Yɛɛ Cho yɛ Yooŋgu Kɛndɔɔ?

1. Yooŋgu kɛndɛ kuɛɛ chɛŋ yɛ o Mɛlɛka lo?

Mɛlɛka hɛnaŋ mi waŋchieeya tuei yoomoo yeela o lɛŋndeŋ choo. Mɛlɛka toosiaa nyɛ o nyɛ fee o lɛŋndeŋ choo ni, kanifuule, o kaala waŋchieeya. Mɛlɛka cho suŋ suŋ hunɔɔ chieeŋndo hoo toosiaa nyɛkɛndɛi le waŋchieeya. O cho nda hunɔɔ soli o nyɛpalaa niŋ.​—Nuawɔ Chɛluimaya 29:​11.

Masaa chieeŋnda kinɛi, opilɛ bɛɛ nɔla wɔ le nyɛpalaa, naalaŋ, vɛlɛ a piɔmndo chiiyo o chieeŋndo hoo choo le. Kɛ yooŋgu kɛndɔɔ cho hoo ni maa, Mɛlɛka cho hunɔɔ a masale ndɔleŋ o lɛŋndeŋ choo. Okoŋ mbo faŋa masaa chieeŋnda. Wanaa cho wa o masale Mɛlɛkaleŋ bɛŋgu wa sɔla niŋ nyaaloo vɛlɛ a kɛndiaa kɛndɔɔ.​—Nuawɔ Aisaya 25:8; 33:24; Daaniɛɛ 2:​44.

2. Le yɛɛ o bɛnda yɛ miŋ pɛɛku a yooŋgu kɛndɔɔ okɔɔ?

Te Mɛlɛka huŋ faŋa pɛ wanaa yɔŋ wɔɔŋnda o lɛŋndeŋ choo, nyɛpalaa ve lɛ niŋ te. (Sɛfanaya 2:3) Lɔɔ kuɛɛ hei cho yɛ yɔŋnɔŋ? Mi Baabuiyo suaa paandu pa a sɔɔŋ cho hau waŋchieeya kindilaa woŋ okɔɔ. Sɔɔŋ cho hau yɔŋnɔŋndo woŋ chɔm maa teleŋndo lo lɛ o bɔɔ le mi Mɛlɛka huŋ faŋa wanaa yɔŋ wɔɔŋnda.​—Nuawɔ Timoti Diiŋ Ndɔɔ 3:​1-5.

3. Yɛɛ naŋ nɔ yɛ miŋ tosa?

Ŋ nɔ miŋ pɛɛku a Mɛlɛka okɔɔ o Baabuiyo niŋ. Baabuiyo cho ko mɛɛ finya kaalaa yɔŋ chuauwaa nduaa yauwo yɛ. O chɔm naa mɛɛ naŋ tuɛi yoomu naa yeela suŋ suŋ yɛ. Nduyɛ, o chɔm vɛlɛ naa nyɛ naŋ nɔ miŋ tosa le yoomu fafɛɛŋndo sɔlaa o lɛŋndeŋ choo wo. A tonya, apum yeema num le ma pɛɛku Baabuiyo le. Kɛ teleŋ kɛndɔɔ cho hoo ni le Baabuiyo pɛɛkoo. Lelaŋ, chɛl mi wana o wana kɛɛlu num Baabuiyo pɛɛku le.​—Nuawɔ Pulɔwaa 29:⁠25; Sɔɔŋ Chɔɔmaŋndoŋ 14:6, 7.