BUŊGƐI YAA VE
Waŋndo Tɛɛmbuu Num pɛ Kɔl “Te o Wa pɛ mi Chaaŋ Num Yɔŋ Num Isɔɔ”
“Mi ndepilɛnɔɔ o kunda nuu niŋ nyiinduu ya choolaŋ maa I chiimbuu kanii nduɛi. Mɛɛ wanaa cheleŋ o kundaa niŋ tuei a ndi okɔɔ, ma laalaŋ nyɛ o dimul nda wo. O mɛɛlulaŋ, mi ndepilɛnɔɔ hoo dimulla maa o saaluŋ maa i cho tonya le. Mi che bɛɛ mbo nyɔɔlu ya, kɛ mi yiyaŋ o kɔl niŋ maa fɛɛŋ bɛɛ I mel ndu haki le tɔɔ wɔɔŋ ya sɔla wo le.”—Linda.
NUM bɛɛ suɛi waa lende yɔŋnuŋ num niŋ maa Linda, o tambu kɔl tau le nyɛ chaaŋ ndɔ laalaŋndo tosal ndu wo? I cho suɛi kɔl tambɛi le sinaa maa apum kaa acheleŋnda tosal nda wo paaliaŋ niŋ sɔɔŋ ndaŋ iMɛlɛkayaŋ. Baa i waa ndoo yɔŋnuŋ num niŋ?
Wana Nɔla pa “Mbo Faŋa Naa o Kaala Mɛlɛkaa Bɛŋgu”?
Tonya i cho ni maa miŋ che ndi ikala kpoke le chaaŋ naa laalaŋndo malɔɔ haki te o benduŋ a naa pɛ. Nduyɛ Kilisiɔŋnda nɔ ma kaaliaŋ vellaa velle. (Chɔŋ 13:34, 35) Te chaaŋ naa laalaŋndo tiŋ naa pɛ, miŋ tambu kɔllo puɛɛ.—Sam 55:12.
Baabuiyo bɛɛ dimi maa teleŋndaŋ lapum, mi chaaŋ naa Kilisiɔŋnɔɔ ‘yɔŋ naa isɔɔ.’ (Kolosiaŋnda 3:13) Te keŋ yɔŋnuŋ naa pɛ, miŋ che ndi ikala kpoke le ndi toosiaa. Nyɛ cho pa o mala naa wo? Tofawɔ silala Baabuilaŋ la yaa.
Finya naa o choo choo niŋ sina nyɛ o nyɛ fee. Chɛhowa cho chɔɔ nyɛ o nyɛ cho yɔŋnɔŋndo, kafala nda tosal naa laŋ kpou, nduyɛ a saŋga la chuu naa wo. (Hibuluiya 4:13) Le handɔɔ lechoo, mi mɔnɛi bii Chɛhowa te saŋgaa wa naa pɛ choo. (Aisaya 63:9) O chɛl “kpundɛ o kpundɛ” ɔɔ nyɛ o nyɛ cheleŋ, kɛlɛŋgaa le buɛi ndɔ cheleŋ, mbo “faŋa naa o kaala Mɛlɛkaa bɛŋgu le.” (Luomaŋnda 8:35, 38, 39) O bɛnda mi naa bɛɛ tosa keŋ. Ŋ chɛl mi nyɛ o nyɛ ɔɔ wana o wana piɔu naa a Chɛhowa le.
Hakioo malɔɔ chɔm naa maa a chɛl nyɛ nda tosal numndo le. Te ŋ mal pɛ wanaa benduŋ a naa wa haki, koŋ chɔm naa maa nyɛ nda tosa wo cho nyɛ wɔɔŋ te le, ɔɔ chɛlɔɔ le naŋ cho nyɛ nda tosal naa wo le. Loonuŋ maa Chɛhowa chɛl hakioo kposoŋ te, kɛ mbo mal haki te o che pɛ saboo le keŋ tosaa. (Sam 103:12, 13; Habakuku 1:13) Te Chɛhowa dɛɛniaa naa pɛ le miŋ mal acheleŋnda haki, mɛɛ dimullo o cho naa koŋ ni maa naŋ tol tamasi ndɔɔ kɔɔli. O cho “wana chɔm wana ŋsɔɔ choo le teleŋ o teleŋ te.”—Sam 103:9; Maatiu 6:14.
Te ŋ kɛsiŋ suɛi waŋndo tosal naa ve o kɔl te, o wa tɔnɔɔ le naapila. O nɛi kuɛɛ choo? Yiyaŋndɔ a tamaseliiyo hoo. A chua pou lusulɛiyo tiŋ kpiliŋ ma bii o ba. Pouwo hoo yɛ, a nɔla ma bii ndu o ba le teleŋ biŋgi. Kɛ te o wa yɛ niŋ ma bii ndu o ba le teleŋ vilɛi? Vɛɛ kpɛ ŋ cho yɛ biunɔŋ le mbo wa num o ba? Le chemchemndaŋ chalaŋ? lɛɛlɔɔ opilɛ? ɔɔ mbo hiou lende? Wana dimi isɔɔ a tonya, mi baa saŋga num yɔkɔɔ! Kɛ lusul pou koŋ feŋaŋ lechoo le, nduyɛ o henduŋ lechoo le. Kɛ mɛɛ o viau num o ba fau, lende koni o chɔɔlu lusul ni. Lende koni i cho a suɛi waŋndo tosal naa ve biyɔɔ o kɔl ni. Mɛɛ i viau naa o kɔl fau, o yɔŋ bɛɛ suɛi taaniŋ, lende koni kɔl naa tambu ni. Lelaŋ, o cho fuule Chɛhowa dimul naa le miŋ mal suɛi kɛsiŋndo o kɔl te. A tonya, te ŋ mal pɛ suɛi kɛsiŋndo o kɔl, o wa tɔnɔɔ le naa tau.—Pulɔwaa 11:17.
Te ŋ kɛsiŋ suɛi waŋndo tosal naa ve o kɔl te, o wa tɔnɔɔ le naapila
“Mi Yiyaŋ maa Chɛhowa Pila Wa Suɛi o Yallo Ni”
Yɛɛ mala yɛ Linda o kɛsiŋ suɛi nɛiyaŋ chaaŋ ndɔ laalaŋndo tosal ndu ve o kɔl te? O nyɛm mala ndu woŋ tɛɛŋ, opilɛ wa yiyaŋndo o bolii Baabui soo a haki malaa okɔɔ ve ni. Nyɛ pilaŋ Linda kɔllo tau wo wa ni, sinaa maa te ŋ mal pɛ waŋnda haki, Chɛhowa bɛɛ tiuba mbo mal naa haki. (Ɛfisiaŋnda 4:32–5:2) Le chɔmndo mɛɛ nyɛ o yiyaŋ koŋ choo wo piiliaŋ ndu yɛ, mbo dimi aa, “Mi yiyaŋ maa Chɛhowa pila wa suɛi o ya lo ni.”
Mɛɛ teleŋ biŋgi hiou, mi Linda soliŋ suɛi keŋ o kɔl. Mbo mal ndepilɛnɔ koŋ haki fasɛi. Nduyɛ suŋsuŋ niŋ, chaaŋ ndɔ kɛndɛ kɛndɛ ndepilɛnɔ koŋ cho ni. Linda cho niŋ hiouwɔɔ lachioo tosaa o Chɛhowa piɛiyo niŋ. Kɛsiŋ o kɔl maa Chɛhowa yeema num ma tosa nyɛpilɛ koŋ kpe.