Diomnda Nda Chua Waŋndalaŋ—Vɛɛ Naŋ Soliŋ Yɛ Laŋ Kpeku?

1. O fulawɔ o yaula poonyiaala naŋ soliŋ kpekulaŋ kɔɔli, yɛɛ cheleŋ naŋ nɔ yɛ vɛlɛ o naŋ sɔla tɔnɔɔ wo?

¹ Mi wanaa bɔɔbɔɔ tuei yeela le soliŋndo jw.org kpeku le veeloo diomnda bɛnda nduyɛ mi la wa diomnda tonyalaŋndo. (Ikili. 12:​10) Kɛ o wa bɛɛ lende, a soliŋ niŋ pa diomnda nda chua waŋndalaŋ kpeku? Hei mala num ma yaŋ nilaŋ o sɔɔŋ bɔɔbɔɔ o tɛɛŋgii nɛi. Vɛɛ naŋ sɔla yɛ tɔnɔɔ o diomnda nda chua waŋndalaŋ?

2. Vɛɛ naŋ soliŋ yɛ diomnda nda chua waŋndalaŋ kpeku le pɛɛkɔŋ naa ipilayaa ɔɔ pɛɛku leyuŋgoo?

² Le Pɛɛkɔŋ Naa iPilayaa ɔɔ Pɛɛku leYuŋgoo. Nilaŋ yaŋɔɔ o diomnda Baabui nda chua waŋndalaŋ, Bandu Mɛŋgɛlaa, “Tiondoo!”, ɔɔ yau cheleŋ o kelaa niŋ ɔɔ o walta naalaŋ niŋ lepaa o lepaa mala naa miŋ soliŋ teleŋ naa kpeku nyɛkɛndɛi. (Ɛfi. 5:​15, 16) Ŋ chɔɔlu sɔɔŋ yɛ yiɔɔŋ le pɛɛku naa leyuŋgoo te ŋ wa pɛ nilaŋ yaŋɔɔ o diomnda nda cho wa veeloo laŋ mi naa bɛɛ bii yau koŋ o ba miŋ wa tofaa leniŋ. Soliŋndo diomnda nda chua waŋndalaŋ kpeku teleŋ pɛɛkɔŋ ipilayaa mala tau taama taama te o yɔŋ pɛ miŋ yeema hiouwɔɔ lachioo tosaa o diomndaŋ veeloo niŋ ɔɔ te ŋ wa pɛ suɛi maŋgalɛi sɛnɛiye pɛɛkoo.

3. O tanda naa niŋ, nɛɛ yaa sɔla yɛ tɔnɔɔ o diomnda nda chua waŋndalaŋ?

³ Le Wali Pollo. Wanaa cho o tanda naa niŋ ma yiyaŋ maa a nɔ teleŋ kposoŋ le diomnda veelu le wa nɔ yeemɛi lepum le nilaŋ yaŋɔɔ o diomnda nda chua waŋndalaŋ. Ɔɔ naapum miŋ komal wanaa dimi suɛi maŋgalɛi cheleŋnde wa ma nɔ yeemɛi tau le ma chɛl yooŋgu kɛndɛ leMasa naŋ cho dimioo wo o ‘suɛi ndɛi maŋgalɛi niŋ.’ (Walta. 2:​6-8) O fondaŋndaŋ lapum, nilaŋ yaŋɔɔ o suɛi cho nyɛ kpeekpeiyo o naamu ndaa niŋ ni. Le tamaseliiyo, o naamu waŋnda haa niŋ Hmong, waŋnda challe ma dimul feleŋguaa cho chɔnɔŋndo wa sɔɔŋ paandu yɔŋnuŋ nda woŋ nduyɛ mi nda bɛɛ kɛsiŋ yooŋgu nda tueiyo o kɔl. Naamula bɔɔbɔɔ Afilika o bundɔŋ dimioo niŋ nda tuɛi pɛɛkoo yeela ni.

4. Nyunala kuɛɛ naŋ nɔ yɛ miŋ nyunaŋ naapila le wanaa cho o tanda naa niŋnda malaa?

⁴ O tanda numndo niŋ, o wa pa tɔnɔɔ le ma hendul wana chiɛiyo diomnda nda chua waŋndolaŋ o suɛi nduɛi maŋgalɛi niŋ? Baa waŋndo sɔla pa tɔnɔɔ te ŋ yɔŋ ndu pɛ yau nda chua waŋnda diomndaŋndo naa o sɔla yooŋgulaŋ nda? Baa ŋ hivi pa yau nda chua waŋndo diomndaŋndo o CD-yo choo miŋ ke wana chiɛi chɔm yeemɛiyo, naapum a yauwo pila latulu? Yau kɛ kɛ nda chua pɛ waŋnda diomndaŋ o CD-yo choo, Bandu Mɛŋgɛlaa, “Tiondoo!”, ɔɔ yaula pɔmbɔlaŋ miŋ ke ndu waŋndo o wali pollo niŋ, ŋ chɔm ndu te ŋ wa pɛ kona wali pollo yɔŋgoo o paŋgei mɛɛlulaŋ. A toosiaa diomnda nda chua waŋndalaŋ le pɛɛkɔŋ naa ipilayaa vɛlɛ a kuluŋ tonya Masale Mɛlɛkaleŋ tɔlɔɔ.—1 Kɔliŋ. 3:​6.