Soliŋ Teleŋ Numndo Kpeku Nyɛkɛndɛi o Wali Pollo Niŋ
Le wɔsi naa baalaa o wɔsi 2014 ve niŋ, mi Seiyaa Chɛhowaa chieeŋndo balɔɔ silɔ tosa hawɛilaŋ (lɛɛlɛlaŋ) 1,945,487,604 o yooŋgu kɛndɔɔ dimioo niŋ. Hei chɔm kpendekele maa icho naa o lakɔl le miŋ lo wali Chɛhowaa tosaa! (Chon. 110:3; Kɔl. Tasoo 15:58) Mɛɛ teleŋ lo wo cho lɛ o bɔɔ le yɛ, a yiyaŋ maa o ve o bɛndaa miŋ soliŋ teleŋ naa sɔvɛɔ kpeku le wanaa bɔɔbɔɔ yooŋgu kɛndɔɔ dimullo le?—Kɔl. Tasoo 7:29.
Le miŋ soliŋ teleŋ naa kpeku nyɛkɛndɛi o wali pollo niŋ, lepum o bɛnda miŋ siŋga teleŋnda naŋ kua o wali pollo niŋndo. Le tamaseliiyo, te o yɔŋ pɛ maa a kua yooŋgu kɛndɔɔ dimioo o nɛiyo pum niŋ lɔɔlɔɔ ma tosa hawɛiyo (lɛɛlɔɔ) ɔɔ mbo hiou lende kɛ a sɔla wana ŋ suaa o ndu lo wo le, o bɛnda ma siŋga teleŋndo le wanaa bɔɔbɔɔ komallo ma soo o nda lo le? Tanda kɛ kɛ nɔ bahawɛiyo o ndɔɔ. Kɛ o wa bɛɛ lende, kɛɛsiaala cho laŋ amatou laŋ la cho naa mala miŋ soliŋ teleŋ naa kpeku nyɛkɛndɛi ŋ “wuu bɔta fondoo le.”—Kɔl. Tasoo 9:26.
Yooŋgu Kɛndɔɔ Dimioo o Chiɛila Waŋnda. Le wɔsiŋ bɔɔbɔɔ niŋ, o chiɛila waŋnda wanaa dimiaa yooŋgu kɛndiaa bɔɔbɔɔ kandu suɛi o waŋnda lo ni. Kɛ o wa bɛɛ lende, mɛɛ wanaa bɔɔbɔɔ kua o waltaŋ niŋ ipala yɛ, a yiyaŋ maa o ve o bɛndaa miŋ kuɛ yooŋgu kɛndɔɔ dimioo o chiɛila waŋnda a paale yɔŋgaŋndeŋ ɔɔ paale delaaleŋ teleŋ nda wa pɛŋgioo o labɛɛ wo le? Yooŋgu kɛndɔɔ dimioo o nɛi ipala ɔɔ naa waŋnda tosa yulaleŋnda huŋ a fulamakɔɔli kɛndɔɔ tau.
Yooŋgu Kɛndɔɔ Dimioo Naa Waŋnda Hiau Tau Wa. Pɛŋgɔŋ mapuuluŋ nda toosiaa vɛlɛ a tibiilaŋ le challe yooŋgu kɛndɔɔ dimioo naa waŋnda hiau tau wa la nɔ mi la wa la kɛsiaa naa waŋnda hiau tau wa o tanda kundaa niŋ. (Tofa Yau Wali Naa leMasaa, Suɛɛsɔɔ 2013, p. 5, o puuluei niŋ.) Te waŋnda ve lɛ hiouwɔɔ tau o fondaŋ nya kɛsi nyɔɔŋ muŋndo le, Kunda Sim Hɔlte Bɛnduaa Chua Chilaŋ o Kundaa Niŋndo tosa kɛɛsiaa le ma faŋa nyɛm muŋ o fonda koŋ ma kuɛ a muŋ o fondaŋ cheleŋ naa waŋnda hiau tau wa.
Miiŋgula Makɔɔlaŋ a Pɛɛkula Baabuilaŋ. Te a kua pɛ yooŋgu kɛndɔɔ dimioo teleŋndaŋ lapum o nɛiyo pum niŋ kɛ a sɔla fulamakɔɔli kɛndɛ le, a yiyaŋ maa o ve o bɛndaa ma kɛɛsiaa a wanaa ŋ pɛɛku Baabuiyo wa ɔɔ miiŋgula makɔɔla numndaŋ le ma wa kɔlaŋ o nda lo a teleŋ koŋ te? Le tamaseliiyo, te a komal pɛ waŋnda tau o Ndaamaa choo idiiyo o chiɛila ndalaŋ o wali pollo niŋ, a yiyaŋ maa o ve o bɛndaa ma kɛɛsiaa le pɛɛkula numndaŋ tosaa ipalaa ɔɔ a paale yɔŋgaŋndeŋ te? Te miiŋgula makɔɔlaŋ nya cho tosaa ni, a yiyaŋ maa o ve o bɛndaa le mi wanaa dimiaa yooŋgu kɛndiaa kɛɛsiaa le pɛɛkula Baabuila ndalaŋ tosaa o fondaŋ pilɛ koŋ niŋ le ma tosa tau o wali pollo niŋ te?
Mi che bɛɛ naa teleŋ o teleŋ naŋ kuɛ pɛ o wali pollo niŋ miŋ poonyiaa teleŋ naŋ tosa wo, kɛ ŋ sɔla nyaaloo tau te ŋ sɔla pɛ fulamakɔɔli kɛndɔɔ. Te a saaluŋ pɛ maa yooŋgu kɛndɔɔ dimioo o nɛiyo pum niŋ a teleŋndo pum nɔ fulamakɔɔli kɛndɛ le, kindiŋ ma tofa nɛi dimiaa yooŋgu kɛndɛ cheleŋ. Piɛi o Chɛhowa lo, “Masanɔ nɔ wallo wo” le nɛi chɔmaa le ma soliŋ teleŋ numndo kpeku nyɛkɛndɛi o wali pollo niŋ!—Mat 9:38.