Waŋnda Veeloo

1. Teleŋ kuɛɛ naŋ cho yɛ kandɔɔ yaula veelaalaŋ yɔŋgoo le bɔŋaŋ naa naŋndee?

¹ A chii nyɛdiaa teŋgeŋndo toosiaa le chaaŋaa numnda ɔɔ yuŋgu numndo. Nduyɛ ma chua teleŋndo tau le nyɛdiaa baakalaa hoo toosiaa. A ve a kɔllo wuye wuye le nda veeloo le? Lende koni wallo tosaŋ niŋ tau ni le toosiaa sɔɔŋ yɔŋguŋ niŋ o bɔŋaŋ naa bɛndoo wo ni. Te lɔɔlaŋ la lo pɛ layaa tuupa mi bɔŋaŋ naa kanduŋ, ŋ cho kandɔɔ waŋnda yaula veelaalaŋ kioo le hunɔɔ o bɔŋaŋndo. Yɛɛ mala yɛ niŋ naa le waŋnda veeloo a dialuŋ fulaa?

2. Yɛɛ nyindu yɛ niŋ naa miŋ yɔŋguŋ tau le waŋnda yaulaŋ ndaŋ kioo?

² Yiyaŋndo a tɔnɔla naŋ sɔla o bɔŋaŋnda naala bɛndaŋndo nyindu naa ni miŋ yɔŋguŋ le waŋnda veeloo. (Ais. 65:13, 14) Ŋ kɛsiŋ o kɔl maa veeloo waŋnda wɔsi o wɔsi le bɔŋaŋnda naalaŋ huŋ a fulamakɔɔli kɛndɔɔ. (Tofa kɔfoo “O Nɔ Fulamakɔɔlilaŋ.”) Wanaa naŋ cho veelu le bɔŋaŋ naa bɛndoo wo, apum cho hunɔɔ. O yɔŋ bɛɛ ma hiŋ kpou le, yɔŋgɔŋ naa le nda veeloo a dialuŋfulaa huŋ a saŋgalaa o Chɛhowa lo nduyɛ miŋ wa kɛndɛi nduɛi tolɔɔ kɔɔli.—Sam 145:3, 7; Sɔɔŋ. 22:17

3. Vɛɛ naŋ ke yɛ niŋ waŋnda yaula veelaalaŋ ndaŋ?

³ Bɛnduaa kundaa o kundalaŋ niŋ nɔ ni ma kɛɛsiaa mɛɛ kundaa yɔŋgu niŋ waŋnda yaula veelaalaŋ ndaŋ o tanda ndaa niŋ yɛ. A nɔ ma kɛɛsiaa te o bɛnda pɛ le ma yɔŋgu laŋ ba o ba fee o wali pollo niŋ, ɔɔ ma mɛi o dio waŋndo te a komal ndu o bɛɛ le. Te o bɛnda pɛ o lɔɔlaŋ mɛɛlulaŋ, ŋ yɔŋgu Bandu Mɛŋgɛlaa a “Tiondoo!” a yau veelaa latulu. Te boondii veelɛi keŋ hiou pɛ, ŋ wa niŋ bɔɔ a nyaale le mɛɛ naŋ yɔŋguŋ le waŋnda veeloo a dialuŋfulaa mi wanaa bɔɔbɔɔ huŋ miŋ sɔla pɛɛku sɔvɛɔ Chɛhowa o ba yɛ.

O Nɔ Fulamakɔɔlilaŋ

O cho niŋ suɛi wɔsila bɔɔbɔɔ, ndepilɛnɔ pilɛ wa o wali pollo niŋ mbo wa waŋnda yaula veelaalaŋ kioo le bɔŋaŋ naa bɛndoo. O wa buulaŋndo te fulamakɔɔli kɛndɛ wa niŋ pɛ. Mbo nyunaŋ aa, ‘Baa waŋnda chɛl niŋ pa ma hiŋ o bɔŋaŋ naa?’ O Ndaamaa choo idiiyo paale bɔŋaŋndo, mbo cha laŋunɔ pilɛ fula o piɛile cheleŋ niŋndo ichali ndu ikɛi. Mi ndepilɛnɔɔ kandu baltaŋ a ndu. Mi ndepilɛnɔɔ sina maa yau veelaa laŋunɔɔ hoo sɔla ni mbo huŋ o bɔŋaŋndo. Ndoo nɔ nyunalaŋ tau nduyɛ mi ndepilɛnɔɔ hoo tiuba mbo muli laŋ. Mi laŋunɔɔ hoo suaa a mɛɛ o wa bɔŋaŋndo tueiyɔɔ yeela yɛ nduyɛ a mɛɛ chuɛinɔŋ wanaa hiŋ o bɔŋaŋndo wa vɛlɛ a kaa nda kɛndɔɔ pilaŋ ndu kɔllo yɛ. O paale pilɛ le leŋ choo, mi ndepilɛnɔɔ hoo kandu vɛlɛ baltaŋ a pɔnɔɔ a lanɔɔ wa ndu ichali ikɛiya. Nda bɛɛ yau veelaa le bɔŋaŋ naa bɛndoo nda sɔla ni ma huŋ o mɔmbillo niŋ. Nda bɛɛ wa bɔŋaŋndo tueiyɔɔ yeela nduyɛ ma kɛɛsiaa le ma hiŋ vɛlɛ o Kuɛɛndoo choo. Mi ndepilɛnɔɔ hoo sina niko kɛsɛ maa yaula veelaala naŋ ke waŋnda laŋ la cho bɔɔ nyɛ sɔvɛ.
O bɔŋaŋ bɛndu pilɛ laŋga hiou wo, mi pɔnɔɔ a lanɔɔ a cho o kɔɔfale lɔɔlɔɔleŋ niŋnda kandu baltaŋ a pɔnɔɔ a lanɔɔ cheleŋ chuu nda okɔɔ wa. Mi pɔnɔɔ a lanɔɔ chuu nda haa okɔɔ wa dimi maa bɔŋaŋ nda tasoo wa koŋ ni. Mi kɔɔfaa haa nyuna nda aa, “Nɛɛ veelu yɛ nya?” Ma muli aa, “Paale pilɛ mɛɛ naŋ hiŋ o bɛɛ, miŋ saaluŋ yau veelaa o dio naa bɛŋgu.” Ma nua o yau veelaa hoo niŋ okoŋ, ma poonyiaa amakɔɔ naa fondaa cho le poonyiaa wa. Mi wanaa cheleŋaa hiŋ o bɔŋaŋndo wa ke nda nyɛdiaa le dioo a teleŋ pɛŋgi pɔmbɔɔ. Ma tuɛi bɔŋaŋndo yeela tau okoŋ ma tosa pɛŋ kɛɛsiaa le ma miiŋgu vɛlɛ diimandɔɔ. Mi kɛɛsiaa tosaŋ le mi waŋndo wa kɔlaŋ o nda lo le yeemɛi ndɛi chɔɔloo.