Top left: Marek M. Berezowski/Anadolu Agency via Getty Images; bottom left: Halfpoint Images/Moment via Getty Images; center: Zhai Yujia/China News Service/VCG via Getty Images; top right: Ismail Sen/Anadolu Agency via Getty Images; bottom right: E+/taseffski/via Getty Images
LA WA LAHƆL!
2023: Wɔsi Tosa Mi Wanaa Bɔɔbɔɔ Wa Buulaŋ Ndo Wo—Yɛɛ Baabuiyo Dimi Yɛ?
A wɔsi 2023, sɔɔŋ yɔŋnuŋ o wɔsioo hoo niŋndoŋ chieeŋndo balɔɔ silɔ chɔm maa ŋ cho niŋ o palɛi Baabuiyo soo a ndi okɔɔ ve niŋ, ndi cho yɛ “palɛi mɛɛlɛi” ni. (2 Timoti 3:1) Tofa wɔ sɔɔŋ cho yɔŋnuŋndo suŋ suŋndo, ma che mɛɛ ŋ velaŋ a ŋ Baabuiyo dimi maa ŋ cho wa yɔŋnuŋndo o teleŋ naa hoo niŋ yɛ.
Baabuiyo a sɔɔŋ cho yɔŋnɔŋndo chieeŋndo balɔɔ silɔ wo
“La tuɛi niŋ a chɔulaŋ okɔɔ, vɛlɛ a konala chɔulaŋ.”—Maatiu 24:6.
“O foŋndaŋ ndaŋ lapum o chieeŋndo choo delɔɔla choolaŋ la choo hiouwɔɔ lachi a kuiyo mbo hiau ma paandu.”a
Tofa suɛi lebolle hei “Nɛɛ Cho yɛ Wanaa Kue o Chɔu le Wa Chiindiaa?” a “Waŋnda Cho Nyɛsɔlaa Pisioo Le Nyɛm Chɔuwoŋ Toosiaa le Teeliɔŋndaŋ La $2.”
“Lɛŋnde nyiiyaaleŋ le wa niŋ o fondaŋnda bɔɔbɔɔ.”—Maki 13:8.
“Chɔŋ niŋ a wɔsii 2023, lɛŋii nyiiyɛi 13 yɔŋnuŋ niŋ chieeŋndo balɔɔ silɔ ni. Nduyɛ i ŋɔmmɛu hiou le wɔu chɔŋ niŋ a teleŋ naŋ kandu konaa hoo kɛsioo wo.”b
Tofa suɛi lebolle hei “Mi lɛŋnde nyiiyaa le wɔɔŋ wɔɔŋndeŋ le yɔŋnuŋ o lɛŋnde Tɔki a Siliaa leŋ niŋ.”
“Sɔɔŋ ŋsiooŋndoŋ.”—Luku 21:11.
“Teleŋ chieeŋndo wa tuuloo wo chuu, kɛ teleŋ chieeŋndo cho ŋolɔɔ wo fuuluu”—A mɛɛ António Gutɛlis wana poonyiaa le UN dimi yɛ.c
Tofa suɛi lebolle hei “Tuulu Bɛndu Chieeŋndo Cho Niŋ Chɔŋ Niŋ A Wɔsi 2023 wo.”
“Yima bɛnduaŋ ma del niŋ.”—Maatiu 24:7.
“2023 wa wɔsi wanaa bɔɔbɔɔ wa buulaŋndo a mɛɛ nda ke niŋ yuŋgu ndaa nyɛm nda hauba woŋ yɛ.”d
Tofa suɛi lebolle hei “Chɔulaŋ a Chieeŋ Cho Siŋgaŋndo wo Tosa ni mi Yiaŋ Ma Wa Chieeŋndo Balɔɔ Silɔ.”
“Nyɔɔ kiandu niŋ bɔɔ”—2 Timoti 3:1.
“Te a chɔm pɛ wanaa ŋɔmaa o chieeŋndo choo wana pilɛ o nda tɛɛŋ cho saŋgaa a naa mahullo.”e
Tofa suɛi lebolle hei “Feleŋguaa Cho Hau Naa Mahullo Sɔlaa wa Okɔɔ.”
Yɛɛ naŋ cho yɛ kɔl ma o cho yɔŋnɔŋ a wɔsi 2024?
Wana o wana tiuba mbo dimi nyɛ cho yɔŋnɔŋ a wɔsi 2024 wo le. Kɛ sɔɔŋ cho yɔŋnuŋndo woŋ cho chɔmndo maa Masale Mɛlɛkaleŋ le cho niŋ kpɛɛluŋ, nduyɛ maa le cho suŋ masale waŋchieeya tɛɛmbuu, okoŋ mi le chii saŋgala kɛ kɛ waŋchieeya cho hau laŋ.—Daaniɛɛ 2:44; Sɔɔŋ Chɔɔmaŋndoŋ 21:4.
Kɛ tuupa mi teleŋ koŋ fuuluu, te o yɔŋ pɛ miŋ kandu buulaŋndo, o bɛnda miŋ tiindaŋ Mɛlɛka le naa malaa. Baabuiyo dimi aa:
“Te siooŋnde bii ya pɛ, num ya I tiindaŋ le ya malaa ni.”—Sam 56:3.
Vɛɛ naŋ chɔm yɛ maa ŋ tiindaŋ Mɛlɛka? Ŋ cho num dɛɛniaa le ma pɛɛku a diomnde mɛyaale Baabuiyo dimi maa, teleŋ cho fuuluu mi saŋgaa chuu wo okɔɔ. Kindiŋ ma nyuna le pɛɛku Baabui ŋ paawa nyɛ o nyɛ le wo. Pɛɛkoo hoo cho num a yuŋgu num ndo malaa le mi la sina tɔnɔ cho o diomnde mɛyaale Baabuiyo dimi leŋ ndeŋ niŋndo
a Foreign Affairs, “Chɔulaŋ o Chieeŋndo Niŋ Hau: Yɛɛ Cho yɛ Sɔɔŋ Wɔɔŋ Cho Hau Yɔŋnɔŋndo o Chieeŋndo Niŋndoŋ Kɔɔli?” Lende Imma Bɛla nda Pitɛ Salibula nyuna ni, Saa 30, 2023.
b Konaa a Lɛŋnde Nyiiyaaleŋ Okɔɔ, “Wɔsi 2023: A Mɛɛ Konaa Dimi yɛ Lɛŋii Nyiiyɛi Wɔɔŋ Wɔɔŋnde nɔ le Yɔŋnɔŋndo,” Bukuloo, 2023.
c UN, “Diomnda wanaa poonyiaa kandu suɛi laŋ a teleŋ nda bii bɔŋaŋ bɛndoo a chieeŋ cho siŋgaŋndo okɔɔ wo,” Suɛɛsɔɔ 27, 2023.
d Kɔɔna Chieeŋ Cho a Nyɛdiaa Piɔuwo Okɔɔ Wo, “Nyɛdiaa Lepɛŋndo Chieeŋndo Balɔɔ Silɔ.”
e Kɔɔna Chieeŋ Cho a Kɛndiaa Okɔɔ, “Paale Waŋnda Suaa a Naa Mahullo Okɔɔ Leŋ 2023,” Saa 10, 2023.