Hiouwɔɔ Lachioo Tosaa o Wali Pollo Niŋ—Kila Ŋgemelaa le Miiŋgu Makɔɔ

Le yɛɛ hei Bɛnda Yɛ? Te ŋ saaluŋ wana chɔm yeemɛiyo pɛ, o bɛnda miŋ miiŋgu o ndu lo a teleŋ naŋ chɛlaŋndo le kulii naŋ tɔl ndu o kɔlle pɔɔlaa. (Kɔl. Tasoo 3:6) Le hei tosaa, o bɛnda miŋ kila ŋgemelaa tuupa miŋ mal le kɔŋndaŋ nduyɛ, miŋ nyuna ndu vɛlɛ le teleŋ o bɛnda miŋ miiŋgu o ndu lo wo. Le handɔɔ lechoo, o bɛnda miŋ mɛi nyuna naŋ cho hunɔɔ suukaŋ choo wo te ŋ miiŋgu pɛ. Hei tosa mi wana chiɛiyo wa a yeemɛi le hunɔɔ naŋ cho wo. Te muli nyuna koŋ wa pɛ o yau naŋ mel ndu wo niŋ, naapum o cho diomnda cho leniŋndaŋ veelu. Ŋgemelaa kilaa le miiŋgu naŋ cho lɔɔ cheleŋndo tosa mi suukaŋ naa wa tɛtɛlɛ, kanifuule, ŋ sina niŋ suɛi naŋ cho lakɔ suukaŋ choo ve nduyɛ, wana chiɛiyo bɛɛ nɔ niŋ ndi o kɔl. Te ŋ miiŋgu pɛ, ŋ dimul ndu maa ŋ hiŋ le nyuna naŋ mel numndo mulioo. Okoŋ, ŋ hiou niko lachi a suɛi.

Vɛɛ Ŋ Tosa yɛ Hei?

Te a wa pɛ pɛɛkoo nyɛ ŋ cho lakɔ waŋnda dimul o chiɛila ndalaŋ ndo, pɛɛku vɛlɛ nyuna ŋ cho nda mel le miiŋgu ŋ cho lɔɔ cheleŋndo. Nyuna koŋ wa a suɛi dimiŋ o yau ŋ cho nda lakɔ mello niŋ, ɔɔ muli nyuna koŋ wa o yaula naŋ pɛɛku waŋnda laŋ niŋ. Okoŋ te a miiŋgu pɛ, a mel nda yau kalaa.
Te a hiŋ pɛ le suɛi chiiyo nya wana chɔm yeemɛiyo, dimul ndu maa a yeema ma miiŋgu vɛlɛ o ndu lo mi la chɔɔlu suukaŋ. Chɔm ndu nyuna nya cho suukaŋ choo wo te a miiŋgu pɛ. O tandalaŋ lapum niŋ, waŋnda nɔ makolaŋ tau. Le hei, a chɛl mi wana tosa kɛɛsiaa le miiŋgoo o nda lo le. Te o wa lende pɛ, a dimi naa aa, “Baa teleŋ o bɛnda le num komallo o bɛɛ wo cho hoo ni? [Chum mbo muli.] I yeema mi kei naŋ filo o lɔɔ kɔɔli mi mulul num nyunaa hoo . . . Te I hiŋ pɛ ma nɔ ba le, a dimul la.”
Te la chɛlaŋ pɛ a teleŋ ŋ nɔ le miiŋgoo wo, a nɔ ma lo o lediom. (Mat. 5:37) Te la chii pɛ suukaŋndo o miiŋgu ŋ cho wo, kila ŋgemelaa le miiŋgoo vɛlɛ.

Kindiŋ Ma Tosa Hei o Paŋgei hei Niŋ.

Te a wa pɛ pɛɛkoo nyɛ ŋ cho lakɔ waŋnda dimullo, pɛɛku vɛlɛ nyuna ŋ cho nda mel le miiŋgu ŋ cho lɔɔ cheleŋndo. Chɔm ndu wanaa cheleŋaa nya cho yooŋgu kɛndɔɔ dimioo wa.