SUƐI LEBOLLE O KƆƆ | NƐƐ YAA CHO YƐ SEIYAA CHƐHOWAA?
Yɛɛ Seiyaa Chɛhowaa laalaŋ yɛ?
Seiyaa Chɛhowaa laalaŋ maa ‘diom o diom cho o Yau Mɛlɛkaa niŋ, nyina Mɛlɛkaa tosa ni ma poonyiaa laŋ. Nduyɛ, la cho diomnda nɔ malaa leniŋ.’ (Timoti Diiŋ Ndɔɔ 3:16) Ŋ soliŋ Baabuiyo kpeku le naa malaa miŋ pɛɛku a Wana Toosiaa chieeŋndo wo okɔɔ, nduyɛ le miŋ sɔla yoomu sɔviɔɔ.
Baabuiyo dimi aa, “Tosa ma sina maa num pilɛ kpe cho Mɛlɛka Yaawɛɛ ni, maa num cho Mɛlɛka hiou kpou wo ni.” (Sam 83:18) Lelaŋ, Chɛhowa Mɛlɛka kinɛi naŋ piɛi ni, nduyɛ maa seiyaa ndɔ, ŋ cho kindiŋndo le mi waŋnda sina diola ndɔlaŋ.—Aisaya 43:10-12.
Maa Kilisiɔŋnda, ŋ laalaŋ maa mi Chiisu, “Po Mɛlɛkaa”a huŋ o lɛŋndeŋ choo, nduyɛ mbo simnuŋ Mɛsayanɔɔ. (Chɔŋ 1:34, 41; 4:25, 26) Mɛɛ o vi, mbo sɔla fulasɛiniŋndo le miiŋgoo o choo choo niŋ. (Kɔliŋtiaŋ Tasoo 15:3, 4) Okoŋ kɔɔli, mbo simnuŋ Masaa le Masale Mɛlɛkaleŋ. (Sɔɔŋ Chɔɔmaŋndoŋ 11:15) Masaleŋ kpeekpei Masale leŋ le cho ni, nduyɛ leŋ le cho hunɔɔ a Kpele Hɛnɛkiɔɔ o lɛŋndeŋ choo ni. (Daaniɛɛ 2:44) Baabuiyo dimi aa, “Kɛ wanaa tuisiŋ nda, nda lɛŋnde Mɛlɛka chua buŋgɛi leŋ le wa niŋ nyɛ nda ni, nduyɛ, nda wa niŋ o kɔl nyuloo niŋ, nduyɛ, ma de nyɛm kɛndɛŋ Mɛlɛkaŋ tɔnɔ ni.”—Sam 37:11, 29.
“Te a nua pɛ o Baabuiyo niŋ, ma laalaŋ maa Mɛlɛka cho suɛi o ndalo ni. Te a sɔla pɛ bahawɛilaŋ o yoomu ndaa niŋ, ma tofa o Diom Mɛlɛkaa niŋ le bahawɛila laŋ solioo. . . . Le nda nda, Diom Mɛlɛkaa cho wɔ yoomu.”—Wana bɛndu Katolikiiya Bɛŋnjamiŋ Chɛlayati, Muŋstalandishɛ Volksaituŋ, yau layooŋgu Chamaniiya
Seiyaa Chɛhowaa laalaŋ maa hau bɛɛ, mi silala Baabuiyo ke waŋnda tɔnɔɔ. (Aisaya 48:17, 18) Lelaŋ naŋ bii silalaŋ ndaŋ nyɛkɛndɛi ni. Le tamaseliiyo, le mɛɛ Baabuiyo sila naa le kpakpalaa kaala nɔɔliaa yiyaŋnda naalaŋ a dialluŋ naŋ yɛ, lelaŋ naŋ kɛɛ taando, ɔɔ kooma ŋ ve o numpila niŋ te waŋ chuaa ni. (Kɔliŋtiaŋ Diiŋ Ndɔɔ 7:1) Miŋ kpakpala vɛlɛ sɔɔŋ Baabuiyo kɛɛ muŋndoŋ, mɛɛ kolɔɔ bɛɛtambɛiyo, kaa ihini nɔɔlɛiyo, a viileŋ le cho naa yɛ.—Kɔliŋtiaŋ Tasoo 6:9-11.
a Baabuiyo dimi vɛlɛ maa Chiisu cho “Po ndɔ pilɔɔ” ni. Kanifuule, ndu fɛŋ Chɛhowa toosiaa a bandɔ lɔɔpa bɛɛ mbo toosiaa nyɛ o nyɛ.—Chɔŋ 3:18; Kolosiaŋnda 1:13-15.