Chiisu Kuɛ o Mɛŋndaŋ Choo

Mi Chiisu ndoo siŋgi wanaa wa a naalaŋ nda, nduyɛ mi ndoo miŋgi wanaa vi wa yoomu. O cho ko sɔɔŋ muŋ te ndoo tosa le, kɛ ndoo nɔ vɛlɛ kpaayaa hueiye choo a piɔɔ. Mɛɛ Chiisu kɔ chii piɛileŋ o pembei choo, mbo tofa o pioo Kalili, mbo cha hueiyii fuku fukuei hɔŋndo. Kiilaa nduaa wa o dɛnɔɔ niŋ, nduyɛ hueiye wa nda paaliaŋndo kpeekpei. Mi Chiisu tual pembei, mbo kandu kɔlaŋ o mɛŋndaŋ choo naa nda wa o dɛndɔɔ niŋnda. Mɛɛ kiilaa nduaa che ndu hunɔɔ o mɛŋndaŋ choo, mi siooŋnde bii nda. Kɛ mi Chiisu dimul nda aa: ‘Ya ni. La yɔŋ isiooŋ te.’

Mi Pitɛ dimul ndu aa: ‘Masanɔɔ, te num lekɛndɛi ni, mɛɛ dimul la mi hiŋ naa num chua.’ Mi Chiisu dimul Pitɛ aa: ‘Huŋ naa ya chua.’ Hueiye wa hɔŋndo lende fuku fuku, mi Pitɛ fula o dɛndɔɔ niŋ, mbo kandu kɔlaŋ o mɛŋndaŋ choo naa Chiisu chua. Kɛ mɛɛ Pitɛ hiŋ le Chiisu sɔɔŋguuwo ikɛi, mbo nua hueiyii wa hɔŋndo ve, okoŋ mi siooŋnde bii ndu. Mi Pitɛ kandu mɔɔwaa o mɛŋndaŋ bɛŋgu. Mbo deŋi choo choo aa: ‘Masanɔɔ, piŋi ya fɔ!’ Mi Chiisu saa ndu baa, mbo dimul ndu aa: ‘Le yɛɛnɛ ŋ kandu yɛ kiisaŋndo? Baa a nɔ laalaŋ te?’

Mi Chiisu nda Pitɛ luɛi o dɛndɔɔ niŋ, nduyɛ o lepilɛ niŋ kpe, mi hueiye pɛŋgi hɔŋndo. O yiyaŋ numndo niŋ, vɛɛ kɔllo wa yɛ kiilaa Chiisu wa? Mi nda kpou dimi aa: “Po Mɛlɛkaa kpeekpei ŋ cho ni.”

O cho ko a teleŋndo hoo kinɛi le Chiisu kpaa hueiye le. A teleŋ cheleŋ, Chiisu nda kiilaa nduaa wa kɔlaŋ o mɛŋndaŋ choo o dɛndɔɔ niŋ, mi Chiisu kɔ hiniŋ o dɛndɔɔ tumndo. Chiisu wa o luaŋ, mi hueiyii fuku fukuei kandu hɔŋndo. Mi mɛŋndaŋ ma kandu dɛndɔɔ hiiluuwo, okoŋ mi ma kandu luɛiyɔɔ o dɛndɔɔ niŋ. Mi kiilaa nduaa kɔ tindi ndu, ma wa deŋioo aa: ‘Wana pɛɛkaa, piɔmndo naŋ hiŋ nuaa ni! Mala naa!’ Mi Chiisu chaŋ, mbo dimul mɛŋndaŋ aa: ‘I tuɛi lɛ hau le dɛ!’ O lepilɛ niŋ kpe, mi hueiye pɛŋgi hɔŋndo, nduyɛ mi mɛŋndaŋ ma sim yi. Mi Chiisu nyuna buɛiyaa nduaa aa: ‘Baa la nɔ laalaŋ te?’ Ma dimulaŋ vellaa velle aa: “Hueiye a mɛŋndaŋ bɛɛ, tueiyɔɔ ndu diom.” Mi kiilaa nduaa pɛɛku maa te a dɔu pɛ tiindaŋ ndaa o Chiisu niŋ a kɔllo kpou, siooŋii ve nda le nyɛ o nyɛ le.