Vɛɛ Ŋ Tosa Yɛ Hiouwɔɔ Lachioo o Piɛile Numndeŋ Niŋ?

1-2. (a) Yɛɛ kuuna yɛ naa Chɛhowa dimullo nyɛ cho naa o kɔllo? (b) Vɛɛ naŋ looku yɛ sina maa mi Chɛhowa yaŋ nilaŋ o piɛile naaleŋ?

BAA a yiyaŋ pa maa nyɛ pilɔɔ ŋ dimi o piɛile numndeŋ niŋ teleŋ o teleŋ niŋ ni, nduyɛ a dimul Chɛhowa mɛɛ kpeekpei ŋ cho sinaŋndo yɛ le? Te lende i cho ni, mɛɛ o cho ko num pilɛ le keŋ i yɔŋnuŋ te. Le mɛɛ yoomu naa cho kpɔndi kpɔndi yɛ, lepum ŋ chue teleŋndo tau le piɛileŋ te. Ɔɔ lepum miŋ che ndi i kala le Chɛhowa dimullo nyɛ cho naa o kɔllo niŋndo kanifuule, miŋ yiyaŋ maa ŋ cho wanaa sɔvɛ ndu o hɔl te.

² Baabuiyo ke naa tiindaŋndo maa o cho diomnda naŋ soliŋ kpeku o piɛile naa leŋ niŋndaŋ te la cho la sɔvɛ Chɛhowa o hɔl te, kɛ te nyɛ naŋ cho dimioo wo chɛŋ pɛ naa o kɔllo niŋ di. Mbo yaŋ nilaŋ o “piɛile wanaa tusiaŋnda.” (Sam 10:17) Mbo yaŋ nilaŋ o nyɛ o nyɛ naŋ dimul ndu o piɛileŋ niŋ, kanifuule o nɔ yeemɛi o naa niŋ.—Sam 139:​1-3.

3. Nyunala kuɛɛ naŋ cho yɛ yaasiaa o buŋgɛi hei niŋ?

³ Lepum miŋ nyunaŋ aa: Le yɛɛ naŋ nɔ yɛ miŋ piɛi o Chɛhowa lo a tiindaŋndo? Yɛɛ mala yɛ naa le mi piɛile naaleŋ le chɔɔlu naa sɔɔŋguu Chɛhowa ikɛi kpɛɛluŋ? Vɛɛ yiyaŋndo o sɔɔŋ buɛiyaa Chɛhowaa o paandoo niŋ dimi o piɛileŋ niŋndoŋ mala yɛ naa miŋ tosa hiouwɔɔ lachioo o piɛile naaleŋ niŋ? Nduyɛ yɛɛ naŋ nɔ yɛ miŋ tosa te ŋ che ndi pɛ ikala le Chɛhowa dimullo mɛɛ kpeekpei naŋ cho sinaŋndo yɛ? Ŋ tofaŋndɔ mulilaŋ le nyunalaŋ ndaŋ.

YƆŊ ISIOOŊ LE PIƐILEŊ O CHƐHOWA LO LE

4. Yɛɛ mala naa le Chɛhowa dimullo o piɛileŋ niŋ nyɛ cho naa o kɔllo siooŋii ve naa le? (Sam 119:145)

⁴ Te ŋ bii pɛ bila maa chaaŋ naa chɔm naa lo lechoo wo Chɛhowa cho ni, nduyɛ maa o yeema naa miŋ sɔla batiuwaa, ŋ nɔ niŋ isiooŋ le piɛileŋ o ndu lo le. Mi wana poonyiaa Sam bolle 119 wo kindiŋ le chaŋyɛi waa nuaa nɔɔ a Chɛhowa. Ndoo nɔ bahawɛilaŋ tau o yoomu ndɔɔ niŋ, nduyɛ mi waŋnda dimi choola wɔɔŋndaŋ a ndu okɔɔ. (Sam 119:​23, 69, 78) Lepum vɛlɛ mi ndoo tambu kɔl le biondɔŋnda ndoo tosa laŋ. (Sam 119:5) A koŋ kpou, siooŋii bii ndu le Chɛhowa chɔmndo nyɛ wa ndu o kɔl lo le.—Nuawɔ Sam 119:145.

5. Le yɛɛ naŋ nɔ yɛ miŋ chɛl mi yiyaŋnda wɔɔŋndaŋ la kuuna naa piɛileŋ o Chɛhowa lo le? Chɔmndɔ tamaseliiyo.

⁵ Chɛhowa yeema mi wana o wana piɛi o ndulo, hali wanaa tosa bɛɛ hakila wɔɔŋ wɔɔŋndaŋ nda. (Aisa. 55:​6, 7) Lelaŋ, ŋ nɔ miŋ chɛl mi yiyaŋ wɔɔŋ kɛ kɛ kuuna naa piɛileŋ o Chɛhowa lo le. Le tamaseliiyo, wana kua a dɛndɛ choo wo sina maa o tiuba mbo suukaŋ a wanaa mala le mi dɛndɛla choo laŋ la kuɛ nyɛkɛndɛiya teleŋ o teleŋ o yeema pɛ malaa. Baa o nɔ pa mbo kiisaŋ le mbo nyuna le malaa, le mɛɛ o yeema mi wana sina maa nɛiyo luusiaŋ ndu o hɔl ɔɔ maa o tosa biondɔŋndo yɛ le? Sako! O nɛi pilɛ koŋ choo, te o yɔŋ pɛ miŋ tosa biondɔŋndo, ɔɔ miŋ sina nyɛ naŋ nɔ miŋ tosa wo le, ŋ nɔ miŋ piɛi o Chɛhowa lo a kɔl naa kpou.—Sam 119:​25, 176.

YƐƐ MALA YƐ NAA MI PIƐILE NAALEŊ LE CHƆƆLU NAA SƆŊGUU CHƐHOWA IKƐI KPƐƐLUŊ

6-7. Vɛɛ yiyaŋndo o suliŋnda Chɛhowa laŋ choo mala yɛ naa le mi piɛile naaleŋ le chɔɔlu naa sɔɔŋguu ndu ikɛi? Chɔmndɔ tamaseliiyo. (Tofa vɛlɛ tɛɛsiaa amatou.)

⁶ Te ŋ piɛi pɛ o Chɛhowa lo a kɔllo kpou, miŋ tɛɛsial ndu yiyaŋnda naalaŋ, nduyɛ miŋ chɔm ndu nyɛ cho naa o kɔllo niŋ ndi wo, mi piɛile naaleŋ le chɔɔlu naa sɔɔŋguu ndu ikɛi kpɛɛluŋ. Mɛɛ yɛɛ mala yɛ naa le piɛileŋ o nɛi waa nuaa choo?

⁷ Yiyaŋ o suliŋnda Chɛhowa laŋ choo.a Mɛɛ naŋ hiau lachi fau a yiyaŋndo o suliŋnda ndɔlaŋ choo, lende koni i wa bɛɛŋ le ndu chɔmndo yiyaŋnda naalaŋ a kɔllo kpou ni. (Sam 145:​8, 9, 18) Ŋ yaasiaŋndɔ tamasi Kilisitiŋ ndo, ndepilɛnɔɔ finya ndɔ wa ŋuasu ŋuasu wo. Mbo dimi aa: “I ve ya o ba bɛɛŋ bɛɛŋ le suukaŋndo o Chɛhowa lo maa finya ni le. Mi yiyaŋ maa le mɛɛ ya tosa biondɔŋndaŋ yɛ Chɛhowa hiu niŋ lachi a ya kaalaa le.” O suliŋnda Chɛhowa laŋ tɛɛŋ, o kuɛɛ mala yɛ ndu? Mbo dimi aa: “Mi kaala lo lechoo Chɛhowa wo tosa mi sinaŋ nyɛkɛndɛi. Nduyɛ I sina maa o cho wa ya ikɛi teleŋ o teleŋ le ya malaa. O yoŋ bɛɛ mi tosa biondɔŋndo, o cho hiouwɔɔ lachi a ya kaalaa chɔmndo nduyɛ mbo mala ya. Mi hei mala ya mi chɔm ndu sɔɔŋ nɛŋi ya kɔllo woŋ vɛlɛ a sɔɔŋ tɛɛmbuu ya kɔllo woŋ.”

8-9. Tɔnɔla yɛɛ naŋ sɔla yɛ te ŋ yiyaŋ pɛ a nyɛ naŋ nɔ miŋ dimi wo okɔɔ tuupa miŋ piɛi? Chɔmndɔ tamaseliiyo.

⁸ Yiyaŋ a nyɛ ŋ cho dimi wo okɔɔ. Naapum tuupa ma piɛi, a nyunaŋ num pila nyunalaŋ ndaŋ aa: ‘Bahawɛila kuɛɛ la cho yɛ ya choo suŋ suŋ? Baa wana cho pa o ya nɔ mi mal haki wo? Baa siŋgaŋ sɛnɛi komalla pa o yoomoo niŋ o ya yeema mi Chɛhowa mala ya a ndu wo?’ (2 Ma. 19:​15-19) Ŋ nɔla vɛlɛ miŋ tol nɛi chɔmaa Chiisu yɔŋgu a piɛileŋ okɔɔ wo kɔɔli, te ŋ yiyaŋ pɛ a nyɛ naŋ nɔ miŋ dimi o piɛileŋ niŋ a diola Chɛhowa laŋ, Masale ndɔleŋ, vɛlɛ a hɛnaŋ ndɔɔ okɔɔ wo.—Mat. 6:​9, 10.

⁹ Mɛɛ nda saaluŋ pɔnɔɔ ndepilɛnɔ pilɛ diolaŋ Alisika naa kaŋsɛiyo o hullaŋ niŋ, i wa ndu o ba ikala le mbo piɛi. Mbo dimi aa: “Le mɛɛ ya wa buulaŋndo tau yɛ, i wa bɔɔ ikala ya o ba le mi yaa piɛi.” Yɛɛ mala yɛ ndu? Mbo dimi aa: “Mi chua teleŋ biŋgi le yiyaŋndo a nyɛ ya nɔ mi dimi o piɛileŋ niŋndo choo, le halikpeŋ I kɛsi kɔllo o ya pila choo, ɔɔ bahawɛi pɔnɔ nuu le. Mi hei mala ya le mi kɛsi kɔllo, nduyɛ mi yiyaŋ nyɛkɛndɛi tuupa mi piɛi o Chɛhowa lo.”

10. Le yɛɛ naŋ nɔ yɛ miŋ chua teleŋndo tau le piɛileŋ? (Tofa vɛlɛ fotueilaŋ.)

¹⁰ Chua teleŋndo tau le piɛileŋ. Mi che bɛɛ piɛile biŋgi leŋ le tiuba mi le sɔɔŋguu naa Chɛhowa ikɛi, kɛ te ŋ chua pɛ teleŋndo tau le piɛileŋ o Chɛhowa lo, ŋ tiuba miŋ dimul ndu yiyaŋnda naalaŋ a nyɛ kpeekpei cho naa o kɔllo niŋ di wo.b Mi Ilaacha, pɔnɔɔ Alisika dimi aa: “O paaleŋ niŋ mi piɛi teleŋnda bɔɔ bɔɔ. Nduyɛ le mɛɛ ya chua teleŋndo tau le piɛileŋ o Chɛhowa lo yɛ, mi keŋ tosa mi sɔɔŋguu ndu ikɛi kpɛɛluŋ. Chɛhowa yeema ya mi lau le mi keleŋa piɛile nileŋ chii le, lelaŋ I tiuba mi chua teleŋndo tau te I wa pɛ piɛileŋ o ndu lo.” Tofawɔ nɛi ŋ tosa heiyo: Nuuviaa teleŋndo a fondaŋ doŋdoŋndo le piɛileŋ. A nɔla ma piɛi choo choo, nduyɛ ma kɛsi kpeleŋndo le ndi tosaa teleŋ o teleŋ.

YIYAŊ A MƐƐ BUƐIYAA CHƐHOWAA O PAANDOO NIŊ NDAA PIƐI A KƆL NDAA KPOU YƐ

11. Vɛɛ naŋ sɔla yɛ tɔnɔɔ te ŋ yiyaŋ pɛ a mɛɛ buɛiyaa Chɛhowaa o paandoo niŋ ndaa piɛi a kɔl ndaa kpou yɛ? (Tofa vɛlɛ kɔfoo hoo “Baa Num Bɛɛ Nɔ Pa Bahawɛi Pilɔɔ Maa Nda?”)

¹¹ A tiuba ma sɔla tɔnɔɔ te a yiyaŋ pɛ a nyɛ buɛiyaa Chɛhowaa o paandoo niŋ dimi o piɛileŋ niŋ, vɛlɛ a o chonduŋ nda soli le Chɛhowa saŋgalaa woŋ niŋ. Te a pɛɛku pɛ a mɛɛ buɛiyaa Mɛlɛkaa o paandoo niŋ piɛi ndu a kɔl ndaa kpou yɛ, keŋ cho num nyindɔɔ mi num bɛɛ piɛi Chɛhowa a kɔl numndo kpou. Piɛile ndaleŋ le tiuba mi le mala num ma saaluŋ nɛila sɛnɛila ŋ suliŋ kpeku le Chɛhowa saŋgalaa laŋ. Naapum a nɔla vɛlɛ ma saaluŋ nyɛ buɛiyaa Chɛhowaa apum dimi o piɛileŋ niŋ, o chiɛɛliaŋ a bahawɛi numndo okɔɔ wo.

12. Te a veelu pɛ diomndaŋ o Baabuiyo niŋ a nyɛ buɛi Chɛhowaa opilɛ dimi o piɛileŋ niŋndo okɔɔ, nyunala kuɛɛ ŋ nɔ yɛ ma nyunaŋ?

¹² Te a veelu pɛ diomndaŋ o Baabuiyo niŋ a nyɛ buɛi Chɛhowaa opilɛ dimi o piɛileŋ niŋndo okɔɔ, nyunaŋndɔ aa: ‘Nɛɛ ndoo dimi yɛ diomndaŋ ndaŋ, nduyɛ bahawɛila kuɛɛ la wa yɛ ndu choo? Baa bahawɛila nilaŋ la velaŋ pa a bahawɛila ndoo nɔ laŋ? Yɛɛ piɛile ndɔleŋ le pɛɛku yɛ ya?’ Naapum a nɔ ma chɔɔlu yaasiaa tosa le mulioo sɔlaa le nyunalaŋ ndaŋ. A cho tɔnɔɔ sɔla tau te a kindiŋ pɛ le hei tosaa. Ŋ yaasiaŋndɔ tamaseliilaŋ latiŋ.

13. Te o hiŋ pɛ a piɛileŋ okɔɔ, yɛɛ naŋ pɛɛku yɛ o tamasi Hana wo niŋ? (1 Saamiɛɛ 1:​10, 11) (Tofa vɛlɛ o kɔɔ.)

¹³ Nuawɔ 1 Saamiɛɛ 1:​10, 11. Teleŋ Hana wa piɛileŋ ndeŋ ndo, ndoo nɔ simulta kala kalaŋ latiɔɔŋ. O ve wana vialaa le, nduyɛ diɔɔmu ndɔ wa ndu nyɛpalaa tusioo choo. (1 Sam. 1:​4-7) Te num bɛɛ wa pɛ bahawɛi bii niŋ num paaliaŋndo le teleŋ vilɛiyo chɔulabaa, yɛɛ piɛile Hana leŋ le pɛɛku yɛ num? Mbo sinaŋ nyɛkɛndɛi mɛɛ o chua teleŋndo tau le piɛileŋ o Chɛhowa lo, nduyɛ mbo nyindul ndu bahawɛila ndɔlaŋ. (1 Sam. 1:​12, 18) Naa bɛɛ tiuba miŋ sɔla kɔl dɛɛniaa te ‘wuulul pɛ Chɛhowa kalaŋnda naalaŋ,’ sanaa a ndu dimullo mɛɛ naŋ cho sinaŋndo o kɔllo niŋ a bahawɛila cho naa choo laŋ okɔɔ yɛ.—Sam 55:22.

14. (a) Yɛɛ cheleŋ naŋ pɛɛku yɛ o tamasi Hana wo niŋ? (b) Vɛɛ yiyaŋndo o Diom Mɛlɛkaa choo mala yɛ naa miŋ chɔɔlu sina sɔɔŋ naŋ dimi o piɛile naaleŋ niŋndoŋ? (Tofa tɛɛsiaa amatou.)

¹⁴ Mɛɛ Hana velu poo diolaŋ Saamiɛɛ, wɔsilaŋ latiŋ hiouwɔɔ okoŋ kɔɔli, mbo huŋ a ndu o wana bɛndu wanaa soliaa lasalaa lo Ilai. (1 Sam. 1:​24-28) Mbo mel Chɛhowa balikaa o piɛileŋ niŋ kanifuule, mbo cha maa mbo manda wanaa chɔm lo lechoo wo o ndulo wa, nduyɛ mbo soli bahawɛila ndalaŋ.c (1 Sam. 2:​1, 8, 9) Mi che bɛɛ ndoo nɔ wɔ bahawɛilaŋ o yoomoo niŋ, kɛ mbo handu kɔllo o salala Chɛhowa ndoo dɔu niŋ ndu laŋ choo mbo hiau kɔllo handɔɔ o bahawɛila ndɔlaŋ choo. Yɛɛ hei pɛɛku yɛ naa? Ŋ tiuba miŋ hiou lachi a biuwɔŋndo simulta cho naa komallo laŋ te ŋ handu pɛ kɔllo a mɛɛ Chɛhowa bii niŋ naa tooloo haaa a boondei hei yɛ.

15. Te a tosal naa pɛ kafalaŋ, yɛɛ naŋ pɛɛku yɛ o piɛile Chɛluimaya leŋ niŋ wana ndoo suaa le Mɛlɛka wo? (Chɛluimaya 12:1)

¹⁵ Nuawɔ Chɛluimaya 12:1. A teleŋ pilɛ o yoomu ndɔɔ niŋ, mi Chɛluimaya wana ndoo suaa le Mɛlɛka wo tambu kɔl le mɛɛ o wa chɔɔ wanaa dɛnɛwɔɔŋnda batiuwaa sɔlaa yɛ. Teleŋnda bɔɔbɔɔ mi ndoo tambu kɔl le mɛɛ chaaŋaa nduaa Isɔluɛiya wa ndu biyɔɔ wɔɔŋndo yɛ. (Chɛl. 20:​7, 8) Naa bɛɛ miŋ sinaŋ maa ndu te ŋ che wanaa lakafaa batiuwaa sɔlaa o yoomu ndaa niŋ, ɔɔ ma bii naa biyɔɔ wɔɔŋndo. Mi che bɛɛ mi Chɛluimaya dimul Chɛhowa sɔɔŋ wa ndu kɔllo tɛɛmbuuwo woŋ, kɛ o bii ndu tɔɔyaŋ le sɔɔŋ wɔɔŋ wa yɔŋnɔŋndo woŋ te. Mɛɛ o che Chɛhowa wanaa nila kaluaa miŋgioo o nɛi, naapum mi tiindaŋ ndɔɔ o yamaŋ Mɛlɛka kialu o nɛi sakpoo choo woŋ chɔɔlu kalu. (Chɛl. 32:19) Naa bɛɛ tiuba miŋ dimul Chɛhowa kpendekele kɔl naa tambɛiyo o piɛileŋ niŋ. Nduyɛ ŋ nɔ tiindaŋndo o ndu niŋ maa o cho hunɔɔ kafala cho naa choo laŋ faŋa a teleŋ bɛnda wo.

16. Yɛɛ naŋ pɛɛku yɛ o tamasi po Livainɔ wa o biyɔɔ niŋndo o ba, te bahawɛila naalaŋ la kuuna naa pɛ sɔɔŋ ŋpum tosaa? (Sam 42:​1-4) (Tofa vɛlɛ fotueilaŋ.)

¹⁶ Nuawɔ Sam 42:​1-4. Livainɔ wa o biyɔɔ niŋndo poonyiaa bolle Baabuileŋ ndeŋ ni, nduyɛ ndoo tiuba kɔlaŋ o chiɛi Mɛlɛkaa niŋ le Mɛlɛka piɛiyo a chaaŋaa nduaa Isɔluɛiya le. Bolle Baabuile ndoo poonyiaa leŋ ndeŋ le chɔm kpendekele mɛɛ o wa sinaŋndo yɛ. Naapum miŋ sinaŋ mɛɛ o wa sinaŋndo yɛ te a dɔu naa pɛ o chiɛi manyumndo niŋ, ɔɔ mi dialii nɛyɛi kala kalɛi kuuna naa kɔlaŋ inɛ ve wa naa choo. I cho tonya maa teleŋndaŋ lapum miŋ sinaŋ nyɛkɛndɛi, lepum yɛ miŋ tambu kɔl. Kɛ i wa bɔɔ suɛi sɔvɛ le miŋ chɔm Chɛhowa mɛɛ naŋ cho sinaŋndo yɛ o piɛileŋ niŋ. Hei nɔla mi mala naa miŋ mɛɛndaŋ yiyaŋnda naalaŋ nyɛkɛndɛi, nduyɛ miŋ handu kɔllo o nyɛ hiou wa o sɔvɛ wo choo. Le tamaseliiyo, mi po Livainɔ hoo bii bila maa o cho hunɔɔ dilakeŋnaŋnda sɛnɛila sɔla le Chɛhowa saŋgalaa. (Sam 42:5) Mbo yiyaŋ vɛlɛ a mɛɛ Chɛhowa wa ndu mandaa yɛ okɔɔ. (Sam 42:8) Mi piɛileŋ o Mɛlɛka lo a kɔllo kpou mala naa le biyɔɔ bila mɛɛ naŋ sinaŋ lepum yɛ, miŋ miiŋgu nyaaloo sɔla, nduyɛ a yoomuaŋ le hiouwɔ lachi a biuwɔŋndo.

17. (a) Yɛɛ naŋ pɛɛku yɛ o piɛile Chona leŋ niŋ, wana ndoo suaa le Mɛlɛka wo? (Chona 2:​1, 2) (b) Vɛɛ diomnda cho o yau Sam ndo niŋndaŋ la mala yɛ naa te ŋ wa pɛ o simullo bɛŋgu? (Tofa tɛɛsiaa amatou.)

¹⁷ Nuawɔ Chona 2:​1, 2. Suu bɛndoo o dembe Chona, wana ndoo suaa le Mɛlɛka wo dimi diomndaŋ ndaŋ o Chɛhowa lo ni. Mi che bɛɛ mi Chona ndoo kɛɛ le diikɔŋndo, kɛ ndoo nɔ tiindaŋndo maa Mɛlɛka cho piɛile ndɔleŋ muli. O piɛile ndɔleŋ niŋ, mi Chona soliŋ diomnda bɔɔbɔɔ naŋ saaluŋ o yau Sam ndo niŋndaŋ kpeku.d Ndoo kɛɛ dɔɔ yau Sam ndo sina nyɛkɛndɛi le. Mi yiyaŋndo o diomnda laŋ choo ke ndu tiindaŋndo maa Chɛhowa wa ndu mala. O nɛi pilɛ koŋ choo, te ŋ kindiŋ pɛ le bolii Baabuiye ipum loonɔŋndo, mi i luei naa yoomuaŋ te ŋ piɛi pɛ o Chɛhowa lo o teleŋnda kala kalalaŋ niŋ.

HIOU LACHI A CHƐHOWA SƆƆŊGUUWO IKƐI KPƐƐLUŊ O PIƐILEŊ NIŊ

18-19. Te ŋ che ndi pɛ lepum ikala le Chɛhowa dimullo nyɛ cho naa o kɔl o piɛileŋ niŋndo, tiindaŋ yɛɛ Luomaŋnda 8:​26, 27 ke yɛ naa? Chɔmndɔ tamaseliiyo.

¹⁸ Nuawɔ Luomaŋnda 8:​26, 27. Le mɛɛ naŋ wa o buulaŋ bɛndoo niŋ yɛ, lepum miŋ che ndi ikala le Chɛhowa tɛɛsiallo mɛɛ naŋ cho sinaŋndo yɛ. Kɛ ŋ nɔ miŋ yiyaŋ maa ŋ nɔ wana mala le le. A teleŋnda waa nuaa, mi nyina diandaa Mɛlɛkaa “nyɔɔlu” le naa. Vɛɛ keŋ yɔŋnuŋ yɛ? Sanaa a nyina ndɔ diandaa, mi Chɛhowa tosa a sabu ma poonyiaa o Diom ndɔɔ niŋ nyɛ buɛiyaa nduaa o paandoo niŋ dimi o piɛileŋ niŋndo. Te ŋ che ndi pɛ ikala le Chɛhowa chɔmndo mɛɛ kpeekpei naŋ cho sinaŋndo yɛ, Chɛhowa tiuba mbo che nyɛ buɛiyaa nduaa o sindɔɔ niŋ dimi o piɛileŋ niŋndo maa nyɛ naŋ yeema dimioo o piɛile naaleŋ niŋndo o cho ni, okoŋ mbo muli naa diom.

¹⁹ Mi hei sinaa mala ndepilɛnɔɔ o Lɔɔsiaa niŋ diolaŋ Yelena. Ma bii ndu le mɛɛ o wa piɛileŋ a diomndaŋ veeloo o Baabuiyo niŋ yɛ. Mi keŋ tosa mbo buulaŋ tau tau, nduyɛ i wa ndu o ba ikala le piɛileŋ o Chɛhowa lo. Mbo dimi aa: “Okoŋ, mi loonuŋ maa te I hiu pɛ buulaŋndo nduyɛ mi sina nyɛ ya piɛi le ndu wo le, mi Chɛhowa che nyɛ buɛiyaa nduaa o sindɔɔ niŋ nyuna o piɛileŋ niŋndo maa nyɛ yaa yeema le ndu dimullo o piɛileŋ nileŋ niŋndo o cho ni. Hei wa bɔɔ suɛi kɔl dɛɛniaa le ya o teleŋ kala kala koŋ bɛŋgu.”

20. Vɛɛ naŋ bɛɛndiaa yɛ kɔl naa le piɛileŋ te ŋ wa pɛ o nyɛ kindilaa bɛŋgu?

²⁰ Te ŋ wa pɛ o nyɛ kindilaa bɛŋgu, mi i wa ikala le kɔllo handɔɔ o nyɛ naŋ cho piɛileŋ a ndu okɔɔ wo choo. Le kɔl naa bɛɛndiaa, ŋ tiuba miŋ yaŋ nilaŋ o diomnda nda chua le yau Sam ndo laŋ. Ŋ tiu vɛlɛ ba miŋ poonyiaa mɛɛ naŋ cho sinaŋndo yɛ o yau choo, mɛɛ Masaa Deeve ndoo tosa yɛ. (Sam 18, 34, 142; diomnda taselaŋ.) I cho tonya maa sawa kpeekpei cho a mɛɛ naŋ nɔ miŋ bɛɛndiaŋ tuupa miŋ piɛi yɛ le. (Sam 141:2) A tiuba ma tosa nyɛ bɛnda le numndo.

21. Le yɛɛ naŋ nɔ yɛ miŋ piɛi o Chɛhowa lo a kɔl naa kpou?

²¹ I cho bɔɔ suɛi kɔl dɛɛniaa le sinaa maa mi Chɛhowa bii bila mɛɛ naŋ sinaŋ yɛ tuupa miŋ piɛi o ndu lo. (Sam 139:4) A koŋ kpou, mbo wa a kɔl kɛndɛ le naa nilaŋ yaŋɔɔ te ŋ dɔu pɛ tiindaŋndo o ndu niŋ, nduyɛ miŋ dimul ndu mɛɛ naŋ cho sinaŋndo yɛ. Lelaŋ, kiisaŋ wa num le piɛileŋ o finya num cho o choo choo niŋndo lo le. Pɛɛku a sɔɔŋ buɛiyaa nduaa piɛi a muŋ okɔɔ woŋ o Baabuiyo niŋ le sinaa nyɛ ŋ nɔla ma dimi o piɛile numndeŋ niŋndo. Piɛi a kɔl numndo kpou. Dimul ndu o piɛileŋ niŋ nyɛ tosa num ma wa a kɔl kɛndɛ wo, a nyɛ tɛɛmbuu num kɔllo wo. Chɛhowa cho wa teleŋ o teleŋ a num latulu maa chaaŋ num kpeekpeiyo.