Vɛɛ Naŋ Dimi yɛ Yooŋgu Kɛndɔɔ a Pɛŋgɛi Mapuuluii Nda Toosiaa le Challe Yooŋgu Kɛndɔɔ Dimioo Naa Waŋnda Hiau Tau Wa?

Yooŋgu kɛndɔɔ dimioo a pɛŋgɛi mapuuluii nda toosiaa ve ɔɔ tibiiyo cho bɔɔ nɛi sɔvɛ bɛndu le wanaa nɔ yeemɛiya malaa ma sina tonyaa. (Chɔŋ 6:44) Le hei, bɛnduaa kundaa sɔla niŋ dɛɛniaa le ma tosa kɛɛsiaa le yooŋgu kɛndɔɔ dimioo a pɛŋgɛi mapuuluei ɔɔ tibiiyo naa waŋnda hiau tau wa o tanda ndaa niŋ. Mɛɛ naŋ beŋ pɛŋgɛi mapuuluei hei ɔɔ tibiiyo o fondaŋ pilɛ le yooŋgu kɛndɔɔ dimioo le yɛ, ŋ handu nyɔɔŋ muŋ o fondaŋ naŋ yeema wo miŋ nyuna bɛɛ masaa waa le. Nɛɛ yaa suiliŋ yɛ le yooŋgu kɛndɔɔ dimioo o nɛi waa naa niŋ? Wanaa dimiaa yooŋgu kɛndiaa bii sɔɔŋ o nɛi taasi niŋnda, a chuɛinuŋ nyɛkɛndɛiya, vɛlɛ a wanaa chaa suɛi nyɛkɛndɛi o waŋnda lo wa. Kɛɛsiaalaŋ ndaŋ, nyɛ ŋ nɔ ma tosa wo vɛlɛ a nyɛ ŋ nɔ ma tosa le wo cho wanaa dimiaa yooŋgu kɛndiaa mala ma sɔla fulamakɔɔli kɛndɔɔ.

Nyɛ ŋ nɔ ma tosa wo.

Wa wana ichaŋya, chɔm hɔlaa ichaŋyaa, nduyɛ ma wa wana malaa le wanaa cho hiounɔŋndo wa. Mi wanaa dimiaa yooŋgu kɛndiaa apum kandu a mammɔɔ muɛɛŋ okoŋ ma yil yilɔɔ ichaŋyaa. Te waŋndo wa pɛ hiounɔŋndo mbo tofa yaula cho o pɛŋgɛi choolaŋ, a dimi naa aa, “A chua yau suu ŋ yeema wo.”
Te la simi pɛ pɛŋgɛi yaulaŋ la cho lechoo ve, la tofa fondaŋ bɛnda mi la simndo. Fondaŋndaŋ lapum, mi wanaa dimiaa yooŋgu kɛndiaa sɔla fulamakɔɔli kɛndɔɔ te a sim pɛ tiŋ pɛŋgɛi ikɛi. Apum che maa simndaŋ pɛŋgɛi ikɛi kpɛɛluŋ tosa mi wanaa cho hiouwɔɔ wa kiisaŋ le kɔlaŋ o pɛŋgɛi yaulaŋ la cho lechoo ve. Le hei, ma sim tiŋ landaŋ a pɛŋgɛi yaulaŋ la cho lechoo ve haaa mi waŋndo sim o pɛŋgɛi. Te waŋndo sim pɛ o pɛŋgɛi hɔlndɔ, kindiŋ ma kandu suukaŋndo a ndu, naapum a nyuna ndu aa, “A yiyaŋ niŋ pa a nyuna hoo paandu?”
Soliŋ Baabuiyo kpeku teleŋ o teleŋ.
Wana o wana chua pɛ yaula naŋ pɛɛku waŋnda Baabuiyo laŋ o pilɛ mɛɛ yau Pɛɛku Baabuiyo cho naa yɛ, tɛɛsial ndu kɛɛsiaa naŋ nɔ le Baabuiyo pɛɛkoo a waŋnda wo. A chɔm ndu vɛlɛ vidueiyo hoo, Le Yɛɛ Ŋ Pɛɛku yɛ Baabuiyo? o nyɛ mapuulu chɔm ndu wo choo.
Te o bɛnda pɛ, nyuna le fondaŋ wanaa chɔm yeemɛiya ɔɔ foŋ nɔmbɛi (nimbolo) ndaa. Te o ve o tanda nyaa niŋ te o cho ichali le, poonyiaa diola ndɔlaŋ, fondaŋ ndɔɔ, vɛlɛ a foŋ nimbolo ndɔɔ o yau pɔmbɔɔ hoo choo, Please Follow Up (Veuillez suivre l’intérêt) (S-43) ma ke wana poonyiaa o kunda numndo niŋ.

Nyɛ ŋ nɔ ma tosa le wo

Wa wana kɔl tuu le, a nɔ ma baŋ wana le, ɔɔ ma sim pɛŋgɛi ikɛi mɛɛ ŋ wa nyɛ mɛŋgɛla.
Chua nɛi dimiaa yooŋgu kɛndɔɔ hoo maa le yaulaŋ piɔuwo kinɛi le o cho le. Te ŋ wa pɛ o wali pollo niŋ, kpeleŋ naa cho ni, le pɛɛkula Baabuilaŋ kandɔɔ a waŋnda. Lelaŋ, o bɛnda miŋ kindiŋ le baltaŋ kandɔɔ a wana o wana.
Sim pɛŋgɛi yaulaŋ la cho lechoo ve lachi le ɔɔ ma luɛiŋ yiŋgoloŋ o balta cheleŋ niŋ nya wana nya kuɛ yooŋgu kɛndɔɔ dimioo wo le. Te a yeema pɛ waŋndo veeloo o foŋ numndo choo le bahawɛi numpilaa, o bɛnda ma faŋaŋ pɛŋgɛi yaulaŋ la cho lechoo ve ikɛi ma kuɛ tiŋ landaŋ.
Hiŋaŋ ladiom a wanaa yeema a tonyaa wa le. Te wana yeema hoo tonyaa le wo kandu pɛ diomnda wɔɔŋndaŋ dimioo, o bɛnda mi la faŋaŋ ndoŋ mi la kuɛ o fondaŋ cheleŋ.