“Yɛɛ Baabuiyo Pɛɛku yɛ Naa?”​—Mɛɛ Naŋ Soliŋ Ndu Kpeku Yɛ

Yau “Pɛɛku Naa” a yau Pɛɛku Baabuiyo la velaŋ. Yaula tiɔɔŋndaŋ kpou la cho o kɔfu nyɛm waliŋ naŋ pɛɛku waŋnda woŋ niŋ nduyɛ tonya pilɔɔ la pɛɛku ni vɛlɛ o nɛi pilɔɔ niŋ kpe. Kɛ a koŋ kpou, yau “Pɛɛku Naa”, diomnda tɛtɛlɛla nɛi bila biyɔɔ le laŋ la cho leniŋ ni. O toosiaŋ le wanaa o cho i kala le yau Pɛɛku Baabuiyo biyɔɔ bila wa. Yau “Pɛɛku Naa” nɔ yooŋgula chɔɔlaa le. Kɛ o nɔ tɛɛsiaa le diomndaŋ lapum o tɛɛsiaa diomnda kendu bila biyɔɔ o pɛllo niŋndaŋ nyɛkɛndɛi vɛlɛ a nyɛ kpeekpei o cho suɛi okɔɔ wo. Buŋgɛi kɛ kɛ nɔ la nyuna o kandɔŋndo ɔɔ kɔfu miiŋgaa choo le. Kɛ o buŋgɛi mɛɛlulaŋ, mbo chɔm sɔɔŋ kuluŋ tonya Baabuiyo pɛɛku mi la yaasiaa muŋ o buŋgɛi niŋndo. Mɛɛ yau Pɛɛku Baabuiyo cho yɛ, ŋ yɔŋgu waŋnda yau “Pɛɛku Naa” mbo ve bɛɛ aa ndu le naŋ nɔ le yɔŋgoo o paŋgii keŋ niŋ te. Vɛɛ naŋ soliŋ yɛ sɔɔŋ cho o yau “Pɛɛku Naa” niŋndo kpeku te ŋ wa pɛ pɛɛku Baabuiyo tosaa?

SƆƆŊ KULLOŊ: Le wanaa bɔɔbɔɔ, nyɔɔ hɛnaŋ nda bɔɔ mɛɛ naŋ tosa pɛɛku Baabuiyo a waŋnda yɛ. Ŋ veelu fɛŋ diomnda pɛllo o yau Pɛɛku Baabuiyo niŋ okoŋ miŋ nyuna. Te o wa yɛ mi wana ŋ cho pɛɛkoo wo sina suɛi maŋgalɛi le ɔɔ mbo chiee diomndaŋ veelu lapi le? O nɛi koŋ niŋ, naapum a kɛɛsiaa le ma soliŋ yau “Pɛɛku Naa” kpeku. Okoŋ, a soliŋ sɔɔŋ kulloŋ kpeku o buŋgɛi keŋ niŋ le waa pɛɛkoo tosaa. Nduyɛ a dɛɛniaa wana ŋ cho pɛɛkoo wo le mbo wa diomndaŋ veeloo o pɛllo niŋ a bandɔ. Sɔɔŋ tonya kɛ kɛ cho o Baabuiyo niŋ miŋ wa o pɛl nya cho pɛɛkoo wo niŋ, a pɛɛku muŋ waŋndo le chemchemndaŋ 15. Mɛɛ sɔɔŋ kulloŋ tɛɛsiaa nyɛ dimiŋ o pɛllo niŋ tau le yɛ, wana cho waŋndo pɛɛkoo wo nɔ mbo bɛɛndiaŋ nyɛkɛndɛi, mbo sina bahawɛi wana o cho pɛɛkoo wo. Te wana cho waŋndo pɛɛkoo wo tosa pɛ pɛɛkoo o pɛllo niŋ kpeekpei, o soliŋ sɔɔŋ kulloŋ kpeku le sondoo miŋgioo o nyɛ nda pɛɛku wo choo.

DIOMNDA CHƆƆLAALAŊ: Tɛɛsiaa le diomnda kendu bila biyɔɔ laŋ a nyɛ dimiŋ o pɛllo niŋndo o fondaa hoo bɛŋgu la cho o lepula a mɛɛ la dimiŋ o pɛllo niŋ yɛ. Naapum wana cho waŋndo pɛɛkoo wo kɛɛsiaa te o bɛnda pɛ le tɛɛsiaa le diomndaŋ lapum yaasiaa o yau “Pɛɛku Naa” niŋ a teleŋ nda cho pɛɛkoo wo.