Pɛɛku Wanaa Chaa Yooŋgu Kɛndɔɔ Dimioo Nyɛkɛndɛiya o Ba

Ŋ nɔ kpeekpei miŋ chua wanaa chaa yooŋgu kɛndɔɔ dimioo nyɛkɛndɛiya o kunda naa niŋ wanaa sɔvɛ bɛndu. Apum viou niŋ Chɛhowa piɛiyo o laalaŋndo choo le wɔsila bɔɔbɔɔ. Apum suŋsuŋ nda laŋga sɔla nɛila kɛndɛla cheleŋ nda chaa yooŋgu kɛndɔɔ dimioo wo ni. Chiisu cho kunda leKilisiɔŋndo nɛiyo chɔmndo le yooŋgu kɛndɔɔ dimioo, a le waŋnda siiŋgoo buɛiyaa ndɔ o palɛi mɛɛlɛi hei niŋ. Wanaa dimiaa yooŋgu kɛndiaa haa cho hei chɔɔ kpendekele. (Mat. 28:19, 20) Lelaŋ, “kpaaya bɛndu” nda sɔla o yooŋgu kɛndɔɔ hoo niŋ le simulta ndalaŋ a tɔɔndaŋ nda komal ndalaŋ biunɔŋndo wo, Mɛlɛka ke nda ndu ni. (Kɔl. Diiŋ Ndɔɔ 4:7) Ŋ nɔ le pɛɛkoo tau wanaa chaa haa yooŋgu kɛndɔɔ dimioo nyɛkɛndɛiya o ba. Te a chɛl pɛ, mi yeemɛi wa nda tau le num pɛɛkoo nyɛ nda sina niŋndo. (Chon. 71:18, NW) Lelaŋ, ŋ nuviaŋ nɛilaŋ le miŋ pɛɛku nda o ba. Vɛɛ naŋ looku yɛ hei tosa?

O Wali Pollo Niŋ. Le chaa yooŋgu kɛndɔɔ dimioo nyɛkɛndɛi, wanaa sɛnɛiya a wanaa nɔ wɔ taasi bɔɔ le wa nɔ ma sɔla pɛɛkoo. Ŋ tiuba miŋ pɛɛku tau te ŋ wa pɛ wanaa chaa yooŋgu kɛndɔɔ dimioo nyɛkɛndɛiya tofaa mɛɛ nda dimi ndu yɛ. (Tofa buŋgɛi o Bandu Mɛŋgɛlaa niŋ Doŋdoŋndo 1, 2015 o suɛi lebolle hei bɛŋgu, “Lo o Dialuŋ Fulaŋ Numndoŋ Choo le Wali Pollo”, pɛl yaa ndɔɔ o suɛi lebolii pɔmbuɛi bɛŋgu aa, “Mala Wanaa Nɔ Wɔ Taasi Bɔɔ Le Wa.”) Tɔnɔ yɛɛ ŋ sɔla yɛ niŋ le kɔlaŋ o wali pollo niŋ a wanaa suu waa naa?

A dimul wana chaa yooŋgu kɛndɔɔ dimioo nyɛkɛndɛiyo le mi la kuɛ latulu o wali pollo niŋ. Te wana chaa hoo yooŋgu kɛndɔɔ dimioo nyɛkɛndɛiyo nɔ lɛ kɛndiaa sɔvɛ le kɔlaŋ o bɛɛ kposoŋ te, teleŋndaŋ lapum a dimul pɛɛkula numndaŋ o pilɛ mi la hiŋ o wana koŋndo bɛɛ mi la huŋ pɛɛku loŋ. Te la chii pɛɛkoo pɛ, nyuna ndu le mbo chɔm num sila mala num ma tosa hiouwɔɔ lachioo wo.

Chua Teleŋ Numndo le Waa a Nda Latulu. Le ma sina wanaa chaa yooŋgu kɛndɔɔ dimioo nyɛkɛndɛiya, mɛɛ ma chua teleŋndo ma wa a nda latulu. A veelu o pilɛ mbo hiŋ o pɛɛku num leyuŋgoo ma nyuuniaa ndu o nɛi la bali niŋ. Te wana chaa hoo yooŋgu kɛndɔɔ dimioo nyɛkɛndɛiyo nɔ lɛ kɛndiaa sɔvɛ le kɔlaŋ o bɛɛ kposoŋ te, a tosa kɛɛsiaa mi yuŋgu numndo kuɛ o ndulo bɛɛ mi la kɔ tosa pɛɛku nya leyuŋgoo loŋ. Kindiŋ ma sina mɛɛ o looku hunɔɔ o tonyaa niŋ yɛ. Tɔnɔla yɛɛ o cho yɛ niŋ tueiyɔɔ yeela? Hiouwɔɔ lachi yɛɛ o che yɛ niŋ yɔŋnɔŋndo o tanda ndɔɔ niŋ? Nyaale yɛɛ o sɔla yɛ niŋ o Chɛhowa piɛiyo niŋ?

Kɛsiŋ o kɔl maa wanaa chaa yooŋgu kɛndɔɔ dimioo nyɛkɛndɛiya bɛɛ, o cho sɔɔŋ fau le nda sina le. Naa kpou nɔ kelaŋ yɛ yɛ. Wanaa chaa yooŋgu kɛndɔɔ dimioo nduyɛ ma viau niŋ leniŋnda bɛɛ nɔ kelaŋ yɛ yɛ. (Luom. 12:6-8) Apum cho niŋ a yuwɛi. Hei kuuna nda le kɔlaŋ yooŋgu kɛndɔɔ dimioo a teleŋndo chuaa a naa latulu. Kɛ a koŋ kpou, ŋ pɛɛku nda o ba tau kanifuule, a sɔla niŋ taasioo puɛɛ o Chɛhowa piɛiyo niŋ o laalaŋndo choo.