Nɛi Sɛnɛi Cheleŋ le Yooŋgu Kɛndɔɔ Dimioo Naa Waŋnda Hiau Tau Wa
1. Dɛɛniaa yɛɛ kundala nɔ fondaŋ nda waŋnda hiau tau laŋ la sɔla yɛ niŋ le tosaa?
1 Kundala nɔ fondaŋnda waŋnda hiau tau laŋ la sɔla niŋ dɛɛniaa le ma kɛɛsiaa le yooŋgu kɛndɔɔ dimioo o fondalaŋ ndaŋ. Te la wa hei tosaa pɛ, la kɛsi tibiiyo ɔɔ pɛŋgɛi mapuuluii nda toosiaa le challe yooŋgu kɛndɔɔ dimioo naa waŋnda hiau tau wa mi la handu yaulaŋ lechoo. Te pɛŋgɛi mapuuluii keŋ nya kɛsi ni, o bɛndɛ mi wana dimiaa yooŋgu kɛndɔɔ o pilɛ sim ɔɔ chal ndi ikɛi. Kɛ te o wa pɛ tibiiyo nya kɛsi ni, wanaa dimiaa yooŋgu kɛndiaa a ŋiɔɔŋ nɔ ma sim ɔɔ chal ndu ikɛi. Wanaa cho nyɔŋ muŋ ikɛiya nɔ ma wa wuye wuye. A nɔ ma chɔm hɔlaa i chaŋyaa le mi waŋnda hiŋ o nda lo. Te la che pɛ mi waŋndo wa nyɔŋ muŋ tofaa, wana dimiaa yooŋgu kɛndɔɔ o pilɛ kandu suukaŋndo a ndu. Naapum a kandu naa aa, “A yiyaŋ niŋ pa nyɛ Baabuiyo dimi a suɛi keŋ okɔɔ wo?” Teleŋ ndu cho wa suɛiyo, waŋndo pilɔɔ ɔɔ a ŋiɔɔŋnda wa o fondaŋ koŋ ndoŋ ma wa waŋnda yooŋgu kɛndɔɔ dimullo o baltaŋ niŋ.
2. Chɔm suɛi yɔŋnaŋnde le nyɛ o cho suɛi tɔnɔ le challe a tibiyoo a yaulaŋ lechoo le yooŋgu kɛndɔɔ dimioo naa waŋnda hiau tau wa.
2 Nɛi sɛnɛiyo hoo mala niŋ le pɛɛkula Baabuila bɔɔbɔɔ kandɔɔ. Mi chua cho kɔlaŋ o sukuu bɛndoo niŋndo yeema nyɛ poonyiaa a Seiyaa Chɛhowaa okɔɔ, kɛ o seeluŋ Toŋgo leMasa Seiyaa Chɛhowaa le. O lɔɔ pilɔɔ, mbo cha tibii wanaa dimiaa yooŋgu kɛndiaa kɛsi a yaulaŋ lechoo wo o sukuu ndɔɔ. Mi pɛɛku Baabuiyo kanduŋ nduyɛ, sukuunɔɔ hoo yiŋ niŋ mi ndu bɛɛ wa yooŋgu kɛndɔɔ dimioo o nɛi waa naa niŋ.
3. Vɛɛ wanaa dimiaa yooŋgu kɛndiaa apum yiyaŋ yɛ le yooŋgu kɛndɔɔ dimioo o nɛiyo hoo niŋ?
3 Mi ndepilɛnɔ tuei niŋ yooŋgu kɛndɔɔ dimioo o nɛi waa naa niŋndo dimi aa, “Mi waŋnda apum kei isisi le yaula sɛnɛila naŋ kɛsi o tibiiyo choo laŋ chuaa. Apum yɛ, le pilɛ bɛɛ a tuiyɔ a Seiyaa Chɛhowaa okɔɔ le. I che maa yooŋgu kɛndɔɔ dimioo o nɛi waa naa niŋ, wanaa bɔɔbɔɔ tiuba ma tuei ndu.” Mi ndepilɛnɔ cheleŋ bɛɛ dimi aa, “Nɛi sɛnɛi kɛndɔɔ pila cho hoo ni le yooŋgu kɛndɔɔ dimioo. Kanifuule, ndapila huŋ o numndo ni, o yɔŋ bɛɛ mi yeemɛi ve nda tau le, a yeema le sinaa.”
4. Le yɛɛ o cho yɛ suɛi tɔnɔ le yaulaŋ kɛsioo o tibiiyo choo ɔɔ pɛŋgɛi mapuuluei o fondaŋ pilɔɔ, palɛi pilɛi, a teleŋ pilɔɔ o lɔɔ o lɔɔ bɛŋgu?
4 O cho suɛi tɔnɔ le tibiiyo kɛsioo ɔɔ pɛŋgɛi mapuuluei a yaulaŋ lechoo o fondaŋ pilɔɔ, palɛi pilɛi, a teleŋ pilɔɔ o lɔɔ o lɔɔ bɛŋgu. Fulamakɔɔlioo cho wa ni, waŋnda cho dɛli a yaulaŋ chɔɔ o nyɔŋ muŋ choo nduyɛ, mi kɔltaŋ la wa nda fɛɛsɛŋ le hunɔɔ naa num cha ma nyuna ɔɔ ma chua yaula nda yeema laŋ. Baa kunda nyaa kɛɛsiaa niŋ le yooŋgu kɛndɔɔ dimioo naa waŋnda hiau tau wa? Te o wa lende pɛ, naapum a nɔla ma sɔɔŋguu le wali yeelɛiyo hoo tosaa le miŋ dimul waŋnda yooŋgu kɛndɔɔ “a Masale Mɛlɛkaleŋ okɔɔ.”—Luku 9:60.