Ŋ WAŊNUŊ MAA ŊKILISIƆŊ
Vɛɛ Naŋ Yɔŋgu yɛ Malaa te Kpundɔɔ Komal pɛ Puaapiliaa a Ndepiliaa Naa?
Kpundɛlaŋ la cho niŋ bɔɔ yɔŋnɔŋndo o palɛi nɛi hei niŋ. Te kpundɔɔ del pɛ mɛɛ mi sɔɔŋ kɔɔnaŋ nyɛkɛndɛi le mala yeemaŋndo yɔŋgoo. Le sabu koŋ Dialii Kuumbaŋ Choo Ve tosa kɛɛsiaa ni, le ma kila Kunda Kɔɔna Sɔɔŋ le Wanaa Kpundɔɔ Komalla o lɛuvii kɛ kɛ bɛŋgu.
Te puaapiliaa cho o kundaa hoo choo wa sina pɛ maa kpundɔɔ del, o lepilɛ niŋ kpe a veelu bɛnduaa kundaa le ma sina mala wanaa dimiaa yooŋgu kɛndiaa yeema wo. Te o yɔŋ pɛ maa kpundɛ yɔŋnuŋ koŋ ndo, wanaa dimiaa yooŋgu kɛndiaa cho loŋ nda nɔla bahawɛi koŋ solioo a ba nda le, lɛuve cho puaapiliaa suliŋ nda hɛli le chilaŋ chuaa le wali koŋ tosaa. Mi puaapiliaa haa nyuna lepum le wanaa malaa ɔɔ ma nyuna le nyɛm kpeekpei yeemaŋ ndoŋ. Lepum yɛ ma pendu o tanda koŋ niŋ nyɛm puaapiliaa hau ba woŋ okoŋ ma piɔu nda muŋ.
Fulamakɔɔlila kɛndɛlaŋ la cho tau te ŋ bii pɛ sɔɔŋ o nɛi waa nuaa choo. Miŋ kpakpala mala pilɔɔ yɔŋgoo lediiŋ, miŋ kpakpala sɔɔŋ tosaa laasi laasi, nduyɛ ŋ tɛɛmbuu nyɛsɔlaa le. Mi hei yɔŋnuŋ te o yɔŋ pɛ mi puaapiliaa ve sɔɔŋ tosaa a banda le.
Puaapiliaa lɛuve hɛli kaŋ nda nɔla ma tosa kɛɛsiaa le sinaa mɛɛ nyɛsɔlaa a wanaa malaa yeemaŋ le wali koŋ tosaa yɛ. A nɔla vɛlɛ ma suukaŋ a masaa cho o tanda koŋ niŋnda, le ma mala mi wallo tosaŋ chɔ chɔ. Lelaŋ ŋ nɔ miŋ tosa kɛɛsiaa a ba naa le chuuŋgiaŋ biyɔɔ, malaa yɔŋgoo, ɔɔ miŋ kuɛ o fondaŋ kpundɔɔ del koŋ ndo, te o yɔŋ ma dimul naa le keŋ tosa le.
A koŋ kpou, te kpundɔɔ del pɛ miŋ nɔ yeemɛi le malaa. (Hib 13:16) Kanifuule ŋ kaala Puaapiliaa naa. Lelaŋ yɛɛ naŋ nɔ yɛ miŋ tosa? Nyɛ sɔvɛ naŋ nɔ miŋ tosa wo cho piɛileŋ le wanaa kpundɔɔ komalla, vɛlɛ a wanaa cho malaa yɔŋgoo wa ni. Ŋ yɔŋgu toolula naalaŋ le wali dimiaa yooŋgu kɛndɛ cho tosaŋndo chieeŋndo balɔɔ silɔ wo. O nɛi chɔmaa Dialii Kuumbaŋ Choo Ve bɛŋgu puaapiliaa cho chilaŋ chuaa o lɛuwoŋ nda tosa kɛɛsiaa ni, le sinaa naa malaa hoo nɔ mbo yɔŋguŋ nda. Te ŋ nɔ pɛ yeemɛi le yɔŋgɔŋndo le malaa, mɛɛ ŋ peelu yauwo hoo “Local Design/Construction Volunteer Application (DC-50).”
LA TOFA VIDUEIYO HOO KPUNDƐ MƐŊMA HUNAŊ MA MAL BILASIL WO, OKOŊ MI LA MULI NYUNAA HOO:
Yɛɛ pilaŋ yɛ num kɔllo a mala Seiyaa Chɛhowa yɔŋgu teleŋ mɛŋma hunaŋ ma mal kpundɔɔ Bilasil wo a wɔsii 2020 wo?