Teleŋ Kuɛɛ Sɔŋgɔlaŋ la Cho yɛ Mɛɛlu?—⁠Yɛɛ Baabuiyo Dimi Yɛ?

Le mɛɛ waŋnda Ilaŋ kɔ del waŋnda Isɔluɛi choo a sɔŋgɔɔ o Ndaamaa Nyaakuɛiyo 13 2024 yɛ, lelaŋ Antonioo Gutɛɛli wana poonyiaa le UN dimi ni aa: “Teleŋndo fuuluu hoo ni, le miŋ yɛlɛmiaa sɔɔŋ tiŋ vɛlɛ a kpundɛla cho yɔŋnɔŋndo laŋ.”

Sɔŋgɔ la cho Eesia Ba Paaleŋ le del lo laŋ la cho chɔmndo mɛɛ sɔŋgɔlaŋ la cho yɔŋnɔŋndo chieeŋndo balɔɔ silɔ yɛ.

“Sɔŋgɔlaŋ la cho hiouwɔɔ lachi a kuiyo o chieeŋndo choo mbo hiau maa paandu. Nduyɛ chɔŋ niŋ a Chɔu Chieeŋ Diiŋ Ndɔɔ, waŋnda biiliɔŋndaŋ la tiɔɔŋ cho hau saŋgaa o chɔulaŋ ndaŋ niŋ ni.”—United Nations Security Council, Tɛɛkpaa 26, 2023

Lɛŋii chɔulaŋ ndaŋ la cho niŋnde i tiŋ cho hei ni, Isɔluɛi, Kaasa, Siiliaa, Asabachaŋ, Yukileŋ, Itoopiaa, Nichia, Mayama a Heti. a

Teleŋ kuɛɛ sɔŋgɔlaŋ la cho yɛ mɛɛlu? Baa simlachiaa o chieeŋndo hoo niŋ tui pa ba ma hiŋ a kɔl nyuloo? Yɛɛ Baabuiyo dimi yɛ?

Chieeŋ la chɔuwo

Sɔŋgɔ la cho hau o chieeŋndo choo laŋ la cho chɔmndo maa mɛɛlulaŋ la cho niŋ kpɛɛluŋ. Nduyɛ sɔŋgɔlaŋ ndaŋ la cho huului Baabuiyo dimi a palɛi nɛi hei okɔɔ ve peeloo. Mi Baabuiyo dimi maa “mɛɛlula chieeŋndo hoo la fuuluu.”—Maatiu 24:​3.

• Lɛŋndeŋ le cho sɔŋga a lɛŋndeŋ, mi masaleŋ le sɔŋga a masaleŋ.” —Maatiu 24:​6, 7.

Veelu diomndaŋ o suɛi lebolle hei bɛŋgu “Sɔɔŋ Kuɛɛ Chɔm yɛ Maa ŋ Cho Niŋ o Palɛi Mɛɛlɛi Niŋ?” le sinaa mɛɛ huuluŋ Baabuiyoŋ cho hau peeluŋndoŋ yɛ.

Chɔu cho chɔulaŋ kpou chiiyo

Baabuiyo chɔm mɛɛ sɔŋgɔlaŋ la cho mɛɛlu yɛ. Vɛɛ hei cho yɛ looku yɔŋnɔŋ? O cho a kpaaya waŋchieeya le kɛ a chɔu Amakɛdɔŋ ndo, “chɔu nɔ le yɔŋnɔŋndo o paale Mɛlɛka Kpaaya Kpou Kpou Wo choo wo.” (Sɔɔŋ Chɔɔmaŋndoŋ 16:​14, 16) Chɔuwo hoo cho nɛiyo kumbi ni, le mi Mɛlɛka peelu buŋgaŋ o chuel waŋchieeya le kɔl nyuloo fafɛɛŋndo tueiyɔɔ yeela woŋ. —Sam 37:​10, 11, 29.

Le ma chɔɔlu sina a chɔu Mɛlɛka cho soliŋ kpeku le chɔulaŋ chiiyo wo, veelu diomndaŋ o suɛi lebolle hei bɛŋgu “Yɛɛ Cho yɛ Chɔu Amakɛdɔŋ Ndo?”