La Mala Pa Wanaa Nyɛpalaa Del Choo Wa?

Ei, Seiyaa Chɛhowaa mala wanaa nyɛpalaa del choo wa. Ŋ yɔŋgu mala yɔŋaa hoo le Seiyaa Chɛhowaa a wanaa cho Seiyaa Chɛhowaa le wa. Nyɛ Baabuiyo dimi wo naŋ cho tolɔɔ kɔɔli ni. Mi Baabuiyo dimul naa o Kaleesiaŋnda 6:10 niŋ aa, “boondii na ŋ nɔ hei fondaa ve, ŋ tosaŋ tonyaa naa waŋnda chua, taama chaaŋaa naa wanaa laalaŋnda.” Nyɛ wanaa nyɛpalaa del cho wo yeema wo cho nda kɔltaŋ dɛɛniaa a suɛi Mɛlɛkɛi ni. Lelaŋ, ŋ kindiŋ le nda kɔltaŋ dɛɛniaa a Diom Mɛlɛka wo o boondii kpundɛi keŋ niŋ.—Kɔliŋtiaŋ Diiŋ Ndɔɔ 1:3, 4.

Kɔɔnaa

Te nyɛpalaa chuu pɛ yɔŋnɔŋ, wanaa chua chilaŋ o kundalaŋ niŋnda kuɛ naa nyɛpalaa koŋ yɔŋnuŋ nda le ma sina te chaaŋaa naa laalaŋnda cho pɛ kɛndɛ, okoŋ ma sina mala nda yeema wo. Te wanaa chua chilaŋnda kɔ chii pɛ mɛɛŋndaŋ, a dɔunuŋ kona a mala tase nda yɔŋgu wo okɔɔ o lɛuvii Seiyaa Chɛhowaa lo.

Te o yɔŋ pɛ aa nyɛpalaa hoo hiou mɛɛ kundalaŋ o tanda koŋ niŋ la nɔla malaa yɛ, Dialii Kuumbaŋ Choo Seiyaa Chɛhowaa luei balaŋ le yɔŋgoo malaa le wanaa nyɛpalaa hoo del choo wa. Teleŋ yima bɛŋndaŋ ma del sindɛ wo, lende koni chaaŋaa laalaŋnda maaliaŋ vellaa velle ni. (Kɔliŋtiaŋ Tasoo 16:1-4) Lɛuvii Seiyaa Chɛhowaa cho o lɛŋnde leŋ niŋnde tiuba ma hɛli waŋnda le wanaa nyɛpalaa del choo wa nyɔŋ muŋ piɔuwo. Seiyaa Chɛhowaa cho o fondaŋ nda cheleŋ ndaŋ bɛɛ soliŋ teleŋ ndaa, yoomuma ndaŋ a nyɛsɔlaa ndaa kpeku le balaŋ sɔɔŋguu wo.—Talelaŋ 17:17.

Nyɛsɔlaa

Nɛiyo o pilɛ o naŋ soliŋ tooloo kpeku o nda yɔŋ o lɛuvuŋ Seiyaa Chɛhowaa woŋ cho le wanaa nyɛpalaa del choo wa malaa ni. (Walta Wanaa Chiisuaa 11:27-30; Kɔliŋtiaŋ Diiŋ Ndɔɔ 8:13-15) Baala o baala tosaŋ, ŋ paawa wanaa yɔŋguŋ le ndu tosaa wa le. O hei niŋ, ŋ soliŋ nyɛsɔlaa sɔlaŋ ndo kpeku le chaaŋaa naa laalaŋnda malaa, o cho le wanaa cho baalaa tosaa wa le. Toolu o toolu sɔlaŋ pɛ, mandaŋndo pila naŋ mandaŋ a ndu ni.—Kɔliŋtiaŋ Diiŋ Ndɔɔ 8:20.