Chiisu Ke Waŋnda o Waalaŋ Niŋ Nyɛdiaa

Tuupa ma bii Bɔŋaŋ Hiouwɔɔ Choo Wo a wɔsi 32 boondii Chiisu ve, mi kiilaa nduaa fula yooŋgu kɛndɔɔ dimioo ma miiŋgu naa ndu chua. A wa a saŋgɛi yɔkɔɔ. Le hei, mi Chiisu dimul nda le ma luɛi o dɛndɔɔ niŋ ma kuɛ Bɛtisaida le halikpeŋ ma kɔ pɛŋgi nyɛɛmbɔ. Kɛ mɛɛ dɛndɔɔ hiŋ le fuuluuwo o kɔŋgɔ, mbo cha waŋnda o waalaŋ niŋ a wa ndu tolɔɔ kɔɔli. Mi che bɛɛ ndoo yeema mbo waŋnuŋ kpeele nda kiilaa nduaa, kɛ mbo bii faŋga bɛndu koŋ nyɛkɛndɛi. Mbo siŋgi wanaa wa a naalaŋ nda, okoŋ mbo kandu nda pɛɛkoo. Le paaleŋ kpɛŋ, Chiisu wa nda pɛɛkoo a Masale Mɛlɛkaleŋ okɔɔ. Mɛɛ paaleŋ le yɔŋguŋ, mi kiilaa nduaa dimul ndu aa: ‘Yiaaŋ ma cho waŋnda haa nɛiyo. Dimul nda ma kuɛ ma kɔ nuuviaa nyɛdiaa le ma de.’

Mi Chiisu dimul nda aa: ‘A nɔ ma kuɛ ba o ba le. La ke nda nyɛdiaa ma de.’ Ma nyuna ndu aa: ‘A yeema naa miŋ kɔ piondu beediiyo le nda?’ Mi kiilaa nduaa o pilɛ diolaŋ aa Filipi dimi aa: ‘O yɔŋ bɛɛ miŋ nɔ kanioŋ tau, ŋ nɔla miŋ pendu beediiyo o wa letuu le faŋga bɛndoo hoo wo le.’

Mi Chiisu nyuna nda aa: ‘Nyɛdiaa suu kuɛɛ nya nɔ yɛ o ba?’ Mi Andulu mulul ndu aa: ‘Ŋ nɔ beediiyo kpuŋgbaŋ ŋmuuŋ a suwaa pɔmbuaa a ŋiɔɔŋ. Nduyɛ koŋ cho o bɔɔ le.’ Mi Chiisu dimi aa: ‘La ke ya beedii koŋ a suuwa.’ Mbo dimul waŋnda le ma chal o billo choo a kundalaŋ. Kundaa pum 50, kundaa pum 100. Mbo heelu hɔlla choo choo, mbo piɛi. Okoŋ, mbo chua nyɛdiaa koŋ mbo ke kiilaa nduaa, mi kiilaa nduaa ke waŋnda. Waŋ piaanduaa de nyɛdiaa hoo wa suei, a wa 5,000. Nduyɛ a chɔm waŋ laanduaa a chuaambuaa le. Kɛ mi nda kpou dia ma pum cha. Okoŋ kɔɔli, mi kiilaa nduaa chɔuviaa o nda dema wo, mbo pia kambɛilaŋ 12! A tosa hei le halikpeŋ nyɛ o nyɛ tambu le. Kaama bɛndoo pila wa koŋ ni, lende le?

Mi nyɔɔ hɛnaŋ waŋnda tau a nyɛ Chiisu tosa koŋ ndo, nduyɛ ma yeema pɛŋ le ma siiŋguu ndu masa ndaa. Kɛ Chiisu ndoo sina maa o cho a teleŋ koŋ te Chɛhowa ndoo yeema ndu mbo wa masa le. Le hei, mi Chiisu dimul faŋga koŋ le ma kuɛ o la nda lo, nduyɛ mbo dimul kiilaa nduaa le ma kuɛ o kɔŋgɔɔ leeloo o Pioo Kalili. Ma luɛi o dɛndɔɔ niŋ, nduyɛ mi Chiisu kuaŋnuŋ o pembei choo ndupilɛ kpeele. Le yɛɛnɛ? Kanifuule, ndoo yeema mbo kɔ piɛi o Finya ndɔ lo. Mɛɛ o mɛɛ Chiisu ndoo nɔ waltaŋ le tosaa, mi ndoo nuuviaa teleŋndo lɔɔlɔɔ le piɛileŋ.