Yɛɛ Mala yɛ Num le Ma Wa Pɛɛkɔŋndo Teleŋ o Teleŋ?
BAA ma che ndi pa ikala le Baabuiyo pɛɛkoo teleŋ o teleŋ, nduyɛ a ndu tueiyɔɔ yeela? Naapum mi naa a bɔɔbɔɔ sinaŋ lende teleŋndaŋ lapum. Kɛ yiyaŋndɔ a sɔɔŋ naŋ tosa lepaa o lepaa woŋ, mɛɛ pulɔŋndo cho nuaa yɛ. Sɛmbɔɔ a teleŋndo yeemaŋ ni le pulɔŋndo. Kɛ te a chii pɛ, ma sinaŋ nyɛkɛndɛi. Lende koni, mi Baabuiyo pɛɛkoo bɛɛ tosa miŋ sinaŋ nyɛkɛndɛi. (Ɛfi. 5:26) Ŋ tofaŋndɔ nɛilaŋ lapum la mala naa laŋ:
Kɛsi teleŋ kpeekpeiyo. Pɛɛkɔŋ ipilayaa cho nyɔɔ opilɛ o “sɔɔŋ hiou wa ŋ sɔvɛ woŋ” tɛɛŋ, ŋ Kilisiɔŋnɔɔ nɔ mbo tosa woŋ. (Filip. 1:10) Handu kɛɛsiaa ŋ poonyiaa wo o fondaŋ cho kpendekele wo, le num malaa ma tol ndu kɔɔli, mɛɛ pɛŋgɛi layooŋguei, ɔɔ o chiɛiyo cho nuaa yɛ. Ɔɔ a handu teleŋndo o nyɛ num mapuuloo choo le num loonɔŋndo tuupa mi teleŋ ŋ pɛɛku wo fuuluu.
Hɛli teleŋ bɛnda le numndo. Vɛɛ ŋ tuɛi yɛ pɛɛkoo yeela? Le tamaseliiyo, baa pɛɛkoo le hawɛiyo opilɛ ŋ hiau kɔllo handɔɔ o nyɛ ŋ cho pɛɛkoo wo choo ɔɔ pɛɛkoo le teleŋ biŋgi, kɛ chuɛi chuɛi? A sina bahawɛila numndaŋ nyɛkɛndɛi mbo hiau wana o wana. Lelaŋ, tosa kɛɛsiaa bɛnda a numndo. Te teleŋ ŋ kɛɛsiaa le pɛɛkoo wo fuuluu pɛ ma nɔ iyeema le, naapum a kindiŋ le pɛɛkoo o yɔŋ bɛɛ aa le chemchemndaŋ tɔ kinɛi. O yɔŋ bɛɛ aa chemchemndaŋ tɔ kinɛi ŋ chua le pɛɛkoo ni, keŋ mala num ma pɛɛku sɔɔŋ tau. Naapum te chemchemma tɔ waŋ ma chuu pɛ, a cho yeemɛi nɔ le ma hiou lachi a pɛɛkoo.—Filip. 2:13.
Hɛli suɛi lebolle tuupa ma kandu pɛɛkoo. Te a lo pɛ chumndo haaa mi teleŋ ŋ kɛɛsiaa le pɛɛkoo wo fuuluu malaŋ ŋ kandu yiyaŋndo a nyɛ ŋ cho pɛɛku wo okɔɔ, mɛɛ a cho teleŋ numndo soliŋ kpeku nyɛkɛndɛi le. (Ɛfi. 5:16) Kindiŋ ma poonyiaa o yauwo choo sɔɔŋ lebolluŋ ŋ yeema ma pɛɛku a muŋ okɔɔ woŋ. Le tamaseliiyo, te a nɔ pɛ nyuna ŋ yeema ma sɔla mulioo wo, poonyiaa ndu o yau koŋ choo. Nduyɛ te a chii pɛ pɛɛku kɛ kɛ tosa, naapum a nɔla ma poonyiaa vɛlɛ sɔɔŋ kuluŋ cheleŋ, ŋ yeema ma pɛɛku a muŋ okɔɔ woŋ.
Wa o bɛɛndiaŋ le yɛlɛmiaala yeemaŋ ndaŋ tosaa. Suɛi sɔvɛi cho ni, a nɔ ma wa pɛɛkoo o lɔɔ o lɔɔ bɛŋgu. Le mi keŋ yɔŋnuŋ, te o bɛnda pɛ a tosa yɛlɛmiaa a paale ŋ pɛɛku leŋ okɔɔ, mɛɛ ŋ chua teleŋndo le pɛɛkoo yɛ, vɛlɛ a sɔɔŋ lebolluŋ ŋ pɛɛku woŋ.
Miŋ sɔla tɔnɔɔ te ŋ wa pɛ pɛɛkoo teleŋ o teleŋ. Miŋ sɔɔŋguu Chɛhowa ikɛi kpɛɛluŋ, miŋ tosa sɔɔŋ a taasi, nduyɛ miŋ sɔla kɔl dɛɛniaa.—Chc. 1:8.