou masaa kpou wo?—Tai. 3:​1.

“WANAA CHO NAA MASALEŊ CHOO WA”

6. (a) A mɛɛ Luomaŋnda 13:​1 dimi yɛ, yɛɛ naŋ nɔ yɛ miŋ tosal “wanaa cho naa masaleŋ choo wa”? (b) Yɛɛ naŋ sina yɛ a masaa waa kpou okɔɔ?

⁶ Nuawɔ Luomaŋnda 13:​1. O bolle Baabuileŋ ndeŋ niŋ, diomndaŋ ndaŋ “wanaa cho naa masaleŋ choo wa” sim le wanaa nɔ kpaayalaŋ acheleŋnda choo wa. Kilisiɔŋnda nɔ ma diikuŋ wanaa cho o masaleŋ choo wa. Mi masaa waa tosa le mi sɔɔŋ kuɛ kpɛ kpɛ, ma tosa a sabu le mi waŋnda diikuŋ sawalaŋ, nduyɛ lepum pɛŋ ma suŋgu le wanaa Chɛhowaa. (Sɔɔŋ. 12:​16) Le hei, sawaa i cho ni le miŋ mal paawaa, miŋ yɔŋgu chuuŋgiaa, miŋ nɔ siooŋii ndɛi, nduyɛ miŋ ke nda bɛɛleŋ te a dimul naa pɛ le miŋ tosa keŋ. (Luomaŋ. 13:​7) Kɛ, ŋ nɔ miŋ loonuŋ maa Chɛhowa kinɛi chɛl ni mi masaa waa nɔ kpaayaa. Mi Chiisu chɔm hei kpendekele mɛɛ Masa Ibuŋgaa le Luomaŋnda diolaŋ Pɔŋtiɔɔ Paile nyuna ndu. Mɛɛ Paile wa suɛi a kpaaya o nɔ le Chiisu diyɔɔ ɔɔ le ndu malɔɔ wo okɔɔ, mi Chiisu dimul ndu aa: “Te o cho mi kpaayaa o keŋnuŋ num fulaa o choo choo niŋ te, a nɔ ya kpaaya o kpaaya choo le.” (Chɔŋ 19:​11) Kpaaya Paile ndoo nɔ wo ndoo nɔ mɛɛlulaŋ. Hau bɛɛ, ŋ sina maa kpaaya masaa waa nɔ wo o nɔ mɛɛlulaŋ.

7. O sɔɔŋ kuɛɛ niŋ naŋ nɔ yɛ miŋ kɛɛ masaa waa diikɔŋndo, nduyɛ yɛɛ masaa waa nɔ yɛ ma loonuŋ?

⁷ Mi Kilisiɔŋnda diikuŋ sawala masaa waa duau laŋ kpou te la tɛɛmbuu sawala Mɛlɛkalaŋ te. Kɛ ŋ nɔ miŋ diikuŋ nda le, te a dimul naa pɛ le miŋ tosa nyɛ tɛɛmbuu sawala Mɛlɛkalaŋ ndo ɔɔ te a kuuna naa pɛ le nyɛ Mɛlɛka dimul naa wo tosaa. Le tamaseliiyo, o lɛŋnde ipum niŋ, lepum ma dimul puaambuaa feleŋguaa le ma simnuŋ sovɛiya.c Ɔɔ naapum, ma kuuna naa “New World Translation” a yaula tɔlnuŋ o Baabuiyo choo laŋ soliŋndo kpeku. Nduyɛ ma kuuna naa vɛlɛ yooŋgu kɛndɔɔ dimioo a kɔlaŋ o bɔŋaŋndaŋ. Te wanaa cho o masaleŋ choo wa soliŋ pɛ kpaaya ndaa kpeku o nɛi wɔɔŋndo choo, naapum le buɛiyaa Kiliti wa nyɛpalaa tusioo choo, a nɔ ma muli nyunaa o Mɛlɛka lo. Nduyɛ a nɔ ma loonuŋ maa, Chɛhowa cho nda tofaa.—Ikili. 5:​8.

8. Teŋgeŋ kuɛɛ cho yɛ “wanaa cho naa masaleŋ choo wa” tɛɛŋ a Chɛhowa “Mɛlɛka Bɛndoo Kpou,” nduyɛ le yɛɛ naŋ nɔ yɛ miŋ sina teŋgeŋndo hoo?

⁸ Diomndo hoo “masaleŋ” sim le kpaayaa, foofoo, a dioo le nyɛ tosa. Kɛ o sim naa maa kpaaya kpou kpou wo, foofo bɛndu bɛndoo, a dioo le nyɛ o nyɛ tosa le. Chɛhowa kinɛi nɔ kpaaya kpou kpou wo, foofo bɛndoo, a dioo le nyɛ o nyɛ tosa ni. Kanifuule Baabuiyo dimi maa ndu cho “Mɛlɛka Bɛndoo Kpou” ni. Mi che bɛɛ wanaa cho naa masaleŋ choo wa nɔ kpaaya, kɛ Chɛhowa nɔ nda kpaayaa choo kpou ni. Diomndaŋ ndaŋ “Mɛlɛka Bɛndoo Kpou,” la cho tau o Baabuiyo niŋ.—Daan. 7:​18, 22, 25, 27.

CHƐHOWA CHO “MƐLƐKA BƐNDOO KPOU” NI

9. Yɛɛ Daaniɛɛ wana ndoo suaa le Mɛlɛka wo che yɛ o yilaŋndoŋ niŋ?

⁹ Mi Daaniɛɛ wana ndoo suaa le Mɛlɛka wo cha yilaŋndoŋ, ŋ chɔm maa Chɛhowa nɔ kpaayaa mbo hiau masaa waa wo. O yilaŋuŋ muŋ niŋ, mbo cha visiaa bɛnduaa a hiɔɔlu a sim le kpaayala lemasalaŋ nda. Laŋ la cho ni, Babilɔŋ, Mɛdo Paasiaa, Kilisi a Luom. Nduyɛ kpaaya lemasa cho suŋ suŋndo, o kpaaya lemasa wa Luomndo niŋ o fula ni. Ndu cho, Bilitiŋ a Amɛlika ni. (Daan. 7:​1-3, 17) Okoŋ kɔɔli, mi Daaniɛɛ cha Chɛhowa ichali o kpeŋgbei ndɔ lemasaa choo o choo choo niŋ. (Daan. 7:​9, 10) Kɛ nyɛ cheleŋ Daaniɛɛ che o yilaŋnde niŋndo nɔ mbo wa silaa le wanaa cho hau o masaleŋ choo wa.

10. A mɛɛ Daaniɛɛ 7:​13, 14, 27 dimi yɛ, mɛɛ Chɛhowa puu wanaa cho o masaleŋ choo wa masaleŋ o ba, nɛɛ waa o ke yɛ, nduyɛ yɛɛ keŋ chɔm yɛ a ndu okɔɔ?

¹⁰ Nuawɔ Daaniɛɛ 7:​13, 14, 27. O bolii Baabuiye hei niŋ, mi Mɛlɛka puu wanaa cho o masaleŋ choo wa masaleŋ o ba, okoŋ mbo ke wanaa cheleŋ nɔ kpaayaa mbo hiau nda wa. Nɛɛ waa o ke yɛ masaleŋ ndeŋ? Wanaa kaŋ cho “po wana pɔnɔɔ” a “wanaa cho le Mɛlɛka Bɛndoo Kpou wa” ni. Nda cho yɛ Chiisu Kiliti, a ŋwaŋ 144,000 ni. Nduyɛ, a cho wa o masaleŋ choo “le fɛɛŋ a fɛɛŋ.” (Daan. 7:​18) A tonya, Chɛhowa cho “Mɛlɛka Bɛndoo Kpou” ni. Ndu kinɛi nɔ kpaayaa le hei tosaa ni.

11. Yɛɛ cheleŋ Daaniɛɛ poonyiaa yɛ le chɔmndo mɛɛ Chɛhowa nɔ kpaayaa lɛŋnde choo yɛ?

¹¹ Nyɛ Daaniɛɛ che o yilaŋnde niŋndo chɛlaŋ a nyɛ o dimi hoo wo. Mbo dimi aa: “Mɛlɛka naa, . . . num tosa ni ma handu masaa bɛnduaa, nduyɛ, num tosa ni ma faŋa nda.” Mbo chɔɔlu poonyiaa aa: “Mɛlɛka bɛndoo kpou ndu nɔ kpaayaa lɛŋnde choo o chieeŋndo choo kpou ni. . . . Wana o yeema le siiŋguuwo masa wo, ndu o siiŋguu masa ni.” (Daan. 2:​19-21; 4:​17) Kani bɛɛ Chɛhowa faŋa niŋ waŋndo o masaleŋ choo ɔɔ o siiŋguu niŋ pa waŋndo masaa? Ei!

12. Chɔmndɔ tamaseliiyo a mɛɛ Chɛhowa faŋa masaa o masale ndaleŋ choo o sindɔɔ niŋ yɛ. (Tofa fotueiyo.)

¹² Chɛhowa chɔm niŋ kpendekele maa o nɔ kpaayaa “wanaa cho naa masaleŋ choo” wa choo. Ŋ tofaŋndɔ tamaseliilaŋ la yaa. Mi Feloo o wa masaa le Ichipi wo siiŋguu wanaa Chɛhowaa chiaa nduyɛ mbo kɛɛ le nda malɔɔ. Kɛ mi Chɛhowa piŋi wanaa nduaa, okoŋ mbo miisuu Feloo o Pee Siaŋa Mɛŋma Ihɛllo. (Ɛsɔ. 14:​26-28; Sam 136:​15) Mi Bɛtisiasa, masaa o Babilɔŋ niŋ ‘kɛɛ le tusiŋndo Mɛlɛka o ba bɛŋgu.’ Nduyɛ mbo kɛɛ le Chɛhowa saŋgalaa, okoŋ ‘mbo saŋgala mɛlɛkaa nduaa. O nda toosiaa a kanii humbueiyo a o ŋkooliiyo.’ (Daan. 5:​22, 23) Kɛ mi Mɛlɛka tusi po yoŋga koŋ siɔmbulaŋ. “Ichɔl koŋ kpeekpei” Bɛtisiasa sɔla piɔmndo ni nduyɛ mi Mɛlɛka piɔu masale ndɔleŋ tɛɛŋ mbo ke waŋnda Mɛdii a haa Paasiaa. (Daan. 5:​28, 30, 31) Mi masaa le Palɛstaiŋ diolaŋ Hɛlɔɔ Akilipa Tasoo dii kiilanɔɔ Chemisi okoŋ mbo duau kiilanɔɔ Pitɛ o chiɛi manyumndo niŋ. Nduyɛ, ndoo yeema vɛlɛ Pitɛ diyɔɔ. Kɛ mi Chɛhowa kuuna ndu ndi tosaa. Baabuiyo dimi maa, “mi maalikɛinɔ Chɛhowa wo duau ndu naa choo” okoŋ mbo wu.—Walta. 12:​1-5, 21-23.

13. Chɔmndɔ tamaseliiyo a mɛɛ Chɛhowa nɔ kpaayaa masaa chuuŋgiaŋ diompilɛ wa choo yɛ.

¹³ Chɛhowa chɔm niŋ vɛlɛ maa o nɔ kpaayaa masaa chuuŋgiaŋ diompilɛ wa choo. Le tamaseliiyo, mbo chɔulaba le Isɔluɛiya, mbo mala nda ma dii masaa Kenanaitiiya 31. Nduyɛ, mbo mala nda ma sɔla tandaa tau o Lɛŋnde Mɛyaaleŋ niŋ. (Chɔɔ. 11:​4-6, 20; 12:​1, 7, 24) Mi Chɛhowa mala vɛlɛ Isɔluɛiya le masaa Bɛnihadadi diyɔɔ a masaa Siiliaŋnda 32.—1 Masaa. 20:​1, 26-29.

14-15. (a) Yɛɛ masaa Nɛbukanɛɛsa a Daliɔɔ dimi yɛ a kpaaya lemasa Chɛhowaa okɔɔ? (b) Yɛɛ wana ŋchondoo dimi yɛ a Chɛhowa okɔɔ vɛlɛ a wanaa nduaa?

¹⁴ Chɛhowa chɔm niŋ teleŋnda bɔɔbɔɔ maa ndu cho Mɛlɛka Bɛndoo ni. Mi Masaa Nɛbukanɛɛsa o Babilɔŋ niŋ saŋgalaŋ maa o nɔ kpaayaa, nduyɛ maa o cho wana tɔɔ. Mbo kɛɛ le Chɛhowa tusiŋndo o ba bɛŋgu, nduyɛ mbo kɛɛ le ndu saŋgalaa. Le hei, mi Mɛlɛka tosa mbo fula waŋnda chieeya tɛɛŋ okoŋ mbo sɔndaŋ yondoo niŋ. Mɛɛ o miiŋgu o ndupila niŋ, mbo saŋgala “Mɛlɛka Bɛndoo Kpou.” Nduyɛ mbo dimi maa, masale Chɛhowaleŋ “le nɔ lamɛɛlu le.” Mbo chɔɔlu dimi aa: ‘Wana o wana nɔla Mɛlɛka kuuna nyɛ o hɛnaŋndo tosaa le.’ (Daan. 4:​30, 33-35) Mɛɛ nda dɔu Daaniɛɛ o sooŋ kpɔkuŋnda niŋ le mɛɛ o lo o pimbi ndɔ simiaa choo nduyɛ mi Chɛhowa piŋi ndu yɛ, mi masaa Daliɔɔ duau sawaa aa: “Wana o wana cho o masale nileŋ niŋ, . . . la nɔ mi la ke Mɛlɛka Daaniɛɛ wo bɛɛleŋ, nduyɛ mi la nɔ siooŋii nduɛi. Kani fuule, ndu cho Mɛlɛka cho yoomu wo ni. Nduyɛ o cho le fɛɛŋ a fɛɛŋ. Kpaaya ndɔ lemasaa o cho le fɛɛŋ a fɛɛŋ, nduyɛ o nɔ lamɛɛlu le.”—Daan. 6:​7-10, 19-22, 26, 27.

¹⁵ Mi wana ŋchondoo dimi aa: “Kɛɛsiaala lɛŋii piɛi Mɛlɛka le ve a kɛɛsiaa laŋ, tɛɛmbuuwo Mɛlɛka Yaawɛɛ tɛɛmbuu laŋ ni. Isɔɔ o isɔɔ la tuu le tosaa, laasiaa o laasiaa ndi ni.” Mbo chɔɔlu dimi aa: “Lelɛŋ o lelɛŋ le chɛl Mɛlɛka Yaawɛɛ maa Mɛlɛka nda nda sooluu wo pɛ, lɛŋnde lɛŋ le pɛl tɔnɔɔ, nduyɛ wanaa o chua maa wanaa ndɔ wa a pɛl tɔnɔɔ.” (Sam 33:​10, 12) A tonya, ŋ nɔ bɔɔ sabu kɛndɔɔ le loo o pimbi naa simiaa choo!

CHƆU MƐƐLAA

16. Tiindaŋ yɛɛ naŋ nɔ yɛ miŋ nɔ a “nyɛpalaa bɛndoo” okɔɔ, nduyɛ le yɛɛ? (Tofa fotueiyo.)

¹⁶ Ŋ che niŋ sɔɔŋ Chɛhowa tosa o paandoo niŋndoŋ. Mɛɛ yɛɛ naŋ nɔ yɛ miŋ wa kɔl le mbo tosa o chilaŋ niŋ? Ŋ nɔ miŋ nɔ tiindaŋndo maa Chɛhowa cho wanaa cho loo o pimbi nda simiaa choo wa piŋi a teleŋ “nyɛpalaa bɛndoo.” (Maa. 24:​21; Daan. 12:​1) Nduyɛ o cho naa piŋi te Kɔɔki o Lɛŋnde Makɔkileŋ niŋ, ndu cho yɛ lɛŋii chuuŋgiaŋ diompilɛ ve ni, chiŋalaŋ pɛ wanaa Mɛlɛkaa chieeŋndo balɔɔ silɔ. O yɔŋ bɛɛ mi lɛŋii 193 cho o kɔɔna UN ndo niŋndo kpou chiŋalaŋ naa, Chɛhowa a puaa nduaa chɔuwaa kpaaya bɛnduaa cho o choo choo niŋnda hiou nda kpaayaa poloŋ. Mi Chɛhowa mɛi lediom aa: ‘Lɛŋnde o chieeŋndo niŋ kpou cho sina maa ya Mɛlɛka, wana kpaaya bɛndoo ya I cho ni, nduyɛ mi wa Mɛlɛka diandaa. A cho sina maa ya cho Mɛlɛka Yaawɛɛ ni.’—Isi. 38:​14-16, 23; Sam 46:​10.

17. A mɛɛ Baabuiyo dimi yɛ, yɛɛ yɔŋnuŋ yɛ niŋ a masaa chieeŋnda kpou, nduyɛ buŋgɛi kuɛɛ Chɛhowa chuellɛ wanaa cho loo o pimbi nda simiaa choo wa?

¹⁷ Chiŋalaŋ Kɔɔki cho wanaa Mɛlɛkaa wo cho tosa ni mi Chɛhowa hiŋ a chɔu Amakɛdɔŋndo. A teleŋ koŋ, Chɛhowa cho “masaa o chieeŋndo choo kpou” tɛɛmbuu. (Sɔɔŋ. 16:​14, 16; 19:​19-21) Kɛ o baa pilɔɔ choo, o chuel wanaa cho loo o pimbi nda simiaa choo wa buŋgɛi aa, “wanaa cho sakpo Mɛlɛka o hɔl la, nda wa niŋ o lɛŋndeŋ ndeŋ niŋ ni. Wanaa [lo niŋ o pimbi nda simiaa choo wa NWT,] nda koni a lo niŋ o lɛŋndeŋ ndeŋ niŋ ni.”—Pulɔ. 2:​21.

Ŋ NƆ MIŊ LO O PIMBI NAA SIMIAA CHOO

18. Yɛɛ Kilisiɔŋaa tonyaa a bɔɔbɔɔ tosa yɛ niŋ, nduyɛ le yɛɛ? (Daaniɛɛ 3:​28)

¹⁸ O wɔsiŋ hiou woŋ niŋ, Kilisiɔŋaa tonyaa luei niŋ yoomula ndalaŋ a hɛnɛkɛyɛi ndɛi o kpundɔɔ niŋ, le mɛɛ nda kaala Chɛhowa Masa Kpou Kpou Wo yɛ. A cho hei tosaa le loo o pimbi nda simiaa choo, mɛɛ puaa Hibuluiyaa yaa wa tosa yɛ. Ma duau nda o yiŋnde bɛnduleŋ niŋ, le mɛɛ nda wa lo lechoo ndaa chɔmndo o Mɛlɛka Bɛndoo lo yɛ.—Nuawɔ Daaniɛɛ 3:​28.

19. Yɛɛ Chɛhowa cho yɛ tofa le wanaa nduaa yamɛi kilullo, nduyɛ yɛɛ naŋ nɔ yɛ miŋ tosa suŋ suŋ?

¹⁹ Mi wana ŋchondoo Deeve poonyiaa a mɛɛ i cho suɛi sɔvɛ le loo o pimbi naa simiaa choo yɛ okɔɔ aa: “Mɛlɛka Yaawɛɛ, num cho yamanɔɔ le chuaa ŋwaŋnda chiee kpou ni. Kiolu yamɛi a ya okɔɔ, kani ya ya I sina maa kaa nuu cho sakpo. Nduyɛ num pila a sina maa I tɛɛmbuu isɔɔ o isɔɔ le.” (Sam 7:​8) Mbo poonyiaa vɛlɛ aa: “Oo Mɛlɛka Yaawɛɛ, I cho num nyunaa ma siiŋguu ya wana sakpo num o hɔl, kani fuule, num ya tiindaŋ ni.” (Sam 25:​21) Nyɛ sɔvɛ naŋ nɔ miŋ tosa o yoomoo niŋndo cho lo lechoo wo chɔmndo o Chɛhowa lo ni. Nduyɛ pesiŋ bɛɛ ŋ nɔ miŋ faŋaŋ o pimbi naa simiaa choo le, mɛɛ mɛɛ sɔɔŋ wa naa choo o yoomoo niŋ. Te ŋ tosa lende pɛ, mɛɛ naa bɛɛ cho dimi maa wana ŋchondoo hoo. Mbo dimi aa: ‘Kɔl kɛndɔɔ cho le wanaa cho loo o pimbi nda simiaa choo, nduyɛ ma tosa nyɛ sawala Mɛlɛka Yaawɛɛ laŋ la dimi wo wa.’—Sam 119:​1.