Mɛɛ Ŋ Tosa Pɛɛku Baabui Numndo Nyɛkɛndɛi Nduyɛ Ma Tuei Ndu Yeela Yɛ

Chɔɔsuaa cho diomndaŋ veeloo o Yau laSawaa niŋ; chiɛilaŋ kpou la koombiaa Chɛluiko nduyɛ chiɛi Luehabi wo cho isisi; Chɔɔsuaa cho balaŋ heeloo choo choo o piɛileŋ niŋ

CHƆƆSUAA ndoo nɔ mbo sim kaaleŋ Isɔluɛi lachi le kɔlaŋ o Lɛŋnde Mɛyaaleŋ niŋ. Hei ve wa suɛi kpɛdɛ le. Kɛ, mi Chɛhowa luei ndu yoomuaŋ nduyɛ mbo dɛɛniaa ndu aa, “Num nɔ kɔl simulaa tuŋ, nduyɛ ma vesa hɔlla.” Mbo dimul Chɔɔsuaa maa te o veelu pɛ diomndaŋ o Yau Sawaa niŋ nduyɛ mbo diikuŋ ndu, mɛɛ o cho kɛɛsiaalaŋ tosa a taasi nduyɛ mbo sɔla batiuwaa.—Chɔɔsuaa 1:7, 8.

O teleŋ “nyɛ palaa” niŋ naŋ cho ni. Lelaŋ, sɔɔŋ palaŋ nɔ miŋ wa o yoomu naa niŋ. (Timoti Diiŋ Ndɔɔ 3:1) Te ŋ yeema pɛ miŋ sɔla batiuwaa maa Chɔɔsuaa, ŋ nɔ miŋ tol sila Chɛhowa ke ndu wo kɔɔli. Ŋ nɔ miŋ veelu diomndaŋ o Baabuiyo niŋ lɔɔlɔɔ, nduyɛ miŋ soliŋ nyɛ naŋ pɛɛku wo kpeku le kɛɛsiaala kɛndɛlaŋ tosaa.

Kɛ naa pumnda sina lepum mɛɛ naŋ nɔ miŋ pɛɛku yɛ le, ɔɔ ŋ tui pɛɛkoo yeela lepum te. Kɛ pɛɛkɔŋ ipilayaa cho bɔɔ nyɛ sɔvɛ. Te a wa kɔfu nɔ suɛi lebolle “Kindiŋ Ma Tol Kɛɛsiaalaŋ Ndaŋ Kɔɔli” wo nuaa pɛ, a cho sɔɔŋ saalɔŋ, ŋ cho num mala le tɔnɔɔ sɔlaa o pɛɛku numndo niŋ nduyɛ ma chɔɔlu ndu tueiyɔɔ yeela wo.

Mi wana ŋchondoo dimi aa, “Pɛɛkula Mɛlɛka Yaawɛɛlaŋ la cho sanaa. La ke wana kɔl kɛndɔɔ.” (Sam 19:8) Num bɛɛ nɔla ma tuei Diom Mɛlɛkaa pɛɛkoo yeela. A cho saalɔŋ sɔɔŋ kɛndɛŋ bɔɔbɔɔ te a hiou pɛ lachi a Baabuiyo pɛɛkoo.

Mi che bɛɛ a nɔ ma sim kaaleŋ lachi maa Chɔɔsuaa le, kɛ a nɔ simultaŋ la numndaŋ. Lelaŋ, maa Chɔɔsuaa, pɛɛku nduyɛ ma diikuŋ Diom Mɛlɛkaa. Te a tosa keŋ pɛ, a cho kɛɛsiaalaŋ tosa a taasi nduyɛ ma sɔla batiuwaa.

KINDIŊ MA TOL KƐƐSIAALAŊ NDAŊ KƆƆLI

Piɛi fɛŋ tuupa ma kandu pɛɛkoo. Yiyaŋnda Chɛhowalaŋ la cho o Baabuiyo niŋ ni. Nduyɛ la poonyiaŋ le tɔnɔ numndo. Lelaŋ te a wa pɛ diomndaŋ veeloo o Baabuiyo niŋ, nyuna Chɛhowa le mbo mala num ma bii bila nyɛ ŋ cho diomndaŋ veeloo wo, ma loonuŋ ndu, nduyɛ ma soliŋ ndu kpeku le ma tosa kɛɛsiaala kɛndɛlaŋ o yoomu numndo niŋ.—Ɛsilua 7:10.
Nyuuniaŋ numpila te a wa pɛ diomndaŋ veeloo o Baabuiyo niŋ ɔɔ yaula soo a Baabuiyo okɔɔ laŋ. Le taamaseliiyo, ‘Yɛɛ Buŋgɛi hei cho yɛ ya pɛɛkoo a Chɛhowa okɔɔ? Vɛɛ hei velaŋ yɛ a suɛi lebolii Baabuiyo? Vɛɛ ya soliŋ yɛ sɔɔŋ muŋ kpeku le acheleŋnda malaa?’
Yiyaŋ o nyɛ ŋ cho pɛɛkoo wo choo. Simndɔ kpɛ le teleŋ biŋgi, nduyɛ ma yiyaŋ a nyɛ ŋ veelu diomndaŋndo okɔɔ. Nyunaŋndɔ aa, ‘Yiyaŋ yɛɛ hei cho yɛ ya kioo? Le yɛɛ o ke yɛ ya yiyaŋ koŋ? Vɛɛ hei vellɛ nyɛ yɔŋnuŋ niŋ ya paandu wo, nyɛ cho ya yɔŋnɔŋndo suŋ suŋndo, ɔɔ nyɛ cho ya yɔŋnɔŋ o chilaŋ niŋndo? Vɛɛ ya duau yɛ sawala mandaala Baabuilaŋ ndaŋ ɔɔ silala ndɔlaŋ ndaŋ o wali niŋ?’ (Choobu 23:5; Sam 49:3) Te a wa pɛ yiyaŋndo, kindiŋ ma tɛɛsiaa le sabu Chɛhowa dimul wanaa nduaa le sɔɔŋ pum kpakpala wo. Ɔɔ yiyaŋ a fulamakɔɔlila wɔɔŋndaŋ, te wana ŋ wa diomndaŋ veeloo a ndu okɔɔ wo ndoo tosa pɛ sɔɔŋ o nɛi cheleŋ choo.—Ditɔnɔmii 32:28, 29.
Soliŋ yiyaŋ numndo kpeku te a wa pɛ diomndaŋ veeloo. Le taamaseliiyo, a nɔla pa ma yiyaŋ a nyɛ yɔŋnuŋ Choosɛ teleŋ bɛnduaa nduaa pisi ndu Isimaliiya o ba wo? (Chɛnɛsee 37:18-28) Yɛɛ ŋ cho yɛ chɔɔ, tueiyɔɔ, a chuŋndo tueiyɔɔ? Sim ndɔ o foofo wanaa kaŋ. Yɛɛ nda wa yɛ yiyaŋndo nduyɛ ma wa sinaŋndo? Te a soliŋ pɛ yiyaŋ numndo kpeku, a tiuba ma sɔla tɔnɔɔ tau o pɛɛku numndo niŋ.
Soliŋ nyɛm pɛɛkaŋ kɔɔnaa toosiaa woŋ kpeku. Ŋ nɔla miŋ mala num le yaasiaa tosaa nyɛkɛndɛi. Pɛɛku le nyɛm cho o suɛi maŋgalɛi numnde niŋndo soliŋndo kpeku, o Intanɛtiiyo choo, a yaulaŋ. Kiisaŋ le acheleŋnda nyunaa le ma mala num le pɛɛkoo mɛɛ ŋ soliŋ nyɔɔŋ muŋ kpeku nyɛkɛndɛi yɛ le. Le taamaseliiyo, Yau Yaasiaa ŋSɔɔ le Seiyaa Chɛhowaa cho num mala le saalɔŋndo nyɛ nda poonyiaa a sɔɔŋ lebolloŋ ŋpum okɔɔ woŋ. Soliŋ Yau Mala Naa le Diom Mɛlɛkaa Pɛɛkoo Wo kpeku. Yauwo hoo nɔ yooŋgula sɔvɛlaŋ le fondalaŋ sinaa, mɛɛ sɔɔŋ yɔŋnuŋ o lepula yɛ, mɛɛ ndaa tuu nyɔɔŋ yɛ, a sɔɔŋ cheleŋ.
Miŋgi sondoo o sɔɔŋ kulloŋ choo. Keŋ cho num mala ma loonuŋ nyɛ ŋ pɛɛku wo. Nyɛ bɛnda vɛlɛ tosaa wo cho acheleŋnda dimullo a nyɛ ŋ pɛɛku wo okɔɔ ni. Nyɛ cho pa, o ŋ tiuba ma soliŋ kpeku o wali pollo niŋndo? Te a tosa pɛ sɔɔŋ muŋ, a cho sɔɔŋ kulloŋ loonɔŋ, nduyɛ mi acheleŋnda bɛɛ sɔla tɔnɔɔ o nyɛ ŋ pɛɛku wo niŋ.