Yɛɛ Naŋ Saaluŋ yɛ o Tɛɛŋgii Nɛi Niŋ?

Mi Chiisu Kiliti dimul buɛiyaa nduaa aa, “nyɛ wawoŋ nya nɔ wo o nɔ le diondɔɔ. Koŋ tosa ni, te waŋnda che pɛ sɔɔŋ kɛndɛŋ nya tosa woŋ, a saŋgala Mɛlɛka Finya nya o cho o fondaŋ ndɔɔ wo.” (Maatiu 5:16) Le keŋ tosaa, ŋ cho nyɛm mapuuloŋ waalioo kpeku soliŋndo nyɛkɛndɛi, mɛɛ Intanɛtiyo cho naa yɛ. Tɛɛŋgii nɛi, jw.org, cho tɛɛŋgii kpeekpei Seiyaa Chɛhowaa ni. O ndi choo waŋnda sɔla yooŋgulaŋ a naa okɔɔ ni, taama taama laalaŋnda naalaŋ vɛlɛ a walta naŋ tosalaŋ. Yooŋgula yɛɛ naŋ saaluŋ yɛ o tɛɛŋgii nɛi choo?

Mulila Baabuiyo a nyuuniaalaŋ lapum okɔɔ. A saaluŋ mulilaŋ le nyunala sɔwɛlaŋ lapum, la waŋnda nyuuniaa haulaŋ. Le tamaseliiyo yau pɔmbɔɔ hoo, Baa nyɛpalaa chuu niŋ pa? a Baa waŋvilɛiya miiŋgu lɛ niŋ pa yoomu? la cho o tɛɛŋgii nɛi hiouwɔɔ o sɔɔŋ maŋga­laŋ niŋ 600. A saaluŋ vɛlɛ New World Translation hiouwɔɔ o sɔɔŋ maŋgalaŋ niŋ 130. A saaluŋ vɛlɛ yaula cheleŋ la mala num le Baabuiyo pɛɛkoo laŋ o sɔɔŋ maŋgalaa bɔɔbɔɔ niŋ. Yaulaŋ ndaŋ la cho ni, Yɛɛ Kpeekpei Baabuiyo Pɛɛku Yɛ? vɛlɛ a la sɛnɛila naŋ sɔla ipaŋgu o ipaŋgu laŋ, Bandu Mɛŋgɛlaa a “Tiondoo!” Yaula cho laŋ o Itanɛtiiyo choo laŋ, a nua, a yaŋ ndaŋ nilaŋ. Te koŋ te a hivi laŋ o kasɛtiiyo choo le nilaŋ yaŋɔɔ. Lapum yɛ, la cho o nyɛ nda veelu o puuluei niŋndo aa MP3, PDF te koŋ te EPUB. Ndu cho ni, yauwo chɔɔ a fotueila ndɔlaŋ nyɛkɛndɛi. A tosa vɛlɛ mi maasii soli poonyiaa wo solul num pei layau ve hei itiŋ le ma mala wanaa nɔ yeemɛiya o sɔɔŋ ndaŋ maŋgalaŋ niŋ. Ŋ nɔ vɛlɛ kasɛtiila vidueiyo la hɔbɛi o sɔɔŋ maŋgalaŋ bobuaa niŋ. Diomnda Baabui nda veelu o tuulaa niŋndo, sɔɔŋ Baabui cho ŋtuulaa woŋ, vɛlɛ a nyɛchaa bɛɛ, a tiu ba ma hivi laŋ o kasɛtiiyo choo. Okoŋ, te a sɔla pɛ fondaŋ, a chal o numndo bɛɛ ma yaŋ ndaŋ nilaŋ.

Yooŋgula tonya laŋ a Seiyaa Chɛhowaa okɔɔ. A tiuba ma saaluŋ vɛlɛ yooŋgula sɛnɛilaŋ vɛlɛ a vidueilaŋ a wali Seiyaa Chɛhowaa okɔɔ le chieeŋndo kpede. A cha vɛlɛ sɔɔŋ cho Seiyaa Chɛhowaa paaliaŋndo woŋ, vɛlɛ a mɛɛ nda cho malaa yɔŋgoo yɛ. A tiuba ma sina pɔɔ a bɔŋaŋ bɛndu naŋ nɔ le biyɔɔ wo okɔɔ, nduyɛ a nɔla vɛlɛ ma sɔla yooŋgoo a lɛuwuŋ Seiyaa Chɛhowaa okɔɔ.

O hei tosaa niŋ naŋ cho chɔmndo ni maa ŋ cho kɔlaŋ a nyɛ wawoŋ tonyaa dindioo ba o ba fee o chieeŋndo choo. Waŋnda o lɛŋii kɛ kɛ fee niŋ, kɔ bii a Aŋtatika, cho niŋ tɔnɔɔ sɔlaa. Ŋ cho piɛileŋ maa “Yooŋgu chɛŋ hoo o Masanɔɔ Mɛlɛka lo wo o keleŋa tiuba o ba fee” o chieeŋndo choo, le mi Mɛlɛka sɔla saŋgalaa.—Tɛsaloniaŋ Diiŋ Ndɔɔ 3:1.

• Vɛɛ jw.org cho yɛ hau wanaa bɔɔbɔɔ malaa le tonya Baabuiyo pɛɛkoo?

• Yɛɛnɛ ŋ yeema yɛ ma nuuviaa o tɛɛŋgii nɛi hei niŋ?