ဧ့ၤဘြံၤ

၅ ပှၤလုၢ်တၢ်ခိၣ် အဒိၣ်ကတၢၢ် ကိးဂၤဒဲးန့ၣ် ဘၣ်တၢ်ဟံးန့ၢ်အီၤလၢ ပှၤဟီၣ်ခိၣ်ဖိအကျါ ဒီးဘၣ်တၢ်ပာ်ထီၣ်အီၤလၢ အဝဲသ့ၣ်အခၢၣ်စး ဘၣ်ဃးဒီး တၢ်လၢအဘၣ်ထွဲဒီး တၢ်ဘူၣ်ထီၣ်ဘါထီၣ် ကစၢ်ယွၤ ဒ်သိး အကလုၢ်ထီၣ်တၢ်ဟ့ၣ် ဒီးတၢ်လုၢ်တၢ်ပာ်တဖၣ်လၢ တၢ်ဒဲးဘးအဂီၢ်လီၤ. ၂ ဒီးပှၤလၢ အတသ့ၣ်ညါဝဲအဃိ မၤဘၣ်ဝဲ တၢ်ကမၣ်န့ၣ် အဝဲရ့ဝဲလၢ တၢ်သးကညီၤအပူၤသ့ ခီဖျိလၢ အနီၢ်ကစၢ်စ့ၢ်ကီး အိၣ်ဒီးတၢ်ဂံၢ်စၢ်ဘါစၢ်တဖၣ် အဃိလီၤ. ၃ မ့ၢ်လၢအအိၣ်ဒီး တၢ်ဂံၢ်စၢ်ဘါစၢ်တဖၣ်အဃိ အဝဲကဘၣ် လုၢ်ထီၣ်တၢ်လၢ အနီၢ်ကစၢ် အတၢ်ဒဲးဘးအဂီၢ် ဒ်အလုၢ်ထီၣ်န့ၢ်တၢ်လၢ ပှၤဂီၢ်မုၢ်တဖၣ် အတၢ်ဒဲးဘး အဂီၢ်အသိးလီၤ.

၄ ပှၤတဂၤပာ်ထီၣ် အနီၢ်ကစၢ်လၢ ပှၤလုၢ်တၢ်ခိၣ် အဒိၣ်ကတၢၢ်န့ၣ် တသ့ဘၣ်. ကစၢ်ယွၤ ကဘၣ်ပာ်ထီၣ်အီၤ ဒ်အပာ်ထီၣ် စီၤအၤဟရိၣ် အသိးန့ၣ်လီၤ. ၅ ဒ်န့ၣ်အသိး ခရံာ်တဒုးကဲထီၣ် အနီၢ်ကစၢ်လၢ ပှၤလုၢ်တၢ်ခိၣ် အဒိၣ်ကတၢၢ်ဘၣ် အဃိ အဝဲတမၤလၤကပီၤ အနီၢ်ကစၢ်ဘၣ်. မ့မ့ၢ် အဝဲဘၣ်တၢ်မၤလၤကပီၤအီၤ ခီဖျိကစၢ်ယွၤလၢ အတဲအီၤလၢ “နမ့ၢ်ယဖိခွါ ဒီးတနံၤညါအံၤ ယကဲထီၣ်နပၢ်လံ.” ၆ ဒီးလၢတၢ်ကွဲးအသး အဂၤတတီၤန့ၣ် အဝဲတဲဝဲလၢ “နမ့ၢ်ပှၤလုၢ်တၢ်ဒိၣ် ဒ်စီၤမၤလကံစဒ့းအသိး လီၤထူလီၤယိာ်န့ၣ်လီၤ.”

၇ ဖဲခရံာ်အိၣ်မူလၢ ဟီၣ်ခိၣ်ချၢ အဆၢကတီၢ်န့ၣ် အဝဲဟ့ၣ်လုၢ်ထီၣ် တၢ်ဃ့ကညးတဖၣ် ဒီးတၢ်ဃ့တဖၣ်လၢ အကလုၢ်ဖးဒိၣ် အိၣ်ဒီးမဲာ်ထံမဲာ်နိဆူ ကစၢ်ယွၤလၢ အမၤပူၤဖျဲးထီၣ်အီၤလၢ တၢ်သံသ့တဂၤ အအိၣ်န့ၣ်လီၤ. ဒီးကစၢ်ယွၤ ဒိကနၣ်အီၤ မ့ၢ်လၢ အပျံၤယွၤအဃိလီၤ. ၈ အဝဲမ့ၢ် ဖိခွါဘၣ်ဆၣ် အဝဲမၤလိန့ၢ်တၢ်ဒိကနၣ် ခီဖျိတၢ်လၢ အတူၢ်ဘၣ်ဝဲတဖၣ် အဃိလီၤ. ၉ ဒီးအဝဲဘၣ် တၢ်မၤလၢထီၣ်ပှဲၤထီၣ်အီၤ ဝံၤအလီၢ်ခံ တၢ်ဟ့ၣ်လီၤအီၤမူဒါ ဒ်သိးပှၤလၢ အဒိကနၣ် အကလုၢ်ကိးဂၤဒဲးန့ၣ် ဒိးန့ၢ်ဘၣ် တၢ်အုၣ်က့ၤခီၣ်က့ၤ ကသ့အဂီၢ်, ၁၀ မ့ၢ်လၢ ကစၢ်ယွၤ ပာ်ထီၣ်အီၤလၢ ပှၤလုၢ်တၢ်ခိၣ် အဒိၣ်ကတၢၢ် ဒ်စီၤမၤလကံစဒ့း အသိးအဃိလီၤ.

၁၁ တၢ်လၢပကတဲဘၣ်ဃးဒီး အဝဲအဂ့ၢ်န့ၣ် အိၣ်ဝဲဒီဒူၣ်လီၤ. ဘၣ်ဆၣ် မ့ၢ်လၢသုနၢ်ဃၢထီၣ်လံအဃိ ပကတဲနၢ်ပၢၢ်သုအဂီၢ် ကီဝဲလီၤ. ၁၂ နီၢ်ကီၢ်န့ၣ် ဆၢကတီၢ်ခဲအံၤ သုကြၢးကဲထီၣ် ပှၤလၢအသိၣ်လိတၢ်လံ. ဘၣ်ဆၣ် လၢတၢ်န့ၣ်အလီၢ် ပှၤကဘၣ်သိၣ်လိက့ၤသု ကစၢ်ယွၤ အကလုၢ်ကထါ အခီၣ်ထံးခီၣ်ဘိတဖၣ် စးထီၣ်လၢအခီၣ်ထံး ဒီးသုကဲထီၣ်ကဒါက့ၤပှၤလၢ အလိၣ်ဘၣ်တၢ်နုၢ်ထံ ဒီးတမ့ၢ်တၢ်အီၣ် အသံးအကာ်ဘၣ်. ၁၃ ပှၤလၢ အဆဲးအီ တၢ်နုၢ်ထံကိးဂၤဒဲးန့ၣ် မ့ၢ်ဒံးဖိသၣ်တဂၤ အဃိ အတသ့ၣ်ညါ ကစၢ်ယွၤ အကလုၢ်ကထါ လၢအတီအလိၤဒံးဘၣ်. ၁၄ ဘၣ်ဆၣ် တၢ်အီၣ်အသံးအကာ်န့ၣ် မ့ၢ်ဝဲလၢပှၤလၢ အဒိၣ်တုာ်ခိၣ်ပှဲၤတဖၣ်အဂီၢ်လီၤ. အဝဲသ့ၣ်န့ၣ် မ့ၢ်ပှၤလၢ အမၤလိသ့ထီၣ်အသးလၢ အကဆိကမိၣ်ထံတၢ် ဒ်သိးကပဲာ်ထံနီၤဖး တၢ်ဂ့ၤဒီးတၢ်အၢအဆၢန့ၣ်လီၤ.