ဧ့ၤဘြံၤ

၄ အဃိ တၢ်အၢၣ်လီၤလၢ ပှၤကနုာ်လီၤဘၣ်လၢ အတၢ်အိၣ်ဘှံးအပူၤန့ၣ် အိၣ်ဒံးဝဲအဃိ မ်ပပလီၢ်ပသး ဒ်သိးပသု တကဲထီၣ်ပှၤလၢ အတကြၢးဒီး တၢ်အၢၣ်လီၤအံၤ နီတဂၤတဂ့ၤအဂီၢ်န့ၣ်တက့ၢ်. ၂ ပဝဲစ့ၢ်ကီး ပနၢ်ဟူဘၣ် တၢ်သးခုကစီၣ် ဒ်အဝဲသ့ၣ် နၢ်ဟူဘၣ်ဝဲအသိးလီၤ. ဘၣ်ဆၣ် မ့ၢ်လၢ အဝဲသ့ၣ်တအိၣ်ဒီး တၢ်နာ်တမံၤဃီဒီး ပှၤလၢ အဒိကနၣ်တၢ်တဖၣ်ဘၣ်အဃိ တၢ်လၢအဝဲသ့ၣ် နၢ်ဟူဘၣ်ဝဲတဖၣ်န့ၣ် တကဲဘျုးလၢ အဝဲသ့ၣ်အဂီၢ်ဘၣ်. ၃ ပဝဲလၢ အစူၢ်က့ၤနာ်က့ၤတၢ်တဖၣ်န့ၣ် ပနုာ်လီၤဘၣ်လၢ အတၢ်အိၣ်ဘှံးအပူၤလီၤ. ပသ့ၣ်ညါဒ်အံၤ ခီဖျိလၢ အဝဲတဲဝဲလၢ “အဃိ လၢတၢ်သးဒိၣ်ထီၣ်အပူၤ ယအၢၣ်လီၤလၢ ‘အဝဲသ့ၣ် တနုာ်လီၤဘၣ်လၢ ယတၢ်အိၣ်ဘှံးအပူၤဘၣ်.’” ဒီးအတၢ်မၤတဖၣ်ဝံၤဝဲ တချုးပှၤဟီၣ်ခိၣ်ဖိ အိၣ်ဖျဲၣ်ထီၣ်လၢ ဟီၣ်ခိၣ်ချၢဒံးဘၣ်* သနာ်က့ အဝဲတဲဝဲဒ်န့ၣ်လီၤ. ၄ ဒီးဘၣ်ဃးဒီး မုၢ်နွံနံၤတနံၤန့ၣ် တၢ်ကွဲးအသး အိၣ်ဝဲတတီၤလၢ အဝဲတဲဝဲလၢ “ဒီးကစၢ်ယွၤ အိၣ်ဘှံးဝဲလၢ အတၢ်မၤခဲလၢာ် လၢမုၢ်နွံနံၤတနံၤန့ၣ်လီၤ.” ၅ ဒီးတဲကဒီးဝဲလၢ “အဝဲသ့ၣ် တနုာ်လီၤဘၣ်လၢ ယတၢ်အိၣ်ဘှံးအပူၤဘၣ်.”

၆ အဃိန့ၣ် ပှၤလၢအဘၣ် တၢ်စံၣ်တဲၤတဲလီၤဆိအီၤလၢ တၢ်သးခုကစီၣ်န့ၣ် မ့ၢ်လၢအဝဲသ့ၣ် အတၢ်ဒိကနၣ် တအိၣ်ဘၣ်အဃိ အဝဲသ့ၣ် တနုာ်လီၤဘၣ်လၢ အတၢ်အိၣ်ဘှံးအပူၤဘၣ်. ဘၣ်ဆၣ် တၢ်ခွဲးတၢ်ယာ်အိၣ်ဒံးလၢ ပှၤတနီၤန့ၣ် ကနုာ်လီၤဘၣ်လၢ အတၢ်အိၣ်ဘှံးအပူၤလီၤ. ၇ လၢတၢ်န့ၣ်အဃိ ဖဲတၢ်ဆၢကတီၢ် ပူၤကွံာ်ဖးယံာ် ဝံၤအလီၢ်ခံ ဒ်တၢ်ပာ်ဖျါလၢထးအသိး ကစၢ်ယွၤတဲဝဲလၢ စီၤဒၤဝံး အထါစံးထီၣ်ပတြၢၤအပူၤလၢ “မုၢ်တနံၤအံၤ သုမ့ၢ်ဒိကနၣ် ယကလုၢ်န့ၣ် တဘၣ်မၤကိၤ သုခိၣ်တဂ့ၤ.” အဃိန့ၣ် အဝဲပာ်ပနီၣ်ကဒီး မုၢ်နံၤလီၤဆီတနံၤ ခီဖျိလၢ အသူတၢ်ကတိၤလၢအမ့ၢ် “မုၢ်တနံၤအံၤ” န့ၣ်လီၤ. ၈ စီၤယိၤၡူ ဆှၢနုာ်အဝဲသ့ၣ်လၢ တၢ်အိၣ်ဘှံးအလီၢ် မ့ၢ်ဝံၤလံန့ၣ် လၢခံ တမ့ၢ်လၢ ကစၢ်ယွၤကတဲဝဲ ဘၣ်ဃးဒီး မုၢ်နံၤအဂၤတနံၤ အဂ့ၢ်လၢၤဘၣ်. ၉ အဃိ လၢကစၢ်ယွၤ အပှၤဂီၢ်မုၢ်တဖၣ်အဂီၢ်န့ၣ် မုၢ်အိၣ်ဘှံးနံၤ အိၣ်ဒံးတခါ, ၁၀ မ့ၢ်လၢ ပှၤလၢ အလဲၤနုာ်လီၤလၢ ကစၢ်ယွၤ အတၢ်အိၣ်ဘှံးအပူၤန့ၣ် အဝဲအိၣ်ဘှံးစ့ၢ်ကီးလၢ အနီၢ်ကစၢ်အတၢ်မၤ ဒ်ကစၢ်ယွၤ အိၣ်ဘှံးလၢ အနီၢ်ကစၢ် အတၢ်မၤအသိးန့ၣ်လီၤ.

၁၁ အဃိ ဒ်သိး ပှၤသုတလီၤဃံၢ် ဒီးကွၢ်လိမၤဒိးပှၤလၢ အတၢ်ဒိကနၣ်တအိၣ်ဘၣ်တဖၣ် အဒိအတဲာ် နီတဂၤတဂ့ၤအဂီၢ် မ်ပဝဲသ့ၣ်တဖၣ် ဂုာ်ကျဲးစၢးလၢ အဂ့ၤကတၢၢ် ဒ်သိးပကလဲၤနုာ်လီၤဘၣ်လၢ တၢ်အိၣ်ဘှံးအဝဲန့ၣ် အပူၤတက့ၢ်. ၁၂ ကစၢ်ယွၤ အကလုၢ်ကထါန့ၣ်မူဝဲ ဒီးအိၣ်ဒီးအစိကမီၤ ဒီးအကနၣ်အ့ၣ်န့ၢ် ကယဲၢ်နးလၢအကနၣ် အိၣ်ခံကပၤလၢာ်လီၤ. ဒီးအဆဲးဖျိတၢ် ပၢၢ်တုၤလၢအနီၤဖး ပတၢ်အိၣ်ဖျါလၢခိ ဒီးတၢ်အိၣ်လၢ ပသးပူၤနီၢ်ကီၢ်, တၢ်အကမဲာ် ဒီးတၢ်ဃံအကံၢ် ဒီးအပာ်ဖျါထီၣ် ပတၢ်ဆိကမိၣ်တဖၣ် ဒီးတၢ်လၢပလီကီအီၤ လၢပသးပူၤန့ၣ်လီၤ. ၁၃ ဒီးလၢကစၢ်ယွၤ အမဲာ်ညါန့ၣ် တၢ်ဘၣ်တ့လၢ အအိၣ်ခူသူၣ်အသး တအိၣ်နီတမံၤဘၣ်. အဃိ တၢ်ခဲလၢာ်န့ၣ် အိၣ်ဖျါ ဒီးအိၣ်ပျီပျီလၢ ပှၤလၢ ပကဘၣ်ဟ့ၣ် တၢ်စံးဆၢ လၢအအိၣ်တဂၤန့ၣ် အမဲာ်ညါလီၤ.

၁၄ ဒီးမ့ၢ်လၢပအိၣ်ဒီး ပှၤလုၢ်တၢ်ခိၣ် အဒိၣ်ကတၢၢ် လီၤဆီတဂၤ လၢအမ့ၢ် ကစၢ်ယွၤအဖိခွါ ယ့ၣ်ၡူးလၢ အလဲၤနုာ်လၢ မူခိၣ်အဃိ မ်ပဆဲးအၢၣ်လီၤအီၤလၢ ပှၤဂၤအမဲာ်ညါတက့ၢ်. ၁၅ ပအိၣ်ဒီး ပှၤလုၢ်တၢ်ခိၣ် အဒိၣ်ကတၢၢ်လၢ အဒိသူၣ်ဒိသး ပတၢ်ဂံၢ်စၢ်ဘါစၢ်တဖၣ် တသ့ဘၣ်န့ၣ် တမ့ၢ်ဘၣ်. မ့မ့ၢ် ပအိၣ်ဒီး ပှၤလုၢ်တၢ်ခိၣ် အဒိၣ်ကတၢၢ်လၢ အဘၣ်တၢ်မၤကွၢ်အီၤလၢ ကျဲကိးဘိဒဲး ဒ်ပဝဲဒၣ်အသိး ဘၣ်ဆၣ် အတၢ်ဒဲးဘးတအိၣ်ဘၣ်. ၁၆ အဃိ မ်ပသုးဃီၤပသးဆူ တၢ်သးကညီၤ ဒိၣ်ဒိၣ်မုၢ်မုၢ် အလီၢ်ပစိာ်အအိၣ် ဒီးဃ့တၢ်လၢ တၢ်သးဒူအပူၤပျီပျီ ဒ်သိးပကဒိးန့ၢ်ဘၣ် တၢ်သူၣ်အိၣ်သးအိၣ် ဒီးတၢ်သးကညီၤ ဒိၣ်ဒိၣ်မုၢ်မုၢ် ဖဲပလိၣ်ဘၣ် တၢ်မၤစၢၤ အဆၢကတီၢ်န့ၣ်တက့ၢ်.